［股市經濟101］點解股市脫離「實體經濟」？　—　What if 你個 「實體經濟」係錯呢？

1. 信我，呢篇係文自慢（？），埃汾相當滿意嘅文。你有幾可見我咁講？你想了解個世界點運作嘅，睇呢篇就夠，睇少啲垃圾文。

2. 根本，個市場（唔係我）早就預期到，你班友啲預期，係錯晒，係預期地遠勝預期的。

3. TLDR：道指升一千點，5月美國就業數據靚到不得了，經濟師估錯晒。之前個市係咁升，N咁多人 （特別係冇買嘅）話升勢脫離現實　—　而冇諗過，你個「現實」根本就係錯嘅。市場好偶然會死錯人，但一般都準過啲學者分析員，更加準過你啲大學都未畢業嘅網友。

4. 記住，We question conventional wisdom（＊）。埃汾好似自命contrarian，有讀者咁講，01嘅讀者同編輯都咁講，甚至早幾年我嘅中學老師都咁講。但係咪真係？可能只係寫文係。一個讀官校嘅公開試學霸，教完書打金融工碌到而家，唔富有又唔窮（中產嘛），34歲結婚，35歲買樓，放假去下日本韓國台灣。可以有幾contrarian呢又？

5. 無論如何，寫文方面，我的確相信我係幾contrarian—又或者，01年代（非金融文）嘅文，可能我會寫啲唔少人心中都諗，但唔敢講出嚟嘅嘢。所以在Belief上唔係contrarian（好多人咁諗），但在你睇到嘅意見上係（冇乜人敢講）。

6. 哲學嘢寫完。好簡單，哈哈哈，道指升成千點！哈哈哈。我好記得3月尾我老母點畀人問侯。嘩死緊人喎好大鑊（係好大鑊的）。嘩經濟停頓喎好大鑊（係好大鑊的）。嘩未有疫苗好大鑊（係好大鑊的）。

7. 唔止一次寫過，有關「股市脫離實體經濟」呢句嘢。多數係被人用嚟質疑升市（偶然亦都會質疑跌市）。例句：「美國失業率會升到好高，但股票照升，都痴線，同實體經濟脫節」。

8. 但除咗我都解過好多次嘅，「資產格價睇將來睇預期」，同埋「問題係現價反映咗幾多」外。今次我仲想畀兩個新角度：

9. 第一角度就係，你有冇諗過，根本「股市脫離實體經濟」呢句嘢。係好含混呢？你點去驗證？邊度嘅股市？邊度嘅經濟？OK，美股對美國經濟（但，美股好多賺全世界錢）。咁用邊日至邊日嘅升幅？美國經濟，用邊季嘅GDP？

10. 同埋，點先叫脫離？GDP升1% 股市升10%，係咪叫脫離？好似唔係，你話合理。咁當咩金融海嘯，香港經濟收縮10%（是但，其實好似冇），但恒指跌三份二，咁又係咪脫離？點解經濟差股市升你話脫離唔合理，咁經濟擴張但股市跌（無數例子，例如2018）又話離脫唔合理？如果GDP升1% 股市升10%都合理，咁點解GDP跌1%股市升5%又唔合理？如果股市係反映實體經濟，咁點會無啦啦國安法一日跌6%，然後下星期又升6%？即係出國安法嗰日原來人人覺得經濟會收縮6%（呢部份我可以接受），但幾日後又發現唔係？（＊＊）

11. 第二角度就係，就當，股市應該反映「實體經濟」。但What the fuck is 實體經濟？你問一千個人，我估都冇一個真係知道啲乜乜GDP即係乜（包括我）。既然多數人都唔知，咁其實大家可能係睇切身啲嘅嘢。你問樓下賣菜嘅，賣LV嘅，賣身嘅，就知。有冇工開啦，啲客講唔講價啦，畀唔貼士啦，行家減唔減價啦，呢啲會唔會更加係「實體經濟」？

