* 一啲《與神同行》嘅觀後感 「高清垃圾：引用行內某人抵死COMMENT」 （含劇透，慎讀） — — — — — — 睇完套戲之後，我嘅表情係同車太鉉嘅呢個樣嚟咗個「首尾呼應」，佢驚訝自己點解死咗，而我驚訝嘅，係我呢兩個幾鐘頭究竟睇咗啲乜。 — 對於韓國娛樂文化，自己可以話又愛又恨，愛嘅地方唔洗講，女神之神全智賢係不朽嘅，甚或宋慧喬、李孝利、李英愛、孫藝珍等等亦非常高質，黃晸玟、宋康昊影帝級人馬。 — 而近年韓流喺香港愈吹愈盛，韓劇KPOP舉世無雙，《與神同行》就係我認為係「韓流」文化集大成嘅一個產物。以KPOP為例，要靚女有靚女，要靚仔有靚仔，身材個個養眼，勁歌熱舞，甚至限定身高要睇齊幾高以上都無難度。《與神同行》亦然，你可以講得出佢無任何受歡迎作品嘅原素咩？其實佢全部都有齊曬，有巨星、有洋蔥、有精彩嘅特技、有曲折別開生面嘅劇情，有原著漫畫文本做承托，總之乜都有，拍出咗一套堪稱「完美」嘅作品。 — 但點解我會評呢套電影為「災難級」？個原因在於，電影試圖想兼顧一切，但去到最後落得咗乜嘢都兼顧唔到嘅情況出現。 — 第一，喺劇情方面，大量嘅犯駁位我唔打算逐一去挑剔，例如點解罪名由輕至重，去到中間會有豁免？點解一隻所謂冤靈已經可以搞到地獄天崩地陷？點解劇情嘅一個重要轉折係由「走火」去引發出嚟？講故唔好駁故，個道理我明，但我只係信服唔到個故仔，聯想唔到一啲合理嘅文化意涵，所以難以投入喺套電影入面。 — 而電影更嚴重嘅問題係，佢世界觀嘅建立處於一個極亂嚟嘅水平。要講世界觀，一定要講少少科幻作品嘅基礎知識。可能好多人唔鍾意睇科幻作品，覺得個作者點寫都得，唔夠真實。但其實成功嘅科幻作品，必定要有佢相對嚴謹嘅「世界觀」。嚴謹唔係代表套戲嘅IDEA一定要有科學根據，而係寫故事嘅作者一定要對佢筆下嘅世界有自己嘅邏輯，對角色有所限制，或者有清晰嘅強弱等級之分。 — 以一套我極唔鍾意嘅《天啟滅世戰》作為反例，成套嘢都講X-MEN要打一隻勁到PK嘅藍色佬，個個都束手無策，點知最後靠靈鳥一吓大叫就完咗場，我諗你唔早啲嗌？而《與神同行》亦有住呢個「說了算」嘅通病，成個地獄，甚至現實世界都無邏輯可言，地獄使者可以隨時穿越過去查案，一時話唔可以騷擾陽間嘅物理活動，一時又好似無咩後果，冤靈可以無啦啦變沙人，車太鉉唔知點解無啦啦要唔比望啲魚，無啦啦危急關頭，又爆咗個「合併審判」嘅TERM出嚟，跟住到下一關。唔好問，總之個世界設定就係咁，充斥住好多你未知嘅嘢，寫得最差嘅作品，莫過於此。 — 其次，係電影語言同立意嘅問題，我唔知呢套電影定位嘅觀眾究竟係邊類人，但電影製作人好明顯就將電影語言設定到一個極之淺白嘅位置。坦白講，我喺觀影嘅頭五分鐘已經覺得中伏，大抵係講金自鴻唔知道自己死咗吧？其實交代主角死咗，靈魂脫離肉身嘅訊息極之顯淺，需唔需要用五分鐘，仲要加插同使者嘅連番對白，先交代到呢一件事？好的電影大多精煉，一個眼神，一個鏡頭已經足夠，我寧願佢用多一兩分鐘講多少少火場入面嘅情況，描寫車生點樣大愛，點樣無私，用以鋪墊之後嘅劇情發展。 — 另外，電影故事嘅道德層次近乎係有當觀眾有弱智嘅傾向，例如老掉牙嘅「殺一救萬」、「善意的謊言」等等，好多差嘅行為嘅背後，原來都有一體兩面。但呢啲概念竟然可以成為故事佔大約一半嘅「主線」，果真「蔚為奇觀」，「哦」。（於此我唔係反對簡單道德概念可以拍為電影，可以作為表皮，但絕不能如《以神同行》咁平鋪直述，然後扮發現新大陸。） — 而故事最後所謂嘅「扭橋」，金自鴻想殺媽媽果陣，原來媽媽係知情嘅，成家人心入面有條刺，但金生發奮打工養家贖罪，最後得到寬恕，所以可以轉世。可能喺「扭橋」之前已經太多荒謬情節衝昏頭腦，我真心無被呢個情節驚艷到，亦無感動，不太感受到弟弟是營養不良的，媽媽昏迷也是可笑（扭橋是她開了眼lol），覺得劇情仍然係非常普通，只係想套戲快啲完結。 — 《與神同行》於我，係一套節奏非常奇怪（剪接及編劇要負很大責任），極度堆砌嘅作品，喜歡係無問題嘅，但如果多人喜歡，捧到上天，甚至喺香港獲得巨額嘅票房，（《以青春的名義》、《藍天白雲》、《黃金花》好睇過佢幾千萬倍），就係一個不得不注意嘅問題。電影令我諗起今時今日韓國娛樂圈嘅生態，乜嘢靚嘢都有，但就係討好唔到我，因為靚嘅女人，唔需要一定大波高鼻，但必須比到人「渾然天成」嘅感覺。 — 有啲嘢千祈唔好做多咗，就好似《與神同行》嘅罐頭式音樂咁，印象中套戲嘅襯底音樂無停過超過一分鐘，有時唔係音樂緊張，套戲就緊張架，究竟無咗配樂，個導演仲識唔識拍戲呢？ — 觀眾，加油。 — （如果你咁有心機睇到嚟呢度，一篇觀後感其實要寫嘅時間真係頗長同相當費心力的，正如呢篇野都過左千五字了。如果你覺得文章係寫得好嘅，我一個人嘅力量真係非常有限的，唔好吝嗇你嘅like同share吖，甚至幫手推薦比朋友知道原來睇戲之後係可以有反思的，一齊傾，一齊分享同感受。網絡的力量可以很少，一篇千文字可以只像一粒沙，但同時亦可以很鉅大的，依靠的就是你，你，和你，感激不盡！）