【破涕為笑】

兩年前嘅秋天，十月最後一個星期五…

今早，我負責當值，返8：00am(中心開放時間)，聽大堂保安同事講，未到7：00am，大樓下已有條長人龍，點解？因為今日中大盆菜宴開始賣飛，$25/位，名額55個。

8：00am開門，老友記蜂擁而至，我同接待處同事互相合作，採取派籌制；我負責派籌兼維持秩序，佢負責call咪兼賣飛。每位老友記憑會員證可以幫多一個老友記買，即一人最多買兩張飛，8：30am開售。

所有籌一分鐘內派哂，其餘全部歸後備！未到8：30am，已有超過130位老友記上嚟登記！

同買演唱會飛同IPhone一樣，一定有人歡喜有人愁！維持秩序期間，我要不停安撫買唔到飛嘅老友記，我同佢哋講：「買到嘅開心去玩，買唔到嘅都唔駛唔開心，一嚟機會成日有，二嚟太夜，夜猛猛，黑蚊蚊，中大好多蚊，你食盆菜蚊食你！我冇呃你，以前姑娘讀中大，成日俾蚊針㗎！」

有啲老友記受氹，乖乖笑住離開，有啲依然嘰哩咕嚕，話自己8：00am嚟排隊都冇位！有個婆婆最淒涼，呻吓呻吓，竟然喊咗出嚟！原來佢同三個老友記一齊晨咁早嚟排隊，只得佢一個買唔到！

見佢喊得咁淒涼，我攬住佢膊頭安慰佢之餘，仲靜靜雞送咗包長壽麵俾佢！我叫其餘三個買到飛嘅老友記請佢去飲茶食馬拉糕，三個平均年齡80嘅邊應承邊幫呢個78歲嘅抹眼淚，場面都幾感人！

78歲女主角仍然喊到收唔到聲！見佢排牙唔多掂，我忽然靈機一觸，問佢駛唔駛整假牙？婆婆邊喊邊點頭話想，我發現佢原來合資格申請關愛基金長者牙科資助計劃！

我同婆婆講，見佢喊得咁淒涼，優先幫佢辦理申請手續先，其他申請人通常要等兩個幾禮拜，叫佢千祈唔好同人講！

呢招果然有效！婆婆聽見唔喊喇！即刻返屋企攞紅簿仔，戴住副黑超返嚟搵我！我笑佢係咪喊腫咗對眼要戴黑超？佢笑住辯稱啱啱做完白內障冇耐唔曬得！

同婆婆完成所有手續後，我送婆婆去搭lift, 婆婆眼濕濕捉住我隻手，笑住話：「阿肥姑娘，多謝妳！」

婆婆，唔駛客氣！見妳笑返就好喇！冇很食盆菜，賺到排假牙，係咪好喜出望外呢？話時話，等妳第日整好副牙，有大把機會！係咪？