失憶後愛你（上）
　　
一場車禍，我個腦受傷，失咗憶。

我只係一個普通女仔，無想像過呢啲咁戲劇性嘅事，會發生喺我身上。

不過作為現代人，失憶都唔係咩大問題。

拎番部手機出黎，望下啲訊息、社交網站，大至番咩工讀過咩學校，小至撞車前同邊個八婆講緊八卦，一清二楚。

新手機喺車禍中撞爛咗，我阿媽搵番部舊手機畀我，
我一路喺病床上睇，一路感慨，失憶嘅神祕感無晒。
　　

呢個時候，有兩個男人黎探病。

佢地兩個都拎住花，一臉殷勤。

佢地知我失咗憶，所以好主動咁介紹番自己，講自己叫咩名。

兩個人嘅名，我都喺睇舊手機訊息中度過，總之都係我嘅追求者，追咗我幾年。

從訊息上睇，我平日對佢地好冷淡，成日已讀不回。
　　

但係，呢啲都唔係重點。

重點係，呢兩個男人好靚仔，一個似吳彥祖，一個似古天樂。

佢地whatsapp頭像都無擺真人相，我真係想像唔到會有咁靚仔。
　　

由於佢地似吳彥祖同古天樂，所以暫時一個叫祖祖，一個叫樂樂。

雖然我仲喺醫院，但佢地已經不遺餘力咁討好我。

鮮花禮物就基本，一日三餐都包晒，仲爭住買嘢畀我食。

當然，佢地如果咁岩一齊出現，都難免會舌戰唇槍，寸吓對方咁。

我表面調停，其實心中暗喜，祖祖溫柔細心，樂樂霸道有型，都令我十分享受。

靚仔就算撩鼻屎都係靚仔，何況仲要一心一意討好我。
　　

但係我心裡面都有一個疑惑，據我研究，我屋企無咩錢，個樣正常啦，唔算好靚女。

點解呢種級數嘅靚仔，都會追我？失憶前嘅我仲要唔接受追求？

我都好婉轉咁問過祖祖同樂樂，點解會鍾意我。

祖祖話：「你又靚又善良，係我遇過最好嘅女仔。」

樂樂答：「我都知自己襯唔起你，但唔努力過，人生總係唔甘心。」

我忍唔住笑咗：「下，大把靚過我叻過我嘅女仔，會鍾意你地啦。」

佢地面面相覷，過咗一陣先答啲「愛情唔係講條件」之類嘅雞湯答案。
　　

到我出咗院，祖祖同樂樂都繼續追我，可謂驚喜不斷。

但係兩個人不斷出招，出吓出吓，總要出絕招。

果日祖祖約我，佢垂頭喪氣咁同我講，
佢阿媽話佢年紀都唔細，係時候拍拖結婚，又見祖祖仲未有女友，祖媽諗住安排朋友個女同佢相睇。

「我無興趣同其他女人相睇，但阿媽年紀都唔細，我知佢好想我有女朋友。」
祖祖含情脈脈咁望住我，我知佢咩意思。

而樂樂嘅絕招，就更加直接。

樂樂約我食飯，我去到餐廳，見到成地都係玫瑰花，砌成心形，
而樂樂就單膝跪喺中間，拎住隻細戒指：「做我女朋友，Baby。」
　　

對於呢場人生大事，我對佢地嘅答覆都係：我需要時間考慮吓。

一女不能同時嫁二夫，何況佢地仲要識對方，想暗渡陳倉都唔得。

即係話，我揀咗其中一個，另一個就會離我而去。

其實我都明白，我唔可以收一世兵，

佢地係咩人？係靚仔，係貌似吳彥祖同古天樂嘅靚仔，要咩女人都有啦。

我再拖拖拉拉，分分鐘佢地無晒耐性，一齊轉目標，我就渣都無得剩。
　　

但係決定揀邊個，的確唔容易，《單身男女》都拍咗兩集啦，仲話要拍第三集添。

我列晒兩個人嘅優點缺點，又計分又比較咁，都無結果。

於是我決定，問朋友！

但我失咗憶，所以邊個朋友同我關係好啲，適合傾呢啲話題，都係要睇番舊手機。
　　

點知睇睇吓，我新買嘅手機收到一個訊息，係一個叫金金嘅男人。

佢話：「你還好嗎？」

我初時無太在意，以為係啲唔熟嘅朋友，畢竟我住咗咁耐醫院，呢個金金都無黎探我。

我就好有禮貌咁解釋番，我失咗憶，所以唔記得佢係邊位。

金金問：「出黎飲杯嘢？」

我好爽快咁應承咗，上天安排佢喺呢個時候出現，可能佢可以解決「祖祖VS樂樂」嘅難題呢。

一見面，嘩，金金真係無改錯名，成個八兩金咁嘅樣。
　　
下集：https://goo.gl/RZ2bDq
　　
將專頁設定為「搶先看」/ "See first"，最新故仔馬上睇！
　　
唔開心係一種傳染病：https://goo.gl/RGsEqg
我有半種超能力：https://goo.gl/4gJxRF
　　
#短故 #短篇 #小說 #陳美濤 #廣東話 #粵語 #tomatochan #失憶後愛你