【遊戲】任天堂發布會「Nintendo Direct」曝光多款遊戲預告 任天堂今日喺「Nintendo Direct」發布會公布多款遊戲預告片，主要講述於2021年將會推出嘅Switch遊戲，整個發布會時長接近一小時，相信大家都無時間睇曬全條片㗎啦，所以我為大家抽出幾個遊戲集中討論。 圖2. 當中最令人矚目嘅莫過於《薩爾達傳說 禦天之劍 HD》，早喺2011年任天堂曾經喺Wii上推出《薩爾達傳說 禦天之劍》主打體感操作為賣點，玩家可以用Wii嘅手制當劍咁耍。今日任天堂就宣布將喺Switch上推出HD畫質重製版，預計今年7月16日正式發售。玩家可以用兩個Joy-Con分別當成劍及盾，扮演主角林克去揮劍斬怪救公主。 圖3. 如果一向鐘意玩Mario合家歡類遊戲，最新推出嘅《Mario Golf Super Rush》可能啱你。呢隻「孖寶高爾夫球」可以畀你約埋幾個朋友一齊打Golf，同樣支援體感操控玩法，紮好個馬拎住個Joy-Con一下揮出去，成班朋友一齊望住個球飛都幾過癮㗎，預計6月25日發售。 圖4. 上年《動物森友會》咁紅，今次又點少得佢呢。任天堂公開「Super Mario 35週件記念活動」，約於2月25日推出《動物森友會》新更新包。提供多項Mario道具，例如硬幣、磚頭、超級星星、種菇及水管等，令玩家可以喺森友會入面整返個Mario世界。 圖5. 事隔7年，任天堂終於宣布將於2022年推出《Splatoon 3》，有玩開嘅朋友都知Splatoon係一隻唔錯嘅合作遊戲。今次宣傳片公布人物角色將會有客製化系統，並有全新武器，見到主角坐火車到一個好cyberpunk嘅城市，似乎暗示將會有新場景。 圖6. 覺得上面啲Game都太益智，想玩啲拳拳到肉充滿打擊感嘅Game？今次任天堂表示將於今年2月25日推出《戰國無雙 5》（除咗Switch版仲有PS4及PC版），無論故事定係角色設計都有別於過往《戰國無雙》系列。 當然仲有其他遊戲，例如上年熱門大逃殺生存類遊戲《Fall Guys》將會登錄Switch平台，篇幅所限未能盡錄，大家有興趣就睇下「Nintendo Direct」發布會條片啦。 資料來源：Nintendo Direct - 2.17.2021