【龔成問答信箱】（Q21201-Q21220）

Q21201：

你好龔Sir , 上完你堂就計一計吉利(175)既估值，麻煩睇下我做成點呀

因汽車界近來有著革命性的改變, 所以只用近5年的數據
主要競爭公司 2016-2020年PE raio

(因比亞迪完全是一間電動車公司而且市盈率太極端所以不用來比較)

以下數據按大小排

吉利(175)8.551 12.58 13.87 14.41 26.97
長城(2333)6.676 7.178 8.777 8.812 11.11
廣汽(2238) 4.22 6.802 8.584 9.454 10.19
北京汽車(1958) 6.236 7.766 8.495 9.402 12.14
(因2018年一次性PE大升,其後回復正常, 所以不用2018年改用2015年)

用你課堂教的調整，再綜合分析，推算行業平均市盈率 : 8.5815 - 10.5195

吉利(175)市值大, 業務規模比其他同業大, 值得調整，大約調整50%。經調整後吉利合理市盈率 : 12.87 - 15.78

吉利5年平均每股盈利 : (0.64 + 1.4 + 1.58 + 1 + 0.61)/5 = 1.046

大行預期2021年每股盈利為 : 0.94

因吉利積極發展電動車品牌及推出新車, 但同樣銷量亦受疫情及芯片短缺帶來一點拖累

所以先假設每股代表盈利是5年的平均數1.046
所以吉利的合理估值為 : 13.46 - 16.51

請問咁計同你計出黎既差得遠嗎? 你計出黎又係幾多呢? 謝謝

龔成老師︰

首先，北京汽車(1958)2018年市盈率大升，並唔係一些會計因素，純粹係當年不少汽車股被炒起。

因為價格大升，所以市盈率就被大幅抽高。將來都有機會出現這種情況，故你都應把這年，計算在內。

吉利(0175)本身的質素不差，擁有一定的銷售網絡及品牌，不錯的市場策略及定位。

佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些因素，都值得給予吉利較高評價。加上佢近年加大新能車部份發展，預期會令增長力增加，故市盈率可以比以往，再調升少少，大約17-22倍。

合理估計，你可再上調多D，會較為合理。

其實，你已掌握了估值的方向，你最重要在計算後，明白這計算背後的基礎，當中是考慮了那些環境情況。

有時我在估值時，會同時計幾個情境，例如好景時的EPS會怎樣，如果差的情況估值又會怎樣，去得到更立體的答案。

另外，你要多做練習，為不同企業進行估值，這樣才會更掌握當中的技巧。

------------------------------------------------

Q21202：

龔老師您好，想問下中國鐵建，長遠和短期投資可以嗎，現時pe2-3，點解佢賺到錢，又有股息，但係格價咁低？

龔成老師：

中國鐵建（1186）業務以鐵路及交通相關工程為主，包括高原鐵路、高速鐵路、高速公路、橋樑、隧道和城市軌道交通工程設計及建設。

業務地區包括中國，以及中國以外地區，工程承包業務是這企業的核心業務，例如基礎設施建設，鐵路、公路等。

這企業的發展不過不失，但增長力及賺錢能力都比過往有所減少，從一些財務數據，例如資產回報率、股本回報率、EBITDA利潤率等，都見到這企業的長期財務數據有轉弱情況，反映企業現時每個項目的賺錢能力，不及過往年代，企業質素因而下跌，而市場估值都會因此而減少。

這股的整體質素算是中等，發展力比過往有所減弱，這類股不是不可投資，但就不值得投資太多資金。

至於市盈率較低，並不一定代表吸引的。

第一，每一間企業，每一個行業，都會有其合理的市盈率，雖然數字愈低一般代表愈便宜，但在實質操作時，先要了解每個行業及企業自身的情況。

第二，當一個行業、一間企業的發展前景不及過往年代，賺錢能力減弱，市場就有可能將其合理市盈率的估值調低，投資者要小心解讀數字背後的意思。

第三，近年一帶一路的發展力，並不及之前所預期，部分國家的工程都減少了，這企業的長遠生意都會因此受影響，同時每項工程的賺錢能力都有可能因此而受壓。

第四，當投資者分析企業時，要了解生意的持續性，例如一些從事零售行業、飲食行業，只要大環境無太大變化，生意往往會持續。但若然企業從事工程，投資者就要了解生意持續性的因素，若果一個國家該類建議最大規模發展的時期已過，企業生意可持續發展能力就會轉弱。

在中國鐵路最大規模建設時期已過，以及一帶一路國家對中國興建鐵路的需求，未必及預期的情況下，這企業自然受影響。

若投資者見到這企業長期的市盈率，經常都處於很低的水平，反映市場認為這企業面對上述因素，只是值這個市盈率，因此，並不代表特別便宜（情況與內銀股一樣，長期低市盈率背後是有原因的）。

------------------------------------------------

Q21203：

你好，想問下你有冇長線投資邊隻美股或者ETF？知道你長線投資1211，覺得你好有毅力，

想問下如果我長線投資arkk / arkf好吾好呢？另外你還睇好邊隻港股可以長期持有呢？thanks

龔成老師︰

其實你只要明白，真正最好架財富增值方法，就係長線持有優質股這個道理，你都可以做得到。

美股和ETF，我自已無投資，我都係自行選股，好似比亞迪(1211)、小米(1810)等。

美股我自已無特別研究，所以這些股票比唔倒太多具體建議比你。

但初步睇佢地都有質素和潛力，但你預佢地波動性會較大，緊記投資持要控制注碼。

而港股方面，都有不少優質股，值得長線持有。若你係年青至中年人士，以下股票都適合。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)

潛力股︰安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。

但你要留意翻，部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

------------------------------------------------

Q21204：

龔sir，你好👋🏻本人30歲，是全職媽咪，現持有以下組合嘅股票：

1. 01093石藥 （平均價$9.56）持有12800股

2. 2342京信通信 （平均價$2.612），持有16000股，現價跌到兩蚊，請問應唔應該再購入？

3. 941中移動（平均價:44.85 ） ，持有1500股

4. 939建行（平均價$6.41 ）持有4253股

請問這些股票是否都是有質素？除了建行外，其他另外三隻都打算長渣，是
否可行？謝謝你抽空解答

龔成老師︰

你以上持股，都係有質素，全部都係可以長線持有。

但選股組合上，京信通信(2342)質素未算好高，唔建議再加注。

現時你除左石藥(1093)外，其餘幾隻增長力都唔高。若果你個人投資取態係較保守，咁都可以。否則，你就你加入多少少有增長力股票，去提升財富增長速度。

另外，有一個較大問題，係你好偏重左係石藥(1093)身上，佔組合比重很高。任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

長期你需要建立一個更平衡架組合，唔好太集中係幾隻股票。

------------------------------------------------

Q21205：

你好，龔sir 小妹今年28歲，月儲一萬左右，想係30歲前有100-130萬，有可能嗎？現時持股如下
(坐艇中）！！！

匯豐2000股@70元
騰訊100股@662元
美團300股@330元

小米400股@32.7元
安碩恒生科技600股@20.58元
21世紀教育33000股@1.38元
易鑫集團500股(新股上市抽中的）

另外有大約價值6萬港幣的美股(哈，終於系正數😅唔洗負數負到懷疑人生）和30萬左右現金！

龔sir,請問有機會達成目標嗎？有無邊d股票應增加或減持？希望你比小小意見我，多謝解答。

btw報左你股票班，因為你太神秘關係，好想揭開你的面紗！

龔成老師︰

其實你唔好太著重係股價上，帳面賺定蝕，從來都不是持有一隻股票與否的因素。

關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

假設回報10%計(連股息再投資)，你每月投資$10000 + 現有資產約值65萬，2年內增值至100萬，計算上係可以。

但由於2年唔係一個長的時間，就算優質股也有機會出現波動，影響到你最終回報，你要明白有這個風險。

先講你現有持股，都有質素。

但匯控(0005)只係收息股，唔會有太高增長力，唔適合你。

易鑫集團（2858）、21世紀教育(1598)質素中等，而美團(3690)有質素，但不確定性較高，都不宜持有太多。

你現時28歲，較適合用"平穏增長股" + "潛力股"的組合。每月用5成儲蓄，去做月供，其餘先儲起，用一邊月供一邊儲蓄的策略。

現時大市只係合理水平，現金和股票最好各佔一半。餘下30萬和每月儲蓄，就等大跌市出現，才加大力度掃貨。

股票班見!

