【龔成問答信箱】（Q21481-Q21500）

Q21481：

你好! 老師。我今年28歲，疫情問題，搞到我現收入對比之前少左差唔多4-5成人工，現時收入得17000。

而我對於金融知識可以話係0，之前一直都無去接觸投資或者相關知識！

近一兩年我更加體會到合適投資理財既重要性，最近機緣巧合之下我接觸你個page ，所以我忍唔到想問一些有關好新手既問題。

我想問︰

1. 投資是否要有一定既本金，才可以開始。我有朋友一直都叫我合理投資，佢話就算你得幾千蚊都可以！唔一定要幾萬/幾十萬。

而我就覺得本金覺得要有返一定既數目，例如兩三萬不等。

2. 另一個問題係，我身邊有部分朋友佢地投資股票，大部分都係短線投資（我唔知佢地對該股票本身公司既了解程度深淺）

係宜類事上樣，佢地算係投資定算係投機!?

3. 最後我想問一下，28歲先開始慢慢學（本身興趣不大）會唔會係好遲

可能真係問左幾個好愚蠢既問題，但我覺得如果開始要學，更加應該要解決我眼前既疑惑先。

龔成老師︰

「發問」，係學習必經階段，唔好覺得愚蠢，而停步。因為，無人一出世就乜都識，好多野，都係後期努力學習得來。

所以，你想做投資，就要努力去吸收知識。睇財經新聞、睇企業年報、投資書籍、上相關課程，都會對你有幫助。

1) 我地開始投資，唔一定要有一筆較大的起動資金。只要你每月有一定儲蓄能力，就可以利用這筆閒錢，以月供股票形式，去進行投資增值。

以你28歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

2) 我地買入一隻股票，就等同買入一間企業，一定要知道佢質素、行業前景、財務狀況等，才去考慮否投資。

當我地確認係值優質股後，我地會用平貴定入貨策略，並長線持有。而唔係做短炒，去賺差價。

因為短線股價會受市場氣氛、資金流向等，與企業質素不相關的事情影響。這些因素，我地係不能估計。

但長線，企業價值會係股票上展現出來。因此，優質股你買入後，長線持有，讓其自然增值，永遠都係最有效的財富增值方法。

而你朋友，不論佢地對企業了解多寡，短線操作，必然受很多不能預計的因素影響。因此一定賭博成份，故算係投機。

3) 你28歲，唔算遲，依然有好充裕時間做財富增值。你除了盡力儲蓄、投資、學投資知識外。也要把握你年青優勢，盡力儲錢，做好財富增值部份。

------------------------------------------------

Q21482：

老師，今日隻ASM 近期上升，雖然得一手，我在50值博倍升股中挑選的，1177都有三手，好有滿足感!

但係佢地升咁多，我点加碼再入再長線持有呢？好矛盾
二月開始學習股票，終於睇到威力，都滿足又請教!

等番跌落合理價，又可能冇我入咁低，個值博率咪又低左囉？

龔成老師：

太好了！

ASM PACIFIC（0522）有質素的，這瘓《50股》其中一隻，優質度4分，可見值得長線持有。至於中生（1177），同樣可以長線。

如果你本身有貨，就唔好太急去買入，ASM PACIFIC約在合理區頂，中生就略貴，你都一以耐心少少，等佢地回翻D先加注。

有時就算未到你之前的買入價，只要合理，而你又資金足，買入後仍有現金剩，都可以考慮的。

------------------------------------------------

Q21483：

拜讀完財務自由行後, 有些關於物業投資的問題,想請教下, 先講下本人的資料先:

-女性, 單身, 40歲
-無買過物業, 現住我媽名下之自置公屋, 已供完, 未補地價, 無住屋問題
-現在財務狀況:
*人工$29000, 收入穩定
*基金USD30000 , 月供HKD2000 *股票$450000, 分佈如下:

2 - 15%,
3 - 6.5%,
11 - 14%,
66 - 10%,
590 - 5%,

737 - 0.3%,
823 - 3%, 939 - 4%, 1177 - 6%, 1398 - 1.4%, 1448 - 1.9%,

2382 - 1.6%,
2638 - 0.9%,
2800 - 23%, 2823 - 0.5%, 2828 - 4.9%,
3067 - 1.5%, 9988 - 1.4%

並現在月供
66 - $1000,
823 - $1500,
2382 - $1000,
2800 - $1500, 9988 - $1000

*現金$200000,
*公積金$1600000,
想問:

1. 睇完財務自由行時才發現物業都好重要, 但以我的年齡才買樓會否太遲? 我驚銀行不會做太長年期按揭?

2. 如買樓可以, 要如何儲首期? 因買後打算放租, 要預較多首期, 再要儲幾年錢, 驚按揭難做

3. 還是不買樓了, 買股票儲資產算了
買樓這問題, 我想了幾個星期, 問不同人有不同意見, 都不知怎決定好, 所以都好想聽聽龔老師意見, 謝謝你的回覆!

其實我驚年紀大，現在才供樓負擔太重，另外股票打算長線投資，但如因買樓要賣出，又唔知好唔好

龔成老師：

你現時的股票組合，基本上都無問題，大多是優質股，同時算是一個平衡狀態，而部分持有較多比例的，就不要再加注，你預一隻股票去到15%是上限。

1）在我地財富配置中，應該長遠建立「股樓平衡」的組合，不過，你現時無住屋方面的逼切需要，因此，你在這方面變成了不是「必然」。

但長遠，建立股樓平衡都是方向，但要留意，雖然這是方向，但我地買樓有一個好重要的原則，就是「供得起」，要確保在這方面無問題。

如果太勉強，就未必是好事。

以你的情況，暫時不用急於買樓，因為當你買樓後，財富會太偏重在物業，同時你在供款方面，都會有一定的數目用於供樓。

因為你這刻的財富與收入，並不算好高，因此在置業後，會用了一定的資金同時供樓可能會有吃力，就算收租現時亦未能對消供款，每月都要有支出。

2）儲首期以儲蓄及投資股票滾存，然後到接近買樓時，就要賣出股票去套取現金準備買樓。

3）你可以視買樓為一個方向，但不用一定要完成，同時不用好急去進行。可以等你財富有更大累積後，例如定一個3年的儲蓄投資計劃（試試在3年內，盡全力去儲蓄、投資），睇下到時的財富與收入情況，再作決定。

------------------------------------------------

Q21484：

老師 想請教一下 組合入面想減少一啲質素無咁好既股票套現 可唔可以俾啲意見減邊隻好

405 66 788 1558 823 2342 8083 2806 1980 336 2208 6618 6993 1810

大部份都蝕緊 未返到家鄉 除左823 66 1980 1810 8083有賺

龔成老師：

上述持股的隻數，的確有少少多，管理會較難（但又不是好多）。

而我地決定一隻股票去或留，不是睇賺蝕，最重要睇質素。而我見組合內的股票，其實又不是差，因此問題的確大。

京信通信（2342）、中國有贊（8083）、天鴿互動（1980）、華寶國際（0336），並不是無質素，只是風險較高，又或業務較為波動，可考慮減持部分。

至於其他，無問題，可以長線。

------------------------------------------------

Q21485：

522 ASM 之前公怖第一季純利急升，對估值有沒有提升，現在加注是否合適？謝謝

至於700，1177，9988，等等我直等老師說到合理位置才入，所以700，9988，未有加注，1177就越等越貴，不知如何是好。謝謝你

龔成老師：

ASM PACIFIC（0522）有質素。

佢係半導體和發光二極管行業的集成和封裝設備供應商，為跨國芯片製造商，為獨立集成電路（ＩＣ）裝配工廠和消費電子產品製造提供半導管裝配設備及材料。

過往的生意與盈利都有增長，不過盈利有點波動，這都會令股價略有波動。

佢業績正面的，會對估值有少少提升，但我在分析時，會以更長期的角度分析，不能只睇短期業績。因此，雖然現時睇佢業績正面，但都不能太過調高企業價值。

而佢長遠有一定的發展，可長線投資。現價合理區頂位，如分注小注或月供，仍可以。

如果本身不太多貨，都可加小小，加如果已有一定的貨就唔好加。

至於另外三隻，你可以月供的，如資金不多，就停一停，不要急於買入。

------------------------------------------------

Q21486：

你好，我想問下，如果月供股票會否產生很多碎股日後出售比較困難？

龔成老師：

的確會有碎股，但其實不用太擔心。

第一，碎股都可以賣到的，一些大型股，只要價位低少少就賣到。

第二，當你好長期去供的時候，碎股佔比其實好少。

第三，有些銀行提供「你在該銀行月供股票，該銀行比你用正股價賣出」，佢地會提供這服務。

------------------------------------------------

Q21487：

龔成老師你好，我最近開始由讀醫書，放假開始研究投資。想透過投資，為屋企人帶來更穩定嘅退休生活。

但我係投資新手，想問應該如何入手，因為平時鑽研醫書用上好多時間。

我是一位醫學院畢業生，投入職場數年，最近因為打算為屋企人帶來更穩定嘅退休生活，並有出國進修嘅目標，

開始在工餘時間，由鑽研醫書，抽撥時間開始研究投資，因而關注了你的專頁。

我是投資新手，所以把握時間，清楚自己嘅投資能力同方向

龔成老師︰

你讀醫，相信會投資一定的時間去得到專業資格，而這個事業的回報，比一般的其他職業為高，因此，你要好好發展這事業。

因為這個事業可以為你帶來理想的初期本金，之後再配合投資，可以為你帶來長遠理想的財富。

怍為一個位投資新手，你建議你先要做三樣野。

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

你可以先睇我本《股票勝經》，適合初階投資者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個包含55間優質企業的組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。

