【龔成問答信箱】（Q22441-Q22460）

Q22441：

龔sir你好，本人係聾人，最近對於聾人遇到很多不公平的事，例如社會上健全人在最上層，盲人、其他殘疾人士比健全人地位低，佢哋可說話，可溝通。

可是聾人呢，卻是更低，在最最低層。我們手腳都沒問題，但不能溝通，不能聽電話，只能被壓到社會的最低層。其實政府對殘疾人士，完全零支緩。但我沒有自卑，從來沒有，我總希望自己可以堅強一點。

本人很想向你學習下，為買股票想財富增值。

從未睇你FB前第一次買咗[email protected]（二手）跌咗蝕得甘慘，咁難升番上0.64，打算想賣出後轉到有質素的股票。有咩意見？

今年3月頭，一向都有留意你分享，日日都有睇你的Q&A, 覺得有用，得益不少。如你開班我第一時間會報名，可惜我不能因聽不到（聾不代表啞）

你教的課堂內容，變相會跟不上進度，就係我遇上很大的學習困難,so sad, 唯一方法是購入你的作品，

最近睇咗你三本“80後千萬富翁“，“50後穩健收息股“，“股票勝經“，睇呢本書有d未必一定可以理解，想請教你，有個問題我唔明白又唔懂点計算，

例如建立咗一個長期的「平穩增長組合」，佢哋收入都增長，盈利都保持向上，加上股本回報高，有機會回報高10倍or可能未必成為10倍股 ，所以要睇佢哋之後的業務發展，

請問呢個点計算法？可以舉個簡單例子？可簡單解釋嗎 謝謝

我35歲，月入19k, 每月約有10000作儲蓄，給家用9000元，希望在10年可資產增至200~400萬, 目標：50歲前提早退休，想做財務自由。

現時持貨如下：

平穩增長股
1928 ＄28.25(1手)
0012 ＄35.9(1手)
2318＄68.85(1手)
0270 ＄10.6(1手)

潛力股
1810＄21.65(1手)

收息股
939＄6.13(1手)

我自覺賺的幅度不大，打算將邊投資（平穩股70％ 潛力股30％）邊儲蓄的策略，等跌下會大力掃貨。請問有沒邊啲股票係有機會做到5年或10年後有200~400萬？

不好意思我講到甘多，期望得到你的回覆，謝謝

呢本書你講句“現金不斷會貶值，不是財富“ 你講得好好講得有道理

買咗你本80後，希望睇完增加了一些投資嘅知識，努力

voo定期定額好？月供好？謝謝

龔成老師︰

這個世界，有好多客觀條件，未必到我地控制。唯一可以做的，就是唔好比這些因素，去限死自己。盡力去打破這些限制，為自己創造出更多空間。

只要你有夢想，內心夠強大，其實無野可以難到你。

我當然不能夠明白你的情況，但現時利用文字，在網上或其他平台，都可以作出溝通、發聲、工作，你要加油！

現金，由於可以無限量發行，因此長線必然會造成貶值。所以，我地財富增值，就係將只會貶值的現金，換成優質資產的過程。

令我地財富不被貶值影響之餘，可以有一定增長能力。

你所講的歐科雲鏈（1499），我本身無特別研究，佢屬較高風險類，要睇下你博唔博。過往持續虧損，見佢股價上落好大。只可以話，唔建議大注，自己衡量風險。

計算企業的價值方面，過程其實比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

所以，我好難係而度解釋，或者用例子去講解估算方法。

雖然你未懂估值，但唔代表你唔可以進行投資增值。但方法上，要進行調整，例如用月供或者分注模式，去減少你買貴貨風險。

以你35歲計，現時持股係可以。以你年紀和投資經驗計，平穏增長股和潛力股比重都正確。

你現時應以增值為主，建議你用「平穏增長股」 + 「潛力股」作組合，去創造一個增值平台。

正如你先前計劃所講，你現時將每月5成儲蓄，即$5000做月供。其餘先儲起，用一邊月供一邊儲蓄的策略。

但如果你對這些股票認識不深，可以全供指數基金。如果你都有認識，就可以用你平穩增長股70％ 潛力股30％的分配策略，去選股。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

我假設投資回報有10%（連股息再投資），你每月投資$10000 + 現有持股約10萬，10年後大約會增值至200萬。

至於你能否50歲提早財務自由，就要睇這筆資金，是否足以滿足你期望的退休生活水平。我假設你退休後，預期每月需要用2萬開支。以股息率6%計，你就需要本金400萬。

你可以用這個計算結果，作為參考，再去調整你投資計劃。

至於Vanguard標普500指數ETF〈VOO〉，是追蹤標普500指數的ETF，算係平穏增長股類別，都適合你年紀。

其實你做月供或"定期定額"都可以，因為2者都可以做到平均價格效果。但重點係必須長線(建議最少供3年和持有5年)去進行。如果供下停下，或者成日轉變，就唔會有意義。

------------------------------------------------

Q22442：

想請教，阿里巴巴旗下菜鳥網絡牽頭投資一百二十億元，在香港國際機場南貨運區的過路灣興建智能物流中心，作為一帶一路的貨運設施布局，

將為本港出口商再增一個貨運出口選擇，亦便利消費者經由淘寶購物收貨。阿里巴巴這個ai 物流倉是否未來企業關鍵？

帶來豐富收入，9988現價合理？

阿里巴巴這個ai 物流倉是否未來企業關鍵？

好似Amazon AI物流中心，之後股價一直上升

龔成老師︰

阿里巴巴(9988)宣布投入1000億人民幣，於香港機場打造高端物流中心，預期在2023年投入營運。此營運中心，將會是該地區同類設施中規模最大，技術最先進之一。

中心由菜鳥網絡帶頭開發，中航、圓通快遞都係當中投資者。

此個新營運中心，配有全自動化倉庫、溫度空調、空運處理中心、訂單處理中心等。

集團過往一直收入核心，都係來自內地零售商業部份﹐佔收入近75%。集團在內地發展，其實已相對成熟，相信集團預期該部份增長，會開始有機會放緩。

因此，集團開始著力開發更多其他市場，在香港機場打造高端物流中心這個布局，可以睇到佢這方面野心唔細。

這個物流中心，係一個利好因素。但這只是一個資本性投資，到底到集團有多大幫助和效益，現在言之尚早。但長線計，一定係對集團有利。

但估計方面，我暫時唔會有調整，宜再觀察，才再決定。

------------------------------------------------

Q22443：

老師你好，我是之前曾經向你請教過一些問題的讀者。亦都購買了老師的著作

其實我在今年12月便會前住加拿大工作。我現在存有12萬現金。13萬保險基金和12萬股票總值。

1. 0068 （15.3入）2000股
2. 00823 （67.25入）500股
3. 00939 （5.84入）10000股
4. 03918 （7.940入）2000股

想請問在移民的前提下如何分配現有的資產?謝謝老師

龔成老師︰

首先，你要先清楚，移民時是否所有在港資產，都係會變現。

如是，由於你12月就要走，多於1手的股票，你現在就要慢慢分段沽出股票，唔好等到走先一次過沽。

如否，以你剛畢業年紀，應先做好增值部份。建行(0939)只係收息股，增長力欠奉，不宜持有太多。

利興發展(0068)無投資價值，但由於佢停左牌，你現時無野可以做，等佢復牌就沽出。

其餘2隻都有質素，可以照持有。但金界(3918)由於疫情關係，中短期一定會較弱，但長線持有係可以。

12萬現金就先留起，等大跌市機會。

另外，緊記要開始月供計劃，因為我地長遠組合，唔可以只係得1,2隻股票，應該係有不同行業優質股，才算平衡。

------------------------------------------------

Q22444：

1) 明白老師,咁買入一隻股票之後預算要擺幾耐左右先至係最理想?即係要擺幾耐之後先至等收成?去睇吓佢有冇升?

2) 同埋老師我之前睇過你啲書, 如果你話價值投資係一定要買入優質企業然後長線擺好耐,咁樣係咪唔使理個價位高低月供股票都可以?

只要我知道呢個公司好有價值,例如好似中電煤氣咁, 咁咪就算幾貴都好都應該買?

咁樣嘅話月供股票都唔使煩㗎喎?淨係買呢兩隻都乜都得喇?用成副身家買晒佢哋? 總之有錢剩就擺晒落去咁係咪一定賺㗎?