------------------------------------------------

Q21206：

Hello!請問龔sir你覺得比亞迪電子285 現價可以入嗎？其實我都有啲睇好佢，但知道佢，依家呢個價唔平，要落返去20-30蚊都幾難下！謝謝

同埋阿sir 我想問你依家手上有咩股票同平均咩價位入？

龔成老師︰

比亞迪電子（0285）質素不差的，有潛力。睇佢過往發展都正面，有技術，而前景都唔錯。

考慮到近期的增長，$40左右算係佢合理區頂部，現價略貴。要等回翻才好分注，或者可用月供去儲貨。

至於我的持貨，講其中幾隻啦，比亞迪（1211）、小米（1810）、中生（1177）。

現時比亞迪較貴，唔好考慮住，而小米同中生，算是合理區頂至略貴。相信這3隻股，都會好長線持有。

------------------------------------------------

Q21207：

龔sir,你好！本人45歲，已婚有2個子女讀中學，夫妻有穩定工作及收入共6萬元。

我上年12月在FB follow 你，除了睇完百萬富翁系列書籍，也買齊你的聖經及50系列的書，
真是獲益良多。

今年1月開始月供1萬股票，包括2800＄3000, 1810＄1500, 9988＄1500, 66＄1500, 823＄1500
及1928＄1000。

現手持有股票：
1手2382＄175入, 1手9988＄222入, 6手3067＄17.15入, 1手981＄24.5入, 1手2018＄43入

1）有10萬資金想在跌市時再買入上述持有的股票，還是買入月供的股票，哪個會比較好？

2）以上股票分布會否太散太多？有否集中某類型？

3）2018及981仍可持有，還是賣出轉換1928或其他會比較好？

懇請龔sir指教分析，謝謝。

龔成老師︰

先多謝你支持，你可以先睇"80後百萬富翁"、"財務自由行"和"股票勝經"，由淺入深，咁會較好。

1) 其實2者都可以，除了中芯(0981)較一般，唔建議加注之外。

同時間，你入市架時候，唔好太偏重新經濟股，都要加入部份舊經濟股，令組合更平衡。

2) 不算太散，但有少少偏重天係新經濟類別，會令組合波動性偏高。

3) 瑞聲科技（2018）不差的，本身有一定的規模與技術，長遠發展正面，不過，佢增長力不是好強，只能視為平穩增長類別，你可以長線持有。

中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。加上之前熱炒過，股價大上大落，投資要注意風險。現貨1手可持有，但唔建議你再加注了。

------------------------------------------------

Q21208：

龔成老師你好，我今年32歲，其實我已經接觸股票超過十年，在最近開始留意你的fb才發現原來我一直都買錯哂/亂咁買，有一種一言驚醒夢中人的感覺

我已經買了股票勝經，希望重新開始真正學習如何買股票，非常感謝你無私的分享

我現時持有以下股票：

267 - 1000股 @15.48
388 - 100股 @297
745 - 12500股 @2
1733 - 60000股 @0.5

1776 - 1000股 @24.65
1816 - 5000股 @3.71
2382 - 100股 @176
6886 - 200股 @24.8

我知道大部分蟹貨應該賣出，其實我深知積存蟹貨的原因是我買股票後就好少留意股價，到想起來時先發現原來跌咗好多

加上我不知道應該幾時賣出才好，感覺過去十年的時間及金錢都浪費了。

看了老師你的分享後，我才知道月供股票，覺得頗適合我這種很少留意股價，但又想獲得合理投資回報的人，希望老師有時間的話可以對我的投資組合給予寶貴意見。

萬分感激龔成老師，謝謝!

龔成老師︰

你想先更正你一個投資想法，蟹貨與否，唔係一個重點。我地投資最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，賺緊定蝕緊，都要賣。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你今年32歲，建議你先集中做好增值部份。現有持股中，舜宇光學(2382)和港交所(0388)係合適的。

中國國家文化產業(0745)見佢過往有20合一，而且多年出現虧損，好大機會係財技股，建議你盡快沽出。

易大宗(1733)，如果有睇佢的企業年報，就會見到核數師，多年來都有「保留意見」或「不表示意見」，這已經賬目「有古怪」。這類股基本上無投資價值，賣出較好。

中信股份（0267）、廣發証券（1776）、中廣核電力(1816)、ＨＴＳＣ華泰證券（6886）質素一般，唔建議你持有太多。

至於月供適合較初學者原因，唔係因為唔洗成日睇住個價。而係佢可以透過拉平均左個買入成本，令你減少買貴貨架風險，從而長線得到較佳回報。

月供策略上，現在你每月用5成儲蓄，去做月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

而何時賣出，基本上企業質素一直無變差，你係唔洗賣。除非個市去到好狂熱，如果你現階段無信心判斷大市平貴，你可以用"升一倍、沽一半"架策略。

先收回成本，餘下一半讓佢自行慢慢增值，咁就可以。

書本上，我建議你先睇埋我寫架"80後百萬富翁"、"財務自由行"，咁會較理想。

------------------------------------------------

Q21209：

我爸爸岩岩過身
原本供緊層樓諗住比佢養老
我租左新樓 $12500
但依家舊樓就空左市值300萬左右
我諗緊賣唔賣好
層樓倍升左幾倍
岩岩我公司燉我冬菇
減左20%人工

股票我仲有
比亞迪
盈富
領展
小米
3033
全部小量
想睇下你會點睇

龔成老師︰

每個人都有自住需要，除非間屋已經明顯無乜增值潛力，咁你才考慮沽出。

否則，你可以考慮自已住，可利節省新樓租金，用來投資增值。又或者，放租比人，自己另租地方。大前題係，如果物業依然係有質素，就應留住這個物業。

你現時持有的股票，都係有增長力和質素，適合年青至中年人士。這些股票，你長線持有就可以。

若你將來會再投資恆生科技股ETF，建議你用安碩恒生科技(3067)。

相對南方恒生科技(3033)，佢每年收費和追蹤誤差都較低。但由於幾隻恒生科技ETF都係初上市，追蹤誤差只能作參考。實際誤差未必一樣，你要知道這個風險。

------------------------------------------------

Q21210：

龔sir,你好，又要你幫手解答問題了，想問萬國數據值得持有嗎？我知道都有新意網，2隻長遠黎講邊個好？

新意網又持續上升，萬國數據就蝕錢，但又因為覺得中國發展潛力大

另外亦知道美股亦有呢隻股，那麼大家有什麼分別?見佢低過招股價 想入手，那麼我買美股定港股?唔清楚呢d範疇，謝謝。

龔成老師︰

我地持有邊一隻，唔好太著眼係中短期股價走勢，要用翻佢長線質素去做考量。

新意網集團（1686）主要提供數據中心、設施管理、網上應用及增值服務，系統之安裝及保養服務。

行業長遠發展正面，佢已經做到全港最大，加上行業的需求不斷增長，對佢長遠都有正面影響。佢過往生意與盈利保持增長，財務數據正面。

這股有投資價值，不過現價就唔算平，大約在合理區頂。如投資，小注分注都可。

萬國數據（9698）有質素的。

佢的業務為開發及營運數據中心，根據佢公司提供的資料，佢係全中國最大的運營商網絡中立數據中心服務提供商，市場份額約2成。

現時主要通過GDS上海、GDS北京及其子公司進行該等業務。GDS北京及GDS上海各自持有經營業務所需的互聯網 數據中心牌照。

佢提供託管和管理服務，包括創新和獨特的託管雲價值主張，機房面積為266,260平方米，有一定的規模。

見佢生意有一定的增長，行業前景正面，只是現價唔算平，投資價值都有，但就唔建議太大注。跌翻10%較合理。

2者都有長線投資價值，規模上，萬國數據（9698)會佔優。但此刻值博率，會係新意網集團（1686）較高。

至於，買港股定美股，其實分別唔大。

------------------------------------------------

Q21211：

龔SIR，我想講你知，我上過你股票班，跟咗你兩年之後，認同你套方法係得！

我今年28歲，成功說服家人賣了住了20年的兩房自住物業，目的一部分資金幫老人家做收息作生活費，還了另一物業的樓貸(因自住物業作抵押)

剩下部分讓我倆兄弟(弟弟22歲)投資增長股，目標是5~10年再運用借貸買兩個物業，一個值300多萬的細價樓，一個過千萬的三房物業。

目標投入潛力股的資金約340萬港元，目標組合:舊經濟股1177, 3319, 1830, 新經濟股 2382, 0636, 2845, 9988

340萬本金的組合，若選擇投資以上的股票，應選幾多隻好呢?建議比例如何?我會留意股價睇值博率

龔成老師︰

你所講的組合，都適合用來做財富增值。

但這個組合中有主要係潛力股，佢地雖然有增長潛力，但同時波動風險都唔細，唔建議全部資金盡用在這些股票身上。

我建議你加入一些平穏增長股，同你上述架潛力股，比例上各佔一半，咁會令到個組合更平衡。

大市現處於合理水平，那340萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨。

由於你現處於"沽空樓市"狀態，股票增長和樓市增幅未必同步。所以，假若股票升幅跑輸樓市，反而會令你日後買樓成本上升。

你可以在投資組合中，加入多少少房產類股票，去盡量平衡翻這個風險。

至於老人家收息部份，就唔好用以上股票，應以一些優質收息股為主。策略上，都係先用一半資金，分注入市，餘下就等機會。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

