【龔成問答信箱】（Q21441-Q21460）

Q21441：

老師你好，有d關於創業同投資嘅事情想請教你。

1. 當我已經諗到我嘅生意做咩之後，應該從咩各度思考？

2. 點先可以有效宣傳自己的企業？

3. 我好想行岀第一步，但我唔係好知應該做d 咩好。

4. 如果我有個idea 但就無實行idea嘅能力，身邊有無咩人有咁嘅能力，有d咩方法？

最後想多謝老師你，我上年先開始投資，好幸運一開始接觸到老師嘅fb page 同書，認識到價值投資法，令我覺得睇年報，了解一間公司營運模式非常有趣，

因此作為投資初哥，我完全無試過炒賣，雖然而家賺嘅錢唔多，但已經感覺交小唔小學費。我定左個目標，就係希望有1日可以去交港交所敲鑼

龔成老師︰

1) 開始寫一份給自己的商業計劃書，規劃出未來發展大方向。但唔需要太仔細，只要有個大方向即可。

因為商業社會，每日變化都好大，寫得太仔細，反而會限制左自己發展。

做生意，「執行力」是關鍵位，我成日都聽到有人話：「早知我就…」、「這生意我一早想到啦，只是佢快過我」等等，這類說話。

做生意，最重要是「做」，之後先慢慢再調整。

2) 要睇你業務性質，和對應什麼客戶群。例如你做補習，你就要去多學生和家長出現的地方去宣傳。

你要「找出市場」去宣傳，不要亂用力去宣傳。

3) 你要做，就係先行出第一步。好多人就係顧慮太多，唔敢行第一步，令到自己只停留空想狀態。

其實做生意，好多時都係摸石過河，邊行邊試，有時唔需要諗太多。只要有大方向，做就可以了。

4) 你就去睇下，市場上有無類似的成功人士，去模仿他，學習他。或者，你去做或學一些，可以幫到你實踐IDEA的工作和課程。

記住，你投資方面，現時只係起步。你要一直保持學習，投資回報才會好。

期待見到在港交所敲鑼的你！

------------------------------------------------

Q21442：

老師你好，本人現有200萬流動cash, 還有其他大保份cash放左保險公司saving plan, 回報大約3.2% 但一本lock死5 to 20年。

今年年頭ipo市況好，賺到75000已經非常開心，但3 to 5月連蝕番66000,主要因為本來10萬買左 AMC升(12.8 入但13.x走左)賺到d, 但佢升到30後我50萬元反手手沽空，

1.5分鐘蝕足50000，之前又500000萬買左9959,24.25炒賣左幾轉有得賺又賣左，跟住佢跌到又買番，以為自己好醒，點知隻野跌到18已cut loss,

本人炒買股票20年，都係得果吉，可否教教本人應該怎樣？因為已經信心儘失。感激謝謝

龔成老師︰

你有「賺錢」的思維，反映你與98%的散戶想法一樣，都係停留係短炒，賺差價架模式。

短炒我見好多人都係蝕錢收場，股價中短期一定會有波動。而波動架原因可以同企業本質無關，只有長線股價才會反映企業質素，所以優質股一定要長線持有。

你見全球最賺錢架投資人巴菲特，都唔會做短炒，只會係做長線投資。所以，你要改變你投資方法，唔好再做短炒，並以長線投資優質股為目標，會對你較好。

你現時先做，就係放棄以往一直用的短炒方法。之後，再用正確的理財策略，去累積財富。

我建議你睇我架《80後百萬富翁》、《財務自由行》和《股票勝經》，當中會有一些理財和選股概念。

到你明白當中理念，才開始再計劃你投資大計，會較好。

------------------------------------------------

Q21443：

龔sir，我今年28 上年開始接觸股票 但因為咩都唔識成日都高追 一跌就好驚 輸左好多錢 依家我轉左新的一組配合持有：

9988 $228 200股
3067 $17 2000股
175 $23 1000股
6618 $174 100股
1398 $5.4 5000股

想請問我這個新組合 適合嗎？
我打算長線 唔睇股價短期波動。因為成日睇股價影響心情。

另外3067 係睇到你話潛力股可長線 我洗唔洗巴巴升返少少之後每個月加倉到3067 （因為3067指數都包括埋9988）

謝謝你龔sir
知道你平時都好忙好勤力覆大家訊息。

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，各行業或粳類別都要有。

但同一行業又不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你上述持有的，都是有質素的股票，因此可以長線進行。另外，工行（1398）是收息股類別，而你年齡應該著重增值，因此收息股未必最適合。

至於恆生科指ETF（3067），你可以久不久加注，原理同月供，長期儲貨一樣，但就唔需要改變阿里（9988）的持股情況。

但你要計算翻潛力類別比例會否過多，因為「平衡組合」是好重要的。

------------------------------------------------

Q21444：

龔sir 有d問題想請教你 我買入一隻股票後，係咪升2成就要止賺，否則跌翻會無得賺。我成日聽人講要鎖定利潤。

龔成老師：

這是坊間的做法，而你睇翻全球投資最賺錢的人，巴菲特，佢無這樣做。

我地只要買入優質股後，長線持有就得。我持有比亞迪（1211）13年，就是唔理佢，長線就得。

如果你成日望住個市，成日要「止賺」，你想想，騰訊（0700）、港交所（0388）這些升值100倍的股票，你根本就賺唔到！

------------------------------------------------

Q21445：

老師，我同我先生聯名買咗間688萬3房居屋，個名已經用咗，我打算再置業，但又要比15%稅

現在層樓買咗2年，
現在有100萬積蓄，
我個人計

我每月可以儲2萬，
請問點樣可以再置業，
用幾多年時間儲和投資？
做什麼投資比較岩？

龔成老師：

如果有需要，其實可以到律師樓搞拆名，這樣你地就可以一人一個單位。

不過，你現時的現金$100萬，再加上買了物業只是2年，其實唔需要太心急不斷投資物業。

我地理財，最重要就是建立平衡的財富組合，例如物業、優質股，同時持有。

所以，你這刻可以利用每月$2萬，儲蓄投資，並利用手上現金的部分，例如$30萬，去投資股票，先將財富增值，過幾年後先投資第2個物業，這樣會較好。

你可以定一個5年計劃，投資優質，平穩增長類股。

------------------------------------------------

Q21446：

老師，我之前買$255果時入咗美團，$46入左華虹半導體，而家咁嘅市況，你會由佢跌定止賺

龔成老師︰

首先，一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

美團點評（3690）都有質素，佢業務巨大，同時增長快，是有危有機的股票。但近期反壟斷政策，相信會對佢有一定影響。但影響有幾大，暫時無人知。

但相信只係會加強規管，而唔會係出現大改革，整體質素預期唔會大變，但增長力難免會受影響。

集團過往一直處於燒銀紙階段，至2019年才開始有少量盈利。未來是否維持，暫時都好難講，若你持股佔組合不多，可以守。

華虹半導體（1347），佢而家係部分範疇擁有技術，但並不是整個產業鏈中最重要的技術部分，所以不能定為很高質素的企業。

不過，中國政府一定會加強開發半導體技術，所以，長線發展正面，可持有。

------------------------------------------------

Q21447：

老師你好， 我是一個媽媽，有四個仔女，三個出哂身，有個讀緊大學， 近年學識左點買賣股票， 呀女推介睇你的書‘50隻優質潛力股’， 現時手上的組合是以下：

（00005）9手61.37
（09988)3手223
（02628）5手16.5
（2383）3手166.7

（02318）2手90.04
（01810）10手25.5
（00659）10手6.11

（00788）25手1.1
（3309）6手5.46
（00823）10手59.43

1.想請教一下現時組合可以嗎？ 有冇一些可以從中剔除呢？

2. （02628）本人有意想賣走，應否溝一溝下貨？

3. 最後， 我成日有個心引，見到有啲賺少少就想放， 以前銀娛就係咁$59買左， 之後賺左$7000就走左， 呀女成日叫我唔好放要長揸， 話有潛力唔怕。

但我覺得如果長揸咁有咩用，啲錢袋左入袋先係自己， 而且有時會覺得見佢升幾轉， 如果自己買賣幾轉已經可以賺幾轉。

所以想問下老師你，其實而加我係咪應該長揸本身持有的股票， 等佢跌到本身持貨嘅價位/低過先再入， 慢慢草貨呢？

龔成老師︰

1)ＴＯＭ集團（2383）業務不太好。發展多年都無乜成績，近5年生意無增長，年年虧損，投資價值不高，可沽出。

希瑪眼科（3309）有質素，業務仍發展中，有一定不確定性。你可以考慮沽少少，去平衡個風險。

阿里巴巴(9988)和小米(1810)這類潛力股，雖然有潛力和質素，但同時間，個波動性都唔細。現貨可持有，但當年年紀越大，就要慢慢減少這類潛力股的比重，令個組合唔會太波動。

至於其他股，基本上都有質素的，問題唔大，但要留意，同一隻股票佔組合的比例，最好控制在15%以下。

2) 中國人壽(2628)質素較中等，近年賺錢能力係弱左，但未至於無質素。此股不建議太大注，你可以沽出部份，換至其他較股票。

3) 你有「賺錢」的思維，反映你與98%的散戶想法一樣。

你追求實在的現金，認為要賣出賺到現金，才是賺錢，但我地最重要是講求「財富最大化」。

當一隻股票上升，例如你買入價$10，現價$15，賣出可以賺$5。

但當你套現$15後，你怎樣將這個「$15」再次增值，令你的財富增長，比留在原有股，得到更大的回報？

如果原在的股票是優質股，即是我地持有優質企業，當你一直持有這股，企業長期價值向上，就會帶動我地的財富有最大增長。

簡單來說，我地是從「財富長遠最大化」的角度去想。

可能你會問，一直不賣，啲錢永遠入唔到自己袋，即係永遠無法取出財富。

我地累積財富，會用「先增值，後現金流」作策略，前者著重增值。之後就會改變策略，將已增值了的資產，轉為現金流類別，而我地就是不斷享受資產產生的現金流。

另外，你有一個想法，係想走幾轉，賺佢波幅，都係有問題。

因為我地投資，係唔應該去估走勢。你諗住而一刻已經好貴，先沽貨，但之後回調平價再入翻。但實際上，股價是否每次一定跟你預測一樣走?

