《我做外賣仔的日子》

呼，尋日又做左半日外賣仔，比起第一次做，第二次做明顯有好多唔同既感受，就好似愛情咁，第一次約會總係令人感到新鮮，但新鮮過後，就需要面對現實了，同各位報告下感受，去點：

1）是日都係半日，六個小時，地點係尖沙咀區，南至海旁，北至窩打老道，東至尖東，西至柯士甸站

2）總單數，13單，收入，360蚊

3）當晚約左大學同學食飯，消費400……俾錢個一刻，我好想再打開個apps去補多一鐘，令當日收支平衡

4）極度懷疑系統係有新手優惠，派得特別多單，暗示你聽，好好搵啊，記得做多D！

5）上星期因為被退單，有蝦餃、薄餅、雞翼、肉醬意粉食，原來術語係叫福利餐，而今次我已經成長喇，所有派送成功，無任何福利……

6）是日來回柏麗大道三次，短期內我都唔會再想行呢條路……

7）尖沙咀區比起旺角區舒服好多，我指環境，明顯綠化同公園長椅都有唔少，整體無旺角咁壓抑，而且搵廁所係相對輕鬆好多

8）請叫我渡船街小霸王，呢個範圍，我送左五單，雖然每單既等待時間都有五至十分鐘，但送餐距離極短，短到點呢？就係間餐廳係樓下但客戶都唔想落街咁既距離，每單都有25蚊以上，當時我感覺原來賺錢就係咁簡單

9）距離短，錢好似好易搵，但計返數，原來重點係唔停手地做先係搵到錢，今次只有一次同時拎兩份外賣，比起上次連續3次搵住3個外賣比，感覺到付出幾多，收獲幾多

10）是日最遠派送，係尖沙咀I Square去佐敦永安，仲要係4人餐，果斷搭巴士，車費6.8，點知去到佐敦再次陷入漫長等待，早知慢慢行過去……

11）無單既時候，我企左係譚仔門口，希望譚仔可以賜單比我，點知旁邊有個南亞同事都係度等緊單，你無聽錯，自從成為外賣仔之後，我係街上面見到外賣仔都會心諗，又有同事開工，會給予佢地一個加油既微笑！

12）閒來無事同南亞同事吹開水，佢都係步兵，已經做左兩年，比起我呢個做左兩日既，佢絕對係大師兄，佢一日最少做12個鐘，鋼條既身型，比起我呢個行半日就去按腳既廢柴，我諗佢做完12個鐘都仲可以去兼職按腳多幾個鐘！送外賣用腳，手唔攰可以再用埋佢

13）南亞同事月入差唔多三萬，同幾個同鄉夾租，每月2500，佢夢想係搵到錢開間雜貨店！感覺就好似香港人移民硬係想開埋小食店賣雞蛋仔，文青總係夢想開間Cafe咁

14）問佢公餘有咩做，佢話打排球，剛好小弟年輕都係排球校隊打過學界，但我見佢差唔多一米八，壯碩既身型，強勁既臂彎，我婉拒左佢邀請我閒時打友誼波，我怕比佢打死

15）傾傾下系統派單比佢先，佢同我講，因為佢係老鬼，同地點有多過一個人都會派單比佢先，我當時心諗，頂，你唔早講，佢用一個朋友，你返印度食蕉既表情同我講，下次同到佢班南亞兄弟就記得唔好一齊等

16）佢工作好認真，真係當係職業，而我就係玩味性質，原因好簡單，因為佢係巴基斯坦搵幾千蚊都做到成隻狗咁，依家派外賣比起以前搵多成十倍，感覺好似當年我去澳洲工作假期比當地人問我點解咁鍾意返工，當時我答佢，香港做麥記20蚊一個鐘，澳洲做又係20蚊一個鐘，但係澳紙既分別

17）是日太無聊，所以我係七仔特登買d平時唔飲既冷門或者新飲品，林家謙代言既清。麥茶都唔錯，紅茶花傳既檸檬紅茶幾好飲，但原來成15.3g糖……

18）尖沙咀區送The Austin同Grand Austin最花時間，要落隧道來回，荒島黎，但大型屋苑既保安服務真係做得比較全面，拉門既都好有禮貌，同日送窩8，樓下阿姐真係有少少無禮貌，唔係對我，而係一個順豐哥哥佢拉住貨入黎，佢嘈左幾句，但順豐哥哥無理佢就入左lift

19）今次我比上次做多左樣野，想睇下分別，就係我今次拎到外賣，同送到樓下，我都會Msg客人同佢講我出發喇，我差唔多到喇，送到我都會msg佢地用餐愉快，到底呢個行為會唔會令我多左Tips呢！！？？

20）答案係無既，可能我既服務仲未夠好，但我又覺得咁send個msg比客，都係認真對待呢份工作，令客人多左一份安心，自我感覺良好，下次我會再接再厲睇下點先有tips！

21）收到張單係送食材，蕃茄薯仔豬骨，應該係煲湯，平時我自己買只係50蚊左右，但有人用差唔多高一倍既價錢去享受服務

22）外賣呢樣野，真係一種時間同金錢既交換，有人分分鐘幾十萬上落，佢花費幾十蚊去慳返時間搵更多錢，或者休息，一路送我一路覺得係對整體社會發展係好事，因為人可以做更有價值既事

23）感覺到外賣都不斷升級緊，係外賣盒、外賣速度、包裝等等都感到比幾年前好太多，以前你食個麵要分湯？真係叫都未必有！依家分湯好多唔講明都會分比你，感覺外賣自取同埋派送對於一個人食飯都係一種趨勢

