【龔成問答信箱】（Q22181-22200）

Q22181：

你好，想問怎樣判斷泡沫，例如美股市場? PE一直擴張，高於歷史長期水平，但係又有新解讀方法例如利率降低所以估值可以上升，

那麼要去到哪一個水平才屬於高，才需要沾貨呢?謝謝你的意見

龔成老師︰

其實泡沫，係無一個明確的準則，去到計算邊一個位，就算係好危險。

所謂的泡沫，就是「企業價值」與「現時股價」的相差，如果股價遠遠企業價值價值，就是泡沫的概念。

我地可以從大市和企業估值，去到調整我地投資策略(現金和持股比重)，去平衡風險。

就好以現時美股，大市算係合理區頂至略貴，係投資時就不宜太進取，要留有一定現金，去等佢回調，才慢慢加注。

而新解讀方法，的確利率下跌，某程度上係可以調升估值。但同時間，當利率倒轉回升，你估值都會馬上被下調，可能由而一刻合理，變相貴。

所以，我地做估值時，唔好單單睇利率，還要從企業和市場長線發展去著手，才會得出一個較穏當和立體的結論。

------------------------------------------------

Q22182：

龔sir 你好，小弟27歲 收入唔高 每月大約儲到 一千至二千蚊

一個約月前加入市場，希望為未來做個打算，但新手入場 做得少功課 攪到輸多贏少 （亂咁走去玩GME...)，E家就離左場啦

E家大約用三萬蚊拎黎投資，放左係1919(19蚊入，收左息），美股係 Apple 同 Biotech

想問下呢家咁有冇野要調整？

同埋因為儲得少，有冇機會仲做到月供股價？

如果有要點做，同埋有冇推薦？

多謝龔sir 回答

龔成老師︰

我投資股票，就等同投資企業，有一定要認真分析佢質素，例如點賺錢、行內有什麼優勢、長線發展方向、財務是否健康等等。

而且，我地目標一定要係長線，唔好做短炒，這都是經驗之談。

以你27歲年紀，投資上應以增值為主。Apple 同 Biotech 係可以，但Biotech這行業本質風險較高，要控制注碼。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

首先，此股係無派息。你收到是10送3的紅股，但係10送3只是一些財技，你係唔會從中得到益處。

另外，你買入價係貴。此股質素只係一般，現時環球貨運緊張，才令佢收入大升。當回復正常，有機會出現調整。

長線投資價值都有，但唔算好高。若佢佔你組合較多，建議沽出部份，換至其他優質股會較好。

由於你投資經驗不多，加上定平貴能力好弱，你未來都係先集中做月供，去減低風險。

建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$1000做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

最後，你依然係好年青，應好好把握這個優勢，做好財富增值。你現時每月投入資金好少，最好可以增大至收入一半，咁會較理想。

------------------------------------------------

Q22183：

你好呀老師我係初次接觸股票我想問吓你嘅作品裏面我應該睇邊，或者應該係有冇推介邊一本會易明少少

你有時間先覆返我啊唔緊要㗎

龔成老師︰

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

你可首先睇以下幾本，會較為適合初學者：

《80後百萬富翁》
《股票勝經》
《財務自由行》

之後再睇其他。

------------------------------------------------

Q22184：

龔成老師你好 ，本人和女朋友一直有follow你的page和買你的百萬富翁系列著作，但今次想為自己父母發問 。

媽媽58歲， 全職主婦， 爸爸63歲，兩年後退休。兩老沒有投資經驗，現在擁有現金80萬。已供完自住樓，樓價現約450萬。

預計兩年退休後會有退休金有600萬。 請問可以如何分配資產，讓退休生活更有保障？ 需要分段購入收息股， 或者可以考慮年金等計劃嗎？感謝你！！

龔成老師︰

由於你佢地都已或接近退休之年，我地投資重點，會係點安排一系列可產出現金流的資產，為地退休生活作準備。

你可以將這$680萬，分成5部分。

第一部分投資收息股，你可以建立一個收息股組合，你可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之需。同時，若投資市場大跌，你可以在這時買到更多的收息股，股息率會進一步上升。

你可以將$680萬資金，平衡地分配在上述的項目上，對你來說是最好平衡風險，同時有穩定的現金流。

上市收息股︳都在合理區。你現時可以先用40萬，慢慢分注買入收息股，餘下40萬就等個市有明顯回調，才慢慢加大入市力度。

------------------------------------------------

Q22185：

你好，請問⋯ 2318 1475 1909 是否還有質素？

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

日清食品（1475）不差的，都算有質素。

佢由日清日本（於東京證券交易所上市）分拆上市，主要於香港及中國內地從事生產及銷售麵條、蒸煮食品、冷凍食品、飲料產品及零食。

本身有品牌，加上業務穩定，盈利都不差。但比較大的問題，是增長有，但發展潛力未算好強，但市場已假設佢有高增長，所以在股價上，只視為平穩增值類別。

內地市場的確係一個增長動力，現價合理，未算平，分注都得。這股可長線的。

火岩控股（1909）有質素的。

佢主要從事開發網頁遊戲及移動設備遊戲（包括遊戲設計、編程及圖像製作）以及授權全球各地的營運商營運集團自主開發的遊戲。

遊戲已在北美、日本、歐洲及中國營運。集團收入主要來自授權費及出售遊戲幣。

業務發展理想，生意與盈利都有理想的上升，賺錢能力強，基本上有投資價值，暫時睇，前景仍是正面的。

不過要留意兩大風險，第一，佢行業是一些變化較大的類別，無人知當中的優勢能持續多久，始終市場變化可以較大。

第二，股價上落大，現價合理區中上部，未算平，投資值博率都有，但未算高。因此，：如果要投資，就要控制注碼。

------------------------------------------------

Q22186：

Sir 1177最近回了好多，我之前$8入了3手，我記得你話我太高入，現在跌到 $7可以再入小小嗎？還是等再回下先？

Sir 另外想請教你點睇 1798 大唐新能源?

龔成老師：

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。

如果你加注，要慢慢加，不要急。

大唐新能源（1798）主要在中國專注於風電項目的開發、管理及營運。

佢要從事風電等新能源的開發、投資、建設與管理，低碳技術的研發、應用與推廣，新能源相關設備的研製、銷售、檢測與維修等，與新能源業務相關的培訓、諮詢服務，以及房屋出租。