若你沽貨後，佢反而不停升，你除左錯失個升市機會，而且要可能要用更高成本，才可以買回這隻好股票，成件事係得不償失。

你試想想，如果用你的方法，在過往，港交所（0388）、騰訊（0700）在這麼多年，股價上升100倍時，你的方法能賺到多少？可能連一倍都賺唔到。你怎樣能賺到100倍，就是「唔好賣」，一直持有這些優質股。

至於，是否跌至低位再入，我地唔會用你買入價，作為入貨標準。

我地係會睇翻企業本身估值，如果當時個價格水平合理，你持貨又唔多，又有充裕資金，可以加小注。到平宜區，才加大注。

記住，永遠都係睇企業本身價值，而唔係你個買入價，買入價其實意義不大。佢應該作為你買賣，或者是否持有一隻股票的指標。

------------------------------------------------

Q21448：

买左老师五年置业果本书 中间提到黄竹坑等地区系比较有潜力的。

想请问马鞍山和钻石山房产比较 是否钻石山升值潜力会相对较高？谢谢！

龔成老師︰

鑽石山優勢在於同時擁有2個鐵路線，加上較為接近香港第二個核心商業區「九龍東」。

沙田區是新界東與市區的連接位，在整個香港的地圖上，算是一個中心點，對於較常往返內地，而又想近市區的人來說，沙田區是不錯的選擇。

近年多年屯馬線，令馬鞍山交通便利度提升，都係有利發展的原因。

但從地理位置上，鑽石山都係較接近「九龍東」和港島，整體質素，會相對馬鞍山稍稍佔優。

------------------------------------------------

Q21449：

老師，想問一下小米連續幾日不斷回購股票，對於同股不同權架構，會令小股東對企業既控制權減弱嗎？同埋佢回購主要係邊類股份

龔成老師：

會有少少影響（其實好少影響）

佢現時的回購，是回購出面市場的股票（即是小股東的）。

即是小米這間公司回購，間接會令大股東佢地的控制權增加。

但說到尾，由一開始，佢同股不同權的模式，已是大股東佢地玩晒，因此分別唔太大（因為大股東在投票權方面，一向都過半）。

------------------------------------------------

Q21450：

龔sir, 我係90後27歲男仔，想請你幫下手 指點。
我本金60萬學人買股票，今年2月尾開始輸到變50萬 。心情好難受。

過往都係以短線炒股為主。 港股美股都有買，想搵你教我慢慢追返本金，以中期或長期目標為主。

目標係30歲 有100萬 每月存款有$4000 ，主要想重新整理個投資組合，唔想經想睇到心煩又失望。 麻煩龔sir有空指點下。

美股有ARKK 打算長期持有
港股 少量短炒

龔成老師：

我20年前，都是短炒者，短炒幾年，輸足幾年，之後長線投資，就開始不斷賺錢。

其實我當時，用左幾年時間去學短炒，我當時不斷睇書、上堂學短炒，但最後都是輸，可能是我能力不足吧。

但我之後做銀行同證券行，見大部分輸錢的客，都是偏向短炒的。

當然，你問我有無人贏錢，是有的。但就我觀察，長線投資贏錢的人，比短炒的較多。

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的。

因此，我相信長線投資，是真正助我地贏錢的方法。

如果你發現自己行錯路，就唔好再向前行，行翻正確的方向。

你之後要投資優質股，長線，學「真正投資賺大錢的人」，如巴菲特學習。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你投資ARKK，長線，可以。

另外，你可以考慮投資平穩增長股+潛力股。
你可以月供或自行分注。

上述是大方向，但我這刻唔建議你投資太多，例如只動用3成以下現金，餘下等機會，反而建議你先學好投資，例如可睇《股票勝經》，之後先正式投資。

------------------------------------------------

Q21451：

龔sir～
又有問題打搞你喇
我一路想入金沙同領展
金沙set左目標買入價係 35
領展係 70

但好耐都唔到呢個位
開始接近左陣又彈返上去
我係咪諗多左？應該調返高d？
定其實可以等？

麻煩曬你成日解答我地d問題～～
同埋想同你分享下
我剛剛join左za bank
佢地做緊頭 $20 萬savings 有年利率 1%！

我擺左d錢係入面賺息 好過擺銀行
想知點解呢類虛擬銀行會做呢類咁勁嘅優惠吸客？佢地背後係為乜？

龔成老師：

領展（0823）及金沙（1928）都是有質素的股票，面對這類股，只要不是貴，都可考慮，特別是當你完全無貨，而你現金又十分足夠的時候。

如果你買入一注後，仍有現金剩，這兩股你可以現價買入第一注先，等你有基本的貨，之後再跌先買入。策略上會較好。

另外，虛擬銀行為左吸引客戶，都會利用高息，去等客戶試佢地的產品，等多d人對佢地有認識。

------------------------------------------------

Q21452：

龔成老師
我疫情時初學投資股票
根據你經常說的理念 長期持有優質股 今日終見曙光
雖然我持有的股票是小量

財富增值都是很小量
但我都好想多謝你
初學見短期波動 都會好緊張
是你啟發我 我才有信心堅持長期持有

龔成老師：

太好了！

投資是一個長期戰，你要面對好心心理壓力，但要記住，你只要買入優質股，長線，就能有回報。你只要想想，全球投資最賺錢的人是誰？是巴菲特，只要我地用的方法同佢方向一樣，就有不差的回報。

------------------------------------------------

Q21453：

龔sir 你好,自從上年第一次向你請教, 我現在主力持續買入index tracker (除2800 仲有S&P 500/ MSCI World), 因為問心知道自己冇時間/ 知識去選股。

後面2者我買左外國買accumulative 個種, 唔駛自己人手將派息再投資,好啱我D 懶人。現時同長線我都會keep 住月供index tracker, 間中先會買下個別股。

1. 03067 - 我想買入長線, 見你近來的Q&A 都話現價唔平/ 在合理價較高水平所以應該小注/月供, 想請教在大概咩價錢左右應該開始平/ 多買入?

2. 我持既股同上年一樣(只係多左小小金沙同2800), 考慮緊好唔好遲點賣出大部分收息股(銀行+地產+港燈) 轉去index tracker (等平點入), 希望加強增長力, 你會建議嗎?

3. 如賣出左收息股, 但index tracker 現價又唔平, D 現金放在銀行唔知幾耐先會等到買入時機, 你會建議用這些現金暫時放落其他野嗎? (舊年收到的股息都係只係放在o係度等)

4. 如我aim index tracker 佔持股80%, 個別股20% 會太保守嗎?

感謝你的意見, Stay safe!

龔成老師：

你的方向正確，有選股能力，當然可以憑自己實力選出高回報的股，但如果高估自己能力，反而會輸錢，因此，明白自己的實力而願意付出的時間好重要。如果不想選股，就投資指數基金，你所選的都可以長線。

利用月供，或慢慢分注買入，長期累積，是最好的方法。

1）安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

2）要睇你投資目標及風險承受能力，最重要是長期方向，如果你仍想增長，就將收息股轉其他，現時合理價都可賣，然後可轉平穩增長股及潛力股，如果無心水，就盈富（2800）及恆生科指ETF（3067）。

3）其實現時舊經濟類是合理的，因此轉盈富或其他舊經濟類股是無問題的，至於新經濟則在合理區頂，因此轉3067時就會慢慢去分注買入，部分資金可能會等跌多少少先買入。

4）如果你真的無選股能力，或無時間選股，這樣是最好的，好多人高估自己選股能力，最後出現虧損。

------------------------------------------------

Q21454：

你好。我最近睇你解答網友留言提到GX 中國電車ETF 2845, 請問GX 系列其他etf , 2826中國雲算。2820中國生科。2809中國潔能。適合長線投資ma?

