去年寫的。 記得928的下午，我和同事上了道風山做嘢。落山後途經一間士多，士多的電視正播著金鐘那邊施放催淚彈的景況…… -------------------------------------- 清（唔到）場後的不正常情緒結集 這絕對是最最最最難寫的一篇，難在千頭萬緒。但再難，也難不過在旺角銅鑼灣金鐘瞓天光吧。 我依然能夠正常和完美地返工 本來諗住佔領會令我正常地返唔到工（我返工需要過海，路程OK遠的），可以留守家中靜靜思考——點知，每一個工作天都能夠完美地返工放工，實在成何體統。 這段期間已經有太多人寫過太多好文，分析的抽水的嚴肅的幽默的包羅萬有，而我這一篇，只是一個生存在這荒謬時代的月巴仔的一點情緒整理：冇乜分析，冇乜抽水；不太嚴肅，也不太搞笑。 1. 9月28日晚上，初次施放催淚彈後，我在沙田市中心一間酒樓。現場所見，身邊都坐滿了食得好愉快的人，我突然有種置身平行世界的幻覺——我不是說當有班人在對面海飽嘗「催淚放題」時，另一班不在場的人也要食不下嚥或喊住咁食，而是：我置身的這間酒樓是一個正常世界？圍繞住我的才是（過著）正常（生活的）人？於是未等到甜品，便先行告退，會合友人過海（但我冇同屋企人講自己過海）。 2. 過海前，先買保護裝備：眼罩、保鮮紙、口罩、毛巾（至於遮，則長期跟身）。結果只買到口罩毛巾。 在藥房買口罩時店員問我：「買嚟做乜？」霎時間我真的唔識點答，畢竟自從2003年沙士便開始買口罩後，藥房中人都從沒有問我買口罩目的，但我還是答了：「去佔中囉……」（那一刻我自然預計不到，傳說中的佔中原來一直都沒有發生）店員：「咁平啲賣俾你，原價18蚊而家收你10蚊。」Well，感性的我突然湧現一種難以形容的感受。 3. 到達中環港鐵站，未出地面，我同友人突然狂打乞嚏，喉嚨乾涸，周圍望，發現人人都係咁。後來從早到一步的朋友口中得知，原來剛剛又施放了（由我們納稅人負責俾錢買的）催淚彈。這是自作孽？抑或攞嚟賤？ 4. 打住乞嚏上到地面，我開始收到不少朋友來電和WhatsApp，目的只有一個：快啲走啦今晚會開槍呀。 我認，那一刻我很淆，淆底在預料唔到面前不遠處那班笠晒面具full gear上陣的差人，會對我（及身邊的所有人）做乜，而我本人（及身邊的所有人）明明不是罪犯，更加不是出嚟行，而只是keep住齋企。 5. 翌日，如常返工。路程一如以往地遙遠，也一如以往地順利返到公司。之後咁多日，一樣。特首及好多人都話，佔中（而傳說中的佔中根本沒有發生）影響了市民正常生活，偏偏我依然過著跟過去每一天幾乎一樣的生活，難道我的生活一直不正常？ 6. 10月3日早上我身處銅鑼灣，買了一本書，《超譯王陽明》（是明代思想家王陽明而不是全真教創辦人王重陽，不要撈亂）。王陽明好後生時已被認為天資聰敏（但同時朝中有班官，一班既得利益者視佢為心腹大患），做官後，仕途normal，面對過政治風波，被貶過官，相當冇癮。 就在生命走到最無奈絕望一刻，王陽明思考以下問題：如果換轉是聖賢在此時此刻面對相同情況，會點面對？ 7. 同一日下午，一群人形生物走到MK & CWB進行佢哋所謂的「反佔中」行動（重申：嚴格來說佔中從未發生過）。佢哋有幾出類拔萃特立獨行，相信大家都已經透過由不同市民冒險拍下的短片見識過了（你睇唔到？Sorry，鬼叫你戀棧TBB）。 我沒有王陽明咁高level，所以沒有去到搬聖賢出來的高層次，而只是簡單地諗：如果眼前有條友（或茂里），肆無忌憚攻擊（兼鹹濕）一個手無寸鐵乜都冇做而只是齋企或齋坐的市民時：A.作為一個正常人，會點面對？B.作為一個正常的差人，又應該點面對？ 在面對某些大是大非時，一個正常（差）人的正常選擇，根本跟政治立場無關，而只是同閣下的良知有關。 8. 當有人懶中立地大條道理說「有事差人冇事衰人」時，我只想回應：有（犯）事就放人冇（犯）事就打人。我終於明白了那一句「佔中影響了市民正常生活」（而傳說中的佔中根本沒有發生），原來事件也影響了、顛倒了、扭曲了、泯滅了差人的正常思維，而這才是最不正常的。 9. 同樣不正常的還有：有尊貴議員指因受集會影響而未能到政總開會——正如朋友話齋，當連乙武洋匡都能夠去到政總時，有手有腳的尊貴議員竟然夠膽死話自己去唔到政總？當然，尊貴的他們大抵堅信：坐尊貴的房車去政總才．是．正．常．的．生．活。搭港鐵再徒步行過去？好唔正常囉。 10. 呢個moment，作為一個人，我唔會當以上嗰班嘢係人。 （原文刊於am730）