【龔成問答信箱】（Q22161-22180）

Q22161：

老師，我見你話如果該股票是近幾年上市的，當分析該股時，都可睇一睇佢的招股書，但不明點解要再看招股書？
有什麼用？

龔成老師：

我地買股票，就是買企業，你要盡能力了解企業的業務情況，以及財務數據，只要企業是近年上市（例如近3年內），我地都會睇佢的招股書，這樣可以了解企業的發展，以及當中的財務數據情況，就能有效評估企業的質素，以及進行估值。

招股書有好多行業的資料，市場研究報告，行業預期的發展，企業預測數據等，都是好有用的。

------------------------------------------------

Q22162：

龔成老師你好！我留意左你FB已半年多，買左你幾本書，已睇完80後百萬富翁和股票勝經，現在睇梗財務自由行。睇左你既書感覺獲益良多，謝謝。幾時會係澳門開班？（已登記留位）

請教一下老師，我今年36歲，月入4萬，扣除供樓、家用同生活費，每月可儲蓄1萬5千左右，層樓仲有140萬要供，現在現金只有20萬左右，持有股票有：

9988 — 200股@206
1810 — 2000股@21
0270 — 18,000股@11.68
1113 — 3000股@38.65
1177 — 3000股@7.08

1113可以長期持有嗎？270要減持嗎？

上面組合如需重組，希望老師多多指導。

短暫目標係五年儲到200萬，退休時希望達到財務自由。

謝謝老師

龔成老師︰

由於疫情關係，暫時都未可以係澳門開班，當情況許可，我會馬上過澳門開班，到時同事會聯絡你。

你現時持股，都係有質素，全部都可以長線持有。

但任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

粵海(270)明顯太集中，要作出調整。

未來投資策略上，你可以投資「平穏增長股」和「潛力股」。你每月5成儲蓄，即是用$7500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，資金不宜用盡去入市。你現有20萬資金和每月所儲倒的資金，建議等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$15000 + 現有資產60萬(持股和現金)，5年後要增值至200萬，相信係很大機會成事。

至於長線增值，你都係維持這個大方向，咁就可以。

------------------------------------------------

Q22163：

龔老師, 打攪你, 請問1919 中遠海控除淨10送3點樣計算? 除淨前$19.36入左3000股, 應該送900股, 請問到時送的900股系咪除淨後價錢$15?

到時送股到戶口我的成本價點計?吾識計~ 請幫忙解答~

龔成老師︰

我地再精準D咁講，你除淨後每股成本，會下調至$15左右。(而非只係送的900股)

其實佢除淨後，就會按比例，將個股價向下調整。變相你每股買入成本係少左，但你持貨價值係依然不變。

若以佢除淨前$19.36計，除淨後每股就應該係$19.36 X 3000 / (3000+900) = $14.89

當然，實際開市個價未入樣，因為市場還會有其他因素，令股價變動。但單係考慮個10送3，股價就應下調至$14.89。

而你計算每股成本，都應該用$14.89。

------------------------------------------------

Q22164：

老師，您好！我快提早少少退休了，兩個月前第一次買股票。一隻領展，一隻香港寬頻。後者11.4買入, 一直跌去，現在已經跌到8.7了。

請問應該再買溝下，還是等？真的不開心啊！希望你可以盡快指點我。萬分感激啊！

老師，我每天看你的文章，希望好好學投資

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

香港寬頻（1310）主要在香港提供固定電訊網絡服務及國際電訊服務，以及產品銷售。

業務發展不差的，生意與盈利都有增長，不過盈利略有波動。

整體來說，有長線投資價值，收息不差，同時有基本增長力，現價算合理。

由於你將近退休，應以投資收息股為主。透過收息股產出的現金流，去支援你退休後的生活開支。

你現時持有的領展(0823)和香港寬頻（1310）都適合你，你目標主要係收息，所以股價波動，你係唔洗理。除非佢長線質素出左問題，否則你一直持有就可以。

以下係其他優質收息股，供你參考，現價都在合理區，可分注入市。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q22165：

我人工每月可以存20000、想問下有什麼基金或股票可以有15%一年、月供20000

龔成老師︰

你可以選擇一些「平穩增值股」+「潛力股」作投資目標，比例你預大約各一半。

以現時大市合理區狀況，你可以每月先用一半儲蓄(即$10000)去做月供，另一半就先儲起架策略，餘下現金就是等大跌市時出手。

恆指當中有不少平穩增長股，至於潛力股，可考慮：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

但你要明白，「潛力股」係有一定波動性，會有一定風險。你以上配置，拉長線平均計，每年大約有10-15%回報，相信可以達至你目標。

------------------------------------------------

Q22166：

龔成老師，我$31.65已入了345，買貴左，而家仲出左事，如佢有機會升多2元，我想轉去買322，請問322ok嗎？這個做法好嗎？

龔成老師︰

我地持有一間企業，主要係睇佢有無質素。而當佢出問題時，你要分析到底係中短期，還是長遠對集團有影響，才好下投資決定。

維他奶(0345)只是短期不利，但長遠，我相信影響又未算核心性，不過好睇事情的發展，要睇管理層，以及事件發酵程度，仍有未知數。

只可以話短期股價上落都大。

至於，康師傅控股（0322）其實本質不差，有品牌及規模，但內地的市場競爭都激烈。

這企業的長遠投資價值仍在，但在市場競爭較大的前提下，相信盈利會有點波動。可以理解為平穩增值股，因此估值不會太高。

現價算是合理區中上部，分注投資，長線，都可以。

若你持有維他奶(0345)，佔組合比重不高，你照持有，再觀察事態發展，係可以。但若持貨較多，你可以考慮換少少去康師傅控股（0322）或其他優質股，去平衡個風險，都係無問題。

------------------------------------------------

Q22167：

龔sir你好呀，有野想請教你。我今年40歲，月入20K，如可儲7-10k左右。

員工合作社已儲大約有20萬，利息3厘(每月儲$5000)，銀行大約有10萬，利息5.5厘、現金約10萬

現供每年約5萬保險 (醫療大約佔40%, 儲蓄大約佔60% (50歲可收回約70萬))

以前只係用最保本方法增值，但回報都未如願。剛喺Facebook 接觸老師約半年，現持有以下組合，由上年12月開始買股票

目標想年回報有8-10%！可唔可以比少少意見。

請教你應該點配置好，想有好既財富增長效果

持有股票:

1177 1000 $7.69
1345 15000 $1.09
3067 800 $17.24
6618 150 $119.98
6823 3000 $10.28
2845 50 $153.25

謝謝老師~

龔成老師︰

以你40歲年紀，依然係有財富增長需要。你現時銀行5.5息存款，勉強可以。但合作社3%儲蓄，實在太少。建議將這部份資金，用來月供優質股會較好。

"保險"只係理財中防守部份，買足夠保障就可以，增值可以留比優質資產(如優質股、物業等)去做。

你現時持有股票，都有質素，可長線持有。

但當中的中國先鋒醫藥(1345)質素都一般，盈利和股價都十分波動，最多只宜小注。建議你沽少少，換至其他優質股較好。

未來增值策略上，若你想做到長線平均有8-10%回報，你可以投資「平穏增長股」和「潛力股」。你每月5成儲蓄，即是用$5000做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有10萬和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22168：

本人34歲，已婚，有2個小朋友，我月入8萬，太太6萬，現金約100萬。

有一層樓收租（17000租金，差銀行400萬，現值800萬），有一層自住（差銀行400萬，現值800萬）。

小朋友開始長大，想換港島3房有工人房，睇過樓心水要2200-2500萬，好不好賣2間換1間？

每月可存6萬，點樣可以快d增值到足夠首期呢？另外要問下你點睇中人壽及華潤水泥。唔該你如果有空請回覆。thanks

龔成老師︰

財富增值方面，你可以用「平穏增長股」 + 「潛力股」作組合，去創造一個增值平台，去累積這筆首期。

現在你每月先用5成儲蓄，即$30000做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

華潤水泥控股(1313)有質素，用來增值係可以，但波動性較大，不宜持有太多。

而中國人壽(2628)都有質素，但近年增長弱左，質素只算係中等，同樣不建議太大注。2隻股票都在合理區，可以分注入貨。

而置業方面，由於你本身已有一定房貸，如果你要買你目標2500萬的自住房，基本上你係較大機會，要沽出現有2個物業，再盡用資金才可以做到。(你心水物業，因為過千萬，故只能做50%按揭)