過往的業務發展不差，長遠都有投資價值，不過規模較細，唔建議投資太大注。現價合理區中上部，未算貴。

------------------------------------------------

Q22187：

我想買隻709，我係1.7買左一手所以先留意，我相信佢疫情後復甦番所以一直都冇動作，係奇怪在佢同鱷魚恤呢幾日都好似俾人有心炒起但係又冇咩利好消息咁所以先好奇

老師我想問多兩樣野，我相信我買既都係優質股，但係如果我高追左的話我應該點做？

同埋如果touch wood 真係要放手上既股票套現，我地應該用咩準則去計算邊一隻可以放先？我諗唔明我應該放高增長力先定保守既先

龔成老師︰

若果你買的股票，係有質素，但係買入價較貴。由於企業係有質素，長線係會成長，令股價上升，所以你照長線持有就可以。

記住，買入左一隻股票後，我地唔好再用買入價，作為是否持有指標，而應該用佢質素，去做決定。

至於你現套現的話，可先集中沽出，較無質素的股票。

另外，你可以睇翻邊D股票，無咁配合你目標。好以你現時31歲，應集中在增長股上，一些增長力較弱的收息股，就可以先沽出。

最後，你可以睇埋佢地佔組合比重和現時平貴，將持股較多，或股價已經相對較貴的股票，優先沽出。

但緊記，有質素和適合你的股票，不要盡沽(就算略貴)。必需留有部份，去保持增值才算理想。

------------------------------------------------

Q22188：

你好，老師。希瑪眼科（3309）可以投資嗎？現在是合理價嗎？

仲有1隻歡喜傳媒（1003），可以投資嗎？

1660（兆邦基地產）可以投資嗎？

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

歡喜傳媒(1003)多年虧損，無投資價值。

兆邦基地產(1660)規模唔算好大，質素算係一般，不宜投資太多。加上現價偏貴，值博率不高。

------------------------------------------------

Q22189：

老師，我是你剛剛完成初階課程的學生，最近分析1717澳優。澳優算優質股 但行業比較時 發現6186中國飛鶴優質度更高

行業平均pe為19-24，兩隻均處於合理價低

1.如果現時兩隻值搏率那隻會比較高？

2.老師會比這類行業的pe太約是多小？

3.現是政策上對於這類奶粉股長期發展是有利，但在研究要主要那些不利因素？

龔成老師︰

1) 澳優（1717）和中國飛鶴（6186）都有質素，現價大約係合理區中間，值博率相約。

但由佢地過去股價都係較波動，投資時要控制注碼，去平衡風險。

2) 一般都係10-15倍，會係較合理。但較具潛力和規模，好以蒙牛(2319)，就會比高少少，大約可以去到15-20倍。

3) 你主要可以從成本和供求去分析，例如原料價格和成本、中國出生率、行業形象(出現毒奶事件風險)、國際奶價、競爭對手(國內外)等。

------------------------------------------------

Q22190：

你好,我已經睇了你本<80後的千萬富翁>, 比外國作家(有名的)寫的致富書都好.我買過好多致富書睇, 當中包括:

1) 有錢人想的和你不一樣 (我的最愛, 入面教的思維方法很好)

2) 致富的科學 (啟發<秘密>誕生的一本書, 看這更能感受到吸引力法則在錢或財富方面更深的思想)

3) 35歲開始，不再為錢工作：歐洲富爸爸教你賺錢之道 (這是<我11歲就很有錢>作家的大人版, 教人開始儲錢幾好)

4) 思考致富 (我覺得不錯, 但應用內容部份己見過時, 例如分享如何寫CV, 收音機發展那些...)

5) 窮爸爸富爸爸 (這本是借的, 看過一次)

以上的書, 我只留了1和2, 其他都斷捨離了, 因為覺得內容都重覆.

至於你的投資教科書, 我看了<年報勝經>, 覺得不錯, 很易明, 但內容不夠深入. 知道最好是上你的股票班, 但我真的抽不到時間, 因為我不定時工作, 有時要OT至夜深.

希望你可以寫更深入的書, 教更深的知識. 黎緊我會買埋你其他書.另外, 因為我開始做小生意了(兼職), 你會寫做生意, 同埋推薦一些實用性高的書嗎?謝謝你.

這次主要是想告訴你, <80後的千萬富翁>寫得很不錯, 真的, 比我看很多名作家的致富書好, 一來可能是你吸收了各人的大承, 二是你的文筆親切貼地, 令讀者喜歡.

期待你繼續創作寫書.

龔成老師︰

多謝支持，由於估值方法，真係要好長時間講解，你如果上過我堂就會明。所以，較難係書中詳述。

但你若對企業估值，想作進一步的認識，你可以睇《股票勝經》、《選股勝經》和《年報勝經》，會較詳細教你估值的基本概念。

至於實用性較高的投資書，你可以睇《證券分析》和《巴菲特給股東的信》

雖然不如上堂咁完整，但對初學者已經會有一定幫助。

至於創業有關的書，都可以考慮。但因為現時真係好忙，所以重心暫時只能放係股票上。未來有時間時，都可以考慮下。

------------------------------------------------

Q22191：

老師你好，我最近發現屋企人原來買咗幾隻水泥股，都唔少貨，現在蝕咗好多，想請教下應該點算，thanks

- 2233(買入價：1.32）
- 1313 （買入價：9.xx)
- 743(買入價：7.xx)

龔成老師︰

西部水泥（2233）主要在中國陝西省從事水泥生產，以「堯柏」及「堯柏水泥」商標銷售，主要用於建設高速公路、橋樑、鐵路及道路等基建項目以及住宅樓宇。

業務不過不失，雖然都有d質素，但不算好強，產品價格自主能力不高，賺錢能力不算強。可以視為收息股。這類股唔建議太大注投資。

華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，現價合理，但就要留意股價上落會較大，自己要注碼上控制。

亞洲水泥（0743）質素只是一般。

佢母公司亞洲水泥集團於台灣成立，並於台灣證券交易所上市。而佢的水泥及預拌混凝土產品主要於上海市和江西、湖北、四川、浙江、安徽及福建省，以「洋房」品牌出售。

這企業的主要生產設施位於江西省、四川省及湖北省。於上海、四川省、湖北省、江蘇省及江西省亦有混凝土配料廠，可生產混凝土供應鄰近的用戶。

佢擁有及經營鄰近主要生產設施的石灰石礦場，供應集團生產熟料所需的全部石灰石。過往都有發展的，但盈利波動大，佢的賺錢能力較被動，整體質素只是一般。

這幾隻水泥股，係有投資價值，只係你買入價有少少高，又唔算好高。

但較大問題係佢地質素上，不宜持有過多。再加上組合太集中係水泥行業，令過度集中性風險增加(個別行業不宜佔組合30%以上)。

因此，你要進行減持，將部份持股，換碼至其他行業優質股，去令個組合回復平衡。

------------------------------------------------

Q22192：

龔成老師，您好。一直都好想報你的班，但係因工作時常出場，現在因為疫情更加被隔離在外不能回港。請問，有無機會有網上課程？

覺得港股越來越難玩，現在手上有 2039, 2866, 6666, 1810, 除了1810睇過老師介紹，

其他的股票越揸越無信心，唔知係咪優質股，睇PE又唔覺得貴，在想應該呢刻止賺或長揸。

龔成老師︰

我同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

近期環球經濟因素、疫情、中央近期政策等，都令最近市場比較波動。但我地唔好因為咁，就比市場氣氛影響左自己判斷。

我地持有一隻股票與否，都係要集中睇翻佢本身有無質素，唔好被個股價波動，影響左你左決定。

但留意，市盈率只係其中一個估值方法，未必適合所有企業。而且各個行業，市盈率的合理值，都會有所不同，唔可以用市盈率低，就判斷係唔貴。

我地仲要考慮埋企業本身質素，有時市盈率太低，反而未必係好事，可能係反映緊市場覺得這股票，係無投資價值。

中集集團(2039)和中遠海發（2866）投資價值都有，但唔算好高。若持貨較多，可以沽少少，去平衡風險。

恒大物業（6666）有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務，長線發展正面，可長線持有。。

小米(1810)都係一隻有質素的潛力股，你可以持有。

------------------------------------------------

Q22193：

老師，你好。想請教一下，24歲開始月供2800 快一年，每月$1000，今年增加供款2800 $3000,另加多一隻1177月供$1000 。

如果一直這樣供到50歲(供26年)，會有幾多錢呢？

龔成老師︰

我假設投資回報有10%（連股息再投資），你每月投資$4000，26年後大約會增值至520萬。

你24歲還很年青，你要把握好年青這個優勢，去盡力投資，加大複息效應。每月投資資金，最好係可以等同收入一半，咁就會較理想。

另外，我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

你現時係年青，可以集中係「平穩增值股」+「潛力股」。到你接近中年時，就慢慢集中翻係"平穏增長股"。到你近退休之年，就應集中在「收息股」，去創造平穏現金流。你可以睇翻自已年紀，去作出配置。

所以，你唔好諗住一個組合供到老。以下是一些相關股票，供你參考。

潛力股︰、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）

平穏增值股︰港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

由於現時大市只在合理區，每月儲蓄唔好盡用，要留翻一半，等大市出現一定程度的下跌，才大力度掃貨，然後長線投資。

------------------------------------------------

Q22194：

本人30歲，每月收入4萬，現持10萬現金

以下持股比例想老師幫我分析一下：

收息股（水桶3, 總投資11萬）：
$70.25買（0005）匯豐1600股

平穩增值（水桶2,總投資12萬）：
$52買（66）港鐵500股，
$92買（823）領展500股，
$27.66（2800）盈富1436股，
$4.94買（3662）奧園健康2000股,

潛力股（水桶1，總投資10. 6萬）：
$6.78買（1448）福壽園1000股,
$1. 12買（788）中國鐵塔26000股，
$2. 1買（6068）睿見教育12000股，
$2.16買（1337）雷蛇9000股，
$0. 54買（860）力世紀48000股，

問題1：想問持股比例適合我嗎？同公司質素有冇問題？有部份股票都坐緊艇，有冇邊隻股係應該賣掉轉其他？

問題2：想再買入潛力股，老師最近有否推薦新的潛力股？

問題3：力世紀（860），見佢先前從事珠寶業，近年轉型做豪華電動跑車，覺得佢管理層都正面，佢收購左Apollo 條生產線，德國汽車工程服務外包提供商ideenion,

亦同上海金橋簽訂合作協議，並於今年下半年推出原型車型，可見佢唔係得個講字，而佢既股東陣容亦有雅居樂9％,李家誠9. 25 %,

與李氏關連的維港投資6.3%, TOM集團1. 9%支持，覺得亦有加分。睇過佢既現金流亦強勁，近期股價落至$0. 4, 想增持多40000股，是否有值博率？

佢已經轉型發展電動車，但有d網頁依然會將佢同六福，周大福等既珠寶業比較，其實點解？

問題4：上年與未婚妻聯名買入500萬私樓單位自住用，希望於8年內買入第2個私樓單位（預算約800萬），但感到十分困難，如果只靠投資股票，回報率要有多少才能使我買到第2個單位呢？

而方法係咪應該係儲夠首期，再將原本自住的單位甩名？再用單人名義購買新一單位，但單人又好難過到壓力測試，除非儲了3成或4成首期，感到十分迷妄，希望老師可以指點一下，感謝

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合。收息股，就不宜持有太多。而且個別企業和行業，不要佔組合15%和30%以上，否則會有過度集中性風險。

因此，你應該減持部份匯控(0005)，至其他有增長力的優質股，長線會較有利。

另外，你唔好用個買入價，作為判斷股票質素指標。我地著眼點，應該係睇企業長線質素。如果係有質素，中短期帳面數字虧損，唔需要太在意。

睿見（6068）政策風險較高，要時小注係可以，但不建議再加注。

雷蛇（1337）有潛力，但本質好波動，同樣不宜持有太多。

力世紀（0860）好難分析佢價值，只能說投資風險唔細。

2) 潛力股暫時都係推介以下幾隻，但現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘都略貴，想買就要等一等。

安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

3) 力世紀（0860）佢一直處於虧損狀態，雖然已開始發展電動車，但只係好初期，未到賺錢階段。

現時主要盈利，都係來自珠寶產品及鐘錶分部。因此，坊間用佢同六福(0590)比較，都係合理。

最終新能車能否發展成功，都係未知之數，現時新能車方面估值，只係得個"估"字。整體而言，此股好難分析佢價值，加上佢過往有10送1之類動作，我對這類股票較有保留，投資風險唔細。

4) 我比較建議你甩名，因為可以變回首置，從而節省15%印花稅。但壓力測試會較難過，你要預留較多首期資金。

至於股票投資回報，你預10-15%左右，只要你係投資一些有質素的增長股，長線要做到這個回報率，係合理。

建議你用「平穏增長股」 + 「潛力股」作組合，去創造一個增值平台。

策略上，你現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金和現有10萬，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

我假設投資回報有10%（連股息再投資），你每月投資$15000 + 現有資產43萬(股票+現金)，8年後大約會增值至300萬。

你可以用這個結果作為參考，去計劃你每月供款金額和投資計劃。

------------------------------------------------

Q22195：

你好， 本人35歲，已婚，家庭月入3萬5至4萬，與家人同住，需供養4大長老，每月基本開支+2夫婦保險約3萬5，每月可儲蓄金額約5千，現有約15萬股票+15萬現金

完全唔識投資 ，朋友教我買入匯豐嘗試下投資。2019年第一次投資入0005，好快就跌咗4成，有入多一手溝貨平衡成本

幾個月前開始睇你嘅facebook及剛剛開始建倉

現有投資分佈：（平均入手價）
0005：800股 （49.35）
1310：1500股 （9.34）
0636：500股 （23.35）
0823：200股 （76.15）
0066：1000股 （43.8）
ibond : 3手（2024到期）

明白投資應該要分散風險，我想問下我現在剛剛建嘅呢個倉，比例可以嗎？

同類行業不超過30%，單一股票不超過15%， 想問下係咪用金額去計？

因四大長老，只有二人有工作，但即將步入退休之年，家庭開支將會進一步擴大，現在想儲多一點現金以備不時之需。我們能承受的風險不高，短期一年內暫不考慮月供股票

但如果手頭鬆動可能會考慮在大市調整時分注購入平穩增長的股票

請問下領展，港交所及港鐵適合我們投資嗎？ 到我們儲多一點現金後打算月供或分注購入

謝謝回覆及解答

龔成老師︰

我地配置一個組合，除了因應人生階段外，都要考慮到平衡性。同類行業不超過30%，單一股票不超過15%，是一個幫你達至平衡性的參考指標。

我地係會用當時市價，去計算比重。由於股價係會有波動，所以差少少都係可以接受。

以你現時35歲年紀，應以增值為主。匯控(0005)和香港寬頻(1310)有質素，但佢地係收息股，主要收下息，增長力唔會明顯。你可以沽少少，換至較有增長力股票。

而IBOND係收息產品，比較適合退休人士。建議你沽出，贖回資金作其他投資。其餘持股都適合你，可長線持有。

現時大市只在合理區，15萬現金用來等大跌市機會。而沽出部份收息股和IBOND資金，可以換碼至以下股票。

但潛力股增長潛力大，但風險會較高，你要自己平衡。以你年紀，最多可以佔5成。但由於你現時經驗較淺，最多佔3成好了。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘都略貴，想買就要等一等。

未來當你每月有較多空閒資金時，你都可以利用上述股票，作為月供目標，去進行財富增值。

------------------------------------------------

Q22196：

龔sir你好~本人近年才真正認真學習投資,增加知識, 同時近日在重新審視自己倉位/思考手上股票該如何部署. 其中2個問題有少少想不通,想向你請教

1.現時雖處於牛市階段, 但近日恆指走勢向下,再加上內地制定反壟斷政策/不同監管政策, 不利消息令新經濟股價下跌 ;

是否可視為趁低吸納機會,待企業適應這些政策後繼續增長? 我們可以如何理解現時市況&進行出入市部署?

