*嚴禁劇透* *粗口自行過濾* *可瘋狂話戲屎但免人身攻擊* [1230隔夜超短劇評][無綫][宮心計2 深宮計 EP07] [讚] 係潔儀姐姐呀!!! 原來畀太平囚禁喺回心院嘅舌婦吳翠瑩係袁潔儀，我避開晒啲劇透，上一集佢出現至到今次上殿拆開幪眼白巾之前，我都認唔到係佢。唔係話對潔儀姐姐唔熟悉，而係佢連把聲都扮到筋疲力竭受盡折磨咁，所以認唔出係佢，真係好勁。到今集佢對住元玥講起殷瑈仲有自己妹妹嗰時嘅溫柔平和，講自己要返回心院唔係屋企人會有事時嘅激動，到殿上以為自己屋企人已經死晒發晒癲咁指證太平公主，再到最後太子妃話佢知屋企人未死而太平公主又話一早已經殺死晒屋企人嗰種由悲轉喜再轉悲，真係不得了，畀晒位佢發揮，潔儀姐姐亦都做到晒。做盲人唔可以用眼神去做戲，潔儀姐姐靠把聲同表情仲有動作搭救，成功喺今集力壓所有人。 太子妃同埋太平公主嘅仇怨愈積愈深，希望可以快啲有嘢睇啦。太子妃喺宮人失蹤事件上面放過尚宮局，依家尚宮局欠太子妃一個人情，希望之後可以多加利用尚宮局嘅人對付太平。太平真係好惡毒呀，唔認同佢嘅做法就一定啦，但係佢有死老公呢個咁強力嘅怨念，真係乜都做得出，乜嘢奇怪嘅折磨人哋橋段都合理晒。 另外，今集終於都係得返幾句押韻，終於都唔係「有太平嘅係《深宮計》，有若芊嘅係《公主嫁到》」喇~~ 小青姐話押韻呢個設計係畀尚宮以下嘅級別，係有清晰嘅劃分，要嚟緩和緊張氣氛。我自己就覺得唔關個階級事，而係個時機同埋多少嘅問題。如果做得氣氛啱嘅話，其實太子同太子妃打情罵俏時有一兩句押韻都無妨。問題係依家有好多情況一放押韻落去就破壞氣氛，如果係為咗氣氛輕鬆啲，真係做得到，仲做到好盡，破壞晒成套劇嘅氣氛，觀眾投入咗落去又畀啲押韻抽返出嚟，睇到好痛苦。 [彈] 吳翠瑩呢段演得非常高分，但最大問題係點解一個毒舌婦唔係畀人勾脷筋，而係畀人整盲呢？都用得家人要脅佢啦，完全唔使驚佢會搵路逃走喎，點解要整盲佢？如果真係怕佢走，點解唔係做太平公主成日講嘅人彘呢？最後又畀個吐血搞到好鬼老套，死咪死囉，仲要講到出口話佢已經氣絕，咁使鬼吐血咩……另外，睇咗咁多集，都仲未明白點解何離有任務在身都要搞兒女私情，更加唔明係佢幾時鍾意咗元玥？一日唔話我知點解，何離為元玥做嘅任何事我都覺得古古怪怪，投入唔到。 已經唔見咗幾集嘅碎剪，今集喺秦槐去對付吳翠瑩再向太平公主匯報唔見咗人嘅時候又出現返。呢個係咪剪接風格嚟？但係我個人就唔buy，剪剪剪，剪斷晒啲戲味。用喺啲演技未夠嘅演員身上就話可以救佢一命，但用喺啲有演技嘅演員身上，簡直係浪費佢哋啲戲呀。你試吓第一集一刀都唔剪，等米雪姐一鏡落咁發揮呀，一定好過依家聞名江湖嘅「40秒31刀」。 [演員表] 馬浚偉 飾 李隆基 / 胡定欣 飾王蓁 / 陳煒 飾 太平公主 / 馬國明 飾 任三恕 / 蕭正楠 飾 何離 / 劉心悠 飾 元玥 / 黃心頴 飾 甘若芊 / 謝雪心 飾 章瓊香 / 張慧儀 飾 陸碧雲 / 羅霖 飾 徐相思 / 張文慈 飾 汪敏 / 康華 飾 南宮琹 / 韋家雄 飾 成恭 / 李美慧 飾 秦槐 / 賴慰玲 飾 姚思源 / 李天翔 飾 李成器 / 陸詩韻 飾 元倩瑜 / 李龍基 飾 李旦 / 張達倫 飾 薛紹 / 曾偉權 飾 武攸暨 / 袁潔儀 飾 吳翠瑩 #1230隔夜超短劇評 #無綫 #TVB #宮心計2深宮計 #深宮計 #馬浚偉 #胡定欣 #陳煒 #馬國明 #蕭正楠 #劉心悠 #黃心頴 #謝雪心 #張慧儀 #羅霖 #張文慈 #康華 #韋家雄 #李美慧 #賴慰玲 #李天翔 #陸詩韻 #李龍基 #張達倫 #曾偉權 #袁潔儀