除非你有好實際需要，否則我唔係太建議你咁做。因為你會資金盡用，令你成個財富組合偏向物業類，而且仲係單一間物業，其實唔係咁理想。

你可以考慮一些樓價無咁貴的3房單位，再用細屋換屋的策略。

目標係希望不用集中在單一物業之餘，又可以每月空出較多資金，用來投入優質股增值。相信這樣配置，你個財富組合平衡性會較高，長線對你較有利。

------------------------------------------------

Q22169：

龔sir,你好。如果我只可以每月用5000供股，想儲20年後退休，退休後我想有每月股息20000，請問有可能嗎

龔成老師︰

如果你希望退休後，每月有2萬蚊現金流，以股息率6%計，你需要本金400萬。

我假設投資回報有10%（連股息再投資），你每月投資$5000，20年後大約會增值至340萬，故很大機會達至你的財務目標。

策略上，你可以用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2500做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股，例如恆指成份股當中有不少，亦可考慮、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

但由於你月供可用金額不多，我建議先集中指數基金，以免個股月供成本過高。到你可以加大月供金額，才加入其他股票會較好。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22170：

Sir, 我係第31期畢業生

想問下1024 快手前景如何，持貨平均價$300. 而家應唔應該放左佢入番d 平穩股如領展，地鐵？

Thx

龔成老師︰

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。

現價雖然無之前咁貴，但仍未平，可稱為合理區頂。但短期股仍會十分波動。但佢係有投資價值，雖然你買貴左，但若持資不多的話，可以守。

若持貨較多，你可以沽少少，換成領展(0823)和港鐵(0066)這類水桶2股票，去平衡風險。

------------------------------------------------

Q22171:

你好龔老師，我想問我從來沒有買股票，我每月可供股10000至15000，現在38歲，老公40歲，之前每月供保險現金30萬，長遠供那幾隻股票好？謝謝

保險係赤霞珠

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你38歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$5000-7500做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

你個保險計劃，我無研究過。

其實"保險"你可以好簡單咁理解，佢主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

若你份保險，已經供了一段時間，你可以照持有。但唔好再加大儲蓄保障金額，咁就可以。

------------------------------------------------

Q22172：

老師你好，我係你澳門既讀者，我目前睇左你兩本書，《80後百萬富翁》及《股票勝經》 睇完想上你既堂學深入少少，請問你何時來澳門開課/會不會打算開網課之類？

另外比較推薦我之後看甚麼書，想學習更多評估企業是否優質的能力，謝謝你

雖然自己買入都是大公司，但由於本人評估企業價值能力弱，大大減低自己長期持有的信心。

（目前持有阿里爸爸、小米、藍月亮、東京健康、農夫山泉）平均每隻目前都跌了15-20%。

謝謝老師

龔成老師︰

我同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

澳門班，我會等疫情穏定，可以通關後，就馬上過澳間再開翻。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

如果你睇完《80後百萬富翁》及《股票勝經》，都有一定掌握。你可以再睇埋《選股勝經》和《年報勝經》，這2本書，會再仔細少少，去教你點去初部分析一間企業。

睇完這2本再去上堂，對你課堂上掌握，會有一定幫助。當然，就算你睇唔明都唔緊要，上堂會再由淺入深，去解釋一次。但有個底，就會吸收得快D。

另外，我地持有一隻股票與否的重心，係企業質素、前景，不要過度被買入價影響。買入價只是一個心理因素，如果企業核心因素未被影響，我地係唔需要理會。

你現時持股，都係有質素，適合你長線持有。

------------------------------------------------

Q22173：

你好，龔成老師！最近想了解一下投資，想買你的書學習一下，請問你會建議先看哪一本書先？

另外，我媽咪有20萬叫我學習下幫佢買股票，但係我唔知點樣去選擇買咩股，請問老師你有什麼建議？

謝謝！

龔成老師︰

你可以先睇我架《80後百萬富翁》、《財務自由行》和《股票勝經》，都適合初學者。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你媽媽距離退休，都只有10年左時間，其實已要開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的$20萬，暫時只能動用$10萬，因為大市唔算平，你要分注投資，同時留下一半資金。長線投資。

平穩增值股，例如指數基金、金沙（1928）、長建（1038）、中銀（2388）、港鐵（0066）、恆基（0012）、粵海（0270）、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

但若果你媽媽已經好接近退休之年，甚至已退休，我地就應集中係「收息股」，重點係創造現金流，去支援佢退休生活開支。

------------------------------------------------

Q22174：

老師你好 新手一名 完全冇任何知識 想問下第一步應該開始學咩？新手想買股票建議資金幾多？

你邊本書比較岩新手從最基本學起 謝謝

龔成老師︰

作為投資新手，你要做三樣野。

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

《80後百萬富翁》、《財務自由行》和《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供指數基金。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，指數基金是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供基金，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q22175：

龔成SIR，我今年29歲，我與家人持有下列股票，我有一些股票分配的問題想請問你，

我手上有﹔
2手京東9618@$330
1手騰訊700@$560
2手匯豐005@$51

我亦由上年開始每月供股﹔
銀河娛樂0027@$65 - 每月 $1500
中國生物製藥物1177@$7.8 - 每月 $1500
盈富基金2800@$28.5 - 每月 $1000

我知道購買京東的現價格太高，但我上年購買時都已經打算長期持有。

如果下半年時想再購買騰訊或是小米，是否會持有太多新經濟股？

如果持有太多新經濟股，是否應該買傳統經濟股呢？例如﹔領展，港鐵等等？

好多謝你花咁多時間去解答問題！

龔成老師︰

以你年紀計，應以增值為主。你現時持有和月供的股票，都係有質素，就算買貴左，都係有得守，你照長線持有就可以。

但匯豐(0005)只係收息股，增長力一般。若係你家中長輩持有，都可以。但若是你本人持有，就未必太適合。

月供方面，我建議用指數基金做主力，個組合平衡性會較好。

騰訊(0700)和小米(1810)都適合，現價在合理區中上至頂位。但若你加入這2隻股票，會有太集中係科技股的問題。

而且，這類股票雖然有增長潛力，同時風險都較高，不宜持有過多。

你想投資這類股票，唔係唔得。但同時間，你都要買入一些平穏增長股部份，去令組合保持平衡。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q22176：

你好，龔老師 拜讀完股票勝經，增加對股票認知，令自己對股票有基礎概念，多謝老師。已買你另一本著作＜80後 百萬富翁＞

同報左你股票班，繼續學習，增加智識，希望可以達到財務自由。

本人37歲，已供完樓，有大慨20萬流動資金，月入21000，每月可以儲蓄10000蚊，已開始用5000蚊月供股票，留5000蚊作現金儲備買貨。

月供股票我選擇，盈富+港鐵+中電+領展+中銀香港+金沙+小米+港交所+騰訊+安碩A50，盈富月供佔其中2份。以上供股會否太散？

如現在小注買入騰訊，小米，金沙是否合適？謝謝龔老師

龔成老師︰

你所選的股票，係適合你年紀，資金配置比例都正確。

但的確係有點散，因為你月供總金額唔多。若你同時供咁多隻，變相個股月供成本會高左。

最好你用指數基金做主力，月供$2000， 再供多3隻各$1000，咁會較好。

騰訊(0700)和金沙(1928)算係合理區中上部，而小米(1810)就在合理頂至略貴。若你無貨，而價開始分注入資係可以。股票班見!

------------------------------------------------

Q22177：

你好,老師, 我想問下現有自住物業供緊, 近排搵緊心水車位100-130萬車位收租, 你認為加按是1個好途徑嗎? 謝謝你!