3) 同埋老師想請教你, 我好似你咁講試吓買吓啲月供股票, 但我發覺裏面個倉可能有幾隻上升,同時間有幾隻又會下跌, 情況就好似啲資金只係搬龍門,擺嚟擺去,

咁其實我哋嘅策略應唔應該逢親嗰啲股票上升就賣咗佢, 然之後將同一舊錢入返啲一齊下跌左嘅股份?如果唔係好似每次嘅上升浪同跌浪都好似唔關自己事咁?

其實舊大錢都冇乜點變?定抑或應該全部都長線投資?只要等嘅時間夠耐,長時間全部整體都會升?因為我擔心就算我擺咗好長時間如果佢都係只係搬龍門,有啲上升又有啲跌,

咁最終就算我擺咗好長時間舊錢都唔會多咗好多個喎?謝謝老師

4) 唔好意思老師, 同埋想請教你, 最近睇你寫嘅嘢,你都話要我哋趁後生嘅時候掘多啲井, 儲多啲錢, 準備充足,

咁我想請問如果我每一個月將我全份人工扣除晒開支使費比屋企人同埋信用卡,有政嘅錢如果全部都擺晒落股票有冇問題?

因為我做緊月供股票, 同埋買嗰啲股票都係喺低位先買,逢親低位先至月供個一隻股票,因為我嘅概念就係銀紙係會貶值，咁我每個月將啲錢擺落去一啲穩陣同收利息嘅股票,

就算我將所有剩餘嘅積蓄擺落去,唔知會唔會都冇問題呢?

PS: 我都有啲流動資金可以應急, 有一舊錢可以靈活運用冇問題, 但係每個月出糧嘅人工可唔可以用晒嚟買股票?

龔成老師︰

1) 一般我建議持有最少5年，當然優質股永遠都係長線持有，增值效果才會最好。中短期股價會有波動，會有起有落。但長線股價，必然會將企業質素反映出來。

2) 其實我地買股票，除了要有長線投資價外，"股價平貴水平"和"組合平衡性"，都係好重要。

月供雖然有平衡價格波動能力，但太貴時候，我地都會考慮減供款，甚至停供。但如果你係初學者，對企業估值無太大信心。

我就比較建議你不理價格平貴，一直去供，反而會更好。因為你自行調整，若果判斷錯誤，有好大機會拖低左長線回報。反而不理價格，對你會更有利。

另外，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

3) 你唔好依然停係賺差價模式，我地現在投資增值，係將長線只會貶值的現金，轉換成資產的過程。而優質股，係資產的一種。

但再優質股票，中短期都會有波動，你係唔洗太在意。只要你長線持有，佢都就自然會有唔錯增長。

4) 現時大市只係合理水平，未到平宜區，每月儲蓄你預用一半左右，去做月供好了。餘下一半，我地先儲起，去等大跌市機會。

你現時才33歲，係選股時，應選擇一些較有增長力股票，先去為自已累積一筆資產。到近退休之年，才慢慢換回收息資產，支援退休生活。

所以，你應先集中增長，而唔係收利息。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

------------------------------------------------

Q22445：

你好龔成老師，想請教下: (我45+歲) 現持有組合：

長和 500 股
香港中華煤氣 600 股
匯豐控股 1,091股
恒生銀行 111 股
港鐵公司 1,100股

香港交易所240股
陽光房地產投資信託基金 2000股
領展房產基金 900 股
建設銀行 4,280股
長江基建集團 500股

華潤置地 260 股
工商銀行 4,180股
平安好醫生 100股
金沙中國有限公司 580 股
中銀香港 1,570股

盈富基金 1,090股
交通銀行 930股
中國銀行 2,200股
阿里 100股

這樣既組合是否可以。

請問你是否贊成賣出交通銀行買入復星醫藥 (2196)?

想供月供股，每月$3,000，領展（823）-$1500 & 比亞迪（1211）$1500? Or 領展（823）- $3000, 不知道可以適合我 ? 請問你會建議我買哪些股票呢? 盼回覆～謝謝！

請問你陽光房地產 or 越秀房產信託基金 or 領展比較適合我?

龔成老師︰

你現時持股，雖然都係有質素，但數量實在係太多，好難定期檢視管理。長線計，你最好集中翻係10隻左右。

另外，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。你組合中，銀行股佔左唔少，你要審視翻個比重，以避免出現過度集中的情況。

唔建議賣出交通銀行買入復星醫藥 (2196)，復星現價略貴，要回多少少才算合理。

以你年紀，我建議集中在平穏增長股類。領展(0823)係可以，但我地投資唔可以只集中係單一股票，我建議你都加入指數基金，指數基金供$2000 / 領展供$1000。

陽光房地產(0435)和越秀房產信託基金(0405)都可以考慮，但佢地主要係收下息，增長力無領展咁高，以你年紀，領展(0823)會係比較適合。

------------------------------------------------

Q22446：

想問多一問你意見，假設我而家買入一個單位450萬，俾首期兩成，呢個單位會放租，但有機會未必一定請時間可以放租，有機會預算自己都要供樓，

用以上呢個方法就係擔心樓價不斷上升， 而萬一幾年之後股票增長不太理想，可以自住。但假設股票增長理想 呢個單位會賣出 而買入反一個600-700萬單位自住。

問題係，咁會現金用左100萬 俾首期，剩返180萬投資

1） 是否唔應該現在買入一個單位先？ 因為自己租樓住唔想追唔切樓價上升，所以諗緊要唔先買一個單位，同埋有機會五年之後賣出呢個單位，會比起集中只投資效果冇咁理想？

另外擔心一買一賣 都需要印花稅 等費用

2）以我諗法希望5年後有500萬以上 當然希望回報可以再大，可以50%潛力股 50% 平隱增長嗎？

3） 如果用五年時間投資，預留一半現金等大市大跌再埽貨，但冇人知道大跌市係咩時候，咁應該點樣去衡量？

所以例如如果兩至三年仍未大跌市，佢應該keep住月供，或者分注見低就入？

謝謝老師

好希望盡早投資 生活會較理想，多謝你成日比正能量人

4) 老師， 現在平衡股票如下 會長線投資。請問一問 以下組合如何，可給一點意見嗎？

用180 萬 先分注入
再留100 等機會

大約
60%潛力股 ：
1177 12％
1810 17％
3067 17%
9988 12％

40% 增長
2388 14％
1972 14％
0548 14%

月供 $2000 2800
月供 $2000 2845

龔成老師︰

1) 這個問題，無一個100%答案。正如之前所講，現時樓市租金回報率不高，正常用優質股增值，個效果會較好。

但無人知5年後，樓市升快D，定優質股升快D。我地只能用現有水平，去得知值博率係而一刻，係優質股較好。但唔代表最終，樓市唔可以跑嬴翻優質股。

所以，"用投資優質股換大屋"，定係"細屋換大屋"，你要自己衡量。從現時值博率計，會係前者。

但若你相穏陣D，其實先買細屋，再換大屋都未嘗不可。但你要確保細屋升值能力，最少能跟大市同步。

另外，你可能會用來自住，即係佢都要滿足你長線生活需要。而且，間屋唔好太細，最少要有300呎以上(一個家庭基本需要大細)，才有基本投資價值。

2) 可以，但留意如果要直接入貨，現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)算在合理區中上至頂部，可分注入貨，其餘都略貴，想買就要等一等。

但如果係月供，我之前推介你的股票，現價都可以開始。

3) 的確係無人知，但我地投資係唔會"估"走勢，只會用平貴去定策略。現時市況係合理水平，我地應預留3-5成現金，去等大跌機會。

因為我地唔會知幾時大跌市出現，但如果你無現金係手，真係出現時，你會錯失良機。

4) 你計劃係可以，但小米(1810)都仲係有D貴，最好回多1成才入。

你緊記180萬係分多注咁，慢慢入貨，唔係一次過買晒。

另外，深圳高速公路（0548）只係收息股，增長力好弱，唔係咁適合。我建議你將佢換成指數基金，去增值組合平衡性。

------------------------------------------------

Q22447：

龔成老師，這個失敗的組合(0003, 0012, 0778, 1299, 2388,3067, 3383, 9988) …應該怎麼辦…？ 除了aia , 有很多股票由2017，18年坐到現在… 到了3067，我不停加註，怎知愈來愈跌

很灰

龔成老師︰

你整體的持貨不是劣質，不少都是有質素的，但部分你可能在較貴的價位買，以及市況波動，令股價向下，建議你日後多用平均入市法，又或提高計算企業估值的能力。

另外，你提及3067不停加注，記住，投資要有策略，買入前寫低具體的進行方法，投資後要長線，持股5年以上。

只要長線質素無變，中短期波動我地唔需要理會，長線持有就可以。

另外，我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

你現時持有股票，都係有質素，可長線持有。但當中雅居樂集團（3383）負債水平較高，不宜佔太高比重。

我見你安碩恒生科技(3067)都加注左唔少次數，你要留意此股和阿里(9988)都係潛力股類，雖然有長線投資價值，但風險會比較大。如果你年紀較大，或者投資經驗不高，這類股票不宜持有過多。

