《咎由自取的失分 抹煞前線的努力 車路士對修咸頓賽後分析》
.
由三分變一分，相信除左令一眾睇住直播既球迷氣憤之外，對場上經已付出足九十分鐘既球員黎講亦難掩一份失落，個別球員「自殺式」犯錯可以話埋下失分既伏線，亦同時抹煞左前線球員喺比分上既努力，其實哩啲學費都已經交左接近一季去到依加都仲交緊，身為主教練既林伯特需要負上不能推卸的責任。
.
繼續源用4231陣式，正選陣容上有佩利錫正式復出，令添姆雲拿可以回歸正箭頭位置，身後支援既亦繼續係夏弗斯，而蒙特就依然兼任左翼鋒角色，雙中場分別用左佐真奴配搭簡迪，至於四人防線就用上蘇馬同基斯甸臣為中堅組合，賽前傳出有小傷既捷維爾亦趕及復出同艾斯派古達擔任左右兩間，而門將就由基柏接替於國家隊訓練時受傷既文迪，堤亞高斯華就因倦勤而並無在賽事名單之中。
.
以結果論黎睇著眼點過份側重於個別球員既失誤而引致既失波，但其實今場波理應平均分為入球與失球兩部份黎睇，雖然最終都唔能夠全取三分，不過喺進攻層面上其實有唔少值得觀賞既看點可以分析，先講組織攻勢，過往車路士由後場開始組織主要都以短傳同地面戰為主，不過自捷維爾接任左閘正選後，好多時後場既波都會經由右閘到中堅再到佢腳下，而捷維爾既視野同能力可以省略左中場轉換直接將皮球傳上前線發動攻勢，比起中堅同樣以長傳方式唔同既地方係，哩位英格蘭左閘除左可以選擇向前傳上邊線之外，亦可以以拋物線方式彎入中路，變相令進攻套路更加多元化。
.
由於添姆雲拿偏好走向左路發展，多番見到佢成功接應到捷維爾既長傳，德國人回歸正前鋒後可以得到更大既活動活間，可以令佢專心於前線捕捉機會，而今場波兩個入球亦見得到添姆雲拿既個人質素，早前亦多次強調球迷們無需過份擔心佢會有步向莫拉達後塵既機會，因為兩者係截然不同風格類型既前鋒；至於喺佢身後既夏弗斯亦漸入佳境，繼續以前場多面手既角色串聯攻勢以及為隊友製造機會，更同雲拿一樣正式取得英超入球，而佐真奴亦終於「擦出」助攻。
.
略略講完組織同入波喺進攻層面上既野之後，就係時候到令人氣憤既失球部份，而喺哩部份之中亦可分為兩個範疇，除左場上球員既失誤之外，另一個位就係林伯特既安排同臨場部署上同樣都存在失誤，先講前者，睇返三個失波，除左最尾禾確特彈射命中隊友改變角度入網果球略有幸運成份之外，前兩球都係由於球員個人失誤所造成，先由夏弗斯於中後場區域推失波所致，當時睇到哩個畫面之後第一時間令人聯想起巴克利過往既犯錯，同樣地係喺接近哩個位置推失波，其實唔係唔比你向後推，但係喺哩個位推真係好危險，基本上一推失就等同伏左後面既隊友，哩方面夏弗斯就真係要交下學費。
.
至於第二球失波，亦係大眾球迷著眼同車迷們氣憤既一球失波，蘇馬回傳力度不足派出「醫院波」，同時基柏喺禁區內撲救存在猶豫，撲救失敗後雖然有基斯甸臣試圖解圍，但最終都被對手以半空門方式射入，如果單計責任的話，蘇馬同基柏兩者難辭其咎，前者犯錯後無嘗試起跑跟返轉對手彌補自己既失誤，返而覺得龍門應份地幫佢補鑊，至於基柏既心理狀態其實都已經打唔起，多次自我犯錯或被防線「放伏」到就連自信心都無埋，而其實喺哩球失誤之前兩者都經已出現過誤會畫面，當時蘇馬呼喝基柏出黎將皮球沒收，其實果下對手都唔算壓迫得蘇馬太西利，理應自己由能力轉身再組織過，而基柏本人都覺得無必要出龍，蘇馬幾時變左後防大佬連出龍都可以由佢叫？場外人都睇到兩者明顯存在心病，對一條防線黎講絕無半點得益。
.
最後就講到林伯特，要講既野亦唔會比球員少，先講防守佈置，佢都執教過左一季時間，球隊依然喺防守死球時存在明顯漏洞，今場波對手兩下死球時都能輕鬆地喺禁區頂位置施射，而哩個區域係並無任何藍衫球員進行防守，變相只要解圍不遠，對手就可以有空間輕鬆起腳，防守唔洗教都唔識教係兩件事黎，而林伯特好明顯係後者；令一個問題就係臨場調動，其實球隊喺下半場已經開始失去壓倒性優勢，尤其係喺六十分鐘打後形勢已經交到修咸頓為主導，但感覺上林伯特好似無乜目標咁，換完薛耶治入黎就等完場咁，去到下一個換人已經係要數到八十六分鐘既占士，果時其實未被對手扳平已經係好彩。
.
你要縮既，其實理應六七十分鐘要開始換人縮，如果你要谷多粒既，就早啲換艾巴咸入黎跑下，唔係去到九十分鐘先換佢入黎踩下草咁，你臨完場前先換佢入黎請問有咩用？感覺上林伯特喺球隊仲係些微領先3:2果時係完全無方向，完全無任何為球隊再鞏固形勢既目標；最後一樣想講既就係喺戰術安排上，喺國際賽前對水晶宮時都有睇到同講過，果場波球隊既中前場除左做迫搶之外，亦好肯落腳去制止對手製造攻勢，講緊既係對手連半場都未過到時已經被打斷，果時明顯見到球隊係有刻意咁做，但今場波完全見唔返哩樣野，中前場肯落腳既就只有簡迪一個，其餘人就淨係企位迫之後就再無其他跟進動作，都講過咁做既話變相令對手好輕易咁透過短傳就破解到你哩招，無系統性既迫搶只係掛羊皮賣狗肉，亦無助為後場減壓。
.
學費唔係唔想交，而係交到有冇意義，都經過左一季多既時間，陣容上亦都有補充同提升，但內容上依然都好似維持原狀咁，失既波都依然繼續都係咁，根本上只係等邊位球員犯錯，而林伯特就好似永遠立於不敗之地咁既樣，如果係咁的話前線入幾多球，後面都真係同你失番咁多球。
.
《岩睇既比個Like支持我地啊！》
作者 : BluexLion車迷手記
-------------------------------
同場加映《令車迷們「瘋狂」的一個暑假 淺談藍軍大灑金錢的一個轉會窗 – 後場篇》
https://bit.ly/2T6r2YE
.
#Chelsea #車路士 #修咸頓 #英超
https://s.fanpiece.com/nnT7mUh

