[gfmurmur9523] 我住喺外國，同男朋友一齊咗三年左右，大家今年都25歲。唔知點解男朋友好唔鍾意出街。佢返工好唔定時，通常一個禮拜大概返3，4日工，所以佢唔係返工返得攰，返到屋企要放鬆個種。 我地一個禮拜大概見2，3次。因為我自己一個人住，所以每次見面通常都會過埋夜。但係次次佢黎見我，都係陪佢揸車四圍去（佢工作成日需要四圍採購）。就算唔係疫情，我地都好少行街睇戲食飯。我地拍拖主要係我陪佢揸車四圍去，佢陪我買餸，大概一個月一次既珍珠奶茶，同埋一個月一次既狗公園。狗公園行路15分鐘到，但係平時佢都唔肯同我去放狗。 唔係我唔鍾意出街，而係我成日叫佢出街佢都搵十萬個藉口。我已經知道佢會拒絕我，所以我都廢事問。次次黎我屋企剩係對住部電腦。佢唔係成日打機嘅 男仔，但係日日都睇youtube 睇屋 睇車 睇股票。黎我屋企剩係食飯先一齊，其餘時間各自做各自嘢，第二朝一早佢就會走人。問佢食完飯一齊係netflix揀套戲睇 佢都會同我講第二日先睇。其實我都唔明佢點解要黎我屋企上網。當我問佢時，佢就會答我因為如果佢唔黎見我 我就會complain。呢排我公司放咗差唔多一個月大假，但係我地乜都冇做過，成個月我就日日吽喺屋企。 上個禮拜我地嗌交。我發脾氣因為佢明明第二日冇嘢做佢都唔陪我。前一晚佢黎搵我，我地如常咁四圍揸車，之後我地去咗買餸，買完餸返到屋企我就即刻煮飯。煮飯期間佢一直做自己嘢，我冇煩過佢，連檯都唔洗佢開，煮好晒 擺好晒 連水都斟埋先叫佢過黎食飯。食完飯佢做自己嘢，我都已經習慣晒，我自己睇youtube。睇到一半，佢突然開始攬我，因為佢想要。但係因為我嗰幾日姨媽到，所以佢叫我用手。好喇，其實我唔係幾情願，但係我唔想佢冇癮。幫完佢之後大家就訓覺。第二朝9點幾10點，佢一起身，㩒電話15分鐘，落床去廁所，跟住就同我講佢要走喇。我叫佢陪我放狗佢唔肯。佢其實冇嘢做，佢係返自己屋企睇電腦睇成日。我就好嬲，覺得佢只係當我係性工具。明明冇嘢做，點解一起身就走。係我角度睇，我幫佢>訓覺>一起身佢就同我講再見。我個刻真係覺得我好cheap，點解佢可以咁樣對我。我就開始一路喊一路鬧佢，講咗好難聽嘅說話，話我前一晚就算好唔想好唔想都幫佢。總之講咗好過份好令佢尷尬令佢冇自尊嘅說話。 鬧咗可能10分鐘到，佢就問我，咁係唔係宜家車我去狗公園就得，佢坐係車度等我，我帶隻狗落車 跑夠玩夠，係唔係跟住車返我返屋企就得。（佢唔係想和好，佢係想prove我剩係想利用佢，想等價交換 沉日幫完佢，今日我就要佢車我去邊度邊度，prove我同佢一齊因為佢有㗎車可以載出載入。）問題我唔係想佢車我去狗公園，我係想一齊做一樣嘢。佢咁講完之後我更加嬲，我問佢係唔係以後都會咁樣對我。佢話睇我表現。我再問多佢一次...最後佢自己一個走咗。 之後我block佢ig，block佢電話，其實我唔知佢在唔在乎，但係我真係好嬲，覺得如果佢宜家咁答我，之後點結婚 點生仔 點一齊生活。我block佢係比決心自己遠離佢，唔再搵佢（因為以前次次嗌交都係我求佢，主動同佢和好。如果我唔主動佢唔會搵返我。）過兩日之後，我就覺得其實我地只係嗌交，唔洗次次鬧交都分手，我就打電話搵佢，結果佢唔接。打咗兩日都唔接。 明明佢錯先搞到宜家我自己都覺得內疚覺得我自己錯。我火遮眼之後想同佢傾返，想解決問題，唔想就咁話唔適合就分手。因為之前次次鬧交之後其實我地都冇溝通過，每次都話試多次但係次次都只係將問題推埋一邊。 有時候會懷疑佢究竟鍾唔鍾意我。不過佢會成日同我分享佢d工作啊煩惱啊，我係佢唯一傾訴對象，佢平時好孤寒，但係聖誕節會大手筆送我差唔多成萬蚊嘅禮物。佢會帶我返屋企食飯介紹我比屋企人。我知道佢唔係當我係玩具，但係我就係唔明點解佢會咁對我。我要嘅唔係山珍海味，我要嘅係食完鹹魚白菜會陪我落街散步睇月光嘅人。 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig #香港 #情侶 #香港情侶