------------------------------------------------

Q22448：

龔成sir, 你好，多謝你用心的分享，增加咗我唔少投資方面的知識。一直以來都無去做過咩投資，特別是股票，了解不太多。

最近數月，我開始透過youtube及朋友了解到股票投資。

想透過穩建的投資組合去增值資產，而非將錢放銀行貶值。增值資產主要目的在放：

1. 短：5年內換2房半或3房單位（$900萬以下）
2. 中：（10-20年內）孩子將來有到外國留學需要時用
3. 長：（20年）將來退休生活費

現時我（33歲）與老公（39歲）有穩定工作和收入，每月收入扣MPF約$68000。每月家庭開支約$56000，可儲約$12000。育有1個幼兒，有計劃1-2年內生多一個小朋友。

資產：
1. 現金$30萬
2. 物業：市值約$620萬，每月供約$14000（仍欠銀行$296萬），出租每月$13000（自己租樓住$16500）
3. Ibond: $30000
已買基本醫療保險

現在有些投資想法：用一半現金儲備投資股票（用一半在黎緊尼次股市下落中分注買入一些平價位優質潛力股(0700、9988、2845，各100股）；

一半投資穩健收息增值股和EFT（0823/VOO/HD/0303/0006/6823）作儲蓄增值之用；另外，計劃每月供$6000股票（0823/VOO/HD/0303/0006)

Q1. 以上這個投資計劃會否太進取？分佈是否平衡？

Q2. 月供股票主要想放在有穩定收息增長及分散風險的股票，想問我較適合先投資哪些我計劃內的股票？

Q3. 美股我計劃待下跌後再供，VOO & HD咩價位為之適合入市？

Q4. 以上三個潛力股到何價為平（以作參考入市價位）？會否有另一些更合適我投資的優質潛力股？

Q5. 我也有想過入0388，咩價位才適合入市？

謝謝你。

龔成老師︰

其實你3個目標，我地都可以透過用優質股增值，去達成。

1) 潛力股部份，係可以。但另一半，以你們年紀和計劃作考量，我較建議集中在平穏增長股，而非一些收息股。

領展(0823)、VOO、HD係可以，但其餘3隻都係收息類股票，增長力唔高，唔建議用。你可以用以下股票，去取代這3隻。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

2) 由於你3個目標，都係需要財富增值才可做到，因此選擇方面，應以增長股為主。

你月供計劃，同樣有少少保守，建議你將偉易達(0303)和電能(0006)這2隻收息股，換成潛力股，去增升組合增長力。若你相保守少少，換成平穏增長股，都係可以。

每月餘下$6000就先儲起，等大跌市機會。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

3) 現時佢地價格在合理區，你照保持月供，咁就可以。我地月供只會係去到好貴，才會考慮下調供款額，甚至停供。

如果你本身定平貴能力不高，我建議你不理價格，一直月供會較好。因為你自己調整出錯，就好大機會影響你長線回報。反而一直供，會對你更有利。

4) 上述的潛力股，都適合你。你可以睇翻自已對邊個行業或企業更看好，本身對隻股票，又有一定認知，去決定投資目標。

部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

5) 港交所(0388)都係一隻可選擇的潛力股，但現價略貴，回多1,2成才入，值博率會較高。

另外，你持有的IBOND只係定息產品，無增長力，唔適合你。建議沽出，用來投資優質股會較好。

------------------------------------------------

Q22449：

成哥，想問下以下組合係米仍然繼續特有適合?

700 ，556買入
799，10.94買入
3383，10.94買入
3690，281買入
1810，28.61買入
939，6.2買入

龔成老師︰

騰訊（0700）、小米(1810)、美團(3690)和IGG（0799）有質素，可長線持有。但美團(3690)和IGG（0799）不確定性較高，不宜持有太多。

上述4隻都係潛力股，如果你年青，持有係可以。但若你年紀較大，就只宜好小注。

雅居樂（3383）業務上是有質素的，但中國經濟有少少風險，加上佢本身負債較高，相信會對佢有影響。

這股都有長線投資價值，但負債高始終是風險，唔建議太大注。

而建行(0939)都有長線投資價值，但佢增長力不高，只係收息股類。如果你係較年輕，這類創造穏定現金流的股票，就唔適合你。

------------------------------------------------

Q22450：

龔sir，請問2158 $35.5入 1044 $50.9入現價可溝嗎？可以長期持有嗎？

龔成老師︰

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

之前貴，現價依然係略貴，唔建議加注。而且，此股不確定性較大，只宜小注投資。

恆安國際（1044）主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

長遠來說，恆安仍有一定的前景，故有投資價值的。成本上升，令佢略有風險。整體而言，有長線投資價值，現時大約在合理區中間。

若你本身計劃分多注投資恆安的話，現價加1注係可以。如果你資金不多，等佢再回多1成左右，值博率會較高。

------------------------------------------------

Q22451：

龔sir, 你好！想請教你，我現在月供

$5000港交所
$6000騰訊
$6000 阿里巴巴
$5000中國平安

中國政府現時加強監管科技、教育、物管和外賣股，我應唔應該繼續供？還是有其它股票可以平衡風險？請龔sir 指教！

另外，美股科技ETF 值得買嗎？

龔成老師︰

中國政府在不同行業拖加新政策，都造成不同程度的風險。但我地要分析翻，這些政策係唔係明顯會對企業長線發展，造成核心性影響。

就你所月供4隻股票而言，影響係有，就暫時唔算係一些核心性問題，這些股票依然有投資價值。

但你而家月供組合，太偏重左係潛力股(0388, 0700, 9988)，佢地雖然有增長潛力，同時風險都較高，不宜持有過多。

若你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

同時間，每月儲蓄唔好盡用，要留有3-5成現金，等大跌市時去入平貨。

美國科技ETF，都有投資價值。

你可以考慮三星FANG ETF（2814），佢係追蹤NYSE FANG+指數的表現。是一個美股潛力股基金。

首先，FANG+係代表美國上市多隻領先既科技股票，即係代表Facebook、Amazon、Netflix、Google，而該指數會再加上其他科技股，如Twitter、Tesla、百度等，即是全球處最前列的科技類公司。

這基金是一個潛力基金，長遠正面，但要留意價格會較為波動，加上近年科技類公司上升左唔少，因此現價唔算平，建議以月供的模式投資，買入後長遠持有。

但你要留意一點，你現時港股有內地的阿里(9988)和騰訊（0700），再加上這美國科技基金，你就會成個組合，非常集中係科技相關股份。

由於佢地係同業，最好維持不多於組合3成，以免出現過度集中性風險。

------------------------------------------------

Q22452：

想問一問愛康
點解 我買入既一手 都咁差

龔成老師：

投資要不斷學習的，如果投資因為自己分析不夠完整，下次就分析得更好。我15年前開始，一年平均睇50隻股，每隻要花6小時分析，然後一年只買1、2隻股票。

其實愛康醫療（1789）不算差，以長遠業務分析，正面的。

佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。

不過，投資時要考慮價格風險。現價合理區頂，另外，佢業務是有潛力有風險類，因此要明白較為波動。

------------------------------------------------

Q22453：

成哥，我上年先開始學投資，果陣見到d科技股 升極都仲有得升， 有幾隻股等左好耐想入，之後早排回落左都算多 就入左 d，發現原來仲有得繼續跌

例如阿里 果陣300，跌到落 230 我無貨 ，果陣都見你話仲係略貴 但都係入左1手 ，依家落到191 ，其實都有信心呢隻股係無問題

但覺得買貴左好多， 如果當拒上返 大約23x度 我放一放，再耐心d等拒跌 比較平既價位再入 如唔會比較好？因為初初開始投資 唔知道原來耐性好重要

龔成老師：

阿里（9988）有質素，中短期一般，但長遠仍有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票。

你有貨，可持有，上到230，其實未算貴，如果你賣出，無人知能否買得翻。

你這種想法，就是一種估走勢的做法，而巴菲特等投資大師，都不會這樣做（因為佢地認為無人能做到），你現時的想法，同一般散戶一樣。而我希望你能進步，加強知識，不要停留在一般散戶層次。