12. 講咗咁耐，戲肉。美股升1000點嘛。本身唔特別，之前都升架啦，之前咪話「股市脫離實體經濟」。潛台詞即係，實體經濟好差，你股市都係咁升喎，傻的嗎？

13. 但，What if 你啲咩「實體經濟好差」，根本係錯架呢？只係班蛋頭學者投行經濟師涼冷氣鳩up出嚟架呢（我都做過類似工作）

14. 今日（星期五晚）道指升1000點，就有得解釋啦，因為實體經濟根本唔差！係你班蛋散（包括我）一路以為好差之嘛。講真，點解你覺得差？你咪又係睇文（可能我啲文）。但啲文嘅作者，點知下個月GDP市場睇幾多，下個月失業率市場估幾多？佢地咪又係抄投行報告，或者睇Bloomberg 睇Reuters – 咁呢啲 poll又點嚟？成日都乜柒「市場預期騰訊賺1000億」，個「預期」點嚟？個「市場」又點識「預期」？咪又係幾丁（頂多四五十丁）分析員估出嚟！就係咁化學！因為我曾經有份參與其中，所以俾斯麥話齋，整香腸嘅好難尊重香腸！（＊＊＊）（＊＊＊＊）

15. 好啦，市場預期，估美國5月，流失職位750萬個嘛。結果呢？係新增咗250萬過！爭好遠呀大佬，係李嘉欣同李嘉欣嘅分別！周迅同他信嘅分別！同樣地，經濟師預期，失業率升到19-25%—結果？係跌到13.3%（＊＊＊＊＊）

16. 抽水前，記住，班華爾街經濟師，一定叻過你同我（唔使拗），人工高過你同我，亦勤力過你同我，好可能接觸到嘅資料多過你同我。甚至乎佢地可以搵助手（而家可能搵無人機）去數下麥當勞有幾多人，排隊拎救濟有幾多人都仲得。但一樣錯到七彩。因為預測呢件事本來就好難，但人人都上癮，包括我

17. 最可愛係乜？最可愛係，個「市場」，先唔撚理你啲經濟師。一早照升無誤，真金白銀落注嘅，早就知你班人戇居。之前咁升法，你質疑，明明經濟師話失業率狂升，做乜個市係咁升？結果咪話你知，根本啲經濟師就估錯。根本經濟就唔係咁差，至少已經回復好多

18. 當然，如果更加過癮嘅，如果今日道指唔係升1000，係跌1000，就更加好玩。更加示範咩係Buy on rumor sell on fact（＊＊＊＊＊＊）．更加示範點脫節

19. 呢篇文收視，我預期（又預期！）會好，但未必會極好。我早排狂鬧迪士尼，實多人睇的，viral添。但在思想水平嚟講，呢篇文係我極滿意嘅一篇。我建議你收起佢，當然更好係share

——————————————————————————
（＊）有機會解下呢句

（＊＊）人越老越嚟越相信，投資又好，做人又好，多睇其他書。非金融嘅書，例如哲學書。以上呢堆自問自答，係學……顧西蒙。

（＊＊＊）其實俾斯麥係講法律，但的確係以腸為喻

（＊＊＊＊）呢段畀你見到，真係凡事質疑。問下，嗰樣嘢點嚟。乜乜日報話市場預期，咁乜乜日報點會知個市場預期乜，就當個市場識報夢，市場自己點解識預期嘢。原來係人。咁係乜人？一路諗落去，你就知晒成件事，係俾斯麥的香腸。

（＊＊＊＊＊）你睇咗我咁耐文，都仲打算講「13.3%都仲係好高！」嘅，我建議你都係唔好投資，畀晒啲錢我幫你。或者平少少，訂我收費專欄，睇到你唔再講呢句嘢為止。有用的！真係有用！有病人（！）可作證。

（＊＊＊＊＊＊）補多句，你見一般呢，公司業績好過預期，股價咪升，反之咪跌。當然有例外，但大約有個咁規律。不過，好得意地，經濟數據好多時唔係咁的。原因？唔知，但應該好大程度因為，股市係脫離實體經濟嘛。

———————
版務：收費專欄已減價。支持埃汾高質文章。
一星期三篇，$175睇到6月22號，加埋過去兩個幾月所有文章。
請去呢度訂：bit.ly/2wVXndj
課程編號填: CC01
報完會有email通知，繳費後有Login及Password
逢一三五入去 homebloggerhk.com （入到去就睇到《事先張揚》）
亦睇得返以前嘅文。一般我都係會黃昏出文嘅。

