睇舊相突然見到自己以前戴眼鏡扮斯文都呃得下人。
最近唔夠瞓好似近視加深左。夜晚揸車仲發現有少少散光添～
可能係時候又要再帶返眼鏡。
有啲咩款式或者牌子好提議？🙋🏻‍♂️

有一種愛，叫 #爸爸的愛

聽日就係大公主生日喇！ 個傻妹成個12月響度倒數，每日都問住瞓多幾多個覺先到19號😆
有一種叫 #廿四孝爸爸，個囡把elsa 梳爛咗會專登夜晚揸車入去樂園酒店買返把一模一樣嘅；
樂園閉園，大小公主今年唔能夠儲到樂園特別郵戳聖誕卡寄俾自己，當呢個爸爸知道酒店有得寄，當晚響鋪頭閂門前趕到去，仲扮米奇寫字✍️寄俾兩個囡，兩個收到真係以為米奇呢個your pal 寫俾佢🤣

早排行誠品見到有本 #公主立體書，點知得display 仲要有defects 所以唔賣，於是拎咗個書號上網搵自己訂。本書噚日到咗香港點知又唔派件⋯呢個爸爸會搵電話打去物流倉自己去拎件🙄

最後不得不提嘅係⋯為咗打造一間公主房俾對囡，年頭同爺爺兩個人砌咗8個幾鐘先砌好嘅sir 滑梯公主床😳

其實早於8月我哋已經密密地收集緊唔同嘅小禮物俾大公主同埋收埋哂，唔知佢聽日尋寶時會有咩反應呢？☺️

#第時俾阿囡睇返
#有些事是要記錄一下 #HKDisneyland
#親子日常 #神隊友 #mimimomoma
#生日快樂 #coolhkg #5歲生日快樂

《為打機的男人平反》

有女性朋友係飯局上面「呻」佢老公成日打機，覺得佢收工就只會打機，覺得好無謂，作為一個都係會打機嘅男人，我決定為打機平反！

每個人都需要娛樂，工作一日之後，我哋需要休息，打機只係一種娛樂嘅方式，同運動、揸車、玩模型等同一目的，就係放鬆。

大家可以話，興趣有好多，點解要揀打機，講真，我有錢的話，我真係可以有好多娛樂選擇，夜晚揸車去食宵夜放風又好，去上紅酒班都可以，同老婆去食餐好嘅再行街都好（雖然我唔知呢樣係唔係仲攰過返工），玩吓音響又得，其實有錢真係可以做好多野。

但問題係，無錢嘛。

如果將唔同興趣列出一個表，然後將佢以花費金額排列的話，打機算係極低極低消費嘅行為，一隻遊戲當係四百蚊，可以打足一個月？甚至有好多免費手遊，我打咗一隻moba遊戲五年，幾乎只用過二百蚊，每年都只係四十蚊，有乜快樂係可以一年只花費四十蚊？我真係想知！就連你去跑步，你換對鞋啊，都要四五百啦，著爛襪都要換啊，跑完步洗衫都要時間心機同水費電費啦！

擁有一個打機嘅男朋友或者老公，你應該要開香檳！因為佢打機，只係係屋企打，佢一舉一動你都可以睇到，至少佢係痴家，同埋佢唔介意同你共處一室，試想下另一半嘅興趣成日都唔係你身邊，你又會唔會開心？

既然打機唔係咩壞事，但點解咁多女性會討厭？其實又唔難理解嘅，當你見到另一半成pat爛泥咁訓係度或者坐係度，的確係觀感上係唔多好嘅，但一個咁嘅人，你仲怕佢走咗去咩，應該要有安全感先係！

打機嘅男人，佢慳家少洗費（重課另計）；
打機嘅男人，佢痴家簡單；
打機嘅男人，佢容易滿足；
打機嘅男人，佢唔會沾花惹草；
打機嘅男人，佢仲係一個大細路，亦願意係你面前流露呢一面。

你話咁可以連機都唔打，做有意義嘅活動嘛，得得得，到我問吓呢位女性朋友，佢平時會點娛樂休息時，佢答我，煲劇，行街，買野時……

其實兩個人一齊，大家都會有各自己習慣同愛好，而呢件事係從來無高低之分，無話做運動就一定係比打機好，如果要尋找意義的話，就唔係娛樂啦，而如果大家係想娛樂的話，打機又有何傷大雅呢？

