【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21261-Q21280）

Q21261：

龔Sir, 請問銀娛現價PB 4倍，金沙PB 10以上，Why PB so different ?

龔成老師：

記住，當我地計算企業價值時，要同時考慮企業的業務價值及資產價值，這是配合的。由於企業是永續經營，不打算這刻清算，因此投資者一般會著重業務價值多過資產價值。

有兩點你要注意，第一，市賬率是衡量企業資產價值的方法，但你要了解翻佢的資產價值是否有具體呈現在資產負債表，簡單來說，就是報表上的價值，是否能具體向映該資產的真正價值，這樣去衡量賬面值的代表性。

第二，市場估值時，可能是否考慮業務價值多過資產價值，甚至有些企業，市場不理會資產價值，因此，你要了解翻這企業過往賬面值的情況，市場如何定義價格與賬面值之間的關係，從而推算該賬面值是否有參考價值。

------------------------------------------------

Q21262：

老師，我係你學生，我現在想問下

1. 如何判斷那隻股是增長型?

2 增長型及龍頭 PE 就可調高至25-30?

3. 目前在分柝一些光伏板塊嘅公司 eg 福萊特玻璃
及隆基

我覺呢兩家也是增長型 可以給 30- 40 PE 嗎？

龔成老師：

1）要睇佢身處的行業，現時的業務情況，發展，以及過往財務數據，例如過往生意的增長力如何，預期將來的銷售怎樣。

2）的確可以調高，但未必有一個好實在的數，因為估值對每一個行業來講，其實都不同的。

3）隆基泰和智慧能源（1281）質素較普通，投資價值未算高，盈利變數大。所以，在估值上，都不會比太高。

至於福萊特玻璃（6865）有質素。你可以比高少少市盈率佢，但就未必值得去到40倍市盈率。

佢主要在中國生產及銷售光伏玻璃，此外，亦生產及銷售浮法玻璃、家居玻璃及工程玻璃，並向中國大陸、日本、新加坡、韓國、台灣、德國及美國等地客戶，銷售產品。

睇翻佢的資料，佢的光伏玻璃產品主要用於生產晶體硅光伏電池，以及用作薄膜光伏電池的蓋板，而佢的生產設施位於浙江省嘉興市。

無論生意與盈利都增長理想，財務數據正面，這股值得長線投資。唯一擔心的就是估值問題，始終現價唔算平，近期股價有時在合理區頂，有時略貴。如果投資，可以小注慢慢分注，不建議這刻大注。

------------------------------------------------

Q21263：

Hello 成哥 如果而家2238廣汽集團同吉利汽車等嘅車股比較 算唔算係比較值博嘅一隻？

我見佢都有電動車業務 但係股價跌到好殘

如果而家要揀一隻值博又有發展電動車嘅傳統汽車股 會唔會有比2238同埋175更好嘅選擇？

因為覺得經濟好返傳統汽車行業都會逐漸回暖

龔成老師：

廣汽集團（2238）本身都有質素的。

佢係中國汽車製造商之一，主要業務包括製造及銷售乘用車、商用車、發動機及汽車零部件，亦從事一系列汽車相關服務及其他業務。

佢透過共同控制實體廣汽豐田及廣汽本田生產多個系列的乘用車。

業務發展不過不失，但增長力就不算強。

長遠仍有發展，但不是高增長型。現價合理。

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

如果講長遠發展，吉利會較好。

------------------------------------------------

Q21264：

你好，老師，仲有問題想請教你！

好耐之前家人幫我以67.5入過1200股匯豐，一直以收息為主，其後跌市，有再入1200股，現在成本價56.1，應該持有定賣出一部份擺入其他股？

之前亦有月供$2000中銀香港，現已停供，現持有845股，成本價是28.614應繼續月供定持有？

如果我有5000蚊用作投資，我應該如何分配資金？以平穩增長股為主？定係可以考慮一些潛力股？感謝

龔成老師：

匯控（0005）賺錢能力與增長力比過往年代弱左，但又未去到完全無質素。銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

相信長遠是收息股，但股價增長就有限。

這股都有投資價值的，但就未必值得佔組合比例太多，同時明白佢是收息股，增長力有限。。

如果你投資目標是收息，可持有。如果你希望有較高的增長，就應該在匯豐股價上多少少時，轉其他。

另外，你持有中銀（2388），這會令你的組合太過集中在銀行業。

其實，我地最重要是建立一個組合，要平衡，要優質，同一行業不要多過30%，同一隻股票不要多過15%，你長遠要平衡翻。

至於每月$5000，就要睇你的年齡及風險度，最簡單就是投資優質，平穩增長股。

你可以考慮盈富（2800）。

另外再加：銀娛（0027）、恆基（0012）、港鐵（0066）、中銀香港（2388）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21265：