上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q21488：

唉！成哥！好惨！朋友介紹我買輪。買左華虹12479..0.26買，就死得。係米冇可能升返0.26

其實我第一次睇你fd，我已經覺得你好好，好細心幫d網民分析。如果之前我大胆d問下你的介绍同分析，我一定吾係咁結果

龔成老師︰

我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

其實我當時，用左幾年時間去學分析技術，我當時不斷睇書、上堂學短炒，但最後都是輸，可能是我能力不足吧。

但我之後做銀行同證券行，見大部分輸錢的客，都是偏向短炒的。

當然，你問我有無人贏錢，是有的。但就我觀察，長線投資贏錢的人，比短炒的較多。

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的，佢都唔用技術分析。

因此，我相信長線投資，是真正助我地贏錢的方法。

所以，我不停會叫讀者，唔好短炒，唔好用衍生工具，就係這個原因，這都是經驗之談。

以你現時情況，建議唔好再用衍生工具。因為短期股價，主要係受市場氣氛、資金流向等，與企業本質不相關的因素所影響，好難估。

但長線，只要係優質股，企業價值一定會係股價上慢慢反映出來。因此，若你睇好個別企業，你係應該買正股，而唔係短炒工具，並長線持有。

華虹半導體（1347）有質素，發展不差。

佢主要從事半導體產品的生產及貿易，開發及提供晶圓工藝技術組合，包括嵌入式非易失性存儲器及功率器件，以及ＲＦＣＭＯＳ（射頻互補式金屬氧化物半導體）、模擬及混合訊號、ＣＭＯＳ圖像傳感器、電源管理及ＭＥＭＳ（微機電系統）等多種其他技術。

佢客戶主要為集成器件製造商與系統及無廠半導體公司。中國因為想發展這方面的技術，政策在長遠會對這公司有利，增長正面。

但你現時投資12479這些衍生工具，投資策略與正股好唔同，這些衍生工具當你見到唔對路，就要立刻賣出，無得守，因為佢時間值會不斷減少，你持有愈耐，就愈貶值，你只能等多短時間，現時距離到期有2、3個月，你最好在1個月內，無論升跌多少，都要賣出，否則之後時間值跌得好快。

------------------------------------------------

Q21489：

龔成老師， 同朋友一齊做生意，但係佢叫左自己屋企人黎反工，我就開始有種唔知點既感覺，又唔知點叫佢做野，我應該點處理。

龔成老師：

第一，你要同佢溝通，做生意要多溝通，要大家知道各自的想法，比佢知你想點，同時你都要了解佢想點，要找一個大家都平衡到的方法。

第二，要定規則，要盡早定立營運模式，要向企業化去行不能一個人話事。

當企業化，就大家要守規則，事情就會較易處理。

------------------------------------------------

Q21490：

老師你好，考慮左好耐，始終都係心思思想向你請教一下。

因此近年係FB睇到老師分享資料好有用，而且你強調買股票應該採用價值投資法，而唔好只係為短炒波覆，呢一點真係好警醒我。

回顧過去買賣股票，因為只顧短線波覆，其實鑊利唔多，可以只係打和。

所以而家開始，我都希望自己可以跟從老師既方法去投資，請老師指教一下。

我今年32歲，月入3萬。存款100萬，月息可收約2％，股票約30萬（2388,2628,9988,3069）

以前買股票，短炒為主，波覆收入會儲一半，花一半。未來1-2年希望買樓，請問老師覺得我應該從現金再投資幾多去股票市場會比較好？

同埋想問一下3888,909呢類是否可以低吸儲貨？
謝謝

龔成老師︰

記住，我地投資股票，係希望長線持有一些優質企業，透過佢自然增長，達至財富增值目的。

而唔係做短炒，去賺差價，這個方法係好錯。

32歲計，你應先做好增值部份。但由於你1-2年內要置業，資金係有一個明確的使用目的。

而且時間太短，如果用來投資較有潛力股票，會有一定波動性，影響最終回報。

以你情況，資金最多可以投資一半在收息股，另一半則以現金或定期持有。再保守D，你可以只持有現金或定期都可以。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

現有持股，華夏恒生生科(3069)和阿里巴巴(9988)波動性會較大。中國人壽(2628)質素只是中等。

如果置業時都需要贖回現有持股，我建議你減持部份﹐將佢換成收息股，定期或現金持有，會較好。

到你買樓後，新資金才投入較有增長力股票，幫你作財富增值。

金山軟件（3888）主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區頂位，這股前景正面的。

明源雲（0909）有潛力。

佢主要係中國房地產開發商及房地產鏈參與者，提供企業級ERP解決方案及SaaS產品。

睇翻佢之前的資料，佢係中國房地產開發商的第一大軟件解決方案供應商，市佔率有約2成。係呢個市場裡面，按收入計，亦為ERP解決方案及SaaS產品的最大提供商。

其實，佢的角色可以話中國房地產行業的數字化轉型，為房地產開發商及其他參與者，開發了一套行業垂直的ERP解決方案及SaaS產品，以助其管理廣泛的業務運營。

包括銷售及營銷、採購、成本管理、項目管理、預算以及房地產資產管理，佢的SaaS產品包括雲客、雲鏈、雲採購及雲空間。

業務雖然有增長力，但股價都唔平，如果初步分析，處貴水平，值博率未算強，始終市場現時對這類股有好大期望。

但由於3888和909都係波動性高架股票，暫時不適宜你用來投資，等你置業完成才再考慮。

------------------------------------------------

Q21491：

龔成老師你好，本人36歲，單身，正職加freelance收入大約每月兩萬元。最近一年才認真開始儲錢。

現在儲了10萬元港幣，另有多年前買入的5萬元人民幣。有意分注買入股票作長線投資。很想請教您的意見！

現在我可以keep住每月儲一萬元。我打算平均一個月用大約＄5000 分注買入股票。餘下的$5000儲起，等在大市回落時用來買平貨。

我初步的想法是：

1. 每月買一手安碩恆生科技（03067）
2. 大約每隔兩三個月買一手雅生活（03319）或者中國生物製藥（01177），你建議買哪一隻較佳？

請問我這樣方案可行嗎？定係有其他更加好的組合更適合我？

另外你會否建議初學投資的人先集中只買港股？其實我亦有意投資美股ETF，原因是我見它長缐的回報不錯，有不同成份股亦可分散風險。

只是現在我資金不多所以暫時不打算買。

我有信心半年後我的freelance收入會有所增加，到時可有多些資金投資，打算之後每月keep住用分注買入VOO，長期月供。這樣可以嗎？

感謝龔sir寶貴時間回答。

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

你現時36歲，應以增長力為主。現時你先用$5000分注，另外$5000儲起等大跌市機會，這策略係可以。

安碩恆生科技（3067）、雅生活（3319）和中國生物製藥（1177）都係有質素，和較有潛力股票。3319和1177相比，潛力度1177會高少少。

而現有人民幣，如果無特別用途，可以換回港幣，連同10萬元作投資之用。

但我地投資增值，唔係只係講求增長力和優質程度。同時間，我地都要考慮成個資產配置。唔可以太集中係個別資產、行業或者股票。

你所提到的股票，都係潛力股類別。佢雖然有增長潛力，同時風險都較高，不宜持有過多。

你每月分注，暫時集中係潛力股係可以，但現有資金，必需較集中在平穏增長股部份，去平衡個風險。

長線計，你要留意平穏增長股和潛力股比重，以你年紀，最多只可以50:50。而你只係初學者，要再打折扣，大約佔3成好了。

另外，50:50這個比重不是永遠。到你年紀日長，你要慢慢下調潛力股佔比，去平衡個風險。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

至於初學者，無話一定要港股先，定美股先。個重點係你較了解邊個市場，和當中股票。

美股都有質素，若你對美股有一定認識，將來都可以將VOO加入月供組合之中。

------------------------------------------------

Q21492：

老師，20歲 Year2，我好希望大學畢業之前儲到半個百萬即係500,000！

龔成老師：

這是一個高目標，不過，不是不可能。

最基本你要你要做好理財，盡力儲蓄，之後就要睇下你點樣滾大財富。

主要方法有兩個，第一，投資，較集中投資增長力較高的股票，當然會有風險，但同時要求你有一定的投資實力，但只要付出，我相信$50萬目標不是不可能的。

第二，做生意，你現時大學生，應該能找到時間做生意，同時可以找一一個年輕人的市場，這是你的優勢，只要做得好，你可以有理想回報。

加油！我等你完成目標的好消息！

------------------------------------------------

Q21493：

似乎Alibaba 近况普通，想把它換了腾訊

1357聽講它買了很多Bitcoin, 我又無膽買Bitcoin, 所以考慮它，你覺得如何？

龔成老師：

我地分析企業時，最重要是睇翻企業的長遠發展，唔好單比這一刻的情況影響，要睇長遠。

阿里（9988）有質素，有增長力，之前貴，現價去翻合理區。其實仍不差的，佢同騰訊（0700）的質素，接近。

阿里係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票，小注分注投資，或月供，是較好的方法，算是平衡了風險與增長的考慮。這股可以長線投資的。預佢現價約合理區中上部。

至於美圖公司（1357），佢的確有投資比特幣，你當間接投資，都可以的，但你預佢上落較大。這股業務都算正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

------------------------------------------------

Q21494：

你好，老師，有些問題想請教你：

本人30歲已婚，家庭月入約18萬，平均儲蓄每月13萬，現持有一幢樓齡約34年的物業，市值800萬，現欠按揭350萬。

目標想購置一個三房港島單位作永久居住使用, 現有物業則用作放租用途。

本人和太太現金約有420萬，由於理想單位大約需要1800-2000萬，首期不足，故此有兩個方案,還望老師指教：

1）儲蓄多3-4年和平穩投資，儲夠首期以買到心儀3房單位

2）投資一個兩房新樓，如康城/啟德/黃竹坑等，待物業升值後再發售並換上心儀單位

請問上述方案更好？定還是有其他可能？
謝謝

龔成老師：

其實兩個方案都可以，但從這刻的投資項目值博率考歲，方案（1）較好。

當我地考慮你長遠的置業計劃時，會考慮怎樣最有效達到，怎樣將現時的財富，最有機會及最快，能完成你的目標。現時股市的平貴度，相比起香港樓市為平，因此在增長力方面會較好。

再加上股票的流動性較強，以及買賣的成本比你物業買賣成本為低，因此，（1）對你來說是較好的。

另外，當你進行（1）的方法，其實不一定硬性規定要3-4年，如果你持有股票升值較快，同時樓市出現下跌，這已經可以買。

相反，如果資金未足，就可以遲少少先買，可彈性處理。

------------------------------------------------

Q21495：

呀Sir~我想加番多d潛力股落個組合到（暫時我只有盈富同六福）

想問問中生製藥1177，是否$8以下都可以入？
另外，福壽園1448係咪around $7.5以下都可以入呢？
我想暫時各入1-2手

另外，小米都想買一手，依家可否都入一手呢？

龔成老師：

這3隻都可以，你可以在適當位置加入。

褔壽園（1448）$7以下合理區頂，如果$7以上你小小注好了。

中生（1177）$8以下合理區頂。

小米（1810）$24以下合理區頂，如果在這價以上，你小小注，或月供好了。你可以買入一手，等跌再加。

另外，你可考慮安碩恒生科技（3067）。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q21496：

阿Sir 之前睇咗你嗰條片關於25歲再讀四年full time course, 好有少少問題想請教你。

我18年大學畢業主修英語研究。 畢咗業兩年半我都係做luxury零售業,因為我知道未來嘅路我唔係想做零售 我三月中辭咗職。

我計劃左打算今年8月考試CFA所以而家嘅時間溫習多。 而家暫時都係冇做嘢，有時會做兼職， 之前儲嘅錢都有做少少投資。

對於呢個轉變呢一刻我有少少迷惘 但係因為我選擇咗咁樣去做，所以都要硬着頭皮繼續去。

所以你對於例如考 CFA 或者FRM認為係點？

我之後都想會喺金融或者銀行個方面發展

我以前中學係讀商科 同埋都有考LCCI。因為而家疫症嘅關係我短期內都應該唔會搵到工 屋企人都為我有啲擔心。

龔成老師︰

我地考慮重點，應集中係你長線發展。

首先，你要了解CFA和FRM對你將來工作，會唔會有實際幫助。

如果有，你就努力去做。心態上，只要唔好為左有張沙紙，人有我有而去做。而係從實際作用出發，去考慮這件事。

另外，現時除左讀書和兼職外。你都可以睇下，有無一些工作，係可以吸收相關經驗。

可以幫助你將來，進入你心儀的工作，都值得去試一試。

短期可能因為讀書、學習，令收入偏少(當然，收入減少不致嚴重影響家人。)。但長遠係有利的話，你就應向這方向進行。

------------------------------------------------

Q21497：

你好龔成先生， 我想請問點樣可以增重增肌，同時又可以兼顧儲錢呢方面。

因為健身需要大量食物補充，是否只能降低少許儲蓄平衡。

龔成老師︰

如果增重增肌是你工作所需，而又對你工作有利。你係可以調整一下儲蓄部份。

但若果係個人興趣，你就要找出儲蓄增值和生活興趣中，取得一個平衡點。

若你放棄今天興趣的消費，去加大儲蓄，自然財富增值會較快。當財富累積較多，將來你就有更多資金實現你夢想和興趣。

當然，這個平衡點無一個絕對答案，你可以自己衡量。

------------------------------------------------

Q21498：

龔sir, 我持有以下股票，有乜評價，應否繼續持有？

3968
2319
3993
2628
5

941
861
1515
338
6869

588
1666
3613
3382
1
1113

龔成老師︰

首先，你持有組合好雜亂，而且太多隻。長線計，你要集中翻係8-10隻左右，會較易管理。

你組合配置上，算係一個偏保守的平穏增長型組合。若你係較中年，這個組合係可以。

整體而言，你持股質素都無大問題，但要留意翻以下幾隻。

洛陽鉬業（3993）、天津港發展(3382)質素上唔算最高，加上波動大，不宜大注。

中國人壽(2628)、質素只係中等，同樣不宜持有過多。

北京北辰實業股份（0588），本質不算差，但賺錢能力又不算好高，同埋企業規模較細，都是較負面的因素。如果你持有的股票不算多，可以繼續持有。

若持有較多，建議沽出部份，平衡個風險。

同仁堂科技（1666）有質素的，不過增長力比過往略減。唔值得投資太大注，小注等佢回勇係可以。

------------------------------------------------

Q21499：

龔sir想請教下你。

本人25歲，每月可儲蓄14000，其中月供股票8000，餘下6000等大跌市先用。

現有7萬現金，40萬股票組合如下︰

0257 光大環境 12.5%
1177 中國生物製藥 12.5%
1833 平安好醫生 5%

2800 盈富基金 20%
3067 安碩恒生科技 25%
3091 A日興電遊 25%

月供股票都係用這比例供，想問5年後累積200萬資產可能性大唔大。

同埋問如果資助配置係，每年做一次rebalancing 好定係用升一倍放一半好d？

謝謝

龔成老師︰

你現時持股都有質素，月供資金分配都可以，都係適合你年紀。

安碩恒生科技（3067）及A日興電遊（3091）有少少都是同類，因為有不少都是科技類別，因此，你持有的比例其實已開始多，你要留意翻（這刻問題未算大，加上你年輕，可承受風險），只是長遠要留意比例不能過多。

但留意光大環境（0257）業務本質不差的，不過負債不斷增加，令風險度提高左。

其實有長期投資價值計，只是太宜大注。現貨可持有，但唔好再加注。

我假設投資回報有10%（連股息再投資），你每月投資$14000 + 47萬(現金和持股)，5年後大約會增值至170萬。

故你要再加大少少投入，每月大約去到月供$16000-17000，才有較大機會達至你的財務目標。

至於幾時重整組合比重，其實你1年左右做一次就可以。當你發現個別行業，或者潛力股比重開始過高，你就要作出調整。

調整唔一定係沽出現有股票，可以透過新資金的配置，去令組合平衡翻。同時睇下有無持股質素轉差，就要沽出部份，甚至全部持貨。

至於"升一倍、沽一半"這策略，但比人些不懂定平貴，或者好保守架投資者。讓他們先收回成本，所以唔係一定要做。

因為只要持股係優質，長線持有永遠都係最好。

------------------------------------------------

Q21500：

龔成老師你好 我想請問係没有會計基礎下 有無書藉可以推薦 讓我可以睇明白年報？ 還是必須要去上會計課程？

我是澳門人 一直沒機會上你的課程 過去一年睇左各種各樣嘅書藉 但一睇公司年報就頭痛 基礎知識太差 希望老師可以指點一下

（其待有日你可以到澳門開班）

龔成老師：

你可以睇《年報勝經》，這是是寫比一些無乜會計知識，而又想學睇年報分析的人，相信是適合你的。

你睇完這書後，再試下睇企業年報，自行分析。

如果日後有需要，就再講會計課程。

另外，如果你想學股票基本知識，可以睇《股票勝經》。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21101-Q21120）

Q21101：

龔成老師你好, 我是你股票班學生, 有些投資配置問題

本人一直採用7(水桶1):3(水桶2) 的投資比例係低位分注買入不同的優質股，特別是華虹半導體（1347),平均買入價14.47, 現價雖然下跌但仍有+200%的升幅，亦佔了我整個組合25.07% 問題就是：

1.我應否減持部分股票，轉入比較便宜的水桶1

2.我應轉入中國平安（2318) or 信義光能（968), 比較適合

3. 信義光能（968) 雖然潛力比較高，但估值上仍在較貴的水平，應等到合理價以下才開始減持華虹半導體（1347)?謝謝

龔成老師：

1）我地衡量水桶123佔組合比例的方法，是根據過往一段時間的股價的，以你持股的市值去衡量。

其實好多時都會出現這現象，就是水桶1的增長好快，令組合比例較多，由於我地配置是長期的，因此著眼點不是短期的股價令比例超過，但如果長期開始超過，就要配置翻。

另外，如果一隻股票去到貴，都可調整。

華虹半導體（1347）有質素，發展不差。

佢主要從事半導體產品的生產及貿易，開發及提供晶圓工藝技術組合，包括嵌入式非易失性存儲器及功率器件，以及ＲＦＣＭＯＳ（射頻互補式金屬氧化物半導體）、模擬及混合訊號、ＣＭＯＳ圖像傳感器、電源管理及ＭＥＭＳ（微機電系統）等多種其他技術。

佢客戶主要為集成器件製造商與系統及無廠半導體公司。中國因為想發展這方面的技術，政策在長遠會對這公司有利，增長正面。

這股長線持有無問題，但現時估值有少少貴，如果投資，我會建議你由25%減至15%-20%。

2）可以，因為可以令組合更加平衡鄧

3）信義光能（0968）近期股價比高位都回落翻，近期大多時間處合理區頂水平，其實都可以開始小注。

------------------------------------------------

Q21102：

成哥:真係好好笑，尋晚發夢竟然你黎咗我屋企玩，同你一齊傾計食飯打下機...講堅的!!依家諗返起真係笑死我!