24）睇返譚仔上市資料，幾年前堂食外賣比重都係8：2，依家已經差唔多6：4，世界唔同左，仲記得當年沙士打開左網購既潮流，而上年疫情就改變左堂食習慣，有好多野唔迫到埋身真係唔會成長

25）是日趣事，我左手拎住電話，右手拎住外賣，個客開門之後我遞左電話比佢佢呆左；一個上身赤裸既男人拎外賣，我覺得睇到佢身體要加錢囉

26）暫時對我講，送外賣都係有趣既，而我分析過，因為我係兼職，又唔係靠佢養家，收工時我計一計數，360蚊，如果我等佢開飯既，我真係要加多半日做到夠數先可以收工，而唔係收工仲去食餐比今日搵既錢更多既飯，今次已經比起上星期無咁腳痛，唔駛按腳，但起左水泡，

27）興趣同職業，真係兩個層次，將興趣變成職業係一種漫長既過程，唔係人人做到，當你既興趣超過左一定既數量，就會量變引起質變，即時變質，需要一個覺悟！

28）我會唔會繼續做？會啊，下星期六強勢回歸旺角區！每次有人問我都係咁答，依家每個星期有人比錢我做gym，真係唔做就蝕啦！

29）但同時我係送外賣既時候諗，其實全職炒散真係幾適合我，黎緊我會有新動向，試下其他唔同既工作，分享多少少大家平時成日見既職業，當真係做既時候係咩感受，如果你地有咩特別職業想我去破地獄既，歡迎留言！

30）兩次既步兵經驗，我升級喇！步兵將會轉職成騎兵，點樣升級得快d！比個like啦！like數就好似經驗值咁，令我有動力去冒險！！！！

早前HKTV（1137）公布四月之未經審核營運數據，各方面的營業數字都出現下跌，平均每日訂單交易額從去年底的1,840萬元，一直下跌至四月份1,630萬元，跌幅超過一成有多；平均訂單值也從去年底的508元，跌至四月份的442元。不過最令人擔心是「每月活躍使用者」的數量持續下跌，在去年肺炎剛開始的時候，HKTVMall的每月活躍使用者有182萬，去年底跌至145萬，今年四月更跌至135萬，較高位消失超過四分之一。

當然大家最關心的一定是HKTV的股價，這比營業額跌得更厲害，從一月中17元的高位，數個月內已經冇咗一半！如果各位在年初買了，輸的錢應夠在HKTVMall幫襯好多次。

HKTV股價大插的原因，應該是市場擔心「兩隻貓」對HKTVMall的影響。較小的一隻貓是Foodpanda旗下PandaMart、FoodPanda Mall及Pandago等一系列的「熊貓」，目前已經有超過一千個合作夥伴，售賣逾萬款產品。「熊貓」較優勝的是本身在外賣市場佔有率超過60%，運送團隊高達4,000人，習慣送貨時間以十五分鐘內為目標，而HKTVMall依靠自家貨車團隊，送貨隨時要一個星期，現在跟風推出「一小時派遞選擇」，邊可能咁快變出大量電單車及步兵？加上目前只能處理自營O2O門市兩公里內的客戶，根本冇得打。

不過最令1137股民擔心的，並不是鬥快的「熊貓」，而是殺傷力更大的「天貓」，因為登陸香港的時候肯定會「鬥平」，用銀彈的方式先佔據市場份額，就算蝕本都要霸佔市場，情況就如富途證券登陸香港一樣，最後搞到全行降價，消費者當然Happy，其他券商就冇啖好食。

根據HKTV的年報顯示，糧油雜貨佔整體交易額的比例，從2019年的39.7%升至2020年的46.7%，差不多佔整體一半。這類型顧客通常很Price Sensitive，平台Stickiness很低，只要將來天貓的貨品價格較為便宜，很快就會「雞咁腳」轉會，到時HKTVMall唯一策略就是減價，益晒消費者。

我身邊一些幫襯開HKTVMall的朋友，近期都投訴貨品越來越貴，特別是在街市或超市買到的東西，他們說HKTVMall價格偏高。我看到HKTV的年報也有相同結論，例如直接商品銷售的毛利率，從2019年的24.5%升至2020年的27.4%，由於貨品成本沒可能大幅下降，所以HKTV應該將貨品價格提高，才導致毛利率明顯上升！至於特許銷售收入的佣金率，亦從2019年的21.4%升至2020年的24.6%。一些我有份投資的公司，業務上有將貨品放在HKTVMall銷售，同事們的感覺是「食水幾深」，較其他銷售渠道要貴，所以在有選擇的情況下，我們寧可放在其他地方銷售。

除了兩隻貓之外，還會有更多強大的參與者加入戰團，導致HKTVMall的市場份額受到挑戰，例如非常勤力的BigBigShop，由朝到晚不停在電視前賣產品……但看到TVB（0511）年報中，顯示BigBigShop在2020全年商品交易總值只有1.42億元，約等於HKTVMall一個星期的營業額，估計王維基暫時唔會太驚。

https://eastweek.my-magazine.me/main/103553

【疫市下製造額外收入】

呢排經濟唔好，有唔少朋友被減人工、放無薪假，喺收入銳減之下，使錢都要認真諗過度過。除咗「節流」，其實大家亦可以考慮「開源」，不妨試下以下呢啲方法製造額外嘅收入吧：

1. 運用自己嘅知識或興趣賺取收入，例如做補習老師，或者網上寄賣手作飾物、將自己嘅攝影作品放上專業付費相片平台放售。
2. 將屋企唔用或少用嘅物品放上二手平台售賣賺錢，亦藉此提醒自己下次諗清楚先好買。
3. 利用空閒時間做外賣平台嘅車手、步兵幫補下。

#滾續達人 #逆市搵錢 #賺錢都有好多方法 #聽日一定會更好㗎 #你話係咪呀積金丸