------------------------------------------------

Q21212：

老師我想請教，其實我等緊2020居屋結果，搞珠號碼好後，本身以為冇機，但又收到信補料，之後仲收到二次急件要我補料，好似比咗個希望我。

現在有現金100 万，覺得而家係買樓時機，唔買冇機會，目標500万樓下，做9 成，其實冇咩實力。

聽講居屋5、6 月𢵧樓，如果到嗰時先知自己原來冇机先再睇返私樓巿場，會唔會太遲，我已經41，買舊樓驚做唔到長年期，500 樓下變得冇乜選擇，好心急，求意見

龔成老師：

你可以等埋居屋果邊先，我相信私樓未必會一下子上得太快，估計1年內上落都唔會太過多。

如果居屋果邊唔成功，到時就睇私樓（當然，現時你久不久睇下私樓先，都無壞的）。

要留意，你的「供款能力」是最重要的考慮因素，唔好太過勉強，如果這方面不足，就寧願調低目標樓價金額。

------------------------------------------------

Q21213：

你好龔老師 關於上次你既解答 我風險過高，除左買3067，如何可以提升組合平衡性？ 現持有小米及雅迪，但不是月供

小米有1800股，雅迪4000股； 是否建議買短期股？想每個月都增加$4000以上收入，有可能嗎？

龔成老師：

恆生科指（3067）是一個組合，會比單一股票的風險度較低，當然，由於佢持股都是潛力類股票，因此本身都有一定的波動性，你要留意。

小米（1810）絕對有質素，可長線。

至於雅迪控股（1585），都有潛力，不過要留意股價升左好多。

佢主要係中國以「雅迪」品牌從事電動兩輪車（包括電動踏板車及電動自行車）的開發及銷售，亦銷售電動兩輪車用的電池、充電器及其他零部件（包括電機、車架等）。

睇翻過往財務數據，唔差的，生意的確有增長力，潛力度有。不過現價唔算平，因此唔建議持有太多。

另外，不建議你短炒，全部都要長線投資，不要著重每月賺多少，要睇長線。

------------------------------------------------

Q21214：

龔成老師本人30中，有一自住物業育有一子，供樓等家庭開支全一力負擔，每月可尚餘2-3千元。。。

而儲蓄則由老婆負責，現有100手a50，2手電能，2手中國建築，3-4萬現金。應該如何重新分配令財富有長遠的增長保障退休後的生活？

而5-6年後除去支出本人每月可有8-10k的餘額，50％作月供股票50％用作儲蓄流動資金合適嗎？而40歲才由零開始理財會否太遲？

本人明白財富增值非一朝一夕的事，但人總有貪婪的一面，會引發一些錯誤的想法，所以唔知醜咁希望龔成老師指教一下以滅絕那錯誤的想法！

另外想問問老師的投資初階班學費是多少

龔成老師，我媽媽遲下會退休，強積金大約有50萬左右，我應該以咩比例分配係收息股同平穩增長股，而到左退休年齡可以投資少少係潛力股嗎？

龔成老師：

你現時現金其實不足，以一個家庭來說，加上要供樓，如果只有$4萬現金並不足夠，最好去到$7萬-$10萬作備用現金，餘下的才投資，這會較好。

另外，A50中國可長線的，但要留意，雖然這是組合，但都不能過度集中，宜同時投資其他股，如果不懂選股，就考慮其他ETF。至於電能（0006）及中國建築（3311），質素是有的，但增長力不強，收息為主，以3X歲來說，算是較保守，因此，日後可增持一些有基本增長力的股票。

至於你自己要5-6年後除去支出本人每月可有8-10k的餘額，50％作月供股票50％用作儲蓄，最好當然盡快啟動這計劃，但如果無計，就等5年後啟動，40歲，有心都唔怕遲。

現時你每月可儲$2-3000，都可以盡力投資，月供股票都得。

當然，希望你在收入上更進一步，想想長遠增加收入方法，對你會更有用。

至於你媽，潛力股就唔太建議，如果佢真的好想，就1、2成好了。

佢你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

股票班共8堂，暫時優惠價：$8800。

------------------------------------------------

Q21215：

龔成老師你好，我40歲，睇左你FB 一段時間，另外都購買左你先前的網上課程，有得益。希望你能指導下。麻煩曬，長文

因為以前父母系股票輸左好多錢，多年前讀 U 就開始兼職賺錢供父母層樓，也一直都抗拒進入股票投資。
但幾年前開始有剩餘錢就學人抽下新股或短炒賺餐晏仔。

現時還繼續持有幾個蝕本股
3883，1916, 8511, 8313, 6886, 1932, 1227(呢個是父親的)

想問下應該蝕住放甘點？

另外上月開始月供3067, 暫時每月7000
還有1833, 6060, 386, 1786, 1299(都是2至3手)

成40歲最近我被裁，有筆20萬長期服務金。請問應該投資股票定放系供樓的高息戶口等跌市？

我同先生目前有2層樓，一層租萬5(月供5千到2016完), 一層自住(月供2萬8). 另外有150萬現金，股票40萬。我同先生月入8萬(我被裁前人工4萬), 但要供養4大長老同個女，經常性使費都大。

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

中國奧園（3883）有質素可持有。
江西銀行（1916）質素一般，增長力不強，宜減持。
ZC TECH GP（8511）無乜質素，賣出較好。
杰地集團（8313）無乜質素，賣出較好。
ＨＴＳＣ（質素中等），可守住先，但增長力不強。
中漆集團（1932）質素一般，增長力不強，宜減持。
國盛投資（1227）無乜質素，賣出較好。

至於你「上月開始月供3067, 暫時每月7000
還有1833, 6060, 386, 1786, 1299」

基本上無問題，只是鐵建裝備（1786）質素不太好，宜賣出。

由於你現時有一定的物業資產，反而股票部分很少，因此應增加股票比例。

你$20萬應投資股市，但你投資知識與經驗不多，暫時只建議你月供股票，以及投資平穩增長股。盈富（2800）、港鐵（0066）、領展（0823）都可以。

你可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21216：

龔sir，有啲野想請教下你
月供基金,我應該要留意啲咩

龔成老師：

首先，要睇翻該基金的投資範疇，投資策略，因為基金有好多種的，你要了解該基金投資的資產類別，是否你睇好的，長遠向好的。

另外，過往回報是否理想，比起大市時否較好或較差。

當確認有質素後，就可以投資，月供是一個方法。如果該基金不是在交易所上市，你就要睇翻有那些條款，會否要求你最少持有幾多年。

------------------------------------------------

Q21217：

老師好！本人50歲持有股票。

公用股：0003 6823 6.51%
REITS：0823 10.96%
醫藥：1177 4.23%
潛力金融：0388 15.54%
石油：0386 1.24%
家電：6690 2%

保險：2318 7.13%
電動車：0175 1211 21.38%
內銀：0939 1398 3988 21.38%
新資訊科技：9888 1.98%

另外以下基金：已供占10.81%
2800 月供$6000
3188 月供$4000

計劃每月買一手3033
已買了一手2845

1. 以上組合是否太亂？有什麼需要加減？
2. 想每月買入一手3069 3109？有咩意見？
3. 手上還有60萬現金，等機會？
多謝

龔成老師︰

1） 都有少少，最好組合數量維持係8-10隻，咁會較理想。

持股方面，都有質素，可長線持有。但你比重上，太偏係潛力股類（1177, 0388, 0175, 1211, 9888）。

佢地雖然有增長潛力，同時風險都較高，不宜持有過多。以你50歲計，潛力股佔組合20%左右好了。

現貨可持有，但未來時間，你要加大翻平穏增長股部份，慢慢令個組合平衡翻。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

月供方面，同樣要作出調節。而你想投資恆生科技股ETF，我建議用安碩恒生科技（3067），佢費用成本會較低。

2） 華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

南方科創板５０（3109）都有投資價值，但成交比較少，會有機會買賣差價偏高。

但你要留意，這2隻都算係潛力型股票，以你年紀，不宜持有太多。

3） 現時大市只係合理水平，現金和股票最好各佔一半。若你持股總值已超過60萬，有手現金就最好等大跌市出現，才加大力度掃貨。

------------------------------------------------

Q21218：

你好，老師
35歲，家庭月入約6萬
每月儲到2萬
2小朋友讀緊幼稚園

持有以下，希望可以盡快儲到200萬作首期，買多層樓收租。不過，我都唔係好清楚當有200萬時，應該購樓收租，還是繼續投資股票？

農行：10萬股$3.38
建行：17000股$6.58
交行：10000股$4.9

9988 阿里：300股$463
快手：200股$402
中移動：1000股$53.8

總成本：70萬

另外可動用多50萬投資股票，請問投資方案應該係點？謝謝你

龔成老師︰

我地做財富增值，係要建立一個有不同優質資產的組合，除了股票，物業都係其中之一。

以你現時情況，由於現時資金較少，應先利用優質股去增值一筆財富，再買入物業。但同時間，必需留有一定數量的股票，作增值之用。

而這物業可以放租，用「以租養樓」架模式去運作。較詳細方法，你可以睇我本<5年買樓4步曲>。

你現時持股，主要有2大問題。首先，農行（1288）、建行（0939）、交行（3288）和中移動（0941）只係收息股，增長力好一般，不宜用來增值之用。

另外，你組合好集中係銀行股。記住，個別行業唔好佔組合3成以上，否則會有過度集中風險。

我建議你用「平穏增長股」 + 「潛力股」作組合，你可以慢慢將部份收息股，換至以下股票。

現在你每月5成儲蓄，去做月供，其餘先儲起，用一邊月供一邊儲蓄的策略。

大市現處於合理水平，那50萬資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21219：

Hi 龔sir你好
我今年35歲 穩定職業
想每月供$5000落金沙、阿里、小米或比亞迪
是但兩隻可以嗎？
邊隻會前景好d?

