［大家樂盈喜］要不是「保就業」？

TLDR：都係多得「保就業」先有錢賺有息派。3.5億純利，但拎咗4.6億「保就業」。

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

1. 都有點複雜，但大約係咁。首先再鬧一次，大家樂財年係4月1日至3月31日，「扮日本仔咩」，係好麻煩的。以下講啲日子區間，全部含頭含尾。

2. 咁今次嘅「盈喜」，係全年業績，嚟緊應該6月出。2020年4月至2021年3月（都話好煩架啦），會賺3.5億。相比之下，之前一個財年，2019年4月至2020年3月，只係賺7400萬。嘩，多賺幾倍，「點解股價唔係升幾倍？」「點解盈利跌仇成股價冇跌九成」「點解蝕錢間公司仲未破產」

3. 但首先講返大家樂近幾個半年嘅表現先。近年已經唔多搵錢，嘢食難食並唔係一個問題（有好食過？況且，麥當勞道指成份股添，好好食？），最低工資呀難請人呀租金呀之類。後期仲有啲社運影響

4. 咁你見我地由右邊掃過嚟，2019年4-9月，賺緊1.5億。去到2019年10月至2020年3月，疫情來襲嘛，蝕錢啦，蝕7600萬。所以埋單，2019年4月至2020年3月，只係賺7400萬—就係今次盈喜嘅「舊基數」

5. 然後去到疫情爆發下半年，2020年4-9月。公司已經轉賺1.6億，仲勁過疫情前嘅1.5億。點解？因為立咗3.2億嘅「保就業」！亦都可以話，唔係「保就業」嘅，一早蝕錢（當然唔會執，30億book，仲要冇負債—指冇銀行貸款冇債券啦，平時拖恭應湘嘅唔計）

6. 關於呢個「保就業」，之前都寫過，都有其他公司（例如大快活）搞到出盈喜，甚至派息。咁亦係睇你點演繹。即係你話你交Patreon畀我嘅錢用咗去養埃汾太又得，話去咗我食方榮記屙返變屎都得，錢冇記認（除非整個區境鏈NFT）。同樣地，你「保就業」就係為咗出糧嘛，咁公司既然無炒人有出糧，就冇濫用。咁慳咗呢舊錢，自然就賺錢，咁賺錢就當然似乎可以派息的。至於係咪用「嗰舊錢」派，就睇點演繹，理論上「嗰舊錢」係出咗糧，而公司唔使出—但冇「嗰舊錢」，可能公司就炒人啦喎，「都係唔使出」。所以呢啲只係意識形態之爭。正如負面啲嘅你覺得交稅去咗噴水池，正面啲嘅可以話去咗資助中學生大學生（然後等佢地長大再屌鳩你）。

7. 咁今次全年業績，都係好明顯多得拎「保就業」。全年（2020年4月至2021年3月）會賺3.5億嘛，咁上半年（2020年4-9月）賺咗1.6億，下半年（2020年10月至2021年3月）咪賺1.9億。

8. 然後有個少少嘅技術問題，「保就業」分兩期出，我幫你查埋，兩期大家樂都各拎2.3億咁滯。不過，留意大家樂上半年（2020年4-9月）已book咗3.2億保就業？點解？好簡單，部份第二期嘅「保就業」都book埋落去。第二期嘅錢應該（應該係？）一次過拎，但當然可以部份accrue返去公司上半年財報，基本會計嘢啦。

9. 亦即係，公司下半年（2020年10月至2021年3月），照計就只會book 1.4億嘅「保就業」，而公司同期應該賺1.9億。咁所以，理論上，都唔係完全靠「保就業」先賺錢。「唔知你條氣會唔會順啲」。不過睇全年計，4.6億「保就業」，3.5億純利，仲應該會派息添（中期都派咗啦）

10. 「其實呢，唔想搞咁複雜嘅，教你一個好簡單嘅方法睇」，你睇毛利咪知咯，冇計任何「保就業」。由疫情前半年5億，到之後2.3億，1.4億 — 最近呢半年又有冇好轉？難估，但目測可能仲惡化，但見底啦啩？