[bfmurmur1584] (第一次出po，希望可以po到出黎) 我25，女朋友24。最近同女朋友有d爭執，原因係佢成日都覺得我對佢付出得唔夠。 喺以前嘅父權社會下，男人地位比女人高，永遠都係男人讀書同出去做野。所以男人會有大男人主義，對女人好差呼呼喝喝。但同時亦因而產生左小女人主義，就係好多時樣樣野都要依靠男人，男人要對佢同全家人負責。但隨著社會進步，男女讀書工作機會平等，大男人主義已經無乜，但小女人主義依然存在，覺得男人要對女人負全部/大部分責任。永遠只強調男人對女人有咩責任，要點樣對女人好。但無乜人強調女人對男人有咩責任。所以，如果一段關係有問題嘅時候，好多時都係錯在男方，因為男人對自己唔夠負責。但又唔會諗下自己對男人付出幾多。只係想對方做付出一方，而自己做接受一方。 1. 經濟方面，男仔要出錢多d。如果女仔肯AA制，佢會話「我已經肯夾番份，已經好好肯負責任」，但其實呢個唔係理所當然咩？講得出呢句其實即係心入面都覺得男仔要比多d，但自己又唔好意思，所以免為其難咁夾番份。試諗下如果以上呢句說話係出自男仔把口會點？個男仔肯定比人鬧爆。所以，女仔心目中只有男仔比多d。AA就免為其難接受。更加唔好講女仔比多d。但其實唔係應該視乎雙方經濟能力而決定咩？ 2. 男仔要比到安全感女仔，要好好照顧女仔。而同時男仔其實都好需要安全感，都好想有被照顧被在乎嘅感覺。但如果女仔要照顧個男仔，佢反而只係覺得好似湊仔咁，好唔鍾意。 3. 男仔要比到女仔將來。女仔好容易會覺得同個男仔無將來。所以有部分女人會同年紀大自己好多嘅男人結婚，可能因為覺得年紀大d喺工作上已經有左一定成就，揾既錢亦都唔少，所以覺得有將來，女人可以輕鬆d。相反，如果嗰段關係女人揾錢多過男人，段關係好難長久，只會覺得個男人好無用。個人感覺女人係會睇左男人背景先決定會唔會鍾意佢，但男人係唔會睇對方背景而決定鍾唔鍾意，係鍾意就鍾意，唔鍾意就唔鍾意，同背景無關。在男人立場，我地大家嘅將來係希望我地並肩作戰，經過高低起伏，攜手一齊建立出黎。唔係淨係等男人建立完，女人就去一齊享受成果。唔係淨係同我一齊享受快樂，困難時就唔不一齊面對。 大家可能會話，咁你愛嗰個女仔就要為佢付出架啦，但同一句説話亦都可以應用落女仔度，你愛嗰個男仔都要為佢付出。我成日喺度諗，成日淨係強調男仔對女仔有咩責任，到底女仔對男仔又有咩責任呢？大家可能會話生仔，但首先未必每段關係都會發展到結婚生仔呢個階段，如果唔係發展到呢個階段，女人就對男人無責任？再者，如果女人唔想生仔，男人都無得迫。我唔係斤斤計較，我亦唔介意為我鍾意嘅人付出。只不過一段關係唔可以男仔淨係做give嘅角色，而女仔淨係做receive嘅角色，如果唔係段關係會好唔平衡。應該係互相都有give同receive嘅角色，互相依靠，因為愛與被愛都好幸福。女仔唔可以成日只係得「佢對我好好，所以我好鍾意佢」呢個觀念，仲要有「我好鍾意佢，所以我要對佢好好」呢個觀念。因為男仔都好想要有被對方付出，同被愛嘅感覺。 講返點解我好大壓力，就係因為我女朋友就係中哂以上嘅價值觀。佢有難題時，我會好耐心咁聽佢講開解佢，諗盡方法去幫佢，因為我會覺得佢好可憐，好想幫到佢。但到我有難題時，佢係對我好冷漠，態度好差，好無耐性，無諗過點樣幫我開解我，反而淨係會覺得我好廢好懦弱，小小問題都搞唔掂。自此之後，我就開始意識到原來男人跌倒，女人唔會覺得你可憐想幫你，你喊都無用，反而只會覺得你好廢好懦弱，覺得你好靠唔住，會質疑你「係咪男人黎架」。我慢慢喺度諗咁我第時無論喺經濟，健康，情緒或任何方面出左問題佢都唔會幫我？所以我只好靠自己，千其唔好跌低，因為我唔係女人，跌低時會有男人喺背後幫你，男人跌低時係無人幫你無人照顧你無人可依靠。但我愈咁諗就只會愈不安，愈大壓力，愈覺得抖唔到氣。我甚至慢慢對戀愛產生左恐懼。其實係咪大部分女仔都係有咁樣嘅觀念？只係希望receive，而唔想give？如果係咁，男人真係好大壓力，大部分責任同壓力都壓在男人身上，真係好辛苦。女仔可唔可以試下逆地而處，諗下如果交換角色係有幾咁辛苦？ ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig

- 0660 〔感情意見〕絲 20 - 我好愛男友但佢不斷呃我瞞我 - 我好愛男朋友，想知道究竟係我嘅問題定係佢嘅問題 認真求意見，希望留言要分手嘅可以提供埋理據，謝謝！ - 我哋拍咗差唔多2 年拖 已經有咗共識，唔係諗住拍散拖，亦都希望可以行到最後 但最近發生咗太多事，糾結咗好耐究竟投唔投稿好 到依家真係頂唔順，先至決定投稿 以下係一啲最近嘅感情問題： - 男朋友之前喺課外活動識咗一個女仔（佢哋淨係見個2 / 3 次） 因為佢會喺IG DM 男朋友（有時會讚佢），所以我對依個女仔有啲印象 有日我得閒冇嘢做，就去睇我男朋友following 發現咗佢之前已經follow 咗一個小帳，但我冇認真睇入面嘅post （因為嗰陣覺得無咩可疑😂純粹覺得好奇）淨係cap 低咗佢個名 跟住第二日問男友，一問先知嗰個人原來就係嗰個女仔，但佢從來都無同我提起過依件事 我作為一個女仔，雖然自己無開細帳 但會覺得細帳通常都係會俾一啲自己嘅close fd follow 而佢依果細帳follower 唔多，但都竟然俾我男友follow 而我男朋友明知我介意依個女仔，都無同我提起過依件事，所以就令我有啲介懷 - 有次我睇到有一個不知名女仔嘅chat room 喺男朋友嘅通訊軟件入面 問完先知原來男朋友喺一隻game 入面add 咗一個女仔聯繫方法（女方提出嘅） 跟住就喺依個通訊軟件度傾偈 同一時間，佢嗰個通訊軟件嘅icon 由我哋原本嘅合照，變咗做佢同佢個friend 嘅合照 我唔知係咁啱定點啦，但佢就話係之前已經轉咗嘅 我喺依件事最嬲嘅地方係，佢竟然會咁輕易就同喺隻game 入面識嘅人交換contact 就算我平時玩其他game 有異性想咁做我，我都會拒絕 因為我知道自己有男朋友，我唔會咁隨便就俾contact 俾其他異性，至少都要避嫌 - 我唔係好鍾意男朋友落bar（我自己都唔會落bar 嘅） 之前有2 次佢都同我講佢同friend 去食飯 但結果係一齊落bar，仲要好夜先返屋企 其實如果佢同我講，又肯早啲返屋企嘅話，我都唔會阻止佢 （佢咁大個人亦都阻止唔到😂） 我知道佢咁樣呃我之後好失望，佢話呃我係唔想我嬲 但大話係冚唔住，我知道真相之後只會更嬲 依家都會有陰影，雖然傾好咗，但失去咗嘅安全感同信任真係無咁快返嚟 - 到今日，我本來約咗男朋友出街 咁啱就喺我出門口嘅時候，佢同我講佢有班friend 好耐冇見 難得今日會約齊人，想同佢哋食飯，我真係好嬲 正常嚟講，如果你約咗A，後尾再約B，都唔會為咗就B 而放A 飛機丫 雖然我明，我係一個人，佢班fd 係幾個人 但因為以上情況最近都發生得好密 唔係咁樣放我飛機，就係遲幾個鐘先出門，搞到原定計劃要取消，所以我都仲係覺得好委屈 - 我真係唔知點算好，我條底線好似慢慢咁俾佢踩低 最近我一路都覺得好似係得自己care 佢嘅感受，尊重佢嘅存在咁 佢就好似一個無同理心嘅人，當我無到 雖然2 年唔長，但始終係初戀，又唔捨得放手 而且就算搵另一個，都一樣會有其他嘅矛盾 所以就好想知道，會唔會其實一路以嚟都係我嘅問題 定其實佢真係唔識去愛自己嘅女朋友 最後希望大家都可以搵到自己嘅真愛！感謝睇到依度嘅你！ 圖﹕想見你 #SorryFor1999 #求意見