觀塘願景 - 梁凱晴 Jannelle R. Leung：

//如果單單係因為國安法嘅實施，而你自動滅聲，咁你就係正中敵人嘅下懷。敵人一直費煞思量就係諗盡辦法想令到我哋驚，而呢一刻佢哋真係做到喇。

每個人嘅抗爭成本都唔一樣，我哋可以做到嘅就係喺自身嘅崗位，盡自己嘅所能。無論係歌唱師、入信師、簽名師、翻譯師、文宣組、Twitter師、抗制TVB團隊、勇武、F A、哨兵、記者、黃色經濟圈、議會線、國際線等，邊一條路你覺得可行嘅，而自己身位做到嘅,就盡力去做。

香港人最自豪嘅就係我哋識靈活變通，Be Water係我哋上年解鎖嘅一個重要技能，一條路封死咗，我哋就會去開拓更加多嘅路去嘗試，呢個就係我哋香港人嘅精神。你，仲有想放棄嘅理由嗎？//

【罷喇罷罷罷 I'm strikin it】

連續兩日於九龍東擺反惡法街站。容許我重覆又重覆咁講多次，聽日立法會就會恢復惡歌法二讀。而較早之前因為親共派強撕立會議事規則，強搶內務委員會主席權利，令到李慧琼可以獨行獨斷，永續內會主席；所以如無意外，聽日恢復立法會二讀後，接下來嘅6月4日就好大可能會通過惡歌法。

中共嘅惡歌法之所以臭名遠播，正正因為當中內容極具爭議性，會扼殺香港人嘅創作自由，將所有關於國歌嘅二次創作，視作大逆不道、侮辱中國嘅行為，使大家嘅言論自由進一步受到政治掣肘。

藍絲經常發表謬論，大大聲話：「國際上，美國等嘅西方國家亦都有國歌法嘅存在，你班黃絲驚乜嘢？」。但佢哋並唔知道，其實美國嘅國歌法只係一條官方指引，實際上內文係冇執法罰則。而事實上問題根本並唔係在於條法例本身，而係執政者喺執法上面嘅差異。你唔會期望，喺一個極權統治下嘅中共，違反國歌法嘅人係唔會受到法律制裁。

而五月廿八號（星期四），好有可能會有一條更加嚴峻嘅惡法直接殺入香港，就係國安法。大家對國安法可能好陌生，因為當中所講到嘅「顛覆國家政權罪」、「尋釁滋事罪」，好似同大家嘅距離都非常遙遠。但可以話俾大家聽，呢啲虛無飄渺嘅罪名，係點樣影響到普羅大眾嘅日常生活。中國一路以嚟嘅維權事件都可以話俾大家聽，只要任何嘅言論係觸動到中共嘅神經線，佢就可以以言入罪，以一啲「莫須有」嘅罪名，夾硬話你損害國家利益。

我哋一路引以為傲嘅遊行、集會自由，可以預視到會進一步受到迫害，甚至以「聚眾擾亂公眾場所秩序」定罪，話我哋危害「國家安全」。莫論所謂嘅新聞自由，網絡上嘅言論自由都將會一一被滅聲。

畢竟呢一篇並唔係解說文章，我唔再逐一詳盡解釋，大家可以從各大渠道嘅文宣上了解得到。

呢兩日街站，不斷聽到沿途市民同我哋講：「多謝你哋，加油努力。」而我想講嘅係：「冇錯，係大家都要一齊加油努力。」只有大家一齊身體力行，支持社會改進，我哋先至會有成功嘅一日，而呢一日缺少任何一個人嘅支持都冇辦法成事，確實真正缺一不可。

有街坊好擔心咁拖住架BB車走嚟問我：「可唔可以喺立法會嘅層面阻止到呢條國安法？」我可以好老實咁答你，對唔住，好遺憾嘅係，人大係會直接繞過香港嘅立法機關，直接強加呢條法例嚟到香港，呢個完全唔係立法會層面可以阻止到嘅事。

我講呢個真相俾大家聽，唔係想令到大家氣餒，而係想大家思考返，我哋上年一齊走出嚟嘅原因。當時我哋都係完全唔會知道聽日係會發生咩事。我哋唯一嘅本錢，就係我哋作為一個「人」本身應有嘅價值，同埋對自由嘅追求。

如果單單係因為國安法嘅實施，而你自動滅聲，咁你就係正中敵人嘅下懷。敵人一直費煞思量，就係諗盡辦法想令到我哋驚，而呢一刻佢哋真係做到喇。

每個人嘅抗爭成本都唔一樣，我哋可以做到嘅就係喺自身嘅崗位，盡自己嘅所能。無論係歌唱師、入信師、簽名師、翻譯師、文宣組、Twitter師、抵制TVB團隊、勇武、F A、哨兵、記者、黃色經濟圈、議會線、國際線等，邊一條路你覺得可行嘅，而自己身位做到嘅，就盡力去做。

香港人最自豪嘅就係我哋識靈活變通，Be Water係我哋上年解鎖嘅一個重要技能，一條路封死咗，我哋就會去開拓更加多嘅路去嘗試，呢個就係我哋香港人嘅精神。你，仲有想放棄嘅理由嗎？

明日罷工救港，街坊請見諒🙏🏿

#反惡法 #惡歌法 #國歌法 #黨安法 #國安法

#太夜冇叫同事整圖 #配圖自己整唔好介意🙏🏿