龔成老師︰

4隻股票都係有質素，但我地做配置時候，都要考慮平貴、年紀等因素，去決定成個組合。

以你35歲計，建議你用「平穏增長股」 + 「潛力股」的組合，比例大約各一半。

現時比亞迪（1211）略貴，回到$120才可以月供。

金沙（1928）係「平穏增長股」，而另外阿里（9988）和小米（1810）係「潛力股」，你可以在當中2選1，去創建你月供組合。

現時大市只在合理區，每月儲蓄不要盡用。你要留有部份，等大跌市機會出現時，用來掃貨。

------------------------------------------------

Q21220：

龔sir,你好，我今年大約35歲，現有股票如下：

788@6000股 買入$1.16
1810@1400股 買入$24.59
1922@8000股 買入$5.1

2031@2000股 買入$16.63
3067@400股 買入$17.11
3718@12000股 買入$1.28

1）想問現有股票會唔會太多？同埋有無長遠投資價值？
2）1922，2031，3718可以長遠持有嗎？
3）想問下京東健康，阿里健康同平安好醫生嘅分別？邊個比較有投資價值？同埋長遠發展
邊個比較理想？有月供價值嗎？
謝謝

龔成老師︰

1） + 2） 數量上，唔算太多，長線維持8-10隻就可以。

持股方面，銀城生活服務（1922）上市時間唔算長，不確定性較大。而澳至尊（2031）質素只係好一般，2隻都不宜持有太多。

其餘都有質素，可長線持有。

3） 京東健康（6618）、平安好醫生（1833）和阿里健康（0241）都係有質素和潛力，業務上都非常相近。

但問題係佢地是有危有機的類別，雖然業務增長好快，但這刻仍處於燒銀紙的狀態中。估值上好困難，因為無實質的盈利數據作為基礎，市場只是估估下。

質素和值博率計，平安好醫生（1833）會較為佔優。但始終有一定不確定性，因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況。

現價算合理區頂，但好波動。你可以用月供儲貨，如直接買入，就只能小注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17181-Q17200）

Q17181：

龔成老師，我從17歲番暑期工就開始成為你嘅讀者，到而家18歲，經過左一年我好努力咁儲錢，同時累積資產，就係以老師你為目標

但係呢一年，我不斷俾人打擊，離唔開就係話而家應該好好讀書

投資就將來投身社會先做，同輩、長輩都不斷睇低，但其實我都只不過係想趁年輕盡早累積財富，並不是賭博。我擁有老師五本書，上車路途、大學空閒時間，一得閒就翻睇，深受老師文字嘅啟發。

我正正就係因為我好想追求自己理想嘅生活，亦都唔怕辛苦付出。

我成日都向身邊嘅人推薦老師作品，分享老師嘅背景，但係換來就係不斷俾人貶低，認為自己永遠都不能像你般成功，甚至乎我解釋只是幸運。

但我心知不是靠運氣，是靠着不斷努力、不斷嘗試。我從一個永遠都不會儲蓄，有錢就花光，戶口永遠都不會有超過三位數字，到今天用了一年時間累積至六位數字的資產，我想喺度多謝你啟發左我，影響左我一生。

［可是，究竟我應該如何改變身邊人的思想，令他們明白我，心很累... ］

另外我都一直儲緊錢，希望能夠上老師的堂，只希望疫情盡快過去，家庭的負擔少些，這樣我就能利用我日常兼職所賺取的金錢，去上老師堂... 雖然我年齡細，但我都好希望能夠勉勵所有人，有心一定能成事！

龔成老師：

你要明白，改變一個人的思維，是一件好困難的事，你這樣做其實「吃力不討好」。

我在20年前，都好似你這樣，好想將財富的真相，正確的發展方向，同身邊人分享，但我發現，完全無用。最後，我選擇唔講，我自己向目標去行，當我完成一個又一個目標後，身邊人就開始聽我講。

所以，你「講」是無用的，你唔好花力氣游說身邊人，你這刻要做的，就是做好自己，當你完成目標後，佢地自然會認同你。

讀書，是較大路的方法，但不是對財富最有影響的方法，由於讀書是投身社會的基礎，所以，你仍是最好讀書，等自己有基本的學歷，但同時要並行學習及發展投資及自己真正的事業。

簡單來說，我唔建議放棄讀書（除非你超強，如FB創辦人），否則，一邊讀書，一邊發展投資與生意，是最好的方法。

------------------------------------------------

Q17182：

你好。
看了你幾本作品。
現在看到倍升股。
1980 現時你的看法有變？

因為看到2018 和2019 年收益和毛利有向下。
是否可以昨長線投資？

或企業已變質了？
由今年5月才認識你

龔成老師：

天鴿互動（1980）的質素，的確有少少下跌，不過這類股，業務變化一向好大，可能潛力好強，又可能忽然轉差，這是這類股的特性。

這股投資價值略減，但不是完全無投資價值，但就一定唔會太注投資。同時考慮到佢最新的情況，現價只是合理，未到平。

------------------------------------------------

Q17183：

龔sir, 請問你對買保險有咩意見，保險產品咁多款，應該點揀好，特別係保障醫療健康方面，你認為應該買咩產品好？謝謝！

龔成老師：

其實保險是好個人化的項目，你按自己需要去買就得，保險的原理，就是將你某些不想承受的風險，轉嫁比保險公司。

在理財中，我地應該攻守兼備，保險是防守性產品，有購買的需要，我自己都有買，但買那些，就要視乎你那些風險可承受，那些想轉嫁。

另外，保險不用買得太多，足夠就得。

因為做好防守後，就應該將資金，用作進攻。

------------------------------------------------

Q17184：

龔sir,你好，我已在銀行app set 了下個月開始月供2800($2000)及0823($2000)。

但我見0823的每股盈利是-8 是甚麼意思？

龔成老師：

這兩股都是有質素的，你可以長期月供，如果日後有較多資金，你可以加大盈富（2800）的金額。

每股盈利，就是將佢當年的盈利，除以發行的股數，每一股計算是賺錢還是蝕錢。這代表領展（0823）出現虧損。

不過你不用擔心，因為領展上年度在「營運上」是賺錢的，只是因為「物業重估」的會計數，出現了虧損，所以令每股盈利有負數。這不會影響企業的實際價值，也不會影響派息，只是會計因素。

------------------------------------------------

Q17185：

你好老師，今年開始追看你出的投資書藉，本人和先生也是41歲，月入一共十萬，有兩個小孩，只有一個屋苑車位資產自用，住在家人自置物業

手上有少許股票，但以往不懂投資，錯失年青時黃金機會，現在想計劃五年後供兩個子女到外國升學，約需90萬港幣一年

請問我們應該如何在這五年內有效地投資有較大的回報？買股票還是買樓好？應否按車位來借貸投資？謝謝

龔成老師：

以5年期的投資來說，你應該投資流動性較好的項目，物業並不適合。

所以，你可以考慮股票，而一些「穩健、平穩增長股」，相信是較適合你的情況與年期。

你可以每月投資$12000-$14000，利用月供股票或自行分注投資，本金加上基本的增長，能滾存到你所需的目標數目。

你可以考慮盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17186：

你好，很喜歡看你的書，我32歲，現在有現金二十多萬，十多萬現金儲備。

需要時用來買平股票，每月可以儲蓄3到4萬用來投資/租房子/買樓。投資經驗不多，現在持有以下的組合

公用
2 $77 @ 500 合理偏低買入價位，偏保守
6 $44 - 56 @ 1500 買入價位 偏貴 ，投資保守
3 $ 12.25 -13.7 @ 6000 13.7 買入價位偏貴

內地公路
0548 $ 8.1-2 @ 6000
0576 $8.9 @ 2000
1576 $1.5 @ 10000

能源
0386 $3.9 @ 10000

科技
2013 $ 8.8 @ 3000 現價估值偏高 需要時候賣出
1211 $48 @ 500 現價估值偏高
1347 $ 16.7 @ 1000 現價估值 偏高。
9988 $ 198-199 @ 700
9999 IPO @ 100
0268 $14.5 @ 1000 現價估值偏高，必要時換其他潛力股
0788 $1.7 @ 2000 小注

