【龔成問答信箱】（Q22541-Q22560）

Q22541：

老師！持倉部位現在-40%，請問如何調整心理質素？之前聽你說好像是去跑步

現在我天天飯都吃不下了！

龔成老師：

如果投資影響了生活，你的心理問題都開始大，我強烈建議你：

第一，唔好睇股價3個月。

第二，這段時間逼自己睇10本巴菲特相關書。

第三，這段時間睇你持有股票，佢地的年報，每一間都要睇5年年報。如果你能做到，3個月後，當你見到優質股股價跌（前題要優質股），你會變成天天都開心都不得了，每天的食量都很好。

（當然，我地要分析企業的價值有無改變，但不是睇股價，而是睇業務與前景因素，如果前景轉差，要止蝕的）

------------------------------------------------

Q22542：

龔成老師，我近日面對股票市場感到十分迷失和迷惘，我年初曾大手買入股價20元的心通醫療2160，但今日已跌穿9元，十分心痛，不知如何處理。
希望你能指引一下，謝謝

龔成老師：

微創心通醫療科技（2160）是有危有機類。最大問題是上市價貴，以及之前熱炒。

係一家中國醫療器械企業，專注於心臟瓣膜疾病領域創新的經導管及手術解 決方案的研發和商業化。

佢自主研發的第一代經導管主動脈瓣植入（TAVI）產品VitaFlowTM，於2019年7 月獲國家藥監局審批並隨後於2019年8月在中國進行商業化。

根據資料，截至2021年1月17日，有五款TAVI產品在中國獲批准或商業化，其中，VitaFlowTM是首款使用牛心包作為瓣膜組織的產品。

佢亦推出第一代自主研發的AlwideTM瓣膜球囊擴張導管及AlpassTM導管鞘，使其成為中國唯一一家全面提供自主研發互補性TAVI手術配套產品的醫療器械企業。

VitaFlowTM II是唯一在中國研發並已在歐洲開展臨床試驗的TAVI產品。

除TAVI產品之外，佢目前還擁有五款經導管二尖瓣（TMV）在研產品，通過自主研發及與全球合作夥伴（即4C Medical及ValCare，均為專注於二尖瓣及三尖瓣醫療器械研發的醫療器械企業）的共同開發戰略性地針對所有主流可行的二尖瓣返流經導管瓣膜療法（TVT）方案。

企業都有一定獨特性，同時長遠發展不差，不過估值方面就十分難，因為這刻仍未有似樣的盈利。

如果你持貨多，宜減，但如不多，就長線，耐心等企業好轉。

------------------------------------------------

Q22543：

龔sir:我已經睇緊你本「選股勝經」，想貴埋你本「80後百萬富翁」、但行咗幾間書間都只有2同3，請問喺邊度買到第一呢？

謝謝你的建議，我在過去一星期小注了

2800，0066，0002，0006 及0270 等平穩股，諗住遲D慢慢放曬D 1336 佢，平穩股慢慢長揸

我都係比較心急，在508 及500 各一入了一手 700，在14.62 又入了3500 服3067，睇來都要等下，暫時高風險股都唔入住了

揸住D現金就等個市跌多D時再入吧

龔成老師：

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第6版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

記住，最重要是建立一個長遠的優質股組合，用長期角度配置，同長期角度去買入，唔好心急，要有策略。

現時大市波動，點都要有一定的現金在手。

------------------------------------------------

Q22544：

老師，小弟打算4月左右移民，有40萬流動現金，請問有什麽投資建議？附上現有倉資訊，謝謝無私指導

700 一手 430入
3319 1250股 28.8入
3918 16000股 6.343 入
1177 5000股 7.214 入
6862 1000股 30.263入

感激

龔成老師︰

我地投資增值，係要長線，因為中短期有好多波動會出現，我地係預計唔到。

你只有9個月就移民，時間不多。我假設你移民前，係需要賣出所有香港資產，你40萬資金我建議最多做定期好了，一切以保本為主。

而你現時持股，現時就要開始分段沽出，去慢慢換回現金。唔好等到離開前一刻才沽，因為無人知個個時候，個大市係什麼環境。所以你要分段沽貨，去平衡價值波動的風險。

------------------------------------------------

Q22545：

老師，我明白長期持有優質股的道理，亦明白分注重要性，但跌市時分注買入優質股，永遠不懂注碼控制，

本人分注得比夠保守，可能一次恐懼跌浪當中只買了組合的百分之十，手持夠大現金，比如上年2020年3月，能把握機會，但買的量可能只有20-30%，

在上升軌當中便一值錯失加注機會，回報並不理想，記得老師說過上年把握大市購入小米，必瘦站等優質股，當時是用了多少現金或組合百分之幾去買？

過了上年3 月跌浪在之後的升浪有否加注？

同埋永遠保留適當現金當然沒錯，但如果你說恆指在23000是便宜區，我能否在範圍內增持組合股票水平至8成或9成？

我知一個熊市可能長達半年什至兩年，我應以時間比如每月去月供還是在便宜區去大手吸納？從而令自己持倉股票水平夠高，當遇上升市時有夠好的回報，謝謝

龔成老師︰

其實分注，我地無話一個好100%準則，乜野水平，就入幾多貨。

因為大市下跌，唔代表所有股票都會下跌，有時候個市開始平，但你目標股票無乜點跌，你都唔應該視佢為平宜，而去大注入貨。

所以，大市平貴所定的入市比例，只係一個參考。

由於近年恆指將好多波動性較大股票，納入恆指成份股，故便宜區都有所調整，你預23000點左右，係開始平宜。

但你要記住，這只是初步平宜區，未去到好平，持貨比例大約7-8成左右。

我地雖然唔知會唔會再跌，但基於平貴去衡量，我地必需留有資金，去等你個可能再下調的機會。

------------------------------------------------

Q22546：

龔sir, 你好！現時上緊你的課堂，真的獲益良多。有少少野想請教，我想問中泛控股（00715）你點睇？

我家人買了此的股票，已套了很久。請問呢隻係咪就係所謂嘅老千股？

龔成老師：

這企業年年虧損，你持有這盤生意，當然無意義。

這企業本質一般般，長遠價值向下，建議你賣出。如果不想一次過賣，都建議減持部分，將資金投資更有增長的股票，會更好。

你要記住，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22547：

老師，從國策層面來看，醫藥股（中生製藥）在我們堂上研究target它為未來倍升股潛力會否長遠大受影響而大打折扣和阻力嗎？

從5月上你初班開始，我已列入「中生製藥」在我的配置表中(其中10％的潛力股之列）, 但我一直有留意著股價，

從$8.x跌到$7.x到現時$6.x, 已接近52週新低，雖然你曾說股價由之前好貴（去年$11.x, 現在已跌咗一半) 已經慢慢回落合理估值的上部或中部可以分注買入，

但我看股價圖表一直呈現向下走勢，睇返2019年低位曾經大概是$3.x，就算現在是合理估值中或下部，可分注開始買入也要$6.x，但是還有可能冒著再向下跌一半的風險，

你曾說過唔好去估個底、亦唔好去估個市，買股票就係買公司，唔好事後孔明、就算買貴咗都有得守…………

我已經睇過你很多本書籍，也十分認同你的理財和財務想法與概念，即使我的理念同樣也是———「用便宜價格買入優質股票長期持有而不理會中間價格波動」，

但我心裏仍有忐忑不安，覺得我會用多咗多餘的資金而買貴咗要捱價x年才能返回買入價，雖然你常言道不要看買入價為神聖價位只看股票本質有沒改變，

如果沒有改變不用擔心股價上落，讓優質股票慢慢成長，最終股價也會回歸到合理估值，但我心裏仍覺得不安買貴咗，從而導致少了資金去買配置表內其他優質股票…………..