龔成老師︰

現時仍處低息期，加按是沒有問題的。

關鍵是加按後，是否能將資金買入其他資產，創造更高的回報，由於加按是要支付利息的，所以新資產產生的利息回報一定要比加按的利率高，這樣才值得做。

近年「車位」價格近年雖然已回落不少，但整體上，只係合理區頂部。相對優質股，佢投資值博率會較低，建議你先用股票增值，會較好。

投資車位與否，你就要自行衡量。

若決定投資，只要加按後，負債比重不會過多，咁就可以。假設你30歲，總負債最多可位總資產9成。但若50歲，比例就要下調至5成，會較穏當。

同時，你要明白將來加息，會令你息差回報收窄，有機會影響你回報效果，你要明白這風險。

------------------------------------------------

Q22178：

你好，龔Sir，我已經30歲，投資左5-6年都係蝕多，已經有10萬投資左係美團，現在開始每月可以$6000投資，

請問每個月$3000月供盈富，$3000月供3067可以嗎？謝謝

龔成老師︰

如果你過去5-6年，每次投資多數都是「輸」，即係你存在一些核心性問題。譬如一些錯誤的投資觀念。

記住，正確和正常的完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

往後，你只要以「長線投資優質股」，作為投資目標。我好有信心，你會結束過往一直虧損的狀況。

以你現時30歲計，你這個月供策略係可以。

緊記月供係一個長線計劃，月供最少維持3年，並持有這些股票5年以上，才會有較理想效果。而中間可能會有股價波動，但你不用理，一直供就可以。因為月供本身，已有平均價格波動的作用。

當然，可以的話，最好一直持有。因為，優質股持有時間越長，財富增值效果就會越理想。

現時大市只在合理區，每月資金唔好盡用。最好留有部份，等大跌市出現時，可以用來掃貨。

至於美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

只可以話，潛力是有的，現價唔算平，之前明顯貴，之後回翻好少少，大約合理區頂。此股可持有，就不能太大注。

若佢佔你組合不多，可以守。但若佔你合較大比重，你要沽出部份，去平衡風險。

------------------------------------------------

Q22179：

老師 如果有時間 可唔可以分折一下美股RIDE Lordstown motors corp 謝謝你 請問合理價位係幾錢？Thanks

龔成老師︰

Lordstown Motors Corp (RIDE)是一家汽車公司。該公司從事設計和製造電動汽車。其卡車產品主要係輕型卡車，專注於商業車隊市場。

其旗艦車 Lordstown Endurance是一款電動皮卡車，是一種利用了四個裝有集成軟件的輪轂電機。

我初步睇過佢資料，產品都有佢價值。但由於現時都尚未有正式盈利，而到底幾時會有，無人肯定到。

此股有一定不確定性，唔係唔投資得。但我地投資時，必須要控制注碼，去平衡不確定性，所帶來的風險。

------------------------------------------------

Q22180：

成哥!! 你好!! 想問8032呢隻股!!我睇佢ROE同PEG都好強!! 前2-3年是蝕錢宜家有盈利!!所以基本面是算不錯嗎??

我感覺他會成為倍升股!!?? 對嗎?

龔成老師︰

非凡中國（8032）主要從事體育人才管理及賽事／項目製作及管理、提供體育諮詢服務；以及物業與社區發展。

過往業務都有發展，不過增長力不強，同時有點波動。而盈利上落都大。

你見佢2019和2020年盈利大升，係由於出售於一間聯營公司之部分權益所致。實際上，業務方面增長，唔算明顯。

整體而言，未見企業有好強的獨特性，增長力唔算強。整體質素一般般，現價偏貴。最好等有大幅下跌，才入貨，而且只宜小小注。

我地分析一間企業時，唔好單憑指標或數據，就覺得佢好左。當佢近年和過去幾年盈利，出現明顯變動。我地就要小心分析，找出當中原因。

是企業賺錢能力提升、市場有所改變、定係其他因素。如果係一些長線利好企業本身因素，我地估值可以提升。

但若只係一次性因素，我地就唔應該用這些原因，去作估值和投資決定。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21321-Q21340）

Q21321：

龔sir你好，你本《80後千萬富翁》我已經睇到接近尾聲，書中含金量極大,當中思維篇真係本書最重要既部分，講中哂大部分香港人既固有思想，其中“覺得冇可能，到最後就真係冇可能”呢句一語中的，成枝針拮到9成香港人。

至於金錢篇都係講返金錢背後運作同乘既法則，其實用字真係好簡單，小學生都睇得明，同富爸爸窮爸爸一樣keep it super simple。

到實戰篇，睇完令我更加想成為全職股票投資者，要自己提升股票投資，希望自己做到第四級投資者，脫離打工生活。

本書真係勁好睇，內容價值一定大過書既價錢，其實龔sir既書全部已經睇過哂，最重要既係，書中所帶黎既投資回報已經大過咁多本書既價錢總和，真係多謝龔sir，希望可以再出多啲書

龔成老師：

多謝你的讚賞！

其實我之前有少少擔心，讀者會覺得我重覆左某些概念，與之前的書有接近內容，因為這是一個由思維到應用的知識大連貫，總會有小部分內容，同之前類似，因為有些重要內容我無可能跳過不談。

現時你這樣講，我就放心了，因為我能夠做到寫這書時的目的，就是帶領讀者，由思維到落實，向著$1000萬進發。

這本書用左我好多時間寫，希望可以幫到你知識與財富提升，等你的好消息，加油！

------------------------------------------------

Q21322：

你好龔成老師我沒有工作差不多9個月，現在做全職媽媽。

三十幾歲係07年既時候買咗d細價股，輸咗差不多20萬，一直吾敢再買股。

直至今年2月開始，買再買返現時有既股票︰

390 4.09 買入10000 股
2314 7.5 買入3000 股
777 19.92買入1000股
460 2.09 買入10000股

仲有3隻 現在都持有緊
9626 (抽返來的20股)
2158 37.65 買入1000股
769 1.02 買入60000股

1. 我以上既股請俾一俾意見，我現在有的7隻股票，有邊d可以繼續持、有邊d要放咗佢?

2. 同埋我想用30萬去買其他股票當幫小朋友儲錢及收息，可給我建議嗎?
謝謝

龔成老師︰

1) 中國中鐵(0390)和理文造紙（2314）質素中等，唔建議持有太多。你可以等反彈時，沽出部份，餘下的就長線持有。

網龍（0777）主要從事網絡遊戲開發（包括遊戲設計、編程及繪圖）及網絡遊戲營運；教育業務；移動解決方案及移動營銷業務。

另外，佢近年有發展教育業務，相信長遠都有前景的，但業務始終有不確定性，市場具體情況仍有未知數，所以，投資價值是有，現貨可持有，但暫時不要加注。

四環醫藥（0460）好翻D，相信無之前咁差。不過這股，2015年、2016年，曾經出現了核數師有「保留意見」的情況，反映盤數有問題，小心這股。我對投資這股有保留。

中國稀土（0769）質素一般般。炒作多過實際，過往賺錢能力不高，業務波動，間中出現虧損，投資價值唔算高，你沽出會較好。

醫渡科技（2158）和嗶哩嗶哩(9626)有潛力的，可長線持有。但由於佢地係新股，不確定性會較高，暫時只宜小注。

我睇翻你持股中，除了部份新股算有質素外，其他都係麻麻。你再投前資，建議你先學好投資知識，對你長線財富增值效果，會有重大影響。

現時，你可以先集中係以下「平穩增值股」+「收息股」。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

由於你投資知識不足，建議你用月供方式去儲貨。若想1手手入都得，但緊記要分多注咁慢慢入，去拉平均個買入成本，以減低入貴貨的機會。

2) 由於小朋友年紀少，到佢用這筆資金尚有一段長時間。所以，我地可以集中係增值部份，先為佢累積起一筆財富。

收息都可以，但這類股票增長力較弱，我唔係太建議你用在小朋友身上。

策略上，我建議你分注，慢慢買入盈富（2800）。現時大市只在合理水平，30萬可以先用一半，慢慢咁入分多注入，唔好一次過入晒。

餘下15萬，就等大跌市時，我地才出手。

------------------------------------------------

Q21323：

Hello,龔老師，小朋友岩岩出世，想幫佢儲起啲利是錢去投資，買金粒或者買港鐵股票，請問有無咩意見？謝謝！

龔成老師︰

黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。用作小朋友的財富增值，就未必咁適合。

我建議你小朋友，利用一些優質股，去做財富增值會較好。

港鐵(0066)係其中一個選擇，另外，你都可以儲盈富(2800)，佢係包括55間質素不錯上市公司股票的組合，比港鐵更能分散風險。

若你想增長力高D，可以投資安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上股票都係可以，但你明白當中風險和分別。

------------------------------------------------

Q21324：

老師：我是一個中年婦女，想請教基金每月派息有邊隻建議

龔成老師︰

我對坊間基金無特別研究，無太多意見比到你。

除非你係有原因，係必需以「每月」這模式去收息。否則，我建議你用「收息股」去創造一個組合，咁會較好。因為基金好多時都會有費用要收取，變相令你實際收入減少。

或者你可以考慮，在港交所上市的收息ETF，GX恒生高股息率（3110），這是一個投資收息股的基金，追蹤恆生高股息率指數之表現。

佢一年派2次息，都不差的，你可了解下。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

可以上基金網站有介紹的

http://www.globalxetfs.com.hk/funds/hang-seng-high-dividend-yield-etf/

另外，以下都係較有質素的「收息股」，你可以參考下。

這些股票大多每年派1至2次息，雖然唔係每月派息。但你可以按照你生活所需，再去自行調配這些股息就可以。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q21325：

你好呀，有野想請教。

我想問有冇聽過 消費商，對於呢樣野既前景又點睇?

