【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19161-Q19180）

Q19161：

老師，我分唔到投資同投機，有冇啲簡單易明既說明其中分別？

龔成老師：

如果你是買入股票如同一間企業，長期成為你的財富組合的一部分，而你買入前經過仔細分析企業，就是投資（即是：投入資金）。

------------------------------------------------

Q19162：

龔sir 我想代我表哥佢多謝你一聲 本來佢想親自pm你 不過佢冇咩點用facebook,所以我幫佢講啦。

我表哥佢今年32歲。 大約係五年前 佢當時做緊文員仔，人工$12000 而我表哥佢係月光族,從不儲錢 因為佢話自己冇能力係香港置業, 只求及時行樂, 所以到27歲時 戶口仲係連6位數都冇。

之後我介紹左佢睇你的百萬富翁系列,佢由一開始拒絕睇(佢認為呢類書都係呃人) 到後來佢主動去買第2,3本你的書, 再聽你書中講的建議 去閱讀不同的書藉, 我睇到佢係有改變, 佢之後同我地講 唔想再咁落去, 既然有人可以做到 ,佢都要決心改變自己, 要效法你咁格奮鬥。

之後佢重考左大學,成功入到大學讀工程, 佢一邊讀書一邊搞啲小生意同投資 ,最後只用左4年時間 係畢業時儲到100萬,而家仲搵左份有前途的工作, 屋企人都感到好欣慰。

除左想同你講多謝, 仲想比你知道 你做既野其實幫左唔少人(特別係我地呢啲只受填鴨教育的90/00後後) 令我地明白財務知識的重要性。期待你分享更多正能量/財務知識比有需要的人!

龔成老師：

太好了！

我出書的其中一個目的，就是想幫翻個社會，我自己都是18歲，係圖書館免費睇書，得到好多知識，到今日，算是有少少能力，所以都希望幫翻人！

可以幫到你表哥改變實在太好！證明我的努力都有作用，大家加油！保持進步！繼續對不同人有正面影響！

------------------------------------------------

Q19163：

老師，你喺股票勝經中提到散戶十大錯誤之一：溝貨
其實同平均入市法，月供…等等有乜分別？

龔成老師：

最主要是「預設的金額」。

溝貨，就是無計劃去進行，例如最初只想買入$10萬就夠。

不過，買入$10萬後，股價下跌，所以再入另一個$10萬，再跌再入$10萬。

分注買入，就是將$10萬，分成多次，例如4次，每次$25000。

這是一個風險管理的問題。

月供，是從長期的財富角度，投入一定的比例落去，這都是一個預先設定的投資計劃。

------------------------------------------------

Q19164：

老師，這幾天有個機會比我作出你所說的建立「資產」的決定。

你點睇投資車位/電單車位?

我亦做了資料搜集，實地考察，而這抉擇佔了我8成總資產，所以糾結。求指點

龔成老師

車位是資產項，本質上，可投資，成為你長遠財富組合的一部分，因為佢長遠的價格及現金流都會向上。

但要留意，現價唔算平，我地其中一個衡量平貴的方法，就是睇佢租金回報率，至於現時回報率，唔算高，因此投資吸引力未算強。除非你找到一些租金回報率較高的車位，否則，未必是好投資，始終佔了你大部分財富，要小心D。

------------------------------------------------

Q19165：

老師 我有些問題想問 就是關於企業的內在價值與企業平貴，因為我在你寫的書時，了解到最好在股價低於企業的內在價值

但是究竟如何衡量所謂的‘平貴’ 與‘價值’之間的關係。

因為平貴同價值都係一啲空泛的概念。企業價值 我大概知道是由分析該企業的財務狀況、行業前景、賺錢能力等等因素來判定其價值。

但平貴是個相對且含糊的概念，是你的書中並沒有清楚交代如何知道企業嘅股價現時低於還是高於其價值。

謝謝龔sir, 好人一世有好報

只外，如果可以過澳門開班 我一定會報名的

龔成老師：

首先你要明白，企業價值與股價是不同的概念，股價就是平日見到的價格，而價值，就要我地自己計算出來，以企業角度，計出這企業值多少錢。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

因為估值要配置最新的大環境分析，因此在書裡表述較難講，所以會集中在課堂裡講述。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

例如計出來的企業價值是$70-$100，現價是$120，現價就是貴。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q19166：

龔sir，最近人仔升值，會否利好一些消費零售股，想問下莎莎前景如何，買入的策略又是如何

龔成老師：

莎莎（0178）不是無質素，但佢已經無過往年代般的賺錢能力，同時香港的零售市道有風險，都令這股近年的表現較一般。

這企業本身在行業有一定的地位，賺錢能力不差，但就會受經濟及零售市道影響，令股價較為波動。

人民幣升值的確會有少少利好，但要等疫情過去先見到。

另外，其實股票班我都有講這股的估值，在過往10年，自由行較為黃金年代過左，所以從估值上，無之前咁高。

佢在行業的優勢仍在，但整體行業及零售市道，無過往咁強，我地就要將估值略有調低。雖然長遠仍有質素，但這刻只能視為合理區，同時投資注碼不能太大注，亦要有耐心先有收成。

------------------------------------------------

Q19167：

龔sir，我媽已退休，63歲、佢從來冇買股票，最近突然問我話想拿20萬（佢30%現金）買哂煤氣話想收息

我因為有睇開你文章都大概知道煤氣價值、想慢慢分析佢知紅股、增長力、派息各樣野係咩一回事。

但佢好冇耐性唔想聽，我最後同佢講應該要分散投資買2800會好點。

可以痳煩老師用你既功力說服佢唔好一棍買哂某隻野嗎？

龔成老師：

煤氣（0003）有質素的，但任何股票，都會有不確定性，就算優質股，都會有平貴的時候，因此，我地要建立一個平衡的組合。

以收息股來說，煤氣都可以，但只能成為其中一個成員，因為佢的股息率大約是3%，其實未算好高，應該加入其他收息股，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

至於紅股，其實是左右手數的遊戲，例如10送1，假設股價為$11，當佢送完股後，就會調整10%，大約為$10，所以根本無著數。另外，佢已經減左紅股，最近變成了20送1。

------------------------------------------------

Q19168：

龔Sir，你好！我現在投資覺得好迷茫，唔知自己做的決定是否正確，希望龔Sir可俾到寶貴意見！

首先我會講下我現在和之前狀況，希望唔好介意。
我今年35歲已結婚太太香港人有個小朋友香港出世今年4歲了，我是馬拉西亞新移民

2017年bb出世後先決定裸移民，當時我和太太總現金約35萬港幣，馬來西亞有固定26萬馬幣現金放定期
（每年利息當家用俾屋企人）大馬有1份儲蓄基金，年供6000馬幣供8年，15年後拿回7.5萬馬幣（現時已供完）43歲先可拿。

由於2017年至2019年期間發生的事情導致我和太太總現金+投資極速下降至21萬，
（當中冇任何虧損投資）我開始有危機感，2020年1月開始自定儲蓄投資理財

我投資如下：匯豐買入價57.15=2000股 約11.5萬（當初想長期收息）

中國人壽年供基金每年3.6萬 供5年
現金=6萬
兩人每月平均收入3.3萬計劃月儲1萬-1.2萬
由於今年疫情導致收入下降唯有將儲蓄目標降低至8k-1萬

現在預計2020年12月總資產有

匯豐=57.15=2000股
電能=41.15=1000股
中國人壽年供=$36000
6820=2.2=3萬股
現金=13.7萬

現時投資2，3線股，賺到錢就買入高息股 保持有5-10萬現金防身錢。

目標在我55歲前能夠儲夠500萬+每年有5-7%回報可以和太太返馬來西亞退休！

我這一刻在糾結是否要繼續買入高息股，見到匯豐股價大跌而又停止派息，依家我開始轉買入電能

我所有投資經驗和資訊都是在網上提供，每天肯花1-2小時睇財經新聞！

希望龔Sir能俾到寶貴意見我！

最後想問我應該適合睇龔Sir邊幾本書？
無論點我真的要 講聲謝謝你，俾機會講出我自己的想法。

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

所以，你而一刻著力點唔應該係"收息股"﹐而應該放係有增長力的股票身上。用佢地去幫助你累積財富，當到一個水平，才轉回收息股去過退休生活。

匯控（0005）和電能（0006）都係收息股，現階段不宜持有太多，可沽出部份換碼至其他增長股上。

FRIENDTIMES（6820）係是中國的手機遊戲開發商、發行商及營運商，專注於女性玩家的手機遊戲。

除發行自主開發的遊戲外，佢亦通過第三方分銷平台發行及營運第三方開發的遊戲，以及授權第三方發行商於海外市場發行及營運集團的遊戲。

見佢增長快速，佢這類公司的風險高，加上上市不久，根本不知佢的真實情況。因此，這股業務有發展，但同樣有風險。此股暫時只宜小注，建議沽出小部份去平衡個風險。

中國人壽儲蓄基金方面，你都要了解翻佢質素和升值能力。你可以用盈富（2800）作比較，佢年平均增長約8%至10%（連股息再投資），去決定維持這基金，還是轉投至其他優質股。

現時，你可先用每月5成儲到的錢做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、長建（1038）、港交所（0388）、長建（1038）、粵海（0270）、領展（0823）、或潛力股︰中生（1177）、福壽園（1448）、華夏恒生科技（3088）、阿里（9988）、騰訊（0700）。