我想問，你成日叫長線，但假如我一直持股唔放咪冇賺囉？？

龔成老師：

你有「賺錢」的思維，反映你與98%的散戶想法一樣。

你追求實在的現金，認為要賣出賺到現金，才是賺錢，但我地最重要是講求「財富最大化」。

當一隻股票上升，例如你買入價$10，現價$15，賣出可以賺$5。

但當你套現$15後，你怎樣將這個「$15」再次增值，令你的財富增長，比留在原有股，得到更大的回報？

如果原在的股票是優質股，即是我地持有優質企業，當你一直持有這股，企業長期價值向上，就會帶動我地的財富有最大增長。

簡單來說，我地是從「財富長遠最大化」的角度去想。

可能你會問，一直不賣，那麼永遠無法取出財富。

我地累積財富，會用「先增值，後現金流」作策略，前者著重增值，之後就會改變策略，將已增值了的資產，轉為現金流類別，而我地就是不斷享受資產產生的現金流。

------------------------------------------------

Q21266：

龔成老師：感謝你既回覆，另外想問多少少，小朋友有無話幾多歲學投資好啲？

同埋用咩方法去慢慢教佢理財知識好啲？因為你成日都講理財知識越早學越好

龔成老師：

我相信7-10歲，都可以有基本的理財概念，例如錢從何來（起碼要佢知道，錢是由父母努力工作得來），另外就是量入為出，以及儲蓄的概念。

在適當年齡你可以比零用錢，這是一個理財的訓練，同時慢慢由每日比，轉為一星期，甚至一個月，等佢自己分配。

你可以玩「大富翁」之類的遊戲，都是一個學習過程。我記得《富爸爸》這書的作者，有出過「現金流」遊戲，有兒童版的，你可上網找找。

------------------------------------------------

Q21267：

您好，龔成老師，我係19年5月股票班同學，最近睇完您本書 五年買樓四部曲，想同太太買一層細價樓，請教一下您既意見。

而家我本身有一層自住樓，同太太加埋現金一百五十萬，想係灣仔買樓，因為老師既書都有講過星街、堅彌地街都較好

而且近商業區，人口密度低，有名校網，區內供應預小，我預算550萬至600萬左右，老師您認為買灣仔舊樓收住租搏收購好定係買30年左右既相對新樓有流動性好？

而家我自住樓係我自己名下自己供，睇完老師既書，開頭集中睇堅尼地城、黃竹坑、大圍、九龍城，但堅尼地城好似嘉輝花園咁租金回報相對低2里都做唔到

黃竹坑買唔起，大圍冇咩樓盤都係金獅花園無咩選擇，一係就補地價居屋，感覺上唔係私樓升值潛力又差小小

灣仔區黎緊有會展站，學您教的方法，去左城規會度睇，告士打道以南莊士敦道以北全部係商業用地，地積比去到15倍，咁樣我推輪呢度既地價會唔同，所以想係灣仔區置業。

猶豫緊600萬內預算，買舊樓搏收購好，還是買30年內200尺以上既樓保持流動性好？謝謝老師！

龔成老師：

由於你本身有自住樓，因此現時的作用是投資，最好是建立一個平衡組合，即是你買完樓後，最好仍有一定的現金，以及其他資產剩。

至於灣仔區，有質素的，你可考慮。

我會建議你買30年左右既相對新樓有流動性較好。舊樓博收購，始終成功率不高，因為全港超過50年的舊樓有5000幢以上，要成功被收購並不易，而這段時間往往要支付維修費等，因此值博率並不高。

至於其他地區，你可以留意一些細少少，樓齡不太新的樓，睇下有無一些目標範圍。

其實，灣仔不差的，都可以留意，只是我書無特別講，但整體唔差，你可以細心發掘。

------------------------------------------------

Q21268：

老師，如果我在嘉里派特別息之後賣嘉里轉港燈是否可行？港燈現在會不會特別貴？

謝謝老師指點

定是由得他，放嘉里在度？
嘉里建設（636）

龔成老師：

兩隻股的性質有點不同，唔好貪特別股息，因為佢派息後會除淨，股價會自然調整的，所以不一定有著數。

嘉里增長力都有，但港燈（2638）就只是收息，所以，要睇翻你的投資目標。

嘉里物流（0636）這股不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

------------------------------------------------

Q21269：

阿Sir，請問吓你以下一條問題，希望你可以回答給我明燈。 方間有許多股評人及平台都教人或講有人因着股市波動而買期權。

所以想問阿sir, 你認為期權可以投資嗎？
唔該阿sir.

是不是不接觸為妙！

龔成老師：

我自己會有少少保留，因為我20年前，都有玩不同的衍生工具，但最都是虧損，之後集中正股長線投資，就贏錢。

當然，一定有人投資期權贏錢的，但我過往做銀行及證券行多年，觀察散戶的投資成績，玩衍生工具的，大多是輸錢。

------------------------------------------------

Q21270：

龔老師你好，我想請教一下，我有2隻股票，分別是3868/$6.18買入及6606/$76.3買入，想問下這2隻股票前景如何，要止蝕嗎？謝謝

龔成老師：

信義能源（3868）有質素，佢主要於中國經營太陽能發電場業務，並向國家電網的當地附屬公司銷售電力。而佢派息高的，因為管理層話會用高派息政策。

投資價值都有，但不能投資太多，因為佢業務都有風險的，要注意股價波動，如分注長線都可以投資。現價已略貴。

這股前景不差，你持有就得，但預佢股價較波動。

諾輝健康（6606）業務有發展，但之前貴。

佢係中國結直腸癌篩查市場的先行者，旨在推進技術創新，並加快癌症篩查技術於中國的採用。

根據報告，其專有的非侵入性多靶點FIT-DNA測試－常衛清為中國首個且唯一獲國家藥監局批准的分子癌症篩查測試。

佢的兩大家居結直腸癌篩查測試產品，常衛清及噗噗管協同面向不同風險程度的目標人群。

「常衛清」有一定的護城河，可避免施行一些具有侵入性的手術，就能得到一些結果，長遠有一定的發展。潛力度存在。

佢已於全球包括中國境外的17個國家或地區，建立包含71個專利及專利申請的組合。通過直接銷售渠道包括醫院、體檢中心、保險公司、藥房及網上渠道向終端用戶提供產品，亦在較少情況下通過分銷商提供產品。

發展潛力都有，但始終業務未算完整，未有盈利，因此風險都存在，這類股小注投資好了。

------------------------------------------------

Q21271：

想請問而家中國銀行(3988)

而家仲抵唔抵買，現時$2.96。月供緊2手，諗住賺下股息，現時價位會否太高?

龔成老師︰

中行（3988）由於內地經濟無過往年代咁強，股價無過往咁好，由中美貿易戰開始，中國的經濟動力已有所減少，加上最近的疫情，都是影響經濟的因素。不過，初步已好轉，但不是高增長型。

現價合理區中間，唔話係好高，依然係有投資價值。用此股收息係合適，但就唔好對股價有太大期望。

另外，我地最重要是建立一個長期的「財富組合」，要優質，要平衡。同一行業不能太多，同一股不能太多。

所以，若你係以收息作為目標。你可以投資多幾隻不同類型的收息股，令你組合更豐富，和平衡性更高。

以下都係一些有質素的收息股，供你參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)。

------------------------------------------------

Q21272：

老師你好！留意了你的教學很久了，但第一次鼓起勇氣寫信給你，希望真向你請教投資的心得和方法。

本人28歲，已婚，我月入3萬，老公大約工資2-3萬，供樓大約1萬5千蚊，減洗費後大約能每月儲蓄2萬5左右，並準備迎接小孩出生。

現有儲蓄約70萬，並擁有以下股票：

11 - 200股，$162 (在2019年已買入)
1211 - 500股 ，$270(當時高位入但沒走貨亦未分注)
9988 - 100股，$253

請問老師我應如何做好我的資產管理和投資策略？

龔成老師︰

我地投資策略其實好簡單，主要係因應你現時人生階段和投資取態，去建立一個平衡的財富組合。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你28歲，應以增值為先，建議你用「平穏增長股」 + 「潛力股」的組合。

由於「潛力股」係需要一定經驗，如果你經驗較淺，可以先小注，大約3成左右。若你係有一定經驗，你可以投資到約5成比重。

現有持股方面，無大問題。雖然比亞迪(1211)係買貴左，但由於佢優質，你連同阿里巴巴(9988)、恆生(0011)一齊長線持有就得。

而你快將迎接新生命，相信會有不少小朋友方面的開支。所以，你係開始投資計劃前，最好先儲起約半年開支和小朋友出世前後的相關洗費，以後備不時之需，咁會較為穏當。

現在你每月先用$13,000做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

大市現處於合理水平，股票和現金最好各佔一半。你可以睇下70萬資金，扣除半年開支和小朋友支出後的比例。若現金佔依然高於一半，你可以再以"分注"形式，入多少少貨。

餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q21273：

老師你好，我$15.7買入968, 請問應該長渣還是搵機會放?