龔成老師︰

其實「消費商」概念，就是從過往純「消費者」年代，單向作出消費的模式，轉變成「消費者」除了單向消費外，自己同時參與一定程度的銷售工作。從而賺取回報，這個模式有少少似「產品代理人」。

現今科技較以往發達，人與人之間溝通和分享渠道多左，都造就這類「消費商」發展。而且，這類宣傳有別於傳統模式，由生產商單向花大錢賣廣告。

而是直接有身邊認識的人，向你推薦產品。相對舊模式，精準度和新客戶接受程度，一般都會較高。

其實「消費商」概念好耐之前已經存在，好似你購物後，再介紹新客戶賺積分的獎勵活動，其實都係運行緊「消費商」模式。

這模式有佢價值，相信在現時互聯網發達的社會，在不同社交平台支援下，發展會唔錯。

------------------------------------------------

Q21326：

老師你好 本人今年33歲 完全係投資新手無經驗。

但𠵱家決心要將財富增值 希望10年後達到財務自由 現打算月供股票

請問建議買邊類/隻股票 同應該將儲起嘅錢幾多percent用嚟做月供?

以下大約係本人背景
- 單身 月薪9萬左右
- 平均每月可儲6萬
- 有意2-3年內置業

謝謝老師

龔成老師︰

你可以投資「平穩增值股」+「潛力股」，去創造一個增值組合，累積一筆資金，助你達成置業和財務自由的目標。

至於，用多少儲蓄作投資，無一個特定答案。若你想盡快達成財務自由，最好係盡量投入最多閒置資金，就會越理想。

組合當中的「潛力股」，要求你有一定的投資知識。加上你會在2-3年內置業，時間唔算好長，係增值時先要保守一點。

現時，你可以集中在平穩增值股先，潛力股小注好了。到你投資實力較強和處理好置業時，可慢慢增加潛力股比例。

平穩增長股：潛力股
7：3

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金的策略去做月供。每月用3.5萬先月供，另外2.5萬就儲起，是等大跌市時出手。

如果你能在這段時間學好選股等技巧，到大跌市時就能把握機會，財富增值會更明顯。

其實你要考慮一點，當你打算中短期置業時，宜留多少少現金，特別是打算買樓前的一年。而我地投資股票就是買入企業，而企業成長需時，因此一定要長期先有效果。

因此，你要考慮幾時置業，在現金與投資上取平衡。

現時可以用上述的方法，部分月供，部分留現金（但近置業就可能要減現金），到你完成置業後，其實可以再加大投資力度，進行財富增值。

------------------------------------------------

Q21327：

手持5百萬現金應該怎樣投資 希望每月回報有2%

投資股票 置業 應該 怎樣分佈

龔成老師︰

我地做財富增值，一般希望做到架合理回報，係每年增長10-15%。你現時這個每月2%回報的目標，用股票或物業投資去做，風險會較大。

我建議你按步就班，透過月供和買入優質股，去一步步為自已資產作增值。在合理風險下，爭取最大回報。

係投資增值時，我地會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

所以，當我地選擇投資項目時，應參照自已人生階段。年輕時，可以用「平穏增長股"」+ 「潛力股」，到中年「潛力股」比重要減少，到近退休應集中在「收息股」上。

若你投資經驗較淺，就算年輕，我都建議你「潛力股」部份比重，要調低少少。到有一定經驗時，才慢慢調高。

現時，你可以因應自已人生階段和投資經驗，在以下股票中，作出選擇和配置。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

大市現處於合理水平，那500萬資金，你可以先用200-250萬，以"分注"形式慢慢入貨。餘下資金，我地就等大跌市機會出現，才大力度掃貨，並長線投資。

如果你本身無乜投資經驗，暫時只建議動用$100萬-$150，同時你要增加知識，等你有一定知識先慢慢加大金額。

長線計，我地要建立一個長期的「財富組合」，要優質，要平衡，要適合你的年齡與風險承受程度，不同資產類都要有，好似優質股、物業等。

持股中，唔可以太集中個別股票，同一行業不能太多，同一股不能太多。

此刻整體物業算是合理區頂，相對股票值博率較低，所以又唔需要話好急去買入，投資值博率算是中等，當然，如果你見到較有質素，回報理想的物業，其實又不是不可考慮。而長線，你都要將佢加入財富組合當中，成個組合平衡性才算理想。

------------------------------------------------

Q21328：

龔Sir 您好！近排買咗你的一本書，開始留意股市，我想入高增長的股票，但資金不多$5-$8萬左右

有一手快手，想望長綫，無時間長期留意股市波動，建議入咩組合？

龔成老師：

你唔好只集中在高增長股，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你部分資金買入高增長股是可以的。

快手（1024）可長線，但上市後一直都貴，注意風險。不要心急加注。

另外可考慮盈富（2800）、恆生科指ETF（3067）。潛力股投資要慢慢用資金，不要急。

------------------------------------------------

Q21329：

老師，早前聽你分析一篇是有關人士尚欠10年退休，應如何處理退休計劃。

你提及若基金有高回報，可考慮退保轉移收息股。

我以前同朋友買落一些基金單，過去回報真係麻麻，但最近終於超越我的供款額，我計劃停供兼考慮申請退保，取回本金轉買你建議的收息股，十年後成效會否顯著？

但還有一些基金單早已停供，但退保費用尚高（要足20年才沒有，現時退保費達41%）。但係未回本兼一早已停供，應否提早贖回此單買其他如2800，起碼不會被每月基金手續費蠶食本金？

本人一向好節儉，但不懂投資，到今日開始認真思考未來退休生活費。慶幸認識你才檢討自己投資方向，希望有所改善。

過去經驗令我現在對基金單有所保留，雖然回報可以好高，但亦可以蝕到入肉。所以自己入行後從沒建議人客買，除非人客有能力選擇基金 。

但若我只集中股票投資，又會否有危機？最近有朋友常説股票市場未崩是阿爺出手，叫我有賺就放。但聽完富途牛牛老師分享，更堅定長線投資。不過始終心不夠定，因自己已不年輕，希望老師俾一些啓發，謝謝。

龔成老師：

基金有好多種的，因此，好難一次過講基金是好還是壞，有些基金的回報可以跑贏市場，但同時有些都可以遠差過市場。

你最重要考慮翻該基金，佢本身的投資策略，投資那些市場或產品，以及過往5-10年的回報，比起一般投資市場回報是好是壞，如果回報較差，就要考慮轉。

不過，你話有些基金單已停供，但退保費用尚高（要足20年才沒有，現時退保費達41%），你就要睇翻仍有多少年要等，如果等的年期不多，就可以等。

其實在概念上，以及比較那個投資決定上，最重要是你要分析「之後的組合情況」，不是過去，是將來。應該持有那些項目，比例如何，能為你帶來怎樣的長期財富。

你最重要建立一個平衡配置，不要只集中在過往的虧損。首先，你每一份基金去分析翻，個別的質素怎樣，如果質素不佳同時又無特別賣出的限制，就轉其他工具。（你要問清楚，如果賣出相關基金，會有那些罰款，能夠取回多少本金）。