現時大市只是合理區，你現有13.7萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

以恆指過去年平均回報10%計（連股息再投資），我單以你每月投資$10000去計，20年後大約會增值至680萬，故這樣安排相信很大機會達至你的財務目標。

書本上，你可以先睇我寫架"80後百萬富翁"、"財務自由行"和"股票勝經"。

------------------------------------------------

Q19169：

謝謝龔sir 的書 雖然只看到一百多頁《財務自由行》 但獲益良多 很多只知道應該是咁使而不知原因的東西 你寫得很清楚明白

比如人人說負債是資產 但沒人說為什麼跟如何做到 真心你的書給我清晰方法 比很多專家給出幾組數字 你的書給清晰指導出正確方向 這個是我佩服你的地方 真心謝謝！

其實看到這 突然覺得開發層壓式推消的人很強 他是將主人跟平民的關係放在一個小型公司實行

由下層去供養上位者 我也終於明你一開首說為什麼喜歡借錢給別人

龔成老師：

太好了！有好多重要知識，學校都無教，所以我地要自己主動學習。

至於「層壓式推銷」，其實這是一個好強的資產項，只是有些模式太過進逼，甚至會有法律上的問題。所以，我地要學習這些運作，套用在其他事情上，例如正當的團隊銷售。

保持進步！加油！

------------------------------------------------

Q19170：

老師，我對股票全無認識，但有聽YouTube 你分享,盈富基金係好嘅選擇。

呢幾個月有番固定嘅工作但收入比以前少左只有14500出現金不用mpf，但用6000供人壽基金儲蓄及5000家用

車費不出10元，公司包3餐，仲單身平均仲可迫自己储多1500～2000左右，可否見議某些投資較好
thz

龔成老師：

人壽基金儲蓄不是不好，但這是較為防守性的工具，風險較低，回報都較低，因此，其實不用供太多，足夠就得。

餘下資金應該用於增值。

你現時可以儲下現金先，到現金足夠，可以月供盈富（2800），這是最適合的選擇。

如果想進D，可月供安碩恆生科技ETF（3067）。不過現價唔平，不能大注，要慢慢月供。

------------------------------------------------

Q19171：

龔sir你好
我上年買左居屋$300萬（未補地價），380尺，而家月供$11xxx，供25年。

我想10年內買層大d既樓，希望有3房，唔知得唔得...？

我月入$43000，先生收入$28000，供樓及水電方面先生負責，我就負責工人費用，家庭及保險開支，另外再比家用我父母，常規開支合共$18000左右。

如果我每月儲$10000，投資$10000，可以做到以上目標嗎？我34歲，先生35歲。有一3歲女兒，準備生多個小朋友。

目前持有：
012 1000股 $30.4入
9988 100股 $250.6入
1928 400股 $30.6入
1123 2000股 $11.45入
1183 4000股 $1.81入
823 191股 平均$61.4入，月供$2000
1810 63股 平均$23.5入，月供$1000
6823 500股 平均$10.89，月供$1000（供夠1手會轉供第二隻）

另外，我有一份已供5年既儲蓄保，已供完，本金USD$13254，打算退休時取用（66歲時可有保證連非保證回報共USD$80000)

龔成老師：

你現時儲蓄+投資金額，一年約有$24萬，假設你全部會投資，得到的回報率為10%一年。最終滾存數目為$380萬，你可以自己衡量，這個數目的現金，是否足夠到時你地買目標物業。

上述假設投入$20000每月，即是你現時每月保持投資$10000，另外，要好好利用剩下$10000的現金，在適當時期投資，才可以把握到機會。

我相信只要你有少少選股能力，可基本投資知識，當大跌市可把握到機會，你不能爭取到10%以上的回報率。

至於現時的持股，基本上都有質素的，中港照相（1123）質素則較一般。

另外，你之後應該以「10%」為投資目標，因此應該投資平穩增長類股為核心。

------------------------------------------------

Q19172：

龔sir 想問下你會唔會睇恆生指數? 其實呢個指數係咪只係講係指數入面既股份升跌? 因為之前有見過佢下跌但物管股反而上升,(果時係大炒物管股)。

但睇反恆生指數入面既股票,唔係全部都有投資價值,有d入左恆指之後業務差左,但又無被取消恆指名單,令一d投資者覺得買恆指入面既股票一定無死。

之前睇你本年報勝經講到,要分析番前5年既年報,咁每半年或者每季既報告你會唔會睇? 真係會有年報報喜又報憂?

最近既科網股好似唔係好穩定,阿里,京東,網易,好似京東比較好,阿里股價會跌我明白,因為螞蟻既原因,但我唔太明網易最近點解跌左咁多,佢出左既業績都唔錯,股價反而下跌?

831利亞,我之前入左一手,睇番佢今日出左既股東大會通知見到,佢賣左ok店收到29億,之後排息都排左差唔多29億。即是佢將賣左既收益全部比股東? 加上佢排息後會除淨,現價$4.5減去股息$3.85咁佢除淨之後就會變左亳子股?

佢將賺錢既業績賣左,但又唔留d現金再發展,咁算唔算變相縮水? 我應唔應該係佢除淨之前賣左佢? 睇完股東大會之後我自己覺得唔應該繼續持有,想問下你意見。

我依家買左車股之後都唔會點睇，會發掘下仲有無其他股可以投資,睇緊9633 農夫山泉。

龔成老師：

恆生指數會睇的，而恆指只是由裡面的52隻股票組成，不過，當中的股票已經佔全香港上市公司市值的一半以上，因此，都有參考價值的。

我地分析企業，會以「長期價值」角度作分析，因此，會睇5年的年報，至於最新的半年業績、季度業績，都會睇，但最重要是以「長期角度」作分析點。

企業有可能會報喜不報憂，所以要睇多幾年，就可以有更立體的情況。

至於網股，因為中國會加強監管，自然影響賺錢能力，不過，你唔好太著重中短期分析，要睇長期。

利亞零售（0831）出售香港「ＯＫ便利店」業務，作價２７﹒９億元現金，交易完成後，擬向股東派發特
別現金股息每股３﹒８５元。利亞零售預期出售收益約２９億元。

利亞零售表示，便利店業務主要以密集運營模式服務香港市場，並且由於其覆蓋之產品種類繁多，因此涉及相對龐大的物流營運設置以及供應鏈基礎設施。

另一方面，剩餘集團的品牌（聖安娜、Ｍｏｎ　ｃｈｅｒ和Ｚｏｆｆ），其實都適合利用互聯網及線上平台，對中等收入客戶群更具吸引力，並且更少依賴物流設置以及供應鏈基礎設施。

