各位想幫手捐錢捐物資可以參考！


一人買少少，盡做啦！
記住要小心畀狗咬呀，被沒收就唔好啦
#好人一生平安

各位大家好，我係一個好普通既香港人，細路眼中我係姐姐/姨姨，叔叔姨姨眼中，我係一個細路。
有見於香港好多人都好關心一班成日忙於打機既細路，廢青，但又因為唔太理解點樣過關打大佬，唔知點樣幫佢地升級工具，有見及此，我睇左啲攻略，希望可以深入淺出咁同大家講解一下，如何幫幫廢青，救救香港。

篇文有點長，而且因為時間既關係，我諗到乜就打乜，無乜文法同工整可言，亦唔會太多廢話，可能會有粗口，同埋又有啲虛幻，但各位香港人應該好易明，希望大家都可以睇曬佢。

首先講講出錢既野：

物資：有睇新聞都知，有機打果日，四圍一定封路，有車就查車，見人就搜身，基本上有大型少少或者大量少少既物資都會俾人沒收。
最好當然係人人入場打機前都帶曬裝備啦，但好多學生真係無錢，你見企前面食子彈果啲都係拎住個煲蓋就知咩事。
咁有咩方法可以令到打機既小朋友可以直接升級取得裝備，唔會係中途俾敵人搶左呢？
最好當然係沙田打機果日咁，啲遮呀同保鮮紙從天而降啦，又或者一個無帶面罩同埋著彩色衫既叔叔姨姨，直入打機現場（機鋪呀）又得。再唔係好似果日打打下機，無啦啦有一架補給物資車直接車左去個機鋪咁，亦得。閣下自己探究一下。

升級工具：
防霧＋鏡面泳鏡（即係戴左睇唔到你對眼果種）
不要透明眼罩。因為場遊戲已經升左LEVEL好耐，個大佬已經唔同左，透明眼罩已不合適。

防毒面罩/俗稱豬咀口罩
但價錢真係貴，細路買唔起，加上一罩難求，所以只係得好少人用，所以各位多多益善，少少都唔拘，打機既細路係唔會浪費，一定會重用。
如果唔知邊度有，可以落去樓下街市見到著黃色衫，粗粗魯魯果啲人稱「師傅」既技術維修員，佢地會答你。
秘技：唔好問著藍色衫果啲。

手套，要防割既，唔易爛既。
另外一啲燒焊用，非常耐熱果種手套。
同防毒面罩一樣，問黃色衫叔叔即可。

大聲公，對講機，望遠鏡（攻略書中認為好重要）
機鋪一人一句真係好嘈，又帶住個裝備，完全聽唔到組長指示，所以成日攪到一仆一碌，成日都過唔到關。
以我用毅進制去計，每200個為一小隊，應該需要一個大聲公，遠距離既亦要一啲對講機。咁哨兵就唔駛跑咁多轉，又唔駛捐耗咁多能量值。
而望遠鏡就可以清楚分析地形同現有實力，咁就唔會進退失據，順利過關。

以下有啲物資，我唔詳細講太多用途原因等等，大家會明，亦唔難買。
長遮，水筒，電筒（又細支又光果啲），儲值卡，大剪刀，長索帶，手推車，N95以上級別口罩，銀哨，噴霧樽（大），電池（任何A類型），紙皮，牛皮膠紙，已充電尿袋或可戶外供電既物品。
仲有一樣：盾，請大家自行詮譯。

食物/急救用方面：

水（大量），因為太重，細路入機鋪唔會拎太多，但水好重要，又可以救人，又可以飲，又可以消滅敵方既武器。
茶，又可以飲又可以救人。
生理鹽水，哮喘藥，不痴毛繃帶砂布。

其他既；我會建議各位買啲車票，（買邊個目的地唔重要，細路自己會補飛），方便細路俾大佬打到收曬皮果陣可以速逃既，免得俾人滅軍。
盡可能唔好擺錢係站，排隊買飛大佬可能會趕到。

至於無野食，最好當然係落場派啲輕便，可以一路打機一路食野既野俾佢地啦。
但細路面皮薄，唔好意思拎又會做成浪費。
最折衷當然係俾食物券佢地啦，有個麥叔叔周圍都有鋪又開得好夜，食佢都幾方便。

