全自購 Brand Focus - 平價護膚品 Good Molecules 斷斷續續試用左大半年，終於可以整合下我用過嘅good molecules 產品😍 Good Molecules 係Beautylish 出嘅牌子，韓國製造，無動物測試，部分產品純素，所有成分都清晰地喺網站同埋包裝標明。更加欣賞嘅係佢哋會根據用家對產品或者成份嘅意見，作出改善同埋提升，而所有嘅變動都會喺紙盒註明。 定位同the ordinary有啲似，平均黎講我覺得Good Molecules 嘅產品比The ordinary更適合我，大部份嘅產品我都覺得好用而且性價比極高，中伏比例偏低。 最最最最勁係佢嘅送貨速度，基本上今日落單，最遲後日就會收到，仲要滿$200就免運費！ Instant Cleansing Balm 𝚑𝚔𝚍 𝟻𝟻/𝟸𝟹𝚐 𝚘𝚛 𝚑𝚔𝚍 𝟷𝟷𝟾/𝟽𝟻𝚐 由卸妝開始講起，之前都講過好中意呢個卸妝膏，卸得乾淨，眼妝同mascara都落到，易推，重點係過水後清爽唔笠，唔會有油淋淋嘅感覺。 連缺點係入眼會澀眼，之後短時間睇嘢會朦朦地。 回購再回購，買埋mini size 放工做gym用👍🏻 Rosewater Daily Cleansing Gel 𝚑𝚔𝚍 𝟿𝟻/𝟷𝟸𝟶𝚖𝚕 Ph 5.5 酸鹼度唔會破壞皮膚天然嘅水份平衡，清潔力適中，無我平時用開嘅elta md咁保濕，但係用落感覺都好溫和，洗完唔會繃緊唔會乾。可能我用量比較大，所以唔算好襟用，但係都好推薦！ Niacinamide Brightening Toner 𝚑𝚔𝚍 𝟺𝟾/𝟹𝟶𝚖𝚕 𝚘𝚛 𝚑𝚔𝚍 𝟷𝟷𝟶/𝟷𝟸𝟶𝚖𝚕 有少少滋潤感，但除此之外我對呢枝toner無咩感覺，唔會回購。 Niacinamide Serum 𝚑𝚔𝚍 𝟺𝟾/𝟹𝟶𝚖𝚕 唯一中過的大伏，之前share過突然大爛面嘅原因就係佢😂 Niacinamide ，亦即係B3可以幫你均勻膚色，收細毛孔等等等等，好多人都話呢個成份好好。本身用niacinamide係有可能出現purging，但理論上爆發完一輪，將你底層嘅污糟推哂出黎，你嘅皮膚就會開始靚。 可惜係我身上，我用哂成支serum都無停過爆瘡😂爆到我平時唔會生暗瘡嘅位都不停出石頭瘡。然後我一用完支serum啲石頭瘡就開始停了🥲啲印搞左我大半年先好少少，直頭依家對niacinamide 有啲恐懼😪 我知好多人生暗瘡用呢枝都有好轉，又要老套講句護膚品真係人夾人😹我會建議如果你用呢支精華，keep住爆瘡爆左兩個星期都無好轉，就可以考慮下放棄鳥～ Hyaluronic Acid Serum 𝚑𝚔𝚍 𝟺𝟾/𝟹𝟶𝚖𝚕 𝚘𝚛 𝚑𝚔𝚍𝟿𝟻/𝟽𝟻𝚖𝚕 性價比極高嘅補濕精華，補濕度唔算好高，勝在非常清爽容易吸收。妝前用唔會有擦膠碎，所以朝早同夏天用都好好，冬天就唔太夠力。已經用完兩枝，回購左一枝jumbo size! Silicone-Free Priming Moisturizer 𝚑𝚔𝚍 𝟺𝟾/𝟷𝟻𝚖𝚕 𝚘𝚛 𝚑𝚔𝚍𝟿𝟻/𝟻𝟶𝚖𝚕 易推嘅cream，非常快吸收，唔會有油膩感。滋潤度中等，朝早用ok，夜晚用就唔係太夠力。值得一讚化妝前用從來都無試過同底妝或者防曬打交👍🏻本身買travel size 試，依家應該會回購full size。 Yerba Mate Wake Up Eye Gel 網站暫時缺貨，搵唔到價錢。 容易推開同埋容易吸收嘅啫喱狀，輕微滋潤度，不過除咗少少滋潤之外唔係好覺有其他功效。推介俾比較後生，對抗老抗紋唔大需求嘅年輕妹妹😹如果想抗老或者去黑眼圈去腫etc，呢支就未必滿足到你。 Caffeine Energizing Hydrogel Eye Patches 𝚑𝚔𝚍 𝟷𝟺𝟸 一盒有幾十片充滿精華嘅eye mask，本身期待佢同The Ordinary支Caffeine solution 一樣可以去眼腫去黑眼圈，可惜我覺得佢除咗輕微保濕之外就冇其他功效。Eye patches 嘅cutting 都唔係好適合亞洲人，可以略過唔買😹 Vitamin C Booster Powder 𝚑𝚔𝚍 𝟼𝟹/𝟸𝟶𝚐 勁抵用嘅維C粉，可以溝落所有水狀嘅精華同乳液，發揮維他命C美白同埋抗老功能。通常用嚟溝落body lotion搽手手腳腳，都算係幾容易撈勻。不過比起philosophy，美白效果就無咁明顯。 BHA Clarify Gel Cream 𝚑𝚔𝚍 𝟽𝟿/𝟹𝟶𝚖𝚕 比我用開嘅skinoren 易吸收同埋無咁刺激，不過效果都慢少少。去印比較明顯，去暗瘡我就覺得無咩明顯感覺。 #goodmolecules #goodmoleculeshk #SharedomoSkincare