2.當股市進入跌市階段時,是否有需要將資金進行調配, eg.由之前增長較高既股票轉到房地產/公用股當中? 抑或其實可以照樣保留現有股票,

同時靜待一些企業股價回落到合理/便宜位置時,再進行入市?

謝謝你!

龔成老師︰

1) 大市水平，係我地入市與否的其中一個參考。但更重要係睇企業本身，佢股價是處於什麼水平，才去決定入市。

近期中央政府，不斷推出一些反壟斷政策和監管，令很大大型企業股價受壓。現時不少由過往略貴，回至較合理水平。

表面上，因為咁樣出現左入市機會。但我地都要了解翻，這些政策對這些企業，有無造成長遠影響。如果有，我地估值可能要進一步調整，或者控制注碼，去平衡風險。

2) 當大市下跌，估值好似平時，我地就會加大持股比重，投入更多資金，去買入優質股。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

不論大市在高定低位，都不會影響我們投資選項。市場平貴，純粹只會影響我們入市策略(即現金和持股比例)。但所投資的股票類別，係因應人生階段，所以係不變的。

只要現時持有股票，係適合你年紀，而長線質素又無變壞，就算跌市，你都應該一直持有。

至於入市時機，我地唔會等到佢平，先至開始入貨。因為我地唔會知，這些優質股，係唔係一定有機會，回到平宜水平。

因此，我地會因應自已資金多少，去分成多注咁入貨。係合理區頂，只會小注。回到合理，開始慢慢加大力度。到平宜區，才大力掃貨。

咁就可以平衡價值波動風險之餘，又不會出現完全入唔到貨的情況。

------------------------------------------------

Q22197：

成sir. 之前見你對40歲少股票，多現金的見解，實在擊中心房。

本人已48，冇樓，只是揸住200萬現金，有感樓及股都實實在太貴，故過去一直等跌市，結果錯哂。

求見解未來在房及股怎樣做打算比較好？現在應買樓嗎？同埋建一個約100萬的倉應怎規劃？實在困惑無比。希望賜教，謝謝！

龔成老師︰

由於香港樓房屋供應失衡，相信長線維持上升，機會係會較大。

而是否買樓，從投資角度，而時租金回報率不高，應先投資優質股會較好。但若從自住角度，只要物業係附合你長線生活需要，而你長線又＂供得起"，咁置業都無問題。

至於投資優質股方面，你可以投資優質，平穏增長股，作為投資目標。現價在合理水平，你可以將100萬分成多注，可慢慢入貨(唔好一次過去入貨)。

餘下100萬就等大跌市出現，才出手掃貨。或者此期間，你物悉到合適的自住樓，你就用來做置業基金，都係可以。

------------------------------------------------

Q22198：

龔老師你好，follow了你大半年，零經驗的我都好同意你長線持有嘅說法。

今年26歲，每月可儲$10000，最近都想入手,盈富，港鐵，領展，請問咩位入係最好的？如何分配？有什麼要注意， 謝謝～

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你26歲，應以增值為主。盈富(2800)、港鐵(0066)、領展(0823)都適合你，建議你以盈富作主力。

但你現時無投資知識和經驗，對企業估值，點去定平貴未必會太了解。所以你先利用月供模式(暫時唔好自行定平貴入貨)，去做增值，可以減低買貴貨風險，對你而言會較理想。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

由於你係較年青，長線可以加入一些潛力股，去增升組合增長力。以下都是一些有質素的潛力股，你可以參考下。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22199：

丫sir 唔好意思又麻煩你，我想為隻（1558）東陽光藥估值 ，但發覺現時醫藥行業股既pe 都好高，我試將市值由高至小，

pe 唔過50既6隻股票做一個平均數得出黎係31pe 請問呢個數據可相性高嗎？

另外我拎1558 （東陽光藥）5年平均pe 為25.6 ，最有代表性既eps 為1.18，但佢係20年發紅股1送1 令佢pe 大減 ，

所以我將佢平均pe 減半變成12.8 同時都將行業pe 減半變15.5。

估計合理pe 約12.8-15.5倍估算合理價為12.8x1.18-15.5x1.18

15-18加多10%緩衝=13.5-20

我計得啱唔啱。唔該丫sir

定我應該再減半多次 變成6.75-10呢個先係佢合埋價

龔成老師︰

你計算的基礎，基本上係正確。但數字判斷方法，有些地方係要修正。

首先，現時很多醫藥相關企業，好多都被炒到好貴，所以PE都偏高。加上這些企業，上市時間唔算長，參考價值會被打折扣。

行業本身係有發展潛力，但一般需要較長時間去投資。東陽光藥（1558）本身係有質素，但佢收入較集中在磷酸奧司他韋，考慮到專利到期時，會對佢造成不利等問題。

BOC網中每股盈利，已經考慮了這個1送1影響，所以你計算每股盈利時，唔洗再調整。

至於佢PE大跌，唔係因為1送1紅股。發送紅股，每股盈利和股價係會同時下調，因此唔會影響到PE。

你記翻上堂教你的PE架公式，係市價/每股盈利。即係PE大跌，主要原因應該來自股價大跌，或/和每股盈利上升所致。

於在2020年，受新型冠狀病毒肺炎疫情影響，中國國內人口流動性降低，醫院的診療活動數量、處方量及藥品銷量也隨之下降，因此集團收入有較大下滑。

因此，好明顯不是後者，而是因為前者，即股價大跌所造成。

由於這個是一次性問題，相信唔會長線影響企業，係我地計算每股盈利時，應排除2020年數字會較好。用過往4年平均，約為HKD1.276。

係估算合理PE時，因應企業產品種類、發展潛力和未來面對風險，我地要向下調，你預大約6-10倍。合理價，大約HKD7.7-12.8。

東陽光藥（1558）不是零質素，但業務有少少轉弱，加上業務都有少少風險。雖然現價係吸引，但某程度都係反映市場對佢睇法較淡。

因此，此股係可以投資，但唔可以太大注。

------------------------------------------------

Q22200：

想問下網上有講按揭存款掛鈎戶口可代替交息的概念？ 但睇左唔係太明, 想請教下你, thanks.

想問下如果自住的話, 其實青衣(藍澄灣/ 海欣花園)或者深井(浪翠園/碧提半島) 呢2區作為選擇，請問老師有咩建議? 覺得邊區會好D & 升值潛力好D呢?

唔好意思呀, 突然問幾條問題, 知道你好忙, 但仍細心解答我既問題, 萬分感謝!

