《鯉魚有日返江海》

今晚夜闌人靜，明月初升迎賓府，我漫步由網球場改建的私家花園，茉莉清香撲鼻，不禁舉頭慨嘆，人生已經過了大半世，兩年前我已經到了退休年齡，發展局舊同事Rita已經拎住長俸，同老公坐緊郵輪環遊世界，我到底喺度在幹什麼？為誰辛苦為誰忙？七年前我係英國劍橋買咗間鄉村退休別墅，今晚是否也月圓了?

一生辛勞打拼，由灣仔50呎板間房丶過五關斬六將、靠一個小女人之力，以及兩位爵士悉心培養丶爬到呢度七千呎豪宅時，點解今日居然會有一個小記者當面訓斥我 “噚晚你瞓唔瞓得著？”

有冇搞錯，佢咁都知？我聽到她咁問，都打個突! 昨晚的確輾轉反側，連續一個月了。心神恍惚，不是因為元朗嗰單小case，也不是西環有人刑毁，而是我的舊波士David由英國寫左一封長信比我，附檔是最近一個月全世界的報紙頭版。佢真係老懵咗，我有Clipping house服務，怎麼會不知道全世界的風在怎麼吹? 我抄左Trump名言回佢一句 “Fake News!”,我反問佢，點解我做佢AO嗰陣時，呢啲人又唔出聲反抗政府？點解幾十年都冇人要成立獨立調查委員會？難道我連捍衛一個不成立獨立調查委員會的自由也沒有嗎？我已經捍衛呢個自由，足足七個星期，點解佢哋仲唔肯放過我？ 仲有，sorry，那兩隻字我是怎麼也不會講出口的，over my dead body ！

眾人皆醉我獨醒。今日晏晝嗰十幾個各懷鬼胎的男人、爛口女人都離開咗迎賓府，我獨自一個人坐喺孤零零的宴會廳。我忽然諗到，幾百萬市民應該全部都中咗外國勢力嘅集體魔鬼降頭，仲有總商會代表嘅商界丶大律師公會代表嘅法律界丶大學校長代表嘅學術界丶歐盟代表嘅西方世界，佢哋冚嘭唥統統都傻咗，佢哋到而家都唔明白我嘅初心。聽日要搵我個上海裁縫仁哥上來度身，呢排真係輕左十磅，衣帶漸寬終不悔，為香江消得伊人憔悴!

今晚晚餐都食唔落，廚師肥Ken同我講，連送本地蔬菜的屯門有機農場農夫好姐面色也越來越難看。我驚佢地係我嘅三餐中落毒藥，最衰前住戶留低的菜田已經荒蕪，我已經微信給陳書記，叫佢供應一啲新鮮國產蔬菜俾我，點解過咗三小時，佢都唔覆我?

晚餐時我已經罷看任何電視新聞，因為傳媒特別係前線記者，全部都是越來越偏頗的黃絲，睇住都眼冤。晚晚只追大台《包青天再起風雲 》，剛才留意到中國皇帝原來自稱「孤家」，實在是我現在心情最好的描繪! 門口前花園花壇果個Governor House字樣，應該去殖化，寫成「當代女孤家」，哈哈，好名，我真係好叻!

講開花壇，今朝我的司機阿陳望我的眼神也不同咗，一句早晨都冇講! 凌厲嘅眼神中似乎仲有啲怨氣，我聽花王話阿陳住係元朗，佢個細女在元朗暴力事件中也受傷了。我擔心佢會車住我時故意車毁人亡，而家我決定非必要唔再出街，最衰我又唔識用八達通。諗番轉頭，佢上個星期係車度播城城果隻《到底有誰能告訴我》，應該係度故意潤緊我! 我夠想回到從前囉! 從前我年年考第一、由AO做起，做足廿多個政府不同工作崗位，從來都是政通人和、扶貧安良、受盡讚賞、青雲直上! 時光流走不再來，Those were the days!

唉，我一心為民服務，到底做錯了什麼？星期日本安息日，鑊鑊新鮮鑊鑊金。一生練得好功夫，時不利兮騅不逝!
我哋港大社工系同學有一個WhatsApp群組，已經有個幾月冇人發任何訊息了。白襪仔不理世事，佢前日都讚我六月份「慈母教子論」有先見之明，原來上星期六仲有另外一個「慈父藤條膠喉論」完善左我嘅教仔理論，真係講得好! 我地舟山人有句俗語「黃金條子下出好人」,我阿媽以前成日用藤條打我個唔聽話的細佬阿光，都係為咗佢好，唔係個衰仔邊入到大學架! 我係劍橋間小屋都收埋咗阿媽嗰支藤條，諗住送比Jeremy，將來用來教孫仔，不知幾好用! 可憐天下父母心，吾道不孤！

係喔，我明年應該頒番一個水蓋比慈父，mark低先，咦，個慈父叫咩名? 前日白襪仔好似講過佢個名，我又一時諗唔起。困係度已經七個星期，直情係唔人道的house arrest(屋企軟禁)，記憶越來越差，再咁落去，諗諗下，我真係會變思覺失調、老人痴呆症!!

聽Dr Yim講，大腦多運動，一生不痴呆，呢排比較無聊，我開始了新創作!!

大型歷史劇《鯉魚有日返江海》(暫名)

第一章「送殯大典破紀錄」
第二章「六月飛霜匹夫憤」
第三章「喪家之犬吠聲影」
第四章「諸葛亮獻空城計」
第五章「黑白無間道非道」
第六章「欲擒故縱逸待勞」
第七章「猛鬼亂窜七月半」
第八章「月圓娥奔賀中秋」
第九章「偷樑換柱苦肉計」
第十章「古稀慶生銅雀台」
第十一章「十八面埋伏葬英雄」
第十二章「華容道後笑是何人」

高潮迭起、精彩紛飛、角色立體、場面盛大、峰迴路轉、收視爆燈。今早已經寫到第五章, 我都幾有信心應該問鼎明年奧斯卡(我唔恨攞香港金像獎)最佳劇本, 風物長宜放眼量!

萬福瑪利亞，保佑女孤家!

我們的天父，拯救伯爺婆!

因父，及子，及聖神之名，亞孟!

(待續)

*以上創作，完全杜撰，如有雷同，純屬巧合。