試吓唔好係男人打機時表現唔耐煩，試吓你睇吓佢打機，講聲加油，唔好玩到攰，打完就陪吓自己，咁呢個夜晚，應該好溫馨。

零晨12點幾呢，吉隆坡好似度度都差唔多收晒喇。不過好多人呢就話街邊好多美食嘅 （望下路先），我呢就真係要去搵吓邊度有呢啲美食，跟住我嚟呀！

夜闌人靜嘅時候，又真係點解呢頭都仲有咁多車來往呢？原來呢度係吉隆坡市中心附近其中一個熱門嘅宵夜點，唔只住附近，有啲人仲揸車嚟食餐宵夜㗎！
呢檔好似好多人，雲吞麵呀，好喇！就佢啦！

老細聽完就馬上行動，即叫即煮。睇埋有乜嘢飲先...... 就要杯海底椰啦嘩哥哥仔你都好熱情喎！睇翻老細呢邊個麵先...... 三兩下手勢，老細拋幾下個麵，再放入凍水過冷河，又再放翻入去滾水淥多陣，拋多兩拋，飛走多餘嘅水就上得碟...

放落個碗加入豉油調味，上碟，再放入叉燒、兩條菜同埋啲配料，喂喂，唔好阻住我影啦...... 搞掂！幫我送埋過嚟呀唔該⋯⋯個雲吞呢？。哈哈原來雲吞係放湯上嘅，後補.......

好喇，終於開始食喇，睇到佢煮已經覺得非常好食，其實我聞到都好香，不過同香港啲雲吞麵真係有少少唔同，呢度嘅撈麵其實就係叉燒撈麵，再加甜豉油，跟住再俾多碗有3隻嘅雲吞放湯，最緊就係呢樣嘢，超辣嘅辣椒豉油。試下先⋯真係好正⋯⋯滋味⋯⋯不過夜晚食咁大碟麵呢，我真係驚一陣間瞓唔着。

我試埋個辣椒先！ 真係好辣

呢個雲吞呢唔算好大隻，不過呢要食落口先知道佢好唔好食。

我呢碟個 Size 就叫大碟，咁就賣11蚊，呀！唔係喎，10蚊，因為我呢個涼水要個半，咁但係呢，我上次食細碟呢，其實係賣 6 蚊馬幣，即係約11蚊港紙，呢一碟就廿蚊港紙，抵到爛！

好可惜呀，胃就得一個，好快就飲飽食醉喇。街邊檔仔食嘢的確好有風味，不過你又真係要抵得住先得，話晒都係露天同埋馬路邊......

要嚟呢頭，你可以 用 Grab 呢類租車App，去 Scott Garden 落車就會見到。Scott Garden距離市中心唔遠，由吉隆坡中央車站 KL Sentral 出發為例，都係10分鐘車程，大約馬幣8-10蚊左右。記住，過咗12點半，啲檔仔就會睇情況閂門㗎！

呢度仲有好多其他嘢食嘅，之後再同大家介紹

第5日嘅下半部我哋揸車去到一個遊客區，江之島 。
江之島環境好舒服，無一般城市嘅熱鬧氣氛，係呢度留一日我認為足夠。

我哋今次同一般遊客做嘅嘢唔一樣，2條友去咗間貓cafe玩到唔想走，搞到天都黑埋。果度啲貓完全唔驚人，好痴人，好好玩。鍾意貓嘅可以試下。

夜晚去咗江之島大街食飯，幾間食肆嘅模式都差唔多，求其揀咗間食咗個足料抵食嘅遊客海鮮丼。

#江之島 #日本旅行 #自駕遊

上水粉錦公路蓮塘尾村，村口有家茶座綠色環抱，暴烈艷陽也被樹葉篩出溫柔閃閃。

1952年，林霆豐的爺爺從惠州來此落腳，開了間雜貨鋪賣糧油茶水。店旁翠竹，正是當年種下來的；側門對聯也是爺爺題字：「坐片刻無限爽快　飲幾杯何等清涼」。

那時上水盡是農田，過路人買碗茶水送清風，如得半日閒；現在販夫明星一樣愛來透透氣，歎幾味。

昔日小茶店，今天馳名茶餐廳，轉捩點始於20多年前，林父病重，霆豐和家姐回歸老巢陪伴母親守店。

年年月月，兩姊弟循環磨擦、合作，都為店好，店也愈做愈好。
更重要是能承歡膝下，無慮樹欲靜而風不息。

「這裏雖然距離市區好似很遠，但短短只是十分鐘車程，已是兩個完全不同的世界。」榮昌茶座負責人林霆豐說。就算盛夏，午市、周末必定爆滿。常客有附近學校的老師、出入馬會會所的顯貴、打高爾夫球的明星、北區醫院的醫生護士，也有車房、地盤工人；假日更是區外一家大細、山友、電單車發燒友……無分階層，全是專程自駕或坐小巴而來。