同埋呢隻基金之前未聽過。市值算大ma? 穩唔穩陣ga? Thx

如果我想未來用大約50萬資金。在5,6,7月分開17注分段入做中長缐投資。請問這些ETF 算優質ma? 這樣設計可以嗎？另外加三隻股。700，388，2269

麻煩有空給我少少意見,
thx so much

龔成老師：

你上述所講的幾隻ETF，都是潛力ETF，都有長線投資價值，上述的4個主題，都是一些未來發展大方向，長遠潛力度不差，但要留意，所有這些潛力行業，在發展過程中，一定會有變化，所以，你要明白風險，同時控制注碼。

幾隻基金都穩陣的，只是價格上落一定大，買入時要明白風險，或者用月供策略會較好。

以GX中國電車（2845）來說，這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴（其實另外幾隻你上述所講的基金，都有這類情況）。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

因此，上述基金，可投資，但你要明白風險，同時，不能將所有資金都投資在潛力基金類別。你要建立一個平衡的財富組合。

你可以將$50萬，其中$20萬或以下，投資潛力基金/潛力股類別，要慢慢分注，可分1年時間去買入。

至於餘下的3隻股票，有質素，但都唔平，你可以月供，或慢慢分注買入。我會建議你同時留有一定的現金在手，當大市下跌時有資金去買入。

------------------------------------------------

Q21455：

龔sir你好啊！對上一次PM你已經兩年前，當時啱啱受你啟發開始投資股票，上年仲上埋你嘅堂

由0倉慢慢喺兩年時間建立咗一個六位數嘅組合，真係好多謝你！

其實除咗投資方面嘅知識，你經常分享嘅致富思維都影響咗我好多，自己呢兩年都睇左好多有關呢方面嘅書，一開始真係完全唔明點解[諗下]就會實現到

好懷疑，直至最近我有一個好想走出comfort zone，好想係為咗建立自己事業而做嘢，唔係為咗逗份人工，做幾多都係為公司、為老闆，我覺得自己可以走得更高更遠。

咁啱有個帶保險嘅團隊嘅朋友(亦都係我自己嘅財策師）approach我，邀請我加入，其實佢三年前都搵過我，但當時我未ready, 唔相信自己可以做sales嘅工作。

但三年過後，我嘅諗法唔同左好多，雖然都係唔認為自己係傳統觀念上做top sales果種人，但我真心覺得自己會成功，應該全力用3-5年去build up呢盤生意，建立自己嘅團隊

我亦相信我本身會計師嘅優勢可以比到客戶信心、在職媽媽呢個身份亦幫到我了解到大部分打工仔喺保障上嘅需要。

講咗咁多，都希望你能夠比小小意見：

1. 我感覺你本身都唔係果種好外向好多野講果種人（感覺錯請原諒）你一開始係點樣踏出第一步去開班教人同錄youtube?

2. 我一開始嘅計劃係part time做，始終小朋友仲細，有份正職收入會安全好多，但最近考晒牌開始training而自己都睇書睇YouTube學點樣做個好嘅銷售嘅時候發現原來真係要投入好多時間去做先會做得好

咁我本身都有儲蓄，先生亦有正職可以support，我是否應該去盡d全職去做？我好怕自己係一時衝動。

3. 仲有無d咩係我應該考慮嘅因素？(信心、家人支持、儲蓄)

真心好感激你改變左我人生、之前睇到你再分享<成功人士同普通人之間嘅差別>只係[做同唔做]，令我更加好似打咗支強心針

Thank you so much!

龔成老師：

太好了，我相信這兩年你都成長了不少，最重要是思維，相信你保持這樣「相信自己」，「大膽試」的思維，長遠會有一定的發展。

1）對，我本身是一個十分內向的人，根本不喜歡出聲，中學時老師話我是全班最不想最聲人的頭3位。

到我大個，我知道如果我要成功，要發展事業，就要改，所以我逼自己多同人講野，多做演說，現時無論拍片，上堂對過百人講野，我都無問題，所有野都是逼出來的。

你要想翻你的「大方向」，如果大方向要求你有某些技能能，你就要克服困難，做好這些事，為了完成你的大目標。

2）最好當然是全職，但就好睇你的決心，如果你決心不足，就暫時半職先。

3）如果你擔心，就留多一點儲蓄先，因為初期做，業績會有上落，這時是對你最大的心理考慮，如果你有較多的儲蓄，心理壓力會較少，較易克服不同的時期。

加油啦！我好相信好多事，我地都能做到的，只是有無勇氣去做，你現時已踏出決定性的一步，你要盡全力去做，堅持！

------------------------------------------------

Q21456：

龔成老師你好，差唔多一年前我講過想5年內(即2025年前)將手上資金提升到160萬作買樓首期之用。一年過去，我主力靠儲蓄的疊加效應，total asset 已經算有100萬！感覺2025年160萬目標好似可以超額完成！

1）現金:由$30萬升到大約$45萬 （小部分做了定期存款收息）

2）股票組合價值: 由$4萬升到$39萬（股票蝕錢中。。。）

3）另外儲蓄保險，2025年可以可以拎到20萬左右。

>> 所以total asset 已經算有100萬

本人月入$36,000，收入尚算穩定。要幫家人供樓及照顧已退休父母，現時每月可儲現金大約1萬，另外有月供股票$4500。

—$1,500煤氣 (0003)
—$3,000 盈富 (2800)

現有股票組合

—月供煤氣 (0003) @$13.7
—月供盈富 (2800) @$27
一 3738 @$29.5
- 1283 @$1.7
美股Tesla @$766

因為想買樓，所以希望可以中風險投資方法。上年經指導後加大了月供。而家想加多一隻月供股票，心水係恆基（0012）、中銀（2388）、港鐵（0066）、領展（0823）四選一，請問邊一個會比較平穩增長？

調整後的月供比較會為$2000 一隻，即total $6000 一個月，是否穩妥？

現時股票現金比例大約為50:50，此比例是否穩妥？

希望可以得到你意見，十分感激。

龔成老師：

太好了！恭喜你！
這是你努力的成果，我相信你一定能完成目標的！

現時離2025年有幾年時間，你可以利用這段時間合理將財富增值，到接近買樓時就適度賣出股票，加大現金比例，減少股票或風險類資產的比例。

現時這段時間，你的投資應該以「平穩增長」作核心，潛力股都可以但不能太多。另外，3738、1283不宜持有太多。

現時月供的可繼續，你可以加入港鐵（0066）去月供。

現時你現金比例50%，其實30%-50%都是適當範圍，只要你到按近買樓時增加翻現金比例就得。

另外，你這段時間可保持財富增值，但如果在當中，見到樓價下跌，其實都可以考慮買樓，因為你的最終目的買樓，如果樓價平左，出現機會，只要你供款方面無問題，都可以考慮買樓。

------------------------------------------------

Q21457：

老師，你對1696有何看法？

我從其2020中期報告見到，其毛利有55%，疫情下純利則只有8%，以往則有14%至16%，這表示其經營成本以外，還有很多成本開支，對嗎？

而其總債務佔其總現金及銀行結餘約60%，這是正常嗎?還是不健康呢？

還有1696現價合理嗎？
可長線？

龔成老師：

復銳醫療科技（1696）主要從事設計、開發及提供能量源醫療美容器械，如一些無創醫療美容器械、微創醫療美容治療系統等。

由於疫情是一個特殊的經營環境，所以我地在分析時，會有調整，而我地會以「正常經營環境」作核心分析。因為疫情可能會有一些額外的支出增加，又或由於外在環境影響了生意，當某些業務的生意減少，而固定成本無法立刻減少時，就會令純利率產生影響。

至於負債情況，暫時問題不大。

業務上，有佢吸引地方。但股價近年上升了不少，市場好集中「預期之後的業務情況」，因此，股價會較波動，只可以話現價唔算平。長線投資價值，都有的。

------------------------------------------------

Q21458：

龔Sir, 你好，想問下供股既配置問題，我29歲，一個月可以儲15k, 供股每月$8k如下（已維持約三年）：

煤氣：1000
長建：2000
盈富：3000
比亞迪: 2000

直到比亞迪升過$80我就停供左，轉左供銀娛，而長建亦已停供。

1. 如果呢家月供配置為以下，你認為合適嗎？
領展：1000
中生製藥：1000
小米：1000
盈富：3000
銀娛：2000

2. 煤氣因為已經供左三年，但無咩增長，如果係想追求增長既應否繼續供？還是轉領展比較好？

謝謝！

龔成老師：

1）領展：1000
中生製藥：1000
小米：1000
盈富：3000
銀娛：2000

這組合可以。你保持長期進行就得。

如果你日後有更多資金，可以考慮加入3067，每月供$2000。

2）其實煤氣（0003）仍是有質素的股票，但增長力弱左，而佢改為20送1，反映增長力可能減少左，但不算差。

香港業務不強，但中國部分不差，中短期雖然較一般，但見佢的長遠發展力仍在，但就要耐心點。

由於佢一向都穩定派「相同股息」，在這情況下，反映派息的增長會少左。但整體來說，這企業仍是有質素的。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，只是增長力的問題。

