[Reality check] 我發現香港人真係巧打意，即使三唔識七冇恩冇怨，都唔可以正常理智咁討論下問題。又唔係殺你全家搞你老婆。講樓市啫。

我只係指出政府經濟報告計法嘅問題，以及破除好多人以為「供樓嗰啲人好辛苦　加少少息就要跳樓　」呢種迷思，就有人出嚟話我幫地產商賣廣告，唱好樓市，「升就要買咩」。

而首先我全無收受任何利益，亦冇唱好樓市，更冇叫人買樓，我甚至冇話樓市會升。證明好多香港人，基本閱讀理解能力都冇。

等於之前貼屯門新盤，香港後生仔新一代，唔靠父幹買，一樣大把人買得起。又總係有人話大陸人先買得起（證據？）

甚至有人話亦大把人買唔起。喂，我同你講大把人鍾意飲奶茶，你話大把人鍾意買咖啡，關乜撚事？

況且，幾時話要majority先可以叫「大把人」? 我話大把人投李慧琼，你又質疑返我大把人投佢對手所以我講錯？

Anyway，鬧完一輪，講番事實。經濟日報的唐榮同我一樣，寫文講出政府經濟報告個數嘅問題。又搞清楚，唐生從來都唔係大好友。

但總係有人唔肯接受現實，覺得啲數假嘅，政府呃你嘅，地產商啲數字又呃你既，去售樓處見到啲香港人都係假嘅，大陸人人頭嚟之嘛，呃我唔到。

而我都費事tag晒我啲呢幾年買樓嘅朋友出嚟。

啲反對者就又搬返龍門笑人傻仔，做樓奴，「買得起就要買咩」。

我以為係常識，但好多人都冇。再講一次。買得起唔等於要買，結婚都唔使買樓的。根本就個人選擇，唔使人身攻擊。咁但，你唔買，或者你買唔起，就改變唔到供緊嗰啲人好輕鬆呢個事事。

我上篇文都唔記得講，唔好忘記，呢堆「供樓」人士之中，唔少更加係供滿加按嘅。

按嚟做乜？可能供仔女讀書，可能末期肺癌啦。但更多係攞嚟投資—而過去幾年，其實你投資乜都應該有斬鑊，點都夠冚你嗰兩厘幾嘅息有突。

正如都有網友指出，真係危險係咩人，就係呢幾年借「呼吸plan」，發展商借埋首期畀你嘅人。呢班人好可能係冇乜財力，收入亦唔夠嘅。過咗優惠期後佢搵唔到銀行轉按，或者樓價跌，就仆得街。「但放心，都係變銀主盤，或者發展商收返再賣過」

都係果句，你唔知香港人幾咁有錢。你買唔起／唔想買，大把人買得起。我去日本韓國台灣啲米芝蓮餐廳，差不多只見大陸人同香港人—但大陸十億人，香港七百萬。