11. 又，都係不吐不快，而家大家樂出咗款50蚊嘅早餐！（你冇睇錯）。幾好食的說，我食得幾滿意。不過貴集團嘅凍奶茶真係相當難飲。我當然係蘋果同蘋果比，明顯地大快活美心MX（樓下冇，so sad）麥當勞KFC嘅凍奶茶，都係好過貴集團嘅。不如搵人反映下？一杯奶茶好重要的說。

12. 支持埃汾食50蚊早餐，記得訂Patreon．你心諗九兩菜，你自己都未食50蚊早餐（most likely）．但，「其實你去睇英超睇演唱會都係咁架啦」。

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

［航空公司仆街受惠股］就梗係當舖。當然小仆街好了，大仆街就大家都唔掂。同租客一樣。今朝升5%呀！

明報原文（https://bit.ly/3cugLwU），下面都有。嚟緊會寫多幾篇

1. 試新嘢，唔好寫嚟寫去都匯豐（5）王維基（1137）騰訊（700）阿里巴巴（9988）大家樂（341）國泰（293）啦下。不過呢間都同國泰有少少關係，就係中銀航空租賃（2588，下面簡稱中銀航空，但留意係做租賃，唔營運客運貨運）。

2. 隻嘢係中國銀行（3988）拆出嚟，2016年上市，而家中行仲渣住70%。1993年成立，原本係新加坡航空租賃，原本股東係星航，GIC同淡馬錫（三為一體都係坡國政府）。2006賣畀中國銀行（我覺得有啲政治），2016中行拆出嚟上市。

3. 睇返之後市值同當年中行作價，中行呢壇投資算係不錯。計舊年高峰時，中行個投資14年升5倍，仲中途年年收息（不錯的），算OK。股價呢？上市40蚊舊年80年，4年幾一個開，也不錯。

4. 航空租賃做乜？都唔係太難明。同波音或空巴買飛機返嚟，租畀航空公司收錢。飛機咁貴，咁買機錢何來？一係發債一係問銀行借（所以銀行背景好重要）。點解航空公司唔自己買要租？一來可能莫財，二來唔想孭咁大舊嘢在自己公司盤數，三來多啲彈性。不用講，門檻相當高，主要係個資本同埋關係網之類。技術就唔係射火箭，亦冇咩專利或品牌。

5. 股價舊年升到上80蚊，今年梗係插水，插到見過33蚊，唔見六成。當然係因為肺炎，冇人坐飛機，航空公司大檸樂，分分鐘破產冇錢找數。但你見反彈都好快，而家50蚊，但同高位比仲跌咗四成。

6. 關鍵係，有冇聽到有大型航空公司執笠？冇噃。好多都大得不能倒，累銀行相對事少，多人失業事大。例如波音（唔係航空公司），侵侵講明不能倒。請咁多人，又係美國最高科技嘅象徵，選舉年波音爆煲，等於自殺。航空公司情況都差不多。大航空公司連環執笠，似乎機會不大。

7. 我甚至大膽覺得，中銀航空係得益者。點解？邊個有錢咪話事。舊文寫過，國泰水深火熱（https://bit.ly/3ahdz6b），賣六架飛機比中銀航空，然後租返。咁你可以估下邊個求邊個，terms又會點．同樣地，傳國泰叫停咗原本買波音機嘅計劃（https://bit.ly/3bmOlVt），改為延長啲舊機嘅租期—又係中銀航空。波音當然屌晒鬼（但預咗），中銀航空咪多謝晒。

8. 仲有，中銀航空啲機，當然係同波音空巴買。呢啲時勢，點都係買家有話事權（當然要大幅劈價冇乜可能，始終兩間玩晒）。

9. 航空公司破產點算？大嘅應唔會，細嘅，難保。但正係有風險先係50蚊畀你買。仲有，當然公司係分散風險，成百間航空公司，亞洲美洲歐洲非洲，40個國家，總唔會齊齊爆。之前咩靠匯控做退休金嘅，應該學習下。