你原有貨，持有。

但不要再月供了。轉其他更有增長力的股更好。

------------------------------------------------

Q21459：

老師，潛力股包括9618嗎？最近跌穿300，可以小注入嗎？90後如果9618,175,同914，邊個會較好？唔該老師

90後的我依嫁有4手823，同月供12同66，

甘823同12係地產股，66地鐵就公用股，

另外想加月供中銀香港，就銀行股，

同想加逐手買9618或175或914就新經濟股，甘樣組合正確嗎？唔該老師

龔成老師：

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

從質素上，這股不差的，現價算是合理區中上部至頂，如果買，都可以，但要控制注碼。這股可以長線投資的。

90後，財富仍有增長力，吉利（0175）及京東（9618）都可考慮，吉利會略好。

而你現時持有的，都是有質素的股票，屬平穩增長類，可長線，而中銀香港（2388）有質素，平穩增長類，長線可以，現價合理。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。所以，你慢慢加入吉利及京東，是可以的，最重要是注意整個財富組合的比例，以及要有現金剩剩。

------------------------------------------------

Q21460：

想問平安好醫生 同 2382 現價值買？

同3067

龔成老師：

平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區頂，但好波動，月供就得，如直接買入只能小注。

舜宇光學科技（2382）有一定的質素，但現價合理區頂至略貴。

過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。不過，手機市場又開始向好。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。

這股可以長線投資，分注或月供較好。

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21041-Q21060）

Q21041：

老師，比亞迪電子
由幾個月38.8買入到而家冇放到
近期回到接近我買既價
我想知我應吾應該繼續持有

由60見到佢跌到而家
個心好累

係咪我太貪心以為佢會繼續升
定係e個就係價值投資要經歷既過程？

龔成老師：

其實買股票，是好正常的，我隻1211，10年前，都由$10上到$88，跌翻去$12，之後先慢慢上，睇住自己身家幾百萬上落（當時我仍打緊工，$1萬人工）

成功投資者，就要有好強的心理質素！

我是睇「長遠企業價值」，而你就睇「短期股價」，所以你要學懂唔睇短期股價。

285有潛力，你可長線，但如果你心理壓力太大，不如轉其他股價無咁波動的股。你預左買潛力股，一定會這樣的。

------------------------------------------------

Q21042：

龔sir,另外想問下你對2380的睇法，這股票有8厘息，但上年除淨後股價跌到1.4，應該繼續持有收息還是先賺錢呢？

龔成老師︰

中國電力（2380）有質素的，可以長線投資。但要留意，中國的電力市場與香港的不同，香港的，有利潤「保障」協議，助電力公司賺穩定的利潤，但中國的，電力價格由國家主導，電力公司處被動位。

受燃料成本，以及國家主導的因素影響，中國電力過往的收入略有波動，而盈利亦有不穩影響。國家會給電力公司「合理」的利潤，但不會過多。

你用佢收息係可以，但要留意佢股息率雖然高，但都會有一定波動性，故不宜持有過多。

------------------------------------------------

Q21043：

龔sir你好，留意左你專頁一段時間，亦開始讀你的著作，十分同意你的投資理念，作為投資新手唔想行咁多冤枉路，所以果斷報了你堂。

我現在28歲目標係若干年後，靠收息+工作每月有十萬蚊收入，唔知會唔會太大想頭呢？

另外我想請教你點睇用桿槓買REITs呢？我見坊間有導師會教學生襯現在低息環境，借槓桿買REITs買債等相對穩定和低風險的投資產品，回報可達10厘以上，唔知你又點睇呢？

謝謝你的回覆，期待上堂親眼目睹龔sir的廬山真面目

龔成老師︰

借錢槓杆這個方法，賺錢時候你會加倍，但損失架時候同樣會被放大。風險唔細，唔建議你用。

除非出現「明顯的投資機會」，才考慮利用借貸投資，否則，有機會出現賺息蝕價的情況，小心。

我地投資一般期望合理回報係每年10-15%，如果想做到收息+工作收入加起每月有10萬現金流（我先假設你每月收入有5萬來自工作 + 5萬來自股息）。以股息率5%計，你需要本金1200萬。

你可以用上面架計法，大約推算要達至這個目標，所需要架總資金和時間。

上堂見!!!

------------------------------------------------

Q21044：

Hi 龔Sir，有事想請你比意見

現在同另一半租屋12500，住東九龍
男友是公務員，可申請綠表資格
想買返東九龍嘅居屋自住

二人每月收入共$60000
之前有睇過私樓，但因為我從事美容行業，近年疫情影響，銀行對美容行業按揭比較嚴謹，
所以我哋都偏向買二手居屋有政府擔保
近日睇咗鑽石山
以下都系13,14年樓齡，同一條街，
步行3分鐘到，港鐵站需要搭多一程小巴，或步行15分鐘

1，嘉峰臺 私人參建居屋屋苑
422尺實用，兩房 叫538萬
需月供 $23000左右
間隔不能大改動，感覺不太實用

2，瓊軒苑 單幢居屋
398尺實用，一房 叫438萬
間隔實用四正
需月供$18500左右

基本開支每月二人合共$28000
包括保儉，水電煤雜費，卡數，交通，食飯，電話費，寬頻

我地手持大約流動資金有$65萬
股票有$30萬
所以會做95%按揭，25年供款

想睇下老師比d意見
會揀選屋苑定單幢

龔成老師︰

以你地的情況，買居屋的確是較好選擇。

2間物業位置好近，交通、生活配套、地區發展、落成年份、尺寸等條件都好相近。

屋苑的價值，雖然比單幢樓高，但見兩者呎價都有更段差距，因此要思考值唔值得。

嘉峰臺相對貴成100萬，除非有其他原因（例如預將來會有小朋友，要留定多間房），否則應該瓊軒苑較好。

因為大家質素相若，但瓊軒苑可令你節省近100萬，用作投資增值，長線會對你較有利。

------------------------------------------------

Q21045：

你好， 有問題想請教。
有一層自住樓，幾十年前買斷了。
我地一家三口 為照顧老人家搬咗返去同住。
我係一個從來無買過股票的年輕師奶，要照顧自己的小朋友 和照顧自己個妹的小朋友

也辭去護士的工作 做緊全職媽媽。
靠老公一份人工 生活普普通通。

可惜，自住樓日益老化，維修事項漸多，已投放幾十萬裝修，小朋友也漸漸大個，兩房樓也漸漸唔夠住

在這裡認識了你的專頁，想問問：

1. 想賣左層樓套現，利用套現的錢來增值財富。是否太進取？

2. 我為人穩陣，十分不喜歡炒炒賣賣，如何在這範疇中能平平穩穩地賺取回報，讓老人晚年生活得更舒適？

3.我喜歡文字，不怕閱讀大量資料，想認真地認識自己在進行什麼投資，不是人云亦云地買一兩個什麼號碼，有付出才有收穫 嘛！

4. 前路有點模糊， 請指點下。

註： 自住樓大約值 600萬
手拎零股票
有買 金粒的習慣 大約10萬值
買了兩份儲蓄保險單 給女兒 和年老的家父

龔成老師︰

1）唔建議賣樓。自住樓不應賣出。你換樓可以，但賣出自住樓就不建議。

其實，以你現時奬況，但長線計，你都要增值一筆錢，為換樓作準備。你可以用月供優質股，去做增值。

2） 投資股票，其實係希望買入一些優質企業，透過佢自然增長，達至財富增值目的。絕對唔係"短炒"，只你要選對股票，並長線持有，就會有唔錯架財富增值效果。

你要做架事，就係先睇下每個月扣除開支後，有無多餘錢可儲。無就要睇翻有無支出可以删減，重點係每月要空出一筆資金用來增值。

你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

但由於你家庭靠老公一份收入，開始投資前，必需儲起一半約為半年開支的應急錢，咁會較穏當。

3） 你這想法正確，我地唔好對企業毫無認知之下，做投資決定。你可以先睇我寫架"80後百萬富翁"、"財務自由行"和"股票勝經"，會適合你這類的初學者。

4）你現時每增加知識，並利用股票去進行財富增值，最簡單的方法是月供盈富。另外，如有需要就考慮換樓，但要視乎你地的資金、需要等。

至於金粒，都可以儲。但黃金主要係用來對沖突如其來架風險，所以唔洗多，佔總資產3%左右好了。

而"保險"只係理財中防守部份，只要買足夠保障就可以，增值可以留比優質資產（如優質股、物業等）去做，咁會較有效率。

------------------------------------------------

Q21046：

老師，我看到你的相“你是宇宙最大的奇蹟”
我都有留意 “吸引力”

入左一間公司做半年多， 同team兩個一開始共事既好同事都都走

一個辭職，另一個比人調組（調左一陣都辭職）

之後新來兩個同事 合作得暫時都一般，加野比我做
前日我又沖口而出話自己未必handle到咗多野，跟住佢地對的工作開始質疑，背後對我有微言

係咪我吸引左d負面野比自己
好擔心連份工都無埋
另外，前排可以左投資

買一手藍月亮，一手中國生物製藥

龔成老師：

吸引力法則是一個大方向，而在現實中，有好多變數的。

我地最重要就是自己有正面思維，往往會有好的事情發生，不過，現時仍是有野不是我地控制，你都要明白這點。

由於與你較友好的同事走左，所以你產生左一些負面想法，強加在新同事裡，不如你試下改變對新本同事的睇法，改善大家關係，否則會出現惡性循環。

至於你持有的兩股，有質素的，不用太擔心短期股價波動，持有一手無問題的。

------------------------------------------------

Q21047：

龔sir，你好，我都有啲概念野唔太明，股票係買賣，買/賣要有人接貨先叫成交，照計買賣既金額應該係一樣，咁點解D沽空既金額唔係成交既一半既？

龔成老師：

因為沽空不是正常的「賣出」，是一些無貨的人通過證券行借貨，先賣後買，因此要特別申報的。

------------------------------------------------

Q21048：

老師 我真係好迷茫 唔知應該點行 希望你能夠以過來人身份指點一下我

我27歲 無大學學位 只係普通DSE畢業
依家有份工作 admin 19k 返10:30 放6:30 無晉升機會 但好安穩 基本上都一定唔會踢我走 但19K已經係頂盡唔會再加