首先多謝你成哥，我用你在書本及課堂上教導嘅理財知識已經存到第一桶金。準備置業當中，有問題想請教成哥你.

我白表居屋抽到第一個波，屬於排名好前既核心家庭（不是家有長者類別)，黎緊下個月會揀樓，我一家3口，最驚係揀唔到心儀單位。

今期2020居屋有鑽石山，大水坑，火炭同粉嶺。鑽石山同大水坑地點最好，最近地鐵站，火炭同粉嶺地點偏遠。

以上居屋除了火炭可以今年尾入住外，其他的都要等多 1.5-2 年後先入伙。想請教你意見:

1. 因我有住屋需求，現時還在租樓住，但我屋企人有層樓可以俾我可以先暫住（住10年都得), 就算我抽到偏遠地區居屋，係唔係都應該照買呢？

居屋市價65折真係好吸引，如果買出面私樓每月要供多好多錢，雖然我能力還能夠應該 700萬以下樓價。

2. 如果揀到細單位例如 1房，應唔應該間 2 房，先上車等以後再換大單位呢？

龔成老師︰

哈哈，好榮幸，竟然可以參與你夢中的活動~~~

1. 大炭的彩禾苑和旭禾苑，其實10-20分鐘步程，就會到港鐵站，唔算話好唔方便。但附近工業大廈較多，生活配套可能會弱少少。

至於，粉嶺山麗苑，地理位置和交通會較弱。

至於年尾入住和等1-2年，唔算好重點，因為你始終有屋可以暫住，所以考慮時唔洗放太大比重，係而個因素。

由於你這個是自住房，你應該較集中，在自己生活方向出發，去考慮這些樓盤是否適合。講緊唔係而一刻，而係5年、10年、以至20年後，佢配唔配會倒你生活所需。

如果係可以，而你有"供得起"，咁就無問題。

居屋雖然投資價值私樓較弱，但勝在價錢較平。你可以令自己有較多閒錢，作投資增值。而且當你資金唔算好充裕的時候，居屋會係較好選擇。

因為，我地財富增值會講求組合平衡性，如果你將資金去晒樓市，咁就會太偏重物業類，令組合風險太高。

最理想係，你買完樓之後，都要有一定資金，去維持用優質股增值，才算較好。

2. 如果你現時生活，1房係無問題，只係長遠才有2房需要。你1房都可以要住先，用以資產追資產模式操作。

另一邊，就用優質股增值，到有一定資金，又有適合的2房物業出現時，才去細屋換大屋，咁會較好。

------------------------------------------------

Q21103：

龔成老師 第一次send message 給你 希望你在百忙中給我一點建議

我現時25歲 每個月收入約25000，2019年開始有月供股票 現時每個月我都會用6000$月供股票
現時為止有
1
2
5 （已停供）
11 （已停供）
823 （已停供）
939

我現時資產有25萬，每個月都儲到1.2萬，希望5年可以有100萬資產，所以而家想供一d增長股

諗住加供2318/1928/2382
請問老師覺得是否適合 定係有其他增長股更好? 感謝

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應用"平穏增長股" + "潛力股"的組合，去累積財富。現時每月$6000儲蓄做月供，另外$6000儲起架策略正確。

但選股上，建行（0939）和中電（0002）主要係收息，增長力唔高，唔係咁適合。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

以回報10%計（連股息再投資），你每月投資$12000 + 25萬股票，5年後大約會增值至120萬，故這樣安排相信很大機會達至你的財務目標。

------------------------------------------------

Q21104：

龔老師你好，我一向有追蹤此專頁，以及拜讀你的幾本著作，實在獲益良多，謝謝。

有以下幾個問題想請教一下你，謝謝解答：

1, 請問老師你如何看中石化（386.hk ）這企業及前景？現價合理嗎？是否適合長線持有？

2,中國現時處於疫情後經濟復甦期，屬舊經濟的企業，業務應該開始慢慢pick up, 請問這個設定正確嗎？

3,我和丈夫共同持有一何文田的單位（已供完），本來作自住用，所以沒有特意留意投資回報。

現在由於為了小朋友學校，一年多前搬了港島區租屋住，於可見將來也應不會搬回九龍住。

本想放租此單位，因它屬於名校網，本以為容易出租，但疫情一整年都沒有租客，加上同區

大量新樓盤落成，樓價自2014年買入後都沒有升幅，而此單位另一缺點是管理費貴

加上每月攤分差餉地租等成本，每月的支出也不少。
我們打算放賣此單位，換一港島區的物業

會選擇比較容易出租的大屋苑。這個策略正確嗎？因以我們的預算，買不到近小朋友學校
的單位。

謝謝你的寶貴意見及時間。

龔成老師︰

1） 中石化（0386），質素算是不差，但又未到好好，始終這只是商品企業，沒有一些太大的優勢。生意近5年只是上上落落，無乜增長力，這是受油價等因素影響，反映佢處於一個被動的狀態。

佢上年的股息理想，但翻查之前的幾年，股息都不是好高，佢由2014年-2019年的每股股息：0.25/0.18/0.28/0.60/0.5/0.39

個別年度計，股息是吸引的，但如果佢之後的業務，無之前度咁樣，股息就會下跌，而佢過往的股息亦唔算太高。加上佢的股息不太穩定。

此股算係收息股類別，但質素屬中等。現價合理，可以分注，但不宜佔太多。

2） 現時大多數舊經濟股，估值上算係合理區。相比起好多有輕微過熱架新經濟股，此刻舊經濟股值博率會較高。

其實，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

3） 何文田有不錯學校網，港鐵發展優化了該區的交通，再加上啟德發展區，都會為何文田區帶來機遇。

雖然有唔少新盤，但長線此區都有一定需求。唔好太過因為短期疫情影響左分析，我地要從長線回報和發展潛力架角度去考慮。

整體而言，你這個物業係有持有價值。

建議你找多幾間地產代理行放租，以及減少少租去放，我相信一定有市場的。

------------------------------------------------

Q21105：

龔sir你好,這是我本人的情況,希望你為我提供意見

家庭狀況: 30多歲,已婚,未有子女（但有計劃過）
收入: 二人月入$80000左右,工作穩定,扣除供樓,家用,雜項後每月可剩餘$1.5-3萬 （視乎情況）
物業: 一年前自置物業,月供$25500
股票: 以分注買入形式投資$53萬 （幾多手@平均價）

舊經濟股
0002 中電（[email protected]）,0003 煤氣（[email protected]）, 0005 匯豐（[email protected]）, 0012 恆基（4@34）, 0178 莎莎（[email protected]）,
0823 領展（[email protected]）, 1038 長建（[email protected]）, 1928 金沙（[email protected]）, 6601 朝雲（[email protected]）, 6993 藍月亮（[email protected]）

科技股
1137 港視（[email protected]）, 1810 小米（[email protected]）, 2158 醫渡（[email protected]）, 2382 舜宇（2@145, 6060 眾安（4@57）, 6618
京東健康（2@134）, 6988 樂享（[email protected]）, 9618 京東（[email protected]）, 9991 寶尊（[email protected]）

ETF
2800 盈富（1@23）, 3033 南方科指（[email protected]）, 3067 安碩科指（[email protected]）, 3088 華夏科指（[email protected]）,
3086 BMO納指（[email protected]）, 3140 領航標普（[email protected]）

另加:
實體股票（沒有存倉）
0823 領展（5@10）, 3988 中銀 （[email protected]）
港幣存款: $15-20萬
外幣存款: （GBP,USD）約$40萬 （作旅行,應急之用）

目標: 3-5年內資產多一倍

狀況:
這個投資組合在一年前才剛開始,舊經濟股大部分在疫情初期買入,現時在憧憬重啟各地經濟的前提下才稍為有少許增值

科技股在下半年才開始買入,受惠於熱潮帶動,起初增值不錯,然而在今年初債息問題開始後一直滑落,
抵消了所有增幅,部份虧蝕相對大,令整個配置大致上沒有增長

問題:
1. 組合中的選股有沒有很大問題嗎?
2. 有哪些股份未來時間可以加注,有哪些應該盡早換走?抑或暫時維持多一段時間?
3. 不少銀行劵商都會對同一隻股票發表報告,列出目標價,但部份相距頗大,應如何看待?