所以我仍然在迷惘中和猶疑不決，不知道應該第一注資金應該幾時、什麼價位開始買入，（我正常一般都會分3注），請龔sir再指導我一下

龔成老師︰

首先，你唔好再用圖表，或者52週新低這些短炒方法，去做分析。因為股票過往價格，同將來發展唔一定有關係，特別係一些發展好快，有質素的潛力股。

我地無人會知，佢中短期股價會發展成點，只能以平貴，去定策略。係合理頂時，先小注。再回調，就再加注。到平宜區，才大力掃貨。

你唔好有個錯誤想法，等到平宜區先入，就最穏陣和回報最理想。但你要記住，優質股係有權唔回至平宜區。

如果你平宜區先去入，可能最終結果係，你乜都入唔倒，白白睇住隻股票係咁升。

策略性分注，有機會會有一段時間出現帳面虧損，而且一定唔係可以最大回報的方法。但佢可以平衡左各方面不確定性，令你可以係可接受風險程度，得到最好回報。

近期中央推出一些醫藥相關政策，對醫藥股發展的確係有影響。但長線睇，相信會加快左行業汱弱留強速度，對好似中生(1177)這類優質企業，長線反而係有利。

但你預佢中短期都會較波動，長線投資價值未見大變，你可以按我教的策略，去慢慢分注入貨。

另外，你要留意翻2019年最低價係$4.X，你記得我初班上堂有教過，當企業派息或紅股，個股價圖條線，係會全條按比例下調。由於2020年有2送1紅股，所以條線係下調左。

如果直接睇圖見2019年初係$3.X，就當佢係當時真實價位，那就錯了。

------------------------------------------------

Q22548：

想請教，66 2800 應該長持，因為2800可分散風險。66 地鐵公司長遠收息及增值可觀？

3 及11 算高位？ 待其升10%才放較好?

大家樂 大快活又如何 收息及增長?持有誰較好?

這星期港股大跌 應該持有66 2800 11 3 因長遠來說會升番 優質股不用怕 除非作炒賣?

總括咁問，2638 270 等股市升回正常價才放。11 66 2800 3 可長期持有 因是優質股？ 股市波動對其影響有限 只要不是炒賣 風險好低？thx

龔成老師︰

你現時持有股票，都係優質股，係可以長線持有。我地係唔會因為股市中短期波動，去沽出一隻股票。除非佢已經係好貴，又或者佢長線質素轉差，才會賣出。

但港燈(2638)係收息股，增長力不高，若你係年青至中年人士，就不宜持有太多。

大家樂(0341)和大快活(0052)，質素上大快活會較好。佢有平穏增長之餘，都有一定股息。但如果疫情再反復，可能會令佢中短期再現波動，要留意風險。

近期大市比較波動，但未見對上述股票，質素上有明顯轉差，你照持有係可以。

------------------------------------------------

Q22549：

早晨龔成老師，我今年35歲了，近來確診癌症，將有一筆大概250萬嘅危疾保險。想早點將這筆錢增值，因為將來我可能還有好多時間，並不想成為老公及其他家人的負累。

我應該如何分配？

我不會有小朋友，同老公及患病父親同住先母物業，不需要供樓，一家人每月支出3-4萬。

龔成老師︰

以你情況，一切都以你身體健康為重點。

這筆危疾賠償，你要先扣起一部份，最好預多少少，用現金持有，以備不時之需(生活或醫療上)。

未來時間，為了可以令你安心治病和進行療養，投資選項上，我會建議以創造現金流為主。透過現金流，去支援你生活上開支。

目標會係一些優質收息股，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，只能小注）。

現時大市只係合理水平，資金唔好盡用，大約留翻3-5成現金。等大跌市出現，才加大力度掃貨。

當然，如果你精神未必足以你進行上述操作，你可以入完首注後。用銀行月供股票服務，去將餘下資金，慢慢投入收息股當中。

但緊記，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡。同一行業不能高於組合30%，同一股不能高於組合15%。

祝你早日康復!

------------------------------------------------

Q22550：

想請教1. 如公司個人/高層持股多於50%，在評估公司質素上是否要扣分?

2. 在計算669估值上時，為甚麼用現金折流法得出的數字只是$4X? 但現價卻是$130，差距很大。然而，典業主盈餘卻是按年増加，而折現率亦採用了合理的10%，所以想問問現金折流法是否不適合用在669估值上?原因又是甚麼?

3.想請問2128 中國聯塑積素如何?

龔成老師：

1）要睇那類公司，如果是細公司，有可能佢地好易操控股價，如果大公司，可能佢只是正常持股、睇好自己公司，因此問題不大。

2）現金流折現法不易運用的，你在推算增長率時要小心計算。

3）中國聯塑（2128）這股不差，有長線投資的價值。佢主要從事製造及銷售建材家居產品、提供裝修及安裝工程、環境工程及其他相關服務、金融服務和物業租賃及其他相關服務。
生意與盈利都不差，現金流強，股本回報率理想，基本上有長線投資價值。不過股價上落較大，要注意注波動。
現價合理區中上部，分注投資都可，但不是大手時機。

------------------------------------------------

Q22551：

多謝龔成老師回覆和分享，其實我都是大約年初才買136，我現在手上還有好多不同的股票，但係全部帳面都是蝕包括

匯豐 1200@$68
恒生 500@$151
煤氣 5000@$13.28
小米 2000@$26
騰訊 100@$579

阿里巴巴 500@$278
恆大汽車 2000@$16.4
中國鐵路 20000@$1.21
醫渡科技 2000@$65
金沙中國 2000@$30

上述帳面現在合共蝕緊200,000左右

小米同金沙都係睇得你多分享先至跟買，價位都不算貴所以我不擔心，反而阿里巴巴同埋騰訊真係有啲擔心，仲有隻醫渡科技一上市嗰陣高追又冇止蝕所以搞成咁

上面的股票大部份都是由上年七月開始買入，當時因為手頭上套現左一舊資金所以就入市，另外有1,000,000我放咗入每月收息基金，

最理想的都是allianz income and growth, 一年帳面連基金收入已賺了15%，可惜我當時買了少部份，另外我買咗亞洲的基金，到現在連基金收入都是打和！

一年後review, 最大的虧損都是136

我覺得自己好失敗，將所有資金放入銀行mortage link 收息都好過現在做無謂的投資

現在我只希望所有股票回升，不要再蝕太多我已經心滿意足

龔成老師︰

你要記住，我地投資係為左財富增值，而唔係打個平手就算。

唔好用短期帳面賺蝕，去衡量持股質素，或者個投資組合成敗。因為投資係一個長線計劃，就算最優質的股票，中短期都會有波動。只有長線其價值，才會在股價中反映出來。

你現時持股都有質素，若你係年青至中年人士，這個組合係可以長線持有。(我估你"中國鐵路"係打錯，應該係"中國鐵塔")

但若你偏年青，恆生(0011)和匯控(0005)這類收息股，就不宜持有太多。

另外，醫渡科技(2158)、恆大汽車(0708)不確定性較高，不宜持有太多。

至於基金，你可以衡量基金的投資策略，所投資的資產類別、投資策略、風險程度、市場、費用成本、以及過往的表現。

你可以睇佢過往5-10年(唔好只係睇當前的一年表現)，如果回報係比主要投資市場高，就有機會值得繼續投資。

提翻你，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22552：

成哥，你好，之前是你的學生，有問題想問問。

我計緊銀娛0027價值，用市盈率估值法，但我見他在2020年度市盈率和每股盈利都是負數，這個特別的情況(疫情）我應唔應該計算呢一年的數據？

另外，用市盈率估值法，是否每一隻股票都加多10%緩衝？謝謝

龔成老師︰

其實不論是否市盈率估值法，一些中短期發生事件，如果係一次性，預期將來極細機會會再發，好似今次疫情咁，其實我地就應該將這年的收字忽視。

但由於疫情依然反覆，預期中短期業務，都有較波動，故有需要將估值下調少少。銀娛(0027)現價算係合理區中下部，可分注。

至於10%緩衝區，唔係一定要加。當你發現你計出來合理價區間，係好窄，無法有效反映一個正常合理區時，你就要加這10%緩衝區。

你可以溫習翻初班第5堂的NOTE，重點會係SLIDE26和58，當中有較詳細指引和例子，你睇左會較易明白。

------------------------------------------------

Q22553：

Sir, what do u think about premium financing by insurance company

龔成老師︰

保單融資，其實就係透過借貸，去以槓桿形式放大回報。相比傳統儲蓄保險，佢增長潛力會相對較大，同時風險會相對較高。

若保單實際回報，係多於貸款利息，投保人自然會因為槓桿操作，而令回報放大左。

但由於保單本身，好多時回報和利率都係不保證。再加上貸款利息，多為浮息。在低息環境，固然會受惠。但進入加息週期，利潤將進一步被蠶食。

因此，用保單融資去投保，係有一定風險。

其實係財富增值上，最好集中係優質資產上(如物業、優質股)。

"保險"只係一種產品，主要係用作防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但最好係一些較傳統儲蓄保單，而非這類有槓桿性質的產品。

------------------------------------------------

Q22554：

老師你好! 我和先生40歲, 每月收入共$54000, 有一層自住物業, 市值700萬,尚有170萬要還, 每月供款$12000, 月儲$13000, 股票合共約45萬, 外幣加現金共$44萬,