最近收到一個HSBC既teller offer , 人工少左, 15-16K左右, 我應唔應該轉去做teller? teller既晉升機會大唔大呢..唔係好清楚佢career path係點

希望你能夠解答一下我既難題

龔成老師：

其實好簡單，你從長遠角度去想就得。

你比較一下，5年後，10年後，這兩份工對你有那些分別。

從長遠角度去想，到時的收入、事業、生活、發展等因素，那個較好，那個較近你的長期目標。

你原有職業，突破唔高，除非你懂得善用餘下時間及利用資金投資有理想回報，否則發展唔高。至於銀行，teller的發展唔算高，不過，算是好過你原有職業，因為有機會再轉其他職位，以及有機會令你將來更有動力轉工，慢慢上。從突破角度，轉工會好少少。

你最重要問翻自己，長遠想點？有這個答案，就知選那份工。

------------------------------------------------

Q21049：

成哥，請問我買1177一手

1）甘我比一手價錢，啲錢係比1177間公司定比左邊個？

2）當我用1000投資，買左這股，升到1300蚊我放左，甘賺果300蚊係1177間公司比我定邊個比我?

我想了解運作，謝謝你

龔成老師：

1）交易所是一個二手市場，你是幫「另一個股東」買的。

你平時見到的股價上落及成交，就是每天不斷在買買賣賣，即是貨由投資者A轉給投資者B，不斷轉來轉去。

2）你可以當現時，你比$1000，在二手市場買了一部手機，然後過了一段時間，以$1300賣這手機賣給了另一位買家。

------------------------------------------------

Q21050：

老師，我知道你不建議借父母錢買樓。
不過我男朋友屋企人預備左1百萬(現時做緊定期)俾佢，係預備俾佢大約3-5年左右買樓付首期。

男朋友既父母話唔係好識投資，所以放左係定期。
雖然我覺得自己唔係太應該俾建議佢父母，但我都想問老師

1. 100萬應該拎出部分作投資嗎？

2. 應該拎多少作投資？

3. 應該投資係咩方面？係應該以佢哋既年齡而投資收息股嗎？謝謝。

龔成老師：

如果這筆錢會在中短期，例如1、2年內買樓，咁就最好持有現金，不要投資，因為投資始終有上落，無人知你買樓時的投資市況，萬一股市下跌，就會到時唔知賣唔賣股票去買樓好。

如果在3年後先買樓，就可以動用這筆資金，最好是投資「收息股」+「平穩增長股」，唔建議面對太多風險，同時，投資金額最好在$20萬-$50萬，不要太多。

------------------------------------------------

Q21051：

Sir，我Q19941見你早前的問答，我好想分享，我前後睇樓差唔多一年了，由6百幾萬睇到7百幾萬，又因為已經橫跨成年，可負擔的樓價已經就快可以去到8百萬

我由尖旺單幢20年左右的舊樓2房，睇到半新樓1房，再睇到黃埔細兩房，再愈睇愈貴睇到黃埔靚景中型兩房，已經去到8百幾萬

如果買去買800萬的樓，我就要用盡晒我啲錢同埋要賣晒啲股票，要賣晒股票，我會好唔捨得

後來我有一日本身已經睇左大半日樓，見仲未算好晏，就walk in去睇一個九龍上車屋苑，佢無我之前睇既樓咁近地鐵，但其實都叫walking distance

搭小巴去亦都好快，平均成交價講緊3百幾呎細兩房係6百尾至7百頭，頓時覺得好平，而且比起我之前睇既黃埔新好多好多

同埋一直以為呢個屋苑唔係咁好，但睇完實物又似乎都係一個唔錯的選擇

所以我會建議Q19941的讀者在考慮800萬dream house時，都去睇下啲細價樓，睇下自己感覺如何

就好似我咁，我睇完呢個上車屋苑後，感覺好ok，樓價低啲，唔需要套現晒我啲股票，供得輕鬆啲，可以繼續月供咁上下的股票，成個資產分配又唔會側重晒在住宅物業上面

最後我都想講下我近月的感受，我發現有啲同樣想買樓的朋友，與一年前的自己好似，就係好中意網上睇樓，而好少落場睇實物

親身睇樓真係好重要，而且唔係要買樓前至去睇，而係日後都會想買樓時，已經要早啲去睇下樓，到真係急住要買樓住時，至可以好快決定到。

龔成老師：

多謝你的意見，我都會同佢講聲。

這是一個好好的分享。

而你所講的「睇實物」，這點好認同，我相信網上只是輔助，並不能變成主力，我地一定要親手睇樓先得。

都恭喜你，你找到了你的目標物業！

------------------------------------------------

Q21052：

sir，1337雷蛇點解你睇好佢潛力？

龔成老師：

雷蛇（1337）有潛力的原因，主要係佢發展緊的業務，都是潛力類，加上見佢財務數據等資料，應該過了最差時機，因此可能有轉機。

當然，佢本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

------------------------------------------------

Q21053：

龔sir 你好
本人35歲
現時持有以下股票，請問組合ok 嗎？

0005 - 2手 平均買入價$42
0017 - 1 手 買入價$41
1177 - 2手平均買入價$7.9
0175 - 2手平均買入價$30

0017 買入後一直下跌，但個人認為企業有質素，但增長確實太慢，甚至不停下跌，很有衝動賣出，應如何是好？希望收到你的回覆，謝謝

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，長線持有就可以。

中生（1177）和吉利（0175）都係適合你，可持有。

新世界發展（0017）不錯的，本身有一定的規模，業務廣泛，從事物業投資及發展、合約工程、服務提供、經營基建項目、電訊服務、百貨、酒店及餐廳、電訊、媒體、科技等業務。

但這類綜合企業，一般的增長力都不會太強，佢近年的生意亦只是平穩，你可以持有這股，但不要預佢有好大的增長力。因此不建議持有太過多。你暫時可持有，但不要心急加注。

匯控（0005）增長力一般，主要係收息，以你年紀，不宜持有太多。

------------------------------------------------

Q21054：

成sir 1883和3988各有一手，係當年招股時買一直到而家。你見議應該點看待依兩隻股？

可長持嗎還是平手時放左佢好嗎？

龔成老師：

中信國際電訊（1883）業務穩定，整體質素算是不差，過往股價的波動亦不大。佢近年的生意都保持穩定，盈利亦是一樣，相信市場結構令佢處於一個穩定賺錢的狀態，不過，增長力就不強。

盈利就穩定並平穩增長，但始終生意無上升，點都會有扣分的地方。

相信佢能平穩發展，收息可以，但就不要對股價有太大期望。

中行（3988）由於內地經濟無過往年代咁強，股價無過往咁好，由中美貿易戰開始，中國的經濟動力已有所減少，加上最近的疫情，都是影響經濟的因素。不過，初步已好轉，但不是高增長型。

現價合理區中間，這股收息可以，但就唔好對股價有太大期望。

所以，持有與否，要睇你本身投資目標，如果你想收息，就持有。想增值，就賣出。

------------------------------------------------

Q21055：

你好龔sir, 想問下，近期地產/物業企業既物業重估都系向下，是否可以代表香港物業其實系處於跌價方向，但似乎住宅物業冇乜跌價跡象。其實當中有冇關係呢？

龔成老師：

第一，這些物業重估只是一個「估」的數字，更只是一個會計上的因素，對企業無實際現金流的影響。

第二，我地分析時，會著重長期分析，唔需要太理會中短期情況。

所以當我地分析時，重業重估會影響盈利，但只是會計上，因此唔會太過著重的。

而佢地係重估時，不單考慮這刻的住宅樓價，仲要考慮租金，不同類的物業，以及將來發展情況等。

------------------------------------------------

Q21056：

你好老師，我係澳門人，早兩日去珠海金灣睇樓, 嗰度係 珠海新區 發展勢頭好勁但係依家 就係地盤多, 好多嘢都話會起好 將來點點點!

但係 現時比較荒蕪 但係都賣到兩萬五一方 不過有好多大品牌嘅地產商喺度都 喺度開盤 依家 15 16 唔知 買唔買好

因為我覺得個價錢都幾貴, 我覺得佢有啲潛力, 因為見佢之前啲新城區都 搞得幾好!

