【龔成問答信箱】（Q18921-Q18940）

Q18921：

龔老師，你會選擇幾時賣小米?
感激不盡

龔成老師：

我會長線。持有5年以上。

小米（1810）我2020年年頭先買，原本無想過咁快倍升，但佢真的升得好快。我打算持有5年以上，以佢最新的業務情況，雖然已成為倍升股，相信5年後會帶比我理想的回報。

如果你有睇《50股》推這股的分析，都知我睇好佢手機性價比及建立平台模式，長遠一定有更大發展，我會等佢的手機，進一步在更多國家更多人用，同時等佢建立平台，不斷廷伸賣產品。

------------------------------------------------

Q18922：

龔成老師，我今年37歲，月入33K, 上年剛購置居屋。現持股如下，每月可儲$7000，現金16萬。打算11月開始月供，想請教現有股票/月供是否合適，5年內有機會增值到100萬嗎？謝謝!

3: 1手@12.86
6: 1手@53.3
12: 1手@30
66: 1手@37.75
788: 7手@1.42

823: 2手@61
1211: 372股@49
1928: 2手@ 33
2800: 351股@25
1177: 2手@7.93

打算月供
2800: 1000
1810: 2000
1177: 2000

龔成老師：

你現時持有的股票，都是有質素的，可以長線持有，至於現金$16萬，就暫時持有現金先，等機會。

至於月供部分，可以進行，這些都是有質素的股票，適合長期去供的。如果日後現金較多，就加大月供盈富（2800）的金額。

如果想進取少少，可考慮加入月供安碩恒生科技（3067）。

要5年$100萬，仍要努力，因為投入的本金唔算多，最好加大儲蓄金額，以及要睇$16萬能否把握到買平貨。

------------------------------------------------

Q18923：

龔sir，會唔會嚟個即場分析BYD業績報告？

龔成老師

未必會即場分析了，因為我平時自己分析，都要用好多時間，網友會好悶的（我用坊間表面分析唔同，要用好長時間）。

------------------------------------------------

Q18924：

老師！我無報你嘅班都咁有耐性回覆我嘅問題，你真係好好人好善良！好感動呀

我都有點小煩惱，其實一直留意到好多好股，eg中國十四五大會未來5年目標會強力推能源/光伏股、糧食股；但同時大陸雙十一及雙十二會令物流股、冬天內需股eg羽絨波士登大升.....可惜我嘅本金得咁少，好股/ 潛力股太多有時都唔知揀邊隻好！

短炒就話可以隨時換倉，但如果要耐性咁長揸好股，咁資金就會被綁完全無錢再買其他股，所以真係妹無奈，只怪自己太遲開始明白儲蓄的重要性

盡量唔睇股市令自己心情平靜d，同埋唔好衝動換倉
老師你咁好人一定會有福報咖

我聽過一d大師的哲理，都幾信因果，你今世咁努力向上，同時又咁善良幫助其他人，下世一定會過得好好

龔成老師：

第一，你要集中研究長期的，唔好做短炒，唔好著重短期資料，要以長遠分析。

第二，你要小心研究每一個範疇，放多少少時間去研究，唔好只睇一些表面利好因素就投資。我多年來，平均一年只買1、2隻股票，就是要自己睇得好準先出手。

你要經常小心分析，假設自己買入後持有多年。我自己一年睇50間企業，每次分析用6小時以上，但最後只買1、2間，我都希望你能小心投資。

------------------------------------------------

Q18925：

老師，一星期唔睇都股價好難，但萬一買嘅股票出現大跌市、自己股票都會注意

因為本人經常買嘅股票想長遠發展，買潛力股，但開始個時通常都升，之後就跌破去買入個位

就會擔心放走，想問老師如果長遠買潛力股係咪等佢去到合理價先買入，咁樣個風險會低好多？

龔成老師：

我知唔睇股價係難，但如果你想學賺大錢，就要做到，騰訊（0700）、港交所（0388）升百倍，中間都有經歷好壞，有時會大跌，但如果你能做到乜都唔理，先可以賺到100倍。

我自己持有的比亞迪（1211）都是，持貨10年，由$10升上$80，再跌翻$10，到近年上到$150，中間有時業績好差，你成日睇咩要注意，反而賺唔到大錢。

我地買潛力股，當然最好等合理價先入，這可以大幅增加回報，你在貴的時候買，值博率已有限。

------------------------------------------------

Q18926：

老師，你好
我今年30 歲
我由2017年每個月儲$4500
今年4月儲多$1300
以上這兩份是保險儲蓄。

今年8月起儲多$4000，開始玩月供股票。
8月~$2000（388）
9月~$4000（388）
10月~$4000（388）
11月~$4000（2800）

我想用短時間儲首期$100萬，請問如何部署？

龔成老師：

你可以保持月供盈富（2800）$4000、港交所（0388）$2000。

港交所有質素，可長期月供，不過，現價唔平，因此這刻唔建議供太多。另外，你要建立更平衡的組合，唔能夠只集中在個別股票，否則會有集中風險。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18927：

龔sir你好,我系一個家庭主婦，近期有睇你fb 動態關於投資嘅嘢，股票對我來講一竅不通，不過手頭上有30萬想滾多啲，可以點做

龔成老師：

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以分注投資，或做月供股票，每月$7000。慢慢將現金轉化為股票。

你可以考慮盈富（2800）$3000。

另外再加2隻（每隻$2000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18928：

龔老師你好，現時持有18手1257，4手1448。

1。1257由3.73一直跌到現時3.13，如何分晰該股是否合理區域還是貴?該股是否水桶三?應否再加注碼?

2。而1448卻由6.73昇至8.05該股是否還是合理區域?是否等跌10%再加注?

3。以上投資分布是否過份集中?
希望收到老師的寶貴意見

龔成老師：

1）中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。的確，負債與發展持續性，是這股的風險因素。

長遠來說，這股仍是有投資價值，現價可以理解處合理，但不建議太過大注。始終都有風險，同時可能仍會弱一段時期。不建議你加注。

2）$7以下才是合理區，你有貨可持有，同時等回翻少少先加注。

3）是。

同一個行業，不應多過股票組合的30%，同一隻股票，不應免過15%，你應該加入盈富（2800）等平衡風險。

------------------------------------------------

Q18929：

阿sir你好呀，我而家26歲，月入大約15k，可以儲到8.5k（連月供股票既費用）手上可以用黎買股票既資金大約有140k左右

而家既持股如下：
比亞迪（1211）：500股@$73.5
必瘦站（1830）：4,546股@$2.24

月供股票，每隻每月$1,000：
恆基地產（12）
銀娛（27）
中生製藥（1177）

我想問下：

1. 其實月供股票係咪應該當果隻股跌到合理範圍既時候要一手手咁買同時加供？例如中生而家跌到8蚊以下就應該加供同買小注入手？

2. 我而家手上既股票組合有冇需要再調動？或者話現階段有冇乜野股票適合一手手咁買入去投資？

3. 如果我想加供一隻股票既話必瘦站可唔可以？（我果間證券行可以供既）

4. 承上題，如果唔供必瘦站，我而家仲可以攞多1.5k出黎，喺而家呢個時候我應該加供12/27/1177邊一隻？

5. 我呢個年齡層係咪唔應該太早將錢放喺reits/水桶3既股票呢類資產入面？

6. 屋企人想買d收息既股票，想問下就咁買778好d定係買3187 （追蹤reits既etf）會比較好？

7. 之前有聽過揀收息股最好揀d年年加派息同埋股價都有得升既，好似美股既可樂咁，香港除左領展（823）之外有冇同類既股票？

8. 最後想問下保險既問題，因為近排想買份醫療/危疾保險，想問下應該點樣選擇一個適合自己既計劃呢？

唔好意思呀問左咁多問題，我已經買左阿sir既幾本著作等遲d公司過左peak season就會開始拜讀。預先唔該曬阿sir答呢堆問題

龔成老師：

1）可以在跌市時加大月供，但最好是保持「長期不斷月供」，至於到時是否一手手入，要睇有幾平，以及你的資金情況。

2）組合不差的，但就出現了集中風險，建議加入盈富（2800）。

3）可以，但建議月供金額唔好太多。

4）銀娛（0027）這刻有值博率。

5）唔需要投資太多。

6）其實三星高息房託（3187），不差的，但上市不久，數據較少，佢係追蹤標普高收益亞太地區（紐西蘭除外）房地產投資信託精選指數的表現。

這個REIT ETF，相關追蹤指數有30隻成分股，涵蓋在澳洲、香港、日本及新加坡等亞太區已發展市場上市的房地產信託基金，房託項目包括辦公室、住宅、酒店、貨倉、醫院、商場、停車場等。

簡單來說，就是一個亞太地區的房地產組合，如同同時持有多隻房託，管理費為每年0.65%，算是合理，股息率大約5%、6%。

這ETF都有投資價值，因為地產收租長遠仍是不差，雖然未必是高增長，但都能平穩發展，同時有不差的派息，加上分散在多個地區，有分散風險的能力。

適合分注或月供，長線投資，可作為財富組合的其中一部分。

7）港鐵（0066）、交所（0388）都是。

8）要睇你想將那些風險轉比保除公司，保險是好個人化的。保險，「足夠」就得，不用太多。

------------------------------------------------

Q18930：

老師，股價除淨之後，會下跌，但當佢減去 上升返既阻力未會大左？

龔成老師：

唔好咁樣分析，方向錯左。你要計翻企業價值，你試想想，現時一間公司值$100億，派息派左$10億，現時企業價值變左$90億，都是好正常的。

------------------------------------------------

Q18931：

啱啱睇完80後百萬富翁，受到很大啟發。平時確實沒有去分配資金，只會將錢以加ge方式去儲起。有時就會聽家人意見買d消息股，當然有贏亦有輸。

接下來會看股票勝經，希望可以增值到自己呢方面ge知識！

本人月入23000，有現金50萬，如果投資股票可以令資產增值？

4歲小朋友有10萬儲蓄，應該如果分配投資？唔該曬！

龔成老師：

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

$50萬的分配，暫時可以動用其中$20萬，餘下就留現金先，等機會，以及等你有更多投資知識先。

你可以考慮盈富（2800）。

另外再加其他股：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18932：

你好, 自己打算賣樓移居台灣, 可有財務自由組合建議嗎? 如果想要被動收入每月TWD10萬.

我只懂0778.HK 收7里股息便可達到, 但這是否太單一? 謝謝回覆。

龔成老師：

你應該建立一個「組合」，唔能夠只集中單一股，這個組合要穩健，低風險，不是求增值，只是集中現金流，收息。

如果你資金較多，可將資金分成5部分，做配置。如果資金少，就集中投資收息股，以及一部分持有現金。

第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q18933：

Ah sir, 另外想問一問福壽園，之前聽你介紹過，自己都有上網睇過佢啲財務報表，好似都OK，之前想喺大概$6.5入，但係我驚佢係嗰啲增長類，所以我見到股市霖得犀利嘅時候，冇入到

如果而家入，大概$8，會唔會太貴？定要等佢回落到大概$7左右？

我對佢有興趣另外一個原因係，佢嘅防守力都勁，係增長類型來說，算好少有

龔成老師：

福壽園（1448）有質素的，我自己都有貨，其實都想加注，但佢一直唔跌，只有等。

你預佢$7以下合理，如果現價入，不是不可，但不能大注，你買入後，可以等跌再加注，升就唔加。

這企業的業務有獨特性，長遠發展仍正面，可長線投資的。

------------------------------------------------

Q18934：

老師，你書中講過的「雲軌」是什麼？

龔成老師：

「雲軌」是比亞迪其中一個業務，即是高架的單軌鐵路。

比亞迪佢投資左唔少錢去開發這部分的業務，其實發展都唔差，不過比起電動車，佢近年電動車增長就更加強。

比亞迪這方面的業務，已經獲得汕頭、深圳坪山、廣安、安陽、蚌埠、濟寧等地的訂單，會陸續開工，預計之後仍有多個個城市建立雲軌。

------------------------------------------------

Q18935：

老師，自從去年上完你的堂,對估值有了初步認識。

最近我發現股票有一個好得意的現象，不知我是否可用以下方法作估值的參考：

當優質股/潛力股從高位（近5年計算）

回落20%-30%，大概是「合理頂部-合理區」

回落40%，大概是「合理區-合理底部」

回落50%確定進入「便宜區」

請問這樣作參考可以嗎？因為我見823、3、66、12、1177、5等等都有類似的情況

如果ok, 我想往後買股票時，透過「估值+以上的參考方法」，分3注入，一來可避免高位入，二來可控制注碼，三來做到分注買入

敬侯賜覆，謝謝老師

龔成老師：

不一定的，最重要是質素上的分析。

例如過往上市的利豐（0494），由高位$20跌到$1，如果用上述的方法，你在$5應該已經會定義為平，但之後卻有排跌，所以，最重要是價值的分析。

所以，最重要是分析企業質素與價值，你單以股價比較平貴，恭實有點危險。

------------------------------------------------

Q18936：

龔老師你好

45歳的我一直以來都係一隻牛，一味做，覺得自己賺的錢是血汗錢，唔敢投資。目前月入7萬，自住單位按揭仲要供15年約200萬，存款100萬，無其他投資項目。

最近開始讀你的著作，先驚覺自己後知後覺。即刻去買年金，並打算月供股，想請教你意見，下面組合是否適宜呢？

盈富 - $4000
銀娛 - $2000
領展 - $2000
金沙- $2000
比亞迪 - $2000
中生制藥 - $2000

另外你認為螞蟻值得嘛?
多謝賜教

龔成老師：

上述都是有質素的股票，可以進行月供。可以長期進行。

如你每月儲錢金額增加，日後可以考慮加大盈富（2800）去供，如果想組合增長力提高，可考慮月供安碩恒生科技（3067）$2000。

你只要長期進行月供就得。

至於螞蟻，可以投資的，長線持有。

------------------------------------------------

Q18937：

龔老師，你好，本人今年40歲，打左20年工，而家人工$20K，一路都有儲下錢，但通常儲儲下又不同既一原因之下就洗晒，所以到而家40歲都無錢係戶口，個個月都係月光族。

我而家仲係月光族，有時見到啲真係有潛力既股票，無論係新上市或者係已經上左市，我應唔應該借錢去買賣股票？定我都係應該繼續腳踏實地咁儲錢去買股票？

龔成老師：

唔應該借錢。

理財要一步步的，由最基本的儲蓄開始，然後穩健投資，建立一個「組合」，在你可承受風險的程度下，去爭取回報。

借貸投資雖然有可能創造回報，但始終有風險，因此唔建議，就算用，當中有兩大因素，第一，你有相當的投資實力，第二，大市十分平。

你要做兩樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

------------------------------------------------

Q18938：

你好：本人已退休，[email protected], [email protected], [email protected], [email protected],打算長揸，是否不夠進取？謝謝

資本大約十萬，是否好過存定期？

龔成老師：

如果你已退休，組合應該以收息為主，因此，上述的持股適合你的。

始終你現時無收入，投資不應該進取，建立的組合應該以收息股為主，你可以建立一個收息股組合，除了可持有上述股票外，可考慮港燈（2638）、香港電訊（6823）、恆生（0011）、置富（0778）、陽光（0435）等，大多有5%股息。

但要留意，你點都要有現金在手，唔好用盡資金。

------------------------------------------------

Q18939：

想請問龔成老師點睇長實1113 最近李家不斷買入 好多人都話佢地想回購 如果成事對我們小股東會有什麼影響？

另我本身持有3手長實但均價在47蚊 不知應該趁低位增持還是保持觀望 謝謝解答

龔成老師：

佢應該唔會，根據佢過往的操作，當佢見到自己間公司，股價跌到較吸引水平，佢就會增持，因為佢睇好自己公司，覺得市場現價低估左，佢買入後，認為過幾年，股價會慢慢反映翻企業價值，佢就自然得到理想回報。

如果你本身已有貨，就要睇下再增持，這股佔你組合比例多少，以及你仍有多少現金剩，如果比例太多，就唔好加。

------------------------------------------------

Q18940：

老師，十分感謝你教育大眾理財的概念，之前買入的比亞迪已經有200%增長，請問現時我應該繼續以月供的方式買入比亞迪嗎？

一直在尋找其他增值力強既公司，想請教3868 信義能源是否也是穩妥的公司？有潛質嗎？

龔成老師：

現時的情況較兩難，一方面這股有潛力，見佢公司多少投資有回報，開始有明顯發展，前景正面，但同時，現價又唔平。只可以話，你原有貨應該應該持有。但現價唔平，這刻可以停月供，或減月供金額。

至於信義能源（3868）有質素，佢主要於中國經營太陽能發電場業務，並向國家電網的當地附屬公司銷售電力。而佢派息高的，因為管理層話會用高派息政策。

投資價值都有，但這刻唔好買太多，因為佢業務都有風險的，要注意股價波動，如分注長線都可以投資。現價合理區頂。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18321-Q18340）

Q18321：

老師可唔可以比啲鼓勵支持我 我衰貪心 學人走去買左啲老千股。

辛辛苦苦草落既錢冇左一大半 真係崩左 我宜家讀緊書 下年23歲先開始做地盤學徒計劃得15000一個月 第二年先有20000 之後就有大工牌

想下年開始試吓進行下學你5年草100萬 有冇啲咩建議可以分享下比我 我宜家真係好迷惘唔知點算

宜家剩低果啲錢都冇乜心機打理 又唔知點開始買返其他貨

龔成老師：

我1999年開始投資股票，2000年，投資電盈（0008）輸左8成身家，到2001年，因為炒輸，911事件，令我輸身家，到2003年，學人炒孖展，又輸左好多錢。

我之後，用心學投資，只學「真正賺錢的投資方法」，即是巴菲特的方法，每次買股票之前，要自己用大量時間去研究股票。

平均每星期用6小時睇一間企業的基本面，一年睇52隻，但我一年只買1、2買股票，我要自己睇得好準，好有信心先出手，點解我咁小心？

因為我過往輸得多！

自從我十幾年前輸左上述幾次後，我之後，投資絕大部分都贏錢，仲要好多都贏幾倍。

你23歲，好年輕，如果你可以好好學習，記住今次輸錢的經歷，保證你之後賺得更多！

------------------------------------------------

Q18322：

龔Sir你好，我又有事想請教了。
現在已每月用$10000月供股票，分別：

*2800盈富 $4000
*66 地鐵 $2000
*03 煤氣 $2000
*1211 比亞迪 $2000

除1211外，其他都是於恆指32000時供款的，所以全部暫時虧蝕。

我見煤氣近年股價不繼下跌且減少減息及紅股，故想將月供煤氣的資金改為供哪隻較好？

有以下心水：
1177 中生製，788 中鐵塔，6049 保利物業。
或其他更具增長力的？

謝謝。
*原想供1448，但多間銀行都無此選擇。

龔成老師：

煤氣（0003）增長力的確比過往略減，但不是無質素，如果你想組合有較高增長，可以將煤氣轉其他，而另外幾隻就唔好轉。

如轉，你可以考慮中生製藥（1177）或中國鐵塔（0788），如果你能承受風險及想較高增長，就中生製藥。

另外要留意翻，現時大市只處合理區，要一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18323：

請問老師，你常說一邊買股一邊留有現金待大跌市時就買優質股。

我現時買左100萬股票，現金仲有200幾萬，如果冇特別用途，衣家要入幾多？定係等大跌市先入？又點樣先定義為大跌市？

龔成老師：

以現時的大市平貴情況，你持有3-5成現金就適合，因此，你持有現金是較多的。

如果出現下跌15%以上，就開始是大跌市，到時現金的比較會進一步減少，買較多股票。

你可以將其中$50萬資金，分6-12個月，慢慢買入一些優質股，長線投資。

------------------------------------------------

Q18324：

買左你d書啦！老師

如果我現在有大約現金100萬左右，幾時係好時機可以買樓？同埋要注意咩？

而我屬於首次置業！另外我d股票有好幾隻都屬於未到買入價，包括#3，11，2388，1177，我應該點做好？係咪繼續keep住收息？謝謝您！

龔成老師：

多謝支持！要睇晒同「用」。

如果你想置業，要睇翻你的實質需要情況，你可以按《5年買樓4部曲》所教的方法，決定現時先買入細價樓，還是一次過儲多D資金，一次過買心頭好物業。

如果想買細價樓，最好是買完後，你有一定的資金剩，唔好完全無錢，有$100萬-$150萬已可以開始準備。

香港樓長遠仍向上的，不過中短期可能會調整（不會跌太多），你可以留意下。

至於你持有的股票，都是有質素的，但其中3隻增長力不強，你要睇翻自己的投資目標。要以「長遠的財富增長，風險與目標，配置」等，是否適合你，而不是單單考慮你的買入價。

------------------------------------------------

Q18325：

老師，我一路都有追睇你嘅Facebook教授，學到好多嘢，亦幫自己儲到啲錢，前一陣子經濟未明所以呢賣走左大部份嘅股票

今年35歲，收入每年大約40萬，佣金制度,每個月收入並不穩定，所以買樓的話需要比20%首期，或者用朋友公司做九成

現在以很平的租金租住朋友的單位，所以沒有迫切的住屋需要

面對而家的樓市有未知嘅恐懼，感覺有少少迷惘，正在考慮是否應該上車抑或將一筆錢另作投資

手頭上資產大約有1,000,000
當中有800,000為現金的200,000為股票及基金投資

另外還有800,000是父母交予管理，當中有400,000已做了一個高息定期， 其他的都是現金和一些股票

錢話多唔多而家都唔知點樣部署
所以想徵求下你意見

雖然自己未買得成樓但係依然都想為自己退休籌備下
所以想每個月供S&P ETF或者美國房地產ETF

龔成老師：

以你的年齡，投資方面可以做得更好，你大部分是現金，以及家人管理的定期，這都是太保守。你持有「有增長力資產」的比例較少。

從方向來說，你可以增加股票的比例，或會買樓。

如果你長遠都有買樓的需要，其實可以1、2年內，留意香港樓。香港樓由於供應不足，長遠仍會向上，而中短期會因經濟風險，而有可能下跌，不過，並不是大跌，你可以考慮把握這個機會。

如果唔打算置業，月供S&P ETF或者美國房地產ETF，都是可以的。要好好運用你手上的現金。

------------------------------------------------

Q18326：

老師我今年25歲了，同女朋友一齊儲錢，每個月，月入加埋大約有3萬6蚊，每個月大約儲到1萬2蚊

渣住
11800股16.5，3200股20.2小米
一手hsbc 47.5
一手吉利氣車16.7

現金大約仲有十五萬，我應該如何把握機會財富增值呢
3隻股都應該keep住持有嗎？

小米應該止賺嗎還是先賣出一半

龔成老師：

小米（1810）、吉利（0175）都是有質素的股票，你可以長線，但你唔好只集中在2、3隻股，要建立一個平衡的組合，因此，你之後唔好再加原本持有的股，應該加其他。

小米建議大部分持有，如果真的想賣，賣4分1至3分1好了。

至於匯豐（0005），以你的年齡來說，未必最適合你的。

匯控賺錢能力與增長力的確弱左，但又未去到完全無質素，近期股價受壓，除左佢經營環境影響，佢派息問題都是因素，因為市場一向理解這股是「收息股」。

我從股息角度分析這股。

相信長遠是收息股，但股價增長就有限。可以先從佢近年唔派息及財務情況分析。

首先睇翻佢財務數據唔算話特別差，今次要停派息，主要原因係接獲英倫銀行透過審慎監管局發出的書面通知，要求匯豐取消派息。

所以，佢並不是自己好唔得，而去到要唔派息，而是因應翻英國監管局要求，才這樣做，所以，雖然是不好的利息，但不是核心性不利。

停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。

在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線質素依然存在。

作為收息股係可以，概念上，就是放棄中短期股息，而預期將來慢慢回到正常狀態，只要你投資組合唔好太偏重單一隻匯豐或銀行業就無問題。

但記得，唔好佔比太重就得。同時明白這只是收息股，唔好對股價有太大期望。同時不能持有太多。

至於現金，你可以動用$5萬，投資有質素的股，餘下$10萬就唔好動用。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18327：

你好，自上次提問後開始了第一次的投資，入了一手2800和更改了mpf 的組合。謝謝你的意見！

現時仍有約5萬可用作投資。我發現有兩隻股票的買入時機可能較理想，想請教老師你意見。

1. 1928金沙中國－ 現時的時盈率大概在17倍左右，現在是否一個時機入貨，以我現時的資金，最多可入3手，我應如何分配？

2. 0823 領展－ 現時的息率大概是4.48, 我都有與趣入手，想請教如何分配。

3. 像領展等房地產信託是否不用看市盈率，我在hkex看到領展的市盈率是負數，其實是甚麼意思？

4. 我的部署是2800+ 兩隻優質股（多數是1928同823）再加隻潛力股（但現時比亞迪和小米等都算貴）。

我預算大概的比例是
2800 30%
1928 30%
823 30%
潛力股 10%

再次感謝你在書中和回答Facebook提問的分享，現在跟朋友同事傾投資，發覺大家的取態很不同，有人覺得投資是困難和需要所謂很敏銳和捉準時機

有的會相對focus 短期獲利（其實感覺真的唔錯，有多幾千蚊錢用吓又或幫補吓屋企），但看完你的書更加強我的長線投資和持有優質股的方向。Many thanks!

龔成老師︰

緊記投資一定係要長線，以往我見短炒架人，都係大多輸錢收場。

1） 金沙（1928）現時在合理區，你可以分注入貨。

2） 領展（0823）是優質股，有一定規模，坐擁不少優質商場，而餘下仍有一些有條件提升的商場，故仍有一些潛力。

此股最少要求要有4%以上息率，才有投資價值，股息率達5%會更理想。

你可以現價入金沙和領展各一手，到有較大回調少再入餘下一手。

3） 由於房托收入中，會有一個物業重估的項目。佢唔係真正現金收入，只係一些會計數字，而這個數字會令到實際收入出現誤差，故這類股票之市盈率會相對無咁準確。

負市盈率，代表此股出現虧損。但出現在領展的虧損，並非真正虧損。只是物業重估數字影響，令到佢會計上看來，有虧損情況。排除這個物業重估數字，佢盈利是正數的。

4） 由於你年輕，我建議你加大潛力股佔架比例。但好多潛力股現價都偏貴，入貨時要做好估值，或用月供都可以。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

------------------------------------------------

Q18328：

請問老師信義光能（968）進行配股，股價一度下跌，可以襯這機會吸納嗎？另外想問，一般配股是否都會出現股價下跌

我在哪裡可以看到這次配股的原因？
想查看一下是否作營運資金

龔成老師︰

由於配股時會發行新股，故股價會按比例下調。

信義光能（0968）宣布通過配股集資26億元，用作擴張太陽能玻璃產能的資本開支。

環保能源會係大勢所趨，未來光伏行業，在中國以至全球發展都係正面。

此股係有質素的，雖然股價較為波動，但多年來都保持向上，2018年的生意就出現了下跌，但近年慢慢回復增長力。

佢回落主要係早前價值過高，股價只是回落翻較正常水平。現時價格依然係有點貴，如果你無貨，可以考慮回多1、2成先開始買。同時要分注慢慢入。

有關今次配售資料和公告，可以係港交所網頁找到（附相關連結）。

https://www1.hkexnews.hk/listedco/listconews/sehk/2020/0903/2020090300006_c.pdf

------------------------------------------------

Q18329：

龔成老師，你好！我今年23歲，任職公務員，月入15000，現有32萬 現金，目標5年內儲到150萬。

請問資金上可如何分配及投資？

另外，打算開始每月2000 買股票，該選哪一隻股票？
謝謝

龔成老師：

如果要5年累積到$150萬，你要加強儲蓄，以及投資方面要進取少少，先做到。

第一，每月要逼自己儲$8000-$10000，你可以想方法增加收入及控制支出，第二，要利用投資去進行增值。

你可以要集中投資潛力股，但這就會較高風險，同時要求你有較高的投資實力。

現金$32萬，你可以將一半投資股票，餘下一半就等機會。慢慢分注入，唔好急。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18330：

龔sir你好，留意左你既facebook同youtube，發現投資理財既重要性，近期先開始學，想3年後有一百萬可能嗎？

現時29歲，有10萬現金，15萬保險基金（而家退保就會得話6成），4.8萬儲蓄保險，另外用左18/9萬買左以下股票：

345一手@26.85
1038兩手@40.45
3兩手@10.89
1299一手@70.6
4一手@15.02
823兩手@60.2
405兩手@3.6
1810一手@23
1972一手@20.95

1.以上組合會否太散？

2. 現時大概可以月儲12-14k, 想開始月供股票，以下組合可以嗎？

2800@3k
[email protected]
[email protected]
[email protected]

其餘儲現金，想再分注買入823/4。
謝謝！

龔成老師：

3年後預期有$80萬-$100萬，能否累積到$100萬，都要睇市況，以及你的投資能力。

1）唔算散，當中都是有素的股票，可長線持有，不過，以29歲來說，增長力就不算強，你可以加入多少少較有增長力的股票。

2）可以進行月供，當中3隻都是較有增長力的股，可以月供，長線投資。

要好好利用餘下現金，投資領展（0823）及其他股，但唔好太心急，要耐心等機會。

------------------------------------------------

Q18331：

龔sir 你好

我想問我持有0762中國聯通,平均價$5, 30000 股。 ？長遠睇好中國聯通嗎， 定係而家有得就好快啲走咗佢？

龔成老師：

中國聯通（0762）本質不差的，但賺錢能力比過往有減弱情況，增長力都是，佢是平穩增長類別。

如果你想財富組合有較高增長力，這股未必最適合，如果你想組合穩定，這股都可以作為其中一員。

------------------------------------------------

Q18332：

老師，我有一個小孩，家庭總收入十萬/月，有一單位收租（租金剛等如按揭）

我和先生從不投資，現在想兩年後移民。請問如何投資較理想？謝謝

龔成老師：

如果打算兩年後移民，你投資就不能太過進取，應該儲現金，作備用，等安定好，先慢慢真正投資增值。

這刻，會考慮現金行先，餘下的都可以投資，可以考慮一些環球股票基金，美股基金都可。如VOO、QQQ，你有美股戶口都可投資。

------------------------------------------------

Q18333：

龔sir, 你好
我今年29歲
月入28.5k

之前跟個同事上外匯自動交易班
學費同埋落場交易都唔見咗成廿萬

之後買咗部智能售賣機又唔見咗6萬
但完全回唔到本，盈利都淨係拎黎俾哂部機既管理費

因為租緊屋住 大概每個月只儲到10000~13000
而家手頭上有58萬cash

1000股0008
500股0006
500股1038
1000股6823

請問點先可以盡快達到財務自由?
P.S. 本身無咩接觸股票，都係睇你個page先了解多少少

龔成老師：

我過往做迦外匯孖展經紀，好明白投資外匯根本好難賺錢，所以我地同事無人會自己玩。

另外，我建議你多睇書，打好基礎，你要起樓，就要打地基，這點好重要。

你現時持有，不是無質素，但有兩點注意，第一，集中在「李氏」的股票。第二，你年輕，唔應該集中在這些收息股。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

現時手上現金，只動用$20萬好了，慢慢分注入。餘下資金等你有更多投資知識先動用。

你可以考慮盈富、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18334：

你好，我想問問題，我已經31歲，投資左：

135 價位6.55一手
6969價位36.04一手
9988價位247.4二手
00005 價位62.72二手

依家應該可以點部署？

龔成老師：

昆侖能源（0135）匯豐（0005）只是收息股，其實不適合你投資，因為增長力不強。而你年齡應該要增長較多的。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

思摩爾國際（6969）係霧化科技解決方案提供商，主要經營以下兩項業務。

第一，佢以ＯＤＭ模式為全球煙草公司及獨立電子霧化公司（如日本煙草、英美煙草、Ｒｅｙｎｏｌｄｓ
　　Ａｓｉａ－Ｐａｃｉｆｉｃ、ＲＥＬＸ及ＮＪＯＹ）研究、設計及製造封閉式電子霧化設備及電子霧化組件。

第二，佢做研究、設計、製造及銷售自家品牌（包括「Ｖａｐｏｒｅｓｓｏ」、「Ｒｅｎｏｖａ」及「Ｒｅｖｅｎａｎｔ　Ｖａｐｅ」）開放式電子霧化設備或ＡＰＶ（高級進階私人電子煙設備）。

基本上業務是正面的，有當中的獨特性，以及長遠有增長力。不過，股價升了不少，現價唔算平，如投資真的小注好了，而這股有長線投資價值的。

至於阿里（9988）都有長線持有價值。

------------------------------------------------

Q18335：

呀Sir，請問點解近期中國鐵塔股票下跌？是否熱潮過後既調整？

我見佢2019年d ratio (ROE,Profit Margin, etc)都改善左好多，PE好高，現價是否適合買入？

龔成老師：

中國鐵塔（0788）有質素的，部分財務數據有改善，佢本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

但股本回報率不高，是這股較弱的地方。

因此，這企業本身並不是好賺錢的能力，企業再投資的回報率一般，這點市場明白，而市場會期望行業的增長帶動這企業。不過，在中期業續見到生意的增長只有5%，這是一個較低的水平。

這令到市場對這股的期望減少。現價處合理水平，不過增長力暫時睇只是中等。

------------------------------------------------

Q18336：

阿sir 我做緊功課時候發現，你話第二步係5年數據，係咪核數師 (無保留意見)為其中一個基本準則？ 我check 過9988, 883, 27, 6862, 2313,175的2020數據都係”不適用”, 原因係乜野呢？

係咪有咩特別原因都會令一啲有質素股票的核數師意見為不適用呢？

龔成老師：

兩個原因，第一，如果是中期業績，就是「不適用」。

第二，2020年頭，出現了疫情，影響了核數的工作，所以佢地不少過程都延期或受影響，令你見到「不適用」。你不用擔心，這不代表企業有問題。

「不適用」不代表企業有問題，不用擔心。

------------------------------------------------

Q18337：

我係你學生，我用你教的選股法，簡了799, IGG 做分析，有以下問題想請教阿sir.

1. 利息覆蓋率的數據可以在哪裡找到呢？ 我睇左好多次財務報表都找不到單純利息的字眼，而該股的利息盈利率為395.089, 是否可用這數字呢？

2. 股票上大行預計PE值，是否越低越好呢？ 因為代表預計盈利上升。

而該股現時PE 9倍，預期PE 12倍，是否預計下年度業績收入會減少呢？

3. 於二零一九年四月十日，本公司的全資附屬公司天盟香港控股有限公司，訂立協議收購位於意大利佛羅倫薩的歷史性綜合設施－Palazzo Magnani Feroni

以及該物業的管理公司－Cedro S.r.l（「管理公司」）之100%已發行股本，收購總價2,013萬歐元，可予以調整（「收購」）。本集團擬將該物業重新發展為手機遊戲藝術人才培訓基地及歐洲分支機構。

一個遊戲商以近2億港元收購建築物以作培訓及分支基地，是常見的做法嗎？

既不是投資項目，一來不會因為該資產有收益，而這筆開支卻算入投資活動的業務合併開支，明明收購一棟物業以作經營之用，何解不是經營活動的開支呢？

4.該公司董事會共持有8成以上股權，其中三名大股東分別持有23～30% 股份，算是過度集中嗎，會容易出現自己人古惑嗎？

5. 阿sir你對呢隻股票有咩睇法？

我見佢現金流係好充足，ROE亦有反映再投資回報，不過呢間企業好有良心，用左30pages 講佢點樣對員工好，對社會做公益咁

當然我內心好欣賞佢，好希望成為佢員工之一，佢又會用股份獎賞員工，又捐150萬口罩保護衣俾國家，佢份年報一個圖都無

又無好好解釋在不同國家收入，而佢又講到自己好全球化，有成7.2億用户。但主席報告上講的都沒什麼吸引重點，你覺得點呢？

龔成老師：

1）你在一般的財經網站，都能找到，例如我教你的網，你輸入IGG（0799），去「公司資料」，「財務比率」，在尾二的欄位見到「利息盈利率」。你見到佢395倍是正確的，只要大過5倍就合格。

2）預計市盈率理論愈低愈好。如果現時PE 9倍，預期PE 12倍，預計下年度業績盈利會減少。

3）間中都會有，不過我未細仔研究，如果對企業財務數據影響大，就要關注。

當中有好多複雜野的，我地好難表面解讀。

4）少少集中，但由於這股的市值不是好細間，因此問題相對不大，但都要關注。

5）IGG（0799）業務上都有質素的，但卻是有風險的類別。

雖然佢財務數據不差，但業務本質的不確定性大，軟件及遊戲都是變他較大的行業，這種不確定性可以令企業好勁或好弱，因此你要明白這點。

主席報告不夠具體，這是扣少少分的，因為我地投資者想了解多D，而佢表述不足，但我地最重要，仍是睇業務。

整體上，這股不是無質素，但由於有風險，因此唔建議大注。

------------------------------------------------

Q18338：

老師，想請教一下，近期股市波幅都大，下列為本人持有比較多的股票，因為經常見到你對某些股票評價剛好是我持有的，買入價好像都是高位

所以想請教一下，是否繼續持有還是先走去投資其他比較值得的股票。

金沙中國1928 / 12000 / 32
長和1 / 5000 / 58
領展823 / 2000 / 69
中銀香港2388 / 10000 / 24.5
中生制藥1177 / 50000 / 9.3
舜宇光學2382 / 5000 / 126

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買價價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

上述持有的，都是有質素的股雲你持有是無問題的，但部分的增長力不強，例如長和（0001），要睇翻你的投資目標，是想收息還是增長。而金沙（1928）、中銀（2388）則是平穩增長類。你建立平衡的組合就得。

------------------------------------------------

Q18339：

成哥，感恩三年前看到你的Facebook，令我由過去月尾存摺不會過千，到現在花了兩年半時間透過投資及儲蓄達到最少有三十五萬。是你的書及股票班令我明白儲蓄、投資、目標的重要。謝謝你

最近哥哥和我轉按了物業，還了之前貸款後各分到85萬現金，以前月供6000，現在月供7500。其中三十萬我會用在我的夢想-開蛋糕店上，作為營運資金。餘下60萬現金想全部用作投資，短期內都不會使用。

本來想投資386,但正如你所說這個年紀還是投資增長股比收息股好。如果60萬分注投資到3883可以嗎，我看過它的基本財務數據都幾好

龔成老師：

太好了！每次見到有這樣實質的改變，我都會覺得我所做的事有意義！

如果你做生意，建議你多留現金。暫時只建議你投$30萬，餘下資金，你當等投資機會，或作生意的備用資金，會更好。

你唔好只集中1、2隻股，而是要建立一個組合。

中國奧園（3883）主要於中國從事物業發展及物業投資業務，近年增長快速，這是受中國樓市保持向好的情況帶動，加上佢利用大量負債運作，當好景時，佢就會好好賺。

但佢的負債有點多，有危有機，好景時好好賺，但逆景時，就幾大件事。

所以，這類股不是無前景，你可以將這股加入組合，但不是組合的核心。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18340：

我見有人話1177係老千股，係咪？

龔成老師：

好奇一問，是一些網友講還是某些「專家」講？當中的理據是甚麼？

因為中生製（1177）每年的經營活動現金流量，去到$50億，這類股好難是老千股。佢近期股價的確略貴，但業務本質不是老千成份，股價會波動，但長遠有投資價值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q15041-Q15060）

Q15041：

你好成哥：剛上緊你堂，有問題想請教一下

如果一間公司，今年向銀行借＄買一台機器1000萬，折舊10年，每年10%

那在財務報表的那部份會顯示出來？

是否負債表？因為買機器時借左銀行1000萬
另資產表也多了1000萬資產

另外之後每年折舊100萬在資產負債表內，
同明股東權益表也要每年減100？

因為資產=負債+股東權益

但現金流量表則不影響？只顯示買機器之後的每年還款支出？謝謝解答

龔成老師：

佢會在資產負債表，「資產項」多左$1000萬機器的資產項，同時，會在「負債項」裡，多左$1000萬銀行負債。同時，當中的現金流情況，會同時在現金流量表中反映。

至於每年折舊，就會有$100萬的支出，在損益表反映。

而每年的$100萬支出，都會令「資產項」減值，股東權益的部分都會減少，因為有支出。

而每年就沒有現金流的影響。

你的理解基本是正確的。

------------------------------------------------

Q15042：

我34歲，有層自住樓，但仲供緊，有14萬港幣係離岸投資戶口準備買美股，10萬港幣準備買港股

岩岩上個月開始用大約7000港幣供緊同SNP500有關既美國ETF，每個月大約再剩3000-5000港幣for投資，想請問你會唔會有咩建議俾我/有咩投資組合岩我,感謝

龔成老師：

現時大市處合理水平，你運用月供的策略，作長線投資，方向正確。

其實你這個年齡，仍然是財富增值的黃金時期，要好好把握，盡你一切的力量去儲蓄、投資、學投資知識。

如果你本身無持有其他股票，你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，暫時潛力股只宜小注。

港股方面，你可考慮銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15043：

想問現持有1000股中國恆大 21.9入，之後不斷跌，是否立即賣出？

龔成老師：

中國恒大（3333）業務上是有質素的，但中國經濟轉弱，加上佢本身負債極高，相信會對佢有一定的影響。

你預佢中短期都會弱，但如果只是小注，可以守住先的，但你要預佢慢慢先會上翻去。

------------------------------------------------

Q15044：

龔sir,請問2186綠葉製藥有潛力嗎？

龔成老師：

綠葉製藥（2186）正面的，佢主要銷售腫瘤科、心血管系統以及消化與代謝三個領域的新藥品，基本上都係有市場的，加上佢過往的生意增長唔錯，市場仍發展中，所以長遠不差。

當然，你要預佢業務中短期會有波動，現價合理。

不過，佢的優勢並不及其他較大的醫藥企業，因此，在估值上不會太高。這類股如不太大注，可以考慮的。

------------------------------------------------

Q15045：

老師,我有以下問題, 希望老師可給我一點意見

本人現時46歲, 有一太太及4歲女兒, 我的職業可以說是一兩年來都穩定.
我有一自住樓, 已供滿了. 現時手上有7m 股票及3m 現金.
而我是一個原全不懂投資及不懂股票的人, 但我跟網上學了月供股票, 每月20萬

3 30000
6 10000
823 30000
66 20000
12 50000
11 30000
2800 30000

我的原意是收息給未來退休用, 但我亦很想供一個10m 左右的單位給我女兒或自未來用 （可說是投資吧）. 此樓會用家人名買, 由我擔保及收租去供.
我是自己開公司, 人工10萬, 加每月公司盈利5-10萬左右.
現我有幾個問題想問一下老闆.

1. 我的月供股票組合是否要更改?

2. 這樣月供, 我是否應該改為自己每月買一些更有潛力的股票?

3. 我現時手上的股票95% 都是輸的 （5-10%左右）, 我太差勁了

4. 加上我想買樓, 我是否應賣股去給多點首期呢?

最後我想我是投資多一點的有潛力高增長服票, 及手上都希望持有及一直買入一些收息股作未來退休用.

以下是我手上的股票
中電控股 4,500
香港中華煤氣 29,324
匯豐控股 3,600
電能實業有限公司 609
恆生銀行 4,994
恆基地產 24,004
新鴻基 4,000
香港鐵路有限公司 878
維他奶 4,000
越秀房產信託 120,000
陽光房地產基金 100,000
深圳高速 36,000
領展 4,980
中國建設銀行 60,000
中芯國際 15,000
錢唐控股 120,000
日清食品 50,000
盈富基金 5,477
中國銀行 150,000
阿里巴巴 1,500
Google stock 25pcs
BA （Boeing） 90pcs

希望老師有空可指點一下,萬分感謝

龔成老師︰

1） 月供組合可以，這個偏向平穏增長的組合，適合你年齡用。但我建議你銀碼上有少少變動，分別係更改為$50000盈富（2800）和$30000恆基（0012），原因下面會講。

2） 其實以你人生階段，應該偏向穏重一點，而非單考慮增值。潛力股係你年齡，我唔係咁建議。

3） 你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你所持有的股票質素唔算差，中短期波動就算係優質股都會出現，你唔需要太在意。保持長線持有，讓其慢慢增值就可以。

但你要留意翻2點，首先你持股好側重左係地產股，咁會有過度集中單一行業風險。行業出問題時，會大幅影響到你組合回報，所以你最好跟我 1）的建議調整一下。

第2，以下2隻股票想你了解翻︰

錢唐控股（1466）主要從事採購、加工、設計、生產及批發分銷珍珠與珠寶產品。此股市值細，營業額不高，加上年年虧損，暫時見唔倒有太大投資價值，最好沽出。

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等，最多可以小注。

4） 由於你本身無負債，而按揭一般利率不高，所以你按揭做多少少無問題。空出來的資金，用來投資其他回報率較高項目會更理想。

------------------------------------------------

Q15046：

本人38歲，本人及先生收入共9萬。
扣除供樓，生活及保險及年金開支，餘＄4萬。
現金$300萬，主要定期。
有~50萬股票，不過蝕緊少少。
005 - 3600 （ 平均$61）
2388 - 9000 （平均$28）
最近先留意老師FB ,如早10年睇到就好了！

想月供股票 $10000-12000
1. 2800 $4000
2. 066 $2000
3. 012 $2000
4. 1928 $2000
5. 1211 $2000

請問尼個月供組合好不好？選擇太多，好難揀
請問供地產股012 ， 0823 ，1038 好D？
另 供1928 定027 ，會好D？
近日股市跌，想入少少。有什麼suggestion ?
想入1928，027 ，2388 ，幾＄先算平？
謝謝老師！

龔成老師︰

其實你而家個月供組合己經可以，以你年紀計都有一定增長空間。你組合中包含了平穏增長股和潛力股，所以可以了。

至於你現有的匯豐（0005）是收息類股票，唔會有太大增長力，現貨可維持持有，但唔好加注。

金沙（1928）要$30以下才算平，而銀娛（0027）要下跌多10-15%較好。這2者分別是，金沙會係"平穏增長 + 派息"，而銀娛就比金沙"高增長潛力"。

中銀（2388）現時股息率已有5%以上，已有長線投資價值，可以買入。但留意，你本身已有貨，所以唔好買太多，避免過份側重左係個別股票或行業。

------------------------------------------------

Q15047：

老師你好，本人19歲，希望兩年後把資產增值至20萬以上，請問以下組合能否達到目標？謝謝

現在每月供$4000月供股票，分別係盈富基金$2000，港鐵$1000，領展$1000，另外我會在稍後時間購買一手中銀香港及中華煤氣

龔成老師︰

以你年紀，應以增值為主，這3隻月供選股和預備買入的2隻股票都可以。

你要明白一點，我地投資股票就同投資在一間企業上，一定要長期先會見到回報。而2年是一個短的年期，中短期會較受外圍因素影響，因此回報不確定性也相對較高。

我地月供目標應以5年或以上會較好，以恆指過去年平均回報10%計（連股息再投資），你每月投資$4000，5年後就有機會增值至30萬。

記住財不入急門，投資優質股是需要時間，讓其慢慢自行增值。所以買入優質股後，長線持有才是最有利的方法。

------------------------------------------------

Q15048：

成哥, 華潤醫療1515係優質度上你俾4分, 但自書出版後股價一直下跌, 想問企業質素仍在?

見佢係湖北有不少醫院, 想問最近武肺對佢影響大嗎?現價進入便宜區未?謝謝你!

龔成老師︰

華潤醫療（1515）其實本質唔錯，只是近期好多醫療政策方面的壞消息，如果你持貨不過多，持有住先可以。

佢是華潤集團在醫療版塊的主平台。主要在中國從事綜合醫療服務、提供醫院管理、諮詢服務、醫院集團衍生業務。

旗下擁有過百家醫療機構，提供臨床診療、健康管理、公共衛生、醫養結合等全方位、多層次的醫療健康服務。擁三級醫院、二級醫院、一級醫院、社區機構，總床位數超過1萬張。

本身有一定的企業優勢，但面對中短期的不利，相信要時間守下。武肺相信這個因素會係較中短期，長遠企業發展仍是正面，此刻價格大約在合理區較低位置。

------------------------------------------------

Q15049：

龔老師，上年係Inbox問過你問題，經過一年，不計近來跌市，股票倉有18%增長

近來又有提問，希望老師幫忙解答！
現時持有以下股票

1.港鐵 1000股
2.領展 1400股
3.長建 1000股
4.港燈 6000股
5.恒基 2366股
6.中銀 1000股
7.中生制藥 5000股

月供有以下 （已月供1年）
1.恒基 5000蚊
2.領展 3000蚊

現在想再月供多少少，總共月供金額可以一萬蚊，所以想月供多2隻股票，心水有銀娛及港鐵。你認為以下分配可以嗎？

1.恒基 3000蚊
2.領展 3000蚊
3.港鐵 2000蚊
4.銀娛 2000蚊

你認為需不需要加月供潛力股？

謝謝你！

龔成老師︰

投資是長期戰，保持原有的策略最重要，你已經行在正確的路，之後繼續就得。

要否增加潛力股，要睇翻你人生階段。如果你較年青，可以加入一些如比亞迪（1211），中生（1177）、福壽園（1448）的潛力股。

而你現時或將會月供的組合，都是優質的平穏增值股。但有一個問題，你資金好集中係地產類。恒基（0012）和領展（823）固然是，港鐵（0066）都算是半隻地產股。

咁樣會有過度集中單一行業的風險，你可以考慮將其中一隻地產股從新組合中抽走，換成其他優質股，以下的都可以。

平穏增值股︰盈富（2800）、煤氣（0003）、中銀香港（2388）、長建（1038）、粵海（0270）、港交所（0388）。

------------------------------------------------

Q15050：

龔sir您好，想問隻3690。呢3日它唔太算跟大市跌，似乎有人頂緊價位for某d人出貨（我覺得），對嗎？

業務上我覺得它會因疫情影響下跌，想問吓大約去到咩位可以分注入，又或做淡倉可行嗎？

龔成老師︰

投資我地係睇長線，睇企業本質和前景。"人頂緊價位for某d人出貨"而D無人會知，而且佢唔係一D會影響到企業盈利能力架因素，所以我地唔需要理會。

美團點評（3690）我唔敢睇少佢的業務，因為真的業務巨大，同時增長快，不過，佢仍是有危有機的股票。

業務較新興，但佢現時仍在燒銀紙狀態，我比較怕這類企業。這類企業不是不可投資，但是不能大注。

因為無人知佢燒銀紙燒到幾時，因此市場對其估值都是「估估下」，這一定會帶來股價上的波動。但潛力度，有的。

------------------------------------------------

Q15051：

成sir又再麻煩你賜教,

我打算月供以下股票:
$1000, 盈富（2800）
$1000, 光大國際（0257）
$1000, 福壽園 （1448）
$1000, 比亞廸電子（0285）

承上, 因為我28歲, 剛開始學習投資, 主要想多投資潛力股/將來會更大發展既企業.

我覺得比亞廸電子&光大國際喺中國將來會有價有市, 所以可以先投資一吓, 亦見成sir提及過光大係一隻優惠股（50優質股）, 股息率都還可以, 整體風險還好

盈富就盡對係平衡風險+平穩優質股

福壽園就聽成sir介紹既其中一優潛力股

未知成sir對以上組合/企業有咩睇法呢？謝謝你

更正返先, 光大你無喺書度提過

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀，應以增值為主，你所選的股票適合，資金分配上都可以。

比亞迪電子（0285）正面的，中美貿戰中短期會對佢及唔少企業不利，但這只是中短期，長遠雖然都可能有影響，但不是核心性的。因此，這股中短期仍會波動，但長期就不用擔心，只要長線月供無問題。

光大（0257）本質不錯的，但股價都幾波動，加上佢之前進行供股，以及佢負債愈來愈多，這都令佢股價受壓。

佢係一家以綠色環保和新能源為主業，包括項目投資、工程建設、運營管理等。業務主要可分三類：環保能源、環保水務、新能源。

項目主要包括垃圾發電、沼氣發電、生物質能發電、太陽能光伏發電、工業固體廢物及危險廢物處置、水環境治理、以及中水回用等。例如污水處理廠、垃圾焚燒發電廠、工業固體廢物填埋場、沼氣發電廠、環保科技及工程管理等。

雖然此企業所賺得的項目回報率不會太高，但在可見的將來，行業的擴展仍會保持。以長期來講，佢都是正面的。

------------------------------------------------

Q15052：

你好老師，想問下本人現年51歲，資金上有人民幣1250000做了兩份保險儲蓄定期計劃為期五年，一份2024年7月和2025年2月到期，現在戶口只剩下大約港幣$250000，想用$150000 做月供股票，

因不太懂投資，只會投放在盈富基金，也因為南商銀行最近有月供股票免兩年手續費推廣計劃，兩年後便會每個月收回$50蚊手續費

我知道月供股票是長線的投資，我現在沒有一份固定工作，如果是這種情況下，我適合做月供股票嗎？

我只供兩年不再做月供，放在股票户口滾存到60歲是否不太多利潤？希望老師有空才回覆我吧，謝謝。

龔成老師︰

如果你擔心無固定工作，影響到你月供計劃。你可以直接將你$150000，自行按一個指定時間（如每2個月），不論市況，都保持買入一手盈富基金（2800）。

這方法同樣可以做到月供股票中，平衡價格波動風險之效果。而盈富是包括50間質素不錯上市公司股票的組合，如果你不懂選股，只供此股其實已經可以。

而將來當你再儲到錢時，都可以用此策略。到將近退休之年，再將手上盈富慢慢換碼至一些收息股，幫自已創造平穏現金流就可以。

以恆指過去年平均回報10%計（連股息再投資），你用2年時間投入$15萬，60歲時大約會增值至30萬。

------------------------------------------------

Q15053：

想請教一下龔老師
爸爸今年60歲 己退休

本身有8000股匯豐 早年買落收息
依加佢想再買啲收息股
匯豐好似比恒生高息

咁佢應該買邊隻好
又會否過於集中銀行股？

龔成老師︰

退休人士應以穏定現金流為主，匯豐（0005）和恒生（0011）都適合。但你全部集中在銀行股，就會有過度集中問題。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要為你爸爸建立一個平衡的投資組合，當中有不同的類別、不同的行業，這是最好的平衡風險方法。

你可以選擇港燈（2638）、香港電訊（6823）、置富（0778）、陽光（0435），這些都是優質收息股。

------------------------------------------------

Q15054：

小米會唔會買唔買得過？佢之前升得好勁。玩在跌左少少。會唔會去返10蚊左右？

我也有留意美團。佢跌穿100。有冇潛力？

龔成老師︰

未來會否回到$10無人知，我地投資唔會用預測走勢，而係用企業質素去做考量。

小米集團（1810）有增長力的，因為佢的產品的確受歡迎，同時處於增長狀態中。

但估值是最大的問題，佢不斷在投資，同時無人知幾時先有較理想的現金流，大家都只是憑「將來價值」去推斷，因此股價一定好波動，市場估值經常處於不一的狀態。

所以，你要預佢將來慢慢會向好，但未有確定時間，因為佢的確這刻未有較好的盈利。如果這股只投資小注，現價可以買入，佢前景都算正面，只是有較多不確定因素。

美團點評（3690）我唔敢睇少佢的業務，因為真的業務巨大，同時增長快，不過，佢仍是有危有機的股票。

業務較新興，但佢現時仍在燒銀紙狀態，我比較怕這類企業。這類企業不是不可投資，而是不能大注。

因為無人知佢燒銀紙燒到幾時，因此市場對其估值都是「估估下」，這一定會帶來股價上的波動。這股有潛力的。

------------------------------------------------

Q15055：

你好 龔成 想問下你投資意見
我同我女友有40萬現金,現有一個香港放緊租物業,但今年年尾結婚要用25萬左右。

近來諗住用按揭套現買越南樓（做過research有大概7%既回報同升值既潛力）或者用現金買投票建唔建議？？如果股票買005，2800定美國ETF好？

女方26歲
收入： 45000
租金收入：16000
每月按揭還款連管理費：33000
每月平均儲蓄：7000
現有物業按揭貸款：700萬

男方 27歲
收入：30000
每月平均儲蓄：10000
唔該哂！！

龔成老師︰

越南樓，我自己無研究開。

我地投資的其中一個關鍵，是你有多認識這項目，「不認識就不投資」，如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視，你應該了解當地貨幣過去的變化，以及將來的強弱分析。

由於你年尾有個明確計劃（結婚），手頭上$25萬資金不宜作投資。

至於用唔用"餘下15萬 + 加按"買越南樓，就睇翻而筆錢架整體回報。如果以投資恆指計，過去年均回報約10%。如果你有信心越南樓整體回報（7%既回報同升值既潛力，再扣去加按成本）可以跑嬴恆指，你可以考慮。

但你要留意翻，加按會令你負債風險增加，要注意這一點。

而選股方面，由於你們年青，應以增長力行先。匯豐（0005）只是收息股，無乜增長力，唔適合你，而盈富（2800）和美股ETF都可以投資

------------------------------------------------

Q15056：

老師，我媽媽俾左10萬我幫佢投資，原來想幫佢做訂期，但覺得息口好少錢，想幫佢搵返少少退休金，請問我係每月買1手hsbc 5號收息還是一次過買10萬元

我見現時56元，定係買2800收息，有諗過幫佢月供股票，或者有其他意見可以給我，謝謝你

龔成老師︰

如果你媽媽係退休或將近退休人士，咁佢應以平穏現金流為主。

作為收息股，匯豐（0005）和比盈富（2800）更合適。另外港燈（2638）、香港電訊（6823）、置富（0778）、陽光（0435），都是優質的收息股。

但由於現時大市只在合理區，入貨時要"分注"慢慢入。

------------------------------------------------

Q15057：

Hello 龔成老師

我係投資新手，之前因為聽到好多利好消息
入左1手舜宇光學科技（02382.HK） @$147.

但而家都跌到$126,想知道應該要止蝕離場定仲有機會平手呢？感謝

龔成老師︰

首先，一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

舜宇光學科技（2382）有技術，企業仍有一定的發展，但中短期仍會受中美等因素影響，股價較為波動。此股長線質素無變，問題是你買入價有點貴。

但此股有質素和前景，你可以守，唔需要賣出。

------------------------------------------------

Q15058：

您好龔成老師, 想請問大快活質素是否仍在?另外我發覺0058現價為$18.8,處2016年1月價位,是否處平宜區?謝謝

龔成老師︰

大快活（0052）是有質素的。比起一些潮流飲食，我會偏向選大快活。因為香港人變得好快，潮流飲食的不確定性高，業務可以很好，又可以好差。

反而最基本，民生的必需品，好似大快活咁會更有投資價值。近期由於社會不穏定、經濟不景氣、再加上武漢肺炎所影響，盈利出現倒退是正常的事。

但相信這些因素只會造成中短期影響，集團長遠質素不變。加上大快活定位偏向民生，較有抗跌力。現時股價處於合理區，有長線投資價值，但中短期依然會波動，最好分注入市。現價處合理區中下部。

------------------------------------------------

Q15059：

龔成老師你好，留意到你話最近會入市。我想請教，如果想買追標譜500的ETF, 係要買美國上市個隻 定香港股市追蹤標譜的？
謝謝

龔成老師︰

我所講架係領航標普五百（3140）是追蹤標普500指數之表現，在港交所做買賣的那一隻。

因為佢係港交所做交易，相信對一般香港的投資者，會係最好方便的工具。

由於近年美股的升幅不錯，因此多左人投資美股，多左人認為美股較好，但我地唔好因為這些中短期的表現，就認為美股較好。

以中國及美國長遠的經濟發展計，兩者都是不錯的，而中國的增長力仍會好少少。

------------------------------------------------

Q15060：

你好，我月入$17,000，存款約$70,000，每月能儲$4,000，如想開始月供股票，請問建議供多少？

應集中供一隻股還是多隻？
謝謝

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係放配投資項目時，會因應番你的人生階段。如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（388）、深高速（0548）
潛力股︰比亞迪（1211）、中生（1177）或福壽園（1448）
收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）

以你資金計，你可以選擇1至2隻股票月供，供太多隻股票會令手續費成本比例太高（單隻股票月供成本，不應多於投入資金1%），而月供金額就用$4000。

由於現時大市只在合理區，你現有$70000可等待大市出現一定程度的下跌，才大力度掃貨，然後長線投資。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。