工業
0175 $11.5 @ 1000 短期波動，長遠增長
1093 $21.25 @ 2200 $13.9 @2000 買入價位偏高

銀行 金融
3918 $9.8 @ 2000
3988 $3.54 @ 20000
1398 $ 5.1 @ 6000 合理偏低買入價位
2318 $78 @ 500

一九年買過一些股票，之後沒有再買，最近再次留意，買入價位沒有關係，根據你的分析，我自己也做出調整。

總結經驗：

1）未來需要衡量更低買入價位，比面波動帶來的損

2）習慣經常檢查價位，尋找買入時機，但是發覺會影響正常工作 我計算過我值得花多少時間研究投資六十到八十萬資產

一年如果回報大概為四萬到六萬，相等於出了花紅，仍然沒有計算未來加入資產的現金

每個小時機會成本大概為 600-800 元，相等於一百小時，即每個星期花兩小時研究

如果上班時間為四十小時，每個星期應該花4-5小時研究投資 所以不可以買太多種類的股票，以免顧此失彼

3）未來一兩年，經濟短期會下滑，減少保守的投資，增加資金增值的機會

4） 花時間為工作增值，增加收入

5）過程中看過雜誌有大量的投資選擇：基金 (Mutual) ，指數基金，債券基金，不保本的外幣高息定存，貴金屬以及其基金。

記得你說過，產品和資產是兩個不同概念。所以我決定出了指數基金/ REIT 之外，不沾手其他產品，包括結構性產品。因為購買過程不會增加任何知識，對個人投資知識沒有增長。

6） 投資策略

- 短期 1-3年 增值 潛力 （個人資產兩百萬）

- 中期 5 年 平穩增值 穩定 現金流 （個人資產）

- 長期 10 年 個人資產 （十年之後，計算通脹 投資收益，價值為五百萬，現在價值為二百到三百萬的資產）
- 超級長期 - 退休 現金流3-4萬一個月 （保險 股票 物業）

問題

1）以上分析如何？選擇如何？錯是犯了，可是我每個月幾萬，一年幾十萬，仍然有很多的投資機會，想有進步！

2）需要更多潛力股嗎？？

3）選擇賣出哪些股票比較妥當 0386? 3988?

4）感興趣 買入 1088 1044 3331 定期月供/按時買入穩定增長股票，後兩者現價比較高

5) 如果我專心達成財務自由，就可以理性享受人生，但是如果再認識新的男朋友，他的收入比我低的機會大，若要成家立室，我就會有更大風險。關於這個風險，我不懂用數字衡量。

意思就是，如果我專心花時間研究投資，一定有回報，生老病死，就很難掌握。謝謝你。

龔成老師：

1）你的分析方向大致正確。但在投資目標上，短期唔好太急進，長期就可以定一些較高的目標。

我地花時間去研究投資是一定要的，當你的財富愈來愈大，這個作用就會更加明顯。

當然，如果你本身不是全職投資者，要花時間會較難。我會建議你，首先，每星期花2小時去增加知識，這是你永遠的資產，另外，花4小時去研究股票，對你長遠的財富會有好大影響。

2）以你的年齡，你預潛力股，應該佔你股票組合的30%-60%，如果你投資實力較弱，就30%，如較強，例如有企業估值的能力，就60%。

因為潛力股的分析要求你有較多的技巧。

3）你現時的組合有點散，應該賣出一些質素較一般，增長力較少的股。

中國石油化工（0386）、工行（1398）、中行（3988）都可以考慮賣出。

4）其實唔建議你再入其他股，你的組合開始散。你不如整理好原本的組先。

5）這個問題不用想太多，你這刻做好自己先。

------------------------------------------------

Q17187：

龔sir您好，多謝您寫左咁多書啟發我既投資興趣，作為我嘅人生啟蒙，想請教下您。

我今年30歲，做左空少6年，因為肺炎而停工，但仍有底薪大約$12000，近3個月睇左您其中9本書，現時面對以下人生同投資既處境，希望龔sir可以俾啲意見同建議我：

我有筆資金$10萬，計算過之後買埋份醫保後剩6個月備用現金（之前玩左6年，用哂啲錢...)，有份保誠儲蓄保險（Year 1買，後來發現唔保本，每月$650供到55歲，不過保證每年可攞錢最多一半，覺得取消份野會蝕所以繼續）

由於我份工復工無期（平時收入大約$30000），同時諗唔能夠做得長，同埋一直想做有意義既安老服務，所以想讀2年物理治療碩士轉行（可申請資助，算係唔使錢攞到個牌

但因為個program好密集所以一定要quit左份工讀），之後人工大約$25000，會不斷加薪。讀書時諗住搵parttime做。而家每月最少還$4200卡數（未計其他支出）

仲有一年半還完（係由於上年俾一間聲稱買賣bitcoin既外國公司呃，試過向銀行追討但失敗，冇報警因為上網搵過似冇香港人咁做過，故事太複雜唔講住）

想問龔sir，假如我轉行係梗，若果係您，您會建議我再做住份工儲多啲錢還哂啲錢先，定今年報讀碩士下年頭開學？

而保誠份儲蓄保，您會建議我賣左去，定繼續供到55歲攞錢？

同埋我屋企人唔識投資，阿媽冇做野，行動不便，有大約$20-30萬可投資，想幫佢理財，您會建議我高息時買收息股，低息買債劵嗎？

而有關您既著作，我想問下預計市盈率係基於咩去計算？

我諗緊既係，若果要計算下年盈利，係咪將持續有盈利項目數目，加上下年將會產生既盈利數目？咁股價上升的比率可否用5年平均股價升幅推算？

多謝您睇哂成篇文兼解答呀！

龔成老師：

首先，如果你過往多年無突破，而你對新行業有興趣，在你後生時，可以一試。加上你轉工對收入減少未算是巨大，所以博得過。

因為現時疫情，反正你收入都唔多，如果你本身的儲備足，不如這刻快手D去讀你想讀的方向，這會更加好。

有時呢個世界好有趣，你這刻面對困難，疫情令收入大減，但可能是天上比一個突破的機會你，所以，你可以去試。

至於儲蓄保，其實金額唔算大，可以作為理財中，防守的部分，因此，是可以繼續的。

至於你阿媽，可以部分買收息股，部分留有現金，這已經是一個不差的組合，現時收息股基本上股價合理，可以投資。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

預測市盈率，就是分析下年度的盈利，然後以現時的股價除，得出市盈率。當然，背後仍有好多分析的，上堂會有更多的講述。

------------------------------------------------

Q17188：

Sir, 6185 每年虧損沒有現金流（難以估值）, 即係市場推高佢股價, 根本唔值咁高。。對嗎？

龔成老師：

企業估值有好多方法，利用過往的盈利，是最穩健的計算基礎，不過，這不代表無盈利的企業無價值，因為市場著重以「將來」計算。

不過，將來存有好大的不確定性，所以真正價值多少，就十分難計。

我唔能夠話康希諾生物（6185）一定唔值這個價，只能話現時市場對佢的估值基礎不足。

------------------------------------------------

Q17189：

成哥，想問下你揸左邊d股份，金沙 比亞迪 仲有？ 因為見你推介好多隻優質股你都係冇持有，同埋見12,16平左都冇持有

睇番仲有 中生製藥 1448 小米 想問下小米你唔怕雷軍d財技嗎？

想知多d你既組合，等我可以有改善，只從睇完你fb 我贏多輸小，同埋長線，也開始明白財富，運作。

謝謝你，但未能上你的班對不起

龔成老師：

比亞迪（1211）同金沙（1928）都有貨，而恆基（0012）、新地（0016）就無持有。

小米（1810）有質素的，長遠仍有增長力，但就唔好理佢中短期，因為中短期仍會波動，但長遠會慢慢改善。

你見我如果持有一些優質股，有增長力的，如中生製藥（1177）這類，就算升左1、2倍，我都仍會持有，這就是長線投資的理念，優質股長線持有，唔好理中短期的股價上落。

------------------------------------------------

Q17190：

老師你好,我想問如果淨係諗住退休後收息（現在已55歲）,匯豐值得買嗎？如值得,現價可入嗎？麻煩晒

龔成老師：

如果你打算退休收息，就應該持有一些較穩健，低風險，有股息的股票。你可以建立一個收息股的組合。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、置富（0778）、陽光（0435）都可以。