謝謝

龔成老師︰

1） + 2） 記住，唔好因為大市氣氛高漲，而跟風去買股票，咁係好危險。因為同一時間好多人去入貨，好大機會個已經係貴晒。

過去一段時間，新經濟股被熱炒，好多都去到貴架水平。而在回調，只係令佢地慢慢變翻合理少少，但好多都仲係略貴。

現時你股票數量太多太亂，以你金額計，建議你組合維持10隻以內好了。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，應以增值為主。中電（0002）、匯控（0005）、中銀（3988）都係收息股，增長力欠奉，唔適合你。

其他股票都有質素，可以長線去持有。

但留意朝雲集團（6601）、樂享互動（6988）這類新股，好多時都要2年倒，先見真章，唔建議持有太多。

另外，港視（1137）、醫渡（2158）、眾安（6060）、京東健康（6618）有潛力，但不確定性好高，同樣不宜持有太多。

南方科指（3033）、安碩科指（3067）, 華夏科指（3088）同樣都係追蹤科技指數，當中3067費用率較低，長線用佢會較好。

長線計，建議你用月供"平穏增長股" + "潛力股"，去創造一個增值組合。現在你每月5成儲蓄，去做月供，其餘先儲起，用一邊月供一邊儲蓄的策略。

至於餘下的現金和現有存款，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

3） 這些目標價，建議你只用作參考好了。

------------------------------------------------

Q21106：

龔成老師你好，請問你點睇心動公司2400及心通醫療2160呢兩隻股票?

之前我在差不多最高位時入了心動2手及心通1手，現已蝕差不多3分1，請問

你認為此兩隻股票值得長線嗎？還是應現在止蝕?
謝謝你

龔成老師︰

心動公司（2400）集團主要於中國、亞洲、北美洲、南美洲及澳大利亞開發和營運網上遊戲，網絡遊戲都為免費，收入主要來自銷售遊戲內的虛擬物品所產生。

集團同時也開發及營運付費遊戲，以及與第三方遊戲開發商合作發行及營運授權遊戲。

業務上，有吸引地方。不過，我一向都新股半新股都無興趣，因為真實面要慢慢先見到，所以估值困難。只建議小注，同時你要明白當中的風險。

如果持貨不過多，都可以守。

微創心通醫療科技（2160）有潛力的。

係一家中國醫療器械企業，專注於心臟瓣膜疾病領域創新的經導管及手術解 決方案的研發和商業化。

佢自主研發的第一代經導管主動脈瓣植入（TAVI）產品VitaFlowTM，於2019年7 月獲國家藥監局審批並隨後於2019年8月在中國進行商業化。

根據資料，截至2021年1月17日，有五款TAVI產品在中國獲批准或商業化，其中，VitaFlowTM是首款使用牛心包作為瓣膜組織的產品。

佢亦推出第一代自主研發的AlwideTM瓣膜球囊擴張導管及AlpassTM導管鞘，使其成為中國唯一一家全面提供自主研發互補性TAVI手術配套產品的醫療器械企業。

VitaFlowTM II是唯一在中國研發並已在歐洲開展臨床試驗的TAVI產品。

除TAVI產品之外，佢目前還擁有五款經導管二尖瓣（TMV）在研產品，通過自主研發及與全球合作夥伴（即4C Medical及ValCare，均為專注於二尖瓣及三尖瓣醫療器械研發的醫療器械企業）的共同開發戰略性地針對所有主流可行的二尖瓣返流經導管瓣膜療法（TVT）方案。

企業有一定獨特性，同時長遠發展不差，不過估值方面就十分難，因為這刻仍未有似樣的盈利。若佢佔你組合唔多，可長線持有，等佢更大收成。

------------------------------------------------

Q21107：

老師你好，我今年38歲，想好好設計自己長期投資組合，如果改善同部署

1）883 5000股 $8
2）909 8000股$55.35
3）941 2500股$55
4）981 5000股$26.7
5）9988 1300股245.3

另外上個月開始月供股兩隻
1）2388 500股 $28.2
2）3067 300 股$18
Thankyou

龔成老師︰

我地做投資選項時，會因應自已年紀和取態去決定。以你年紀，重點應放係累積財富上面。

中國移動（0941）只係收息股，增長力弱，不宜有太多。

中海油（0883）和中芯（0981）雖有增長力，但質素只屬中等，不宜持有太多。

明源雲（0909）較新，這些新股好多時要2年見真章，暫時唔可入太多，咁會較穏當。

月供方面，無問題。但留意，現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21108：

你好龔sir, 想請你比下意見我

本人現在28歲, 股票本金$30萬, 現金$10萬, $3500月供緊一份基金債券（供左3年, 帳面蝕緊 $2萬）

以下是我現在持有的股票:
3手3067 @ 17.5
1手 1810 @$27
1手 883 @$7.9
1手 762 @$4.86
2手 728 @$2.3
1手 1833 @$138.1
1手 2333 @$26.45
2手 6618 @$114.75
2手 9633 @$58
1手 1789 @$12.5
1手 175 @$35.95
2手 9988 @$248.1
3手 6993@$14.46
1手 981 @$24.5

請問以上組合可以怎樣改善才有更好的回報呢? 想資產有所增長但股票和基金都蝕緊錢

龔成老師︰

你要知道就算再優質架股票，中短期都會有波動。只要係優質，長線持有就可以。

中海油（0883）、中芯（0981）質素只係中等，唔好佔組合比重太多。而愛康醫療（1789）、京東健康（6618）不確定性較高，只宜小注。

其餘股票都可以，現時大市只在合理區，餘下10萬就等大跌市，才出手。

債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利（你可以睇睇《財務自由行》一書，我從財富本質上，講述了當中原理）。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

------------------------------------------------

Q21109：

您好啊，我是新手，因為之前傻傻地買左01612永勝醫療，2.3入手

依加跌到1.66，我想問下我係未放左佢就算了，買左成幾個月

本身想等佢派股息，點知仲跌得仲加多，所以想問下你意見，謝謝你。

龔成老師：

永勝醫療（1612） 業務為製造各種醫療產品，主要包括呼吸產品、造影劑壓力注射器一次性產品以及骨科支護具康復器具。

佢過往幾年收入都好波動，加上賺錢能力唔算太強，質素一般。

雖然佢盈利有增長，但股價近一年都上升了不少，你預上落都大。

這股唔適合持有太多，你如果小注就守，太多就要減。

------------------------------------------------

Q21110：

老師你好，我其實早幾年都開始接觸股票，但近一年認識了你之後先懂得買入股票作長線投資，希望財富增值，現在亦正拜讀你本「股票勝經」

希望可以真正認識股票更多。我想問下有甚麼股票可以類似比亞迪咁，有好大潛力可以長揸？謝謝你。

龔成老師：

現時好多潛力股都升晒，強行追入反而會有風險。

你可以留意下中生（1177）、褔壽園（1448）、小米1810）、必瘦站（1830），都有潛力，但現時在合理區頂至略貴，回翻D先買入會較好。

當然，要好似比亞迪（1211）升咁多就未必得，但長遠都有質素的。

------------------------------------------------

Q21111：

老師你好 我想問下你意見。我一路都唔識投資，而且保守。年過四十有個小朋友，想幫佢儲多d錢。手頭上股票全部都仲坐係艇。

5、728、857、9988

有大概15萬現金可以再做投資. 請問有咩好選擇? 我應該賣哂手頭上蝕本貨嗎?