龔成老師︰

其實簡單咁講，就係你可以存一筆錢落去個戶口，佢派息金額係足以和你按揭利息支出，作對沖。

但佢會限你存款金額，會係等同你按揭的一個百分比。至於多少，你可以問翻銀行。

從投資角度，青衣(藍澄灣/ 海欣花園)會係較好，始終交通較便利和較近市區。

但這是你自住樓，你要考慮埋你長線生活需要，你要諗佢地配唔配合到未來5-20年生活。若然係可以，又供得起的話，置業係無問題。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22141-22160）

Q22141：

老師你好，想請教一下。我手上有9股均價$600的騰訊。最近跌到得$4xx。我係咪應該止蝕再係4xx買入月供？咁我個價就可以貼市d。

定應該繼續供？我計過要平均返個價去4字頭都要買入超過一手先得。求指教，謝謝

龔成老師：

騰訊（0700）可以持有，你這樣止蝕再買翻，是無意思的，所謂「個價就可以貼市d」只是一個左手數與右手數的問題，你絕對唔好比「買入價」限制左你的投資策略。

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22142：

想請教一下，新手,現持︰

中銀03988,8000股，平均買入2.8蚊
盈富基金2800，一手，買入28.42
越秀服務06626,二手，平均買入4.9

這樣的組合太保守嗎？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，算係一個偏保守的平穏增長組合。若你係中年人，或者投資取態較保守的人，這個組合係可以。

但若你係較年青，應以增值為主。中行(3988)只係收息股，增長力唔高，唔係咁適合。你可以用以下「平穏增長股」 + 「潛力股」，去取締中行。

如果你係偏年青，建議用潛力股，去增大翻個組合增長力。相反，你係近中年，可以用平穏增長股。

未來時間，你新投資都可以參考以下股票，再按你年紀和風險承受能力，去作出配置。

例如潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22143：

龔成老師你好，我同老公三十幾歲, 有2個小朋友。2019年賣樓, 搬番同屋企人一起係九龍住。

賣樓獲利約有300萬, 我地一半放入股票市場, 希望2-3年後可以買市區樓。

暫時買左以下股票, 想請問要唔要調整下? 同埋有咩股票推薦加入組合呢? 唔該哂!

匯控 (0005) @$40.48 有6400股
置富 (0778) @$9.12 有1000股
中銀 (3988) @$2.80 有160,000股
騰訊 (0700) @$610 有200股
潤泥 (1313) @8.66 有10000股

龔成老師︰

由於每個人都有「住」的需要，因此，長遠點都建議你買翻自住樓。

華潤水泥控股(1313)和騰訊 (0700)都有質素，但佢地波動性較大，你距離再買樓只有2-3年，時間唔算長，故不宜持有太多。現貨可持有，但就唔好再加注。

另外，你組合好集中係銀行股，咁會出現過度集中性風險。當銀行業有大問題時，你成個組合就會有重大影響。

因此，你要減持這2隻股票，令佢地比重，只佔組合2-3成。取回資金，可以分注買入以下股票。

若你想增長力高D(但風險都會較高)，可較集中平穏增長股。若你想較保守，可以集中係收息股。

收息股目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

到你置業前半年左右，你就要開始慢慢估貨。唔好等到要買樓一次過沽，因為無人知個陣時會係乜野價位。因此，你要慢慢沽出持貨，去平衡價格波動的風險。

------------------------------------------------

Q22144：

你好，如果扣除家用每月剩$13000（未扣其他日常開支），想開始投資有咩建議？暫時只係抽過ibond 冇其他投資。謝謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄做月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22145：

龔sir 你好,首先,真心好多謝你, 分享小小故事

本人18年創業失敗 , 負債30多萬,當時月入19000,每月還款15000,每日早餐食25元的燒味飯飽肚,中午不吃節省開支,晚餐再燒味飯 ,斷絕娛樂支出,

咬緊牙關渴望用最短的時間還清債務 終於在20年年初還清所有債務

在19年年尾,生活壓力無咁大的時候,購買了你的第一本書, 80後百期富翁 ,當中的心態對我影響好大,讓我確立財務目標,渴望掌控自己的未來 ,

21年年初更成為你倍升股的學生, 對財富之路的了解更多 ,真心再次多謝你

本人今年29歲 , 住公屋, 月入30000 ,現時每月存款18000, 現有資金60萬 ,預計2年內會存到人生第一個一百萬 ,思考未來計劃中

本人與父母同住公屋 , 由於父母年齡已過65歲,短期內不會被房署收回公屋 對未來置業計劃迷茫,未知方向,想你比小小意見

1)買私樓

與父母同住公屋 , 購買私樓出租, 家人作擔保人購買 500-600萬的私樓,做9成按揭 月供21000左右 , 放租大約可收回11000左右租金,

若有租戶的情況下實際每月支出大約一萬左右

2)綠表買居屋

把公屋交回,換購市區居屋 , 每月供款1萬8左右, 但就變成自住物業...雖然有升值空間,它日可出售套現, 但無法出租增加資金收入...

希望龔sir比比意見, 應該如何計畫 , 當有明確目標後,一定將會前進得更快更明確

最後再次祝你 身體健康 , 更早的達成你的目標, 然後開開心心住入你最早的目標

龔成老師︰

你唔需要太急考慮投資物業，現時租金回報率，唔算係好高。投資值博率計，先投資在股市，效益相信會較好。

你可以投資「平穏增長股」和「潛力股」。你每月5成儲蓄，即是用$9000做月供。其餘先儲起，用一邊月供一邊儲蓄的策略。

由於你已經上過股票班，投資上會有一定知識，潛力股可以佔組合約4-5成。但若你覺得，投資知識都未算掌握得太好，或者對這些股票唔係太熟識，可以調低個比重至2-3成。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到了你真係有實際需要，要去購買一間自住樓時候。我會較建議買居屋，雖然佢投資價值不及私樓，但由於佢樓價私樓平。變相你可以空多更多資金，去投資優質股。

當然，因為係自住樓，最重要都係睇你「長線」生活所需，同埋是否可以做到「供得起」。只要做到這2點，基本上就無問題。

而你分享的這個經歷，對很多投資者和創業者，都很有教育意義。好多人都唔識面對失敗，不懂如何走出和面對逆境，你是一個很好的正面教材。

但你要記住，要留住財富，除了「知識」外，「健康」都係好重要。所以，斷絕娛樂和不必要開支係可以，但盡量少做一些會影響健康的事。影響到健康，一切都會變得不值。

加油!

------------------------------------------------

Q22146：

龔sir,你好 今年27歲，現時持股狀況如下，大部分跟龔sir你推薦都升 但自己高位入了其他 變相冇賺冇蝕….請問6919應沽出嗎？

剛忍痛沽出[email protected] 放 出2手 當時買入價是32.5.