另外老師認為939和9888值得長線持有嗎?

如果有100萬存款, 股票比例30萬ok嗎？謝謝回應

龔成老師︰

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

你買價係略貴，但又唔係追貴好多。而且畢竟佢係有質素，你長線持有就可以。但你要預這股股價上落較大，故不宜佔比重太高。

若此股現時已佔你比重較多，你最好沽少少，去平衡翻個風險。

建行（0939）本身質素不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，你唔好對股價有太大期望。

前景不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。不過，初步已好轉，但你預此股不是高增長型。

至於百度（9888），佢係有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

業務上，佢擁有好強大互聯網基礎的領先AI公司。自2010年起一直投資AI以提升搜索及變現能力，並使用核心AI技術引擎「百度大腦」開發新AI業務。

我睇翻一些報告：

1. 佢擁有中國最多的AI專利數量以及AI專利申請數量。

2. 按累計拉取請求計，百度的深度學習框架飛槳居中國深度學習框架榜首，全球排名第二，僅次於Facebook Pytorch。

3. 按開發者數目計，百度開放式AI平台擁有超過數百萬名開發者，係中國最大的開放式AI平台。

4.按開發者數目計，係百度雲基礎設施上運行的Baidu OSChina是中國最大的開源活動開發平台，全球排名第三。

百度核心業務（唔包括愛奇藝）由AI驅動，為其貢獻超過70%的總收入，主要提供基於搜索、信息流及其他在線營銷服務，以及來自AI新領域的產品及服務。

並廣泛使用AI技術開發創新營銷服務（例如動態廣告），為各搜索用戶推薦最適合的營銷客戶產品。

現時佢坐擁不少資訊和客戶群，就可以利用佢地去發展很多不同業務，可以話係一個好大的優勢。佢收入不差，長遠有發展，但由於本身有相當規模，因此，未必是高速增長型。

百度在規模和質素上，一定係有。但近期科網股波動，風險高左，同時到上市一刻不確定性高左。

此股都係有質素，你現貨可長線持有。

現時大市只係合理水平，現金和股票最好各佔一半。如果你有$100萬存款，你可以多用20萬，以分注形式，去投資一些優質股。而餘下50萬資金，我地就等大跌市出現，才加大力度掃貨。

但緊記，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。重點係要平衡，唔好集中晒係2,3隻股票身上。

------------------------------------------------

Q21274：

老師你好，我打算購買元朗尚悅嶺370尺單位作投資用途，因家人先前買入，但移民了，想轉俾我，等我供。

我依家係同老公租緊屋住，因為元朗不方便返工，所以不打算用作自住。

但擔心元朗地區升值潛力低，如資金用作其他用途可能更好。想你俾下意見，唔該曬

龔成老師︰

元朗區始終跟市區有一段距離，所以長線升值能力會較弱。

特別係跟港鐵站較遠地段，會更受影響。睇翻你元朗尚悅嶺這個樓盤，唔係話無投資價值。但會相對較一般，增長潛力唔會太強。

你可以先比較翻租金回報率，到底吸唔吸引，再作決定。

如果租金回報率唔算係特別吸引，而你本身資金又唔係好多。我建議你先集中用優質股去增值，咁會較好。

------------------------------------------------

Q21275：

龔生你好！一路有留意你講3067同1810

想問吓如果想長期每月入貨，呢兩隻股票邊隻潛力會大啲

龔成老師︰

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，你可以用佢作為月供選擇。

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。

所以有長線持有價值。由於基金有30隻股票，比起單一股票，風險能減低。

此股可以月供，或自行分注小注慢慢收貨（例如每月買一次、或2個月買一次），然後就長線持有。

潛力度和質素，2隻都係有。但安碩恒生科技（3067）係一籃子的科技企業，相對小米(1810)會更能分散投資風險。

但長線我地係要建立一個平衡性架組合，唔可以成個組合，只係得1,2隻股票。

而且，這2隻股票雖然係有質素，但佢地波動性都偏高。因此，若你係較年長，或者係較保守的投資者，這2隻股票就不宜持有太多。

------------------------------------------------

Q21276：

龔成老師，多謝之前的回覆，長話短說，我人已在外地，最終留下一小住宅單位在港，本打算能在外地置業才賣的，但勢估不到香港狀況動蕩至此，租客剛剛完約搬出，由於我一心留在外地發展，加上對香港信心不大，我正考慮應否把樓賣掉（樓價跟買入差不多），所以想請教：

1） 對自己此決定有懷疑，此時賣出是不是明智決定？
2） 另外，萬一真的賣出了，又不想現金儲放在銀行，以致可以於3-5年後可在外地置業，有可建議？外地的投資理論差不多吧？

非常感激，能傾談此topic的朋友不多，你的建議對我很有幫助！

3）我有推介朋友參加你的投資班，會否考慮推出網上版？

龔成老師：

1）不如我講少少香港樓市分析，你自己衡量現時決定是否正確。香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

2）賣樓後，如果你已對外國樓有認識，加上租金回報率不差，其實已可投資外國樓。

另外，你可以投資一些流動性較強的項目，例如外國的ETF（如美股VOO、QQQ），而香港ETF，如2800、3110、3067都得。

另外，可以考慮投資收息股，因為股價變動相對較少，對你的情況都幾適合，你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

3）我最近同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q21277：

成老師你好呀，我現年22歲，月入21k，我學習價值投資開始了大約9月開始月供11k股票直至現時，月供包括(均價)：

2800($26.9)
0066($41.9)
0002($73.1)
0027($60.1)
2013($13.5)
0981($21.2)
9988($237.4)