如果層樓唔想做加按, 如何能制造每月被動收入$15000-$20000?謝謝

龔成老師︰

如果你希望每月有2萬蚊現金流，以股息率6%計，你需要本金400萬。

若你想做到這個財務目標，你可以透過投資一些「平穩增值股」+「潛力股」，去累積這筆資金。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

假如你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-4成，視乎你投資經驗多寡和了解這些股票程度而定。

現時大市只是合理區，你現有44萬現金和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$13000 + 現有約90資產(現金和持股)，預計10年左右時間，就會增值至400萬。

你可以以此作參考，視乎你自己情況，再去調整月供計劃。

------------------------------------------------

Q22555：

本人51歲，計劃四年後退休，先生和我各月入5萬，依家手上有500萬現金，有三個鋪位，租金約6萬，貸款尚欠110萬

股票約90萬，係中銀香港、電能實業同埋永利，計劃買多100萬中銀香港收息，

亦有投資保險類年金，仲有八年要供

小朋友剛剛大學，疫情過後去海外升學，咁樣資產部署退休可以嗎？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你4年後就會退休，我地就要將資產，慢慢轉向收息項目。透過這些收息項目，去創造穏定的現金流，去援你退休生活。

你現時財富組合中，主要係物業類。這些物業用作收租，能提供現金流，所以應保留作你退休組合一部份。但由於佢地佔成個組合比重好高，故物業類就唔好再大了。

現時你應加大優質股部份，去令財富組合更平衡。

你現時持有的股票，都係有質素。但永利(1128)雖有增長力，但派息都幾波動，長線不宜作為收息股一員。你現時可持有，但要慢慢換至其他優質收息股上。

至於中銀(2388)和電能(0006)可長線，退休時都可以持有。

我地唔好成個組合，只集中係2,3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

所以，唔建議你再投資中銀(2388)太多，以免因過度集中，造成風險。

以下是一些適合你的股票，你可以一半資金儲指數基金，佢係一籃子組合，就算持有30%以上，都唔會有過度集中性風險。

你可以用佢，係退休前作適度增值。另一半資金，就買入不同收息股，係用來為退休後生活，作準備。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，只能小注）。

現時大市只是合理區，你現有500萬資金可以多投入150-200萬，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

退休後，除了收息股、收租物業外，你都可以加入一些年金(現有那份可照供)、定息產品、A級債券等，去令自己收息組合更多樣性和平衡。

而小朋友升學資金，由於好快會動用，所以不宜投資。你要另外以現金模式扣起，到升學時就動用。

------------------------------------------------

Q22556：

龔成老師，早前拜讀了你那本80後一、二、三百萬富翁、五年買樓4步曲。你的看法讓我打通了自二十年前看富爸爸窮爸爸開始認識的概念。並且能確實、有效實踐出來。

我打算繼續在股票市場努力學習投資，直至儲夠一百萬，就買樓。

但有以下一些疑問：

想請教如何可了解現時樓市是否合適買樓的時機？因擔心一買樓，樓市便下跌。

龔成老師︰

中短期樓價點樣走，其實好難預測。但我認為香港樓，長期會向上。

首先，我用身邊的朋友去分析（因為佢地都是適婚年齡的），我見到一個現象，唔少朋友結婚後，買唔到樓，要同父母用住，這幾年都係咁，而且人數不斷增長。

佢地正在儲錢，正在等樓價跌，只要在適當時機，就會搬出去住，你知道這是甚麼？這就是潛在的購買力，而且不斷累積！

香港樓長期供應不足，需求正不斷累積，這將會令樓價保持向上，跌少少，又會升過。

另外，你要明白，樓是資產，現金不是真財富，所以物業長期一定向上，中間會有上落。這是財富系統最典型的模式，詳細概念你可以睇《財務自由行》，當中會話你知，點解資產長期一定升，現金一定跌。

另外，我地做財富增值，會考慮埋成個組合平衡性。

所以，係你置業同時，最好留有一定優質股作增值。否則，你就會成個財富組合，偏重左係物業一邊，造成風險。

------------------------------------------------

Q22557：

你好龔sir! 經朋友介紹睇你個page，有問題想問問：

話說早排試下開始接觸股票（0經驗+無study）閒錢只有5萬，入左以下兩隻：

1. 3300(中國玻璃)@2.95/3手
2. 6909(百得利)@7.67/2手

請問龔sir點睇呢兩隻？

另外想買你既書睇但無從入手，邊本較適合我呢類0經驗者睇？股票勝經？

期待回覆，謝謝！

龔成老師︰

中國玻璃（3300）主要從事生產、營銷及分銷玻璃與玻璃製品；設計及安裝藥用玻璃生產線。

佢的產品包括無色玻璃、有色玻璃、鍍膜玻璃、節能及新能源玻璃產品（如超白玻璃、低輻射鍍膜玻璃及光伏電池模塊產品）。

這股不算，但又未到好高質。

整體發展正面，但盈利有點不穩，不值得持有太多，同時要留意股價較為波動。

百得利控股（6909）主要在中國從事提供汽車銷售、售後服務及其他汽車相關增值服務。

佢經銷之汽車品牌包括保時捷（Ｐｏｒｓｃｈｅ）及賓利（Ｂｅｎｔｌｅｙ），而豪華品牌包括梅賽德斯－奔馳（Ｍｅｒｃｅｄｅｓ－Ｂｅｎｚ）、奧迪（Ａｕｄｉ）、沃爾沃（Ｖｏｌｖｏ）及捷豹－路虎（Ｊａｇｕａｒ－Ｌａｎｄ　Ｒｏｖｅｒ）。

售後服務包括維修及保養服務、配件及其他汽車相關產品銷售、保險代理服務及車牌登記服務。而其他汽車相關增值服務則包括汽車融資（將客戶轉介予融資公司及商業銀行）及二手車經紀服務（將客戶轉介予從事二手車評估及交易業務的第三方公司）。另集團的經銷店亦可協助召回汽車事宜（汽車製造商可能不時召回汽車以糾正問題）。

質素算是不過不失，但企業獨特性及增長力唔算強，此股只宜小注投資。

其實你現時無投資知識和經驗，對企業估值，點去定平貴未必會太了解。我比較建議你先利用月供模式，去做增值，可以減低買貴貨風險，對你而言會較理想。

現在你每月先用5成儲蓄做月供。其餘先儲起，用一邊月供一邊儲蓄的策略。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

書本上，你可以先睇我架《80後百萬富翁》、《財務自由行》和《股票勝經》，都適合初學者。

同時間，你要去多讀其他投資相關書本、年報，新聞和課程，努力累積投資知識，長線回報才會好。

------------------------------------------------

Q22558：

龔老師你好啊！想請教你1928 金沙中國而家可以入嗎？重有請問呢隻買得過嗎？

龔成老師︰

金沙（1928）有質素的。

佢中短期會弱，加上全球疫情反覆，都對佢有不利影響，不過，相信這只是中短期，以長遠的角度分析，企業仍是有質素的。

在正常的經營環境分析，佢持有的資產好有質素，行業本身好賺，雖然疫情略有反覆，但全球疫情最壞的情況，相信已過。佢長遠是收息及平穩增長型。

但由於仍有未知數，加上之前虧損，因此將企業估值調低左。

現水平在大約在合理區中下部分，如果本身有貨，可長線，耐心持有就得，如果無貨，現價已經可以分注，但都要留現金。投資貨要有心理準備，中短期會弱，要長線，企業有長線投資的價值。

------------------------------------------------

Q22559：

龔成老師你好，人到中年，想投資股票增值財富，但投資知識拙劣，想請教一下老師。

以下幾隻股票，可以長線持有嗎？（一年以上）

00823 領展
01038 長江基建集團
02638 港燈
00008 電訊盈科
01373 國際家居零售

另外有否其他平穩增長股票提供？謝謝老師指教

龔成老師︰

你持有股票，都係有質素，適合長線持有。當中領展(0823)、長建(1038)會有息收之餘，都有平穏增長力。而其餘3隻，主要係收下息。

但留意電訊盈科(0008)負債較高，唔係無投資價值，只係風險較其餘4隻為高，故不宜持有太多。

其實以你中年人士計，都有財富增值需要，但係策略上就會保守少少，主要集中係一些平穏增長股上。以下是一些有質素的平穏增長股，你可以參考下。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)。如果有投資美股，可投資VOO。

現時大市只在合理區，未算平，你可以先用一半資金，分注慢慢買入上述股票，並長線持有。餘下一半資金，就等大跌市，才去掃平貨。

------------------------------------------------

Q22560：

龔sir 最近d 人話恆指成份股換入d 好高PE 既股票 例如6862. 搞到恆指既代表性不及以前 以致恆指愈來愈弱 無乜起息 月供2800係咪已經失去優勢?