以下股票都是一手買入，現想進行月供股票$8000分散風險，$3000小米，$3000金莎，$2000盈富基金 請問組合可以嗎？

No. 數量 平均買入價
386 10手 3.354
590 2手 16.1
2800 3手 24.6
1928 3手 31.4

1972 2手 19.5
788 10手 1.757
1810 2手 1810
6049 1手 35.5
6919 10手 32.5

龔成老師︰

人瑞人才(6919)主要為企業提供綜合人力資源服務，其服務包括發布招聘廣告、前端招聘、入職及上崗、後端人事管理等。

根據灼識諮詢報告，中國人力資源服務市場由2014年約人民幣1,912億元增長至2018年約人民幣4,086億元，複合年增長率為20.9%。

預期到2023年達到約人民幣10,142億元，複合年增長率為19.9%。故行業發展，預期係正面。

集團中國具有強大的服務網絡，覆蓋超過150個城市的客戶，開設超過20間辦公室。

按2020年末計，集團是內地龍頭靈活用工服務提供商，以工人數和收入計，市佔分別為2.3%和3.1%。

初步睇，此股都有投資價值。但人力需求很受經濟環境影響，加上集團現時賺錢能力，唔算得上十分強。

而且行業上，也算不上係藍海市場，因為行業都發展了一段時間，只是市佔較為分散，故增長力你預係中上，唔會係爆發性增長。

此股都有投資價值，但不宜太大注。若你持貨不多，可以守。

新東方在綫（1797）都有質素，但政策風險影響較大，不宜大注。

其實你持有股票，都係有投資價值。但較大問題係，你好多股票都係高位入貨。因此，我建議你暫時維持用月供投資，去減少你買貴貨的風險。

持股中，中石化(0386)增長力弱，以你年紀，不宜持有太多。你可以沽出部份，換至其他較有增長力的股票。

而月供方面，選股係可以，但我建議用指數基金做主力，資金分配轉為指數基金$3000、金沙(1928)和小米(1810)各$2500，咁會較好。

另外，現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q22147：

老師：你好！有問題想請教你，首先自我介紹下，我同先生都是50幾歲，有一個仔和女，我做兼職每月3000元左右收入，先生每月約有18000元收入，

兒女還在讀書，每月交租12000元。現時有300萬現金，眼見資金越耒越少，心情難受，近排同先生開始學投資，

買了銀行安聯收益及增長基金（50萬）、純債卷（50萬）、農業股（50萬），請教我如何運用現有資金投資，目標是想草錢買層600萬左右樓住，

望老師能忙裡偷閑解答，萬分感謝！

龔成老師︰

雖然你地5X歲，但購買$600萬的物業，都可以做到按揭，當然成數未必高，以及年期未必長，因為你地現時月入不算多。

如果要累積多幾年錢先買樓，如5-10年，你地能按揭就更少，但如果現時短期內無法買樓，都無辦法，要慢慢儲錢進行。所以，我就當你地能按揭的金額好低或無按揭，去進行分析。

當然，當你地不斷儲錢時，都可以了解下樓市，不一定儲到足夠的數先開始，中間可以調整。

首先，大方向要累積到較大金額，我先以這個假設作分析。

若果係希望將300萬現金，增值去買600萬的物業，重點應放係增值之上。

但由於你和你先生，已經係50幾歲，都比較接近退休之年，係做銀行按揭上，會較困難。因此你需要累積更多資金，甚至係用全樓價作目標，去作準備。

以你年們年紀，投資選項上要保守少少。我建議你利用平穏增長股，作為增值平台。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只是合理區，你現有可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

若你將來子女畢業，開支無咁多的時候，每月若有空出的資金，建議你用這筆錢，去做月供股票，去加快你增值速度。

策略上，你每月先用5成儲蓄做月供。其餘先儲起，用一邊月供一邊儲蓄的策略。餘下一半儲蓄，就等出現大跌市時出手。

而你現時基金和股票，可以審視翻佢地增長力和質素，去決定是否持有。債券只係產品，主要係提供穏定現金流，無增長力。用於增值，就唔係咁適合。

我假設投資回報有8-10%（連股息再投資），你現時投資$300萬，10年後大約會增值至650-780萬。

但你唔好因為見已多於600萬，就覺得足夠。因為置業時，還有其他連帶成本(如稅、律師費、裝修等)。

再加上，到時已到你們退休之年，你們係需要額外一筆資金，去投資收息資產，為自己創造現金流，去支援你退休開銷。

假設你希望退休後，想每月有1萬蚊現金流收入，以股息率6%計，你就需要本金200萬。你可以用此作為參考，去計劃你未來10年投資大計。

------------------------------------------------

Q22148：

成哥，其實我真係想上你既股票班，但我又行動不便

坐車點對點我都得既
因為真係好想學點估值
而家蠻中中咁買股
好蠢

係咪上完堂
自己肯學會學識？

龔成老師：

完成課程後，你會掌握：
☆自己設定投資策略
☆掌握資金分配
☆低風險爭取合理回報方法
☆能分辨股票優劣
☆為企業優質度評分
☆懂得自行尋找優質股
☆掌握5種選股方法
☆掌握大市買入及沽出時機
☆能評估現股價處平或貴
☆掌握企業估值
☆懂得閱讀企業年報
☆懂得分析財務報表

如果你決心足夠，我相信你總會方法去到上堂的，我未搞澳門股票班前，每一期都有幾個澳門過去的同學，每次上次，由澳門來回香港，8堂如此，每次來回花的時間要4小時，我相信你花的時間，應該不用這麼多。

唔好比一些小問題，影響左你追求進步的心，加油！

------------------------------------------------

Q22149：

您好 龔老師：我初學投資購買股票 想請教您

有穩定工作 每月收入約$45000，租金$10000，還貸款$3750（尚有12期）、保險每月$1800

單親家庭 有1小孩（9歲）、請問我應如何投資好呢？

先謝謝解答

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀，應以增值為主，建議你用「平穏增長股」 + 「潛力股」作組合，去創造一個增值平台。

若你偏向較年青，潛力股可佔3-4成。但若你偏向中年，潛力股佔1-2成好了。到你有一定投資經驗，潛力股比重可以調升翻少少。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

策略上，現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22150：

老師你好,唔好意思我想問下1177, 9988 & 941邊隻股票投資較好。

另外想問下我本身用左10萬買左銀行投資plan要放15年。

另外股票方面現在941有2手,9988有1手。本身喺Manulife買左每月供基金下年11月到期,嗰份基金現時大約$200,000.想用多10萬投資,

唸緊買股票定係投資喺Manulife有隻收益及增長基金每月派息大約6-7%. Many thanks

龔成老師︰

你上述3隻股票，都係有質素。但以你38歲年紀，投資應以增值為主。

中生(1177)和阿里(9988)係潛力股，適合你，現價合理，可以分注入市。但中移動(0941)只係收息股，增長力欠奉，對你就未必太合適。

至於一隻基金是否值得投資，你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

以每月派息7%計，勉強算可以。但你要了解翻個派息是否保證，若非保證﹐長線計投資價質股，相信會較高值博率。

------------------------------------------------

Q22151：

老師我有一個難題唔知點做！我媽媽有一層45年舊樓一向放租，近年疫情長達十年租客唔租，因為多年無維修，現在打算大裝修再放租，其實我咁做啱唔啱，

定係有其他方法，保障我媽媽收入。希望老師能幫我分析一下。謝

龔成老師︰

其實你要考慮翻個物業長線投資價值，因為本身個樓齡都略大，長遠維修成本會增加，會有機會慢慢蠶食租金回報。

除非，係一些大型屋苑(特別係藍籌屋苑)，或者你相信裝修後，租金回報會唔錯，而且可以維持一段較長時間。

否則，你要計劃下將佢轉換成其他資產。個新資產，可以係收租物業、收息股或者其他收息產品，都係可以。

若你不打算再新置收租物業，你可以考慮以下收息資產，大致可將資金分成4部分，平衡去分配就可以。

第一部分投資收息股，你可以建立一個收息股組合，你可考慮港燈(2638)、香港電訊(6823)、工行(1398)、建行(0939)、置富(0778)、陽光(0435)等，大多有5%股息或以上(你可睇下我本《50穩健收息股》當中仲有好多)。