如果讓基金過往表現不差，有質最素，件就可以繼續持有。

之後可以將資金，部分投資股票，只要投資優質股，長線，其實不用擔心，同時你不用太著重短期因素。最簡單是選一些ETF，如盈富（2800）、高息基金（3110），這些ETF的管理費，比一般的基金較低，因此長遠對你的回報較高。

我相信ETF比較適合你，因為彈性比較高。

------------------------------------------------

Q21330：

阿sir你好！我最近係度調整緊月供計劃，total每月有9千蚊，有剩希望儲現金，麻煩你幫手睇睇咁樣嘅組合會唔會太分散？係唔係唔太好？幫手俾啲意見，唔該！

1. 3067 – HKD$2,000（手動月供）
2. 0700 – HKD$1,000

3. 0003, 0823, 0388, 2388, 1928, 1177, 2800, 1810, 2020, 3188 – 各HKD$500

4. IAU & SLV, BTC – 各HKD$500（通過美股同虛擬貨幣平台手動月供）

龔成老師：

你月供恆生科指（3067）及騰訊（0700）無問題，不過都要明白3067是潛力基金，佔組合比例不能過多。

至於0003, 0823, 0388, 2388, 1928, 1177, 2800, 1810, 2020, 3188 – 各HKD$500。你供得有點散，要好長時間先有一定的貨。

建議你集中翻少少，例如每隻供$1000，減少隻數。其實當中都是有質素的股票，都可以選擇，你睇翻自己較睇好那隻，以及自己的投資目標及風險程度。

至於IAU & SLV，即是間接投資黃金與白銀，長遠都可以，因為貴金屬都可以在我地的財富組合中，佔一個比例，但就不會太多，如果你每月合共$1000，佔你每月投資比例10%，開始有點多，調整翻去到5%較好。

至於BTC這類虛擬貨幣，我不是這方面的專家，所以我太大意見。

以本質來說，這是人為創造出來的，絕對不是「資產」，有沒有真正的價值，如何定義真正的價值，未知。

這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。

但這不代表佢無價值，佢可能好勁，只是我自己不知佢好勁定好差。

佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。

因此，這些虛擬貨幣，由於我無法作出專業分析，所以，我不會投資。

但如果你分析到佢長遠的交易大，大家都持續關注，就有價值，就值得你投資。如果你睇好，小注每月投資，不是不可的。

------------------------------------------------

Q21331：

多謝老師一路以黎既教導 你個page 充滿正能量 哈～（對我黎講）

龔成老師：

加油！

我出書，不斷做分享，在FB不斷發放正能量，正正是這個目的，你要做好自己，影響其他人。加油！

------------------------------------------------

Q21332：

阿sir 我份人比教保守但又想搭到快車 起望資產有所增值

所以我想有一半買3067
但另一半可以買邊隻潛力股

因為好多新經濟潛力股都銀碼太高 所買股份唔多，長遠增值唔大

我睇中必瘦站 佢而家係疫情下重可以擴展 同埋減肥 美容 係唔會冇人去做 加上佢銀碼唔大 大約6蚊
你意見如何？

龔成老師：

你要清楚翻投資概念，如果你風險承受能力較低，就唔應該投資潛力類的股票。

因為風險與回報一定成正比的，你要清楚翻這一點。

記住，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

如果你承受風險能力不太高，就可能要將恆生科指ETF（3067）改為投資其他，如盈富（2800）。

當我地建立組合後，就長期持有，不是買賣賺差價，而是成為你財富組合一部分。

另外你要記住，入場費的大小，以及股價數字大小，與平貴度，無關！

至於必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

你預$4是合理區頂，這股有長線投資價值。

如果你真的想買入，就等回少少先，小注，之後等落翻$4左右先正式買入。

------------------------------------------------

Q21333：

龔sir，用三十萬炒股，最近半年接觸衍生工具，已輸左HKD十萬,有咩方法可以可以追番血汗錢

龔成老師：

記住，財不入急門，你愈心急想追翻，就愈危險。這刻你應該停一停，冷靜翻，增加翻投資知識先，唔好太心急再投資。

其實我20年前，都玩衍生工具，玩左幾年，輸足幾年，之後長線投資，就開始不斷賺錢。

我之後做銀行同證券行，見大部分輸錢的客，都是偏向短炒，及投資衍生工具的。

這刻，你停一停先，之後長遠計，你要建立一個長期的「財富組合」，要優質，要平衡，要適合你的年齡與風險承受程度。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21334：

老師! 我買的保險有儲蓄成份的。我有3份，第1份$ 20萬2022年9月到期$20萬，到期可取$24萬幾，可將筆$供第三份保險。

第2份2026年頭到期，比現在供款大约多$23萬，到時可取~$74萬。第3份$100萬，若10年不取，大约有$ 149萬。整體有~4-5厘息。所以4年後，只有1份100萬的保險。

你建議我們持股要長線才能赚得多D，但退休後冇收入，靠收息過活，始終都需要賣股票，那何時才是適當時間賣? 若不賣，可能到時人在天堂，股票在銀行!

龔成老師：

如果現時保險類太多，你要睇下點樣調整佢，但持有多少，其實好個人化，因為這類有儲蓄成份的保險，可說是一些防守性產品，對一些好怕風險的人，持有較多都可以，但如果能承受基本風險，其實不應持有太多，可考慮將資金投資其他工具，會更好。

如果你這刻在配置上，股票等增值類資產不多，你應該等2022年該份保持到期後，將資金轉到股票，建立一個更為攻守兼備的組合。

至於另外的第2、3份，就可照原定計劃進行。

另外，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，當你退休時，就能以不同的資產，去獲得持續的現金流。

------------------------------------------------

Q21335：

請問老師2588現價位值得入市嗎？留意了它一段時間，之前因市場炒疫苗復蘇已炒到當年的高位81，但現價已漸漸回落，請問現價71值得入市嗎？

龔成老師：

中銀航空租賃（2588）本身質素不算差，但又未到好好，主要原因是負債太高。佢利用高槓杆的模式，進行飛機租賃等業務。

即是借錢，買飛機，再租出給飛機公司。

現時航空業不景，對佢有影響，加上佢利用槓杆，風險點都會有。不過，這只是中短期情況，長遠仍是不差的。

現價算是合理價，但投資注碼不能多。

------------------------------------------------

Q21336：

龔sir, 你好，我係新手投資，聽某股評人8.1高追入了1760英恒科技，我有睇過1760的業務，基本面好像不錯的。

所以一直抱著希望會回升，但股票卻一直向下，現已蝕了五成本金。

請求老師對此股給點意見及睇法，感激不盡。

龔成老師︰

我地買入一隻股票，一定要知道佢質素、行業前景、財務狀況等，才去投資。唔好單憑消息，就去做投資決定，咁係好危險。

英恒科技（1760）算係有危有機類的股票。這股質素不算高，但都未去到劣質，而你最大的問題，是在好貴的價位買入，因此，要上翻去並不是易事。

佢業務主要於中國提供汽車電子解決方案，客戶為汽車行業的原設備製造商、一線及其他供應商。例如新能源、車身控制、安全、動力傳動等。

過往財務數據只是一般，未算強，市場主要炒佢新能源汽車業務。

佢之前有集資去開發集團在新能源汽車及高級駕駛輔助系統（ＡＤＡＳ）方面的服務平台，特別是加強研發實力，包括智能駕駛軟件平台搭建、電動車電控系統軟件的研發、半導體功率器件定制化研發。