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

你持有的股票，都是有質素的，你可以持有。

如果你目標想增值，就可考慮將0005、0728、0857，上翻較多時，轉其他股。

只要你未有把握時機及企業估值能力，令你在貴的價位投資。

建議你之後，應該用月供或分注的模式投資，可減少你一次過在高位買入的風險。

你之後可投資一些ETF，我相信會比例較合你，例如盈富（2800）+恆生科指ETF（3067），比例上前者可較多。

------------------------------------------------

Q21112：

龔sir，最近本人有想法投資香港的小型物業用於放租。請問現時物業是否值得投資？

有些中介推薦了奧運的新樓利奧芳給我，我留意了那邊一房單位198尺，尺價在26000左右，總價500-550。

同樣的預算可以在康城買大一些的單位。請問是面積大一些投資價值高還是地理位置好一些投資價值更高？謝

龔成老師：

奧運利奧坊有質素，但的確有點貴，不過我地投資，會以質素行先，如果要上述2選1，會考慮利奧坊。

當然，更好的選擇是一些舊少少的樓，如10年-20年，大翻少少，市區，會更有投資價值。

------------------------------------------------

Q21113：

龔sir, 我是新手，一直有關注你的分享，也認同價值投資理念，想請教三個問題

1.若是用了較高價格買入了一間質素不錯的公司，股價升了應該先止賺等回到合理價再買入？還是持有並等回調加注？

2.本人36歲，是否可更多投資水桶一作短期獲利來滾大本金，然後再放入水桶二，三作長期持有？

3.若所買的股票升到了較貴水平，該在什麼時候加注，等待時間回到合理區再加？
謝謝抽空回答！

龔成老師：

1）要睇持貨情況，如果持貨較多，應該減部分。

理論上，當股價處貴的時候，部分減持是正確，但這都會面對一個風險，就是股價一直唔跌。有些優質股增長力強，今天的貴，過一年後由於企業價值增長，會變為合理。

因此，如果該股好優質，賣出後就有機會買唔翻，這是最大的風險。

2）36歲，可投資水桶1，但不可短炒。

好多人以為短炒能更快滾大資金，但根據我過往多年做銀行及證券行，統計客戶投資成績的情況，短炒反而會輸錢，你這樣只會令本金減少。

3）到合理價先加注。最多進行月供。

------------------------------------------------

Q21114：

龔成老師你好。我30歲，剛開始學投資。十幾萬儲蓄，15K，每月儲5000-6000，過多一兩年會結婚但唔會使大錢。

好後悔禁遲先學，儲蓄同人工都好有限，所以都有D 心急。初步打算長供，如果我只儲到呢個數應唔應該成份儲蓄去供股？

如果正如老師所講最好要留一半現金等市跌，只供3000又似乎太少，但供曬又擔心無現金揸手唔穩陣。可以請你比一下意見嗎？

定調返轉，郁儲蓄，直接入幾手2800定都係用月供既方法好？

最近開始睇你專頁，睇你答問題都學到好多野，多謝你無私分享禁多知識。謝謝！！

龔成老師：

由於你準備在1、2年內結婚，而我地投資，要長期先有回報，同時中短期可以因市況上落而有不確定性，無人知道你要結婚同錢一刻，市況如何。

因此，你要先計算結婚所需的支出，留這筆現金，餘下才投資。

除非出現大跌市，否則，你應該考慮左結婚的現金先。

餘下部分，可以進行長線投資，月供ETF相信好適合你，你可以考慮盈富（2800）+恆生科指ETF（3067），長期儲貨。

------------------------------------------------

Q21115：

你好，成哥,我一直都有睇你fb,我覺得你教人投資好叻，我知道自己好衰心急，忍唔到，都無賺過。

我有個問題想請教你，我前排高位買左1177，9.45一手，你話人口老化咁我要溝嗎？仲有2013買左1手52.5又係好高位，現在38都見到，都溝嗎？

3號買左1手13.62,滙豐57蚊買入3手，以上是我的投資組合。我有分析銀行股買386，3328，3988長揸有息收就算，但我之前輸左好多錢唔敢亂買

想聽下你意見先，見到好多隻都跌左好多好多心想買呢隻想買個隻，但資金又唔夠，愈想搵返失去嘅錢就愈心急行錯路。

請問1177，2013溝邊隻好？

龔成老師：

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區頂至略貴，你有貨可持有，如果要加注，$8以下小小注好了，$7以下會更有值博率。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，你持有小注好了，暫時都唔好加。

至於另外幾隻，其實不是無質素，可持有，只是部分較入價有少少貴但可以守，不過就反映你投資時機把握力不足。往後投資，宜用月供，又或分注投資，減少一次過在高位買入的風險。

中生及微盟，如果加注，就中生。

------------------------------------------------

Q21116：

老師 想請教你一個無關股票的投資。我同我男朋友最近睇左個江門既溫泉度假別墅項目，150萬人仔一棟別墅，之後可以裝修成為民宿放租比遊客住，視乎裝修設計，可以租到1000-3000一晚。

我地諗法係，可以當半個投資項目，因為唔可以保證一定會有好高回報，但係即使冇回報，都可以以後退休用。

我地會加按層樓去做哩個投資，借貸利率大概2.05%，都算好低。剩餘既一部分錢 可以放入股市或者基金，當係分散投資。

我個人黎講都幾睇好哩個項目，因為依家普遍消費能力高左，大家旅遊都會租別墅黎玩，之後如果順利的話，可以有現金流，如果利益不達預期，可以當係以後自己住。

我相信5-10年大彎區有所發展，都難以哩個價錢買到別墅。想請教你意見，哩個項目值得投資嗎？感謝

龔成老師：

我都相信大灣區有發展，但你地要找更多資料先。

例如經營這類民宿的要求，自己是否有興趣營運，成本、風險因素等等，最重要是了解清楚。

另外，你要了解市場需求，現時有多少類似的民宿，同時在該溫泉度區，本身是否有足夠的酒店，以及該項目的交通配置，周邊情況如何，這都要分析的。

由於退休自用是多年後的事，因此，這刻要集中從「是否值得投資」的角度去了解。

------------------------------------------------

Q21117：

老師你好，想請問唔知你點睇港交所388前景？我喺$452買約咗100股，唔知可以keep住先嗎？謝謝你

請問呢一隻股票算唔算質素高？因為佢應該係壟斷行業，只此一家，如果從老師你講價值投資佢長遠都一定會超越呢個價？咁呢一啲資產係唔係可以keep 10年一世都唔沽？

龔成老師：

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。

你買入價略貴，不過佢始終有質素，無問題，長線持有就得。

------------------------------------------------

Q21118：

龔sir，吉利應否繼續持有？

大行報告同業績都好似講到好差，我喺$22.75入咗一萬股的，我媽媽亦都跟咗我買，之前上到$36都無放，想長線持有，但當股價向下

我媽媽就話有錢唔識放，我話長線持有叫佢唔好理我，要放佢自己放，但佢又跟我唔放，之後不停ee哦哦，情況係咪有啲似你嗰陣買比亜迪，升到$80你唔放，倒跌之後身邊就有人會俾説話你聽？

今日跌穿咗我買入價，我有啲迷失方向，係咪真係吉利電動車唔得....又有可能回唔到A，信心唔夠堅定....

咁吉利係咪屬於虛？前景點睇呀龔sir?

龔成老師：

這類說話，我聽左不知幾多年，當年隻比亞迪（1211）由低位上到$88，之後又落翻$12，係跌9成！你可以想象我聽到幾多說話，要10年後先上到現時的價位。

你要有超強的心理質素，否則，唔好再比意見，唔好再幫人投資。

佢地永遠事後孔明，講一d連股神都唔會做到的野。

你要做到「唔好理人」。

我係一個超級我行我素的人。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

------------------------------------------------

Q21119：

老師，之前我9988,300元入左 ，我可以點樣佢有冇息收， 已經傷及本金一半左右
真係搞唔掂

加上近期科技股回調完全走都走唔到位
我應該換股定係繼續等

同埋我想講依家我完全唔敢同女朋友或者屋企人講呢件事，我驚講咗之後分手， 我應該依家點樣處理日常？

加上我自己做乜嘢事都好唔開心， 完全影響咗我日常， 因為我冇一個 宣洩嘅渠道

我知道自己唔係一個賭徒但係當股票落到去咁低嘅時候我就開始不斷焦慮咁樣我係咪應該換一個倍升股

龔成老師：

第一，由於你在貴的價位買入，因此要更耐心，先有機會上翻去。這股有質素，但都要長線先上得翻。

第二，如果你只集中一股，問題就較大，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

第三，我地買股票，一定要長線投資，起碼持有3年以上。

第四，買股票不能影響生活及情緒的。

第五，財不入急門，你太急去轉另一隻股，反而有問題。

如果這股佔你組合比例太多，可以考慮部分轉其他，建立更平衡的配置。

------------------------------------------------

Q21120：

老師點睇贛鋒鋰業？ 仲有信義光能同信義玻璃。有咩分別？現價貴？

仲有福萊特玻璃，上述股票係咪全部都係電動車概念

龔成老師︰

贛鋒鋰業（1772）金屬鋰及鋰電池等鋰資源生產商，生產包括供新能車用的電池。

此股上市時間唔算長，這類企業數據較少，好難分析。現時市盈率近290倍，點都係貴，現時入貨風險會高。

信義光能（0968）和福萊特玻璃（6865）都係生產太陽能玻璃產品，本質不差，業務保持有一定的增長力。

信義光能（0968）算係合理區頂至略貴，可小注。而福萊特玻璃（6865）現價略貴，要回最少一半，才算較合理。但由於有一定波動性，故不宜大注。

信義玻璃（0868）係信義光能（0968）母公司，佢主要生產汽車、建築，浮法玻璃。近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

現時估值偏貴，投資值博率一般，回翻1、2成才算較合理。同時，你預佢中短期會比較波動，要長期先見到收成。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19841-Q19860）

Q19841：

老師你好！內容好長，希望你唔好介意，我真係好絕望，想聽下你意見/鼓勵

上年疫情初期開始學習投資時開始留意你，感激每日喺Facebook有你嘅好意見同鼓勵說話，又適逢股市大升，7個月以黎投資嘅港美股都有增長

雖然唔多，但對於一直搵唔到工又唔知自己想做咩嘅我黎講，已經係好滿意嘅成績。

可惜早前出現GME事件時，我參與左，其實我都唔係後期換火棒班人，我第一注時股價先$25，之後每日花盡時間心血望住佢，直到升到$500時我都一直睇住，雖然持股唔多

但賺到嘅已經多過過去7個月其他股票嘅總盈利，我知道呢場遊戲點都有完結嘅一日，我一直提醒自己唔好貪心，要盡早離場

可惜當日盤前我分注370, 400, 450三個價位放左部分之後都仲一直升，結果望到上到500時我就收左手，驚放完又望住佢升會賺少左...

點知當日開市就發生限制交易事件...往後幾日其實我都仲有機會400/ 300 / 200離場，但我當時好嬲好唔甘心

覺得限制交易唔公平，又睇左好多其他人叫strong hold打倒大鱷等言論，就一直望住佢狂跌都唔甘心放, 中途仲喺145同63蚊加左注

我依家依然每日望住佢，即使休市嘅日子都係，見到佢停滯唔上唔落真係心很累...

