［比悲傷更悲傷的故事］（＊）—絶非抽水，睇見都傷心。但我又見到希望！你抽人地水或者同情人地嘅，「不如顧掂自己啦」。才華先係最好嘅安全網

原文：牧羊少年咖啡館 The Alchemist Cafe（https://fbook.cc/3F0l）。開到去屯門喎，大家可以支持下。

TLDR：金門大橋下面嘅水，真係好凍！（https://fbook.cc/3F0k）。Roy Raymond四球嘢賣咗Victoria Secret，兩年後公司值5億美金。Ronald Wayne當年沽咗10%蘋果，只係拎返800美金。連李澤楷都沽早咗騰訊啦，當年執10倍，之後反返1000倍。冇得事後咁睇嘅，否則好快痴線。

1. 唔好咁快抽水或下結論，值得細心諗下。當然假設成件事係真，係假嘅唔使討論

2. 故事好簡單，5年前，2015年8月尾，有位仁況沽晒啲騰訊700去求婚。佢買嗰時係2008（強！），買入價9.5，沽出去130蚊。我查過啲數字係啱嘅。同現價可比。騰訊14年拆股，佢寫時已經調整晒。

3. 賺14倍！勁唔勁？唔好話勁過好多散戶，真係勁過好多股神，勁過晒咩神級基金經理（固然基金好多時只能配置10%落一隻嘢—先天係幾低能的）。14倍喎！你有冇坐過一隻嘢升14倍？我就冇啦。仲要只係7年

4. 但講過啦，銀碼都緊要。你買場波贏14倍唔難，但你買得幾多？一萬？呢位仁兄，話買咗60手（！！！）。咁當年200股一手，即係買入成本11萬，沽嗰時156萬。淨賺大約150萬，嘩！

5. Happy ending, right?

6. Except five years later，騰訊升到五舊幾水！如果渣到今日，佢堆貨就值六球嘢。夠你呼丕一層樓。當然唔係太古城，但，pretty good．慳慳地你去台灣食過世都可能得。

7. 故事教訓？其實冇乜。有早知冇乞兒。係畀你思考下。

8. 我諗到嘅係，唔好成敗論英雄。佢執到14倍，已經勁到不能！你事後睇梗係話人地沽早咗啦，正如你睇波，事後個個都韓國女星全知賢（＊＊），梗係簡單。你唔諗下2018年騰訊點一沉百踩講到玩完咁滯。嗰啲位你點都沽啦

9. 亦係回返帶，好廢，但呢啲就係有錢人（當然佢一隻騰訊執一球嘢都唔係窮人）同我地嘅分別。呀主角可以坐14倍，已經勁到不能。但點解唔會坐到50倍？因為佢要結婚！係，李嘉誠都要結婚，但李嘉誠結婚唔使沽咗啲Zoom．（＊＊＊）

10. 再講白啲？就係因為我地常人會有「資金需要」，耐唔耐要套現。但股票多數都升，多數套現都後悔。上次講Zoom嘅故事提過（https://fbook.cc/3F0i），08年我因為借錢炒股票，當然低位打靶冇仇報。好啦，到2014年，我正式搞移民台灣。但要600萬台幣搞公司嘛，話多唔多話少唔少，而我未厚面皮到問我老母拎錢，當時亦冇諗過加按層樓。結果就係沽走啲股票咯。唔使講梗係之後幾年升返好多。但，有乜計？我唔係郭台銘嘛。

11. 真的，凡人，就算你冇借錢炒股（成功第一步），就算你心臟大（成功第二步），就算你上少啲網（除咗睇我啲文），你都總有啲資金需要。Next Station仔女留學。可能你係結婚買樓要首期（咁都係一個投資轉另一種，還好），可能你要搞移民，可能touch wood屋企人有病，或者自己有病。總有呢啲嘢令你要沽貨。

12. 解決方法？係冇嘅。下次投胎希望自己好彩啲。

13. 不過正面啲諗，其實主角好似未出嚟澄清。但我斷估，佢有強大嘅心臟，心理質素強。直接啲講，佢可以一隻嘢坐到咁耐贏14倍，可能之後佢都有其他投資可以執到好多。

14. 才華（包含好多嘢，當然包埋心理質素），先係最好嘅護身符，帶唔走。固然富者越富，但中六合彩然後破產嘅人都好多丫。你一千萬係中六合彩返嚟，定係由幾十萬投資碌返嚟，係有分別的！

15. 呢個亦係舊文講，「你個牙醫好有錢」，Alternative Path，Possible world嘅問題（https://fbook.cc/3F0j）。

16. 當然，傳統智慧講，賣仔莫摸頭，一摸眼淚流。沽咗嘅嘢唔好再望返幾錢。但我覺得係自欺欺人。你可能諗，佢唔寫封信5年後嚟提醒自己（同埋提老婆）咪好地地。但唔得的，而家資訊咁流通。

17. 我係好欣賞主角可以勇於面對呢件事。睇住股票放早咗，是十分痛苦的，痛苦過蝕錢。但無論如何，要為自己嘅決定負責，做trade log其實都好

18. 都係嗰句，主角既然可以坐到14倍嘅，真係堅揪。有能力嘅，使乜驚？踢波咁，都要講啲運，今屆唔得，下屆嚟過。

19. 但最諷刺嘅係：正係因為主角可以坐到14倍—「我懷疑佢唔係結婚的話應該可以坐到今日」。但，唏，金錢唔係人生唯一嘅東西嘛（雖則係好重要嘅東西），唔通因為咁而唔結婚咩！

20. 拿，送畀大家，張學友嘅《明日世界終結時》（https://ggle.io/3OZl）。「人在相戀時　原是最脆弱時候　無情亦無愛　也許更有利成就」。但唔通唔結婚咩。又，周治平係原唱，但張學友廣東版就比原唱嘅《那一場風花雪月的事》（https://ggle.io/3OZn）。每次唱都打冷震（加埋我啲國語更加冷震），台灣佬啲詞太文藝肉麻了。埃汾對版本係好執著的，對龍馬都係，對龍一都係。

21. 「當然事後睇，其實結婚唔使用成球嘢下話？」

22. 都認真的，你話係bias都好，但識唔少人，股票點都唔會沽晒。例如十手沽五手，或者沽八手，留返少少睇結局。呢啲應該係behavioral bias，但大家都係人，人就梗係有啲嘢。當年60手只沽一半，而家感覺就好唔同了。

23. 但都係強調返，才華先係帶唔走。可惜世界上多數人都冇乜，所以都係搵錢實際啲。舊文寫過，摘錄如下（https://bityl.co/3LTq）。埃汾啲文真係有教育意義，記得訂Patreon（https://bit.ly/31QmYj7）．因為我都冇乜才華。

24. 「才華是最好的安全網：對一般人來說，錢是最好的安全網。但對天才如貝索斯而言，才華才是最好的保障。支持同股不同權的留意：亞馬遜沒有同股不同權架構，而貝索斯持股不過16%——但公司走過高山低谷，仍然沒有人把他轟下台，背後原因當然是大家知道他是唯一靈魂人物。」

（＊）在台灣睇咗台版，擺明催淚之作，啲台妹喊到飛喱啡呢。本人都覺得幾慘情，都有眼濕濕。但我內在嘅仙力都係忍唔住覺得—十六歲開始同陳意涵訓埋一齊咁多年你都唔搞佢，真係絶症死都冇人可憐，上天堂落地獄上帝/閻羅王都話你嘥料呀！又，個編劇應該好憎牙醫。

（＊＊）其實係全智賢

（＊＊＊）呢度講個故事，當年我仲在耆英證券，好似係隻富士康定乜鬼，有一排股價跌。跟嘅係個比較新嘅女分析員，咁啲sales早會問下點解，個女同事話「好似呢排聽話郭台銘結婚，可能有資金需要」。結果真係畀個sales指住嚟笑（不太惡意，亦係教精佢，但都係指住笑）：郭台銘結婚要沽股票？諗真啲都係。後來個女同事亦相當富貴就後話。

———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張一個月已近 500人訂，仲有兩篇免費試睇：https://bit.ly/31QmYj7
——————————

［收費短片第八擊］美國總統大選買股部署

課程資訊:https://homebloggerhk.com/course_detail/?code=CC008

到上link會見到紅色按扭直接購買及觀看
題目:「美國總統大選買股部署」 /cc008

內容:
*美國總統大選買股部署
*美股8月終極一升，然後…
*制裁美國上市中資股，有乜後果？
*蘋果2萬億市值，之後點？。下間2萬億市值係？
*未買記得買返CCO06（下半年選股）同CC007（買金）

本星期內特惠售價: $80
課程編號：CC008
觀看期限：首次播放後一星期及限每影片４次
客服whatsapp: 63832145