10. 真係有客爆煲都好，留意飛機係中銀航空嘅，大不了拎返嚟再租畀人或再賣—個客總不可能賣咗我隻機自己拎錢走佬。

11. 加上中銀航空背後係中國銀行，甚至都唔使講到背後係匯金（即係中國政府）。要短期支持下甚至成間買返起，應冇乜問題。

12. 睇返，個行業，就好似幾好賺嘅。中銀航空舊年20億美金收入，但凈利潤成7億美金，三成幾利率！收入八九成都係租飛機出去，另外賣二手機都有少少。支出呢？估下最大支出係乜？就係折舊，一大堆飛機在手喎。第二當然係利息開支，借埋銀行咁多錢。人工開支都唔細，我冇細睇，但段估唔係請好多人，請得嘅都高人工。當然，touch wood 有客爆咗煲，甚至炒咗架飛機落海，就都會係開支（最後邊個賠呢？就唔知，係個客賠？保險賠？斷估唔係租賃公司食晒掛，你使用唔小心喎）

13. 公司往績極好，1993年到而家，年年賺錢。當中經過亞洲金融風暴，同金融海嘯。當然過去不保證將來，而今次對航空業，至少對航空公司同飛機公司嘅挑戰，可能真係1993年以嚟最勁。又睇下今年使唔使斷擔挑。

14. 另外，講到個營運模式咁無敵，咁但，「咁著數點解冇人做」？答案都係有人做，但門檻高嘛，主要係芬定方面難搞。有銀行撐腰就易啲。

15. 另一間，中國飛機租賃，1848。早中銀航空少少上市，但股價就極難睇，過去幾年都係原地踏步，買嘅輸錢多。分別？我估因為規模細好多，同埋因為股東係光大—香港間165，唔係光大銀行（雖然最後都係光大集團），同埋亦唔係渣過半。我見1848啲融資成本好似高好多

16. 當然了，其實呢門生意，你都可以話風險高。資產就一大堆飛機坐住，件件貴嘢，年年折舊，你租唔到出去都要折。負債就大量貸款。所以你見啲負債比率好重，中銀航空講緊3倍（負債係股本3倍），1848嗰啲好似……..10倍！咁不用多講，槓杆重嘅企業，逆境就易出事的。

17. 所以，你睇表面，1848 個 ROE（股本回報，純利除股本）25%，中銀航空15%—但你用10倍槓杆，人地用3倍，咁你話呢？況且人地有銀行背景，理論上受風險能力高過你。

18. 呀重有，其實近年市場呢，都係鍾意asset light model．人人搞平台，唔好責住啲嘢在balance sheet．Facebook有乜資產？阿里巴巴有乜資產？古語有云：The world’s largest taxi firm, Uber, owns no cars. The world’s most popular media company, Facebook, creates no content. The world’s most valuable retailer, Alibaba, carries no stock. And the world’s largest accommodation provider, Airbnb, owns no property

19. 不過，隨住UBER又潛水（至少上到市！），Wework又死咁大半，呢套嘢係咪仲鐵律，就wait and see

20. 埃汾慣例，導讀寫得長過原文，其實等於寫篇新嘅畀你。下面有埋全文- 你想再睇多千五字的話

————————————————————————————
版務：收費專欄已推出，支持埃汾高質文章。幾舊水睇三個月，一星期三篇

請去呢度訂：bit.ly/2wVXndj
課程編號填: CC01
科咗水後後有Login及Password畀你

逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。

—————————————————————————

李聲揚：國泰落難受惠股：中銀航租

【明報專訊】先說段舊事，2006年12月15日，小弟投身證券研究行業不久，記得那天是星期五。為何記得？因為那天小弟便服上班，收市後接到公關公司電話，中行（3988）將有發布會，小弟便服出席。結果是中行宣布收購新加坡飛機租賃100%股權，公司成為中銀航空租賃（2588）（下稱中銀航租，但留意公司從事飛機租賃，並不營運客機貨機），作價75億元。

10年後，2016年，中行將中銀航租分拆上市，就是現在的2588，IPO價42元。上市後業績和股價均平穩上揚，去年高位約82元，差不多較IPO價升一倍。高峰時，中銀航租市值是570億元。當然上市後，中行只持有70%股權，當時約值400億元，但和當年作價75億元相比，14年升值5倍多，再計及中途派息，仍算是不錯的投資，比不少中資收購都好。

