【小男孩與小女孩｜#厄爾尼諾現象】 「大佬，厄爾尼諾現象點解呀？」「你咁蠢架，厄爾尼諾現象都唔知點解！嗱，厄爾尼諾現象即係好Q勁咁解！」 . 厄爾尼諾現象係唔係好勁就見仁見智，要了解厄爾尼諾現象，先要了解「沃克環流」。在正常嘅海洋及大氣情況下，太平洋上空嘅大氣環流可以稱為「沃克環流」，赤道太平洋的信風會將海洋表面嘅暖水由東向西推向印尼方向，暖海水會喺印尼以東海域積聚，令空氣上升，有部份嘅氣團會喺高空向東移動，再喺南美洲附近上空向下沉，形成回饋循環，將水汽同熱能由東向西輸送。 . 當沃克環流減弱或者反向，就會出現厄爾尼諾現象，而厄爾尼諾係西班牙文，代表小男孩（El Niño），由於現象通常係喺聖誕節前後時間發生，所以小男孩其實係指係耶穌，因此呢個現象又叫「聖嬰現象」。赤道太平洋中部同東部海水每隔幾年就會異常升溫嘅現象，大約三至五年就會出現一次，而且會持續十八個月。厄爾尼諾現象出現嘅時候，南美洲地區會出現暴雨，而東南亞則出現乾旱，影響全球天氣。 . 而沃克環流異常強勁，就會出現拉尼娜現象，拉尼娜係西班牙語係小女孩（La Niña），又稱為「反聖嬰現象」，令美國西南部同南美洲西岸變得異常乾燥，東南亞地區有異常多嘅降雨量，西太平洋亦會因為海洋表面溫暖而導致熱帶氣旋數量增加，情況同厄爾尼諾現象相反，兩者嘅出現，都會為唔同地方帶嚟極端天氣嘅影響。 . 厄爾尼諾現象嘅形成原因仍未有完整嘅科學解釋，而過去嘅幾十年中，厄爾尼諾事件嘅數目亦有所增加，對我地影響亦越來越大。 ------------------ ◆ 同場加映： 林子善解釋何謂厄爾尼諾現象：https://www.youtube.com/watch?v=P-2ACJI89pE ------------------ ◆ 每日分享知識、每月提供課程 ◆ Beginneros網站：https://www.beginneros.com/ ◆ Youtube：https://goo.gl/OEJrGt ◆ Instagram：@beginneros ◆ 冷知識投稿：http://goo.gl/zEYS3q #beginneros #冷知識 #geog #geography #weather #climate #globalwarming #greenhouse #climicchange #pacific #全球暖化 #環保 #厄爾尼諾 #拉尼娜 #typhoons