老師先係最唔穩定的職業，HR咪好鍾意挑剔人jumpy嘅，其實好多教書的都要年年轉工，甚至比私人機構更jumpy。

點解成日轉？可能係份工好大獲 (比如一年睇幾百次堂、學生好難頂、好多admin野做等等等等)，又或者係學校唔續你約，無錯，即係比人炒。

如果係出面d firm，你正正常常做野，又無話得罪阿姐老細，係唔會expect比人炒架嘛，但學校就唔同啦，即使你返八放八，自問對學生嘔心瀝血，panel head或者校長平日亦無話特別唔鍾意你，但假如你唔係perm位老師 (即係唔洗續約的長工)，每年到4、5月就會開始坐立不安，到6月都仲未有人同你傾續約就會好淆底，而且要打定輸數。

好多時，你要主動去問高層，究竟下年洗唔洗失業，而D高層又會EE哦哦，好鍾意拖到最後先知會你已經被炒，所以好多老師年年都懷住忐忑的心情，搵定工先，因為無啦啦比人炒已經係教育界的常態。

雖然咁唔穩定，又辛苦，但香港而家咁難撈，老師的人工的確算唔錯，所以每年都有好多人讀教育文憑，即使萬一、二蚊的TA/ AT都照做，想學校可以下年升佢做老師，死捱爛捱 (甚至死唉爛唉)但求一個教席。

不過，當你經歷過幾次續約的忐忑不安，再加上長期多野做到絕望，搞到身體差曬，你就會好自然咁諗，不如轉行？

但係，你發現教書的CV只係適用於教書，除咗教書，你的經驗完全唔值錢，連係教育機構做admin都未必有優勢，更何況好多老師，一grad就做呢行，轉field其實即係同fresh grad差唔多，本來而家香港除左ibank、law firm個d，人工已經好難好高，仲要你無其他工作經驗，如果轉行，即係一下子由二幾三十K，跳樓咁跳落去十幾K，所以明知教書好似永劫輪迴咁，都下唔到決心轉返出黎，如是者，隨著你的年資愈高，跳出黎的成本就愈大，只能好絕望地困住係到，繼續年年一邊做到好似油盡燈枯咁，一邊提心吊膽。

圍城名句「城外的人想衝進去，城裡的人想逃出來」，不單適用於婚姻，也適用於教師。