今年初，中銀航租股價仍接近80元，但3月則曾跌至33元，高位蒸發一半有多。投資者恐慌拋售，當時看來很合理。疫情對股市最大的衝擊不是人命，而是封城，經濟停頓，而航空旅遊酒店相關股當然是重災區。投資者擔心航空公司破產，或會禍及中銀航租。現在市場氣氛大幅改善，國泰（0293）等低位反彈，中資航空股也強勢。中銀航租也低位反彈，但離高位尚遠。筆者相信現在值得留意，而之前對公司財政狀况的擔心，也應該是過慮。

首先留意，航空或飛機公司的情况，當然是相當惡劣。但讀者回想一下，有沒有聽到有大型航空公司倒閉？好像沒有。原因？當然是因為政府相助。波音飛機（BA）是美國總統特朗普的至愛，也是美國頂尖科技的象徵。但若此輪沒有政府救助，公司早已倒下。特朗普倒也誠實，早已打開口牌說明波音不能倒。今年是選舉年，波音飛機是大僱主，也是美國的驕傲，若讓波音倒下，特朗普等於政治自殺。公平說句，換着誰做美國總統也會這樣決定。

航企困境 轉租飛機
航空公司的情况也差不多，衝擊金融系統事小，大批人失業事大。航空公司在好景的年份，將現金用作回購，現在要求政府打救，當然會令部分人憤怒，但至少航空公司普遍從來沒賺大錢，高薪也只限於某些極高層，加上有漂亮空姐英俊空少助陣，形象總比2008年華爾街的貪狼好。筆者甚至大膽猜想，中銀航租將會是航空公司陷入困境的得益者。此話何解？

留意國泰3月中公布了極其難看的2月營運數字，並指出公司單月虧損已達20億元；同一晚亦公布變賣7架飛機，金額約60億元，並且租回，對手正是中銀航租。國泰「變賣家當」明顯是迫不得已，但也是唯一選擇。此類Sales and Lease Back的安——排，公司困境時常用。例如壹傳媒（0282）早幾年有財務壓力，應對方法就是出售台灣物業，再租回。不過壹傳媒錄得收益幫補盈利（因物業早年買下，升值不少），國泰出售飛機則沒有獲利。

然後上星期五，另一宗國泰的新聞，也和中銀航租有關。報道稱國泰將會取消波音飛機訂單，改為從中銀航租延長10架舊飛機的租賃，原因當然也是因為莫財。波音可能憤怒但應早已料到，中銀航租則是冷手執個熱煎堆，可以說句多謝。

風險方面，投資者最關心是：會否有航空公司破產？大型的應該不會，但小型的則有可能。風險的確存在，但正因如此，中銀航租股價才離高位尚遠。即使有航空公司破產，筆者相信損失仍是可控，原因正是因為分散風險（匯控（0005）的小股東可以學習一下）。公司客戶近100家航空公司，遍及近40個國家，亞洲美洲歐洲非洲均有客戶，同時爆煲的機會極細。而即使有航空公司破產，留意飛機屬於中銀航租，再賣再租也有價值。即使在最壞情况下，中銀航租公司屬於中國銀行，提供短期支持，甚至股權融資，應絕無問題。

最後，留意公司的歷史股息率超過5厘，但千萬不要當作是收息股。不錯，公司的派息政策是將35%的純利派出，但政策當然可以隨時更改而不預先通知，况且若公司純利下跌，派息也將下跌。所以只應視派息為錦上添花，不要迷信5厘息。

（筆者為證監會持牌人士，沒持有上述股份）

Puma addidas都是這樣，所以沒有問題的

馬上like facebook: Chief Stock 首選股票
立即訂閱youtube:  https://www.youtube.com/channel/UC_UMkttHTmO59-dwoyJTwnQ

【大家樂與大快活多年世敵 創辦人竟是兩兄弟？】

說到香港的經典快餐品牌，相信大家樂及大快活大家都不會陌生，但不說不知，多年以來看似都是世敵競爭對手的兩大品牌，原來創辦人竟然是兩兄弟？他們來自香港的名門望族羅氏家族，來看看他們創立品牌的故事！

羅氏家族在香港是，父親羅進興共有9個兒子，兄弟排行中，排第7的羅桂祥創辦了維他奶，排第8的羅騰祥創辦了大家樂，而排行第9的羅芳祥創辦了大快活。 這3間上市公司在港總資產超過500億港元，堪稱是飲食王國的傳奇。