【龔成問答信箱】（Q12621-Q12640）

Q12621：

龔成老師你好！
我想接觸下美股，應該點樣入手？會介紹我由邊方面入手，唔該哂！

龔成老師：

因為我自己都無投資美股，所以無法比太多意見，亦唔想亂講。

最簡單的方法，就是投資美股ETF，你可以在港交所買到，例如領航標普五百（3140），就是追蹤美股指數的基金，你簡單投資這基金，已是投資美股，同時由於這是一個組合，你的財富能產生平衡效果。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12622：

老師，我47歲，有個難題。 我幾年前之前放左675k 的MPF放利息基金。我見股市開始跌，在2/8將全數買入恆指基金，但今天已跌了20k.

現在市場不穩，我應止蝕轉回保本債券基金 或利息基金 或 keep住現在隻恆指基金？

我很害怕，675k是我20年的供款，
老師，請問我現應點做？ 希望你盡快覆我，謝謝你

龔成老師：

轉來轉去、太過貼近市況，是你最大的問題，投資者經常追市，反而會令回報減少。

強積金跟本唔應該轉來轉去，你只要按你的年齡，簡單作組合上的配置已得，因為強積合是長年期投資，你根本唔需要因為擔心短期下跌而要轉。

你47歲，其實可以投資5成在股票類，5成在穩健類別，長線持有。同埋唔需要成日睇住報價，唔需要太過有心理壓力。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12623：

你好龔老師，請教你 今個月月供股價係唔係合理區？
準備加供

2388 $10000
2800 $ 10000
66 $10000
3 $10000

有考慮過 供埋 939 $現價$5.7左右，呢個價好像都幾吸引

龔成老師：

你上述所選的股，都是有質素的股票，可以保持長期月供。

現時大市在合理區，你可以保持供。其實，月供股票是一個長期的策略，因此，唔需要太理會中短期的股價情況，保持長供就得。

另外，你現時的的組合，如果盈富（2800）加金額到$2萬，而其餘3隻的金額，各減$3000，組合會更加平衡。

至於建行（0939），本身都有投資的價值，但這股只是收息股，增長力不強，你要睇下這是否合你的投資目標，同埋，如果你加這股，中銀香港（2388）你要減翻少少，因為唔想你銀行股的比例太多。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12624：

老師，我除左月供股票，我仲想擴左大資本，然後才慢慢購入優質股，所以我用4萬資金購入了1573 40000 @0.55 同埋 1133 [email protected]。

老師你對1573被沽空機構後，股價大瀉咁多%，你覺得係市場恐慌還是真的是企業出現問題？

我見近沽空機構經常追擊中資，但最後都係無中生有，純粹係沽空獲利，例如之前的波司登及安踏體育。所以我買入，打算持貨一年，目標價上番$3。

1133私有化失敗，諗著跌穿$2.5已經反映番消息﹐但其實佢都有價值﹐應該可以上番$3-3.5，打算持貨一年。

以上兩隻股票，老師你有咩睇法，謝

龔成老師：

沽空機構的報告，不一定真實的，雖然有些中國企業的確有問題，沽空機構爆出事實，但同時間，有些中國企業無問題，但卻被沽空機構追擊，因為沽空機構可以利用這方法，令股價出現短期下跌，從從獲利。

南方能源（1573）是規模較小的公司，這類公司賬目有問題的機會的確較大，所以，當中不是無風險的，股價大跌後並無升翻，反映市場明白這股的風險，同時這股的確有點問題，令市場認為現時的股價較合理。

這類股你要小心，如果等多一段時間都無升翻，代表內裡可能有點問題，如果佔組合比例太多，要賣出部分先。

哈爾濱電氣（1133）都算不過不失的，現價不貴，你可以持有，但增長力不強，盈利波動，因此不宜太過大注。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12625：

