【奇趣】日本日清推出「合味道口味」碳酸飲料 為慶祝「合味道」杯麵問世50周年，一向創意滿分嘅日本日清，早前就用特攝戰隊風格拍咗條廣告片宣傳4款新口味杯麵，貫徹搞笑騎呢風格。不過佢哋似乎嫌單嘢未夠爆，今日就加碼推出4款「杯麵口味」碳酸飲料以及8款美味棒零食，邀請有覺悟成為勇者嘅朋友嘗試一下。 今次日本日清挑選出原味 、海鮮、咖喱、香辣蕃茄4款經典口味，分別製作成碳酸飲料（容量280ml），等各位享用清涼飲料時，亦可以品嚐到合味道風味。可能大家會心諗「咁咪好鹹囉？」，但據官方介紹，呢幾款飲品係以蘇打水為基底，再加入香料調味，斷估就唔會鹹嘅（好似係）？ 四款口味如下： Cup Noodle Soda（原味）：薑味蘇打水、帶醬油及胡椒風味 Cup Noodle Seafood Soda（海鮮味）： 忌廉味蘇打水、帶海鮮風味 Cup Noodle Curry Soda（咖喱味）：可樂味蘇打水式、帶咖哩香料風味 Cup Noodle Chili Tomato Soda（香辣蕃茄味）：番茄味蘇打水、帶有清爽刺激口感 另外，今次日清同日本國民零食「美味棒（うまい棒）」推出8款聯乘口味，至於好唔好食就要有機會試過先知。 「合味道50周年紀念包」9月17日起於日本Amazon及官網限量發售，售價為2,998日元（約$212港幣），內含8款合味道杯麵、4款「合味道口味」碳酸飲料以及8款美味棒。 #日本日清 #合味道 #奇趣