匯豐（0005）你都可以加入，雖然質素未算好高，但現價都有投資值博率，如果作為組合其中一員，可以，但不能太過集中。

------------------------------------------------

Q17191：

龔Sir想問，我宜家諗住加潛力股到我組合。
如上述所講(0788), (1211), (1177), (9988)都係我想加。

請問佢地既合理區及平宜分別係幾多呢？

龔成老師：

中國鐵塔（0788）大約$1.3，比亞迪（1211）$40。現價處合理區。

至於中生製藥（1177）同阿里（9988），由於現價有少少貴，所以，要大跌3、4成以上，才有機會稱為平。現價跌1、2成，就算是合理區。

------------------------------------------------

Q17192：

龔sir你好，上年曾請教你關於月供股票問題

我現時月薪仍然是$22000，上年年中開始月供港鐵及銀娛各$1000，另外於$10.86買左1117一手（送股前），現時現金大約有$46000

其實想請教的是：之前見你曾認同另一位網友，可把mpf 100%投放於盈富基金，於是我亦將自己的100%都投放到盈富基金，想請教現時是否應繼續運行？還是應轉到其他組合？謝謝

（現時每月人工扣掉各開支後，只餘$2000投資到月供股票，沒有餘額應作儲蓄）

龔成老師：

首先，你現時月供股票的部分，可以保持進行，如果之後有較多資金，就可以加入其他股，中生製（1177）可以長線持有。

現金方面，由於唔算好多，所以應繼續持有。如果大市出現下跌就動用。

至於強積金方面，其實配置唔需要太複雜，只要按你的人生階段進行就得，年輕時進取，中年就平穩，年長保守。你可以強積金100%恆指，可以的。

你唔需要因為市況波動而有所改變，保持進行就得，如果日後年齡漸大，才改變組合都得。

------------------------------------------------

Q17193：

你好老師，幾我年前買了8349、1.1入的，買了9萬股，現在跌到0.48，你可以給些意見嗎？

之前75.5買了01211，46放了，買了6000股，現在輸的怕怕了，現在的股價低，想贏番少少，不用那麼慘，謝謝老師

老師如果我月供股票，應該挑選那幾只呢？謝謝老師

龔成老師︰

美固科技控股（8349）從事多種玻璃鋼產品的研發、生產及銷售，主要產品包括玻璃鋼格柵產品、ＵＳＣＧ認證酚醛格柵產品、玻璃鋼地鐵疏散平台產品及環氧楔形條產品。

此股上市不久，規模很細，你見佢每年都係賺好少錢。2019年只有純利不足350萬，但佢市值去到成2億，好明顯係貴。

整體而言，佢質素只係一般。長線建議你換碼至其他優質股，對你會更有利。

另外，比亞迪（1211）係有質素，只你買入價明顯偏貴。明顯你對股票定平貴能力不足，用月供去投資，會對你較理想。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、港交所（0388）、希慎（0014）、太古地產（1972）
潛力股︰比亞迪（1211）、中生（1177）或福壽園（1448）
收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）、深高速（0548）

由於現時大市只在合理區底部，你用每月儲到資金一半做月供。餘下一半先儲起，待大市出現一定程度的下跌，才大力度掃貨，然後長線投資。

------------------------------------------------

Q17194：

老師，你好！我在0.41元買入1636中國金屬資源利用，請問能否繼續持有？該股是否老千股？謝謝解答！

龔成老師：

中國金屬利用（1636）盈利波動，本身有業務風險，而之前的股價十分波動，有可能是問題股。另外，佢的核數師報告，有一年出現了修定情況，這反映財務數據，有機會有古怪。

這股的確有可能有問題。如果從企業質素去分析，本身都是無乜價值。賣出會較好。

------------------------------------------------

Q17195：

老師，有無啲有質素既二三線股？

另外（2013）微盟質素點？

龔成老師：

天能動力（0819）、必瘦站（1830）都是一些二線股，但你會見到我在《50優質潛力股》都有推介。

我地選股最重要是睇質素，這兩隻都是有質素的公司，雖然並不是規模好大，市場最認識的公司，但從業務與財務數據去分析，就會見到這兩股是唔差的。

至於微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q17196：

龔sir，依家物管股入面邊間企業最為優質，而最有值博率又係邊間？

龔成老師：

物管企業由於業務穩定，現金流強，同時行業有增長，因此不少都是有質素，但估值都唔平，始終市場較有期望。

暫時睇值博率，雅生活服務（3319）較好。但現價不是大注時候，小注分注仍可。

------------------------------------------------

Q17197：

老師你好, 初接觸到你的專頁, 認識到月供股票, 想向你請教

看見你會提議投資新手月供盈富, 明白月供能分散風險, 並看重長期的價值, 但不明白其實當中我們可預期的回報是, 如我月供盈富$5000, 期望的是5年-10年後會有怎樣的回報? 能達至 某%回報 ? 能至少對抗通脹或貨幣貶值 ?

另外, 想閱讀老師你的著作, 有沒有甚麼觀看順序
謝謝

龔成老師：

盈富（2800）就是追蹤恆生指數，恆指在過往50年，連股息的複息增長，每年平均有約14%。

當然，近年中國與香港的經濟減慢，將來的增長不會這樣強，可以連股息只有8%-10%，這只是一個預測，真實情況要到時先會知，由於恆指成份股都是大型及有代表性的股票，所以可利用長遠經濟作分析。

如果你每月投資$5000，假設回報率為10%，10年後，就會滾存到約$100萬。

如果你想提高回報，就唔能夠單投資盈富，要同時自己選股，投資較有增長力的股票，以及利用適當的買賣時機去配置。

至於我的書你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q17198：

龔先生，如果我想將蟹貨570中國中藥（買入價$5.86）轉去788（現價1.51）或1093（現價13.78）。那一個比較值博？

龔成老師：

中國中藥（0570）的質素，的確不及這兩股，你轉是可以的。如果想較穩陣，就中國鐵塔（0788），如果想增長力較強，就石藥集團（1093）。

------------------------------------------------

Q17199：

龔先生你好！我手持幾十萬人民幣，一直做定期。是幾年前兌換時的價位，所以實際是資產貶值了。我可以怎樣利用這筆錢為我增值？

龔成老師：

長期持有貨幣只會貶值，你最好轉人民幣轉為港幣，然後作出投資，最簡單可投資盈富（2800），如果有選股能力，就投資優質股。

------------------------------------------------

Q17200：

老師，你好，剛剛加入你個page唔耐！但覺得你好正面，更想請教一下2128適合中長線投資嗎？

我睇左你近期嘅介紹，都會建議供盈富，25蚊，適合入手嗎？thanks

龔成老師：

中國聯塑（2128）有質素的，這股可以中長線投資，但由於這股比一年前已上升了幾倍，擔心股價會有潛在波動，所以在現價水平，唔建議這刻太大注。

至於盈富（2800），可以作為財富配置的一部分，有平衡風險的作用。$25是合理價，只要分注投資，同時留有現金，就可以。

現時大市處合理區，可以一邊投資一邊留現金，而餘下現金的運用，就是等大跌市時出手。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16161-Q16180）

Q16161：

龔老師你好，我今年29歲，剛買樓，俾完首期後儲蓄只剩下2萬，之後扣取家用及供樓等必要開支，每月應可儲5500，請問我可以點樣理財令自己財富增值？謝謝！

龔成老師：

如果現金不多，會建議$2萬留現金，唔好動用。

而每月就每月$3000股票，保持財富增值。

你29歲這年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

你可以考慮盈富（2800）$2000。

另外再加1隻（每隻$1000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$3000。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16162：

老師，我想上你的堂，但沒錢報讀，點算?

龔成老師：

我有一個3年前的學員，佢當時19歲，讀緊書，無錢，之後為左讀我的班，去馬會做兼職，利用自己的力量賺到學費，之後投資算是有少少賺，總之，所有錢都是佢自己努力得來，而家22歲，好有前途。

你都加油。暫時無資金，但唔好因此而停止進步，你唔一定要報我的班，但就一定要想方法突破！唔好一世都停留原地！

------------------------------------------------

Q16163：

如果有150萬本金，點投資賺錢好？
股市定樓市？

龔成老師：

如果你本身無物業，可以等機會投資物業，香港經濟將會向下，樓市1、2年好大機會會向下，但相信不會大跌，長遠計，樓市仍會向上。

所以如果你有資金，而未有物業，可留意下。

但如果你本身已有物業，就可以投資股票，建立平衡的組合。加上股市這刻有投資值博率，只要分注投資，同時留現金，就得。

------------------------------------------------

Q16164：

龔老師，你好，我同老公月入約4萬。
依家租屋住$7500/月。
支出約$5000/月。

即可以儲蓄或投資約$25,000/月。
請問我應該作怎樣的投資呢？

盈富基金會否太保守呢？但因為我唔太識股票，最近先開始學習相關資料。謝謝。

龔成老師：

如果你未有投資知識，投資較穩健的項目，是較好的，之後等你有知識先增加其他項目的投資。

你可以做月供股票，又或自行分注投資。好處是將買入價分散，減少一次過高位買入的風險。

你可以將年每月的$10000，用作投資股票，同時增加下投資知識，約半年後先開始加大金額。

你可以考慮盈富（2800）$6000。

另外再加2隻（每隻$2000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$10000。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16165：