老師！中鐵建有投資價值嗎？
現價如何

龔成老師：

你最重要睇翻長遠的配置，該地區的交通及價值，以及，本身是否近商業地區。

如果有潛力，就時貴少少都是值得（當然不能過份地貴），建議你進一步分析該區的長遠城市規劃，以及發展等。

中國鐵建（1186）質素算是中等，不算好強，但都不差。

如果有分析佢多年的業績，會見到佢生意其實都幾穩定，但就無增長力，至於股本回報率處合理水平。但這股最大的問題，就是負債太多，雖然佢現金流好穩定，但太多負債始終會扣分。

而這一點，亦令佢企業價值不會太高的原因。而現價處於合理水平，但發展力不算強。

------------------------------------------------

Q21057：

想問下龔Sir對於
686 北京能源國際
668 東銀國際控股
1628 禹洲集團
3883 中國奧園

哩幾間公司嘅潛力，未來趨勢，現時股價值得持有嗎？

留意到近兩月內地房地產成交量急升，80，90後成家置業，可以從呢個方向同埋業績搵現價較平潛力股嗎？

龔成老師：

北京能源國際（0686）風險高。東銀國際控股（0668）賺錢能力唔強。

禹洲集團（1628）主要於中國廈門、上海、福州及合肥從事物業開發、物業投資、物業管理以及酒店業務。

佢係新加坡、香港、上海、合肥、福州、廈門等地均設有分支機搆。

整體質素都有，但未算好強，佢在行業中，未算有好大的規模與優勢，另外，負債較高都對這股造成風險。加上業務有點波動，這股唔建議投資太多。

現價合理，如果控制注碼都可考慮這股，長線投資價值都有，但未去到最高質類別。

中國奧園（3883）主要於中國從事物業發展及物業投資業務，近年增長快速，這是受中國樓市保持向好的情況帶動，加上佢利用大量負債運作，當好景時，佢就會好好賺。

但佢的負債有點多，有危有機，好景時好好賺，但逆景時，就幾大件事。

所以，這類股不是無前景，但風險較高，唔算好建議大注。

至於你從地房地產成交量急升，80，90後成家置業這方向，只能參考下，因為短期成交不一定反映真正的市況情況，而內地往往受政策等因素影響。年輕人成家這是需求，其實一直都有，你要確定是近期短期多左，還是長期核心需求的反映，我暫時未能確定一定是長期需求湧現。

------------------------------------------------

Q21058：

龔老師，我大陸有層樓
值439萬hkd

純粹問下

如果你攞左依439萬hkd
你會做d咩投資
如果做果個投資風險大唔大

龔成老師：

要睇翻你的年齡與風險程度，你可以考慮股票、基金、債券、銀行產品、車位等。

這是一個財富配置的過程，因此無話風險一定大，要視乎你怎樣配置。

就算股票，都有收息股、平穩增長股、潛力股等。

要睇你現時的配置，及將來的配置。

------------------------------------------------

Q21059：

老師，若我希望收息，哪些股票較合適？331豐盛服務可以嗎？659 新創建可以嗎？

龔成老師：

豐盛服務集團（0331）主要係於香港、中國內地及澳門，從事機電工程服務、建築材料買賣、環保產品貿易及提供相關工程諮詢，亦於香港從事清潔及廢物處置管理服務、回收及環保處置服務以及洗衣服務。

過往生意都有穩定的增長，而盈利都是，但企業的規模較細，因此風險較大，同時規模效益不高。但以佢現時的估值計算，價格是在合理區。

你可以投資這股，分注買入就得，長線持有，但就不建議投資得太多，始終這企業有點風險。

新創建集團（0659）都有質素的，佢係是新世界發展（0017）的基建及服務旗艦，業務遍及中國內地、香港、澳門。

新創建係一間綜合企業，可分為7大業務：道路、環境、物流、航空、設施管理、建築及交通、策略性投資。當中可分為兩大類，即是基建及服務

整體的質素，算是不差，但又未到最高級別，業務分散於多個範疇，部分與公共事業有關，過往的生意雖然穩定上升，但盈利卻停滯不前。

企業本身不是沒有優勢，長遠仍有增長能力，但由於賺錢能力略有下降，加上企業本身已很龐大，增長期望不會太多，過往過價大致穩定，投資宜集中在股息多於股價回報。

另外，近期的肺炎對佢有一定的影響，相信中短期仍弱，不過長期來說。仍是有投資價值。

現價合理，分注投資可以，但這股不建議太大注。同時要耐心等好轉，明白佢增長力不強。

------------------------------------------------

Q21060：

龔生你好，本人37歲，月入5萬左右，有一份穩定既收入，同先生財政獨立。現時自住樓先生名下，沒有很大固定開支，現家有大約80萬現金，十萬左右蟹貨股票。

平時無做其他投資，扣除生活開支後，每月大約可以儲2萬蚊。如果想投資，有咩選擇？

另外，如果想買樓投資，應該買咩價位既單位，同埋有無話咩地區比較好。

主要想10年內可以買2層細單位，想留比小朋友
謝謝你給予意見

龔成老師：

我地在財富配置上，最好是建立一個「平衡的組合」，如果太集中買樓，其實會出現集中風險。

當然，你不是不能這樣做，但就明白當中在風險，同時不是最好的配置模式。較好的做法是「股樓平衡」。

你可以先利用現時的$80萬，其中$40萬投資股票，再加上每月用$15000月供或分注買入股票。利用股票去進行財富增值，之後到適當時機先買入（這一步不用急）。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

平穩增長股：潛力股
8：2（如果你投資實力較強，可增加潛力股比例）

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17481-Q17500）

Q17481：

老師，想問下跟進下你80後百萬富翁書中既第103頁
我見到你話一個有資產既人，佢每月會有5萬既生意，租金同埋股息收入。

講到其中一點就係做生意，你明白呢係香港做生意好困難，加上e-commerce係香港發展得比較落後，你會覺得點樣可以係做生意上有D成績呢?你會唔會有D書介紹下?

近排我都問過一D做生意既人，有D人建議就係做番自己擅長既野或者同自己專業學科有關既野，例如讀會計既就去搞會計師樓，中意影相既開攝影studio，做股評人既開投資基金公司，中意煮野食既就開餐廳。

但係我地亦認識到好多人，佢地既成功同自己本身既專業無關，例如馬雲讀英文系就去搞阿里巴巴，李嘉誠穿膠花最後去搞地產，佢地唔止好成功仲可以係癲覆影響緊整個社會既發展。

想問下點樣搵到合適既生意，同埋點樣裝備自己，除左讀多D書有多小小學識，有冇咩技能需要有，並且係對搞生意有幫助?

龔成老師：

做生意，唔單止只做「自己識的」，而是要做「市場要的」。

你上述所講的名人，佢地正是把握到市場機遇，李嘉誠當年已做塑膠做到好強，之後佢大到要自己建大廈去做廠，就因為這動作，令佢發現到市場對「地」的需求，佢最初都是對地產唔識，但當有市場機遇時，就要去學。

你最初可以利用自己熟識的行業去發展，因為會較易，而我相信每個行業都有當中的優勢與機遇，你要學會好好把握。

同時，當你在發展過程中，如果見到有一些機遇出來，無論是你現時的行業或不是，你都要有把握的能力。我認識一些朋友，最初只是做裝修，但之後見到網上有機會，把握時間發展網上業務，取得不少市場，這就是本行與機遇的結合。

其實，做生意的其中一個要點，就是「試」，要「行動」，好多時要試先學到野，要試先找到市場，而大部分人，只是「不斷想不斷計劃」，最後就「乜都唔做」。你加油啦！

------------------------------------------------

Q17482：

你好龔老師，小弟年初在書局購買了老師的50優質潛力股，閱讀後獲益良多，已實現每月1萬 (823, 2388及2638)的月供分配，並約10萬元購入52, 778, 9988及388作長期持有。

原定計劃股票是月供5年作長線投資，但近日得悉現公司可能於2年內結束，因此很大機會失業。月供金額及年期可能隨著收入及當時工作是否穩定再作調整。

小弟現有問題如下，現時38歲，月薪5萬，持有現金約40萬，太太沒有工作，育有一名6歲兒子。現時每年一家三口的醫療保險費約2萬，另有一份已供多年的儲蓄保，年供3.6萬需要供到42歲才供完。

物業方面，自住兩房單位當年320萬購入，現銀行估值約500萬，經過2次轉按，現時月供約1.4萬，供剩370萬左右

太太收租一房單位當年430萬購入現估值約400萬，租金收入9,800元，月供約9,000元，供剩約235萬；另有2個現契車位自用市值約共250萬，如車位放租租值共約5,500元。

他日轉工，估計收入只能賺取現時約一半即25,000元左右。由於現時自住單位狀況不佳及屋苑即將計劃進行大維修，因此已決定短期內出售自住單位並短暫租樓。

由於前景不明，賣掉自住單位後，應否立即買回自住單位還是長期租樓睇情況比較好?