龔成老師：

其實恆指進行較大的改革，長遠會將成份股，加至80-100隻，會加入更多不同類別的股票，例如一些新經濟股，長遠反而會令恆指的增長力提高。不過，同時會令波動大左。

由於這改革只是進行左短時間，而我地睇表現，一定要以長期作單位，所以，你以短期表現去衡量，並不正確。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19821-Q19840）

Q19821：

阿sir 我最近工作好唔如意 雖然是鐵飯碗 但同理念好唔一致 最近仲同老細直接抗衡 成為左眼中釘 唉 我都唔知點解會同你分享呢個 不過我想講

好想靠自己力量實現財務自由 同時我都積極搵緊第二份工 星期一interview 俾d力量我啦！

龔成老師：

我人生中，其中一個要多謝的人，就係我之前銀行工，其中一個針對我的上級。

同事都知佢係一個超級小人，當時我比佢針對，於是，我加速發展打工以外的事業，佢成為我的動力！

因為我好想出面事業到達某一程度，盡快辭職！

我真心好多謝佢，如果無呢D人，我突破的心唔會咁強烈。

你都加油呀！呢D人，係逼你進步的動力！
祝你見工成功！

------------------------------------------------

Q19822：

老師，我係你舊生。今次想請教下妖股/微信女股既問題:

1. 你上堂教左我地一D簡單既指標點樣去避開D妖股/微信女股，最重要就係市值最好大過10億，並且最好係用佢前之前既股價去計算有10億。

想問下老師近呢兩個月有兩隻股都有好多微信女去推。
例如305 五菱氣車同埋3800保利協鑫能源，前者上網睇過係有實際業務，真係有車生產/有車房/有員工，後者市值係未升之前非常高有過100億，我發現今次微信女推既股好似都係一D相對大小小規模既股。

我想問下老師其實股市係咪而家有好強烈既人為因素去操縱?有冇辦法係選股既過程避開呢D人為因素強既股?又或者例如而家市場當炒既股係咪最好都唔好投資唔好買入?

2. 相信有唔少人都問過你必瘦站1830係咪隻妖股，因為細價而家市值係未升之前都係10~20億左右，雖然有實際業務

但近呢幾年有唔少健身中意/美容院好多sell左d好貴既套票後拎錢走人，想問下老師你有冇係必瘦站上考慮過呢個問題?點解會咁放心投資?

麻煩曬！

龔成老師：

1）市值$10億，這只是其中一個因素，去方便大家分析，如果你記得第一堂、第六堂，都有教過多種避開問題股的方法。

現時股市不是這種老千股人為的推升模式，並不是。老千股一般市值細，貨源集中在少數人手上，然後佢地利用左手交右手的模式進行，去「造」個價。

至於現時你見有些股大升，不是這類，而是市場對某些類別的股票/主題有炒作，令這些股受到大量資金去追逐。可能你見某些股無實質因素支持，但佢地有些是因為「預期因素」而受市場不斷追逐。

當然，這類股我地較難分析，較難估值，但你要明白背後的原理。投資這類股，往往是有危有機的。

2）必瘦站（1830）我在《50優質潛力股》2020年的版本，加入了這股。

書中都有詳細分析，亦有講述你所講的問題，佢在品牌上，的確扣左分，所以你見佢並不是最高質的股。不過，佢始終是很好賺，整個營運模式與發展不差，現金流強，同時在2020年，大部分時間都處於合理區中下至平的水平，因此有一定的投資值博率。

------------------------------------------------

Q19823：

龔sir , 可否請教你我個組合係1347，6690 ，883 ，點睇？仲有我初玩一個月，想買你一本作品，你會推介新手買邊本？

龔成老師：

上述的3隻股票，都有質素的，可以持有，而華虹半導體（1347）是潛力股，不過股價上落較大，初階投資者不宜持有太多。

你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

另外，多從穩健的股票，長遠角度著手，要建立一個優質，平衡的組合。

------------------------------------------------

Q19824：

如果我份工一日連埋搭車成13個鐘...
如果係你

你點樣係工作外既時間做依d野

龔成老師：

第一，我會每日用搭車時間，去睇書，增值自己。同時會利用星期六日。

第二，我會思考這份工是否長遠對我事業有利，如果只是不斷消耗我的時間，用我的青春去換取生活費，就無意思。

我會盡日尋找突破點，這工是否有發展，還是轉去另一份工。要從長期角度出發，唔好過得一日得一日。

------------------------------------------------

Q19825：

老師，我買左你本股票勝經就快睇完了，之後會繼續買其他增加知識

我從來無試過認真睇一本書嫁，但睇你既書好有興趣同好易明所以一直睇落去！

我開始左你的建議，現在月供盈富基金、港鐵這兩隻股，同時入左3手安碩恒生科技。

另外我有問題想請教你，太煩唔好意思呀～

1.如果我想加多隻月供$1000，應該選擇金沙、中生製藥、福壽園，邊一隻較好？

2.另外月供長線一般需要持續多少年供款才算長線投資？感謝感謝

龔成老師︰

1） 我地投資選項時，會因應你處於架人生階段。若果你係偏年青，可以選中生（1177）或福壽園（1448）這類潛力股，去增升組合增長力。

若你已經係中年人士，咁金沙（1928）這類有平穏增長之餘，又有一定股息的股票，就會較合適。

2） 月供係一個長線計劃，月供最少維持3年，並持有這些股票5年以上，才會有較理想效果。

如果知識不算多，就集中在ETF，如果有信心，就可選個股去月供。

------------------------------------------------

Q19826：

Hi 龔sir 想問下吉利現價仲可吾可以買？或者去到幾多錢先可以買？

另外我$256買左一手9988,而家個情況應吾應該買多手？如果買多手應該幾錢買？

定係應該買其他呢 ,thanks

龔成老師︰

吉利（0175）現時價位已經略貴，要回多3,4成才算合理區，才可分注入市。

至於阿里巴巴（9988）由於你己有貨，若你本身預定投資阿里的資金，可以以分成多注的話。

現價加一注係可以，之後每跌1成左右，才再加注。

------------------------------------------------

Q19827：

老師您好，請問新意網集團（1686）及萬國數據（9698）這兩隻股票您怎樣分析及比較，希望能夠獲得您較為詳細的看法。

之前大概用P/E進行了一些估值，1686的合理股價大約在5.8-7.2，取中間價大概為6.5

您覺得現價7.4可以入嗎，因為我還是學生，現金不太多，但若有機會還可以買幾注。非常感謝您

龔成老師︰

新意網（1686），有質素，但現價不平。佢主要從事提供數據中心、設施管理、網上應用及增值服務，系統之安裝及保養服務。

佢除了租用設施空間存放客戶服務器外，亦提供24小時設施管理、互聯網連接、系統管理及互聯網技術服務。是全港最大的數據中心服務營運者。

綜合來說，新意網有一定的質素，穩定的租金收入，強勁的現金流，加上行業的增長潛力，都令這股有投資的價值。

不過，亦由於上述所講的種種利好因素，市場亦對這股有相當的期望，市盈率現處高水平。近年由於高速發展，令負債增多了不少，是一個風險。現價偏貴，要回調2成半才到合理區，到時候才可以開始分注入貨。

萬國數據（9698）主要通過可變利益實體在中國內地及香港從事運營數據中心，以提供託管服務、管理、諮詢等服務。

初步睇佢都有投資價值，但係此股則上市，可參考數據唔多。而且集團過往一直在燒銀紙狀態，未有盈利。而是市值郤去到過千億，當中主要都係"估"佢將來發展。

當將來發展不似預期，就會出現較大回調，故此股相對新意網（1686），風險係會較高。唔係話唔投資得，但不確定性較大，只可小注博下。

睇翻兩隻，本質都不差，而新意網業務較穩定，同時現時有盈利，穩健度較高。而萬國，發展力度較大，潛力度較高，不過股價上落就會比新意網較高。因此，要睇你自己的投資目標及風險承受程度。

由於你係學生，相信總資金唔多。你唔好將大部份資金，都入晒落同一行業，咁個風險會過大。應該平均分配係唔同企業和行業上（相同行業不可佔組合多於3成，而單一企業不要高過15%。），令整個組合平衡才算係理想。

