【遇火警用口鼻掩濕毛巾│警告：擋不住致命濃煙】⁣ ⁣ #台北 卡拉OK發生大火，釀成5死悲劇。意外無人想見到，但萬一遇到意外，你又知道點逃生嗎？大火發生時，濃煙密布，如要提升逃出生天嘅機會，應該點做？相信大家都聽過「火警逃生三寶」：濕毛巾、鎖匙及手機，但有台灣消防員指出，咪以為拎住條濕毛巾就可以穿越濃煙保命，咁做隨時會令你致命。⁣ ⁣ 🔽🔽🔽🔽🔽🔽🔽🔽🔽🔽🔽⁣⁣⁣⁣⁣⁣⁣⁣⁣⁣⁣⁣⁣⁣⁣ 關注自己及家人健康？⁣⁣⁣⁣⁣⁣⁣⁣⁣⁣⁣⁣⁣⁣⁣⁣ 立即 Follow @LikeMagazineHK ， 每日送上健康生活Tips⁣⁣⁣⁣⁣⁣⁣⁣⁣⁣⁣⁣⁣⁣⁣ 🔽🔽🔽🔽🔽🔽🔽🔽🔽🔽🔽⁣⁣⁣⁣⁣⁣ ⁣⁣ ⁣⁣⁣⁣⁣ ⁣⁣ ⁣⁣ ⁣ ⁣ 濕毛巾不能助你穿越濃煙⁣ ⁣ 當有火警發生，好多時傷者未必係被火燒傷，原來更多人係被濃煙嗆昏至死。火災發生初期，會先產生白煙，主要成分係水蒸氣，對人體危害較低；但當火燃燒一段時間後，就會釋出黑色、可燃性、含毒物嘅高溫氣體，呢啲就係濃煙。講到火警逃生知識，好多人都記得「火警逃生三寶」：濕毛巾、鎖匙及手機。手機作用係求救和通訊；拎鎖匙原因係萬一不能順利離開火場現場，危急時可以返入屋避一避，等候救援。至於濕毛巾，好多人都知道係用嚟掩住口鼻，減少濃煙刺激氣道。但要注意，濕毛巾只為你逃生稍稍加護，而唔係完全保護，甚至令你無懼濃煙啊！⁣ ⁣ ⁣ ⁣ 有實驗指出，濕毛巾只能擋住濃煙入面嘅固體如：碳粒子，以及液體如炭渣或焦油。以為拎條濕毛巾就可以安全穿越濃煙逃生，未必諗多咗或想像力太豐富。事實上，暴露喺濃煙之中，只要吸到一口氣，都有機會令你窒息喪命。點解濕毛巾唔可以令你穿越濃煙呢？首先，濃煙中充斥有毒氣體，有毒氣體和氧氣都係氣體，如果濕毛巾可以撐住有毒氣體，同時都會擋住新鮮空氣，令你呼吸唔到。即係話，如果掩住濕毛巾都吸到氣，亦有機會將有毒氣體吸入。第二，濕毛巾遇熱會產生水蒸氣，當你用濕毛巾掩住口鼻時，一旦吸入熱蒸氣入呼吸道，有機會造成嚴重灼傷。⁣ ⁣ ⁣ ⁣ 保持冷靜盡快離開現場⁣ ⁣ 記住，濕毛巾嘅作用只係幫助你逃生時減少吸入濃煙，引起咳嗽不適，唔係好似著上保護衣，讓你穿越滿布濃煙嘅火警現場。因此，如遇火警，第一時間唔係揾濕毛巾，而係應盡快離開現場，離開時關上所有門。另外，離開現場時唔好用升降機，宜用最近嘅樓梯逃生。若果有濃煙堵塞去路，則可用濕毛巾掩住口鼻，而且應該喺煙下伏地爬行。若留喺單位內等待救援，應該應盡量阻止濃煙滲入單位，如用膠紙密封門邊罅隙，並把濕毛巾放在門底，在未受濃煙影響嘅房間打開窗戶呼吸新鮮空氣，然後在窗戶或露台懸掛被單，或揮動毛巾呼救，通知救援人員自己的位置。