另外曾一手買入9988($227.8)一手，0981($20.2)一手，0823($58.4)，一手。

我想問一問我的投資組合風險會唔會唔太適合我這個年齡？

這個月供組合會唔會太保守是否需要作出轉換？
是否需要加大月供額？

我亦有儲現金作一手低位買入，如果需要買會唔會有一些建議？

我亦想好好把握黃金10年做好投資將現金轉換成資產。
應謝回覆

龔成老師：

現時月供的股票，都有質素的，基本上可以持續，長期進行。但要留意，微盟集團（2013）、中芯國際（0981）的風險較高，因此月供金額不建議太大。

其他就無問題。

至於現時持有的3股，可長線持有。

基本上，現時的月供組合，可長期進行，如果日後有較多資金，可以投入更多在月供，你可以考慮加入恆生科指（3067），$2000月供。

因為你22歲，可以承受一定的風險，所以應調高組合的潛力度。

另外，當然要同時留現金，你可以等一些潛力股下跌時出手，如小米（1810）、中生（1177）、舜宇光學（2382）。

加油！要好好把握黃金10年！

------------------------------------------------

Q21278：

龔成老師您好，我是您的忠實讀者，住澳門，香港人，今天已40年歲。首先想多謝龔老師的無私建議及幫助，知道老師每天收到大量來信，需要每天花上數小時解答，希望老師繼續努力，並祝身體安康。

自上年疫情開始，有幸在網路認識老師及您的著作，基本上有關老師所寫的股票書籍都已經閱畢， 亦由上年年中在香港某銀行開始月供股票如下：

2800 盈富基金
0823 領展
1038 長建
0669 創科實業
0066 港鐵
1211 比亞迪
9988 阿里爸爸

現在每月月供約16000。盈富佔供款比例稍多，其他都平均供款，現在談成績真的太早，但帳面上已經賺回買書錢有餘，高見有20%，現在回落至8%左右

但我很清楚長期持有不需要理會股價波幅，只想告訴老師所寫的是可行的，亦明白價值投資，持續購買並長期持有優質股的威力。期待龔老師的新作，定必拜讀，努力增強財商。

另想請教老師以下我的邏輯有沒有問題：

本人在澳門手持一自住物業，可轉按減輕利息同時套現約140萬，每月新供款額佔月薪約23%（原按揭供款佔約21%）。

打算利用這筆錢同時努力儲錢作進一步資產配置，希望10年後能財務自由，但供款年期又變回25年（原按揭尚有15年），總利息加行政費約需要110萬。

我想問利用現在低息環境套現，以現在的現金購買優質資產並長期持有，用未來貶值的現金償還。因為是長期，縱然新按揭還息還本比例又重設，但此計似乎可行。我的想法有錯嗎？

明白必須購買優質資產，先增值後現金流，並定期檢視資產情況，多多學習才能實現。月供是因為我尚未能掌握估值，希望日後老師能來澳開班，定必報讀。

謝謝老師的時間及幫助。感激萬分。

龔成老師：

現時你月供的，可以保持，長期進行就得，這些都是有質素的股票，同時處於一個平衡狀態，而適合你的年齡的，當然，你同時都要留一定的現金在手。

對，我地一定要長線的，不要著重短期價格因素，集中長期的財富累積。

至於轉按方面，由於可減輕利息，因此值得做。而之後只是佔月薪23%，這數目不高，因此可以做。

至於套現了$140萬，其實原理是增加了負債，這點你要明白。如果增加負債後，仍是佔你總資產的比例數不高，就無問題，同時你要明白風險度會高左。

至於現時低息環境，你的方向是正確，因為利用低息資金，投資得到較高回報，能有效創富，不過，你都要同時留意風險度，因為現時的投資市場，並不是特別平，因此在時機上，只是中等。

最好當然在「有明顯投資機會，利用借貸投資，就能創造最大效果」。

因此，你的大方向正確，因時機只是中等，所以就算套現後，都只建議部分投資，餘下等機會。

------------------------------------------------

Q21279：

龔sir你好! 我係你舊生, 遲啲都會上你的進階班。上咗你嘅課堂之後, 都有做月供股票 和 買入優質股, 現賬面都有15%的回報, 個別股票更升80%, 感謝你!

我剛買了綠置居(我名下) 並於2022年收樓, 我月入40K, 一個人做按揭, 每月大概供$9000。

由於現在大約有$70萬現金和$70萬股票, 所以想為太太置業 並預算購買約500萬的物業。她薪金大約45k, 並預計只有她做按揭。

Plan A: 買市區舊樓, 近地鐵站, 約250呎, 35-40年樓齡

Plan B: 買荃灣舊樓, 行10鐘到地鐵站, 約330呎, 35-40年樓齡

Plan C: 暫不買樓, 繼續月供股票 和 儲錢。伺機再為太太買樓。希望龔Sir賜教, 感謝回覆

龔成老師：

現時你的供款水平不算高，因此，就算太太置業，都可以考慮的，但你地要明白，這動作會令你地的財富較集中在物業，同時負債增加左。不是不可進行，但就要明白這風險。

Plan C，在這刻是較好的，因為當你地這刻買樓後，其實要用了不少的現金及股票。不過，如果你地大方向好想買樓，Plan B其實可以考慮，只是在這刻進行，還是過1、2年，等你地有更多資金才進行。

荃灣這地區都不差的，是市區與新界西的重要通道，配套發展成熟，如果日後發展大嶼山，這地區都能受惠。

因此，Plan B在大方向可以進行，只是在時機上，睇下你地有幾想這刻進行，還是等多1、2年進行。

------------------------------------------------

Q21280：

Hi 龔成，我係做股票經紀買賣的、想請教下你意見麻煩晒

我之前係做髮型師，而家立心想轉型去做投資股票工作，之前係光大證券。由於學歷不高，所以我不停努力去進修英文，同去HKU讀左Finance。

跟住考保險和證監牌，我自已本身都好鐘意投資。

睇股票市場，好似上一年，幫客人投資，自已每個月都會有一份收入。但當時況不佳，就算我唔理會輸錢個部份，分分鐘會變成零收入。

龔成老師︰

做股票經紀這工作，收入的確有一定波動性。其實就同好多銷售行業一樣，當市道唔好，無人買野，自然佣金會減少，令收入出現下跌問題，這是無可避避免的。

但我地決定一份工作是否合適，除了睇自已興趣和意願。更重要的，是用長期角度分析，你到底想5年後、10年後，你想收入如何？身價如何？生活如何?工作如何？

當你有左長期的設定，你這一刻就要想。現時這個工作，是否可以達至你的目的。而這個問題答案，只有你自已才會最清楚。

見你過往，都為這份工作，付出不少努力。

你可以睇翻如果證券工作真係適合你，你就要找方法解決你當下所擔心的問題。例如經濟環境差時，要找其他兼職，去平衡個收入。或者做些小生意，令自已多個現金來源等。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21121-Q21140）