因怕現時不買回自住樓將來收入減少難做按揭。還是賣掉收租單位和車位，以低成數按揭買自住單位好呢? 想了很久也希望得到老師指點。萬分感謝！

龔成老師：

首先，你所月供的，都是有質素的股票。不過，如果你有收入不確定性況，的確要多留現金，你可能要減金額比例。

至於物業方面，建議你賣出單位並買回另一單位，如果資金不足，可考慮賣出車位，除非你地好睇淡樓市，否則，我較建議你賣出後買翻另一單位，特別是你工作不穩，應該趁現時有穩定收入時進行按揭。

如果將來的收入減少，在「供得起」原則下，你可以考慮買入較細的單位，你這樣能擁有一定的現金，同時風險度會減少。

至於收租單位，見到暫時的收入足以供款，可以暫時唔需要理佢。

另外，建議你多留現金，投資股票不要進取，等你完成物業狀態，以及工作情況更明確，到時先加大力度投資。

------------------------------------------------

Q17483：

老師，請問點睇香港護老行業？如2189。謝謝

龔成老師：

嘉濤（2189）都不差的，見佢生意穩定，盈利與現金流穩定，現價合理。

香港這行業，長遠有市場的，需求會更多，不過，競爭都大，加上市民對這行的要求、如衛生等，會愈來愈高，這會產生一定的成本。

整體都是正面，但未算最高質之列，這股可投資，長線，但規模唔算大，因此唔建議投資太多。

------------------------------------------------

Q17484：

你好，感謝你經常無私協助大眾，我希望可作出改變。

我月入10萬已3年，從20歲開始至30歲，平均工資4萬以上，即總收入13年840萬，如每月花3萬，資產應有372萬以上。

但實際情況是，現時現金流小於400K，總資產(減欠債)小於100萬。。。不計房貸更有185萬欠債。現時貸款月供63800，另有一萬月供股票

港鐵，金沙，煤氣，中國銀行，港交所

持有股票54萬
分別為中手游，港鐵，金沙，煤氣，中國銀行，港交所，匯豐，盈富，中國鐵塔，阿里巴巴，ESR，京東，網易，領展

1.我想重新檢討自己的財務情況，有沒有什麼工具可以推薦？

2.依我現在的情況，有什麼最優先應做？

3.月供股票有其他組合建議嗎？

4.持有股票很多，但獲利十分一般，經常出現低價離場的情況，先小小就走-騰訊，美團，中芯等。。。

相反跌極都唔離場，會依你所教導設定好出入策略，長期持有倍升股，以上有沒有那只股票可不適合以上策略？

龔成老師：

1）我相信你是理財方面，未能有效用盡你手上的資源，在發揮上可以做得更好。

第一，你手持股票隻數太多，有點散，這在管理上唔方便，分析較難。

第二，你仍年輕，但現時不少股票都只是收息股類，對你未必最好。如中行（3988）、匯豐（0005）、煤氣（0003）。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

2）賣出一些增長力較弱的股，同時重新分析組合內每一隻股，了解佢地的質素與增長力。

之後，就要睇你的現金比例，如果現金唔多，就等機會。較多就可留意下一些高增長股。

另外，我建議你寫翻自己的「個人收支表」「個人資產負債表」，《財務自由行》有教你，你本身情況不錯，但就應該加大力度做好理財，對你長遠財富更有利。

3）你可以考慮盈富（2800），加一些較高增長的股，阿里（9988）、騰訊（0700）、港交所（0388）、舜宇（2382）、比亞迪（1211）、中生製（1177），但就要控制注碼，當佢地有一定回落時，才加大金額。

4）如果是有質素的，如騰訊（0700），其實唔洗賣，至於其餘兩股，就要小注控制注碼。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17485：

老師你好！今年31歲月入2萬，pt 3千，現持5萬現金，月儲1萬(當中月供6千)，目標4-5年有100萬然後買樓投資。
現在比例「平穩增值股57%」(003、0027、0823、2388、2800)「潛力股39%」(1177、1211)「收息股4%」(2638)。

股票月供如下：
0027($1500)、0003、0823、1211、2800(各$1000)、2388($500)

現持股票共值17萬左右如下:
0003 平均$15.5@1545股
0027 平均$52.5@361股
0823 平均$79.3@285股
1177 平均$9.7@2000股
1211 平均$47.8@478股
2388 平均$32.6@315股
2638 平均$7.5@1000股
2800 平均勻27@1508股

1）應該幾時賣出股票？當股票賺一倍以上放一半?明白月供係平均成本同我地不應估股票既升跌，1211處於偏高位置，應否停一停月供？

2）每月應該增加月供由6千變供8千，變相儲現金由4千變2千？

3) 以我年紀以上比例應該多少？投資策略應該係點部署？比例幾時要轉一次？謝謝老師

龔成老師：

1）一般來說，優質，有增長力的股，可以長期月供。當然，當股價去到貴的水平，你可以停供，甚至賣部分。比亞迪（1211）如果去到$8X，是進入了貴的水平，你可以停一停，如果你持貨較多，可賣小部分。

如果不懂分析貴，無法掌握幾時賣出，就運用「升一倍，賣一半」作策略。

2）你現時持有現金唔算多，其實唔需要太急進買太多股票。現金的作用，就是「等投資機會」。如果能把握到機會用現金買到平貨，整體組合的回報率就能大幅增加。

3）你現時的方向正確，比例都無問題，選股都是有質素的。你現時4成潛力股適合的，如果你想再進取，就增加到5-6成（潛力股佔股票組合比例）。

至於現金，如果以（股票加現金）的總數計，現時3-5成會適合。

------------------------------------------------

Q17486：

龔成老師 第一次inbox
想問下 有2手Hsbc @51 @60.3
仲放唔放係度 定忍痛只蝕
應該係1手 @51 3手@60.3
我同家姐都好蠢

龔成老師：

匯豐（0005）並不是完全無質素，不過增長力就不及過往年代，加上經濟與行業因素，你預中短期都會弱，是收息股，長遠的增長力中等。

你要預佢增長方面唔好有太大期望。

如果你地年輕，想組合增長力較強，應該轉其他，另外，如果這股佔組合比例較多，都應該賣出部。

但如果佔比不過多，而你地又接受佢是收息，增長力不強，就可以守住先。

這股不是零質素，過1、2年經濟好轉佢，都股價會上翻D，希望能到時上到$50你先賣部分。

------------------------------------------------

Q17487：

老師你好 我就快26歲

月供
2800 @2500
823@2000

另外有
435@3手
2138@1手
11@1手

1) 想問你對組合有咩睇法？
2) 想買2手831，ok嗎？幾多錢先算便宜？
謝謝！

龔成老師：

1）月供的無問題，可以保持進行，如果日後資金較多，可以加大盈富（2800）金額。

至於持股方面，陽光（0435）無問題。香港醫思醫療集團（2138）都可持有，但這股唔建議持貨過多。恆生（0011）雖然有質素，但只是收息股，你26歲，年輕，這股未必最適合。

2）利亞零售（0831）有質素的，有長線持有價值，不過增長力就不算強。現價合理，要跌多2成先算平。

------------------------------------------------

Q17488：

老師，其實我是開公司的，現在扣完同事的糧及開支後，平均有10至15萬贏利

我有點不知道點樣處理，應該是出糧10萬俾自己，還是怎樣呢？

已經37歲，但因為做生意之前沒有什麼積蓄，現在才開始叫順利一點。

我有打算買樓，但因為對上兩年為減少交稅，所以公司報稅賺的不多，以致難以跟銀行借得多。

若你是我會點做呢？
謝謝你的時間

龔成老師：

你應該出糧比自己，無論是為交稅、為買樓、為自己理財，都應該有固定的收入比自己，將自己的數與公司的數分開。

我自己都會這樣，每月會出糧比自己，餘下的資金在公司，可以在公司運用（例如投資、賣廣告、擴大業務）等。

至於出多少糧，則要考慮稅務、買樓等問題，你應該問下會計師的意見，有D錢唔好慳，值得比就要比。

當你出糧比自己後，這些就是你自己可投資，可置業，可消費的資金。這樣理財會較好。

------------------------------------------------

Q17489：

龔sir，我成日見你講估值，請問你邊本書有講呢樣野？
我只買咗你收息股同值搏股的書。想問下華虹半導體28合理嗎？

龔成老師：

《股票勝經》有講少少，不過課堂會較多。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

由於有不少資料，都要較新先講到，所以唔會在書寫，只會在課堂教。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

華虹半導體（1347）你預$28仍是略貴的水平，如果回多10%會較好。這股有潛力的，如果想入，要小心控制注碼。

------------------------------------------------

Q17490：

Hello龔sor 想知你點睇1475日清食品？記得佢幾年前上市好似只是$3.5左右

龔成老師：

日清食品（1475）不差的，都算有質素。

佢由日清日本（於東京證券交易所上市）分拆上市，主要於香港及中國內地從事生產及銷售麵條、蒸煮食品、冷凍食品、飲料產品及零食。

本身有品牌，加上業務穩定，盈利都不差。但比較大的問題，是增長有，但發展潛力未算好強，但市場已假設佢有高增長，所以在股價上，只視為平穩增值類別。

內地市場的確係一個增長動力，但你唔好預佢會好強。現價已唔算平，你可以等佢回調15-20%才入貨會較好。

------------------------------------------------

Q17491：

老師 可唔可以分析下1099國藥控股？

應月供石藥1093或趁低吸納國藥收益較為理想?
感謝

龔成老師：

國藥控股（1099）的質素不及石藥（1093）。

國藥雖然都有質素，但在增長力，業務發展，以及一些財務數據如股本回報率，都不及石藥。

建議你月供石藥較理想。

------------------------------------------------

Q17492：

老師你好，想問下1400怎樣？因為家人係幾個月前約0.45買入，不清楚買了幾多手，但一直都在0.1x的位置，請問應否賣出？

龔成老師：

滿地科技股份（1400）年年虧損，見唔到有投資價值。

相信長遠的價值只會向下，賣出是最好的方法，如不想一次過賣，就分段去賣。

------------------------------------------------

Q17493：

龔sir你好呀。 我宜家讀緊year 4，, 睇左你嘅股票勝經同埋年報分析然後開始學習買股票。多謝你的書讓我學識更多關於價值投資嘅野。

宜家有2手金沙平均29.05買入。 仲有一手深高速8.3 買入， 買入深高速是考慮到佢公路收費業務每年平穩，而且近年開始發展環保業務，就覺得未來應該會有增長。
但係我見到金界控股現價估值好似比較低，而且金界未來也有潛力。