你可以用"分注"形式，慢慢儲貨。平均的投資這些股，除了可以得到穩健的收息收，同時可有效的分散風險。這些股票唔洗理佢股價波動，只要一直持有收息就可以。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。另外，你亦可投資銀行低風險類的產品，你可自行到銀行了解下，總之是「低風險，持續現金流」的。

第四，持有現金，這可以為你的後盾，以備不時之選。同時可以等投資機會。

------------------------------------------------

Q22152：

早晨你好，因為我不太懂投資，所以我想分散風險，打算分三筆錢，買入以有關三個板塊「電動汽車、醫藥、科技」的etf、指數或基金。

應該點買？有推薦嗎，或者哪裏可以找到？

龔成老師︰

若你對個別行業有信心，但又不懂從中選股，ETF會係一個唔錯選擇。

電動車行業，你可以用GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

醫藥方面，ＧＸ中國生科(2820)基金是被動ETF並旨在提供在扣除費用及開支前，與Solactive中國生物科技指數NTR(指數)表現緊密相關的投資回報。

而科技股，你可以考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

以上3隻基金，現價大約在合理區頂，至略貴水平。因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

雖然你現時只有約35歲，算係年青。但畢竟以上都是水桶1股票，風險會較高。緊記，最多只可以佔組合4-5成，否則風險就會偏高。

------------------------------------------------

Q22153：

想問有關月供股票事項

我現時月入3萬、1萬家用、現金儲蓄4000

月供股票
1810 $500
1177 $500
2318 $500
2800 $1000

有1手比亞迪 高位240入左

請問老師我月供組合有無問題？

我想月供金額再加大，另外想供12或16，有無任何建議？

月供股票由今年四月開始

龔成老師︰

你現時月供組合，無問題。至於加大月供，恆基(0012)和新地(0016)都可以，但前者會較有發展潛力。

而你現時25歲，很年青，我反而建議考慮供多隻潛力股，去提升個組合增長力，以下都是一些合適選擇。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

另外，你尚很年青，你應該把握沒有太多財務負擔的時候，努力去做增值。最好係每月投入，可以去到人工一半，就較理想。

------------------------------------------------

Q22154：

老師，想問你意見，我係38歲既孖b媽咪，仔女今年3歲，老公係公務員，老公月供梗941 $2500, 823 $2500 我之前問完你意見，

所以月供梗3067 $2000 6823 $2000, 今日出糧公司加左我大概14-15%人工，所以想利用加左既人工，月供多一隻股票，請問有個提議呢？

還是喺我原有既3067, 6823加大月供金額？

我之前曾經問過你，另外心水既月供股票有1211, 2845, 2382，但最後我揀左3067（因為潛力較大）同6823（因為有息）

求指教一下，謝謝老師！

老師，我最後同老公決定供多隻66港鐵$3000, 941 $2500, 823 $2500, 3067 $2000, 6823 $2000, 一齊每個月供$12000, 希望10年後儲到筆錢俾孖b讀書用

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時38歲計，可以較偏重係增值方面。你現時月供股票，都可以。而新加入的港鐵（0066），都係合適的。

但香港電訊(6823)和中移動(0941)主要係收下息，增長力唔會好高，不宜月供太多。

你可以考慮將佢地月供金額減半，去供多一隻潛力股，增長力會較好。以下是一些合適選擇，供你參考。

潛力股可選阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

現時大市只在合理區，每月資金唔好盡用。要留有部份，等大跌市出現時，可以用來掃貨。

------------------------------------------------

Q22155：

龔sir 你好呀，我係你澳門fans 呀，有少少關於買樓嘅問題想問下你意見。最近同女朋友睇中左一個半新樓嘅單位，

入伙唔夠4年嘅私人樓（金峰名匯近路環）建築面積大概610呎，實用率7成3嘅開放式單位，管理費要2.7。我地都幾鍾意個單位同屋苑，

因為入面比較寧靜和配套設施都齊。我地計算過如果供25年的話大概每個月19000（我地兩個收入差少少5萬，）

但如果租哩個單位就大概8000租，我見疫情期間澳門租金跌左好多，而樓市就只係D大單位回調幅度比較多。我計完之後發覺租嘅價錢好似化算好多（平供樓一半有多）。

如果你係我地會先租再等樓市跌定係都會覺得哩一個係入市機會，還有如果美國加息樓價下跌空間你覺得多唔多呢，謝謝

龔成老師︰

表面上，你租金支出比供樓少近半。但實際上，你供樓金額當中，有一部份係用來還本金，其實等同於係度儲緊資產。

所以，你首先要睇翻個物業，長線有無投資價值。最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

同時，你再要審視其升值潛力，未來地區上、交通上、生活等等的配套發展，才去下一個結論，咁會較好。

另外，你再從自已長線生活需要，去睇下間物業係唔係適合。若2關都過到，而你長線又供得起，咁你去置業，係無問題。

記住，我地投資股市和買物業，都唔好用估走勢去進行，我地應用而一刻佢平貴和質素，去決定買賣策略，咁就可以。

至於美國加息，理論上係對樓市負面。但有多大影響，你要視乎佢加息的力度、時間、經濟情況、樓市供求等等因素。而一刻，較難有個明確結論。

------------------------------------------------

Q22156：

老師你好 我32歲，剛剛開始起步投資了，目前有30萬現金左右。用76.6 入了1手中電 28.7 入了1手盈富基金，淨24萬左右。

我打算分注入市 2-3個月後打算再去入1手中電 1手盈富基金

然後打算用8-10萬買儲蓄保險 分散投資

淨10萬現金做儲備

請問目前的策略可以嗎? 謝謝老師

龔成老師︰

以你32歲年紀，可以進取少少。中電(0002)增長力唔算太高，主要係收下息。現有1手可持有，就不要再加注。

你每2-3月入一手盈富(2800)，這個策略係可以。另外，我建議你加多隻潛力股，去提升組合增長力。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

但現少不少潛力股，都尚在偏貴水平。再加上你剛開始投資，未必太懂得選股，我建議你先用行業ETF做目標，佢地都係一籃子企業，較能分散風險。

安碩恒生科技(3067)、ＧＸ中國電車基金（2845）、三星FANG ETF（2814）現價都在合理區頂，你可以用2-3月入一次的模式，去儲貨。

至於"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

------------------------------------------------

Q22157：

龔成老師。 又係我，又打擾你

首先第一樣野要感謝你，就是因為看你的書開始理財，資產增值，最大的改變由以後的日日外食改為盡量自己煮，籍此省錢。

現在每個月如沒額外消費由每月存5000-6000 增加至8000-9000。當然我爸爸近來身體不好，那是另一筆支出。雖然在大家看來是小數目，不過感謝你，讓我定立目標為將來負責。