Q21121：

老師，我上了四堂也明白你講解的，但返到屋企總有點記不起。再睇筆記時又好像似曾講，但印象不深，要多看幾次。

點樣可以加快學習？

龔成老師：

你最好落堂後或第二日，立刻溫習一次，因為這刻記憶最好，你可以好有效將所學的知識整理。

當一直溫書時，就要同時用筆計數、寫重點等，不斷這樣溫習，到明白後，就要應用，在市場上找一些股票，做分析，這樣會有更大的進步。

保持溫書、做功課、實戰分析企業。

------------------------------------------------

Q21122：

hello
龔sir
我想問

3738
2013

現價可以入嗎？

龔成老師︰

阜博集團（3738）是較高風險類。

業務是線上視頻內容保護服務供應商，客戶包括七大全球電影公司、電視網絡公司及其他內容擁有者。

過往一直虧損，近年開始有錢賺，業務增長加快，不過，本身的獨特性不是好強，規模未算好大，因此，未見佢有好確定的優勢。

潛力度有的，不過就存有較有不確定性，這類股只適合小注投資。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這次中期虧損大部份來自"可換股債券的公平值變動"，簡單咁講，唔係佢業務上出左大問題。

長遠業務上係有一定潛力，但盈利和股價上佢都幾波動。你現時投資係可以，但同樣只可以小注。

------------------------------------------------

Q21123：

龔成老師，您好!本人四十多歲，最近半年才開始接觸股票，也開始閱讀關於您的書籍，現有兩隻股票想
問您的意見!

近排見股價回落了，以26.35入咗兩手175吉利汽車及以237.3入咗兩手9988阿里爸爸，但係買入

之後股價一真跌，尤其吉利越跌越多，而阿里爸爸也好像沒有回升反彈的勢，本人有留意你提

及過這兩隻股票都係有質素及適合長期持有的，但以我的買入價，請問我是否應該止蝕定還是，可以長期持有呢？

望請教，謝謝!

龔成老師︰

先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

阿里(9988)和吉利(0175)都有質素，只是你買入價略貴，現在股價只是回調至較合理水平。

佢地發展潛力係有，你照長線持有就可以。

------------------------------------------------

Q21124：

老師你好！睇完你書中介紹，我想問下有關788前景：

1. 上網見到有人分析話因為三大電訊商係中國鐵塔大股東，令到鐵塔公司失去議價能力

三大為左降低成本，佢地都會傾向維持支付低租金，呢個現象會否令塔類/室分業務收益增長有限？

2. 根據在2020年報，跨行業業務及新能源經營業務增長比較強勁，請問呢兩類業務發展空間是否很大，有無望發展成為其中一個收益主力？

3. Starlink開始進入試用階段，如未來幾年後發展完善，會否直接影響鐵塔收入？

我天真咁諗中國未必會比呢項技術用係中國......中國境內現有網絡用家比較細機會投入較大資金
使用類似starlink 既服務。

謝謝。現在平均價在1.22

龔成老師︰

1) 有機會，但畢竟佢有壟斷優勢。中國的3大電訊巨頭作為大股東，令到佢可以更受惠於5G發展，整體前景仍然正面。

因此，佢會賺到合理而不過多的利潤，投資價值有，但不是高增長類。

2) 這2個部份，的確有發展空間，不過見佢之前的數務數據，暫時比例唔算好大。但現時佢地佔集團收入好少，中短期內相信變成主力機會唔大。

3) 這個新技術會否在中國應用，中國本身會否發展這技術，暫時無人預計到。

其實這刻仍充滿未知數，根本好難話成唔成功。另外，中國鐵塔的母公司係中國的電訊，最終控股是中國政府，以這個角度分析，中國政府應該唔會比外資對中國的電訊行業有核心性的影響。

但此刻，中國鐵塔(0788)在整體條件上，依然係有投資價值。不過，潛力度比過往略減。如這刻買入，分注入係可以的。

------------------------------------------------

Q21125：

老師你好！多謝你無私力推比亞迪，令我同先生資產增值咗三倍！雖然數目都唔係多，但我哋早年唔多儲錢，
而家已經係一個好開始。

我32 歲，先生35 歲，有一個bb，自住未補地價公屋（家人名）

1. 我和先生有現金$170000，合計家庭收入$40000，扣除供養兩邊父母、工人人工、日常開支，每月只餘下$10000，現儲$5000，月供股票$5000，比例合適嗎？

2. 先生為自僱人士沒有公司保險，三人保險合計約$45000 一年，會否太多？

3. 現只有2800（ 3788股 $26@ ）及 1211 （527股 $44@）如果以一百萬為目標，應該再月供2800
還是3067？還是其他股？以我哋情況可再月供潛力股嗎？

4. 手上有約$150000 結婚金器，先保留還是換成現金再分段購入股票？

5. 長輩還有另一間自住的公屋，現在$1300 租金，售價為60 萬，三十年樓齡，應該買還是儲錢買私樓？

謝謝老師！

龔成老師︰

比亞迪（1211）有質素的，你可長線，一直持有就得，我都仍然持有。

1) 大市現在合理水平，這月供比例正確。

2) 算差不多，大前提係只需要買基本保障，儲蓄/增值成份係唔需要。

3) 你可以一半供盈富，一半供3067，已經是一個平衡組合，當然，同時要加上其他股作配置，以你年紀應用"平穏增長股"和"潛力股"作為組合，大約各一半。你先用每月5成儲蓄做月供，其餘先儲起，用一邊月供一邊儲蓄的策略。

現時大市只是合理區，你現有17萬和每月所儲倒的資金，就等大市出現一定程度的下跌，才大力度掃貨，然後長線投資。

以恆指過去年平均回報10%計(連股息再投資)，你每月投資$10000 + 35萬資產(現金+持股)，5年後大約會增值至120萬，故這樣安排相信很大機會達至5年100萬的目標。