龔成老師你好呀 之前有睇過你啲書 入邊都有睇到你曾經幫過屋企人去理財 因為呢而家呢個情況就係 我屋企人都有買股票

但係佢哋大致上都係好耐之前買落同唔係好熟悉咁樣去買 佢哋大約原本由50幾萬依家有得佢放喺度淨返20幾萬 佢哋依家處於一個唔去理嘅狀態

等佢有一日升返上去 所以我想幫佢地慢慢沽出 再入返一d優質既股票

現在持有（中國中鐵00390）（中煤能源 01898） （中遠海控01919）（中國鋁業02600）（遠洋集團03377）我應該要點樣逐步沽出？

龔成老師：

從理性的角度：我地繼續持有一隻股票與否，最重要是企業的質素，前景，買入價只是心理因素。

上述的股票，並不是全無質素，但質素不算高，前景亦不算強。

中遠海控（1919）、中國鋁業（2600）可以考慮在有較大的反彈時，首先減持。

長遠計，都要賣出這些股票，轉換成一些更優質的股。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12626：

龔老師：你好！我持有匯豐及領展，但最近股市嘅波幅跌左好多。我想向你請教：我可以繼續入貨去溝貨？還是應該放咗去呢？

另外一直好想買中華煤氣。現在是不是入市價最好良機呢？謝謝。

龔成老師：

匯豐（0005）及領展（0823）都是有質素的股票，你可以持有，長線投資無問題。

但如否加注，要睇你本身財富組合的比例，如果你持貨佔財富本身已唔少，就唔好加注。同時，我地會分析現時大市的平貴，現時處合理區，我地應該有貨及可以留部分現金，以比例去決定是否加注。

至於煤氣（0003）現價合理，但未到平宜，你分注投資可以。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12627：

老師你好,
我4月份開始月供 2 ，3，66，2388，823

0002 $2000
0003 $1500
0066 $ 1500
0823 $1500
2388 $1500
每月現金可存10000 - 12000

另外現有
一手煤氣@17.28
一手東亞@25
二手電能@71

1股GOOGL@1163
現金16萬、定期有4.6萬、美元2500、日元100000

1.現在股市跌,要減少月供金額,留多D錢 等股市再跌再一手一手買?

2.我現在月供股票需要再加多一隻2800/1928/1211/6823/778會好D?

3.月供5年既話可以到100萬同每月有2千股息嗎?

龔成老師：

1）無人會知之後股市的升跌，因此不要「估市」，我地應該以「平貴」作投資策略。你唔應該減月供，反而可以加少少，你可以以每隻加$500先。

但現金方面，就唔好心急動用。

2）你可以加入一隻盈富（2800）$3000，比亞迪（1211）可以供$1000。

3）我相信有的，但好睇這幾年的市況，如果這幾年的市況不好，令你可以入到好多平貨，而到4、5年後大市又好翻，你就會有最高的回報。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12628：

你好、龔成先生、本人有一直留意你的專頁、最近本人購入00175 吉利汽車 共8000股、入場價為12.66

但見最近幾月、見此股內部員工不斷使用顧員行使權購入、想問這行為對日後股價會造成影響嗎？

另外因為此股最近下跌至11蚊左右、我想問應該怎樣部署

龔成老師：

這會令總股數增加，從而令每一股佔企業的比例減少，雖然這是間接影響股東價值的行為，但唔少公司為鼓勵員工都會這樣做，只要不太多，就勉強接受。

其實吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

但中國車市放緩、外來競爭、行業競爭加劇，都成為不利的因素，相信中短期仍會對佢不利。

股價由高位回落不少，除了反映過往處貴水平，現在回落至合理水平外，同時反映市場預期中國車市的不利情況。相信這股中短期股價仍會不利，但長遠前景仍在的，有貨可守。

現時價位在合理區，但股價波動，如投資要分注，同時要長線投資，車市要慢慢才好轉。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12629：

你好老師，請問及00011是否值得長期持有及月供？
與00005比較，邊隻值得購入？ 感謝

龔成老師：

恆生（0011）的質素會比匯豐（0005）好，可以長期進行月供。不過，都要睇你的投資目標。

首先，兩隻都有質素的，但匯豐近年的賺錢能力減弱，因此股價增長力不強，但股息率較高，股息穩定，因此，作為收收息股不錯。

恆生，優質度略高，企業有增長力，因此股價能長期向上，但股息率就不及匯豐，所以，要睇你的投資目標。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12630：

成哥，我幫老豆入8隻收息股依家個市咁希望你可以比D意見我應該點做？應該繼續持有定沽貨？

股數 買入價
陽光（435) 8000 5.88
置富（778) 4000 10.28
深高（548) 8000 9.37
領展（823) 1000 91.8
互太（1382) 4000 6.3
工商（1398) 10000 5.38
港燈（2638) 6000 7.95
香電（6823) 4000 12.46