在1940年，七哥羅桂祥創立香港荳品有限公司（即維他奶前身） ，其產品在香港深受年輕人喜愛，當年更舉辦維他奶先生選舉，到訪不同學校派豆奶試飲，售價相當便宜，當年只需2毫子。直至1950年代，已達到每年賣1,200萬瓶的紀錄，可見維他奶的受歡迎程度。

八哥羅騰祥和九哥羅芳祥原本同於香港荳品有限公司工作，而八哥羅騰祥決意開創港式快餐店先河，在1968年創立大家樂，為香港第一間快餐店。當時主要售賣漢堡包、雞髀等，亦首度引入自助餐飲模式，讓客人自助點餐和取餐，方便追求快捷效率的白領，令這個自助風氣開始流行。除了自助餐飲模式，大家樂當時也是香港首間做電視廣告的飲食公司，可見其創新大膽是其成功因素之一。

後來，九哥羅芳祥亦模彷八哥，在1972年離開工作近30年的公司，創立大快活。他模仿大家樂的行銷手法，同樣採用自助餐飲方式，更曾進軍內地市場，可惜終告失敗，有數年的虧損，直至由第二代接手時，全面改變餐廳形象、品牌方向和食物質素，將品牌全面年輕化，讓大快活起死回生，成為香港快餐店的龍頭之一。

大家樂開創使用自助形式取餐的先河，也中西合璧，採用半中半西的餐飲模式，更是香港首間上市的飲食集圑。羅騰祥表示香港早年的茶樓、冰室、涼茶鋪、大排檔等都是坐下來有伙計招呼，但大家樂則要排隊買，再拿托盤取食物，十分適合追求快捷方便的白領族，帶動本港自助飲食文化。

大家樂的成功引來九弟羅芳祥的仿傚，如70年代時大量投入電視廣告作宣傳、增加人手以提升效率、延長營運時間、增設各區分店、設立中央食品處理中心。

但在90年代初，大快活在經營上出現困難，無法掌握顧客的口味，食物的質素也變差，導致負面的品牌形象，令公司持續5年虧損，接近破產。

在2003年中，大快活對商標、室內佈置等方面進行大規模形象改革。這次形象工程成功令大快活起死回生，令營業額大增，更吸引到較年輕客戶群。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
每逢週一、週二港股交易日1700-1800，Chief Stock為你呈獻「拆解收市」，每逢週三、週四1330-1430呈獻「直擊開市」，直播討論即市焦點，探討財經熱門內容，分享實戰投資策略。
訂閱以下平台了解更多即時投資內容:
Telegram：https://t.me/chiefstock
YouTube：https://www.youtube.com/channel/UC_UMkttHTmO59-dwoyJTwnQ
若有任何投資策略、股匯商品的新聞稿或廣告合作，歡迎inbox給我們，或電郵至info@chiefstock.com

香港出現過唔少連鎖餐廳、酒樓或快餐店，陪伴著唔少人度過愉快時光。幾十年來，各式各樣嘅快餐店陪住香港人成長。有啲仍然風光，有啲只能回味。你腦海閃起嘅有冇哈迪斯、陽光一代同出奇老鼠？香港飲食業一直競爭激烈，好多都風光一時。選出呢十大，你哋又食過未？ Text: Wong Ki

10) 烤雞大王
喺KFC未壟斷快餐雞市場嘅80、90年代，香港出現本土專攻食雞嘅快餐店－烤雞大王，分店多數位於日資百貨公司food court。戴上膠手套手撕全隻燒雞，配埋粟米真係非常美味，令到另一同業大家樂出「燒春雞」系列打對台，可見點樣風靡一時，可惜只得一時。港產片《最佳損友》，劉華同陳百祥等人食雞食到津津有味，就係喺烤雞大王取景。

9) 農場餐廳
農家意粉前身就係農場餐廳。農場餐廳係香港90年代興起嘅連鎖餐廳，主打簡樸西餐，以抵食、真材實料見稱，高峰時全港分店近50間，只可惜老闆陳興濤喺97年金融風暴破產，全線執笠。2000年代尾東山再起，開「農家意粉」，有分店，結果蝕成千萬，今年年初最後一家都執埋。