Helen第一次光顧，點了豬扒包，發現麵包軟熟、豬扒有肉汁又不油，連從不吃的洋葱也覺「好味」，盛讚「好食過澳門豬扒包」。　

住在加州花園的朱總，十幾年天天來，打風也來。「心癮！塌樹、馬路水浸都要來，不來不舒服。」這裏出名的有被蘇施黃稱為最好食的豬扒包、滑嫩多汁BB鴿，而鑊氣十足的炒牛河他也鍾愛。
限量的原盅陳皮鴨湯飯，還有煎雞尾包都是名物，Eric和Connie每周必吃，有時帶上小狗，一坐就是半天。

來的人慢慢歎，做的人就要手快快。霆豐上一刻在修理洗碗碟機，下一秒已獨臂架着三碟飯從廚房衝出來。

茶座是家庭式經營：他是家中老六，乳名興仔，和排第五的家姐林麗金（乳名金仔）主力管理；細佬廚房、電器工具維修；家姐水吧、樓面招呼。母親收銀；排第三的家姐林麗星（嘉菲）帶位；太太Sara、姐夫也會幫手，假日必定總動員。

「話事人當然就是我媽，她控制整個局面。她說一我們沒人說二。」興仔笑言母親好精靈，在背後看得仔細，不時教大家走位，「令到我們打醒十二分精神去做事，不敢蛇王。」

歸巢伴母　守家業
母親楊錦雲，雖然七十有八，但神采飛揚，每朝飲完茶就出來幫手收銀，和客人打牙骹。「細細個見他們讀書挽書包，現在做工了，或者帶孫來探我，當見下老朋友。」事頭婆有個「四萬」笑容，很有親和力。

她20歲嫁給同村的林泉，「以前幾十年無得揀㗎！老實啩……」又笑不攏嘴，「他同老竇開鋪仔，賣油鹽糖仔餅乾。上水黑麻麻無電燈，亦賣火水蚊香。」那是1960年。婚後前鋪後居，生了兩男五女，她主力養豬養雞，丈夫幫忙看店。80年代，茶水雜貨外，榮昌兼賣簡單飯麵。

「老公走了（離世）二十幾年。他有長期病，那時細路仔細，這頭煮飯，那頭沖茶招呼客人。要供細路仔讀書，養雞養豬又要買材料，樣樣都要賒，但無欠人錢嘅，賣到雞賣到豬有錢就即刻還。」她教仔女做生意，要「講信用，有借有還」。

那是刻苦的年代，「仔仔女女都要幫手，細細個就餵雞，企櫈仔煮麵。」排第二的大女讀完小學就回店幫手兼帶弟妹，「金仔、興仔讀到中學，其他四個都出國，兩個英國兩個加拿大，你話辛唔辛苦？」她日頭打理農場、榮昌，夜晚就穿膠花幫補家計，捱到金睛火眼。

結果，養大的仔女一個個往外飛，尋找自己的人生；只有金仔和興仔在91年先後回巢。

50歲的金仔，伶俐爽朗，年少時很倔強，「對家裏有很多不滿，覺得阿媽管我太嚴，我的同學都很自由。」放學她去打排球而非回家看店，激到阿媽生蝦咁跳；曾經有幾次離家出走，好快被人捉回來；讀完書拍拖、揸電單車，母親愈是耽驚她愈痛快。「以前店鋪有爸爸媽媽撐住，我是一個可有可無的人。」後來父親病重，店交外人打理，母親鬱鬱寡歡，於她如當頭棒喝：「自己玩夠了，肩上有個擔子，不可再像以前般任性。」當了母親的金仔，自言當年「很幼稚」。

小她兩歲的興仔，溫和沉穩，不善辭令。當年讀完書也渴望外出長見識，去北角打工，有兩年做過廚房，但漸覺市區生活太壓迫，「返回新界舒服很多，切合自己多些。」想到蓮塘尾有榮昌有母親在，一個心有了清晰的歸向。

那時顧客除了村民工友，主要是貨車司機，「人家過路泊車，要碟茄子飯、排骨飯。有時金仔煮，有時興仔煮。」事頭婆說兩姊弟夾手夾腳，無分你我。今天店中熱賣豬扒，就是她傳授的在家製作：拍得鬆、醃得夠，不用食粉味精。