《臨天光瀨尿 完場前遭喜鵲絕殺 車路士咎由自取式痛失三分 紐卡素對車路士賽後分析》
.
沉晚英超可以話上演左一晚讓四大戰，多支前列球隊相繼失分各執一分，而尾場既車路士更遭到紐卡素絕殺連一分都無，實在難免令一眾捱夜睇波既車迷氣憤，三分全失後雖然尚未動遙第四位置，但藍軍已經被身後既曼聯逐步拉近距離，而身前既三支球隊亦愈拉愈遠。
.
車路士作客黎到聖占士公園球場，其實向來喺哩度既往績都相當一般，林伯特排出一個433既陣容應戰，魯迪加繼續伙拍基斯甸臣合作中堅位置，左右兩閘亦係艾斯派古達同尼爾斯占士，中場方面傷癒復出既簡迪亦馬上成為正選，同佐真奴以及蒙特合組三中場，而前場方面亦繼續係艾巴咸、韋利安同奧岱作攻堅。而單睇哩個出場陣容時經已有個疑問，何解高華錫連續兩場後備而反而剛復出既簡迪咁快急於作正選？
.
車路士喺今場波既表現其實稱唔得上係「老鼠拉龜」，紐卡素並非嚴密防守到滴水不漏，反而係藍軍自己把握唔到一次又一次既機會，上半場車路士的確喺控制球速方面略為偏慢，佐真奴亦多次揮手示意隊友要提升換邊傳球速度，節奏過慢根本難以拉出空間製造攻勢，兩邊路亦難以over load作人數優勢，而今場波亦過份集中於傳中，少左兩邊翼各自拉邊互傳，令艾巴咸好多時要喺禁區一對三甚至更多去爭頂，老實講以佢能力都做到好幾下埋門都經已算係咁。
.
而紐卡素亦透過好幾下半場死球高波吊入禁區製造唔少具威脅既攻門，車路士球員論身體質素拍埋去對手度基本上都爭成幾個碼，比人圍夾之下紐卡素根本上下下都成功頂到波。而下半場調整後林伯特嘗試要求球隊提升速度，亦開始製造更多更貼肉既攻勢，但奈何一一都係差半步之距將個波送入網中，而三個換人之中球迷較斟酌於巴舒亞伊哩個調動，個人認為如果場上既艾巴咸婁次欠運的話，亦理應換走作新嘗試。
.
不過以賽後分析黎睇今場波既433陣容人腳，其實簡迪同蒙特互調位置可能會更合適，簡迪明顯同右邊奧岱以及尼爾斯占士唔夾，如果安排蒙特打番右邊拍佢兩個夾慣夾熟，而簡迪亦可以去番同韋利安打同一邊作推進，效果可能會更理想，而占士受傷後奧岱亦隨即打番左邊而韋利安調返右，明顯林伯特係清楚知道奧岱拍占士以及韋利安拍簡迪哩兩對組合。
.
不過最摸不著頭腦既係高華錫經已兩場後備而且無出個場，究竟有小傷而無法上陣，還是林伯特想喺場上作出一啲難以睇到既新嘗試？實在無法得知，而黎緊下場波將會迎戰同樣狀態不穩既阿仙奴，能唔能夠喺主場全取三分？而距離轉會窗完結前仲有大約兩個星期，又會唔會有新面孔帶到比大家？就要繼續睇落去...
.
《岩睇既比個Like支持我地啊！》
作者 : 藍獅 BluexLion
-------------------------------
同場加映《尋找簡迪的使用手冊》
https://bit.ly/3aomHHs
.
#Chelsea #車路士 #紐卡素 #林伯特