8) 金龍船
2000年左右狂擴充餅店同酒樓，應該係為咗上市。賣嘅點心同西餅好靚，價錢當然亦有份量，又賣過廣告，主角係蕭正楠。2003年受沙士影響，生意差，最終捱唔住全線結業。

7) 東東雲吞麵
相信好多人大多透過電視廣告認識呢家粉麵連鎖店，「東東麵，非常麵」，又唱歌又急口令，宣傳包裝真係一流，八十年代時期，東東雲吞麵快餐店業務發展蓬勃，可惜食物品質參差不穩，選擇不多，00年後陸續結業。現在喺超市間中見到東東急凍雲吞同水餃。

6) Wendy's
90年代香港出現好多美式連鎖快餐，除咗Hardee's仲有Wendy's，俾香港人多個選擇。Wendy's是第三大漢堡包快餐連鎖店，80年代以「得意妹」為名登陸香港，惜三年後敗走。91年以「雲狄斯」之名再進軍香港，高峯期擁有11間分店，可惜宣傳策略始終不及麥當勞，未受小朋友歡迎，06年撤出香港。

5) 陽光一代
當年在玻璃櫥窗前看着師傅轉動手上的薄餅，是80後小學生每天放學後最愛的節目。最記得當時其中一間舖喺沙田新城市廣場，現在近GAP服裝店果個位置，門面有塊大櫥窗睇到師傅轉Pizza，成為當時小朋友一大娛樂。屬於香港公司嘅陽光一代，由開餐廳轉型其他界別求存，例如中小學飯盒，仲有「波仔飯」，越做越大。

4) 馬里奧餐廳
專攻意大利口味食品嘅香港連鎖餐廳，裡面有咩食冇咩印象，但最記得係首電視廣告歌，有個疑似著名意大利男高音盧奇亞諾·巴伐洛堤唱歌介紹餐廳嘢食，之後有個細路大叫Mamma Mia。仲有《國產凌凌漆》銅鑼灣皇室堡槍戰一幕背後嘅餐廳門面。呢間屬於大快活集團嘅餐廳，似乎不敵同業Pizza Hut，最終逃唔過易手倒閉命運。

3) 雅香園
70年代的香港人，對24小時營業的雅香園不會感到陌生。
對呢間港式快餐店有印象嘅多數都係70後。專賣中式粉麵，80年代風行一時，希望可以殺出條中式快餐血路，當時仲推出24小時營業，創了香港飲食先河，聽前輩說，餐廳不衛生，係執笠其中一個原因。
P.S. 雅香園曾賣過電視廣告，主角係Beyond黃家強

2) 出奇老鼠
呢家80年代風行嘅美資連鎖餐廳好多人都記得，食Pizza又有室內遊樂場，咁樣crossover法真係好獨特，亦令小朋友樂而忘返，但最終都撤資返去美國，歡樂天地取而代之。

1) 哈迪斯
美國連鎖式快餐，90年代進軍香港。80後對於哈迪斯有深厚感情，除了炸薯圈，蘑菇飯最深入民心，可惜不敵肯德基及麥當勞，最終 2006年全線結業，原因係租金同經營權嘅問題。事實止Hardee's風光時期香港、台灣、新加坡、日本等都有分店，而家縮到只可以喺美國及中東地區先食到。

Source of clips:
香港九十年代廣告 ＊ 美心快餐
https://youtu.be/FvwT0a05pDk
[經典廣告] 1990年 - Fairwood 大快活 (大快活早餐 朝朝咁滿意)
https://youtu.be/IO8kU11PU6w
[香港經典廣告](1995)肯德基 KFC 巴辣雞漢堡
https://youtu.be/ljKMygZ2Lus
[經典廣告] 1984年 - Cafe de Coral 大家樂 (為你做足一百分) (張艾嘉)
https://youtu.be/7kv-H09lGPU
[經典廣告] 1987年 - 麥當勞餐廳 (點點滋味餐)
https://youtu.be/YHngo81X2xc

References:
香港十大 十大消失連鎖食店
RoadShow 路訊網
http://www.roadshow.hk/hk-top-10/living/item/21578.html

香港經典電視廣告歌，你記得幾多？Hong Kong Classic Ads Song Medley 香港經典電視廣告歌Medley串燒:
http://youtu.be/QicfiPyKFR0

Help us caption & translate this video!

http://amara.org/v/W8ms/