此股唔係話無質素，只是業務始終有不確定性。若你持貨不多，可以守。但若持貨較多，可以等有反彈時，沽出部份，去平衡個風險。

在將來再投資其他股票前，你先要問問自已。你到底知唔知間公司做乜生意、間公司點賺錢、行內有乜優勢、點解未來有發展和增長潛力。

若果答唔倒自己，就必需要停一停，唔好投資住。

------------------------------------------------

Q21337 ：

你好，龔sir

1. 我買左2018，平均價55蚊，佢近期業績不錯，請問可否返家鄉。

2. 另外347近期有營利，股價會否再繼續上漲？我平均價9蚊。謝謝你

龔成老師︰

1) 瑞聲科技（2018）不差的，本身有一定的規模與技術，長遠發展正面，不過，佢增長力不是好強，只能視為平穩增長類別。

佢業績算係可以，此股有質素，可長線持有。要回到你買入價，相信係可以。但由於增長力不及以往，所以要比多點耐心。

2) 鞍鋼股份（0347）本質屬中等，但有較受大環境影響。佢始終這只是商品企業，沒有一些太大的優勢。近年盈利上落較大，難以達到穩定生意與盈利的投資擬標。

所以整體的投資價值只是中等。這類股，長遠投資價值不算高，但又不是劣質，一般不建議佔組合比例太多。

若佢佔你組合比重較高，我建議你當有反彈，就沽出部份，來減低風險。

你要記住，我地投資時，唔好太過睇重短期因素，要長線咁分析。鞍鋼股份（0347）係2020年公布盈利係多左，但你睇多幾年，會發現佢盈利其實好波動。

另外，我見你對股票點定平貴的概念，唔係太強。建議你再投資其他股票時，可以考慮用月供方法，去平衡這個買貴貨的風險。

------------------------------------------------

Q21338：

Hi 成兄，我留意左你一段時間，前日我買左第一本你既書《80後2百萬富翁》，睇到一半，真心覺得你好有毅力去做每一件事。

而我亦都係上年係股票輸左成50萬，而家要每個月還$14000，人工每個月只係$34000。

小弟只係一個公務員，但唔甘心維持現狀，而家努力儲緊啟動資金、另一邊亦都睇緊啲理財、投資既書，唔想比自己再衰多次。

但係公務員有啲限制，而自己無咩技能，但黎緊會報啲有關電力既野，亦都會慢慢報下其他課程。

但係小弟已經30歲，果50萬要還到34歲，好似有啲唔夠時間用咁，想係呢4年努力返少少儲返多啲資金，再進軍股票世界。

因之前買輪及牛熊輸，到最後都係覺得買正股、潛力股先有增長，亦明白到貪字真係得個貧。

龔成老師︰

緊記，短炒唔係一個正確的投資方法。窩輪及牛熊證這些工具好複雜，唔好再用。

過去的事情，就由得它過去。最重要係你上了寶貴一課後，明白到何謂正確的投資理念，加上你已開始努力學習相關知識，算得上係向成功踏出一大步。

你現在才30歲，絕對有足夠時間讓你做好財富增值。

現時你負債雖然係可以還到34歲，但若果個貸款息率係較高，最好在投資前，先還清。因為高債息，長線會拖低你投資回報率，影響成個財富增值效果。

之後，你唔一定要等到儲到一筆較大的啟動資金，才開始投資計劃。你可以先用月供方法，去邊入貨，邊儲錢。我相信咁做，會較有效率。

以你30歲，可以選擇一些「平穩增值股」+「潛力股」作投資目標。

以現時大市合理區狀況，月供最好係先用一半每月儲蓄，另一半就先儲起架策略。

由於你投資知識不算好高，因此我建議你先集中係平穩增長類股。至於潛力股，只宜小小注(約佔組合3成)，等到你提高投資知識後，先慢慢增加翻潛力股比例。

至於，每月儲下現金，就是等大跌市時出手。如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21339：

龔sir，我之前$61入左1000股9633，和$16入左3500股6993，仲有得守嗎？

龔成老師︰

農夫山泉（9633）有質素的。

是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。佢係中國擁有10個區域取水許可證，並在其周邊建立生產基地。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。

業務上，的確有吸引力的，不過，我一向都新股半新股都無興趣，因為真實面要慢慢先見到。此股可投資，但只建議持有小注，同時你要明白當中的風險。

而藍月亮（6993）都係有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

雖然你買貴左，但由於佢地都係有質素，你可以守。若果佢地佔你組合比重較高，可以考慮沽出部份，去平衡個風險。

但緊記，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21340：

龔成老師你好，好多謝你好用心解答網友問題，雖然睇左咁多，我都有問題想向你請教，先謝謝你。

我33歲,收入約35k, 而家持有月供股2800、2318和0012。每隻$500。

1. 可能係太少，我唔知大約供幾多先好？

2. 現時唔多負擔，係每月要俾約8k家用。所以想請教你我點樣分配先好？

3. 係咪要買多d,同埋加多隻比亞迪呢？ 感謝

龔成老師︰

1) 我地做財富增值，目標係首先累積起一筆財富。到退休時，再換成收息資產，去支持後的退休生活。

以你現時33歲，應先努力做好增值個部份。因此，你每月有空閒資金，我建議都盡量投放在財富增值之用。

至於比例佔收入多少，無一個絕對的答案。你可以視乎你自己情況，作出調節。

但你33歲，係財富增長的黃金期，以你收入來說，其實可以將更多資金用作投資。

2) 以你33歲計，可以選擇一些「平穩增值股」+「潛力股」作投資目標。你現時月供的盈富（2800）、恆基（0012）、平安(2318)都可以。

但每隻月供股票銀碼上，要提高少少，最少要$1000。因為每隻的供款太低，會變相令月供成本佔比增加，影響你長線回報。

以現時大市合理區狀況，月供最好用一半每月儲蓄，另一半就先儲起架策略。

另外，你都要加翻D「潛力股」，去提升個組合增長力。但「潛力股」始終有一定波動性，若你投資知識不高，可先集中在平穩增長類股。

至於潛力股，就先小注(約佔比重3成)。到你提高左投資知識，先慢慢增加翻潛力股比例。

每月儲下現金，我地就是等大跌市時才出手，並長線持有。

3) 比亞迪(1211)都係一隻好有質素的潛力股，但現價偏貴。想月供的話，最好等佢回到$120先考慮。

若你真係對新能車股票好有興趣，可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，故此股有一定投資價值。

此股有潛力度，你預佢會比較波動，但有長線投資價值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20781-Q20800）

Q20781：

老師,你好,我試計了必瘦站(1830)的合理價,請老師幫忙看看是否正確

每股盈利:
2020年:0.32,
2019年:0.287,
2018年:0.179,
2017年:0.082,
2016年:0.116
(數字在各年年報中找出來的),

每股盈利平均值:(0.32+0.287+0.179+0.082+0.116)/5=0.2
假設有增長10%: 0.2*110%=0.22，2020年平均股價:3.28(由4/2020至4/2021期間每月的經調整收市價取得的平均值),估計市盈率為13至18,合理價:13*0.22至18*0.22,合理價為2.86至3.96

龔成老師︰

對，你的計算方向，基本正確，我地進行企業估值，會先考慮佢過往的經營情況，同時分析佢過往的財務數據，以這些數據作為基礎並參考。

你先計算出平均盈利為$0.2，這可以代表企業過往的經營情況，但要留意，之後當推算有代表性的盈利時，如果是一些潛力企業，就會較著數將來的數據，而不是過往。

市盈率以13-18倍作基礎，可以，這企業近年的發展及增長力不差，我自己都調高了市盈率的範圍，因此這數字可以運用。

你計出的合理價：2.86至3.96，有參考價值。

而我見佢最近公佈了最新的業績情況，企業的發展理想，同時管理層加大的外海業務發展力度，相信潛力度會增加，因此，這企業在估值上，例如有代表性的每股盈，就不能只依靠過往數字，而是更多將來的因素，令企業價值調高。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