一家人　難關共渡　
仔女接棒，並不代表就此順遂。那時榮昌一直在賣粉麵飯，但未有食肆牌照（食牌），「我們座落在綠化地帶，申請食牌阻難重重。」金仔記得，食環署不斷來巡查、發告票，她和細佬上庭又上庭，罰款愈來愈多；後來一次，法官警告再犯就要封鋪。「我惟有向法官求情，榮昌不斷申請但都不獲批。法官同情我們，發還所有罰款，又教我如果證明到店鋪在鄉郊條例實施前已在做生意，就可以申請司法覆核。」

「鄉村人好支持，榮昌做了幾十年，大家食了好多年，樣樣有證據。」事頭婆那些日子夜夜失眠。

興仔和金仔四處奔走，找人證物證。「因為這個是我自己的家，也是我的祖業，怎樣我也會做到最後。」興仔說。終於打贏了官司，前後爭取了8年才獲發食牌。

「最大塊的石頭已經移開了，但路一直都是崎嶇的。」興仔指，榮昌主要做熟客，人家吃多了會悶，所以要不斷去找新食物。2000年取得食牌後，客人更多，他們請廚師、水吧，諗到就做，食物款式愈做愈多。入行50年的大廚基哥，做過馬會、酒樓，來榮昌掌勺16年，客家炆豬肉、陳皮鴨湯飯、咖喱牛腩、炸乳鴿……樣樣拿手。
另一方面，興仔坦言跟家姐金仔拍檔不容易。「廿七八年都是繼續磨合：磨擦與合作。」譬如最近，家姐建議用手機取代唯一放在收銀處的電腦落單，省力省時；細佬認為食物款式組合複雜，手機畫面太小不適用。

若在從前，家姐一定激烈行動，像當年她建議電腦入單取代人手，細佬沒立刻贊同，她就黑面三個月。今天，她覺得「細佬未消化」，願意笑着等。

遇上分歧，興仔說一人讓一步，「始終是一家人，（爭拗）大家好多時都是淡忘了。」

「大家都要想住一樣東西：目的都是想鋪頭好。」金仔說。
母親是個聰明人，就算各自跟她說，也當聽唔到，「仔仔女女做生意，各有各方法。有商有量最好，有時拗少少。嬲完，兄弟姊妹一陣一齊食飯又忘記了。」

點點滴滴　都在心
從前為口奔馳，事頭婆嘮叨仔女幫家，放學就要淥麵沖茶餵雞，營役過日，為母者溫柔無從。4年前，眼見三子之父的興仔和兩孩之母的金仔完全困身茶座，她悄悄說服老三嘉菲回來幫手，替補二人管店，讓他們一個返早，一個返晏，多點時間「陪下細路仔」。當年遺憾，她不想仔女重蹈。

趁中午飯市未到，金仔偷空到店前庭院淋花修枝，黃的、橙的、粉紅的小花迎風搖曳，給茶座生色又添生氣。原來當年打贏官司，母親拿出幾十萬給她和細佬翻新榮昌。自此庭院圍了木柵攀了綠藤架了鞦韆，也有了「蓮塘」為誌的英文名Lotus Café。

很多客人喜歡庭院的花，不時拍照，令金仔心花怒放：「放些心機下去，每日少少每日少少，你就見到成果了。」她說，每日堅持打理一下，花自然生得美麗。

店旁竹樹叢、生鏽鐵絲網，金仔曾看不順眼，想除之而後快。可是，母親下令動不得，理由是阿爺年代種下來置下來。「到現在自己年紀大了些，就明白為甚麼阿媽甚麼都不想動。因為每一樣東西都是她的點點滴滴。」水珠澆落她種下的柏樹、萬年青，風一吹，閃閃舞動。

「好似我們經營榮昌一樣，包括客人呀，食物的質素，都是一點一滴的積聚。」

母子親情，手足情誼，何嘗不是？！

採訪：韓潔瑤 拍攝：陳瑞華、關永浩

榮昌茶座
地址：上水粉錦公路蓮塘尾村1號
電話：2670 3388
詳情： http://bit.ly/2NdRYRx

===================================
立即Subscribe我哋YouTube頻道：http://bit.ly/2Mc1aZA (飲食男女)

新店食評，名家食譜，一App睇晒！
立即免費下載飲食男女App： http://onelink.to/etwapp

《飲食男女》Facebook：http://www.facebook.com/eatandtravel

飲食男女網站：http://etw.hk

Follow我哋Instagram，睇更多靚片靚相：http://bit.ly/2J4wWlC (@eat_travel_weekly)