------------------------------------------------

Q22454：

龔Sir 你好
對於股票最近真係跌到懷疑人生
股票長期持有，其實應該點處理
有些股票原先有賺，但諗住長期持有，近期一直下跌，已經跌至虧損。

其實對於長期持有，應該係賣出？一直持有不理？還是依然要睇圖下跌時離場？

係咪就唔使理止蝕，只要長期持有就得？
應該點操作才對

龔成老師：

我記得2003年，香港樓跌到好勁，港股都是，我已有投資港股，當時好多朋友都講「港股玩完」「樓市玩完」。

98%的投資者，都會以短期股價做分析點（樓市都是一樣），這是一般散戶的思維，而投資大師，則能平常心面對股價，著重企業的長遠發展。

到樓市、股市升翻，散戶又話「如果比多一次沙士價我就好了」。

這種思維，就是散戶。

你現時，要睇翻該企業，有那些核心因素改變，分析佢3年仍的業務情況，推算佢盈利是否有明顯下跌，唔好好似一般散戶，只著重短期股價。

我希望你能進步，能學知識，而不是停在一般散戶的思維！

------------------------------------------------

Q22455：

阿sir ，企業質素有冇核心性轉差點樣睇？

龔成老師：

你要分析佢的長遠財務數據，分析3年後，財務數據會否明顯減弱，市場佔有率有否明顯下跌，產品的賺錢能力有否明顯減少。

------------------------------------------------

Q22456：

老師，除淨日會自行調整股價，即派$1息股價會減$1, 咁對於買股收息這件事，仲有咩用？反正收幾多息，股價都跌返個數

龔成老師：

對短期投資者，無用。但長線投資者，就是一種現金流的概念，你要以一盤生意去思考，你買入一盤生意，佢會分派股息，分派股息的當刻，市場價值會減，但只要不是短期去出，長遠生意又會慢慢增值，以及不斷分派股息。

------------------------------------------------

Q22457：

龔sir 你好，突然有10萬，我可以點樣漲大呢10萬價值呢？

我指的是買有咩股票好

龔成老師︰

你可以利用這10萬蚊，去投資一些優質股，進行財富增值。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

潛力股︰比亞迪(1211)、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）。

平穏增值股︰盈富（2800）、港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)。如有投資美股，可考慮：VOO。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

大市現處於合理水平，那10萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

另外，收息股和平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22458：

龔sir ，我依家18歲仲讀緊書，啱啱出嚟做嘢試吓一兩個月，返緊地產行業，眼見好多人都好成功搵到錢，我自己都想成功，遲吓都會想玩下股票請問新手有冇啲咩要注意，

同埋想知道點樣先可以變到有錢，理財很重要嗎？

龔成老師︰

非常好，把握假期時間去工作，吸收工作經驗之餘，可以門開闊視野，對你將來選擇人生路係有幫助。

理財係十分重要，而且範疇好廣泛，由你打工儲錢，到投資增值。若你想成為一個有錢人，你就需要好好學習。

現時你要做三樣野︰

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供指數基金。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，指數基金是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q22459：

龔老師。本人睇左好多你講關於月供股票、投資心態的文章和影片，真的獲益良多。本人30歲，工作繁忙，心感難以日日留意市場捕捉買賣價，

所以希望走向月供之路。以下是我的一些想法，希望老師指教。

每月可儲錢$25000︰

1. 5000 現金儲蓄
2. 5000 月供JPM 美國科技
3. 5000 月供JPM 美國企業成長基金 / 美國巴郡B ETF
4. 5000 月供建行
5. 5000 月供長建

如果可以，打算無限供，未知老師可否指教指教，謝謝

龔成老師︰

我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。因此，你係無成日睇住個市的必要。

而月供，係一個長線計劃，月供最少維持3年，並持有這些股票5年以上，才會有較理想效果。當然，如果企業質素一直無變，最好一直持有。因為，優質股持有時間越長，財富增值效果就會越理想。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你30歲年紀，應以增值為主。你現時月供股票，大致係可以。但建行(0939)只係收息股，增長力唔高，唔建議你用來月供。

你可以用以下股票，去代替。

平穏增長股︰VOO、盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

另外，現時大市只在合理區，現在你每月先用5成儲蓄，即$12500做月供。其餘先儲起，用一邊月供一邊儲蓄的策略。餘下一半資金，等大跌市出現，才去動用會較好。

------------------------------------------------

Q22460：

老師你好，我今年29歲，與家人同住，無男友，無投資經驗，無保險，每月可儲大約萬三，另有現金40萬。

最近有諗緊需唔需要買保險，另外因為同屋企人（妹妹）基本上喺屋企互當透明唔會講野，有打算搬出去住，但如果買保險同搬出去住，洗費就會大增，

可儲嘅錢就會變少，所以有所卻步，老師可以比少少意見嗎？

三個月前開始月供$7,000股票，分別為

港燈（2638）$500
長江基建（1038）$500
盈富（2800）$4,000
粵海（270）$1,000
安碩恒生科技（3067）$1,000

請問老師我現在嘅月供股票組合有問題嗎？有何需要調整嘅地方？麻煩老師了

龔成老師︰

如果無實際必要，我唔建議你搬出去住，因為會產生額外開支，拖慢了你增值計劃。

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大。

即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。但儲蓄保險這類產品，但不宜持有太多。

而我地投資增值，係會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你29歲，應以增值為主，你可以用有增長力的股票，去創造一個增值平台。

現在你每月用$7000做月供，其餘先儲起的策略，係正確。但港燈（2638）只係收息股，增長力欠奉，唔適合你。

現時大市只是合理區，你現有40萬資金可以先投入10-15萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

同時間，你要去多讀投資相關書本、年報，新聞和課程。

書本上，你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21601-Q21620）

Q21601：

Hi 你好，睇咗你個page好耐，本人一路想做中低風險投資，只係未開始落手做，因為我知道好大部份財經資訊同新聞都唔係真係教人投資令讀者得到回報同被動收入，

而係好似龐氏騙局咁，呢個觀察令我大學揀商科都選擇咗marketing and pr，冇揀banking and finance，到而家我都係做嘢然後儲錢，冇投資過。

我想由頭開始學正確嘅投資方法，唔係投機或者賭博，我唔想做個啲無基礎知識扮識個類人，請問我可以點做？

如果係咁，我minimum應該預幾多本金慢慢累積呢？

多謝你睇我個msg！期待回覆。

龔成老師︰

你要分清甚麼是「龐氏騙局」，原理就是一個無任何經濟價值的項目，只利用新加入的投資者資金，令初期投資者得益，以這模式一支滾存。

但如果一間企業，本身有實體價值，對社會有長期正面影響，就不是騙局，你要分清「價值」的概念。

其實，坊間你會接受到好多投資資訊，但並不是全部有用。你要學識分辨那些"有用的客觀資訊"和"主觀的個人意見"。

前者係一些你值得參考的資訊，後者對你係無任何意義。

投資絕對唔應該係賭博，因此你需要有相關知識和經驗，去助你判斷每個投資機會。所以，你係投資前，一定要增進投資知識。

我自己會看好多有關投資、理財、股票、成功、激勵、心靈、致富等各方面的書。

我一開始，對投資一無所知，當開始睇，就發現自己過住的投資方法都是錯，更發現坊間的所謂「專家」、散戶，投資方法都是錯！

之後，我開始明白點解香港有9成散戶，投資股票都是輸多贏少，因為佢地無知識！

當我愈睇書，就愈明白真正的投資道理，同時自己的投資實力大升。由多年前輸多贏少，到現時贏多輸少。唔少散戶，可能憑短期市況好而獲利，但如果要做長勝將軍，就只有靠知識。

巴菲特的閱讀就更多，他多年來，絕對不是「睇住個市」，而是不斷睇書增加知識，睇年報了解企業。

我最初睇得好廣泛，到後來會睇較多「分析企業」、「價值投資法」、「巴菲特」類的書。

以下是我認為適合初學者睇的書，部分要到圖書館找的：

《我十一歲，就很有錢》
《經濟蕭條中，七年賺$1500萬》
《富爸爸，窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪？》
《人性的弱點》

同時間，你都可以睇我架《80後百萬富翁》、《財務自由行》和《股票勝經》，都適合初學者。

至於開始投資，你唔需要預好多本金。其實只要每月有一定閒錢，就可以用月供股票，去做財富增值。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你係偏年青，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中ETF。到你有一定知識，對這些股票又有一定了解，才考慮加入其他股票，咁會較好。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21602：