4) 黃金主要係用來對沖突發性金融事件，佢唔會產生現金流，所以佔組合3%就好了。但由於係"結婚金器"，除了本身黃金價值外，也會其他額外意義，故你可以自行衡量。

5) 如果本身資金不多，買該公屋是一個不差的選擇。但如果你長遠用「投資」角度，其實可先用股票增值，再另覓私樓會都可考慮。

------------------------------------------------

Q21126：

Sir..一直都根據你的價值投資宗旨 慢慢吸納建立了一個組合 當中新舊經濟都有

但近期大市回調不少 希望你給點意見 看看其中有哪些該繼續持有哪些該放出..謝謝

6 電能實業
12 恒基
14 希慎
16 新地
293 國泰

688 中國海外
823 領展
880 澳博
883 中海油
1211 比亞迪
1299 友邦
1810 小米
1928 金沙

1997 九置
2018 瑞聲
2845 中國電車
6993 藍月亮
8069 縱橫遊
9618 京東
9988 阿里爸爸
9999 網易

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。

只要長線質素無變，中短期波動我地唔需要理會，長線持有就可以。

而我地投資股時，會因應人生階段。年輕時，可以用"平穏增長股" + "潛力股"，到中年"潛力股"比重要減少，到近退休應集中在"收息股"上。

你現時組合太雜亂，要維持10隻以內，會較易管理。

先講質素上，國泰(0293)、縱橫遊控股(8069)投資價值一般，建議你慢慢換至其他優質股。

縱橫遊控股（8069）風險較高。

業務非常波動，過往持續出理虧損，其實投資價值不高，因為佢就算疫情之前，都是虧損的。所以本身質素已唔高。

中海油(0883)質素較中等，而網易(9999-S)有一定波動性，2隻都不宜持有太多。

其餘股票都可以，他們都有增長力，若你係年青至中年人士，係合適。當中電能(0006)主要係收息，增長力會較弱。

最後，就是要留意唔好太集中單一行/企業，相同行業不可佔組合多於3成，而單一企業不要高過15%，否則會有過度集中風險。

我見你名單中有不少地產股，你要留意翻有無這個問題。

------------------------------------------------

Q21127：

現時我持有現金$150萬，到明年，可儲多$20萬。保險$108萬，未來三年需要供$44萬，強積金$52萬。

股票~$100萬，整體蝕緊。跌市前買入175，1211，981，3800。去年買2018，1787。~6年前一直持有

941，992，2628。去年不貪心，赚10幾%就賣左幾萬股992，真後悔! 赚少起碼20萬! 941，500股 $116買，
2628 ，6000股~$31

以现時持有以上組合，怎样部署可穩建每月~$ 12000 -15000收入?

債券利息低，年金，回報也不高，頭7年，不能取回供款。

是否將部分現金，投資收息股? 因現金不能增值
股票組合方面，可長線持有嗎?
謝謝回覆!

看了你的書"80後百萬富翁"，你寫的概念，同我以前看過医生謝其燊寫的"心想事成

秘笈'很相似! 要有正面樂觀態度，利用潛意識等等

龔成老師︰

如果你希望每月有1.5萬蚊現金流，以股息率5%計，你需要本金360萬。

現時你可以先用一些有增長力，股去累積這筆錢，之後再換成收息資產(如收息股、年金等)，咁就可以。

你現時保險類其實有點多，原本持有無問題，但之後就唔需要加得太多，可以將資金集中增值方面。

你現時持股，大體上都可以。但山東黃金（1787）、中芯國際（0981）、保利協鑫能源(3800)和中國人壽(2628)質素中等，但唔建議持有太多。

你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)、希慎(0014)、太古地產(1972)

大市現處於合理水平，那150萬現金，你可以用多30-40萬，以"分注"形式慢慢入貨。餘下部份和每月儲蓄，就等大跌市機會出現，才大力度掃貨，並長線投資。

------------------------------------------------

Q21128：

龔成老師你好，我之前上過你初階班，獲益良多，尤其是宜家大跌市，所有股票都坐艇，但我相信長期持有優質股，就可以度過中短期波動，多謝老師成日係fb 幫我地調整心態。

我呢問老師：

我今年35歲，手頭上有450萬cash, 係預備2022 年8月比柏傲莊首期，呢1年半可以為呢筆

錢做資產增值嗎？放係銀行蝕通脹好浪費，應該如果分配？感謝老師！

龔成老師︰

無錯，只要係優質股，就唔洗理中短期波動，一直持有就可以。

至於買樓資金方面，由於時間太短，最多只可以用部份資金，投資收息股收下息。

但你要明白，就算係收息股，都會有價值波動，有機會得不償失。以下收息股，會相對較穏陣，現價計都有5%、6%的股息率。

收息股︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)。

你最多只可以用一半資金，慢慢分注入儲貨。餘下一半，就最多做定期好了。到動用前半年，就慢慢分注沽出，咁就可以。

------------------------------------------------

Q21129：

龔成老師你好呀，我已經退休沒收入了，之前80元買左好多5號仔

而家想轉去內銀股加中移動好唔好，現價轉是否合理?，請老師指教，

龔成老師︰

退休人士，應以收息資產為主。你投資好似匯控(0005)這樣收息股，透過佢架股息，為你退休生活提供穏定現金流，係可以的。

但問題是，我地唔可以過份集中係個別行業或企業。因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

匯控(0005)你可以維持持有，但要將部份分到其他股票。

目標是5%、6%的股息率的收息股，例如港燈（2638）、深高速（0548）、香港電訊（6823）、中移動(0941)、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

這些收息股現價合理，現時換碼係可以。

------------------------------------------------

Q21130：

老師，我36歲，已婚，未有小朋友 ，每月可儲$10000，最近才開始月供3067，每月5000

有100000應急，手上有2013，4000股，$18.5，有3319，1000，$33.5，有857，10000，$7.2，可以5年後有100萬嗎？

睇了你的書，發生自己儲蓄有甘大問題

龔成老師︰

你現要時每月5成儲蓄做月供，其餘先儲起，用一邊月供一邊儲蓄的策略，係正確的。

但選股上，唔可以完全去晒安碩恒生科技(3067)這類潛力股身上。佢地雖然有增長潛力，但同時波動風險都唔細，故不宜持有太多。

未來，你可以將一半每月資金，放係平穏增長股上面，令組合更平衡。

至於持股方面，中石油(0857)都算有質素，但這始終是商品企業，產品沒有差異性。質素只屬中等，不宜大注。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平。同樣組合上，不宜持有過多。

現時大市只在合理區，餘下資金就等機會，若出現大跌市，你就可以大力入市。

我用翻恆指年度平均回報10%計(連股息再投資)，你每月投資$10000 + 資產約23萬(持股和現金)，5年後大約會增值至110萬，故這樣安排相信很大機會達至你的財務目標。