至於你會問：點樣先真真正正可以俾到啲打機細路呀？

方法一：將啲車飛同食物券，俾一個你信得過佢，而佢又會落機鋪打機既人。
方法二：你落機鋪將啲野交俾任何一個行得比較前既細路，然後返屋企。

打機打到上曬腦既廢青，落到機鋪每一個都係均均真真，唔會貪你地一分一毫。有淨低既，佢地會帶去下一次，一定會將佢地用得其所。相信佢地。

民間已有好多自發物資處理，可以嘗試聯絡。
盡量唔好交俾任何一個政黨既成員，絕對唔係政治立場既問題，而係所有人都必須要尊重一班玩家，
打呢鋪機最重要既價值之一：「沒有大台」

———————————

出力方面：

當然係可以用其他方法支持啦，例如參加一啲支線既打氣活動啦，呢啲就唔詳述喇。

我認為好重要既就有以下一啲行動。

一：有車既，接佢地離開機鋪現場，唔駛心慌慌咁驚落車會俾人打，999又線路繁忙。
好多時佢地唔敢上車，除左因為驚你係卧底之外，同埋佢地驚會 連．累．你！
遇到呢啲情況，唔駛驚，俾啲笑容，誠懇啲，用盡一切辦法邀請佢地上車。

二，無車既，唔好咁早訓教，落街散下步，係車站接佢地，見到啲著制服既人又嚇細路，據理力爭保護佢地。（詳情可睇下面連結）

三：見到佢地唔好怕醜，兜口兜面同佢地講句「多謝，叻仔，辛苦你啦」鼓勵係最大力既推動力。
———————————

以下係一啲我親耳聽到既對話，如有亂嗡，落場打機第一個真槍實彈射中我。

（西營盤外出橙旗，一男一女只戴普通口罩同一把遮）

「出橙旗喇，我地無裝行後少少先啦。」
「屌，驚乜啫！反正點都係死架啦！行前呀！」
然後手拖手走上前，好浪漫，但可能會浪漫到死。
（*註 點都係死：拉到又係死，俾槍打到死又係，俾共產黨控制都係死）
—————
（放題中，左邊係煙，右邊都係煙）

「拿，我地千祈唔可以驚，一驚就會亂。見到火頭合埋眼衝上去，整熄曬就會無事架喇。」
—————
（休息時間有人派麵包同水，係扁曬既麥叔叔麵包）

「邊個要麵包同水呀，麵包同水」
「我可唔可以要三個包呀？」「可以！」

然後果個全身係白色粉既粉人，將其中兩個包俾左兩個記者，淨返果一個，佢同另一個肥仔一人一半。
—————
（自我休息時間，有個姨姨派野食，無人食）

「我唔食喇，多謝。」
「你地點解唔俾我幫你地？你地一定全日無乜點食野架喇，你地唔食，不如我俾錢你地啦！你地肚餓先再去買。」（伸手搵銀包）

全部人「唔要！一定唔會要錢架！」
其中一人「一定唔會要你地任何人啲錢架，一陣又話我地收錢攪亂香港！但野食就唔怕，其實我都好肚餓」
迅即派曬。
阿姨邊行邊喊。
——————
（裝備升級中）

我係個大人，行入去腰骨好直，大大聲問野無怕過醜。有個15歲都唔知有無既排骨入左黎。

「唔該我要一個眼罩，頭盔。呀，唔係！都係要口罩同頭盔」
「點解唔要埋眼罩？」老闆娘好豪氣咁問
「我唔夠錢，我用保鮮紙包住就得」
😧<<<<呢個真係老闆娘個樣。我都係。
兩秒後：
「痴線！點睇路呀？我唔收你錢你攞去。」
「多謝，我知道幾多錢，我上次整爛左咋嘛，我下個星期會黎還錢俾你，多謝你支持我地」
—————
（物資鏈，哨兵傳來要飲得既水，好緊急）

一邊傳一邊見到有自家水壺，有啲開左飲左少少。
後來直頭有幾支飲淨兩啖。

「得返兩啖都傳？」
「er...傳架，支支有兩啖就浸死人架喇」

內心好慚愧....因為一路傳我仲攞左支黎飲🌚
—————
問你死未？
曾經你同我都有既單純，率性不矯情，無錯就係叫「赤之子心」。

奉上如何到車站保護孩子影片一條：
https://www.facebook.com/178965725523592/posts/2354859631267513?s=1418702470&v=e&sfns=mo

農民經驗分享 是農業向前進的力量
雲林縣農業經理人協會在虎尾鎮國來田莊溫室舉辦「新型噴霧車、農機具展示暨農機具簡易保養、維修課程」，看到大家不藏私，將從事生產的寶貴經驗、技術、心得，相互分享，這是雲林農業持續成長最大的動力。