龔sir你好，3年前接觸你的fb及書籍，見你一直推介1211， 思量後跟你買了少少，現在還持有著，真的萬分感激你！

講一講我背景，42歲，月入4萬，單身，與1位退休家人同住居屋（已供完），屋企所有開支我全負責，每月儲1.3萬。手上現金1百萬，但當中30萬要撥備以防不時之需。

因投資知識不足，股票分得太散，成19隻，當中不乏高位買入。曾經看過阿sir說8-9隻股票組合就夠了，所以想向阿sir請教一下我該如何整合出一個平衡及適合我歲數的組合

以下是手上股票數目及買入價-

銀娛，1手，$52.2
金沙，3手，$35
港鐵，1手，$41.2
粵海，2手，$12.28
比亞迪，3手，$40.6

福壽園，2手，$7.5
小米，2手，$22.9
阿里巴巴，2手，$215.8
騰訊，2手，$610
中生，1手，$7.72
平安好醫生，2手， $84.8

京東健康，1手，$112
金界，2手，$7.7
郵儲銀行，1手，$5.82
中行，1手，$2.95
中銀香港，3手，$29.81

中國人壽，1手，十幾年前買忘了價位
長和 及 長地， 各1手多，當年和黃重組換成的，和黃$68買入

今年4月剛開始月供 恆地$2000 及 中生$1000

想請教阿sir-

1）19隻股票內哪些該集中保留？

2）中銀香港，金沙，郵儲，一來高位買入，二來好似增長不大。是不是等到升回買入價後該優先舍棄呢？

3）手上股票市值8x萬，可動用的現金70萬，比例約一半一半。是不是全部現金都留待大市在平宜區時才入貨較好呢？

如果現在想慢慢入10萬貨，該加注哪隻較好？

謝謝你的時間及解答！Thank you very much!

龔成老師︰

1) 你現時有股票，都係有質素和適合你年紀，不需沽出任何一隻，照長線持有就可以。

中國人壽(2628)賺錢能力弱左，質素只算中等，現貨可持有，但不要加注。

但長線計，你要集中翻係10隻以內，否則你好難定期去審視佢地質素。

2) 首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票都有質素，佢地增長力無潛力股咁高。中銀香港(2388)和金沙(1928)有平穏增長力，加一定股息。而郵儲銀行(1658)主要係派息。

雖然佢地增長力唔高，但有助於你平衡成個組合，建議保留。

3) 現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

你想再動用10萬，去分注入市，都係可以。

由於你現時組合，潛力股較多，再加上不少潛力股都在略貴水平。我建議你這10萬，集中係一些平穏增長股身上。現價都算合理水平，可分注儲貨。

另外，你月供組合都可以。但我建議加大月供供款，最好用每月一半儲蓄去做($6500)，餘下一半儲起，等大跌市機會。

------------------------------------------------

Q21603：

龔成老師，本人一直有追蹤你的FACEBOOK和YOUTUBE頻道，雖然你我不曾認識，但對於你想提升大眾的財務知識水平的大任，我實在深感佩服。

而當中的一些觀點，我卻出奇地認同，所以我想寫信給你。感謝你寫了80後千萬富翁這書，也希望藉此告之你有知音，認同其致富之道。

其實我和龔成老師的背景有點相似，自小在公共屋村長大，家境非常一般，讀書也不是特別擅長，會考只有十五分，大學也是剛剛好的進去，畢業成績也是非常一般。還有一點相似的是，我們畢業後都從事銀行業。

龔成老師在很早便明白為富者，有很多道理並非一般中小大學課程所傳授，反而更多是躲在日常生活中的潛則規。我贊同推廣財務教育，畢竟金錢是我們所有人一生中用得最多的工具，但現今竟缺乏學科教授。

然而現在的教育制度也僅僅是培養年輕人成為一個出色的僱員或專業人士，而絕非是一個創業家或投資者。

我和龔成老師也有一點很似，就是很早已經讀了很多金融及理財書藉，可能在潛移默化下走上一個銀行家之路。

可是現今的銀行家大多變成跑數的代表，亦只是公司的其中一個齒輪，即是離不開僱員的命運，你所有的付出和努力說穿了也只是為公司的盈利貢獻。

你所分得的其實很少，但付出了最寶貴的時間，這點我非常明白，但我之前 沒有老師當初的勇氣逃脫這命運之輪。反而沉醉在大公司所給予的看似亮麗的職位和不高不低的收入。

當然後來我真的離開了創立了一隊銷售團隊，單純為了持續而穩定的被動收入和可持續的事業發展。

所以我看到龔成老師所提及成為富翁的五大範疇時（全職股票/商業投資者，全職物業投資者，知名專家，企業家，擁有強大銷售團隊）突然發覺自己一路走來方向是對的。

雖然我和所有一般大眾一樣不是天才，也不是特別聰明。但我天生對所有學問的追求和強大行動力，令我創造了很多人認為的不可能。

在我29歲時買下第一層物業。在35歲，在銀行事業正處高峰時離開選擇一條不一樣的路。在於39歲時重返中文大學修讀全職MBA，主修創業家精神。

在40歲時選擇創立銷售團隊不再為大公司拼命，而是為自己而作選擇。回顧到此，再看看你寫的書，便明白有知音，所以非常感激你可以將你的想法匯集成書，以簡潔的方式表達出來，激勵大眾。除了堅定了我的信念外，你的點子也給我和同事們訓練的重要材料之一，我實在感激。

你在書本中提及銷售能力的重要性，年少時的我曾對銷售員有種不屑之感。

我不知道是大眾的刻版印象影響了我，還是成長中有植入錯誤觀念。到我認真反思為富者應具備的能力時，我真的認為銷售技巧和投資知識非常重要，

其實每一個人也需要作銷售，包括是向股東或潛在投資者解說的CEO，以及是提出論點和協議的大律師，本質上也是銷售。所以愈快掌握和深入研究當中技巧對將來致富之路會更為輕鬆。

最後，我花了二天時間讀完80後千萬富翁，在此我鼓勵其他人。龔成老師所說的並不是提供股票號碼，而是確實地，有系統地說明致富的潛則規和在正常書本中學不到的論財知識，所以我非常推薦這書。也希望在不久之將來可以和老師好好交流一下。謝謝你。

你的追隨者

龔成老師︰

多謝你的支持！其實我希望將正確投資理念，和一些過往經驗和方法，跟大眾分享。

希望為一班有理想，但未找到方法的人，提供一條可參考的道路。

同時，也為一班對投資理財有誤解，因而到處碰壁的朋友，引領佢地重回正軌。

成個財富增值之路，要透過不斷學習，令自己保持進步，才可以令我們走得更高，更遠。

其實當我寫書、教班時，我除左想賺錢外，同錯會一定想「怎樣貢獻到社會」，這是一個好大的核心，我相信只要這個大方I向正確，所做的事就正確，而錢就會進來。保持努力，加油~

------------------------------------------------

Q21604：

老師，你好呀。最近岩岩睇完你講樓市既書，

有一章講到地區性。我想問最近有好多新樓盤既位置都係新開發。

我想問問老師點睇屯門掃管芴一帶既新樓盤。

呢一區會唔會受惠到屯赤公路，駁去港珠澳大橋。
發展潛力大唔大呀？好唔好係果區上車

龔成老師︰

屯門是大型的住宅區，商業活動少。而且地理位置上，較遠離市區，因此樓價與市區有距離。

但隨屯門港鐵通車，屯門區交通會較以前便利。屯赤公路，可能都會係一個利好因素。

但始終屯門跟市區有一定隔離，而掃管笏雖在屯門﹐但隔離港鐵站較遠，未能明顯受惠。

因此，掃管笏升值潛力係有，但唔會話好高。因為所有利好因素都反映左，預期掃管笏配套，未來都唔會有好大提升。

------------------------------------------------

Q21605：

想請教，我五十歲，看了你的幾本著作！先想學買股票！

（我份工六十歲要退休，我只剩十年時間有收入去投資！）我應該用月供買邊D股票？

（我每月得4000可運用）手中儲蓄有18萬（但唔係太咁動用)？謝！

龔成老師︰

以你50歲的年齡計，其實已開始為退休做準備。你離退休尚有10年，只要好好把握，都可以做到一個合理增值效果。

但財富增長同時，我地不能過於進取。因此，你可以投資「平穩增值股」+「收息股」。

現時的$18萬，暫時只能動用$7-10萬，因為大市唔算平，你要分注投資，同時留下大約一半資金，等大跌市時入平貨，作長線投資。

當然你覺得自己風險承受力唔高，你保留多一點現金，都係可以。但就會令你財富增值效率，會慢左少少。

月供股票方面，你可以先用$1500供盈富（2800）和供2隻收息股(各$750)。餘下$1000就儲起，同樣等大跌市機會。

但就隨著年齡增加，你要慢慢增加收息股比例。到退休時，收息股佔組合100%。因為你到時，需要透過收息股的現金流(即係股息)，去支持你退休後日常開支。

以下是一些適合你的選擇，你可以從中參考下。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21606：

你好，想請教你一些意見。我今年47歲單身，同家人同住公屋，自己有銀行儲蓄大約39萬，股票大約11萬，MPF大約55萬。

想自己搬出來住有私人空間，買樓但又唔想全部銀行儲蓄用晒，唔知好唔好租樓 。

又諗過海外買樓會平啲，再放租出去，再在香港租樓。
你有什麼意見？我頗煩惱。

謝謝！

龔成老師︰

如果置業後，會令到你資金儲備盡用，再無閒錢去買優質股，去保持投資增值，係唔理想。

至於租樓，會令你可投資資金減少，減低左財富增值能力。如非必要，我都唔建議咁做。

當然你可以用買海外樓收租，再租香港樓的方法，去平衡個支出。

但你必需對海外樓投資，有全面的認知，才好實行。我地投資的其中一個關鍵，是你有多認識這項目，「不認識就不投資」，如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視，你應該了解當地貨幣過去的變化，以及將來的強弱分析。