但始終賣左資產後，發展只是一般，同埋之後好睇佢資金的運用情況，現價合理區中上部，投資價值只是中等。

要留意，唔好只貪佢特別息，派息後股價會除淨，自然下跌翻，而特別息只有一次，之後唔會有的。所以，佢的確有機會變成毫子股。

農夫山泉（9633）有質素的。

是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。佢係中國擁有10個區域取水許可證，並在其周邊建立生產基地。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。

業務上，的確有吸引力的，不過，我一向都新股半新股都無興趣，因為真實面要慢慢先見到。此股可投資，但只建議小注，同時你要明白當中的風險。

由於有一定的品牌價值，因此企業質素與發展正面，財務數據不差，生意與盈利都有理想增長，不過上市不久，股價較波動，同時上市前數據可能執靚過，因此要注意風險度。

最好等回少少先投資，這股適合長線的。

------------------------------------------------

Q19173：

成哥。我睇返對話原來都留意左你5年，多謝你推介隻比亞迪。

龔成老師：

係呀，我持有左佢12年，相信中間推介過好多次，就算多年前出的《80後2百萬富翁》都用好多內容講這股。

------------------------------------------------

Q19174：

我見到網上話如果特朗普玩嘢唔同拜登做交接，有繼續撩事鬥非喺度搗亂，所以美國可能金融市場動盪引發新一輪危機，預測子月有大事，唔止天災可能全球經濟崩潰，我咁多貨怕唔怕。

現時持有700、1211、1810、9618、3690，但都是高位入的。而家已無錢再溝貨了。

龔成老師：

第一，你唔好太信網上的分析，你應該多從「企業長期面睇」

第二，你唔好太集中短期分析，無意思。

第三，唔好太著重中短期的賺蝕數。

第四，你現時無現金是有問題的，這刻市況應該持有3-5成現金。

第五，你唔好成日打算溝貨，加注要有策略，睇自己現金，睇股價平貴。

其實你持有的股票，都有質素的，選股無問題，只是買入價全部都貴！

這些價位，只能小小注，又或月供，你這刻守住先，如果持貨太多，上翻去要減。

暫時可以長線的。

------------------------------------------------

Q19175：

你好 成兄，本人今年28歲 由上半年開始價值投資 開始搵左一d低股值既優質股買入 其中買入左303 已有40%升幅

因為想再調整好d個組合 所以想將303賣出換馬 其中睇中868 1666 1833

1. 想問下以上3隻既便宜區大概係幾多

2.另外 手上有939既股票 計埋收息 暫時無輸無贏 想請教成哥 我應該都將939換馬嗎？

龔成老師：

偉易達（0303）作為收息股，可以，但增長力就不算強。

雖然近年的股價較一般，但本質都未算差，但就唔叫好強。

佢過往派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。

公司已不需要每年投資發展，反而管理層、大股東，偏向想收息，因此這是重派息多過重發展的公司。

雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。

如果你目標係收息為主，此股可持有。

但如果你想組合增長力加強，可以轉其他。

1）同仁堂科技（1666）雖然都有質素，但增長力比過往有少少減。

信義玻璃（0868）有質素，有增長力。

這股在《50優質潛力股》中，一直是其中一隻潛力股，無論在2016年版，還是最新的版本。可見，這股有長線投資的價值，這類股有貨可一直持有。

當然，近年股價上升了不少，股價是唯一的風險，業務則仍是長期睇好，市場長遠發展正面。

現價大約在合理區頂，如投資，這刻唔建議大注。

平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，初步分析，$100以上是貴的價位，$100以下開始為合理區頂。

2）不要理會賺蝕數。

如果你想組合有較強的增長，就轉其他。

------------------------------------------------

Q19176：

你好 想向你請教平時睇書 嘅方法 小弟驚自己睇太多書但係學唔到入面啲嘢 或者好快睇完又唔記得， 我明白睇完之後要盡量去實踐

但係唔係每一樣嘢都可以立刻/每分每秒 實踐到? 想請問你平時睇書之後有冇話會點樣整notes定係點樣可以有條理咁做整理

尤其是還在初學階時

龔成老師：

我會用筆劃書的，部分會有另一本策記炒低，久不久重溫重點。

同時，你可以將書本分類，將筆記分類，這都是好重要的。

例如致富、成功、投資、股票、物業、管理、溝通等，這是大類。

而股票又分選股、估值、投資策略、價值投資、投資心理等，你多分類就得。

------------------------------------------------

Q19177：

龔成老師您好，我現時是學生，暫儲了三萬左右的本金，月頭買入$8000恆生股債混合基金，希望長期持有，其餘資金想購入0371北控水務集團收息可以嗎？

另外想請教03718北控城市資源有發展潛力嗎？

我亦有考慮過月供2800,但因近期收入不穩定，每月平均只有$3000左右，老師您認為我可以嘗試月供，還是等低價購入？感謝！

龔成老師：

這類基金都可長線的，你持有就得。

至於北控水務集團（0371）有質素的，不過增長力就不算強。

反而北控城市資源（3718），質素與增長力更高。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。但都要注意，這股近期上升了不少，要注意股價風險，現價算是合理區頂。

從累積財富及平衡風險的角度，月供盈富（2800）$3000對你較有利。但如果你想取多D經驗及想進取D，就儲現金等機會投資。

------------------------------------------------

Q19178：

今年10月啱啱20歲,英國swansea大學Y1
- 早兩年18歲開始就有睇股票但係最後去左炒外匯因為可以有500倍leverege唔駛太大本金, 一開始賺左20萬,之後試過兩次13萬,但係到而加輸左接近1球,想盡快收復失地

- 有冇可能30歲金做到financial freedom
- 而加現金有5萬

而加其實應該要點做?

龔成老師：

首先，唔好再做這類槓杆投資行為，我過往從事過孖展投資經紀，見證大量客戶投資成績，他們大部分的結果只有一個，就是輸錢！

第一，你要大量學習正確的投資知識，你可以睇（股票勝經》，第二，你心態上唔好太急想「追翻輸的數」，要理性投資，令財富穩步累積。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你利用10年時間，集中「增值」，只要努力儲蓄、投資，要做到財務自由都有可能的。

------------------------------------------------

Q19179：

阿sir, 自從看到你的書，見你點一步一步完成目標。我都向你學習，由嘗試小目標開始，不斷完成目標，到現在越試越大目標，覺得生活很有成功感。感覺人生充滿希望。

阿sir, 希望你可以繼續努力，我都會幫多些人。

龔成老師：

太好了！

我相信我地可以做到的事，比預期可以更多！
要相信自己，定大目標，加油！

------------------------------------------------

Q19180：

您好龔成，請問一間上市公司，發行可換股債券或非上市認股權證，這樣的行動會對股價有利定無利？謝謝

龔成老師：

要睇佢的目的，而及發行比邊個。

如果佢的目的是為公司發展，例如與發行給一些戰略性投資者，有利企業長遠的發展，這是有利。

但如果只是益自己人，而公司本身並無資金壓力，這當然對公司不利。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14701-Q14720）

Q14701：

龔成老師你好，最近王維基搞口罩生產，一個口罩都未有已經升哂，然後配股，又跌翻。其實呢個會唔會係天仙局黎?

龔成老師：

又唔算，佢只是利用市場。

當佢係市場最熱炒醫療用品股時，公布生產口罩，加上佢的網購生意有實質的增長，這一定會帶動股價上升，當時佢的股票在短時期內升左一倍，處於熱炒期，而佢好清楚公司值幾多錢，於是就把握機會在高位配股集資。

這個「局」並不是佢造出來，而是市場出現了這個發展，佢順勢做基些野，從中幫公司得到利益。

------------------------------------------------

Q14702：

Hello 龔成老師
我follow 左你個page已經有兩年，你出既書我都有買有睇，啟發同激勵左我好多，無論係為人同理財方面。

我依家先鼓氣勇氣問你問題，我已經25歲啦，之前仲讀緊大學，原定今年畢業，但因為社會同個人問題我無再讀落去

出左黎做野，覺得自己起步好遲同埋確實我依家呢份工係同自己讀個科係兩碼子既事，我好鐘意依家份工，但人工好低需要時間經營（我係做健身教練），雖然我有畢業既話我份工會有前途（我之前係讀內衣設計）

但我好需要搵錢養媽咪唔想佢再返工，唔可以再任性，所以我好需要得到你意見，因為我係好相信你講野⋯⋯同埋希望你比到D方向我！

我係名牌奴隸，之前用你教既投資方法我搵返黎既錢加埋自己返part-time，全部拎哂去買名牌，依家D名牌價值HKD140,000 (賣返出去既價值），我好想重新開始斬掉重煉

我係唔係應該賣哂佢拎返黎等入市（我知咁樣問你有小小白痴，可能我需要一個肯定同支持），因為防止自己好大洗，2年前開始月供3千盈富，同係24.5個時入左太古地產2千股。我真係好好好大洗，買股票係真係禁得住我既消費能力。

我月薪15k，計哂所有支出，得返5千儲，另外我係昆明有一個單位（商業用途為主）值50萬，我應唔應該賣左佢用左其他投資？我現金流有30萬，黎緊想同朋友做健身生意。

我係好想置業，想5年後買到樓，想儲首期。仲有70萬係係保險到，兩年後就拎得翻出黎（呢個舉動都係防止自己大洗）

多謝你一直無私既分享！期待5月股票班第一次見到你！謝謝你！

龔成老師：

首先，你要改變你的理財習慣，唔好再買名牌，實用最重要，因為名牌只給人一個表面的自信心，如果你個人本身有自信，其實就算用普通的品牌，都可以好好睇！

你要有「逼自己儲錢」的習慣，利用月供股票是一個好方法，長遠來講對你好有利。

現時，你有兩個目標，第一是黎想同朋友做健身生意，第二是置業。

先講做生意，我一向鼓勵人創業，因為這是突破的機會，但你都要明白，創業要求你有多種技巧，你要預計到生意有多少，支出多少，多少客才能收支平衡，你做的生意，當區有多少對手，出面的區域，平均多少人口有一個店舖。

你一定要做足功課，你要保障你的資金在合理的回報。

如果健身是你的興趣，以及你想長遠發展的事業，你就唔需要理會過往讀D乜，最重要是將來。你要想想，點樣可以利用健身，有最大的突破，甚至，有無可能將你設計的知識，結果健身相關產品。

股票方面，你暫時保持月供計劃就得，等上完股票班，先作出策略上的可能的變動。5月見！

------------------------------------------------

Q14703：

龔成老師你好！我有問題想請教你。

我今年30歲，現時月供緊金沙，港鐵同比亞迪股份尼3隻股票，每隻都係月供$2000。另外仲入左1手盈富。手上現金只有8萬蚊。

1） 因為尼兩個月會岀花紅，預計有$50000可以用來投資，我好唔好用嚟入2手股票定係留現金比較好？買股票方面我暫時諗緊入2手盈富/2手比亞迪股份/1手盈富+1手比亞迪股份，邊個比較好？或者老師有冇其他好建議？

2） 盈富同比亞迪股份幾多錢可以入貨？
謝謝老師回答

龔成老師︰

1） 現時大市只在合理區，你最多只可以投入一半資金去入貨，其餘等待大跌市才出手。分配方面，你可以考慮2至3手盈富（2800）+1手比亞迪（1211）這個比例，可以適度配合翻你年紀，較需要增長力的情況。

2） 盈富（2800）你可以睇翻恒指市盈率，過往恒指市盈率波幅在8-22倍。現時恆指不足12倍，算是合理區，其實已經可以入第一注。

而比亞迪（1211）最近升了不少，但算在合理區較底部。佢大約$38以下才算平宜，$35會較安全。但如果你無貨，現時在合理區，入第一注都可以。

------------------------------------------------

Q14704：

Hi 龔成，想問一下855中國水務前景如何？現價$6合理嗎？
謝謝

龔成老師︰

中國水務（0855）本質正面的，業務發展不差，生意保持理想增長，不過，負債是佢最大的問題，這令佢的風險度增加。

當經濟轉弱時，佢這類負債較高的企業，要對的不確定性會更高，所以佢股價不斷下跌，只是市場正常反映佢的風險度。

現價合理，此股可以長線持有。但注碼方面唔建議太大，同時你要明白佢股價仍會波動。

------------------------------------------------

Q14705：

老師想請問，鷹君（0041）呢隻股票，有六成幾冠君（2778）嘅股權，依家股價又咁低。

而家買鷹君，就有埋同價錢嘅冠君嘅股權，再送埋其他嘢，包括朗廷SS。冠君好似都係合理價錢嘅投資，咁鷹君係咪好抵？

龔成老師︰

鷹君（0041）業務本質不差的，佢主要從事酒店業務、物業投資、建築材料銷售、經營共享工作空間、證券投資、提供物業管理等。佢業務本質不差，有長線投資的價值。

佢分別擁有冠君（2778）和朗廷SS（1270）6成多股權，2者收入都會影響到集團總收入數字。但留意翻2者都是房託，增長力唔會太強，而且朗廷SS以酒店為主，會較受經濟週期所影響，會較波動。

鷹君近期股價回左好多，現時已到了合理區中下部分的水平，分注投資可以。

但不要預期股價爆升類，這只是平穩增長類，同時有少少股息。

------------------------------------------------

Q14706：

成老師 請問你對0831有何看法。本人透過生活選股 得知旗下Zoff眼鏡界“uniqlo" 在港擴張很快。

龔成老師︰

利亞零售（0831）主要從事經營連鎖式便利店、餅屋、電子商務及眼鏡業務。

當中包括不少為人熟識的品牌如OK便利店、聖安娜餅屋、Zoff眼鏡店，當中收入絕大部份來自便利店業務。

此股正面的，這股有長線投資價值，收息不差。但你要留意翻，佢增長力唔會太強。

------------------------------------------------

Q14707：

老師，我現在主力月供緊盈富，港鐵，煤氣呢3隻，現有用10萬入市，可以嗎？

另外，應該再加邊隻收息股比較好?

龔成老師︰

現時大時在合理區，但未算平宜。我建議你此刻可以將投資資金一半，用"分注形式"去買入優質股。如果你總資金有20萬，那現時投放10萬可以。

至於另一問題，"應該再加邊隻收息股比較好?"，首先要睇翻收息股適唔適合你。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係放配投資項目時，會因應番你的人生階段。

如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。

如果你開始接近退休之年，你可以在組合中加入收息股去減低組合回報的波動性。但你若在中年，甚至是年青人，收息股這類無乜增長力的股票，就唔係咁適合你了。

以下是一些優質的收息股，給你參考︰
收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）。

------------------------------------------------

Q14708：

想問2899會有機會升到4.5?

龔成老師︰

其實我唔主張去找目標價，一個企業只要優質，而質素無轉差，就應該一直持有，以達至最佳財富增值效果。

紫金礦業（2899）︰主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

------------------------------------------------

Q14709：

老師你好，本人今年27歲，月入2萬。自從睇咗你個page 之後開始明白投資嘅重要性。現時有進行月供股票，持續進行咗1年。

$3000 盈富 （2800）、$1000 比亞迪 （1211）。請問呢個供股組合係咪可以繼續保持？打算供多$1000股，金沙 （1928）、領展（0823）、港鐵（66），你會建議邊隻比較好？

另外持有阿里巴巴 （09988） 100股、領展 500股、盈富 1123股、比亞迪 182股。其中阿里巴巴係招股時抽到的，盈富及比亞迪都係由供股儲返嚟。你認為阿里巴巴可以繼續持有嗎？定係應該先賣出，等回落時再買入？

最後想問老師，請問你覺得我呢組投資組合分配得好唔好？有咩改善嘅地方？ 多謝老師解答。

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時組合包含了"平穏增長股-盈富（2800）和"潛力股-比亞迪（1211）"都適合你，而且資金分配比例都可以。至於新加入$1000月供資金，你3隻選擇股票都有質素，以港鐵（66）比較優質少少。

阿里巴巴 （09988）有質素、長遠有發展潛力，此股可保留作長線投資。另外，想提提你注意一個很多投資者都會犯錯的想法，就是"估走勢"，想先賣出，等回調再買入。但絕大部份投資者都係失敗收場，令自已進退失據。

你要明白優質股票要長線持有，讓其慢慢增值，才是最有效的財富增值方法。

------------------------------------------------

Q14710：

龔成老師你好。因為睇左你 所以慢慢儲緊股票 鐵塔 比亞迪 盈富 建行等等！

我都深信散戶慢慢累積潛力股 用時間承擔風險 方為散戶生存之道。

可惜小弟有位朋友 1266西王特鋼
聽人介紹就入左十萬股 @$1.49

至今賬面已蝕十萬 我想請教龔成老師 對1266西王評價 應否減持還是全沽？

我再用你嘅說話去說服我朋友

龔成老師︰

西王特鋼（1266）主要業務為從事製造特鋼，產品包括主要用於建築及基建項目的普通鋼產品，以及特鋼產品，亦從事主要為鐵礦石貿易的商品貿易業務。

雖然生意保持增長，但盈利波動，始終於因為資源價格令盈利有影響。你見佢這刻好高息，但之前的2015年、2016年，無派過息。

因此，這企業的業務，會出現時好時壞的情況。過去一年跌了好多，現時估值不高，是唯一的值博因素。這類股其實只適宜小注博下。

如果此股佔你朋友組合比例很少很少，可以持有博下，但要注意是有風險的。相反，如果比例較多的話，必需沽出部份換碼至其他優質股會較好。

你要佢明白，我地是投資「優質股」，以及進行長期的「財富配置」。

------------------------------------------------

Q14711：

龔sir, 剛剛供股盈富數個月，其實有冇話供到幾多就停？ 謝

龔成老師︰

其實月供股票越耐、利用平均價格買入的效果就越好，建議最少都要供3年以上。

供款期間，股市上落我地基本上唔需要太理會。除非平貴的幅度好明顯，我地就會係現金與股票間的比例作調整（但唔會停供）。在月供股票的層面，一直進行都無問題。

因為月供股票是長期進行的過程，買入價會自然地平均，本身風險已有效減低，而恆指雖然在近期上升，但這刻仍然不足12倍市盈率，仍是一個合理的水平，因此可以照供。

------------------------------------------------

Q14712：

你好 龔成
請問下你點睇178 莎莎？而家價位算唔算便宜區？

有興趣小注入d
Thanks!!

龔成老師︰

莎莎（0178）本質不差的，但近期人民幣較弱，再加上中美貿易戰和香港社運等問題，令佢股價下調不少。

這企業本身有優質的，有品牌、有規模，在行業有一定的地位，賺錢能力不差，但就會受經濟及零售市道影響，令股價較為波動。

其實股票班我都有講這股的估值，在過往10年，自由行較為黃金年代過左，所以從估值上，無之前咁高，所以我都有講市盈率的位置，已經比之前有所調低。

佢在行業的優勢仍在，個整體行業及零售市道，無過往咁強，我地就要將估值略有調低。雖然長遠仍有質素，但這刻只能視為合理區較底部，投資注碼不能太大注，亦要有耐心先有收成。

------------------------------------------------

Q14713：

Hi 龔Sir，未睇你之前乜都唔識買左隻雅高控股（3313），我0.52入，現時已跌超過50%，雖然我只入10000股，但我應該蝕走定繼續等？

龔成老師︰

雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。

其實如果你有上過我股票班，一定會發現此股毫無投資價值。其實投資股票就會買企業，你要好好研究佢質素和前景，確定是有質素才作投資。

我建議你在進行下一個投資之前，多看財經新聞、年報、投資相關書籍和報一些課程。到你對這方面有基本技巧，才投入資金會較為安全。

------------------------------------------------

Q14714：

龔sir，1876，近期較低位，可以入注嗎？

龔成老師︰

首先我想你清晰一概念，我地買一隻股票與否，係視乎企業質素和前景。"低位"與企業質素無關，絕對唔應該成為買入一隻股票的原因。

百威亞大（1876）主要於亞太地區從事啤酒釀造及經銷，集團擁有知名啤酒品牌包括百威、時代、福佳等等，未來會主力在亞洲市場發展。此股有品牌和規模，有長遠投資價值。

此股上市至今只有很短時間，你有留意我fb，都會見我經常講唔會太推薦人買IPO。因為業務上，集團就算有吸引力，但新股半新股真實面要慢慢先見到，加上佢估值困難。初步分析，現價合理區頂。

