讀者投稿《八婆同學自己阿媽篇》

一直以黎喺呢度聽到好多無知奶奶嘅事跡，但其實無知媽媽一樣多！我嘅例子就係有個識少少扮代表嘅阿媽。

話說我係一個初產婦，阿媽一知我有咗就「好好」咁去讀個陪月班（最後肥咗佬嘅）。諗住有阿媽幫手坐月一定好正？sorly，呢個係惡夢嘅開始。

首先，我本身有個真係做陪月嘅親戚（唔係阿媽嗰邊），佢睇住我陀同生，再接我出院。佢知道我阿媽生手，所以接完我出院就上黎示範畀我阿媽睇點樣沖涼、洗面。點知親戚一走，我阿媽就話人手勢唔好，話陪月班唔係咁教。我老豆同老公都話我阿媽睇錯，頭先親戚唔係咁。但我阿媽死堅持佢睇到親戚手勢錯。

對人有無謂偏見都算，識咗班八婆同學先係惡夢開始！

惡夢（一）
話說頭幾日我未好掌握要著幾多衫，成日包實自己搞到勁出汗，又發熱又發冷咁。（生完出汗都好正常）。八婆同學一口咬定我係塞咗乳線，叫我阿媽帶我去仁郎睇急症，話後果可大可小。

都低能！我生完先三日，奶都未有何來有奶畀佢塞？我唔駛讀過陪月都知塞乳線會發燒、或者最起碼會痛/石頭胸喇！

仲有，叫第三日的坐月媽媽去又多人又多菌的急症室？！

惡夢（二）
我當然冇去急症喇，白痴㗎咩。我餵奶pattern 係畀阿囝啜30分鐘再補30ml奶粉。咁其實阿囝係唔夠飽的，所以一餓起上黎喊到拆天。

我阿媽就好怪我唔聽佢同學講去睇醫生，搞到塞乳線冇奶畀個囝飲。然後佢個八婆同學話要補90ml 奶粉畀佢。我冇打錯，你冇睇錯，一個四日大的人仔，補90ml奶粉。

我真係想問條友係咪弱智？一來BB個胃只係乒乓波咁大；二來佢本身食30，你一補補三倍？！你平時一餐食一個巨無霸，下一餐食三個巨無霸吖笨！

但我阿媽信佢信到十足十，我同佢解釋母乳嘅運作，就算未上奶都要畀佢吸。我阿媽講晒所有無知奶奶會講嘅對白，例如「你都冇奶」、「餓親個囝點算」、「喊親點算」、「唔夠飽點算」。

惡夢（三）
呢個真係惡夢中嘅惡夢。

話說頭一日，陪月親戚已經指示阿媽煲通草豬手湯畀我上奶（我知未必個個岩飲），而我飲完確係有上奶感覺，仲上到我諗住第二日要揼出黎。

好喇，死八婆同學黎料，話通草唔好亂飲，好，咁飲咩好？飲雞湯！嘩，正呀！飲完嗰碗雞湯，我冇咗上奶不特止，本身淺啡的惡露變返鮮紅色；都不特止，我子宮痛到我打孖食特強必理痛先止得住。痛到我不能自控地嚎哭！

死八婆陪月請問你係咪好憎我阿媽所以想整死佢個女？我先第五日咋喎，第五日坐月就飲雞湯？

惡夢（四）
梳頭泥問題

話說我發現屋企無喇喇有兩把普通大人用的密齒梳，我問我阿媽，佢話等阿仔大少少幫佢梳頭泥用。而我個仔其實係冇頭泥的......同埋用都唔係用大人梳下化..........

惡夢（五）
我阿媽話喊得多會入風所以會嘔奶，於是勁抱個囝唔想佢喊...............
我以為呢D橋段只會喺奶奶度出現㗎.......

惡夢（六）
呢個唔知算唔算，
反而我奶奶好識做，除咗頭一日上咗黎畀利是我同個囝，仲要只係留咗半個鐘，之後佢都冇上過黎話唔想阻我休息。佢話12朝先再上黎睇我哋。

12朝阿囝要去健康院覆診，其實兩件事係零衝突。但我阿媽竟然「諗住」叫我奶奶唔好上黎。我唔知佢係「諗住」定「已經」叫咗，因為佢哋私下有聯絡。

我都真係幾大反應地同我阿媽講，我話人哋係嫲嫲黎㗎喎，有乜理由唔畀人上黎睇個孫呀？
講真，比起嗰D三日唔埋話要上黎的奶奶，我奶奶好識做喇，同老爺忍到12朝先再上黎。咁樣都唔畀，我覺得我阿媽好極品。

不孝都要講句，我阿媽真係好弱智！如果死八婆同學真係金牌陪月，就唔駛去讀陪月班喇！我陪月親戚做咗十幾年陪月，考晒牌，連湯水呀、嬰兒照顧嗰D牌都拎埋，但我阿媽竟然唔信，親戚都唔信，去信一個識咗一年都冇嘅人。都唔知係咪想我阿媽搞唔掂之後搏我請佢。如果我知佢姓乜名乜，黑心陪月名單見呀真係！

本身有少少抑鬱，呷完真係好少少。我生完先第六日咋......

#退一步海闊天高
#我的極品四大長老

#7個小BB旅行經驗分享

回憶返海馬仔上年第一次family trip 去沖繩，令人難忘。今年我們7月會再度出發去family trip，好令人期待😍 Trip前真係好多野要準備，想分享帶BB出門的小經驗：

👶🏻 #親子遊要輕鬆

同小朋友去旅行行程要輕鬆，唔好排到567個景點一日！因為多行李、又要安排佢地飲食、要比空間佢地適應當地環境

👶🏻 #水源最重要

帶水都好重要，第一次離開居住的地方，小朋友腸胃無大人禁好，容易唔舒服，如果太細的小朋友都建議自備水帶去，不擔心重呀，去到回程前就差不多飲哂啦，個喼會有返位放手信🤣 （我上次買左這個牌子的BB水，飲左幾日都OK）

👶🏻 #包你平安藥

第一次出門要準備「平安藥」，可以去旅行前到兒科醫生話去旅行想攞啲平安藥包，藥物包括發燒藥，腸胃藥，流鼻水⋯講返去幾多日比醫生知就👌🏻

👶🏻 #加固vs輕鬆

上年海馬仔去既時候開始左加固但仲飲好多奶奶，我全程都帶左奶粉在身，去旅行未必所有地方都方便進食加固食物，我就開返奶比佢飲，幾日旅行最重要輕鬆、開心😃 唔洗為左少左幾日加固而唔開心，佢仲有好多日子學習，BB 飲奶飽飽又有安全感多D

👶🏻 #充足要準備

夏天要帶傘☂️、太陽油、毛巾、多幾件衫仔。BB 出左汗會谷住會易病啊

👶🏻 #BB車上機的疑問

帶BB車，留意返一定要在閘口交予機組人員，落機後會在閘口或者行李帶附近可攞返 （⚠️用GB / GB plus 的朋友, 一定一定要用車配的袋先可以手攜上機，如果唔係都要寄艙）

👶🏻 #沖繩BB用品購物好地方

西松屋 Nishimatsuya（買BB野👍🏻）

分店：全沖繩有十二所分店（分店資料可參閱網站：https://www.24028.jp/

Birthday (BB 野靚👍🏻）

分店：全沖繩有四所分店（分店資料可參閱以下網站：https://www.s-birthday.com/

⭐️如果想要物資list參考, 可PM⭐️