------------------------------------------------

Q19828：

龔老師，可以比意見我嗎？我就快60歲，去年失業一年，開始買股票，投資額25萬幾。

883中海洋買入8.86/8000
788中國鐵塔買入1.12/10000
552中國通信買入3.34/10000
762中國聯通買入4.52/8000
728中國電信買入1.89/10000
941中國移買入41.50/2000

龔成老師︰

你個投資組合，有幾個大問題。

首先，以你年紀，投資應以保守為主。中國鐵塔（0788）雖有質素，但波動性較大，現貨可持有，就唔好再加注。

中海油（0883）質素都算有，但不是最高質類別。石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力。這類商品企業可投資，但不宜太大注。

另外，你投資組合中，極大部份係電訊股。我地個別行業比重，係唔應該佔組合超過3成，否則會有過度集中風險。

現時中海油和電訊類股份，建議沽出部份，換碼至以下股票。這些股票都係收息為主，增長力唔算好大，但可以為你提供穏定現金流，去減輕你生活負擔。

當佢地有5-6%股息率，你就可以慢慢儲貨。

收息股︰港燈（2638）、工行（1398）、恆生（0011）、置富（0778）、陽光（0435）、深高速（0548）

現時大市只在合理區，資金唔好盡用。最好留有部份，等大跌市出現時，可以用來掃貨。

你失業，點都要留有一定的現金，我地投資一定是「先想風險，後想回報」。

------------------------------------------------

Q19829：

老師，請問一下你怎看內地新能源發電市場？有那些公司比較有潛力？

另外想請教一下老師怎看滔搏6110？

龔成老師︰

信義光能（0968）和福萊特玻璃（6865）主要在中國生產及銷售光伏玻璃，都會受惠於新能發展。龍源（0916）都可留意。

但由於已被熱炒，股價已升至一個偏貴水平。想入首注，最好等有較大回調才出手。而且有一定波動性，故不宜大注。

滔搏（6110）主要係中國從事運動鞋服產品零售業務。佢大多數門店為單一品牌門店，以所售運動鞋服產品的品牌冠名。

現時同11個品牌合作，當中主力品牌為Ｎｉｋｅ、ａｄｉｄａｓ，其他品牌包括Ｐｕｍａ、Ｃｏｎｖｅｒｓｅ等。

零售網絡包括8300家直營門店，有好強大的網絡，過往業務不差，有增長，有盈利，有正現金流，只是半新股類，分析與估值上較為困難。

新股上市前一定整靚盤數數，所以要打折扣。業務上，都有投資價值，但考慮新股上市不久，不建議大注。長線投資都可以。

------------------------------------------------

Q19830：

龚成兄您好，现有问题如下，希望得到您的宝贵意见:

本人现持有9000股腾讯，我本价$170，持货已七年，升幅已经不少，但由于本人现年51岁

一直在国内工作並刚回流香港，目前並没有主动收入，所以想认真考虑是否应该在股价600元或以上

沽出三分一腾讯，换马收息股，如置富房产信讬，港灯等，以保持隐定被动收入应付日常开支？

但又担心错失股价进一步上升机会。龚成兄意见如何？

另外本人从自置物业加按了200万，以槓杆形式买入债券，年净回报约7厘

你觉得我应否换马买入目前具上升潜力的股票如比亚迪，小米，美团等？

最后，请问您怎么办看Tesla?它最近上升速度如火箭，你觉得仍有上升空间吗？多谢指教！

龔成老師︰

我地投資增值，係要考慮到成個組合架資產配置。騰訊（0700）長線有增長潛力，但由於你已是中年人士，騰訊（0700）、比亞迪（1211），小米（1810），美團（3690）這類波動性高架股票，唔應該持有太多，否則風險會太大。

建議你沽出約一半，換碼至一些"平穩增值股"和"收息股"上。前者有增值能力，但相對波動性無咁高。後者，可以為你提供平穏現金流。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）。
目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

至於債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利（你可以睇睇《財務自由行》一書，我從財富本質上，講述了當中原理）。同時，現時息口低，但未來有機會重回加息週期，債券未必是最好的投資工具。

而且你用"槓杆形式"去投資，嬴會係加倍，但輸架時候都會令損失放大，這種模式太高風險，唔建議去做。

其實現時大市只在合理區，唔係一個"借貸"投資架好時機。這筆錢最好等大市有較明顯回調，才去買入"平穩增值股"和"收息股"，咁會較好。

至於TESLA都有質素，但近期唔少新能車股都炒到好高，現時投資，風險唔細。

------------------------------------------------

Q19831：

老師你好，之前不懂，只盲目跟隨買股票已經輸好多😞又不懂止蝕。

手上蟹貨多到不得了，我應該而家放哂，轉投資其他嗎？

蟹貨購買價例如：
1776 $25.5
1800 $12.5
2342 $3.22
6060 $50
謝謝你

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

廣發証券（1776）質素算是中等，業務有點波動，這類股唔會持有得太多。

中交建（1800）不是全無質素，但近年賺錢能力有所減少，這股不是高增長股，之後只會平穩增長，現時估值合理。

暫時都唔好對股價有太大期望，目標只是收息，你預股價上得較慢，負債較高，因此市場比佢估值不會太高。

京信通信（2342）主要從事研究、開發、製造及銷售無線電訊網絡優化系統設備、提供相關工程服務，以及提供電信服務及相關增值服務。

現時5G的發展，都會對佢有利，但這股規模唔算好大，因此又未算最強之列。但由於規模細，當企業發展時，潛力較可較大。

質素都算有的，但就不算好強，整體上都有投資的價值。不過睇翻佢最近的業績，又唔算好勁。

眾安（6060）這類股，好難玩的，因為多年都在燒銀紙，就算近年才初見盈利。但都仍未能確定長線情況，這類股要估值好難。因此，股價一定好波動，所以，只能小注。

------------------------------------------------

Q19832：

老師你好，我想問銀娛、港鐵、領展，希慎咩價位入會係合理區? 依家呢個價錢是否太高 thanks!

同埋想問下你點睇恆大，入唔入手好? 發展潛力可以嗎?
06666

其實我對地產股同領展都有興趣 但領展對我黎講一手有啲貴 想月供 反而大陸既萬科

金地，恒大發展都好似唔錯，大陸房地產都有興趣，入場費都唔算貴 想問你點睇，係咪應該對佢未來發展方向著手

因為我見恒大都係上個月先公開招股，果陣$8 依家11 應否入手 謝謝

龔成老師︰

銀娛（0027）、港鐵（0066）、領展（0823），希慎（0014）都在合理區，可以分注入貨。

恒大物業（6666）在2020年11月從中國恒大（3333）分拆上市，主要在中國從事提供物業管理服務及相關增值服務。

此股都有質素，但由於上市不久，現時數據只可作參考。長線發展潛力，尚要時間觀察。

由於佢係新股，加上負債都唔輕，此刻只宜小注投資。

領展（0823）現價在合理區中至上部，若有5%股息率，會較理想。

其實內地不少地產相關股票，唔係話無投資，但都有同一個問題，就係負債好高。經濟好，當然問題不大。但經濟變差，資金鏈有機會出問題。

所以，你投資係可以，但只可小注，同時要明白當中風險。

------------------------------------------------

Q19833：

龔sir 想問如果投資新手
26歲 有90萬 只有做定期同買ibond

想儲錢2年後買樓 應該如何投資較好？希望可以指教一下。。月入4萬

龔成老師︰

2年是一個較短期的時間，就算企業再優質，中短期都會出現波動，影響你回報。

若你只有2年時間去做增值，投資選項要相對保守。你可以用「平穩增值股」+「收息股」作增值組合，比例約各一半。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

現時大市只是合理區，90萬資金可以先投入一半，用"分注"形式，慢慢買貨。餘下一半資金，就等大市出現一定程度的下跌，才大力度掃貨。

到你要置業前半年，就要開始分段沽貨套現。

------------------------------------------------

Q19834：

老師你好，想請教一下，本人31歲，每月可儲2萬，現有資產如下:

現金100餘萬，當中包括股票約20萬
買入價位:
1177 - 2000@$7
823 - 500@$63.4
1928 - 2000@34
914 - 1000@$48.15