龔成老師你好，本人今年25歲月入$35000，每年大約加薪＄2000。扣除開支家用等每月可存$17000。

現在月供
2800 ($3000),
3 ($3000),
66 ($2500),
1928 ($2000)

餘下的就存作現金，現持有以上股票總共23萬，現金15萬

打算把15萬分成三注，每注大約5萬，約恆指每下跌千五點，我就從上述4隻股票當中每隻入一手，不知道策略是否正確。

另外，因最近（3）煤氣的業績不太理想，考慮停止月供，正留意 （12）,（823）和（1211），不知道那一隻比較適合我現時的投資組合，還是我應該繼續供煤氣？

因工作穩定，所以不用留太多的現金，希望利用價值投資，把握今次跌市的機會，謝謝老師。

龔成老師：

先講你現時的持股，其實不差的，煤氣（0003）香港業務不強，但中國部分不差，中短期雖然較一般，但見佢的長遠發展力仍在，但就要耐心點。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，只是增長力的問題。

你可以保留原有貨，之後減金額。如果真的想轉其他，都可以。如果你25歲，可以考慮比亞迪（1211）。

至於入市策略，通常我地分注，都會每隔10%一注，你可以考慮2000點為一注。

------------------------------------------------

Q16166：

龔成老師，你好，一年前開始看你的書，和對讀者問題的回答，獲益良多

小弟今年43歲，在公司服務了廿幾年，現在月薪17000元，扣除大灣區的樓貸、保險和日常開支

現在有一手1177和一手1211，每月可儲蓄3000元，我想在5年內儲蓄＋投資有100萬元，怎樣才能做到？
多謝老師抽空解答

龔成老師：

現時的股票，可以持有，但你應該同時要有一定的現金。

如果你每月可以儲$3000，1年$36000，5年$18萬，要累積到$100萬，要有好高的投資回報先得。

如果為了有過高的回報，而背後面對太高的風險，就唔值得。

因此，建議你加大儲蓄，同時增加知識去提高回報，不過都唔能夠太進取。

你可以月供$2000去盈富（2800），餘下資金就儲現金。

建議你多增加投資知識，在選股、企業估值、投資時機上落功夫，對你長遠財富有好大影響。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16167：

龔sir , 吾知有冇記錯，你之前好似有提過如果買樓投資吾建議新樓及唐樓。但係西環果邊唐樓可以考慮，是嗎？

因為凖備用父母現契樓加按再加自己名借以家庭單位，共借到540-560萬，壓力測試下應該不太可能再借到其他大額按竭。

本人35歲月每月大概可儲1.7-1.9萬，現金不多，只有13萬，有一些坐艇的股，打算留6萬等之後股市低殘時入手sir 介紹的股長渣，之後再想有沒有能力再月供。

所以想請問應full pay買西環西營盤唐樓/50年以上近地鐵站翻新舊樓還是其他地方如九龍城舊樓或其他地區比較隱陣？謝謝您

龔成老師：

我在《大富翁致富藍圖》有講述過，這是考慮供應與地點的情況，這是其中一個可考慮的地區。

不過，太舊的樓，如50年，在維修的成本會較高，你要注意，同時當你持有一段時間後，要賣出，就已經更舊，下一手買家會壓價，因此資產長期升值的作用不大。

至於按揭方面，我會建議你點都借少少，等你可以有一些現金剩，唔好令自己完金無現金，咁樣可以有助你財富增值。

------------------------------------------------

Q16168：

龔成老師你好，看了你fb有好一段時間，好欣賞你的見解。之前工作太忙夾不到你上堂時間，這兩天買了你兩本書《股票勝經》和《50優質潛力股》。希望短時間內有機會同時夾得到你上堂時間。

近排股市下跌，希望藉此時間買多點優質股。但有少少迷惘如何入手，希望得到老師的意見。

現在29歲，月薪5萬，總資金大約有130萬。分佈如下：
10萬 基金
28萬 年金（一次過俾5年，有需要餘額可隨時取回）
40萬 現有股票
50萬 現金

現有股票 (主要2019-20買入）:
2800 @5,000股 (平均$24.98) 平穩
939@2,000 ($6.1) 收息
2388@1,500 ($31.27) 平穩
2318@500 ($40) 平穩
405@3,000 ($3.72) 收息
778@2000 ($10.36) 收息
823@400 ($63.5) 平穩
1928@1,600 ($31.9) 平穩
3@2,000 ($16.9) 平穩
1038@500 ($35.6) 平穩
66@500 (47.3) 平穩
1211@1,500 ($40.85) 潛力

按現價分佈大約(如果沒有分錯）：
平穩 77% 收息 9% 潛力 14%

未來六個月打算再入市，留有$15萬現金，剩餘50萬分4次入市(包括未來半年人工)。但老師我發現我的問題可能是不太懂得選股，之前入市的股票是老師曾經有提過的優質股，但可能自己不太懂從中選擇，所以買得比較散。

除了加注在現有股票未來還想再入多些股票，之前有留意老師fb和書本曾經推荐，以下股票有興趣入手但好像自己選擇得太多會令組合更加散，想問老師如何從中選股，不知老師可否給予意見：

打算組合大概比例為:
平穩 70% 收息 10% 潛力 20%

平穩
3140, 11, 14, 12, 1972, 27, 9988, 388

收息
2, 2638

潛力
1448, 1177

老師不好意思問得比較長，希望老師能夠幫忙解答給點意見。非常多謝你！

龔成老師：

你現時持有的股票，質素不差，基本上都可以保持有，比例上，平穩增長型佔大部分，適合你的，你之後仍可以繼續這方向。

不過，你持股有少少散，你應該小心研究每一隻股票才投資。

現金方面適中，而年金，這是防守性產品，你這刻是增長年齡，其實不用太多防守產品。

你將組合設定為：
「平穩 70% 收息 10% 潛力 20%」
可以。

當你上完堂後，會有更好的配置，暫時就以這為方向先，無問題。

暫時會建議你考慮：盈富（2800）、領航標普五百（3140）、恆基（0012）、太古地產（1972）、港交所（0388）、比亞迪（1211）、中生製（1177）、福壽園（1448）、阿里（9988）。

你暫時可以照你上述的投資策略進行，但唔好太急，最好最好等你上左堂先動用較大部分的現金。等你有選股、配置、把握時機、投資策略方面的能力，對你財富會較好。

------------------------------------------------

Q16169：

老師你好，本人45歲，仲有10年退休，一年前每月各供$1000 823 (領展）和012（恒地）

現想下月開始供多$1000 。唔知開始供盈富基金定繼續供番本身二隻其中一隻？謝解答

龔成老師：

原有的兩股，都是有質素的，可以保持月供。

如果想加多$1000，會建議你加盈富（2800），對組合平衡有較大的作用。

------------------------------------------------

Q16170：

Hello, 我之前入左144 （跌左）想問建吾建議再入？

然後仲有5萬現金， 有冇建議邊支股值得入？ 還是月供好？因為自己並吾係好識得點揀邊D股好。 thx

龔成老師：

招商局港口（0144），本身都算是有質素，不過，近年有關貿易的行業，賺錢能力低左，同埋風險大左。

先講佢的基本面，佢係中國最大，世界領先的港口開發、投資和營運商，係中國沿海主要樞紐港建立了完善的港口網，並成功布局南亞、非洲、歐洲及地中海等地區。

佢有龐大的港口業務，於中國處領先地位，絕對有其優勢。不過，貿易因素受全球及中國經濟情況影響，將令業務出現略波動情況。

另外，股本回報率低，加上中國進入經濟增長較一般的年代，都令這企業的賺錢能力較一般，整體質素而言，算是中等。

過往股價一般般，長遠來說將平穩，股息可以，但增長有限，現價有投資價值，但貿易問題對佢股價有波動，如果持貨不過多，守住先。但不太建議加注（除非你打算建立一個收息組合）。

你可以考慮月供盈富（2800），長遠財富增長會更好。

------------------------------------------------

Q16171：

龔成老師 你好，小弟21歲，大約有50-60萬cash 和20萬資產在手,但是收入不穩定

有時候可以一個月賺10-20萬糧，有時候可能2-3個月都冇糧出，本人打算現在開始每月供（2800盈富）$2000 （0066港鐵）$2000 （6823 香港電訊 ）$1000 （2638 港燈）$1000

請問老師你認為小弟應該選擇月供還是直接買入一手？目標在25歲前上車。

龔成老師：

如果收入不穩，你要預留一定的現金在手，最重要先計算自己每月的基本開支，例如$10000，就要預3-6個月的支出金額，作為最後防線。

餘下的資金，就可以進攻。我相信，你留$10萬作現金備用，已經足夠。

餘下的資金，可以在這幾年內盡力增值，投資以及等待投資之用。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

