點解英文老師會鬧人？ 老師對學生的理解越深，越不會嫌棄他們程度低。 教英文咁耐以來，成日聽到嘅故事就係同學覺得學校英文老師好惡，會鬧佢地，佢哋讀錯字，或者寫錯字，老師就會好嬲，父母嘅態度都係一樣，講都唔使講你哋都估到，好多同學亦都係因為咁而討厭左英文。 老師要同理一個程度低學生，當然唔係容易，特別喺香港呢個教育制度底下，老師嘅工作負擔已經好重，仲要講同理心，一啲都唔容易。 今日想同你地分享兩個故事，講吓老師可以點樣同你到學生，先肯定學生，之後再用一個妥協同你解嘅方法幫到學生。 第一個故事係咁嘅： 有個老師發現學生上堂嘅時候成日咁撳筆，騷擾到其他同學，老師將呢個同學拉埋一面，同佢傾談，了解佢點解要撳筆，嘈住其他同學。 老師喺同同學嘅對話之中發現其實同學咁做，係因為佢有過度活躍症，一定要不斷郁動，幫佢保持專注。 老師發現咗呢一點之後，就冇迫同學唔准撳筆，亦都鬧佢撳筆，反而肯定佢話其實你想咁做都係因為你想喺堂上面專注，呢一點係值得欣賞嘅，不如我哋一齊諗吓一啲方法可以令到你上堂郁吓得黎，又唔使嘈到其他同學啦。 最後老師比同學上堂嘅時候un腳，但係佢唔需要再透過撳筆去保持自己專注，嘈到其他同學。 第二個故事係咁嘅： 我自己英文好，甚至可以講係同好多香港學生程度相差甚遠，in this sense我有資格教佢哋英文。 但係當我發現佢哋同我嘅程度差太遠，而佢哋極都係嗰啲部份嘅話，我就嘗試去搵出點解佢哋重重複複錯。 如果我見到佢哋重重複複錯，而又搵唔出原因，我會嘗試諗返自己去學某啲科目嘅時候幾辛苦。 我電腦科真係好廢。 我記得我中學嘅時候上電腦堂係最辛苦嘅，因為我唔識透過觀察佢望見畫面上面有啲乜嘢郁，從而去推斷自己應該撳邊個掣先至會做到某啲效果。 我亦都唔識編程，我成日覺得要諗一個程序出嚟，要做好一件事好難，我唔理解編程嘅邏輯，亦唔理解老師嘅講解。所以IT堂要做嘅功課包括要寫嘅code都係我同學幫我做嘅。 就係因為老師嘅解釋唔係按住我能夠理解世界嘅方式去調整，可能係照住書讀，有可能係我嘅學習方式同老師太唔同，亦有機會係因為我本身學習嘅能力同埋呢一課要求嘅能力好唔夾，所以令到我電腦科嘅成績唔好。 諗到依度，我就唔會覺得學生程度差係一啲好奇怪嘅事。 作為老師，一定要經常諗返自己唔叻嘅嘢，重新諗返學生學某樣嘢，由零開始，成日掙扎，有幾辛苦。咁老師先唔會嫌棄學生程度差㗎。