------------------------------------------------

Q21131：

愚昧一問
什麼是新／舊經濟股？

龔成老師：

新經濟股就是較為新興的經濟類別，例如科網類，美團（3690）這類新興的外賣模式，你會見到結合了一些新科技。

同時，現時好多科網的企業，應用了較新的科技，都可以稱為新經濟股。

至於舊經濟，就是傳統的經濟類別，例如地產、傳統零售、傳統餐飲就是這類。

------------------------------------------------

Q21132：

另外，我媽66歲，持2400股HSBC，約＄80買入
4000股1766，約＄8買入

400000股261，幾年前唔知幾錢買入，去年開始我幫佢沽極都沽唔到

我幫佢買左：
500股2800, ＄28.5買入
2000股83，＄13.1買入

龔成老師：

匯豐（0005）是收息股，其實都適合你媽，只是買入價貴，要耐心持有，同時唔建議太多，但其實都可以守，不過就唔好對股票有太大期望。

ＧＢＡ集團（0261）主要從事物業發展及金融業務，生意持續下跌，年年虧損，投資價值很低。

如果真的要賣，可以打去銀行，佢地可以有方法同你掛牌。

至於其他股票，其實可以持有，都有質素的。

------------------------------------------------

Q21133：

阿sir你好！琴日上完堂今日瞓醒覺時突然諗到一個問題

早幾個月啲新科技股就係市場熱炒狀態
依家開始見到依啲股慢慢跌返，同埋都會見到好多人話走貨

我明白依家雖然跌緊但都仲係偏貴，要學埋點樣估值先可以決定佢平貴，但想問下去到咩情況你先會覺得係買入嘅時機？

早幾個月個個衝去買嘅人依家都開始驚算唔算係一個開始？唔該晒阿sir

龔成老師：

首先要睇質素，唔好盲目去投資，另外要睇自己的財富配置及現金情況，如果你本身的年齡要投資水桶1類的股票，而你完全無這類，就可以以月供或分注的模式，去慢慢買入。

當然，要同時考慮佢的平貴情況，但有時就算少少貴，如果你無貨，月供都得。

現時部分水桶1類股，開始去翻合理區頂，其實可以考慮加翻。

其實，你話「早幾個月個個衝去買嘅人依家都開始驚算唔算係一個開始」，只要我地明白當時唔平，就算想入貨，都一定會控制注碼，同時只會慢慢分注。

------------------------------------------------

Q21134：

老師想請教一下如果平衡及重整到現有股票，原持有:

(00001) 1 手 73.95
(00005) 1手 63.4
(00788) 22手 1.721
(01177) 5手 9.92

最近慢慢草貨，新加入了:

(01810) 3手 25.079
(02382) 1手 170.283
(03319) 2手 31.494
(09988) 1手 223.547

原持有蝕得較嚴重，新加入了一些股票後好左少少，想請教如日後打算繼續增持新加入的股票

另打算再加入(03067)及 (01448)，此組合是否可以，(03067)$16.5或以下是否可以吸納?

至於原持有的股票打算不理，如升反去買入價再處理是否OK? 還是有更好的處理方法，可短期內改善到組合呢? 希望老師可以給我一些建議，謝謝!

龔成老師：

原本持有的，其實都是有質素的，只要你不是持有過多就得，不過不少買入價都唔平，因此之後要做好估值方面的功夫。

暫時可以守住先。

至於現時持有的股是否上翻買入價先處理，其實我地最重要不是睇買入價，最重要睇質素、組合比例。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

至於新加的，方向正確，可以平衡翻你整個組合。因此現時組合基本是無問題的。

而你加入了較有潛力的股票，只要你年齡不過大，就無問題。

另外的恆生科指etf（3067）、福壽園（1448），你都可以考慮，但就要留意現價唔算平，要注意風險，同時等有回落先考慮就更好。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21135：

你好, 老師
目前我持有

1810 1000股 @18.52
175 1000股 @23.6
9633 800股@56.45

6993 500股@15.28
9618 200股@324.7
823 100股@63.35
700 100股@604

由早前全數有盈利到目前虧損逐漸擴大

本人理解新科技股估值高,股價波動, 我都做到唔理短期升跌, 不過我女友知我買估票, 之前賺緊, 最近知我賺轉蝕好有意見, 開始令我感受壓力

我除咗等回升仲可以如何操作?謝謝

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

我見你持貨不是無質素，其實都可以持有，但市場可以好波動，你要平常心，別人的說話你唔需要太理會，最重要是方向正確。

------------------------------------------------

Q21136：

老師，多謝你花時間俾意見我
雖然我地素未謀面

而家我好努力咁搞網站，影靚相，希望可以宣傳得好啲。發覺自己真係好門外漢，所以都有上網睇下人講解點搞網店～

而家返工真係好攰，不過都想努力做好佢，工作如果有得忙裡偷閒，我都係搞緊網店。每日都好忙，好充實，時間真係過得好快，希望快啲可以儲到第一個一百萬。

老師，早排科技股熱嘅時候，我入咗啲小米、3067安碩，同埋第一次抽股，抽咗一手09888百度，又咁啱俾我抽到，但面家係咁跌，我係想長線投資，但見三隻股最近都升唔返去平均買入價，有啲啲不安。

以下是平均買入價：
09888 @$252 50股
1810@$27.86 1000股
3067@$22.023 1200股
0066@$39.0 1000股
2388@$21.45 1500股
2800@$26.26 2000股

請問我的組合還可以嗎？

安碩3067同百度，令我比較擔心，因為一買咗就係咁跌，上唔返去。

而小米知佢有潛力，但要啲時間增長，所以都唔係太擔心。

老師，如果我下次再入貨，應該用咩策略好？
多謝你

龔成老師：

你加油，我過往都是一邊打工，一邊並行發展其他事業，雖然當時會較為辛苦，但你一定會有回報的，加油！只要有第一個$100萬，之後就會好快有第2、3個。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