仲有我想幫佢入多隻
(深國 152) 仲應唔應該入手好？


龔成老師：

上述的股票，基本上都是有質素的，問題不大，可以長期持有。我相信你爸是收息的年齡，上述都是一個不錯的收息組合，因此適合佢的。

唔需要比短期的股價上落，影響長期的策略，集中收息就得。

深圳國際（0152）都是不錯的收息股可以加，買入時最好分注長線投資，集中收息就得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12631：

老師你好，想請教下你，我依家做緊月供股票，一個月供$8000 分別是盈富，港鐵，中銀香港同金沙，每隻分別供$2000 。

我想加大每月供$10000 ，咁你覺得多左個$2000 我應該加大盈富同港鐵改為供$3000 一個月，定楝選多一隻供$2000 好呢？

其實如果資金只有$10000 一個月來做月供，供幾多隻股票你認為較合適呢？又可做到分散風險呢？

另想問多一個問題，你點睇銀行同保險公司做個類儲蓄保計劃呢？

即例如話供五年就唔使再供，不過一般要可能等四，五年之後你先可平反個供款，因為這類都是long term 儲蓄。

之後一路由佢放係到等退休時才拎，。一般說每年大約有4 利息率。低風險投資！你覺得值得供這類儲蓄計劃嗎？謝謝解答。

龔成老師：

如果你有資金加大月供，可以加大盈富（2800）及港鐵（0066）到各$3000。一般來說，你供$10000，4、5隻是適合的，只要當中有盈富，已經能達到分散風險的作用。

銀行或保險公司的儲蓄計劃，都有投資價值，都可以是我地理財的一部分，不過，回報就比例一般，所以我地一般唔會投資太多。

你可以小注投資。不過，如果你自己投資股票有更好的回報，你本身有更好的知識，那就未必需要這些項目。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12632：

老師，我有問題想問，年齡30，儲蓄大概44萬，現股票分配如下：

全部均有一手，除了778
[email protected]
[email protected]
[email protected]
[email protected]
941@70
778@10 （2手）
5@66
2@88

好似大部分都比較高位入，有什麼改善空間？目標是想先儲夠一百萬

另外，本身對香港政治環境有憂慮，即使現時危機解決了，也怕204x年開始愈趨不穩定，屆時經濟環境未知如何，可能比97前更動盪，應該怎去理解或安排資產配置？

網上亦有報道指巴菲特近年沽出股票、手持現金比以往高，應該要盡早減持股票？

補充：若希望增值財富，應定期買入2800？還是其他？
謝謝你

龔成老師：

你上述持有的，都是有質素的股票，以股票與現金的比例來說，你股票的比例不算多，現時大市處合理區，其實可以加多少少優質股，令長期財富有較好的增長。

不過，你有少少集中在銀行股，你要平衡翻，之後唔好太過增加銀行股。

如果你想滾存到$100萬，除了要分注投資優質股外，亦要把握機會，在平宜區買入優質股。

如果你擔心長期「香港」的風險，其實可以在配置上，更加全球後，例如將部分資金投資外國樓，又或投資外國的基金，最簡單就是在港交所買國際ETF，例如領航標普五百（3140），就是追蹤美股的，這已可以助你分配。

相信巴菲特只是做一些配置，未見有很大型的變動，因此不用擔心。

你月供盈富（2800），是很好的策略。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12633：

老師你好 想請教一下為何 1177 對比 3692 及其他藥股的pe低那麼多 1177有機會重估嗎 謝謝

龔成老師：

因為中生製藥（1177）上年度有特殊的盈利入賬，因此拉高了盈利，即是拉低了市盈率，所以，佢這刻的市盈率不能作準。

如果調整翻相關的盈利，同經營得到的盈利作基礎計算，佢現時的市盈率大約25倍-30倍，因此仍未到平宜區。不過，如果月供這股就無問題。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12634：