我自己其實已經知道係輸左，我深底𥚃面知道無可能再發生所謂空頭平倉股價再爆升嘅可能，但同時間我無辦法接受喺呢個價放左佢...

到而家我仍過得好痛苦，每日諗起自己曾經擁有過嘅一下子無左，每日都自責後悔，問自己當時點解咁貪心，點解錯過離場機會...我真係釋懷唔到

我知道你無乜研究開美股，但可唔可以比D意見我？我本身已經係好情緒化嘅人，GME事件後，我每日嘅情緒更加波動，搞到自己做咩都無哂心機

連其他股票都唔想再理，除左每日自責，我已經唔知可以點做

龔成老師：

第一，無人能捉到最高位，不要怪自己以為好易完成但其實很難完成的事。

好多網友都會用我講類似的情況（不是GME），佢地持有某股大升，之後回翻，然後就會自責點解唔高位賣出，大家事後都變孔明，以為自己能在高位賣，但當身處其中，其實好多野都是未知的。

我持有比亞迪（1211）12年，多年前由十幾二十蚊，見佢上到$88，其後見佢有$88跌近9成，去翻$12！

正正就是你無左財富的感覺，比亞迪當時已是我最大持股，我的財富當然大幅貶值，我同自己講，過往的無辦法，最重要是將來，理性分析現時應該持有/加注/賣出，在投資世界，理性是最重要。

我上了一課，經歷財富的大起大跌，心理質素大幅提高，現時，你的事情已發生，你要理性面對，好好學習，你停在自責是改變不到事實，之後努力學投資及賅錢更好。你能在投資7個月，就上了這麼好的一課，其實是好事，有D投資新手只經歷大升市，不斷贏錢以為自己好勁，這才令人最擔心。無輸過的人先最高風險！

第二，你的做法是「投機」，我一向都不建議的。

中短期股價，可以與企業價值無關，而長遠，就會去返企業價值，GME這企業的實質價值其實不高，不過由於投機行為，會令到股價大上大落，而投機行為，你就要有心理準備，會十分波動，同時出現很多不能預期的事情發生，沒有所謂不甘心。

長遠來說，股價最終會回到企業的價值，你要睇下點樣理性處理。

如果你能理性面對，你就是上了重要的一課，對日後投資有好大幫助。過幾年後，你會發現現時的財富只是少數，同時多謝自己能上了一課。

如果你是情緒化的人，其實不適合投機。就算投資，都最重買一些穩健類股。

------------------------------------------------

Q19842：

我見老師會推薦3067比人
其實3067同3032、3033、3088有咩分別？

3067現價高其他三隻ETF成倍，我真係唔明

我上網睇過分析呢四種ETF，但分析唔多，我新手又唔係好明，所以又來請教老師

因為我正計劃幫我兩歲囡囡啲利是錢投資，唔多，約2萬
初部計劃50%盈富基金、50%科技指數

你認為好嗎？

龔成老師：

其實佢地都是追蹤同一指數，即是「恆生科技指數」之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

所以，佢地長遠的表現，其實是十分接近的。佢地是由不同的基金公司搞的，但本質是一樣的。

3067由於管理費較低，所以我一般較建議這基金。至於你見佢價格數字大，只是數字的問題，如果化成投資回報%計，長遠表現與其他3隻是一樣的。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你長期投資2800+3067，可以，最重要是慢慢分注入，同時長線就得。

------------------------------------------------

Q19843：

我今年36 已婚 穩定工作 月入約$53k 丈夫沒有工作 沒有打算要小朋友

上有兩位長期病患已退休父母

供兩層樓 月供約$23k 其中一層租出 每月淨租金約$10k

現持股票約$40萬 當中包括高位入既4手alibaba （比買入價下跌33%）及3手中人壽
（比買入價下跌9%）餘下為2手tencent 20手CCB 同4手fortune reit 以上3隻現價比買入價高

我可以承受中高風險 希望有一個高增值既中長線投資組合 目標係50歲前可以財務自由
我會唔會太大想頭？

補充 父母家用$5k 自己加老公開支大約$10k
約有5個月薪金現金在手

龔成老師︰

由現時到你50歲，都尚有一定時間，都可以做出一個唔錯架財富增值效果。

策略上，你可以投資"平穏增長股" 和 "潛力股"。現有持股中，建行（0939）和置富（0778）主要係用來收息，增長力唔高，建議沽出部分。

由於你先生尚在待業階段，而且有2位需要額外照顧的長輩，建議在投資前，先留下一筆等同半年之生活費和退休父母的若干醫療費用，咁會較穏當。

現時，你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q19844：

老師，請問投資黃金股（1818）（2899）/ 黃金ETF （2099）是否長遠發展穩定？

龔成老師：

都有，但又未必能成為投資組合的核心。

我講一隻，紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

------------------------------------------------

Q19845：

你好 龔成
我最近發覺事業好迷惘

做咗好多年會計
可否給我意見
謝謝

龔成老師：

你最重要睇「長遠發展」。

唔好比過去的情況影響，你問自己，5年後10年後，想自己變成點，做甚麼工作，事業上去到咩位？

你要睇翻自己的興趣，能力。有D人會入錯行，有D人只是做錯公司，只要轉另一公司就有發展，所以，用長期的角度分析，同時用闊少少的視點作考慮。

------------------------------------------------

Q19846：

老師，我50歲，剛上緊你堂仍在學習中

目前想知道如何计算股价在平 合理 及貴區 才能出擊
N 年前嘅基金是月供形式還有10 yr 要供 每月供4000

現供組合
1. FSSA 大中華60%
2. Blkrock global allocation 20%
3. Aberdeen Global innovative Equity 20%

這樣分配ok?
另外仲有一份AIA 基金已停供
裏面Value usd21k

想賣出換碼

問題 分配那個組合好

100% 水桶3
50/50 水桶2 / 3
請老師再比意見

龔成老師：

計算基金的平貴，其實有點難度。如果是個股，你可以上堂的方法進行，但基金則是一個股票組合，相對不易。

很多時我地要計佢追蹤的指數，又或佢最大%的10隻股現時平貴

我無特別研究基金，因此好難確定話你基金好與壞，你可以比較這些基金與大市，分析佢的表現如何。特別是「FSSA 大中華」，因為佔你組合比例多，如果過往表現一般，就未必值得太集中。

至於你之後的配置，以你的年齡情況，可以：
50/50 水桶2 / 3

其實已經是一個平衡的組合。

現時大市處合理區，可以一邊投資一邊留現金，而餘下現金的運用，就是等大跌市時出手。

------------------------------------------------

Q19847：

運用老師上堂教的，自己嘗試計9988（阿里爸爸）的估值，大概合理範圍$175-$230,

9988屬於水桶1，覺得現價合理區頂，打算現價入1注，每跌5％再1注，共3注，之後長線持有，這樣的分析及投資策略對嗎？

龔成老師：

你的計算大致正確，我自己計佢的企業估值都接近，不過由於佢股價波動性較大，所以範圍比你闊。

不過，估值是無絕對答案的。

由於阿里（9988）的股價上落都唔細，因此，見你的將5%入一注，調整為8%-10%，風險度會較好。你可以現價先入一注先。

------------------------------------------------

Q19848：

龔sir, 請問你2021年的股票市場應該點樣步處？我有30萬現金作長線投資，應該投資邊個類型股票？有邊d係倍升股？可唔可以俾d意見我？

希望兩三年後可以翻一倍，呢個目標會唔會太離地？謝謝你解答。。你本新書會幾時出呀？

龔成老師：

新經濟股2020年上了不少，反而舊經濟股在2021年有可能表面會好轉D。當然，我地唔能夠只集中某一類股，而是要建立一個平衡的組合。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067），但就要明白波動性比上述會高左，同時風險大左，你要自己平衡，要慢慢分注入，不要急。

一般來說，3-5年有一倍回報，不是不能的。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

《80後千萬富翁》預期4月出版！

------------------------------------------------

Q19849：

老師，我報左你個網上課程，睇到第五課，入面你有講到股票賣出時機，市場樂觀積極，成交額非常大，之前一日大概成交額係1000億，但近期都成2000億一日，好多股票都一直破頂，身邊啲朋友好多都話賺到錢，甘既情況係咪你所講既賣出訊號？

另外我一邊睇你個課程，有順便計算返自己既資產，係呢度想同你講聲多謝，因為識左你之後開始左月供股票同投資知識，令我呢兩年都有唔錯既回報，而家我資產有67萬，令我好有信心可以達到5年儲夠100萬既目標。

我留左15萬等大市大跌時買入優質股，每月月供盈富同港鐵各$2000，之前有月供比亞迪，但$100果時停供左，而家想轉供3067，但銀行暫時未有得月供，所以我考慮梗係咪可以直接買入？

但佢一手先千幾蚊，如果我每個月買一手，手續費都蝕埋，所以你認為咩價位先至係合理區？我見你都有講而家係貴，我而家儲埋打算係合理區既時候直接買10手～得日後有得月供再轉返月供。甘既方法可行嗎？