以上組合分配如何？如果希望於兩年內將資產增值並置業，增加一些有潛力的股票

你建議加入1448及968，或者增持現有的股票嗎？還是有其他更適合我的股票建議？謝謝。

龔成老師︰

投資股票，就等同買入一間企業，企業是要時間去升值。2年係一個短期的時間，就算企業再優質，中短期都會出現波動，影響你回報。

由於時間較短，只宜作一些較平穏的投資。現在你每月5成儲蓄，去做月供，其餘先儲起，用一邊月供一邊儲蓄的策略。

分配上，平穩增值股和收息股大約各一半。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）、煤氣（0003）。

收息股︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。

現時大市在合理區，你可以先用40萬現金，慢慢分注入以上股票。之後若果大市有明顯回調，你才再用餘下40萬現金去加注。

到你要置業前半年左右，就慢慢分段沽出持股套現。

------------------------------------------------

Q19835：

你好 龔成老師 我29歲月入15000做物業管理 我持有10手煤氣 6手hsbc 3手盈富

1手2163 現金大約有4萬左右 我想1至2年後買樓結婚 普通居屋或者400萬以下私人樓

投資方面應該點樣分配好d？係咪應該買隻進取d既股好？同埋我hsbc大約50蚊左右買入既

想問下應該放左佢換過第2隻定繼續擺係到等收息？

龔成老師︰

你1至2年後，這些資產有明確用途。由於2年只係一個好短架時間，投資再優質架股票，都難免有機會出現股價波動。

因此，你只可以作較保守架投資，現時持貨可以不用變動。另外，你可以再用「平穩增值股」+「收息股」作月供組合，比重大約各佔一半。

現在你每月5成儲蓄，去做月供，其餘先儲起，用一邊月供一邊儲蓄的策略。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨。

------------------------------------------------

Q19836：

我已經上了股票班，但仍然想對投資方面，認識多一點，所以想報這個。

另外，我手持中國移動，本來我覺得佢係水桶三既股票，對佢既股價沒有期望

只係我已經揸左超過10年，諗住佢在發展5G，係國內也有壟斷既地位，點跌都應該有個譜

用黎收息。點不知美國個邊一搞，佢就跌到慘不忍睹。美國將它下架

其實應該唔會影響佢賺錢能力，雖有短期沽壓，但長遠係咪無問題，我想法正確嗎？

龔成老師︰

你的想法，大致都正確。

中國移動（0941），近期國際問題令佢風險大左。但這都是中短期因素，長線佢質素唔算有太大變動。

此股係有質素，5G雖然對佢有正面影響，不過中國政府希望相關費用不會太貴，令資訊流通更便利。

長遠只會慢慢平穩增長，若你目標係為收息股，持有係可以。

------------------------------------------------

Q19837：

龔成老師你好，想請問下981中芯國際同322康師傅前景如何？

我$23.8入了981 5000股
$14.1入了322 12000股

現在中芯有少少收穫，康師傅就未到位，我是否要離場換另外一些股

還有可持有現在的股票好？
謝謝老師抽空回覆

龔成老師︰

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。此股質素和吸引力算一般，若只佔你組合小部份，持有係可以。

康師傅控股（0322）本質不差，有品牌及規模，2016年後其實股價大升，但之後又大跌翻，股價甚為波動，反映內地的市場競爭激烈。

佢近年股價回落了不少，市盈率仍是略高，估值處合理區較上部。

長遠的投資價值仍在，但在市場競爭較大的前提下，相信盈利會有點波動。此股算是平穩增值股，都質股素，可以持有。

------------------------------------------------

Q19838：

龔sir,想請教一下你覺得吉利如何？適合長線定短線持股？

另外想問埋3800保利協鑫，我幾年前$2.6x入咗，之後見佢一直跌無止蝕，後來$0.7x又溝咗轉

之後再繼續跌到無眼睇，到20年7月佢個廠爆炸，股價已經落到$0.21

個股價殘到咁我就決定唔再放錢落去（呢個決定而家好後悔），三十幾萬本金變到得返四萬.....

以為真係無希望，點知突然有政策支持，股價急上，但我都無再溝貨，因為唔敢再放錢落去

而家仲未到家鄉，龔sir,你覺得政策能否支持3800股價再上升？我應該一到家鄉就閃定係有機會第佢股價再上？

龔成老師︰

任何優質股，都應該係以長線持有，增值效果才會最好。緊記唔好短炒，這個唔係一個理想的財富增值方法。

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

未來電動車將為汽車業帶來很大發展空間，吉利在電動車方面技術都有，但唔算最高。相比比亞迪（1211），優勢唔明顯，故對這部份唔好有過高期望。

現時價位已經略貴，要回翻D先算合理區，才可分注入市。

保利協鑫能源（3800）質素一般，近年更出現虧損。最令人最擔心的，是佢2018年的核數師報告，出現了修定，反映核數師曾經對佢的賬面有疑問，這是一個不利訊號。

另外，這股過往是散戶其中一隻炒股，我最怕就是這類。這股質素一般，不適合持有太多，可以考慮反彈後先賣出一半，餘下再觀察少再做決定。

------------------------------------------------

Q19839：

龔sir 如果長線投資 941會否比12更好？現價平 股息又高

龔成老師︰

2者股票性質不同，唔可以單用股息高低，去比較其投資價值。

中國移動（0941）不是無質素，5G雖然對佢有正面影響，不過中國政府希望相關費用不會太貴，令資訊流通更便利。所以，佢只會係平穏增長。

你可以視佢為收息股，唔好預佢會有大增長。現價計有逾7%，可分注入貨。

恆基（0012）前景正面，加上佢是全港持有最多農地的發展商，長遠的價值一定會慢慢釋放。

此股相對中國移動（0941），未來增長潛力會較高。現價處合理區，雖然股息率無中國移動咁高，但投資此股應較著眼未來增長潛力。

你可以因應你自己投資目標，去決定買邊隻。

------------------------------------------------

Q19840：

老師你好，我今年四十幾歲了，將會移居澳洲，先生係當地有穩定工作同收入，過到去，我可能會搵下Part-time 做

未必可以儲到錢。現時資產如下:
現金$1.4M
股票$400K

$100K 941
$100K 9988
$50K 688
$50K 883
$30K 1093
$30K 12
$30K 1928

現金1.4M 中會留0.6M作備用，其餘0.8M 可投資股票，希望每年有10%回報,投資期十年。如果繼續加注以上股票，
可以做到10%回報嗎，可以俾啲意見我參考吓嗎，多謝你先，祝身體健康，會繼續支持你嘅新書。

龔成老師︰

你以上股票都可以，但中國海洋石油（0883）雖有質素，但不是最高質類別。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。這類商品企業可投資，但不宜佔太多。

現時大市在合理區，現金和股票比例大約各一半，故你可以再動用多20萬，分注入一些優質股。餘下資金就等大跌市，才加大力度入貨。除了投資以上股票，以下股票都合適，供你作參考。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18581-Q18600）

Q18581：

老師，想問1343值得買嗎？
見佢呢排升得好多

龔成老師：

偉源控股（1343）要十分小心！股價極高！

過往5年，生意都無特別增長，中期業績更生意下跌，並出現虧損。

這股在過往，一年盈利只有幾百萬坡元，一年盈利平均只有波幣$3000萬，佢增長力一般，從事建築工程等業務，這類股一向估值都不太高，市盈率可能只有8-10倍。

以這個基礎初步推算，這企業只值$2億、$3億。但現時市值$40億！超誇張的價！

加上這股上市年期不久，上市時市值細，近期無原因上升，與之前的問題類股玩法一樣，小心！

唔好因為佢升而買，無跟據的！

------------------------------------------------

Q18582：

其實我都要同你懺悔 2018年問過你問題，跟住其實個人都係無乜動力 (家庭背景關係，我係非常保守派，雖然30歲都未到) 到了今年年頭，終於！的起心肝！

做咗月供股票 跟住到了年中6月股市可以話上升時間，我唔知邊到來的勇氣，衝咗入股市，贏錢贏錢炒呀炒，再玩埋牛熊證，再衝埋入美股。

跟住7、8月開始股市有所回落，呢種炒炒賣賣當然不能長久，贏下輸下，曾經輸到入自己個本到，慶幸又贏返，直到現在就好似一場數字遊戲。呢個信號係我個腦出現了。

呢種方式同睇你咁多年的教學，完全係背道而馳，但呀Sir你都明即時穫利的吸引性 正所謂袋入袋先係自己錢，莫講持有多年佢有機會跌先，你望住賺緊錢，但又唔袋入自己袋，係挑戰人性

但我又明我依家唔係向緊致富道路，只係玩緊數字遊戲，好矛盾呀

學討論區的人講: <你有無佢(即係你)咁本事一隻股揸十年？>

我真係無呢個本事 點做到 求心湯雞湯 (雖然都睇過你寫唔少)