請問1997點睇
48元入了一手，如果再下跌應該入定止蝕

龔成老師：

九龍倉置業（1997）有一定的質素，當中持有的資產，都十分優質，長期持有無問題。當年九龍倉集團（0004）將不少優質的資產，轉左去1997度。

你的買入價合理，不用擔心，你持有就得，這股無問題的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12635：

阿Sir，股東應佔溢利，同盈利，同每股盈利EPS，三者都好相近，但數字上有有d分別，其實有咩分別同意義呢？

龔成老師：

嚴格來說，企業的「盈利」並不等話「股東應佔溢利」，因為當中有小數股東權益，但一般財經網站，為方便大家睇，佢顯示的盈利，並不是整間企業的盈利，而是「股東應佔溢利」。

如果你怕亂，就當兩者是一樣。

至於每股盈利，就是將股東應佔溢利，除以發行的股數。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12636：

龔老師你好，請問如果1211將電池業務分拆出去，那原本的收入會少了電池的這部分，那時候會影響公司盈利和股價

原有的股東又如何補償
1211分拆業務後是否會補償股東

龔成老師：

分柝上市，即是將部分股權公開在市場發售，獨立去上市，這不代表原企業不會持股，但具體要到時先知。佢有可能到時會有得比原股東優知認購，又或送股，未知。

同時，又於佢分柝後，即是集得更多資金，如果企業利用資金作進一步發展，有可能有利。

當然，這刻仍有好多未知數。只可以話，比亞迪（1211）這動作，反映佢更集中發展汽車業務，同時資金方向需要更多，現時資金有點不足的情況。風險度提升左，但如果成功，則回報更高，可說是有危有機。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12637：

老師你覺得呢個月供組合如何
會吾會太多潛力股或者風險偏重？
月入19k，23歲

2000盈富
2000地鐵
1000吉利汽車
1000中國鐵塔

龔成老師：

上述的股票，都是有質素的，可月供，長期進行。

吉利（0175）、中國鐵塔（0788）都是有潛力的股票，股價上落較大，因為你只是供$1000，所以無問題，分配比例上亦適合。

整個組合無問題，保持進行就得。如果日後有較多資金加注，就加盈富（2800）先。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12638：

龔老師：你點睇0855中國水務呢隻股，最近52週低，值得入股嗎？

龔成老師：

中國水務（0855）本質正面的，業務發展不差，生意保持理想增長，不過，負債是佢最大的問題，這令佢的風險度增加。

當經濟轉弱時，佢這類負債較高的企業，要對的不確定性會更高，所以佢股價不斷下跌，只是市場正常反映佢的風險度。

這股可以長線，但注碼不建議太大，同時你要明白佢股價仍會波動。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12639：

1:想請問粵海大約去到咩價位先係略貴?thank

2:請教一個大問題，1928，1972，270，16，388，27，823，12，345，以上股票都係睇中左但未有錢買，每月只儲到1萬，如果咁樣既情況，應該睇最低既入場費先買左隻股，定係應該睇值博率買入，同埋如果跟值博率又長期持有10年以上既話，應該點順序買好?

呢個問題諗左好耐都未諗到，所以想請教下呢個複習既問題

3:如持有4手煤氣情況之下，仲有冇需要買恒基，手上未持有地產股，thank

龔成老師：

1）粵海（0270）由於好優質，市場對佢的估值，一般都會比其他公用股貴少少，現價在合理區中上部，你預要跌多2成先會平。

2）你可以考慮月供。

如果你以一手手模式，我地會先考慮優質度，然後再考慮現價平貴。

港交所（0388）、金沙（1928）、粵海（0270）、太古地產（1972），你可以首先跟這次序。

3）只要你煤氣（0003）及恆基（0012）想加，無佔你組合的比例太過多，就無問題，加上恆基都得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12640：

阿sir, 有關中期業績，我嘅問題係有啲企業嘅收入，上下半年係有分別的，如果係咁嘅話，中期業績又可以點樣去分析企業呢？

龔成老師：

你要分析過往多年，企業有無週期性的生意情況，例如有些企業，在夏季或冬季的生意特別好，你就可以在過往多年來的數據見到，這會令佢地上半年與下半年的生意有較大不同，你要自行調整。

如果業務上無這個分別的話，你可以用簡單的方法，就是假設下半年能反映較新的業務情況，將這部分乘一倍，就可以推論到全年的業績。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。