所以，現價只建議持有小注，同時你要明白當中的風險。

------------------------------------------------

Q14715：

成哥 我一路見你都有推介金沙～2282 MGM如何～我已經買了幾年（平均價17.x）一直未回到～

我應唔應該繼續持有～假如股價回到17~我應該賣出嗎（曾經有試過回到呢個價， 但我沒有賣出，又跌返落去

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

美高梅中國（2282）有質素的，只不過你在2017年大升市時買入，個價比較貴。但唔洗太擔心，我地唔應該因為股價下跌而止蝕，只會因為企業優質度改變而止蝕。賭業中短期不利，但長期仍處於賺錢的狀態，因此唔需要擔心，有得守的。

只是你買入價貴左，可能要長少少時間。相信行業中短期會弱，股價會較為不利，但不要理會，長遠會慢慢好轉的。

------------------------------------------------

Q14716：

Hi 龔成，我今年27嵗，月入16k. 而家户口有2萬幾3萬。

我想而家開始為自己打算，你覺得我應該先繼續儲錢，例如：儲到5至10萬先再投資，定而家每月攞收入百分之10，hkd 1500 來供股？

我而家好迷茫，好冇方向

龔成老師︰

我會建議你先開始進行月供股票會較理想，越早月供，你可以享有複息優勢就越強。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀是黃金增值時期，因為你有較長時間去投資增值，複息效果會更強。所以你應該想辦法去加大你月供金額（減少不必要開支，找兼職等），去提升增值效果。

月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）。

這些都適合你年紀，如果你不會選股，可以直接全數月供盈富（2800），佢係一個包括50間質素不錯上市公司股票的組合，有效幫你平衡風險。

其實，27歲，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14717：

老師好想問，貴，是不是代表會回落啊？

龔成老師：

不一定，這是從企業價值與股價比較，並不是市況的預測。

但價值投資者都認為，長遠來說，股價會趨向翻企業價值。

------------------------------------------------

Q14718：

老師，我在19年不停搵樓睇樓，趁在年尾決定買屋企附近二手自由市場居屋。

收樓後還要花費去裝修，加上其他開支，可以說已經沒有資金。之後每月供樓$18000，加上其他雜費，與太太二人每月仍可以儲$15000。

是否應儲一筆流動資金，然後才考慮買入優質股長期持有，還是可以開始月供股票？謝謝成哥不吝賜教

龔成老師：

如果你買樓後已無現金剩，這刻，要先儲一定的流動資金，視乎你地的家庭情況決定多少。

到了有這注動資金後，這資金以上的數目，才可以進行投資。

除非在你儲資金中途，大市明顯大跌，進入平宜區，到時就會彈性運用資金。

------------------------------------------------

Q14719：

我想問其實月供股票應該分散供4隻股，比較好，還是只供兩隻股比較好？

我現在開始月供股票
$4000盈富基金
$2000 恒基
$2000 港燈
$2000 電訊

請問這個組合是否適合我這個年紀(52歲)

另外本來想月供$2000置富,但係中國銀行冇這隻股票可以月供,所以唯有另外選擇電訊，這樣選擇有否太過重疊?

另外想問如果我miss左堂,是否每次都可以補返那堂的課程?

因為我是輪班工作,又要返夜更,如果調唔到更期,我就上唔到堂？好多謝你的指導

龔成老師︰

你上述所選的股票，都是有質素的，都可以作為月供，如果每隻供款的金額不太少，又或你能以較長的時間去月供（例如供5年以），你供較多隻數是較好的，因此，你可以供上面的4隻股。

以你的年齡，適合你的，資金分配亦無問題。無特別重疊，不用擔心，基本上，你已經可以開始進行。

至於課堂方面，我有補堂機制的，你某一堂無上，預早同我地同事講，下次開班就會安排你上翻該堂。

------------------------------------------------

Q14720：

龔老師。

有個問題想請教你，一間基本面唔錯，有未來可發展既公司，但經常大折讓地出售股權，值得投資該公司嗎？

睇年報，還有很多股權還未行使，知道當股權行使日期過後，權利就會作癈，因此管理層到期前行權變現獲利？多謝指教

龔成老師：

要睇影響的情況。

首先，我地會為整體公司進行估值，在這一步，可以暫時唔計股權部分無，你集中分析企業的質素、前景，投資價值等資料。

到下一步，就是計算每股的價值，這一步除了考慮現時的股權外，如果潛在的行使權好多，就要在這方面，考慮對每一股的影響，從而計算出，影響前後的價值，以比自己參考。

企業有這些給員工的認股權證，並不是新鮮事，不過，就要睇影響的程度，只要考慮這因素對每股價值的影響，就可以更準確去做投資決定。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。