【#Patreon隨緣家書🇭🇰】一個地方淪亡，必然出現連串荒誕人和事，因為這種時代「走紅」的只會有三類人：酷吏、烈士和諧星。在2021年一炮而紅的諧星，居然包括了曾幾何時備受尊重的中文大學政治與公共行政學系的李薇教授，成名作包括「食祭品」和「大鬧港鐵」，充份反映什麼樣的時代，就有什麼樣的人才。

日前有關心政政系聲譽的朋友，注意到李薇教授在官方網站更新了個人CV，上面除了列出她的課程、著作，還有「校外服務」一欄。這欄通常會填上在各種學會、期刊編輯委員會的職務，有些學者也會填上政府公職。李薇教授卻非常有創意、也非常坦白，在2020年9月到2021年3月，列出了「篤灰」這項「社會服務」......

⏺全文見Patreon
https://www.patreon.com/posts/53161837
▶️真國民教育：為何香港必須回歸，卻不准討論海參崴回歸？
https://www.youtube.com/watch?v=aJhpxsVB4Ao

粵事來潮，必有 #迴響 。

上個禮拜係 #903國民教育 既嘉賓 #山城小豬伯 有份搞既粵文小說期刊，要接受大家預購啦。

上星期，佢地話如果賣到500，已經要好開心。因為呢本野，全粵文，佢地又冇人識，咁邊樹有廣告？冇廣告，即係要靠大家一人一本買，先至會支持到落去。

媒體營運既方法，黎黎去去都係果兩個架啦：廣告商課金，你課金。課金課金課金，唔課金，點營運？

如果呢本期刊，只印500，也太可惜啦。

香港730萬人，個個話要「珍惜香港這個家」，有冇人珍惜過＃廣東話 ？

為了要 迴響——粵語文學期刊 這一群人，要乖乖地把他們在節目中說的：「呢本書我諗住做十年……」既豪情壯語，我會建議大家，大大力咁懲罰一下佢地，等佢地可以知道，做一本書，都做到我咁得返1／3條人命（係，你而家係街見到我，我係得1／3功力架咋），佢地要做十年，仲要係一本粵文小說期刊。可以有咁既視野，魄力，決心，都是值得支持同鼓勵的。

＃粵事期待 ＃粵是美麗 ，

【行動 post】《迴響》正式接受預購

多謝大家嘅厚愛，我哋頭幾期會用 KickStarter 平台眾籌，希望大家多多支持。

http://kck.st/2MohkgP

對於各位海外支持者，我哋係有開放海外預購嘅。考慮到運輸成本，我哋決定用香港郵政嘅空郵服務。但係由於疫情關係，部分國家暫停咗呢項服務。所以部分海外支持者可能要等到疫情冇咁嚴重時先收到第一期嘅《迴響》。

眾籌方面，其實我哋都有幾個rewards：

1) 第一期嘅《迴響》

2) 鳴謝贊助 (會有一頁印贊助者嘅名紀念歷史時刻)

3) 廣告

4) 點唱服務

大家可以睇下唔同套餐！

【籌款目標】

如果籌到：

61200蚊——《迴響》第一期就可以出版同發行 (包括KickStarter手續費）
89000蚊——《迴響》嘅小說作者同其他文章作者就可以分別得到2000蚊同1000蚊嘅稿費(包括KickStarter手續費）
150,200蚊——除咗第一期之外，我哋仲基本成功籌埋第二期嘅出版同發行費用 (包括KickStarter手續費）
178,000蚊——第二期嘅稿費都有著落(包括KickStarter手續費）
239,200蚊——第三期都夠成本推出(包括KickStarter手續費）
267,000蚊——第三期嘅稿費都有著落(包括KickStarter手續費）
所籌嘅款項都會用於出版、稿費同埋《迴響》團隊嘅日常開支。

希望做到每個月出到一期。

第一階段籌到越多錢，《迴響》就可以出到越多期，並且喺呢個過程慢慢搵到自己嘅營利模式。

(P.S. 圖為我哋一篇詞評《以後傾城》嘅配圖，分析《傾城》嘅原稿歌詞，會喺第一期《迴響》刊登)

