荷蘭租屋事件薄 （一）有咩途徑搵屋? 有讀者私信，想知道喺荷蘭有咩途徑租屋，同埋有乜嘢要特別注意嘅地方。亦都有人想知道，筆者過往有冇咩特別嘅租屋經歷。既然咁多人問到，我就將一啲過往嘅辛酸史分享一下啦。 喺講自己經歷之前，先簡單介紹一下喺荷蘭做屋有啲咩途徑。 1. Facebook 其實唔同嘅大城市都會有自己嘅Facebook群組，專門俾人去放租，又或者係比租客去搵屋。筆者親身經歷就試過有兩次喺Facebook度搵到屋。要留意嘅係，一般地區較好、價錢相宜嘅屋都會好大競爭，放租人分分鐘收到幾十甚至乎幾百個request，所以都好睇運氣。 另一方面，最近都留意到喺唔同嘅群組入邊，有好多網民會大鬧放租人。原因係有啲網民會覺得間屋或者間房太貴。但好多時候上載嘅人只係原本嘅租客，因為唔同原因要離開間屋所以搵人承接租約，大部份時間都未必係業主本身。有時喺呢啲群組入面係網民互相嘈交為多。 當然，喺群組入面都少不免會有人想乘機敲詐。所以，透過Facebook搵屋嘅人都要小心啲。 2. 搵屋網站 荷蘭都有唔同嘅搵屋網站，有一啲專門比外國人，有一啲專門係做整間屋，亦都有啲轉系做房。主要租一間房。 專門俾外國人：Holland2Stay 主要租一間房：Karmernet (要付費) 專門係租成間屋：Pararius，Funda 3. 中介/地產經紀 如果係大城市，一般來講房屋短缺嚴重，未必所有人都有時間慢慢去搵屋。所以有唔少人，特別係外國嚟嘅Expat，會直接搵地產經紀幫手。搵經紀嘅好處係佢哋有好多房源，有時連未擺上市場嘅屋佢哋都會知。不過，一般地產經紀都會收擁，大約係一個月嘅租金，而且大部份時間都係由租客俾。所以，如果資金充足，可以考慮搵地產經紀幫手，比起自己一個人慢慢喺網上搵容易，身邊嘅人亦都表示，若然有一個好嘅地產經紀，搵到嘅屋價錢會好啲，而且住得舒服啲。 4. 識人 「出外靠朋友」，呢一句真係好冇錯。筆者試過有一次爭啲冇屋住，都係靠朋友嘅朋友先至搵到居身之所。 要留意，喺荷蘭租屋有好規則同香港唔同。例如有一啲業主有權去查你嘅入息證明，確保你有足夠嘅經濟能力去交租。另外，視乎返合約，如果你喺同一個地方租咗超過兩年，理論上續約嘅時候就可以做一份「長約」。換句話說，租客可以無限期繼續租住物業。荷蘭相關法律傾向保障租客嘅權益，因此業主都會好小心，為免做錯俾人而令到自己蒙受損失。 今次講到呢一度，下一次正式同大家分享一下，一年搬四五次屋嘅經歷。 #移民 #移民歐洲 #移民荷蘭 #荷蘭 #西歐 #出國 #留學 #歐洲讀書 #歐洲工作 #歐洲生活 #荷蘭公司 #歐洲公司 #荷蘭生活知多啲 #香港人在荷蘭 #香港人在歐洲 #香港人加油 #搵工 #搵屋 #租屋 #租樓 #租房