貓和老鼠（上） . 大家好，我係Jerry，我係一隻老鼠。 . 我有一個平生宿敵，佢叫Tom，佢係一隻貓。 . 但如果你問我，我最好嘅朋友係邊個，我會猶豫好耐，跟住紅都面晒咁答你......Tom。 . ， 不過，呢啲事都已經過去。 . 當年，為咗追求夢想，我搬走咗，去咗另一個地方，結婚生仔，依加已經兒孫滿堂。 . 呢一次，我帶住子孫一齊去旅行，我特登帶佢哋去咗舊居。 . 無謂扮嘢，我真係想見吓Tom。 . ， 唔知Tom依加點呢？ . 當年佢最咸濕，見到靚女貓就心心眼，後來我走咗，無咗我阻頭阻勢，我估依加佢都兒孫滿堂啦。 . 唔知佢嘅兒孫同我嘅兒孫，會唔會好似我哋當年一樣，劍拔弩張，但又惺惺相惜，情不自禁？ . ， 我從以前嘅老鼠洞鑽出去，一出去，就見到一隻憔悴嘅老貓，佢瘦到見骨，以往美麗嘅皮毛亦變得一岩一忽。 . 「Tom？」我好驚訝。 . 佢望咗我好耐，流下混濁嘅眼淚：「Jerry......」 . ， 原來，喺我走咗之後，主人養咗隻新貓，係一隻好凶猛嘅大黃貓。 . 大黃貓努力捕鼠，好有成效，對比之下，主人就覺得Tom捕鼠不力。 . 大黃貓得到主人嘅寵愛，盡情欺凌Tom，得寸進尺，仲剋扣佢啲貓糧。 . 我望住Tom鼻上嘅血痕：「係大黃貓打你？」 . 「唔係，呢個係老鼠咬嘅。」Tom答得有幾分尷尬。 . ， 唉，大家都知，Tom又蠢又衝動，以前捉我一個，都成日捉唔到，話佢「捕鼠不力」又真係無錯。 . 但係，大黃貓趁機蝦佢，就太過份啦，見到老朋友變得咁憔悴，我都好心痛。 . 「你等我一陣。」Tom突然諗起啲嘢，叼咗一塊半霉嘅奶酪出嚟。 . ， 我呆咗。 . 「你唔係鍾意食呢個咩？」Tom有幾分忐忑咁望住我：「我之前喺廚房偷㗎。」 . 其實，我呢幾年生活得好好，做咗老祖宗，唔駛搵食，靠住子孫嘅孝敬都夠食，已經好耐無食過半霉嘅食物， 我忍唔住問：「你啲子孫呢？」 . 「你走咗無幾耐，主人就拎咗我去結紮啦。」Tom苦笑。 . ， 「唔好講啲唔開心嘢啦，你難得返嚟，我帶你周圍行吓。」 Tom一路行一路講：「主人買咗部寵物飲水機......」 . 呢個時間，我突然聞到一陣陌生嘅貓味，我下意識閃入櫃底。 . 一隻大黃貓搖搖晃晃咁行埋嚟：「Tom，你喺度做咩啊？你上次先打爛咗主人最鍾意嘅花樽，唔好周圍走啦。」 . 「個花樽明明係你打爛。」Tom忿忿不平。 . 「So what？主人信我，定信你呢隻捉唔到老鼠嘅廢貓？」 大黃貓喺寵物飲水機度飲咗啖水：「我警告你，個飲水機係我㗎，唔好用你個污糟嘴整污糟佢。」 . ， 大黃貓走咗，我行出嚟問：「佢平時都咁對你？」 . Tom嘆氣：「鬼叫佢捉得老鼠多咩？主人錫晒佢。」 . 我本來無打算喺呢度留太耐，但依加我決定，要幫佢重奪主人嘅寵愛！ . 我召集晒啲子孫，一齊開會，商討對策。 . ， 我個仔舉手：「Tom伯伯，嗰隻大黃貓捉老鼠有幾叻？」 . 「每兩、三日，就捉到一隻老鼠咁啦。」Tom答。 . 阿仔沉吟咗一陣：「呢間屋唔算好大，佢隔日就捉到一隻老鼠，點解有咁多老鼠畀佢捉？」 . 又係喎，如果我住嘅地方，有隻好犀利嘅貓，成日有子孫慘死，我早就搬家啦。 . ， 為咗查明真相，我嘅乖孫自告奮勇，扮成一隻外來嘅老鼠，去刺探情報。 . 無人估到，老鼠會幫貓做卧底，所以乖孫好快搵到真相。 . 原來，大黃貓同一窩老鼠達成協議，佢容許老鼠喺間屋度搵食，老鼠就要自願送上門，畀佢拎去向主人邀功。 . 我唔係好明：「隔日就要死一隻老鼠？邊個肯自己去死？」 . ， 「隻老鼠扮死咋，主人又唔會要求隻貓，咬到老鼠身首異處。」 乖孫講出佢嘅發現：「大黃貓邀完功，就將隻老鼠放低喺花園，過多一陣，老鼠就自己起身返屋企。」 . Tom好嬲：「怪唔知得，呢間屋嘅老鼠捉極都捉唔晒，我要話畀主人知！」 . 「你點同主人講啊？講：『喵喵喵喵喵』？」 我攔住佢：「我哋從長計議，總會揭穿佢嘅陰謀。」 . 待續... . #短故 #短篇 #小說 #陳美濤 #廣東話 #粵語 #tomatochan #貓和老鼠

我嘅職業係：夢境拯救者（下） . 直到有一次，我進入一個夢，場景係夕陽下嘅一個公園。 . 一對年老嘅夫妻坐喺長椅上，伯伯對我微笑，我就知道佢係夢境嘅主人。 . 我就話畀伯伯知，如果唔醒，現實中嘅佢會死。 . 伯伯咁樣答：「我問過夢仙子，佢話我嘅身體死咗，我嘅靈魂都會活喺夢境中，永永遠遠。」 . 我就講：「咁又點啫，你都係死咗，你現實中嘅親人會好傷心㗎。」 . ， 「我有一個老婆，我哋結婚六十年，舊年，佢死咗。」 伯伯眼神蒼茫：「以前呢，我成日叫佢做『衰婆』，但原來無佢嘅日子......好難過。」 . 伯伯摸一摸婆婆嘅頭髮，露出滿足嘅笑容：「呢個夢裡面，有佢。」 . 婆婆都對伯伯報以微笑．好一幅白頭到老嘅完美畫面， . 但我只可以篤穿呢個畫面：「佢唔係你老婆，只係你夢中嘅......幻象。」 . ， 「但係，現實中，連幻象都無啊。個衰婆連托夢都唔搵我，我好掛住佢......」 伯伯雙眼通紅：「你畀我留喺度啦，好唔好？」 . 「你有無仔女？佢哋會好傷心㗎。」我又講。 . 伯伯露出一絲遲疑。 . ， 呢個時候，我背後傳來一把女聲：「佢有三個仔一個女七個孫，咁又點？」 . 伯伯好驚喜咁大叫：「夢仙子！」 . 我回頭一望，呢個中年女人，睇嚟就係我爺爺深痛惡絕嘅夢魔。 . 「伯伯一生辛勞，養大四個仔女，盡晒做父親嘅責任。佢今年八十六歲，只想喺夢中同老婆一齊，咁都唔得？」夢魔冷笑。 . 我強調：「但佢現實中會死，係一條人命！佢嘅仔女會好傷心。」 . 夢魔反問：「傷心又點？人出世已經無得揀，唔通連死唔死，都要顧慮人哋嘅感受？佢又唔欠仔女任何嘢。」 . ， 我哋劍拔弩張，伯伯下意識擋喺婆婆面前，低聲安慰：「無事㗎。」 . 望到呢個場景，我心一軟，有啲不知所措。 . 夢魔望住我，突然講：「你好熟口面，我係咪見過你......父母？」 . 我咬牙切齒咁講出父母嘅名：「我阿爸就係俾你害死。」 . ， 「哦，我記得。」夢魔淡淡然咁講出一個完全唔同嘅版本。 . 爺爺話，一場車禍，奪去咗我阿媽嘅性命， 夢魔就製造咗一個有阿媽嘅夢境，令阿爸唔願意清醒，同眼前嘅伯伯一樣。 . 「如果唔係你，我會有阿爸陪住我長大。」我嘅語氣充滿仇恨。 . 「係咩？你爺爺有無同你講，你阿爸嗰陣已經確診有癌症。」 夢魔輕描淡寫咁答：「佢喺夢中同你阿媽一雙一對，雖然現實嘅身體餓死咗，但唔係好過死於癌症咩？」 . ， 我呆一呆：「咁癌症都有可能醫得番，阿爸應該努力求醫......」 . 「當年你阿爺都係咁講。」 夢魔冷笑：「我唔明，點解你有權幫佢決定？點解其他人，要依照你口中嘅『應該』去做？」 . 夢魔問：「你係真心覺得，你阿爸脫離夢境，面對現實嘅折磨會開心啲，抑或，你只係希望自己有個『父親』？」 . ， 佢嘅問題太深奧，我一時間答唔到。 . 或者，當年爺爺就係勸唔到阿爸離開夢境，所以佢好憎夢魔，叫我去「拯救」被夢魔迷惑嘅人。 . 但點樣先係拯救？點樣先係更「好」嘅選擇？ . 我諗唔通。 . ， 伯伯無跟我走。 . 無幾耐，我聽講，伯伯喺睡夢中死去，死時面上帶笑。 . 爺爺好嬲，話我唔夠畀心機，搞到任務失敗，害死咗伯伯。 . 於是，爺爺埋頭研究，想研發一種「夾硬將人從夢中扯出嚟」嘅機器，去對抗夢魔。 . ， 我唔知佢會唔會成功，不過，我依然穿梭於唔同嘅夢境。 . 我話畀每一個人知，長期沉醉於夢境，現實中嘅身體會死去。 . 但係，我唔再催逼佢哋清醒，我只係講出後果，畀佢哋自己選擇。 . 好多人會選擇清醒，但總有人會堅持留喺夢境，我都無能為力。 . ， 有時候，我哋為人哋「好」，就想幫人做選擇。 . 但嗰種「好」，只係我哋眼中嘅好，未必係對方心目中嘅好。 . 其實，每人對「好」嘅定義都唔同，只有一樣嘢係共通嘅： . 每個人，都想決定自己嘅人生。 . －完－ . #短故 #短篇 #小說 #陳美濤 #廣東話 #粵語 #tomatochan #我嘅職業係夢境拯救者

親生阿媽大戰養母（下） . 每當我想見吓養母，總係俾親媽用各種方法阻止。 . 每次我都覺得，既然咁麻煩，見少一次都唔係咩大件事。 . 搞到養母每次打畀我，就係哭訴同埋怨，我自己又覺得煩。 . 一次一次又一次，我同養母愈行愈遠。 . 而開心嘅事實在太多，升職加人工，準備同阿茹結婚，親媽諗住買大屋畀我...... . ， 直到有一日，養母出現喺我面前，苦苦哀求，話要見我親媽。 . 養母面黃肌瘦，頭髮都白晒，好似老咗十歲咁。 . 點解佢會突然變成咁？我先諗起，我已經半年無見過佢。 . 我心都軟埋，我帶佢去見親媽，希望佢地兩個好好地傾吓，和平共處。 . ， 養母見到親媽，居然無我想像中嘅劍拔弩張， . 養母態度卑微，話自己得番一個仔，唔奢望乜嘢，只係想每個月同我食餐飯。 . 親媽呢？一如既往嘅虛偽，顧左右而言他：「多謝你養到仔仔咁大，你真係個好阿媽......」 但一直都無應承畀我間中陪養母。 . 我見到養母淚流滿面，見到親媽眼中勝利嘅目光， . 其實我都好同情養母，但我諗一諗，親媽只係畀咗一層樓我， 佢仲話等我結婚買多間大屋畀我，如果我忤逆佢......於是我無出聲。 . ， 呢個時候，養母跪低咗，係五體投地果種跪：「求吓你讓個仔畀我......」 . 親媽發揮虛偽精神，即刻去扶養母：「做咩講埋啲咁嘅......」 . 然後，親媽嘅聲音戛然而止，因為佢腹部插咗一把刀，刀柄當然喺我養母手上。 . 「搶我個仔搶得咁開心，個仔係我架！」養母一邊大笑，一邊扭個刀柄。 . 鮮血隨著刀柄嘅轉動，不斷從親媽嘅腹部噴出黎，好似一部榨汁機咁。 . 有錢、有心計、佔盡優勢嘅親媽，無咗條命。 . ， 果一刻我諗緊咩呢？ . 我諗，呢個故事教訓我地，無論一個人睇起黎有幾蠢幾弱，都千祈唔好逼到佢入絕境， . 因為兔子急了，急到連命都唔要果陣，總可以為你造成好多麻煩。 . ， 之後嘅事發生得理所當然，養母被捕，終身監禁。 . 唯一嘅意外係，親媽同我仲未改資料，法律上我仲係養母個仔， . 而親媽死得倉卒，無留低遺囑，所以我拎唔到佢啲遺產。 . 為咗避開輿論，我賣咗層樓移民，同阿茹嘅婚事都不了了之。 . ， 好彩，天無絕人之路， . 經歷過我契媽同親媽嘅大戰後，我已經學識咗點樣討好長輩。 . 所以移民後，我又搵到啲有錢嘅孤寡老人，做佢地嘅「契仔」，財源滾滾來，簡直係一門新嘅事業。 . 至於我坐緊監嘅養母？咁我移咗民，自然唔方便再探佢啦，你明架。 . ， 無論對方有幾親有幾重要，千祈唔好為佢破釜沉舟、不顧性命， . 因為你唔喺度之後，佢會繼續搵下一個，繼續逍遙快活。 . 而你，只係佢歷史上嘅一點污跡。 . －完－ . #短故 #短篇 #小說 #陳美濤 #廣東話 #粵語 #tomatochan #親生阿媽大戰養母