【我對New Monday一文的幾點看法】

1. 讀完New Monday那篇文章（下稱「NM」），即時感覺是剽竊了「長跑長友」群組內Yiu Kwong Chan、James Chiu等人的「字典」作品（下稱「字典」）；

2. 雖然，「字典」中可能沒有一個「條目」是由作者所首創，但將之彙集成篇，然後為「條目」寫下定義，在我看來，這種功夫已經是一種值得尊重的新創作；

3. 「字典」流傳已一段日子，以「跑步術語」為題材寫文，就我所見就只有他們這一篇。在此情況下，若之後有任何人再以相同題材寫文章，對「字典」提也不提，所謂瓜田李下，因而招來抄襲之譏，亦純屬咎由自取；

4. 「NM」一文，開宗明義以「跑步術語」為題材，卻完全沒有正式提及「字典」一文，我認為這是對「字典」一文作者極不尊重的表現。（「NM」一文中「全靠我的一班院友鼎力協助」？我不認為這是引述了出處）；

5. 如今提及，不是要為追收版權費或甚麼利益，只是覺得這種不尊重人家創作的情況，不應助長。路見不平，雖然我的刀並不鋒利，或許未能相助，但總希望給「NM」一文作者知道一件事——你這種與剽竊無異的行為，人家是會看到的。因此，恕我未能裝作看不見；

6. 我不知道，「NM」一文作者有沒有收稿費。若有的話，即罪加一等；

7. 眾所周知，New Monday有實體雜誌出版。根據維基百科資料，其「固定的讀者人數已超越250,000人」。若然如此，其影響力已不能與一般博客文章相提並論，我們對New Monday範圍內的作品有稍高要求，也屬合理；

8. 很可惜，作者除了剽竊外，連一些常見中文詞彙之用法亦未能盡如人意。根據網上「國語辭典」，「罄竹難書」一詞指「比喻罪狀之多，難以寫盡」，文末使用這詞，明顯與大眾認可的用法相違。若是一般博文或發帖，我根本不會刻意找碴。但一如上一點所言，貴為有頭有面出版了十幾年的New Monday，讀者期望更高（其實也只是想看到正確用詞而已）不是不合理。我相信作者亦不會沒有雅量去接受意見；

9. 最後一提，我也因為質疑此文而遭某些跑友指我的文章並非原創。如果想討論有意義，煩請先答小弟兩問題：一、「原創」之定義是甚麼？二、小弟哪篇文章出了問題，以及如何出問題？

10. 小弟一直以來的蕪文，確是亂七八糟。至於是否「原創」或「抄襲」，甚至是否一點價值也沒有，我想這不是該由我來評論，也不是由一兩個人說了算，而是該留待廣泛讀者自行論斷。