業務上，佢擁有好強大互聯網基礎的領先AI公司。自2010年起一直投資AI以提升搜索及變現能力，並使用核心AI技術引擎「百度大腦」開發新AI業務。

我睇翻一些報告：

1. 佢擁有中國最多的AI專利數量以及AI專利申請數量。

2. 按累計拉取請求計，百度的深度學習框架飛槳居中國深度學習框架榜首，全球排名第二，僅次於Facebook Pytorch。

3. 按開發者數目計，百度開放式AI平台擁有超過數百萬名開發者，係中國最大的開放式AI平台。

4.按開發者數目計，係百度雲基礎設施上運行的Baidu OSChina是中國最大的開源活動開發平台，全球排名第三。

百度核心業務（唔包括愛奇藝）由AI驅動，為其貢獻超過70%的總收入，主要提供基於搜索、信息流及其他在線營銷服務，以及來自AI新領域的產品及服務。

並廣泛使用AI技術開發創新營銷服務（例如動態廣告），為各搜索用戶推薦最適合的營銷客戶產品。

現時佢坐擁不少資訊和客戶群，就可以利用佢地去發展很多不同業務，可以話係一個好大的優勢。佢收入不差，長遠有發展，但由於本身有相當規模，因此，未必是高速增長型。

百度在規模和質素上，一定係有。但近期科網股波動，風險高左，同時到上市一刻不確定性高左。

之前有少少貴，但只要你貨不過多，可以守。

至於你組合，無問題的，你耐心持有就得，唔好太著重短期股價。

但我見你之前所入的新經濟股，都有少少貴，所以你可能在掌握平貴度仍要進步，建議你可以之後，用慢慢分注或月供策略，現時新經濟股大多在合理區頂至略貴，如投資，要慢慢分注，同時留現金。

------------------------------------------------

Q21137：

無聽老師講，短炒左，30萬資金變左20萬，好後悔。

宜家月入10萬，剛剛買左樓，約3.5萬供樓，每月要還2萬卡數，大約1萬家庭支出。

當初短炒諗住希望2－3年可以有2－3百萬換樓. 短炒後發覺自己心理質素差，彈出彈入。同時因為開頭有賺，錢都洗大左。

宜家無貨係手，想重新投資，想問老師有無建議，現時我留意緊0175吉利同2013微盟，請問佢地現價可入？

龔成老師：

短炒好難賺錢的，建議你之後集中長線投資。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

建議你除左上述兩股，同時考慮其他股，建立一個平衡組合。

------------------------------------------------

Q21138：

有啲心聲想同老師分享，上年10月上完基礎班後就開始入市 都係小注進行 因為冇咩現金係手

不過最近個市真係有啲波動
見自己個組合由高位有15%回報到宜家得番4.6% 個心好似真係會患得患失咁 成日有種感覺係「早知當時高位放左佢算啦」

不過岩岩睇完老師個專訪 令我本來忐忑既情緒又穩定番 因為我希望長線係可以做到價值投資哩個方法 因為屋企人同身邊既人都係短炒多 我希望我可以做一個成功既例子話佢地知 價值投資法係有用

現時組合中佔比最大係1177同9988 （各佔25%）其次係3067同823 （各佔15%）

有啲問題希望老師可以俾啲意見我

1. 我每月會買2手3067 根據現況老師建議停一停 先儲現金 還是可以繼續長線進行買入動作？

2. 宜家28歲 所以組合多以新經濟股/水桶1為主 以上組合會過於進取嗎？（已經特登加左823係水桶2 分散風險）

3. 如果投資水桶2 投資823/1928 係咪差唔多？因1928現時值搏率好似冇咁高

4. 最後亦都係最重要，我希望趁年輕可以爭取多啲時間搵錢 雖然宜家有份office正職番星期一至五 星期六有幫4個學生補習 但都想再搵多啲外快

會繼續每日留意老師facebook update
多謝老師抽空睇完我打既野

龔成老師：

1）由於你無太多現金在手，所以，建議你先停一停。

2）你持有的股票，都是有質素的，不過，你較集中在新經濟股，同時，我地同一隻股票的比例不宜太多，15%已經是上限。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

3）都有質素，都可以考慮，現時值博率接近。

4）我建議你可以試下做小生意，以及做一些高時薪的兼職，以提高本金。

加油！

------------------------------------------------

Q21139：

阿sir 我之前問過你，雖然我有上堂，但我衣家既股票全部係打和，如果驚佢黎緊會繼續向下，係咪由佢放係到唔睇就算thanks

香港電訊6823 - 1000股
港鐵 66 - 500股
領展 823 - 200股
盈富2800 - 1000股
海豐1308 - 1000股

鐵塔 788 - 8000股
海爾智家6690 - 800股
阿里巴巴9988 - 100股
騰訊700 - 100股
恆生科技3033 - 4000股
中國潔能2809 - 150股

AAPL - 20股
TSM - 15股
SE - 6股

呢d係我衣家既股票, thanks 我都明上堂講要長線，但都仲係驚驚地 哈哈。謝謝你

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

基本上我見你持有的股，都是有質素的，你唔好太著重中短期股價，平常心。

上述的組合，各類別股票都有，只是你年齡不過大，其實無問題，你長線就得。

------------------------------------------------

Q21140：

你好, 我一直以來都無買過股票, 因為我父母炒股輸過好多錢, 甚至乎我覺得佢地輸埋自尊, 炒輸股票之後對自己失去信心

正職都做不好. 2008年金融海嘯我見匯豐$30都無錢買, 所以都決定儲錢, 下一次大跌市時入貨, 希望賺錢.
到2020年3月, 呢個機會終於來了, 所以我買左3手盈富, 到年尾已經賺左40%

但因為後來的升市, 好多隻股都大升, 所以我都加碼買左其他, 當中試過短炒賺少少.
長話短說, 我以家手上揸住:

小米3手@$29.7
阿里巴巴2手@$255.5
吉利汽車2手@$28.225
領展房產基金2手@$70

只係大約13萬貨, 所以即使依家跌左幾成, 心理都仲支持到.

我想問吉利你覺得有機會升返上$30嗎?

記得08年個陣, 我好多frd買了中人壽, 有D$30幾蚊入, 有frd歷史高位$50幾蚊入, $50幾蚊好似已經永遠唔會返到家鄉了.

吉利會唔會都係咁?

老師, 我已經受不住驚慌, 將個2手吉利今早19元賣左, 立即買返美團同小米, 呢次我一定會長揸. 另外, 我睇緊年報勝經, 之後會睇埋另外兩本, 之後股票班我要星期六日開的才可以來上堂, 我會等你供佈.

龔成老師：

其實你的持股都有質素的，又不用太過擔心。

其實，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

所以，你其實唔需要轉來轉去，建立一個組合，長期持有就得。

至於中人壽（2628）的例子，其實佢當時貴，同時增長力及質素有少少下跌，因此企業價值都向下，所以我地分析時，要懂得分析質素及估值，同時，不能太集中在單一股票。

我間中都會開星期六班的，通常一年開1、2次，星期六下午時間。

下次在今年年尾。

你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。