也考慮到你說“”先增值後現金流”，我應不應該把深高速換為金界，但這樣好似又和金沙有版塊衝突。謝謝老師指引

龔成老師：

金沙（1928）與深高速（0548）你都可以長線投資，這都是不差的收息，以及平穩增長股。

至於金界（3918），是較有增長力的股票，新興市場的機遇點都會較多，不同風險亦會高翻少少。

這股可投資，現價合理，你明白風險就得。如果你想組合增長力提高，的確可以換入金界，但就要留意，你這樣會太集中在賭業類，所以合共比重唔應該太高。

如果你加入後比例過多，就暫時唔好增加住。我地投資，「先想風險，後想回報」是重要的。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17494：

你好成哥,想請教你而家應該點投資好
本人35歲, 同先生有個初生BB, 住緊自己樓, 尚欠100萬按揭, 每月只供$4000, 與先生月入共$7萬, 完全冇生活壓力

有155萬買左美國債劵基金, 本身只想每個月收幾千蚊息, 但買了2舍月便遇上股市大跌, 現在蝕了約12萬, 應繼續持有嗎??

另外持有股票50萬左右, 分別係2800盈富, 0027銀河,2388中銀香港, 1211比亞廸, 66港鐵, 3煤氣, 12恆基

有現金約60萬, 有打算為左小朋友之後移民, 都怕美國唔再比HKD掛鉤, 按左層樓投資換成USD你認為點?? 請問有其他投資建議嗎?? 唔該!!!

另外每月都有$2萬會月供股票-
$10000盈富
$4000 銀河
$4000 恆基

龔成老師：

你現時有物業，在之後的財富增值上，應該集中股票類別，只要是穩健類型就得。

至於債劵基金，過往都聽到不少網友話出現「賺息蝕價」的情況，這類基金有好有壞，要小心分析，因為並不是單單持有債券，而是會炒賣債券，同時會投資垃圾債券。

你最好睇翻該基金的投資策略，如果是高風險的，可能要賣出部分或全部。

至於股票部分，你持有的都是優質股，不過中短期表現會較一般，要耐心持有，長遠有質素的，只要你資金唔需用就得。

月供股票部分，你可以保持月供，如果想組合更平衡，可以加少少新經濟股，例如加入$2000。

至於港幣，唔需要擔心，聯匯並不是建基於美國政府，而是建基於香港有多少美元，所以不用擔心。所以唔需要按樓轉美元，除非你日後有實際需要，但不用因「擔心聯匯而這樣做」。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17495：

老師，我港鐵上年開始買到而家一路都洩緊 現價39 想低位入返一手 這樣正確嗎？

現在仲有12萬現金 可能想將6萬分注入市

另外中生制葯一直keep住供 是否應先停一停呢？ 現時一直高位

龔成老師：

月供股票是一個長期策略，唔好太著重中短期因素，一般都要供5年先有效果。港鐵（0066）是不差的股票，你可以長期進行，這股有基本的股息，同時有D增長力，但不是高增長類型，不過好處是穩健。

你可以將$6萬分注入市，但就唔好太集中在一隻股，要建立一個組合。同時，要留有現金。

至於中生製藥（1177）如果月供金額不多，無問題，如大多就可以減或停。

------------------------------------------------

Q17496：

老師,我是你上年10月的學生,想請教你一些問題:

1.我現在正進行月供股票已差不多一年，月供需$6000，包括2800, 003, 0066及0823，可惜遇上跌市，現在4隻月供股票都出現虧損

我明白月供股票是一項長期的操作，尤其是003及823都出現大幅下降，這兩股票的優質程度還在嗎？我應該維持月供嗎？

2我在中銀網站查看1128 永利澳門，發現過去兩個年度ROE 都達250%以上

有什麼特別原因導致有這麼高的ＲＯＥ？如果以優質及潛力程度，1128 還是27較好? 謝謝老師!

龔成老師：

1）月供是長期策略，因此唔需要太在意中短期。領展（0823）質素無變，可長。至於煤氣（0003）其實都是優質，不過增長力就比過往略有減少，如果你本身增組合增長力強D，都可以考慮轉其他，原有的貨就持有，這股有得守的。

2）股本回報率是一個很有用的工具，但我地在初班，仍有好多未講，因為當中可以再拆解成幾個部分去分析。由於這些轉深，因此要去到進階先會教。

你見到永利（1128）出現這情況，是由於佢的派息好高，同時拆舊數字大，當中出現了一些情況，令到企業的股東權益部分拉低左，所以當計算股本回報率時，其實會變得好高，無法反映企業的真實情況。因此，當你見到這類過高股本回報率的企業，就要深入分析數字的結構，有可能無法反映企業的真正賺錢能力。

永利有質素，可長線投資的。

------------------------------------------------

Q17497：

Hello我係新手

我之前高位8.53買入 288
宜家放好無 定係等佢升番
288仲有冇potential升番上去？

龔成老師：

萬洲國際（0288）質素唔算差的，但潛力就不算強，只是平穩增值的類別。

肉價短期上落，都會對佢股價有短期影響，不過，我地分析時，唔好太著重中短期因素，例如短期的肉價格，以及供應等因素，都會對佢中短期有影響，但我地最緊要是分析企業的長期營運模式，發展，而這股正面的，可長線。

這企業過往的生意保持平穩，業務基本上是平穩的，只是因貿易等問題，令股價較為波動，成為這股的風險。投資這股，可說是平穩增長，以及收下息咁，不要對股價太有期望。你可以守住先。

------------------------------------------------

Q17498：

龔成老師你好，我現在幫家人接手管理投資，發現以下情況，不知應留著收息，還是等回升到甚麼位置止蝕離場，希望您能給予意見，謝謝。

1. 1339 中國人民保險集團 買入價$4.7， 重倉
2. 941 中移動 買入價$113 ， 超重倉
3. 857 中石油 買入價 $11
4. 2628 中人壽 買入價 $41

龔成老師：

我地最重要是睇企業質素、前景。買入價不是分析重點。

中國人民保險集團（1339）質素中等，你預增長力不算強，這股唔議重貨，如果之後上翻D，應該減部分先。

中移動（0941）只是收息股，你預股價好難上翻去，持有收息無問題，但增長真的不強，要睇你的投資目標。同樣，唔建議太集中，可以減部分，轉其他股，組合增長力更好。

中石油（0857），你預經濟好轉時，油價會上翻D，但要上到買入價，好難。

中人壽（2628），這股都有質素，但賺錢能力比過往略減，持有可以，但同樣好難上得翻去。

------------------------------------------------

Q17499：

龔成老師你好，本人現在22歲，有現金儲蓄約4萬，進入股票市場大約4個月，股票本金為4萬，現總資產約4萬7千。

曾持有阿里巴巴（成本：179）一手
比亞迪（37.9）一手，
但因為目光不遠，很快就放掉了。

現在持有金沙（30）一手
京信（3.36）一手

雖然無蝕錢，但希望能有更好的被動式收入，希望能在兩年內儲夠15萬，本人有兼職但現因疫情不穩定，穩定後可每月約1500收入。請問龔成老師能給予投資建議嗎？

龔成老師：

其實你上述所持有的，都是有質素的股票，只是你用錯了方法，你用了短線投資，所以，如果你之後想有實質的財富增值，就一定要「長線投資」。

現時持有的股，都可以持有，長線就得。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你22歲，這刻應該集中增值。

平穩增長股，及潛力股，都是你的方向，你這刻投資經驗仍未多，平穩增長股可較多，之後就應慢慢增加潛力股。

你可以考慮盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382），但就要明白波動性比上述會高少少，宜股價回落先考慮。

現時大市處合理區，可以一邊投資一邊留現金，暫時你持有$4萬現金，唔建議心急用，等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17500：

龔成你好，依家手持81，買入後跌咗6%，仲應唔應該hold 住先？你覺得佢會唔會升番上去？

另外月供緊 2318 $1500，2800 $1000，1810 $1000。
想問下呢個組合可以嗎？Thanks

龔成老師：

中國海外宏洋集團（0081）集團之主要業務將維持作房地產發展，及於中國內地進行投資。整體質素算是不過不失，但增長力不算好強，是平穩增長型，持有都可以的，不過佢的負債唔少，唔建議持有太多。

至於月供的股票，都是有質素的，可長線。如果日後有更多資金，可以加大盈富（2800）的金額。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。