[gfmurmur9566] 交代一下背景，我今年21歲，前男友22歲，一齊咗四年半，喺外國嘅中學認識，識咗無耐就一齊咗，見證住大家中學畢業，一齊考入理想嘅大學。 我哋一直都好甜蜜，幾年嚟陪對方渡過好多難關，大家翻香港搵part time嘅時候，又會去接對方收工咁。雖然間唔中會嘈下交，但一直視對方為終身伴侶，有咩大家一齊拆掂佢，又會傾下我哋嘅未來，上年6月仲開始咗同居生活。 同居生活其實一直都過得幾開心，我一直將佢照顧得好好，家頭細務全部由我包辦。大家有大家嘅空間，佢有佢打機，我有我煲劇，但佢打完一舖就會過嚟望下我，睇下我做緊咩，關心下我咁。 直到今年二月頭，佢打機識咗班大陸人，當中有五個男仔一個女仔係玩得比較熟。由嗰陣時開始佢部電話就變咗個禁忌，拎佢電話或者望一望佢啲打機gp都會成個人起晒鋼。而佢打機亦打到好無節制，成日玩到唔知時間，晏晝玩到夜晚九點幾十點先醒起我哋未食晚飯，然後先過嚟問我要食咩。雖然一齊住，但每日講嘅說話都幾乎唔超過十句。嗰陣時開始，我哋多咗拗撬，我發脾氣或者喊佢都係冷暴力處理，等我喊完佢就行過嚟扮無事，而我成日都會衰心軟原諒佢。然後就繼續重複哩樣嘢，不停打機，鬧交，不停打機，鬧交。就算我喺佢面前黑唒面，佢都係眼尾望咗我一眼然後繼續玩。 去到三月頭，大家都頂唔順，分咗手，自己認真諗咗好耐，認為問題只要大家好好溝通，係可以解決嘅，四年幾嘅感情，實在唔想咁輕易放棄。所以我好卑微咁求過佢好多次，跪喺度求佢，喊到崩潰喊到嘔咁求佢，但佢都係無理過我。我問佢點解，佢話唔愛我了，問佢係咪鐘意咗嗰個大陸女人，佢又話無。 就係咁我哋分開咗，因為喺外國，臨時搵唔到地方搬，分咗手我哋都仲係住喺同一屋簷下。我成日都忍唔住望佢，忍唔住想關心佢照顧佢。以為我哋都仲有一絲可能可以一齊翻。直到前幾日，佢行開咗而電腦無熄，我先發現原來佢一早已經精神出軌。佢由二月開始除咗不停打機，就係睇嗰個大陸女人打機嘅直播。佢電腦開住直播室嘅編號，我自己翻房用電腦一search，就發現佢一早喺直播室課咗好多金比嗰條大陸女。因為有課金排行榜，加上條大陸女有post人哋課金比佢嘅相出嚟。其中一個post就係2月14情人節我ex課重金比佢又示愛嘅screenshot。可笑嘅係當時我哋仲係拍緊拖，係我哋一齊嘅第五個情人節，好驚喜哋佢今年竟然買咗束花比我，嗰陣嘅我真係覺得好幸福，以為我哋會一直咁sweet落去。但原來佢現實中送花比女朋友都不忘上網課重金比自己個大陸新歡。 今日又發現原來佢同個大陸女人已經一齊咗，佢電腦開住wechat，見到佢哋嘅對話要幾sweet有幾sweet。我望到嘅時候都真係幾錯愕，綜合唒所有嘢先知佢一早已經背叛咗我。可笑嘅係條大陸女已經成二十七二十八歲，唔洗翻工日日打機開直播姣啲課金爸爸，其實諗下都知係啲咩人。佢哋素未謀面，識咗先個幾月就唔要拍咗拖四年幾嘅女朋友，同佢搞網戀。 值得一提嘅係三年前左右佢喺香港收到大陸嘅詐騙電話比人呃咗兩三萬，所以當我知道佢識咗班大陸人嘅時候叮囑過佢好多次打下機就算，唔好同佢哋有金錢瓜葛，佢次次都話知啦。但原來一早就開始咗直播室課金之路。其實但凡有少少腦嘅都知人哋只係當你atm，你無唒錢嘅時候就會搵令一個。而家嘅我只係希望佢快啲比人呃晒啲錢，而佢就要為自己嘅愚蠢埋單。 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig #香港 #情侶 #香港情侶