若你不懂，就不要去投資了。

以你47歲，要開始慢慢為退休做準備。在財富增值上，你可以集中係優質股身上。投資目標，可以用「平穩增值股」為主。

現時的$39萬，建議動用多$5-10萬，因為大市唔算平，你要分注投資，同時留下約一半資金。長線投資。

如果你每月有閒錢可以儲，你可以做埋月供股票，供「平穩增值股」。比例上都係用一半，餘下儲起，等大跌市機會。

------------------------------------------------

Q21607：

龔sir, 我是一位50歲嘅未婚女士，有男友但未有結婚打算，現獨居在與父親合資的自住物業。

2008年以198萬買入，市值約750萬，按揭尚餘107萬還清，每月用$6,600供樓。

我現時喺政府做合約職員（今年內可能轉制成為公務員），月入5萬，每年約滿後有一筆約滿酬金，佔全年收入15%，收入算穩定。

做呢份工之前一直不懂投資，亦沒有太多儲蓄。入職5年後到現在儲到約55萬現金，另有30萬股票，同埋下年就供完嘅基金投資保險（現值約24萬）。

股票資產分佈如下：
388 (100股）@$362.7
823（571股）@$78.9
1211 (517股）@$168
1810 (1200股）@$27.3

2800（1774股）@$26.8
6618（100股）@$165
9988（107股）@$250.5

每月扣除按揭供款，所有開支和供養父母的費用後，每月大約儲到$15,000現金。

早前follow你嘅post得到啟發，亦都很認同價值投資法，所以用其中$5,000月供2800和823至上述數量，供咗3年左右直到去年因某些原因停咗月供。

現有數個問題希望你指點一下：

1. 根據現時嘅工作狀況，我預算65歲退休，希望用餘下嘅工作年期可以盡快儲到更多錢做退休儲備。如恢復月供股票應該怎樣分佈較適合我？

2. 你對我現時嘅股票組合有什麼評價？由於有啲股票於較高位買入,現時股價回落，是否應繼續持有抑或應趁低吸納更多？

3. 現時嘅資產應怎樣配置才有機會達到每月$30000現金收入嘅退休目標？

4. 明年供完嘅基金投資保險，到時應全數提取作其他投資，抑或繼續存放滾存比較適合？

感謝你嘅耐性及期待你嘅回覆。謝謝。

龔成老師︰

1) 以你的年齡，其實要開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的$110萬(連同將贖回24萬基金)，可動用多20-30萬，因為大市唔算平，你要分注投資。同時留下一半資金，等大跌市出現，用來買平貨，作長線投資。

月供方面，你可以供「平穩增值股」+「收息股」。每月先用$8000供款，餘下$7000就儲起，同樣用來等大跌市機會。

如果你風險承受力較高，又想進取D，可以較集中係「平穩增值股」。相反，你較保守，可以較集中係「收息股」。

但你要留意，隨著年齡增加，要慢慢增加收息股的比例。到退休時，收息股應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

緊記，月供係一個長線計劃，唔好供下停下。咁樣會影響到平均價格風險的效果，會對你造成不利。

2) 你組合的股票，都係有質素。除左京東健康（6618）真係買入價偏貴外，其他都唔係太貴，算係貴左少少。

部份投資，雖然帳面上有虧損，但由於企業係有質素。長線佢地價值，都會慢慢提升，所以你長線持有就可以。

盈富(2800)和領展(0823)，未來再有明顯回調，你可以考慮加注。

但其他持股，因為風險較高，以你年紀不應持有太多。故只建議你持有現貨，不要再加注了。

3) 由於你自住問題已解決，也算持有一物業。故未來增值上，都係集中係優質股，令成個財富組合更平衡。

如果你希望退休後，每月有3萬蚊現金流，以股息率6%計，你需要本金600萬。

我假設投資回報有8%（連股息再投資），你每月投資$15000 + 現有110萬資產，15年後大約會增值至830萬，故這樣安排相信很大機會達至你的財務目標。

4) 你要睇佢扣除費用後，回報係多少。如果佢整體係優於大市，而風險又唔算過高，你可以考慮繼續存放滾存。

否則，你就按以上計劃。將贖回資金，分注咁慢慢投入「平穩增值股」和「收息股」中。

------------------------------------------------

Q21608：

龔sir，感謝感謝，你之前的回覆得好詳細好用心，老公說很有參考價值，我一直都想供盈富。但考量澳門銀行手續費問題所以未實行，聽您說完更安心了。

我真的要盡快決定投入同開始草貨了。

我老公說：

1.上堂時您提出的‘佐丹奴、粵海投資、大快活、六福‘，當時係優質股，依家隔左咁多年還值得投資嗎？想您俾點點意見，因他說這幾隻文中冇提到。

2.佢見組合內沒有內銀股，如滙豐，這些股票適合繼續持有嗎？

3.科技ETF市面上還有幾隻，是否因為呢隻手續費平D所以選呢隻？

4. 另外是關於我自己的，當時藍月亮發行抽新股時，我抽中左一手，那時睇中它是獨市生意及大陸龍頭，所以冇放，在$13蚊多時更入多了一手，現在這情況你認為適唔適合溝貨或繼續持有？

5. 之前我幾心儀想入手必瘦站，5蚊既時候吾敢入貨吾識睇位，最終沒有持有，必瘦站您認為之後喺邊個位我可以入手？

感謝感謝。
————
我近日開始去看股票勝經，但現在我既level睇會卡住唔太明白，老公說睇左再上您既堂效果會更好。如果老公再上多一次堂，有沒有優惠?

我們2個都會一起上，因有他在我應該會更好學習。

龔成老師︰

1)以上4隻依然係有質素，你投資係無問題。佐丹奴(0709)主要係收息，增長力不高，唔係咁適合你年紀。

粵海投資(0270)和大快活(0052)則平穏增長+股息。而增長力，會係六福(0590)較高，這3隻你們都可以投資。

現時都在合理區，可分注。

2) 大型內銀股和匯控(0005)都有投資價值，但由於已經好大隻，未來增長力唔會高，主要係收息。

以你年紀，應以增長為主，這類收息股就唔係咁適合你。

3) 安碩恒生科技(3067)每年收費和追蹤誤差，都係幾隻當中較低，暫時睇會係較好選擇。

但你要留意，由於幾隻恒生科技ETF都係初上市，追蹤誤差只能作參考，實際誤差未必一樣。

4) 藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，若持貨佔你組合不高，長線持有就可以。

近期雖然回左唔少，但都只算係合理區頂，唔建議現時加注。最好回多1,2成，才考慮。

5) 必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，又真係好想入。你可考慮回少少，先小注，然後等跌多d先正式分注投資。

6. 上堂前，你先睇左股票勝經，的確係有助吸收課堂知識。但唔明都唔緊要，到時課堂都會再仔細解釋，當中的概念。

如果你基礎不足，可以上多一次基礎班，同時當你地2人一同上，可以有互動作用，增加了學習的進度，打好基礎後，再上進階。

你重讀初班，可以比個優惠價你，你whatsapp 55457212我同事講翻。

------------------------------------------------

Q21609：

阿sir 我25歲，係疫情低下 3月頭我決定祼辭左一份我覺得毫無進升和學到野既工作！

我自知呢份工如同書入面星期一捱 想等星期五，毫無激情，繼續向呢個公司只係浪費時間（我覺得時間好寶貴）我已經考慮半年，

但身邊朋友同事都勸我騎牛搵馬，都唔太認同我辭職，話呢個時勢有咁既工已經算好，但最尾諗左半年決定辭 因為我唔知前面會點 但我知總會接觸新環境新事物

而且想趁冇負擔年齡試多啲 至少收入冇呢份工高 但我辭左好肯定都有兼職收入 經過兩個月一直好積極揾全職 一邊睇書 一邊兼職 奈何疫情下難揾全職

開始質疑自己夠竟係未岩同焦慮呢兩日睇左書阿sir 本書 覺得完全觀念同我想法一樣！令我更加相信自己冇揀錯，得到肯定！

因為我覺得我花更多時間黎睇理財知識 運動 學野是值得的！多謝阿sir !