今日 ＃903國民教育 既嘉賓搞既粵文小說期刊。多謝 ＃山城小豬伯 以及佢既團隊，讓呢件事，首先係903國民教育向大家公告。

我寫文，有時都想用廣東話。但每次諗返起要賣書果陣，要我重新再寫一次，我就覺得都係唔好啦，我咁懶，唔會想再做，所以最後都係用白話寫。無計啦。你既書係誠品有個位擺，香港人會覺得你好叻。反而你既書三中高鋪到周圍都係，香港人而家仲會藐你添。

廣東話行到幾耐，冇人知。但我只係知道，一本咁癲既期刊，如果只係一次賣500本，咁香港730萬人，都用鈔票話左畀大家知：sorry，香港人，唔需要廣東話印刷物。

呢個係一個實驗。唔係課金，係實實在在咁要呢個團隊，好好咁對待廣東話。我相信，豬伯唔會，亦都唔敢玩忽任何愛佢地既人。所以，輕輕一推，佢出版既時候，我會細緻咁睇一次，再話畀大家知，值唔值得課落去。

＃佢同我講只係想賣500本呢件事太可怕
＃香港730萬人
＃連一本廣東話小說印刷物都留唔住
＃香港冇左文化身份
＃仲叫香港咩？

【我哋為廣東話再行前咗一大步，大家可唔可以同我哋一齊行】

長話短說。我哋準備出一本全廣東話嘅文學期刊。
　
如果你睇咗上面二十隻字已經決定支持，多謝你。底下有預購 link。
仲係猶疑不決嘅話，睇落去。
　
～～～
　
香港係留唔住人才嘅地方。歌手、演員、作家，成名之後就唔再屬於香港。有個好鍾意嘅作家，喺網上出文，好多都用廣東話寫。幾年前嘅一日，佢出咗名，喺 Facebook 瘋傳。
之後佢嘅故仔就要出兩個版本，廣東話喺前，書面語喺後。
再過一排，佢冇再出兩個版本，所有嘢都得返書面語版。
點解？同樣用繁體字嘅台灣，人口係香港嘅三倍，睇書風氣好唔知幾多。用廣東話寫到識飛又點？結果都係要賣返去普通話、國語市場。
　
上次食飯，總編問我：「如果我哋出本文學期刊，淨係用廣東話嘅，你覺得有冇得做」
我答佢話，「香港有七百萬人，一人一蚊都掟得死你啦。」
　
最賣得嗰份報紙，營業額可以過億，應該有好多空間試新嘢。我唔係講大話。
如果真係有空間，點解以前冇人試？
　
件事型到爆炸，但係大家有心魔。
驚蝕錢，驚冇人睇，驚寫廣東話有好多人「睇唔明」。
　
於是香港嘅文學就十居其九都係純「書面語」，淨返一成，就加插幾句廣東俗語，就話係香港特色。
純廣東話嘅書寫——粵文，一直都係一笪無主之地。俗語話「瘦田冇人耕，耕開有人爭」，廣東話出版明明係「肥田」嚟，居然都會寸草不生。
實情只係未有人去播種。
　
若然我哋集合網上廣東話作家，一齊嘗試唔同文體，寫一堆上乘嘅小說散文出嚟，你話有冇可能改變成個 landscape 呢？有冇一日，喺香港教科書會見到呢堆高質嘅粵語文學作品呢？
香港開埠都只得幾丁友，一樣可以發展到今日嘅規模。
　
不如廣東話就等我哋嚟。
我哋做開荒牛，由我哋雙手去創造廣東話文學嘅輝煌盛世。
　
如果個市場覺得廣東話低等、冇價值，我哋會認命，然後賣樓貼錢做到廣東話贏為止。
之不過香港人個個都話熱愛廣東話，斷估唔會搞到我哋輸身家啩。
　
總之我哋準備開創歷史嘞。
可唔可以同我哋一齊行？
　
【網上預售】
http://kck.st/2MohkgP