另外，想問問你，認為應唔應該得到儲夠100萬先再考慮買樓，因為我唔想將全部錢放晒去買樓度，希望同時可以留有股票繼續增值，但如果等到儲到100萬先買樓，會唔會其實都浪費左時間

因為我而家每月租屋都佔左我$7500，係咪應該買細價樓，將租金既錢直接用黎供樓會比較好？之後先再慢慢儲錢～將100萬個目標再延後達成。

唔好意思太多問題，再一次多謝你改變左我只係識儲錢放銀行既諗法，令我本來認為自己呢世都冇可能買到樓既諗法轉變為應該幾時可以買到樓。

我已經同朋友約好左，等我讀完書，即刻去報讀你個股票班

龔成老師：

分析大市的成交，能幫我地了解這刻大市有幾狂熱，但這只是其中一個指標，不是分析的唯一指標。同時，不能只睇一日，而是一段時間，都處於大成交。現時，新經濟股的確有點熱，中了部分指標，因此投資要較為小心，甚至你持有一定的貨，可以賣部分（當然，如黑優質的，就點都要有貨在手，不能盡賣）。

我相信，你保持正確的投資方法，要完成$100萬目標不難的！

你可以保持供盈富（2800）港鐵（0066），同時每月入一手，或隔月入兩手3067，這已經是一個平衡的作法，但要記住，一定要同時留現金，因為新經濟股唔平。

物業方面，如果無急切的需要，其實可等你有$100萬以上的資金先進行。你到時要買入物業後，仍有資金剩，不能用盡。同時到時再分析樓價，以及你到時的情況。

遲D股票班見。

------------------------------------------------

Q19850：

龔成老師您好：

我是股票新手，
每月存 $4000
現金有 $25000
請問有什麼股票方向可建議？

謝謝
目前32歲 以累積首期為方向

龔成老師：

由於你現時現金唔多，加上你新手，建議你$25000留現金先。

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。你可以每月供$4000盈富（2800）。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。

如果你不想做月供股票，你可以買入一手盈富，然後餘下持有現金。等你有更多知識再投資其他股，這樣會較為穩健。

------------------------------------------------

Q19851：

Hi ~ 好佩服你對投資嘅認識同分享，都好想做到資產增值

喺我做research嘅時候

見到唔少人話香港嘅舊經濟股已經唔值得再投資/買
唔知你同唔同意呢個講法

龔成老師：

舊經濟仍然是有投資價值的，只不過增長力不及新經濟，而我地應該建立一個「組合」，不同類別的股票都有。

你試想想，市民長遠的消費結構會怎樣？大家消費在網上類別會多左，但會否令用電？用水？交租的錢少左？不會的！

只要大家仍會在舊經濟消費，這些企業就會有得益，企業就有價值。

因此，這只是一個增長力問題，新經濟增長力快，而舊經濟，其實較穩健，因此平衡組合是重要的。

------------------------------------------------

Q19852：

請問你介唔介意分享一下你心目中水桶一股票名單？
我想儲緊，留意緊水桶一名單

同時會看這些年報
還是哪些50隻優質股/博升股書內就是？

之前有新聞話「電動車成主流要克服寒冬，北京零下20度Tesla不能關門比亞迪直接死火」，點睇？

龔成老師：

其實具睇，你睇《50優質潛力股》《50值博倍升股》已經是。

較值得留意的潛力股：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177）。

至於電動車問題，其實預左有問題，因為所有新產品初期，都有這類情況，好正常的，我地最重要是睇長期。你要分析，這些事情，在3年後是否仍有問題？還是已經克服了？

我地投資，一定要以長期的角度去分析。

------------------------------------------------

Q19853：

龔sir你好，有啲投資上問題，希望你可以俾啲意見

1)我依家手上持有3988(14000股),對比入市價，蝕緊2萬幾，咁我應該放定係繼續持有，會比較好？

2)由於依家收入唔穩定，有5萬左右流動資金，有啲投資會比較適合？希望能得到你解答

龔成老師：

1）要睇你的投資組合及目標。

如果你輕年輕，投資應該進取少少，中行（3988）只是收息股，未必最適合你。相反，如果你較年長，本身保守，只想收息，就算長期持有中行都可以。

2）你可以將甘中一半投資盈富（2800），餘下一半持有現金等機會。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19854：

老師 華虹半導體是優質企業嗎？它的增長力是不是開始減弱了？合理價大概多少
謝謝

龔成老師：

華虹半導體（1347）有質素，發展不差。質素無變，不過近年已上升了唔少。

佢主要從事半導體產品的生產及貿易，開發及提供晶圓工藝技術組合，包括嵌入式非易失性存儲器及功率器件，以及ＲＦＣＭＯＳ（射頻互補式金屬氧化物半導體）、模擬及混合訊號、ＣＭＯＳ圖像傳感器、電源管理及ＭＥＭＳ（微機電系統）等多種其他技術。

佢客戶主要為集成器件製造商與系統及無廠半導體公司。中國因為想發展這方面的技術，政策在長遠會對這公司有利，增長正面。

這股長線持有無問題，但現時估值有少少貴，如果投資，最好回翻D先。或小小注買入後等跌先正式入。

------------------------------------------------

Q19855：

老師 請問阿里健康 合理價係幾多？

龔成老師：

阿里健康（0241）這是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

這類股只建議小注持有，但你預佢股價上落大。現價略貴。

------------------------------------------------

Q19856：

成哥，我持有了10000股968信義光能,買入價15.74,現在價20左右,我覺得這股有潛力,因為買入了一星期已獲利差不多30%,現在見他下跌心情十五十六

我是不是KEEP住長線持有就OK?麻煩您

龔成老師：

我地不是睇買入價或獲利多少，而是這股長遠質素，長遠對你財富組合貢獻多少。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價略貴，這股股價上落都大，要注意金額。如果你持貨好多，可減少少，如不過多，全部長線。

------------------------------------------------

Q19857：

龔sir, 自从2017年跟你意見開始月供至今，已經達到7成我ge短期目標。好多謝你ge寶貴意見！

我已家ge情況係：
1）現金12萬在银行現金戶口 - 係6個月ge 應急钱。

2）月供1萬 ：
a) 2800 - $5,000
b) 0066, 0388, 2388, 1928, 0823 - 各$1,000

今年每個月可儲多$2,000. 我想分散我ge組合包括中國etf 。

我想请問龔sir - 2822 (CSOP A50 ETF) 同 3188 (CAM CSI300) 邊個會比較適合。

我43歲，目標月供到55歲。
多謝你寶貴時間回覆。

龔成老師：

以你現時的年齡，財富仍有增長力，你保持之前月供的計劃，長期進行就得，能帶比你平穩增長的作用。

如果新加入，你可以考慮華夏滬深三百（3188），佢範圍較廣，風險度會略好。

如果你能承受風險，可同時考慮加入恆生科指ETF（3067），只要金額不太多，就可以，這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

不過這基金好多銀行都無得供，可能要自行分注。

------------------------------------------------

Q19858：

阿sir, 我已經42歲，見你本買樓書for 90 / 00 後，我人工$21500 左右，請問我仲有無機會買樓，會否難了點？又有無什麼策略？我有三十五萬在手，每月可儲7千元？又或者有什麼意見？

有13萬是股票,1萬ibond, 其他cash

有私人借貸19.8萬

股票有恒生一手，vtech 4手，長建一手，陽光五手，港燈一手，金沙一手，領展三手

龔成老師：

42歲，仍可以買樓的，唔好比自己的年齡限制，不少銀行仍可以做到30年按揭的。

第一，你私人太貸如果利息高，就還左佢，反正你有現金。

第二，你現時持有的股票不差，但組合應該加翻少少潛力類股。

第三，你現時的現金唔算多，宜加大儲蓄力度。

如果你要買樓，就要進一步努力儲蓄，另一點都是重要的，就是想方法提升你的收入，否則較難進行。

我希望你定一個3年的計劃，努力儲蓄、投資、想方法提高收入（如果現時工作突破不大，要考慮轉工，要從長遠的角度分析）。

投資方面，你可以將每月$4000投資，每供股票或分注買入，盈富（2800）及其他優質股都得。你要有目標，一步步完成。

------------------------------------------------

Q19859：

老師你好，想請教，我27歲，月入四萬，存款有20萬，一個月可儲3萬左右，短期的目標就30歲有150萬。之前有買阿里巴巴同騰訊，但現已沽出

騰訊現價太貴不敢考慮，想再買入阿里巴巴並長期持有，應該如何投資較好？買左書想研究一下投資組合，唔该

龔成老師：

要完成目標，我相信你可以的，保持儲蓄$3萬並投資，就不難做到，但你要加強投資知識。

第一，我地不是炒差價，是長線持有。

第二，你要建立一個「財富組合」，當中有不同類的股，要優質，要平衡，要適合你，買入後長線。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此潛力股比例不應太過多。

騰訊（0700）有質素的，你可以睇位入翻。

至於阿里（9988）面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區中上部，這股可長線。不過，中短期會波動。

如果未有貨，現金足，可以這刻分注注，買入後跌1成以上再加注。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19860：

龔sir，問收息股：
置富778、陽光435，邊隻較好？

龔成老師：

兩隻都是有質素的，都可以長線投資作收息，其實可以共同持有。

置富（0778）會穩定少少，如果想股價上落較少及收息較穩定，可考慮這股。其實陽光（0435）都很理想的。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。