係呢個問題上，我真係有所反思！9月開始搵本簿寫低每個交易，蝕既我就會紅筆highlight住佢！等自己留意返，萬一不幸地越來越多紅筆，希望可以對自己有個阻嚇作用
。

最後多謝呀sir你，雖然條路越走越歪 但月供股票部分，都係因為見你回覆人叫初學者做，我年頭1月就真係的起心肝開始做，否則我應該後面一連串的野，應該都唔會試到，都叫踏出第一步，係好事來既，都係一個學習，所以感謝你

龔成老師：

我20年前，都是短炒者，炒輪、炒孖展，玩左幾年，輸足幾年，之後長線投資，就開始不斷賺錢。

我好後悔當時浪費左幾年去學這些短炒技巧，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒。

只要我地細心少少去想，都會明短短炒根本賺唔到錢。長線先至係王道。

如果你明白，希望你盡力學長線投資，我都明短炒有時好吸引，但一個錯的方法唔應該再做，我地應該努力學正確方法，就算這方法唔易學。

------------------------------------------------

Q18583：

你好老師，我手上有
788 6000股 @1.44
1317 2000股 @2.3
1972 400股 @18.98

手上可入股票現金余$28000，想全部買入2382，現階段可分注入嗎？還是需要再等等？

或老師有其他提議可供參考？謝謝回覆！

龔成老師：

你上述持有的，都是有質素的股票，你可以長線投資。

另外，我地投資，要建立一個「平衡的組合」，長遠來說，要有不同類的股，同時同一隻股不能太多。你現時現金不算多，應該留現金。

這是一個配置的過程。平衡，長線。

舜宇光學（2382）有質素的，現價合理區中上部，你等回多少少先考慮。這股值得長線的。

另外，你可以考慮盈富（2800）。

------------------------------------------------

Q18584：

阿sir, 我兩年前上完堂後，一直月供以下股票，比亞迪我放左一半（$98）。以下是月供金額：

$500 比亞迪 (潛力股)
$500 中國生物製藥 (潛力股)
$500 銀娛 (平穩+潛力股)
$500 港鐵 (平穩股)
$500 盈富 (平穩股)

有一個問題想請教下阿SIR:

我見比亞迪同銀娛都升左好多，開始遠離合理水平，想減少/唔月供佢地住，有冇咩代替品建議？

麻煩晒阿SIR.

龔成老師：

太好了！這是你2年努力的成果。

其實，月供我地一般都會照供，但如果真的到了貴的水平，可以停一停或減金額。

你餘下的比亞迪（1211）可以持有，至於月供可停一停。而銀娛（0027），其實未貴，你可以照供。我地要見到明顯貴先停。

至於其他股，你可以照供。

你可考慮加入華夏恒生科技（3088）去月供。

------------------------------------------------

Q18585：

老師，報讀了你的股票班，期待與你見面，大家一齊發挖倍升股，加油。

Q1. 想問課堂會有一些軟件，apps, 或是網頁資訊等合適工具提供來更有效地分析優質股嗎？

因為始終是初學者，有時見到老師出post分析一隻股票，裡面的數據都不知那裡能找到，例如過往5年平均ROE, 平均股價，平均市盈率等。

Q2. 最近（981）中芯被美國制裁，股價暴跌，但市盈率仍有63倍，此股可投資嗎？

（522）ASM, (763)中興通訊現價合理？

龔成老師：

1）放心，課堂會具體教你，財經網站、10年財務數據網站、選股的免費程式、5種選股方法、睇年報技巧等等。

總之，你每堂多溫書，我每堂都有功課比你，你照住做，就會跟到。

2）中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算貴，加上之前熱炒過，股價大上大落，投資要注意風險。現價略略貴，如投資，回翻10%先小注。

至於ASM PACIFIC（0522）這股有質素的，長遠正面，現價合理區中上部。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。

此股可長線，只要唔係佔你組合太高比例，都可以，同時要明白這股上述的風險。

11月見！

------------------------------------------------

Q18586：

龔SIR, 如果碧桂園(2007) 同恆生(11) 二揀一全倉買入, 你認為邊一隻較大潛力?

兩隻都有6厘息左右, 即使股價短期不升, 仍有股息收入, 穩中求勝,只是現階段不想太分散而影響回報率

龔成老師：

我地投資，不是賭博，而是一個配置的過程，同一隻股票，唔應該多過股票組合的15%。

碧桂園（2007）的賺錢能力較高，不過負債多，風險大。

恆生（0011）近年賺錢能力略減，收息股，但增長力不強，以穩健度來說，這股較好。

------------------------------------------------

Q18587：

龔sir. 近期比亞迪上升，但如果以資金分散投資各種股票，即使佢升幾倍，都唔會對我整體投資組合有爆發性增長，感覺無咩意思。

而買新地，金沙等等有派息既穩健股，爆升機會極微。要財富快速增長必須全倉一隻睇好有前既股票對嗎？

龔成老師：

雖然重注單一股票，可以令整個組合增長好快，但我地投資，無人話一定該股會升，是可以跌的！

如果你只想回報，只無想過風險，就好易會出事，我地是理財，是一個配置過程。要穩中求勝，不是博。

------------------------------------------------

Q18588：

SaaS 股上我暫時亦都考慮緊兌吧1753 佢雖然暫時仲係處於虧損 但我都仍然睇好佢前境 而且相比起微盟2013 佢既估值仍然係比較低 會唔會比起微盟更值得博值呢？

另外我持有大部份小米1810 但最近林斌又再次出售大量股份令我思考左下 老師你話企業質數係睇長線，但林斌2019 2020 分別兩次出售股份都令小米股價下跌。

但我擔心既唔係股價短期下滑，而係如果話林斌同雷軍呢兩位最大股東對小米前境其實看法分歧 會唔會對小米長遠既質素有所影響呢。有小小不安

龔成老師：

兌吧（1753）主要係中國從事用戶運營軟件即服務平台，以及互動式效果廣告等業務，不過這刻仍處虧損狀態，只可以話分析不易，有危有機類。

這都是潛力股，但風險較高，其實佢生意增長不差，只是未進入收成期，如果你睇好，小注投資可以。你可以長線持有。

佢就好較話同微盟（2013）比較話邊個較好，始終業務模式並不同。

至於小米（1810），你上述的因素，對企業會有中短期影響，但我地唔知佢賣股背後的原因，可能只是佢自己想套現，所以我地無得估佢有無分歧。

我地最終都是睇翻企業的業務、前景情況，其實現時小米已有一定的規模，業務模式與網絡已建立，長遠仍是正面，相信一個人賣股的行為，唔會有影響。

------------------------------------------------

Q18589：

老師，想問你建議全個倉可以持有幾多隻股票？
而各股的比例該如何決定？

如果同時看好很多股票，該根據什麼準則來決定買哪一隻？

龔成老師：

首先你要有一個配置的方向，那些類股較適合自己，同時大量分析這些股。如果是優質股，就可以進入「有可能買入的名單」。

下一步就是分析平貴，考慮值博率的角度，去睇下點樣投資。

我地要建立一個組合，這是一個長線配置的過程，每隻股最好少過股票組合的15%，單一行業少過30%，以減少集中風險。

當然，大多股票也不是好事，因為我地要管理，要持續跟進股票的情況。

------------------------------------------------

Q18590：

你好，龔成老師！
本人26歲，月入約4萬穩定收入。

本人持有以下股份，部分正在坐艇中，想問應長渣嗎？有升值潛力嗎？

01211 比亞迪股份 500股 35.5@
02800 盈富基金 1500股 25.520@
02388 中銀香港 1000股 24.00@
00066 港鐵公司 500股 36.9@
00012 恒基地產 1000股 35.269@
01837 五谷磨房 26000股 1.096@
01212 利福國際 5000股 7.530@

本人仍有現金約15萬，想主力投資潛力股，我有参考你的50優質潛力股所提及的10隻潛力股，現時好像只有0788比較貼近合理區，我應該入市還是等機會，等其他股例如比亞迪中生製藥等回落至便宜區再儲貨呢？

謝謝！

龔成老師：

我地最重要是睇企業質素，有質素，有發展，就可長線。

五谷磨房（1837）質素較一般，這股增長力不強，加上中期業績出現虧損，長遠宜賣出這股轉其他，但由於這股不是零質素，因此不用立刻賣出，可以等機會。

至於其他股，無問題，可長線。

至於資金方面，唔好急。中國鐵塔（0788）都有質素，現價合理，可考慮，不過增長力比預期略減，這股小注都得，餘下資金就等比亞迪（1211）等的潛力股，睇下可以跌幾多入貨。