------------------------------------------------

Q20782：

你好，想請教下你意見
有120萬資金

租緊朋友屋企地方住350尺2000蚊
應該買樓放租定自住好？

龔成老師：

如果你本身無物業，而長遠又有自住需要，買樓都是一個正確方向，只是幾時買的問題。

如果你有足夠資金，計過數，首期與供樓無問題，不會太勉強，加上樓價在適合時機，就可以進行。就算這刻不會自住，都可以先放租，之後再自住。

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

------------------------------------------------

Q20783：

老師，由於成日買賣錯誤導致高買，輸多過贏
我決定今個月開始月供#3067每個月定期買一手，三年返來睇成績，你覺得如何？感謝你

龔成老師：

這是一個正確的方向。

我以前做銀行同證券行，就係見到D客炒股輸多贏少，反而月供平穩增值回報仲好，所以我每咁鼓勵網友月供股票。

你保持月供就得，定期買一手原理如同月供。

不如，你唔能夠只集中在3067，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20784：

龔成老師你好，大概三至四年前我有一位同事介紹你畀我認識。

嗰陣時佢叫我同佢一齊入比亞迪。但股票不太熟悉，到現在才知道長期投資的重要。

我想請問如果我想月供股票大概一個月2000至3000蚊我應該投資邊一隻潛力股票呢。而且我已購買你的50隻潛力股書。

但我還是不太清楚哪一隻比較適合自己。請問老師可以指點下嗎。

令我小朋友3歲都有啲利士錢，我應該如何投資好。

龔成老師：

如果你對投資不太認識，未有信心，月供盈富（2800）$3000是最好的。

對不懂選股的投資者來說，盈富很好的工具。現價合理，可分注投資。

但如果有選股能力，就不用投資。

這是一個「平衡組合的工具」，當中有55隻成份股，對股票組合有平衡作用。

盈富當然不是高增長的項目，但就我過往做了10年銀行及證券行的經驗，比起散戶自行選股（輸錢），投資盈富有基本的增值，反而是更好。

所以，投資者可以部分資金投資盈富，再加入其他優質股作配置。
如果你日後有更多知識，到時再加入其他股去月供都得。

如果你能承受風險，想有較高增長，就加入恆生科指ETF（3067）$1000。

至於小朋友的利是錢，投資盈富都是最適合的。

------------------------------------------------

Q20785：

老師你好 我係澳門一個20歲嘅大學生，平時唔撞課程都會打下工 一個月都有7-8000 之前成日一出糧就亂買野食野 follow左你好耐都冇作為

仲終的起心肝要儲錢開始月供股票 想問我而加嘅月供股票仲有冇需要變動一下
而加都供左3個月

盈富2000
銀河1000
金沙1000

想睇下老師嘅建議
需唔需要有咩變動

龔成老師：

上述你月供的，都是有質素的，可以長期進行，但你將一半資金集中在同一行業，這會出現集中風險。

另外，你要睇翻手續費多與少，如果手續費太高，就未必值得做，或要調整。

記住，月供及投資，都要長期累積的。

你20歲，是財富增長年齡，可以加入少少潛力股，例如安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20786：

龔sir，剛開始上你的課堂，多謝你令我有投資嘅概念！

前幾個月市日日都升，我都忍住冇入市，因為好多股票都應該屬於合理區略貴水平，呢排好似回返少少想作投資部署，本金10萬左右，留意左（136）、（2013）、（1799）、（297），想問下呢幾隻值唔值得投資呢？如果值得投資我應該係邊個區價作部署？謝謝

龔成老師：

恒騰網絡（0136）高風險，現時值博率不足。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

中化化肥（0297）佢主要從事化肥的生產、分銷和零售，提供與化肥業務和產品的研發與服務，以及從事開採和勘探磷礦以及生產飼鈣。

業務不過不失，過往生意與盈利都有增長，不過之前有出現過虧損，這會扣左分。

企業發展力中等，算是不過不失的類別，現價合理，但這類股又唔值得投資太多。

------------------------------------------------

Q20787：

龔老師你好～我是澳門人，今日31歲，已婚有一位小朋友，夫婦收入約5萬，有自住物業，不用供款。

每月恆定支出約2萬，包括買奶粉、父母家用、停車場租金、妻子月供保險、工人薪金等等......每年還有小朋友的儲蓄保險約5萬（共供5年，還有3年要供）

小朋友與我的醫療保險約3萬一年。兩公婆每月各約洗7000元，儲蓄約每月1萬元。婚後兩年現金儲蓄約有15萬左右。

最近留意到龔老師的fb page，想向老師請教，我是個零投資（股票之類的）的人，我該從何入手令財富有額外而又穩建的增長，謝謝

龔成老師：

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，將每月的部分資金，去做月供股票，供盈富（2800）。如果澳門月供手續費貴，就自行分注，做到類似的效果就得。例如每月供$8000，或自行投資類似數目。暫時唔好用$15萬，等你過幾個月，有更多知識先。

對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

到你有知識後，就可增加投資其他股票：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20788：

你好， 我有2手 9911 赤子城科技 (7.11@2), 最近大跌, 我應該止蝕，還是繼續持有呢?
謝謝

龔成老師：

赤子城科技（9911）主要從事開發一系列移動應用程式、健身應用程式、遊戲應用程式等。佢長遠有發展的。

業務上，係有吸引力的，但就仍未算好穩定，盈利上落較大，但長遠增長力是有的，加上業務規模細，發展力強，不過風險都會有。質素中等。

這股不宜持有太多。

如果你2手佔組合%較多，可減1手。如果佔組合%不過多，暫時守住先。

------------------------------------------------

Q20789：

你好龔sir, 我在$308 入了#1024-快手, $202 入了$2382 是否可以長線投資

龔成老師：

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。

現價雖然無之前咁貴，但仍略貴，但短期股仍會十分波動。除非你持有過多貨，否則這股可長線但唔好心急加注了。

舜宇光學科技（2382）有一定的質素，但現價合理區頂至略貴。

過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。不過，手機市場又開始向好。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。

這股可長線的，除非你持貨量過多。

------------------------------------------------

Q20790：

成sir, 請問你覺得隨了投資股票，你覺得再投資債券好些，一話年金好些，用作预備將來退休？

成sir, 想問点睇1299，883呀？

龔成老師：

如果是退休目標，財富組合應該穩健，平衡，不能集中在一類資產。

收息股的組合，是其中一部分。

第二，投資債券，你可以選擇A評級的債券，年期較長都可以，但利息卻不高。可以。

第三，投資年金，都是適合的產品，零風險，可以有穩定回報。

不過，如果你距離退休仍有一段時間，就不用太急。

因為當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

友邦保險（1299）不差的，企業有一定的質素，有品牌、有規模，生意雖然做到較大，但仍有增長力，不過就不是高增長，只是平穩增長。

不過盈利就有少少波動，但這都正常，因為保險公司有投資相關收益，所以這亦會令股價略為波動。

前景方面，正面的，佢保持不同市場的發展，利用本身的品牌去加強新市場業務，而長遠的市場仍有增長潛力。

這股有長線投資價值，現價就處合理區頂，長線持有無問題。

中國海洋石油（0883）雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。

------------------------------------------------

Q20791：

老師想請問我有雅生活1750股@35 而家跌穿$30有一段時間都無升 可以溝貸嗎？點解依隻一直跌 見大行都唱好

龔成老師：

雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

整體是有長線投資價值的。現價合理，不過股價都會有時出現波動，你原有貨，可持有。至於是否這刻加注，要睇翻你持貨%，以及現金的比例。

如果本身已有一定的持貨，佔組合%多，就唔好加。

如果持貨少，現金足，就加少少。

------------------------------------------------

Q20792：

你好成老師
我是一個80頭的媽媽
有2名子女

預計還有1x年便退休（希望）
現每月去除家庭和個人使費有25k儲蓄
過去只有買外幣和買長線基金經驗

想問下我應該怎樣投資才能夠做到財務自由（1x後）
月供股票適合嘛？
希望你能百忙抽空解答

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你的年齡，可投資平穩增長股，但不能太過進取。

到你近退休的幾年，就可以開始轉做收息股。

你可以考慮做月供股票，每月$15000。如不想月供，就自行分注投資類似數目。

盈富（2800）$6000。

另外再加3隻（每隻$3000）：銀娛（0027）、恆基（0012）、港鐵（0066）、中銀香港（2388）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20793：

老師，173 嘉華國際是否一隻優質股可作平穩增長收息股？會否有機會私由化因大股東已有over 60% 股權。現價可入嗎？

龔成老師：

嘉華國際（0173）算是香港的中型地產商，都有投資的價值。

如果睇翻佢的財務數據，雖然收入有點波動，但地產企業常有這情況，特別是中型一類，有時會令股價較為波動。

整體來說，都有質素的，但又未去到好強。你預佢只能平穩增長，潛力唔算好大，長線持有係可以，但不宜持有太大比重。

相信佢唔會私有化，如果要做，2020年上半年，股價最低的時候已經做左。

現價合理，都可以投資的。

------------------------------------------------

Q20794：

龔sir, 請問一下，我現時26歲，平均月入3萬，大約有115萬現金的資產，我適合月供嗎？

定應該保留現金，便宜時掃貨較好？如果月供，最多佔每月收入幾多%較好？（無結婚，無拍拖，平時消費少，家用比$6000）

龔成老師：

月供股票適合大部分人的，除非你本身投資知識較高，能掌握買賣時機，懂得企業估值，否則，利用月供，長期儲貨，平均買入價，這是一個很好的累積財富方法。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以每月月供$15000-$20000，保持進行，同時，當你見到大市有明顯回落時，自行動用現金分注投資，都得。

