《之前睇一個大陸劇，個主角話一個人心胸狹窄，係因為住得太逼.....》
　
之前睇過一個大陸劇《蝸居》，個女主角話居住環境愈細，心胸愈狹窄，個人會變得斤斤計較，無量度，唔包容。其實我好認同，因為你住得愈細，要同愈多人逼，你就愈燥底。香港地，容身之所都無，人都容唔落，心胸好難好廣闊.....
　
見到葉劉訓棺材房，你係好忟，佢好似放工無野做，參加工聯會興趣班，try try 自己伸展能力有無問題，睇下自己可唔可以用縮骨功塞入個棺材咁。佢好似開心大發現，覺得好funny，話個棺材「真係啱啱好」....佢令我諗起一個畫面，長腿叔叔入面，探訪孤兒院個啲紳士，問茱迪班孤兒仔生活成點？有咩感受？..... 可以點？咪孤兒仔咁囉。
　
你就開心大發現，我哋每日都係咁過架...喺香港地做窮人，心胸好難唔狹窄...
　
●　你一早起身，就要同全家爭廁所用，好多屋企一家六七口都係得一個廁所，只要有一條友仔唔準時起身，就會令其他友都遲到。
●　然後你住30幾樓嘅公屋，朝早人人都趕返工，架lift 就好似巴士咁，每一層都停一停，啲呀媽一定撳住個lift 門，佢個衰仔仲要施施然咁行入lift。
●　去到個小巴站，條龍長過長城，有啲人仲要一早派個賓妹來做代表排小巴。
●　去到地鐵站，過海總係架架車啲人都唔肯行入啲，你一嘗試逼入去，車入面啲 人就「嘖」你。
●　去到公司樓下，又要排隊等lift，一個星期，總有一兩日你趕時間，其中一架lift 就維修。
●　去到lunch，想食個間茶記一定排n 世，落咗單又次次都遲來漏單落錯，而你趕時間都局食，因為又要再預十分鐘行返公司等lift。
●　去到呀姐請食tea 個日，你三點叫完tea，間茶記外賣起碼5點先來，等到條頸都長過fiona。
●　終於都放工，過海巴士條龍，長過海底隧道總長度。終於逼到上車，又再次逼到企喺巴士門黃線之後，然後總有個孭背囊嘅人，不停移動，佢個背囊就好似百潔布咁不停擦我塊面。
●　返到屋企樓下，又再次撞返朝早等lift 嘅街坊，於是又再次層層停。
●　終於都食完飯，一家人輪完個廁所，樓上個街坊又開始夜深時段播歌播成晚。
●　捱咗五日到weekend，打算喺條街直線行路都有難度，成日都要好似玩mario 咁，周街都係人，秒秒避開障礙物。你唔出街，屋企咁細，成屋都係人，於是又坐返喺自己張床度。
　
一個咁細嘅地方，咁多人，人人一齊逼，你點會唔心胸狹窄？點會唔秒秒都燥底？你秒秒都抑壓住自己，幾乎每秒都想下秒襲擊他人。
　
香港人西口西面？小小事都燥底？其實我哋好叻架啦，你知唔知我哋要好努力先可以只係西口西面，唔付諸武力，我哋係幾忍耐先忍得住啖氣。
　
你見隔離個c9 將啲鞋擺下擺下，又擺過我門口，你又會燥底，大家都住得咁逼，我俾你擺過來，我就無位。我都好想好心胸廣闊，唔同人斤斤計較，如果我有一萬尺花園，我都唔會咁執著，我都俾你擺架。但大家都咁逼，叫我點退讓？

有樓萬事足 播出剛剛一年，中原指數足足升左 16%。 蝸居宅急變Anthony Sir 分享 2018年 樓市部署及投資方向

Anthony Sir FB專頁
https://www.facebook.com/groups/invest.fci/

一起來幫手加字幕 Thanks Orz ▶
http://www.youtube.com/timedtext_video?v=XDTPu5bcV1Q&ref=share

訂閲我的頻道 ▶ https://www.youtube.com/c/cocogor?sub_confirmation=1