【刑偵II】方健儀笑大宇讀錯啫時 監製潘嘉德：咁講對演員係傷害 無綫深宵時段重播的《刑事偵緝檔案II》，最緊張的不是調查兇案，而是大勇和Jessie、Carmen的三角關係，而近日劇集亦進入白熱化，講到Carmen的真面目終於曝光，情節如此緊張，不但普羅大眾晚晚追劇，連前無綫新聞主播方健儀，都話一連追了兩集，不過她覺得最奇怪是陶大宇每次叫女友名「Jessie」，都會變成「啫時」，相信這亦是不少觀眾的疑問，看來無綫可以製作睇劇學英文，應該大有市場。 近日不少觀眾當新劇追看的《刑事偵緝檔案II》，劇情終於去到高潮位，講到大勇雖然同Carmen一齊，但就仲掛住Jessie，之後Carmen的真面目更加必定要留意。最讓人意想不到是前無綫新聞主播方健儀，也是該劇粉絲，而她在Facebook留言表示一口氣睇了兩集，煲劇煲到凌晨3點，不過她對該劇有好大疑問，但就不是案情有否犯駁，而是陶大宇每次叫女友名字「Jessie」，都會變成「啫時」，方健儀還說「Jessie係咪真係咁難讀呢？」 《刑偵II》監製潘嘉德接受《香港01》訪問，提到大宇的英文口音，德哥表示「咁講其實係對演員嘅一種傷害，佢又唔係番書仔，香港人講英文係咁啦，覺得大宇好貼地，唔通你哋講話搭巴士、的士，會讀Bus、Taxi。(方健儀Facebook講呢件事)佢(方健儀)梗係有專業研究啦，如果大宇發音咁專業，佢去做咗主播啦。(當時有冇發現大宇發音問題？)我哋當時已經知道，但勉強去糾正佢，反而演出唔自然，我寧願揀最自然嘅演出。」其實《刑偵II》大受歡迎，就算大宇的英文發音，也是港人的集體回憶。 其實好多網民都有上述疑問，仲話「以為大勇搵車匙」、「佢係讀遮時」，也有心水清的網民發現其實大勇在第一輯是叫女友「阿婕」。之後方健儀還跟網民一起討論劇情，又話「Carmen呢兩晚演技令人眼前一亮」，想不到方健儀報新聞時似足女強人，但回到家又會變成師奶仔，睇重播《刑偵II》都咁投入。