你26歲，可以研究下以下組合的方向。

平穩增長股：潛力股
7：3
（如果你投資實力較強，可增加潛力股比例）

平穩增長股：考慮盈富（2800）。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20795：

老師你好，前三年接觸你頻道，上你的投資班和睇你的書，我開始投資，但最近遇上樽頸。

我現年31歲，月入五萬。一個月支出約兩萬二左右（包括個人開支、家用和男朋友的飲食，有記帳習慣。男朋友負責租金，我負責水、電煤、日常開支&我家人的家用。

男友是外國人，佢不打算在港買任何物業，我地考慮將來結婚，有小朋友後可能會移居外地，大約五六年後的事，現同居。

家人居住公屋，父母親年紀大，父親在前年被診斷有癌症，幸好藥費有基金幫手，負擔不大，暫無需做治療，只需食藥， 但生怕再嚴重些時，需要做治療，藥費約半年20萬左右。

父母親都無保險，我家中都有兩個兄妹幫手付擔部份日常開支&醫療。加上因為怕家人有事，需要應急，如媽媽牙周病治療&假牙，差不多要成6萬，媽媽又未到65歲。因以上情況，我持有的現金比較多，約80萬，

因為公屋富戶，租金上升，家人個人開支上升，我意識到一直儲蓄係無可能追上開支，所以2018年開始涉汲股票投資，每年都有買小小，大約33萬在股票市場，分佈如下所：

恒生 (183入), 滙豐（81.4入），建行（8.6） ，三隻各1手，此三隻股都係好高位2018-2019年間時入的。

2020 年買入： 港燈有7000 股（7.6入）、煤氣有5000股（平均13入）、地鐵1500股（ 43入）、

2020年尾和今年買入： 1972太古2400股（平圴22入）、必瘦站（5.3入）4000股。

我自己留意到係投資初期集中了銀行股。所以之後，分散投資，想集中在比較慢的增長的股票和收息股中。個人不太喜歡月供股票，因為驚碎股賣唔出，但買時，往往係股票上升/太貴時。

一開頭的投資目標都只係想多小小錢來應付日常開支和增加被動收入，但後來愈來愈想要擁有自己物業，想在香港買，但無奈香港樓價高企，如果自己一個人買只能付擔五百萬左右的物業，而這會用盡我所有積蓄。因為將來想生小朋友，又想買大一點的物業，並想在市區買樓，目標是八百萬左右，想在來緊三年多賺取兩百萬，上樓。離港時就租出去，賺取租金收入。

但自己經常目標不太肯定，因為社會事件，令我有時覺得在港買樓好似唔實在，又想在海外投資，但無奈自己本錢不夠加上未了解當地環境，以致不敢投資海外物業。經常徘徊買與不買香港物業之間。

加上，因可能五年後離開香港，會失去高收入，所以不斷大量儲蓄現金。這種心情影響我無法前進。

想問下老師，我現在投資應如何走下去？現金應儲蓄多少？我現想有三個計劃：

月供買入必瘦站、太古、港鐵，我是否需要加入其他潛力股嗎？我是參照你書本和平日facebook 的介紹，之後再睇資料而選擇哪一個股票。因為知道年輕時應進取一啲，所以亦想放左港燈公司/煤氣股，以增加投資其他股的金額。

第二個計劃是，公屋除名，購買500萬左右的物業，放租出去。

第三個計劃是，公屋不除名，在港不買任何物業，一直投資股票，直到離港，在海外購買物業。

謝謝老師你上次提點，我開始改變了我的人生策略，我亦影響埋我男朋友，佢現在也開始在自己國家進行物業投資。謝謝！

龔成老師：

由於你打算到外國生活，因此，除非現時已經無得住公屋，否則，你這刻利用股票去滾存財富，暫時不要買香港樓，這是較好及彈性的。

反而你可以了解一下你將來的情況，如果你打算移居外地，現時已經可以了解一下當地的情況，如果見到合適的時機，而你資金又足夠，其實可以考慮當地置業，反正你遲早都要在當地住。當然，這一步不急的。

現時，你就利用股票，好好為財富增值，你有幾年時間，可以有效利用股票滾存。

你現時的組合太保守，不合你的年齡情況。你宜調整翻。

至於現時月供的，都可差，可長線進行，但你可以參下以下的組合方向，慢慢調整翻。

平穩增長股：潛力股
7：3
（如果你投資實力較強，可增加潛力股比例）

平穩增長股：考慮盈富（2800）。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20796：

Hello, 你好呀。
我想問你扣稅年金值唔值得買呢？
還是將筆錢投資股票上會好啲？

龔成老師：

扣稅年金有好有壞，好處是稅務上的優惠，但就要強行投資一個較低回報的項目，你的資金會因此而被鎖死。

當然，如果你本身都想買的話，絕對是無問題的，但如果只是為買而買，就要清楚翻對自己是否長遠有利。

至於儲蓄保險，如果當中有投資成份，回報就有機會比退稅年金為高，當然，風險度都會高左。但整體上，一般都是穩健的。

如果你目的是較低風險，投資退稅年金會較適合你的。

------------------------------------------------

Q20797：

老師,1928金沙中國, 會唔會有影響?
澳門賭牌明年就快到期

加上佢又會賣拉斯維加斯賭場
萬一佢續唔例牌會唔會好大影響

龔成老師：

金沙（1928）有質素的，有長線投資價值，收息不差，同時有平穩增長力，但不是高增長類。

澳門賭牌，暫時未有最新的情況，但我相信金沙最得牌的機會好大。我自己不擔心。

至於佢賣拉斯維加斯賭場，佢表示想將資金，集中在亞洲，包括發展澳門，無論對佢續牌及發展，都是有利的。

------------------------------------------------

Q20798：

你好 龔成老師，我是上年的畢業生，很幸運地在不大好的環境下找到工作，月入2萬。

最近無意中關注到你的專頁，剛好我對投資理財很感興趣，我看了你給年輕人的投資建議，有些問題想請教一下你。

我在工作前已從網上事先學習分配自己收入。

現時收入6成為儲蓄、2成為家用、2成為支出。目前減去6個月的緊急備用金，大約有4萬多儲備。

目前的目標是希望透過學習股票令自己儲蓄的錢滾大，並繼續透過書本或課程提高自己的理財知識，希望有朝一日能夠做到財務自由。

想請教老師的是我應該立即（以適當的金額）投入股票市場實戰學習嗎？還是等到我存到一定的的本金（大概多少 ？）及一定的知識再投資會較好。

龔成老師：

你的理財做得不差，每月能儲6成是一個不錯的數，你要持續進行，理財是一個長期過程，我相信你好好把握現時年齡，可以滾存到相當的財富。

現時你已經有備用現金，你已經可以開始投入股票。$4萬，一以分注入，可以動用$2萬。

同時，每月的$12000儲蓄，都可以投資，你可以做月供股票$6000，或自行分注投資都得。

當然，這段時間你應該同步增加投資知識，如果未有知識，就只做月供，同時，只投資ETF，如盈富（2800）$4000，恆生科指ETF（3067）$2000。保持進行。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

現時大市波動，你可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20799：

個市大跌，老師你叫我地要認清企業本身的質素，唔好隨便拋售，呢點我明白

但如果其他人不斷恐慌性拋售，拉低股價，我地其實都好無奈…

龔成老師：

但對企業業務有甚麼影響？？？

短期股價，的確可以好波動，但長期股價，一定會回歸合理價值。因此，你只需要「唔好理」就得。

------------------------------------------------

Q20800：

成哥，請問968，信義光能

請問該股什麼問題會下大跌該股，搵到錢又好景，是否近期中國政治問有影響，唔該成哥

龔成老師：

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

主要原因是之前炒得太勁，你睇佢市盈率已好高，透支了將來盈利。之前過份睇好政策與發展，之後市場冷靜翻，發現原來無咁勁，股價就會回落。

現價合理區頂，如果想入，要回翻D先可以慢慢分注，但仍不是大注投資的時候。這股股價上落都大，要注意金額。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。