------------------------------------------------

Q18591：

老師你好，我是完全新手，32歲剛起步儲蓄，巳比別人慢了很多，如果要學投資應買你那一本書先？是在銀行開戶口嗎？

月入2萬,現金有10萬可什樣投資？希望快點賺到第一個一百萬再有更多錢投資

龔成老師：

32歲，仍是好年輕，只要你投入多少少時間去學投資，同時努力少少儲蓄，我相信你可以追翻的。

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q18592：

你好龔老師，我22歲。

我自己中學畢業就後就係屋企人的餐廳工作但係最後因為其他因素，餐廳倒閉左，而加呢就係一個文員。

來緊諗住讀一個副學士，希望可以升上去學位，我今次PM目的係希望老師可以俾少少意見我呢個 年輕人，希望老師你會抽時間回覆

首先我自己有開始閱讀理財書嘅習慣，我大致上理解到人工只係一個短期解決生活需要嘅方法。長遠來說，要持續累積資產。

而資產下可以分為投資土地，公司以及股票，我先前睇過你講月供股票呢樣野。

1.我想知道月供股票可以賺嘅多唔多呢，定係自己慢慢學操盤呢？

2.你認為需要累積到幾多現金先正式開始進入投資世界呢？

3.咁我可以喺求學嘅時期做啲乜嘢令到自己嘅資本繼續增加？

其實我有打算上你個個股票班但係手頭未有咁多錢去上堂。希望老師你可以解答下我，謝謝老師。

龔成老師：

1）月供股票會比較適合初階投資者，因為原理就是每月不斷儲貨，好處是將買入價平均，你可以減少一次過在高位買入的風險。

不過，如果你有一定的投資實力，可以掌握到較平的價買入，就不用月供。

2）你只要有足夠的備用現金，例如3-6個月的基本支出，以上的資金已經可以投資。

之後就要睇大市平貴，如果貴的話，就等等。現時大約處合理區。

3）第一，盡你的能力去增加知識，我18-22歲這幾年，就是利用讀書期的較多時間，不斷睇投資書，打好了基礎，到之後踏入社會正式工作有收入後，我運用得更好。

另外，你可以做小生意，你現時是一個好好嘗試做生意的黃金期，大膽去試，有機會幫你開一條全新的路。

加油！我相信我地總會在股票班見到。

------------------------------------------------

Q18593：

你好，我係疫情前入左1918 融創中國 之後keep 有入有出 依家均價$38有三手。 如果再跌 好唔好再溝貨 或者 轉移到其他股票？

另外，我仲持有2013 微盟 $11.5 @ 2000

想問埋968 $10 可以入貨 定係等回返9蚊左右先再入？

現時現金不多 得返十一萬左右 感覺上兩頭唔到岸咁。人工也不高 月薪只有17k
謝謝你

龔成老師：

融創中國（1918）業務不差，有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但要明白背後的風險，同時明白這一定會令股價較波動，自己最好控制注碼。

因此，唔建議你心急加注。

至於微盟（2013），小注持有無問題，這股有潛力，同時有風險。

信義光能（0968）有潛力現價合理區頂，你可以小注先，之後等跌先正式入。

資金不算多，你可以等大市進一步回落先入貨，唔好太心急。

------------------------------------------------

Q18594：

呀sir 岩岩見到你之前拍片分析左3隻追蹤恒生科技指數既ETF 想問下你點睇新的3067？佢既管理費同追蹤誤差都低過3088 咁係咪選擇3067較好？

另外，想問下 3067 同3088 呢兩隻既便宜區係幾錢？thank you

龔成老師︰

安碩恒生科技（3067）以100股為1手，相對華夏恒生科技（3088）要200股1手入場費較平。

而且每年收費和追蹤誤差，都係3067較低。

初步睇佢會比3088優勝，但你要留意，由於幾隻恒生科技ETF都係初上市，追蹤誤差只能作參考。實際誤差未必一樣，你要知道這個風險。

由於佢地包含了三十隻恒指科技成份股組合，要估值唔易。而且這些新經濟股雖有潛力，但都比較波動，用月供模式儲貨，並長線持有會較好。

------------------------------------------------

Q18595：

其實想問

優質藍籌股需要訂立 止蝕價嗎（例如5%)

龔成老師：

所以股票都要有止蝕概念，但我地不是用「股價跌多少」去決定，而是用企業質素。

如果佢質素轉差，而這是長期與核心性的，就要止蝕。

相信，股價跌左但質素無變，即是平左，我地當然唔會賣出，而是買入！

------------------------------------------------

Q18596：

老師，什麼是中下部、中上部？

龔成老師：

即是現價處於合理價範圍的那個位，如果企業價值$50-$70，現價$60，就是合理區中間，如果現時股

------------------------------------------------

Q18597：

龔sir 可否請教一下 6189呢隻股🙏🏿🙏🏿🙏🏿，小弟系 4.4 ，3.5. 2.5 都有入貨，現價 應否再溝淡呢？勞煩龔sir 幫忙分析一下

龔成老師：

愛得威建設集團（6189），之前股價$30跌落現價$1，是典型的問題股，今年已見過好多隻，佢唔會上翻去。

中期業績生意跌7成，出現虧損，見唔到有投資價值。

絕對唔能夠加注！

賣出是遲早的問題，建議你分段減持。

------------------------------------------------

Q18598：

龔sir,早晨
想請教下好孩子國際具投資價值嗎？

另外想請問的是未來中國進入老年化社會，有什麼公司行業能夠直接受惠？華潤醫療算嗎？

龔成老師：

好孩子（1086）係中國的國際兒童耐用品公司，主要從事嬰兒推車、兒童汽車安全座、嬰兒床、自行車、三輪車及其他兒童耐用品的設計、研發、生產、營銷及銷售業務。

過往業務不過不失，雖然都有生意，但增長力唔強，到近期的業績有轉弱情況，相信對經濟較為敏感，中短期都會較弱。

現價合理的，但就唔好睇得太好，整體投資價值中等。

至於人口老化，醫療相關是受惠的行業，當然具體都要睇業務模式與範疇，但這是大方向。

至於華潤醫療（1515）其實本質唔錯，不過業務波動與中短期因素，令股價波動。

佢是華潤集團在醫療版塊的主平台。主要在中國從事綜合醫療服務、提供醫院管理、諮詢服務、醫院集團衍生業務。

旗下擁有過百家醫療機構，提供臨床診療、健康管理、公共衛生、醫養結合等全方位、多層次的醫療健康服務。擁三級醫院、二級醫院、一級醫院、社區機構，總床位數超過1萬張。

本身有一定的企業優勢，長遠企業發展仍是正面，此刻價格大約在合理區中下部位置。

------------------------------------------------

Q18599：

成哥，正如你書入面講先買細樓再換dream house, 我剛剛買左個大約250呎的兩房單位(30幾年樓)，諗住自住幾年再換，因為要全屋裝修，想請問你：

1. 應該點搵/揀裝修師傅？

2. 因為係自住，裝修度點平衡個人喜好同埋日後轉手時市場喜好？

龔成老師：

1）你找一些信譽較好的，最好是有自己的店舖，品質有保證的，找裝修師傅一向都好煩，你要小心選，同時唔好表現到弱勢，要懂得爭取自己權利。

2）你預市場要求會佔多少少，在這基礎下有自己的喜好。每個人都想有自己喜好，但你唔好太過「個人化」。

------------------------------------------------

Q18600：

老師，你建議我沽出邊隻股票好？即係現在蝕緊錢都要沽？因為現在個市甘差！蝕好多

中國電信長楂不好嗎？遲d 5g越來越多

龔sir，請問1183可以長楂嗎？
1.57入左 thank you

龔成老師：

唔好理「個市甘差」，你要睇長遠的企業價值。

那一隻持股的長遠質素、前景較弱，就賣那一隻先。

你根據我上次比你的方向，加上自己對企業本質的長期分析，睇下邊隻你會較優先賣出。

至於中國電信（0728），收息股，長遠都正面，但不是高增長類。

而澳能建設（1183）以過往的業務來睇，只是中等，業務發展不算強，整體不差但又未算好好。

佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但近期股價其實有點超前反映。這刻投資值博率未算高，如睇好，小注好了。

另外，如果唔想日後後悔買錯股票，買入前就要多做功課，研究企業。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。