龔成老師︰

其實，我地做決定，一定係睇長線。

好多人一直安於現狀，唔肯試下離開舒適圈，就永遠只能停留係現時階段。

恭喜你，能突破自己舒適圈。你才25歲，還很年輕，應該把握這個負擔較少的年紀，去作出不同的嘗試。

現時你就要好好計劃將來，到底自已未來10年、20年目標係點樣，想自己變成一個點樣架人。點做，才會一步步接近你想的人生。

你現時把握未有全職工作的時間，去學習、做運動，努力投資在自己身上，這個態度係非常正確。

相信你將來，一定可以找到理想的人生。

------------------------------------------------

Q21610：

龔SIR 你好~本人是投資倍升股課程學生，剛上了第一課，感謝你在課堂上釐清了一些錯誤的投資觀念。本人今年35歲，通常會每儲蓄到一筆錢就會買股票投資, 增值財富。

這個投資組合有沒有問題? 還是需要再執一執?

00388 $478.6 @200-
0003 $14 @3707-
0005 $33.617 @ 1200-
02202 $27.3 @200-
03988 $2.4 @3000-
09988 234.8 @100

另外，知道澳門政府在珠海哪邊建立一個新街坊項目，在橫琴哪邊建立一個屬於澳門的新區。（橫琴「澳門新街坊」項目）

位置鄰近澳門關口, 在此發展中的新區對面亦有新樓盤開賣, 你認為值不值得投資?樓價大約為33平方, 值港幣110 萬左右, 租大約每月可收4000-5000元。

龔成老師：

你上述持有的，基本上都有質素，不算差，但可以優化組合。

你年齡35歲，其實可以著重增值多少少，所以，你持有的煤氣（0003）、匯豐（0005）、中行（3988）只是收息類別，不應佔你組合比例太多。

至於港交所（0388）及阿里（9988）無問題。而萬科企業（2202）負債較高，不宜持有太多。

你在之後的財富配置，可以投資平穩增長股+潛力股。

至於澳門新街坊，我無仔細研究在，但我自己對橫琴是正面的，這地方是中央其中一個重點發展地區，加上澳門地方細，一定要想方法延伸經濟圈。

同時，中央會對澳門的信任度會大過香港，所以會加強澳門周邊地區發展。

當然，你最好實地考察下先，上述只是簡單意見。

------------------------------------------------

Q21611：

老師，我亦很仰慕股神巴菲特，所以我亦有投資brk.b，持有1個半月已有7.5%回報，再加上佢財報穩健，令我更有信心持有。

不過，畢竟他年時已高，有佢隨時退休令股價下跌的隱憂，亦不清楚接任的人會不會處理伯克希爾如股神一樣穩妥。

你又對此有什麼看法？

龔成老師︰

其實巴郡已經係一間大型企業，雖然股神巴菲特真的退下來，很難找一個有咁高能力的人取代。

但由於企業已係好成熟，就算係其他人掌舵，相信大方向唔會差好遠。

此股依然係具有投資價值，值得你長線持有，

不過，回報率點都會比過往略減，但仍然是不差的。

------------------------------------------------

Q21612：

想問老師，一年只買1/2隻股票，是否次次都是賺錢。

如果我這樣做，我心理上會害怕。如果睇錯，整年的儲蓄，會就此蝕了。

暫時都想分散投資，如果不夠資本，可能3067/2833/QQQ/VOO/ARKK便算

請問我的想法是否可行？

此外，你為何會有信心，果1/2隻會是眾多公司中，成長最快的一兩間？

龔成老師︰

唔係，就算股神巴菲特投資，都唔會隻隻都係賺錢，佢都試過不少失敗投資。

但由於佢成個組合做得好，整體成績都有唔錯表現，這就是我成日強調，組合要優質和平衡的原因。

其實只要你有一定經驗，細心分析，加上係合理價或以下，才買入優質股，長線虧損的機會，唔會好高。

至於點解有信心，個1,2隻係眾多公司中，成長最快的一兩間。除左累積不少分析經驗外，我都分析左好多企業，從中作比較，才會知道個別企業，優質度如何。

你5隻股票都有質素，3067/VOO/ARKK係潛力型股票，波動性較大。如果你係偏年長、投資經驗較少、或者風險承受力唔高，就不要持有太多。

現時大市在合理區，記得資金唔好用盡，要留部份等大跌市，才出手。

------------------------------------------------

Q21613：

老師，有評論話如果完美醫療（1830）無左過期套票，必瘦站會蝕錢，可信嗎？

龔成老師︰

完美醫療（1830），這個所謂過期套票，其實是指一些客人已付費，但顧客於合約服務期內並無使用服務確認的收益。

預繳收入其實在不少行業都存在，是一種對企業甚為有利的營運模式，利用折扣價向客戶出售預繳套票，藉此推廣纖體美容服務，多年來令集團收入提升不少。

而這些過期套票，大致維持佔每年入帳之套票2-3成。至於出現原因，可以係客人計錯數買多左，或者好多其他因素，無人知。

但這部份一直多年恆常地存在，佔收入比重每年都大致相同。基本上，佢已經算係恆常收入一部份。

這部份收益，無話好定唔好。但我地計算企業盈利時，考慮這部份收益，才算正常。因為佢真係成個生意模式中，其中一個收入部份。

其實，你試從顧客的角度去想想，當你買產品時，你不會假設自己不會用，而最終總會有一部分客無用，有部分客只用到部分。

正如你食一個飯，都會食剩，如果將食剩的%要退錢，要按比例從收入扣除，相信好多食店都會虧損。

這些「用不到」「食剩」，其實是產品收入的一部分，所以，做生意不可能強行將「過期套票」數目折去的。

------------------------------------------------

Q21614：

龔sir你好，今年33歲。早兩年賣左樓，賣咗樓之後大概有5,000,000現金，現在跟屋企人租緊樓，全家五人，爸爸媽媽啱啱退休，我同老公同細佬做嘢

大家都係搵萬幾蚊，每個月租金$29500，屋企人覺得都係買返樓好啲，自己都有買下股票，手上持有3690，3993，6969，6618，291，都係短炒為主

因為都想幫補租金，每年要供三份合共大約120,000保險，3年前供的，包括一份基金（$50000每年），基金已經供咗3年可以隨時停供

一份儲蓄（$50000每年）另外一份危疾（$26000每年），想你俾啲意見我，啲錢點樣可以運用同埋投資得好啲,可以40歲達致財務自由

龔成老師：

你地首先要決定，是否買翻買，如果買樓，就要預留部分資金，然後餘下投資增值。

如果唔買樓，就可全部用作增值。

如果現時完全無物業，我會傾向買基本的自住樓，但就作高成數按，餘下資金投資增值。

如果想40歲財務自由，你可以投資
平穩增長股：潛力股
7：3
（如果你投資實力較強，可增加潛力股比例）

好好利用7年時間，去進行財富增值，利用股票投資。現時現金，計好多少會買樓，餘下的「可長線投資金」，現時已可分注買入（當然要有一定的現金留低）。

另外，唔好再短炒。至於現時持有的其他理財產品，都可以繼續進行。

------------------------------------------------

Q21615：

老師你好....自己依家嘅方向好迷惘，自己有工作，但債項實在太多，呢個時候我真係唔知點做好.....

我好想去重新好好開始，已經31歲嘅我仲係一事無成，我依家應該要點做好....

