#gfmurmur9231 我同前男友都係21 同前男友讀同一間大學先識，拍左幾個月拖。自問我都對佢好好，而佢都算對我唔差。但係就feel唔到佢係真心鍾意我。加上大家宗教信仰唔同，我無教，佢有，佢思想比較傳統，一齊緊嘅時候佢都有提起過話:想搵一個同佢一樣有宗教嘅女仔，同我一齊嘅時候好多野都達唔成共識，覺得咁樣唔會行得長遠。咁我覺得佢其實都講得啱，同埋如果佢有咁諗過嘅話即係其實冇打算同我拍長拖。所以最後雙方決定和平分手。 因為只係拍左幾個月，都唔算好耐，所以分手既時候冇話特別傷心，我一兩個禮拜就已經move on左，覺得分左手就唔好再翻轉頭。宗教唔一樣都唔係一啲可以改到嘅嘢，既然係一段唔會有結果嘅感情，唔適合既話就無謂再浪費大家時間同青春，所以好快就放咗手。 但係呢個都唔係重點，重點係，由分手嗰時到依家，都已經有半年，但係佢一直都喺度騷擾我。啱啱開頭分手無耐嗰陣就係咁message我，我驚自己會心軟走去覆，所以就即刻block左佢個號碼。 嗰時以為係正常，大部份啱啱分手既情侶都可能唔會即刻放得低。冇再特別去諗，只係諗住過多排就唔會有事。 點知一直冇好過，佢可能知我block左佢電話，居然開咗個新號碼，再message我。我同佢講當初分手都係為大家好，叫佢都係時候放低段感情。佢嗰時就應承咗唔會再搵我，咁我後尾就block左佢個新號碼。 點知再過多陣，佢喺Snapchat到想加返我，但係我唔想再繼續拖泥帶水，唔嗲唔吊咁，所以好決斷咁block曬所有social media。之後又喺Snapchat見到佢想加返我，仲以為Snapchat有glitch， 明明block左又會彈返出嚟。陸陸續續重複左幾次覺得怪怪地，有啲唔對路，去setting㩒翻個blocked list出黎睇，先見到原來佢總共開咗五六個fake帳，每個username都好似，只係username入邊既底線擺喺唔同地方，所以我先以為係同一個帳號。 (例如第一個帳係 _chriswong 嘅話，第二個就會係 chriswong_) 唔止snapchat，Instagram都一樣，我個ig set咗做private，佢就猛咁request，block完又開新帳再request，一路循環，加加埋埋都有十幾個fake accounts。 我見一個block一個，block到煩。點知佢一路都唔放棄，block完佢就只會又走去開多個新帳，完全零作用，所以最後就直接扮睇唔到，無再去理。 之後靜左一排以為佢終於放低，點知唔係。我真係太天真，居然俾佢諗到可以用學校嘅email share個Google Docs俾我。我真係點都諗唔到可以用呢招。內容就大致上話叫我唔好再block佢，想復合嗰啲。我無理到，Set咗佢個email做spam，佢再send啲email，share啲docs過嚟嘅時候就會當垃圾郵件。 一開頭以為放唔低係正常，點知越嚟越癲。由開新電話號碼，十幾廿個ig sc fb假帳，到share google doc，send email真係乜都樣樣做齊。 唔明點解都已經過咗半年仲一路唔肯放棄，明明嗰時提出話想分手嗰個係佢，依家想復合又係佢。分咗半年仲要繼續騷擾我。明知我唔適合，但係又唔放過我。我由分手後一路都冇主動搵過佢，唔想再有無謂嘅瓜葛，加上自己都好快就已經放低左，但佢就一路都唔肯放過我。嗰陣明明已經講清楚唔好再搵對方，為大家着想。後尾都有打返電話比佢講唔好再搵我，佢做啲咩，點死纏爛打都唔會令我改變主意。但係好似對牛彈琴咁，講完應承完又會繼續騷擾。 究竟點樣先可以制止到佢？block 佢，唔理佢，同佢三口六面講清楚，扮有新男友，呢啲方法全部都做過曬，無咩作用。佢到尋日都有繼續喺Instagram度dm 我，令我諗返起之前仲拍緊拖嘅時候，佢仲會stalk前女友既ig ，睇佢同佢新男友既相，而依家就由stalk佢變stalk我。好後悔當初無早啲發現唔妥，早啲分手。開始覺得好驚，好似啲恐怖情人咁，陰魂不散。以為時間會將一切沖淡，會令佢放棄，點知過咗半年都係咁，一啲好轉都冇。已經嘗試唔去理，當睇唔到，但係間唔中又收到佢嘅訊息。真係好煩好困擾好無奈，完全束手無策，好似腫瘤咁，切除完會復發。完全唔想復合，只係唔想佢再騷擾我。我可以點做？係咪要等到佢有下一個前女友，佢先會去stalk佢唔stalk 我，先會放過我？想聽下大家既睇法，有冇一啲真係可行嘅方法可以令佢放棄？ ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig