［金融101文］一文解釋美版Nasdaq係乜東東，港版老翻又點借屍還魂。第時肯定係收費文

（寫文時未出詳情，而家出咗，但同預期冇乜分別啦。之後先再出篇文講炒邊隻）

蘋果原文（https://bit.ly/39dqcjL）：恒指公司快推港版Nasdaq　科網股爆炒

TL：DR—其實，咪即係當年喪炒大陸銀行大陸保險，就爆一個「五行三保指數」出嚟咯，後來點呢可？呃到小朋友，呃我唔到嘅。又仲有，Nasdaq係獨立公司獨立市場，NYSE嘅對手。香港就全部388玩晒，點同呢又。慘乜撚考納指丫。

話時話，呢排記得keep 住like and share，主動入嚟睇，同埋設定做see first．真係搵食艱難。但感激大家

1. 港版　Nasdaq 下話，睇過？人人講Nasdaq，你估真係人人識Nasdaq咩

2. 首先問一個好簡單嘅問題，即刻答：星巴克Starbucks，在邊度上市？

3. 你會答，美國。咁我梗知美國啦。唔通香港咩（＊）。但，在邊個交易所上市？係喎，美國好多交易所嘛。答案係，在Nasdaq上，而唔係紐約交易所NYSE（＊＊）

4. 下？Nasdaq唔係科技公司咩？星巴克又好高科技？唔知，但其實冇人話過Nasdaq就係科技公司。其實Lulu Lemon 同Marriot 都在Nasdaq上市，唔知瑜珈服好高科技定爆房好高科技。仲有，教主恥笑，賣sugar water嘅百事，而家都係Nasdaq上市（但當年唔係）。

5. 但你話，關我鬼事咩！冇錯，的確同你無乜關係。買過美股嘅就知，我幾時需要理星巴克在邊個市場上市？呢個就係美股偉大嘅地方。但的確，係有兩間唔同嘅交易所。NYSE同Nasdaq

6. 正如你見咩道鯨斯指數又好，標普五百又好，其實入面啲成份股，係NYSE又有，Nasdaq又有。

7. 所以Nasdaq，其實兩個含義。可以係Nasdaq呢個交易所，又或者呢排好多人講，之前突破10000點嘅，Nasdaq Composite Index．納指

8. 所以講港版Nasdaq，如果係講交易所，「我地一早有啦」，創業板GEM Board嘛。公認失敗，市值應該連GEM Tang都不及，「明明話當年啲官冇而家咁廢」。唔止，港版納指，「我地都一早有啦」，創業板指數嘛！

9. 況且，GEM Board 係港交所嘅一部份，但Nasdaq同NYSE根本係對手，會互搶生意。例如？百事Pepsi而家在Nasdaq上市，但有冇諗過，百事百幾年歷史，當年邊有Nasdaq（＊＊＊）？係由NYSE轉去的。掉轉亦有，Oracle就係Nasdaq轉NYSE

10. 講樣嘢你知，NYSE嘅母公司叫ICE，除咗NYSE仲有一大抽交易所。但港交所嘅市值（我指388隻股票，唔係香港股市市值）仲大過ICE！係咪好神奇？明明美國股市大咁多。點解？因為港交所好賺！點解？因為交易費高！點解？因為一家獨大咯。同樣地，亦令到香港股市嘅成交（相對於市值），其實係偏低的。人地咁上市大市值嘅股市，邊止咁少成交？前因後果等等，另文再講。但記住，港交所係獨大的。如果你信有競爭有進步嘅，咪知點解GEM Board咁頹

11. 好啦，講返呢個主角，港版Nasdaq，其實係港版納指。哦，整個新指數，淨係啲新經濟股之類。

12. 其實，有乜特別？「一早有類似嘅嘢啦！」。係乜？傳說中嘅「五行三保指數」。真係聽名都有歷史感。

13. 真架，五行三保（https://bit.ly/2CusVcJ），就係工建中交招五大銀行（＊＊＊＊），仲有中人壽平保財險。雷曼爆煲前，港股直通車喪炒-就好似今日嘅BAT（百度阿里巴巴騰訊）或者ATMX（阿里巴巴騰訊美團小米）咁。當年喪炒下，恒指公司就推出咗個「恒生中國H股金融行業指數」（https://bit.ly/30o31zy），俗稱五行三保指數。

14. 後來嘅事，大家知，喪炒後，雷曼爆煲。世界當然會復元，但即使恒指早兩年見過33000點，呢堆五行三保都仲係浮浮沉沉，未算係死晒，但唔係嗰回事了。至於呢個「五行三保指數」，你幾多年冇見人提過？唔係我提起，係咪好多人已經唔記得咗，甚至從來唔知呢件事？拿，睇埃汾就畀別人知得多

15. 咁，而家ATMX喪炒，又話出隻新指數，係咪同一回事呢！

16. 當然啦，歷史又唔係咁簡單重覆。固然成個故事開頭真係一樣：有堆股喪炒，不如整個指數只係炒呢啲嘢—但人人喪炒就梗係貴，往往入完就見光死。

17. 呢個港版納指，會唔會變成「五行三保指數」翻版？咪睇堆ATMX會唔會變成內銀咁。講過啦，其實長遠嚟講，股價都係反映盈利。內銀啲盈利後來係單位數增長，股價咪死咕咕咁。咁，至少呢刻估，騰訊呢啲，盈利應該有排未見頂嘅。都話，工行一年純利近4000億人仔，騰訊1000億未夠，追到過頭，唔係不可能—但當然，中國嘅嘢，唔知嘅。

18. 但想講嘅係，人地納指，就唔係在NYSE圈幾隻嘢出嚟搞個新指數咯。都話Nasdaq係成間交易所嘛。所以香港呢啲，就學唔嚟嘅。

19. 又之但係，唔好忘記。拿，樓又話唔炒啦。咁政府收入何來？證券印花稅，都係一個好重要收入。所以，點可以減？

20. 果然乜都係政治。

21. 講返，其實都係市場導向，呢個咩「五行三保指數」，當年好似有出輪出期貨（好似有），但都唔係玩咗太耐。粗略估計，咩ATMX之類，應該仲有一排玩嘅。

22. 咁在投資者角度，好多人話恒指跑輸，因為入面全部係啲舊經濟嘢，匯豐中移動，中資銀行保險，地產。所以估值低嘛（又的確係）。亦因為咁，咪有之前恒指改革，容許多啲科技股入恒指咯。以往因為同股不同權唔比入，而家咪比。順你地意

23. 但，香港人核心價值梗係輸打贏要。即係touch wood幾年後美團小米咩爆咗爆，又有人鬧點解要畀佢入架啦。就係咁撚仆街，升得慢又話銀行廢我要科技，爆煲又話科技唔穩陣我要銀行。

24. 可以比較下嘅係，其實美國咩道指標指呢，都仲係好多「傳統行業」，但又冇特登去加多啲科技股入去，你夠大咪畀你入。當然同股不同權係另一個問題，你話美國又有啲人又會同你講人地有集體訴訟，有民主。冇可比性。哦。

25. 但，唔好忘記嘅係，其實呢排啲美國科技股都回得幾快。上星期道指標指有得升，納指要跌喎。Tesla, Amazon, Microsoft, Netflix, Zoom，全部都按周跌。升嗰時你就梗係話唔使睇估值強者越強，但我幾時都話，再好嘅嘢總有個價。亞馬遜係勁，咁5000蚊買唔買？50000蚊呢？總有個價，就係因為咁先難玩嘛。所以幾時都叫你，想訓得好，就分散下。

26. 講到尾，呢個　港版納指，本身係冇乜用的。係呀，你back date返梗係見跑贏恒指國指，之後呢？唔知，但有可能都係。但你得個指數冇用的。如果有啲ETF 產品，有輪炒有期貨，或者有被動基金甚至主動基金拎呢個嚟做bench mark，好似正牌納指有QQQ有7261咁，又唔同了。不過，其實其他指數商一早有類似的科技指數。係咪恒指公司個名巴閉啲？未必

（＊）話說回頭，星巴克在香港都有上市的！真的，你可以買。4337。傳說中嘅「納指七雄」，而家變成「納豆七熊」。Another story

（＊＊）除咗NYSE同Nasdaq，冇耐前仲有AMEX，唔係運通卡而係阿美利堅交易所。唔細架，亦唔係死咗好耐，2008年畀NYSE食埋。另外，仲有啲所謂嘅乜鬼Pink Sheet，例如你去買LVMH或者咩騰訊個南非股東Nasper就會見到

（＊＊＊）有趣嘅係，蘋果而家在Nasdaq上市，但一直都係！蘋果1980年上市，但其實當時已有Nasdaq

（＊＊＊＊）大家應聽過四大國有銀行，仲有農行。但點解五行入面冇農行？因為農行好遲先嚟香港上市。五行三保當年，係冇農行的。已FC

-------------------------------------------------------------------------
香港聯匯何去何從？新收費片已出，講足一個鐘，單次買200

想睇簡介嘅，呢度。亦有埋以前嘅片，有興趣可訂：https://bit.ly/3iYMD0F
報名嘅，呢度。今次課程編號填 CC005。唔想填信用卡亦可以FPS： https://bit.ly/3j0r9QZ　
Log in 呢度：https://bit.ly/3gYXu9e
已付費嘅，log in後按最頂「按此觀看」就得。再唔係返呢度睇：https://bit.ly/3fyKbw0
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:「聯繫匯率會否脫勾？散戶應如何應對？」
影片/課程編號：CC005
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC005]
2/利用信用卡網上付款
3/及後有登入資料可以立即收看
查詢：whatsapp 63832145

［英縮粉！］果然日日添歡趣。使唔使加稅？

1. 5月講過，英國今年嘅經濟衰退，會係300年以嚟最勁（https://fbook.cc/3CJw）。嘩。好多國家都冇300年歷史。

2. 上次最勁衰退，係1706年，The Great Frost．（https://fbook.cc/3CJy）中國就係康熙四十八年（好彩未係明朝）。當年嘅經濟收縮咗15%。咁原本預今年收縮 14%，都破唔到當年紀錄，但而家分分鐘可以。

3. 又，可能我見識少，但我接觸嘅國家，好似冇乜邊個地方，會出每個月嘅GDP。英國就會。咁4月嘅GDP，搽咗收縮水咁（「姐姐畀錢我買嘢姇」），收咗20%，亦係史上最勁

4. 咁當然了，就預5月會反彈返啦。結果都係。但，彈得嗰丁咁多！各位觀眾，英國5月嘅GDP，反彈1.8%！咁大把。咁經濟師都預期有5.5%。實在都大跌眼鏡

5. 出完呢個數， Office for Budget Responsibility （我都唔知有咁的部門）即時話，最悲觀估計，全年經濟可能收縮14.3%。暫時都未會破到300年紀錄，但仲有機會的，加油。

6. 咁之前都講過，正係因為經濟前景咁差，英倫銀行都勒令埋英國嘅銀行唔畀派息—亦都造成咁多散戶傷亡。之但係，明明匯豐啲盈利在中國在香港喎。唔緊要，都仲係好多人爭住去英國，去到再追。好似追軍票咁，未為晚也。

7. 另外仲會講，赤字大增了。睇怕，要加稅？不過同時又好似減咗平樓嘅印花稅，對香港人真好。應該要香港人幫下手了，聽聞好多都好高質的。我就不了，畀我都唔多想去（又唔係即時變公民）。不過我年年有續BNO，唔係呢幾個月先仆去續嘅Don Corleone, give me justice

8. 美國就有美元特權，銀紙似乎任印，冇錢找數亦冇問題。英國有冇？好似冇。至少英鎊就跌咗兩日。將來使唔使加稅減福利？唔知呢。不過短期似乎大家唔係太擔心。英國國債（＊）受追捧呀下，債息跌到低過日本。咁固然因為經濟差啲人要債券，之但係，即係唔擔心冇得還啦。

9. 寫完英縮粉，不日再寫下坡縮出城。都話唔係星縮老仙，因為隻字讀「秀」。

（＊）英國國債叫做gilts，行內術語。有咁嘅叫法，因為原本係真係鑲金嘅。正如美金叫greenback，英鎊叫sterling，加拿大紙紙叫loonie，知多啲扮下嘢。

-------------------------------------------------------------------------
香港聯匯何去何從？新收費片已出，講足一個鐘，單次買200

想睇簡介嘅，呢度。亦有埋以前嘅片，有興趣可訂：https://bit.ly/3iYMD0F
報名嘅，呢度。今次課程編號填 CC005。唔想填信用卡亦可以FPS： https://bit.ly/3j0r9QZ　
Log in 呢度：https://bit.ly/3gYXu9e
已付費嘅，log in後按最頂「按此觀看」就得。再唔係返呢度睇：https://bit.ly/3fyKbw0
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:「聯繫匯率會否脫勾？散戶應如何應對？」
影片/課程編號：CC005
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC005]
2/利用信用卡網上付款
3/及後有登入資料可以立即收看
查詢：whatsapp 63832145