龔成老師︰

我明白你此刻，可能有太多不如意事情，同時間圍繞在你身邊，令你好氣餒和無奈。

但其實所有問題，都總會有解決方法。在好多問題圍繞自己時，我地要努力去保持一個正面心態。有系統地，將問題逐一拆解。

首先，我相信你最大問題，係債務方面。你先集中去清理這部份，優先處理利息較高債項。或者可以將較高息債務，先轉到較低貸款利息的地方。

我地先減少你長線還債負擔，再慢慢被這些負債消滅。

至於，人生目標，每個人都不同。唔一定要做到家財萬貫，才算係事業有成。

你要清楚知道，5年、10年、甚至20年後，希望自己變成點。之後，再想下，點樣先可以一步步咁達成。

記住，這個世界無問題係解決唔到。只要你定好計劃，按部就班咁實行，問題總會解決。而你人生目標，都總會達到。

------------------------------------------------

Q21616：

Hi 龔sir! 我年紀2X, 每月都儲到幾千蚊加上本身有少少閒錢，所以想由月供股票開始投資。

我有3個問題希望龔sir可以指點一下。

第一：就係月供股票嘅回報。我傾向長期投資，但係唔知道長期係幾長。簡單啲講月供股應該供幾耐(5年10年?)，或者供到有幾多手先夠? 雖然成本平均咗，但回報係咪同時會平均(拉低)咗?

如果股價合適係咪直接(或儲夠錢)買一手長渣好啲?

第二：我諗緊月個股票包括0027 0293 0823 3690

前三隻我覺得喺疫情之下已經係低谷，未來幾年都會升。3690就潛力而言，現時股價係咪屬於合理/便宜區域，或者bottom line (市場消化完美團負面消息)?

第三：揀月供股嚟講成交量應唔應該係重要考量? 抑或其他因素比容易賣碎股更重要?

謝謝

龔成老師︰

1) 如果你定平貴能力不足，一手手買，會有買貴貨風險。月供可以平衡價格波動風險，所以較適合你這類初學者。

月供係一個長線計劃，月供最少維持3年，並持有這些股票5年以上，才會有較理想效果。當然，更理想係一直做，一直維持累積優質股(優質資產)的習慣，對你會最有利。

用月供方法，成本會拉平均左，但同時間，平均回報都會有機會被拖低左。

所以，若你用估值方法，直接1手手係合理區，甚至平宜水平才入貨，的確回報一般會比用月供儲貨為高。

但問題係，用估值方法去入貨，對投資知識要求較高。初學者我唔建議咁做，反而會增大你買貴貨的風險。

記住，我地投資唔係想賺到盡。而係在合理風險下，賺取最大回報。

2) 國泰（0293）的質素只是一般。其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般，此股不宜作為月供目標。

其餘3隻，用來月供都可以，美團點評（3690）有潛力的，但不確定性都高，只可小注月供。

3) 成交量，參考價值好低。有無碎股，其實都唔重要。

你要記住，我地係長線持有一些優質股，而唔係短炒。我地著眼點，應該係企業質素、行業發展、財務狀況等。

我建議你，可以睇我寫架"80後百萬富翁"、"財務自由行"和"股票勝經"，都適合初學者，可以令你更深入了解成個財富增值的理念。

------------------------------------------------

Q21617：

龔成老師你好！本人（31歲）與丈夫（34歲）共月入7萬，育有1子，現金大約有50萬，持有股票價值約12萬，依家持有友邦、盈富、小米、安碩恆生科技，買左一層公屋自住。

仲有3年供完，市值大約300萬。依家每月大概有3萬蚊流動資金可以用黎投資。

想問下老師，如果想係10年內做到每月被動收入有3萬，可唔可行？應該點先可以做到？

龔成老師︰

由於你已有自住物業，因此在你之後的財富配置上，不用太急增持物業部分，可以利用股票去進行增值，而現時自住公屋，基本上狀態不用有特別變動。過3年供樓完成後，你可以再加大力度投資股票，令財富進一步增值。

要做到每月有3萬蚊現金流這個目標，以股息率6%計，你需要本金600萬。

以你31歲，可以選擇一些「平穩增值股」+「潛力股」作投資目標。現有持股，都係有質素，適合用來增值，可長線持有。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，即先用$15000月供，另一半就先儲起架策略。

如果你投資經驗唔算高，可以先集中係平穏增長股，潛力股只小注(少於3成)。若你有一定投資經驗﹐可以加大潛力股比重，最多佔組合3-5成，視乎你投資經驗多寡和了解這些股票程度而定。

現時大市只是合理區，你現有50萬資金可以先投入多10-20萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 現有資產62萬(現+股票)，10年後大約會增值至720萬，故這樣安排相信很大機會達至你的財務目標。

------------------------------------------------

Q21618：

老師你好，小弟現年31歲手上有20萬資金想入市投資股票。

最近有留意0002, 0003, 0012, 2800, 6823想從中開始投資，不過有部分股黎緊都會除淨，理解到一般情況下股價係除淨日後會回調，

如果我目標係長線持有以上股票的話，請問我係唔係應該等除淨日後先開始入市？多謝老師指教。

龔成老師︰

你對除淨派息的運作，似乎有少少誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

所以，假設不受其他市場因素影響，單係除淨這個因素，除淨日股價下跌，係正常。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。因此，你唔會在此期間前後做買/沽貨，而出現任何著數。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時31歲去計，應先集中做好增值部份。你所講的股票都有質素﹐但中電(0002)、香港電訊(6823)增長力較弱，主要係收下息，不建議你持有太多。

策略上，你可以較集中投資在「平穏增長股」和「潛力股」上。如果你覺得自己經驗尚淺，想先保守少少，用中電(0002)、香港電訊(6823)都係可以。

現時大市只在合理水平，你20萬可以先用一半，以分注形式，慢慢入貨。餘下的另一半現金，我地就等機會，當大市出現較大回調，就加大力度掃貨，然後作長線投資。

由於「潛力股」係需要一定經驗，你投資經驗較淺，建議你先小注，大約佔組合3成左右。此期間，你要努力提高投資知識，到有一定水平時，你可以慢慢將佢調升至5成比重。

------------------------------------------------

Q21619：

你好，我由2020年中開始到今年5月在不同的日子持有的股票比例：

00941 10,000股
02628 10,000股
00003 10,000股
03988 5000股
700 100股

另有現金200,000

以上比例會唔會太不平均，比例太重放在0941？

呢幾隻都係股息很不錯的股票我才選上的，但其實這個想法是否錯誤？求解答！謝謝！

龔成老師︰

你現時持有的股票，大體上都有質素，可以長線持有。

但中國人壽(2628)增長力，近年明顯係弱左，你可以考慮沽少少，換去其他優質股。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時中國移動(0941)，佔成個組合一半，明顯係嚴重偏高。你必需慢慢減持部份，換至其他優質股，去平衡風險。

至於以上股票是否適合你，要睇你年紀、經驗和風險承受能力。

好以騰訊(0700)這類潛力股，增長潛力大，但同時間波動性都較高。比較適合年青、有經驗的投資者。否則，不宜持有太多。

至於中國移動(0941)、中行(3988)這類收息股，增長力好弱，但勝在有穏定的派息，風險較細。適合較年長、或者投資取態好保守架人士。

而中國人壽(2628)和煤氣(0003)算係2者只間，有一定增長力之餘，都有一定派息，風險度相對係中等。

你現時組合，算係一個偏向保守的平穏增長 + 收息組合。

若係較接近退休之年的人士，或者投資好保守，想以收息為主。941和3988係合適，但其餘幾隻，就未必太適合。

以下是一些優質收息股，給你參考。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21620：

小妹我已經35歲，工作13年，穩定，但無特破，對炒樓有興趣，想做地產經紀，但家庭有負擔，兩難，但我這年齡又是出去衝的最後機會，點算？

我想做有錢人，但呢刻又好多限制！
同埋我唔夠勇氣呀！

龔成老師︰

要成為有錢人，就不能安於現狀，要有勇氣去突破，你已經存在了第一個條件，因為你已懂得對不理想的現象不滿。

地產代理是成為有錢人的5大方法之一，建立銷售團隊之路。

但從事這條路，不確定性一定比你現時工作高。而且開頭時，收入有機會比你現有工作少。如你選擇好這條路，就要有一定決心，一直走行去。

否則，好大機會會令你成個事業發展，變得進退失據，你要明白這一點。

較好的方法，就是你一邊做現時的工作，一邊尋找一些可以「不辭工但又能創富」的模式（因為我從你的文字，已見到你勇氣不足，如果這刻不足，只能暫時留在原工作先）。

例如你利用投資，好好滾大資金。

然後，到了資金有一定的水平時，你在負擔上較安心，而你又有足夠的勇氣，到時才跳出去。

同時，你可以在這段時間，結識一下地產代理，多了解佢地的工作。（甚至做兼職，當然，你要了解現時正職是否容許，或當中風險，所以你自己衡量，如果真的做兼職，當見到自己這方面真的有發展時，先全力去做。加油啦！

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。