盈富（2800）是平穩增長股，另外兩隻則只是收息股，未必適合你。

其實你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$10000
。

你可以考慮盈富（2800）$4000。

另外再加3隻（每隻$2000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$10000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16172：

龔成老師,你好，想問問0390中國中鐵,我之前係5.72買入,因為環境同經濟影響,現在只有3.87

想問問未來能否追番上去

另外, 現在環境未明,股市大落,想問問如果而家入市是好或壞

不知道來緊指數繼續跌或是會升
感謝你

龔成老師：

至於中國中鐵（0390），本質不算差的，但唔好預佢的增長力好強。睇翻佢的業務同財務數據，生意同盈利都處於穩定狀態，但增長力唔算強。

所以長線睇，佢有投資價值，但增長只是平穩。佢過往股價曾在2015年大升大跌，這只是炒一帶一路，但之後回復原狀，因為這因素只能為佢帶來平穩增長，而不是高速增長。如果你持貨不過量，這股都可以持有的，要耐心點先有機會上得翻。

至於大市方面，相信會波動，唔好特別股，但如果是長線投資，都是一個不差的時機，可以尋找一些優質股，又或基金。如盈富（2800），分注投資，慢慢入，記住，要留有一定的現金慢慢用。

------------------------------------------------

Q16173：

龔成老師 想問下你對樓市點睇？
因為我岩岩落左訂買樓，並唔係自住，係打算租出去。但供起上黎係用左我成份糧

但近排社會事件 加上美國近排做既野都好似會影響到香港既國際地位 我怕樓市股市會因此大跌

想問下老師我應唔應該撻訂？同埋對樓市前景點睇？謝謝老師

龔成老師：

現時的確有不確定性，但有可能只是中短期不利情況，我會建議你「不要撻訂」

香港經濟會轉弱，但長遠的樓市，仍是處於供不應求的格局，因此，長遠香港樓仍不會太差。唔好太著重中短期，要睇長期。

不過，你要考慮自己的供款能力，我相信「供得起」是最重要的。

如果你將物業放租，應該能支付大部分的供款。

------------------------------------------------

Q16174：

老師又有問題，幫朋友問， 今年28歲，每月大約儲$10,000 -$15,000

朋友唔熟股票，有少量月供，除咗月供股票之外有沒有其他儲錢計劃可以另佢五年內多錢過放銀行呢？ 謝謝

龔成老師：

佢可以考慮銀行或保險公司一些「產品」，可以叫佢自己問問。

這些產品會得到比存款較高的回報，但風險會低過股票。不過，我覺得28歲，應該「增值」多少少。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

如果佢未有選潛力股的能力，未有掌握投資時機的能力，就可以簡單地投資盈富基金（2800）。

如果唔想月供，就自己分注，例如每隔2、3個月買一手，都是一個方法。只要唔用盡現金投資就得。

------------------------------------------------

Q16175：

龔成老師，我一直都係比較鍾意花錢，但因為計劃下年結婚，所以開始儲錢。加上最近Facebook 聽到你講野，我開始覺得增值迫切過購物。

今年36，儲蓄現金480k,
700股渣打$48入，
中人壽1000股$17.2入
2000股中國鐵塔$1.6入
200股華泰證券(抽）$24.8

一直以來人叫我買咩 我就買咩，以上都係可信既人叫我買我就買。

我仲有d變左仙股既野，其中算無咁衰既彩星 $4買入既有萬幾股，由4-5萬跌到依家得返2，3千蚊。其他得1，200蚊價值個D就唔提了。

有邊d股應該放左去？

睇左你本書，我決定要增值，唔再做羊太。咩～～～
等緊你股票班羅

每月可儲20k-30k（因從來無計算過，唔知實質可儲幾多錢）

我想試下月供股票，請問應如何分布，供d咩？供幾錢左右（本身心態覺得平先買， 睇左你D片，決定試下月供） 亦打算樓市下跌市時置業，應如果部署？

一直以來生活都傾向吃喝玩樂，感覺自己比人遲了很多，身邊既人都上左車，幸好係Facebook 同YouTube 睇到你既野， 暫時改變了花錢既習慣，希望今年可滾儲到90-100萬，謝謝你啊，祝你愈來愈多學生，愈來愈多like 。

龔成老師：

我地繼續持有一隻股票與否，是基於這企業的質素、前景，如果質素不好，就要賣出，但如果只是股價跌，就不用賣。

你現時持有的股票，質素算是一般，但不算強，因此不應持有太多，長遠應該建立一個更有質素，更有增長力的組合。而彩星玩具（0869）最好還是賣出。

你要設計一個組合，我地投資是一個配置的過程，你要設定，多少比例在某類股，多少比例在那行業，這行業那些股最有質素，如果你不懂分析，投資盈富（2800）是最好的選擇。之後就要長線投資。

你亦可考慮：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

你可以月供做月供，$18000，保持進行。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16176：

龔老師，我阿媽今年55歲，佢想攞一筆15萬嘅現金投資一下，最近股價見到有回落，想請教一下以下股票值唔值得入手：

1. 日清食品(01475)
2. 粵海投資(00270)
3. 維達(03331)
4. 長實集團(01113)
5. 港鐵（00066）
6. 港燈（02638）

以依家市場不穩定嘅情況之下，適唔適合入市or係呢筆錢中攞部分作月供股票，部分錢稍後係股票較低價入手呢？？？

Or 襯依家其他貨幣貶值時買入一啲貨幣係手呢，例如：澳元、英鎊？？？謝謝

龔成老師：

以佢的年齡情況，會比較適合投資粵海投資（0270）、港鐵（0066）、港燈（2638）。

利用月供是較好的做法，因為大市好波動，要成功捕捉不易，反而用平均模式，月供去入，風險會較低。

但要留意，唔好太快用盡現金，要慢慢用。

------------------------------------------------

Q16177：

老師你好，我有個問題想請教下你！

我印象中之前領展系 500股一手 ，現時改做100股一手

點解要咁樣做呢？
請問咁樣做對領展係好事定係壞事？

如果轉成100股一手
代表着市民可以更輕易入市
咁係咪就代表佢集資會多咗呢？

一隻股票如果有呢方面嘅更改
請問係我哋選擇買入嘅時候有需唔需要考慮呢個因素？

Thanks 老師 .

龔成老師：

其實，這同佢集資無關的。

由於佢最初上市時$10，多年來升左好多，散戶的入場費因此而大增。所以佢想一般人，都能以一個唔太高的金額入場買到佢的股票，所以佢調低左手數，無乜特別的。

目的只是方便散戶，以及增加流通量，對企業價值無影響。

------------------------------------------------

Q16178：

龔成你好，疫情之下終於有時間睇書增值，一口氣睇左兩本你的書「80後百萬富翁」「大富翁致富藍圖」獲益良多，謝謝你分享你的寶貴經驗。

我是一個70後，這年紀先學人投資股票，雖然有點遲，但學海無涯，我還是想請教一下老師。

其實之前我有買舜宇光學(02382)持有1500股，因呢隻股有做手機鏡頭同汽車用鏡頭，所以我覺得潛力應該不差。
但拜讀你的書籍後，發現它的市盈率非常高(25) 於是想請教一下老師呢隻股票值唔值得長線投資？還是減持等待其他機會？謝謝你的寶貴意見

龔成老師：

有心唔怕遲，保持進步就得！

舜宇光學科技（2382）有一定的質素，不過之前股價處貴水平，上年手機市場疲弱，佢都回至合理水平。

過往由於手機市場高增長，令佢鏡頭業務受惠不少，但近年手機增速開始減慢，增長力會變得較平穏。

我的《50優質潛力股》（2020年版）都加入了股。

中短期，佢會平穩，但長期，無論是手機，還是鏡頭相關的發展，都會帶動佢增長的。20倍以上的市盈率，不能算平，但現價算是合理，只要分注投資無問題。如果你貨不過多，長線持有就得。

------------------------------------------------

Q16179：

你好 龔成老師
假如$5000月供盈富基金 大約何時到達50萬？

龔成老師：

你預大約6、7年，要預視市況而定。

盈富（2800）最好的方法當然是長期月供，保持是最好的。如果市況出現先大跌，後大升的情況，你就可以以較短時期能累積到$50萬。

------------------------------------------------

Q16180：

Hi 龔成，已家月入萬四，月供緊$1000(2800) $1000(0066) $500(1211),呢個組合會唔會太分散

另外有兩手金沙，但賭業前景好似不太看好？另外想問下美團(03690)個質素，Thanks成哥

龔成老師：

上述所供的，都是有質素的股票，基本上可以保持進行，當然唔會太散啦。如果日後有更多資金，可以加大盈富的金額。

金沙（1928）中短期當然會弱，但長遠仍是正面的，你持有就得。

至於美團點評（3690）我唔敢睇少佢的業務，因為真的業務巨大，同時增長快，不過，佢仍是有危有機的股票。業務較新興，估值難，這一定會令股價好波動，這類企業不是不可投資，而是不能大注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。