第二，有關2013微盟，我女朋友之前2月以近30蚊高位買入（約3手，佔股票1x%)。我現在稍為幫她看了2019-2020的報表。

期實他現金流算不錯，不過他現金流主要來自19年約8億及20年約10億的融資或可換股債券，而21年6月也有約3億的融資，

這部份我覺得公司太倚賴融資，現在大家看到這類saas 網上平台、網上商店、網上廣告等的潛力，可能問題不大，不過我是看到隱憂。

另外，雖然他還在消錢階段時，但已有小量的盈利，但他太倚賴騰信，有2x%營收來自與騰信有關的業務。

這兩點是我比較擔心的地方。如果是你，你認為這股在未來5年有能力去到30蚊的價位？你會如何處理這個投資失誤？

但已有小量盈利是指2019年情況

龔成老師︰

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。

營業額其實持續都有增長，2018和2020年較大虧損，主要係一些金融資產公平值變動所致，並唔係業務上出問題。

至於你所講，佢現金流較依賴融資，這個的確會令風險增加左。但由於佢都係一間尚在發展階層企業，需要投入較大研發資金，故要用到融資去支援開發，都係合理。

而騰訊(0700)佔其收入近20%，唔算話好多，過度集中性風險，唔算係好大。

我地分析微盟，主要考慮點會放係企業和行業長遠發展潛力，而唔係而一刻。當然你所講融資較多問題，和發展上的不確定性，會令風險高左。

但整體而言，此股都係有投資價值。但投資時，我地要控制注碼，去平衡翻當中風險。

由於此股有投資價值，雖然買貴左，都可以守。長遠企業發展，會令估值會慢慢上升，從而股價會回升。

但持有3手係比例上，有少少多，你可以考慮減持1手，去平衡風險。如果你唔想沽，你可以用新資金，去慢慢平衡翻個比例，都係可以。

------------------------------------------------

Q22158：

1830幾多才入市

2331可以考慮買嗎

山東黃金可以買入嗎

想重整股票組合。哪些值得投資

美股期權交易是否好大風險

龔成老師︰

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

所以，如果無貨，可考慮回少少，先小注，然後等跌多d先正式分注投資。

李寧（2331）有質素，佢係中國領先的體育品牌企業之一，擁有品牌行銷、研發、設計、製造、經銷及零售能力。

但現價偏貴，你要等佢有較大跌幅，才好開始小注入貨。

你組合中，大部份都有質素，可長線持有。

但留意，山東黃金（1787）盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。

這類企業都有一定的投資價值，但就不會太高。現價都合理，可分注入貨，但不宜持有太多。

中糧肉食(1610)、五菱汽車(0305)質素中等，不宜持有太多。

中國黃金國際(2099)無明顯投資價值，建議沽出。

美股，係有投資價值。但期權這類估走勢的工具，我就唔建議。你應該用翻正確投資方法，就去分析一間企業優劣，再用平貴向定買入策略，之後長線持有。

------------------------------------------------

Q22159：

龔sir, 我今年54歲，月供由1月2020年至現在，大約年半時間，股票之前組合︰

盈富基金$4000
港鐵 $2000
長江基建 $2000
金沙 $2000
中電$2000
港燈$2000
香港電訊 $2000

另外，分注買入
粵海 6000股
港交所 200股
煤氣 2000 股
六福3000 股
恆基 5000 股
置富 產業信托5000 股
中國鐵搭 2000股
小米 400 股

現時組合股票共現值HK90幾萬

很多年前月供盈富基金，大約有2100股，之後停咗，到之後認識你再重啟供股的路，現時都有正增長，好感激你，想問

1.現時組合是否太散？

2.我打算改變月供組合為

盈富基金$4000
長江基建 $2000
金沙 $2000
香港電訊 $2000
港燈 $1000
港交所 $1000
港鐵 $2000
中電$2000

希望這組合可以增加增長率，但是適合我否？

3. 另外，現在有現金大約60萬⋯⋯已經留咗20萬現金作急用（不動產），請問現時那隻股票可以值得分注買入呢？希望趁平價買入以上種類股票，麻煩幫幫忙

4. 另外，想問如果每月供$15000，六年後有沒有可能累積倒市值500萬股票？

真的感謝你幫忙，以上咁多問題希望你唔會介意，因為自從認識你之後真的財富增長速度比我之前以儲蓄的速度相差一截，在此多謝晒你

龔成老師︰

1) 唔算太散，都可以。

但緊記，現時大市只在合理區，每月資金唔好用晒去月供。最好留有部份，等大跌市出現時，可以用來掃貨。

2) 你將港燈(2638)月供資金，換成港交所(0388)係可以。

但以你54歲年紀，要開始為退休作出準備。港交所(0388)這類潛力股，唔可以持有太多，最多只可以佔組合1-2成。

而且，你成個股票組合，你按年慢慢向保守方向調整。慢慢加大收息股比重，到退休時，收息股最好係佔組合100%。

3) 以下股票，都在合理區。而且佢地都係較適合你年紀，未來應以這些股票，作增值目標。

但由於你本身已有一定持股，故我建議你現時40萬現金，等大市真係有較明顯回調，才慢慢出手。

平穩增值股︰、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

收息股︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

4) 我假設投資回報有8%（連股息再投資），你每月投資$15000，6年後大約只會增值至130萬。

但若用你實際情況，每月供$16000 + 現有資產130萬(持股90萬和現金40萬)，6年後係會增值至340萬。

如果要做到你6年後有500萬目標，就要將月供加大至$33000。若不相加大投資資金，就要將年期加長至9年，才可以做到。

------------------------------------------------

Q22160：

你好， 好想長期投資，好認同你嘅投資策略

本人背景，27歲 現有36萬 月入2萬，宜家有1801 一手 ，1772 一手，少量美股

請問有咩投資建議可以長期有回報？

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時27歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，應以增值為主。信達生物（1801）和贛鋒鋰業（1772）都適合你，但信達生物不確定性較高，不要持有太多。

至於美股，你可以睇翻佢有無增長力和質素，去決定是否持有。

未來投資，你可以集中係「平穏增長股」和「潛力股」。你每月用5成儲蓄做月供，其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那36萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22021-Q22040）

Q22021：

上了你的初班，我已明白唔好追逐平貴，而是睇企業的質素。

但因我太過集中，特別是669，而上次大升時，無把握沽貨，到大跌市，我真有d驚，所以問問咩價位沽貨比較合適，我持有一定比例。

你教的內容真係好有質素，深入淺出，但至於我，我覺得透過實際操作比較易上心，或許這就是我需要活學活用，不停用同一方法去理一些事，然後才能進步。

就好似小孩寫字，一點一筆一畫，做線條練習先。

因為當時我仲未掌握到平貴的計算法，所以有此一問。

龔成老師︰

其實，我係地係決定買入一隻股時，會考慮到佢質素、當時平貴水平、是否適合自己和組合配置等因素，去下決定。

但當買入後，我地著眼點，就會只放係質素和組合平衡性上。

創科實業（0669）有質素，有品牌，有銷售網絡，長遠有發展，這股值得長線投資。

但由於佢已佔你組合不少，個別企業和行業，不要佔組合15%和30%以上，否則會有過度集中性風險。

因此，就算現時係任何價格，你都應該開始分段沽出部份持股，去平衡這個風險。

此股現價已略貴，你已可以分段沽出部份持股。但緊記係分段，調整唔好一次過做，以減低股價波動造成之影響。

------------------------------------------------

Q22022：

早晨老師 18年開始學你投資理財...現已進賬了少許需然離目標還有很遠 不過會用長線投資方法繼續

現在月供緊 2800（$4000）0066（$3000）0012（$2000）

以上組合須要更改嗎？

另持有︰
700 700股
0066 1000股

現金150萬 希望等大跌市入貨 不過等了很久。本人和先生月入約70k 供樓11k 扣除所有開支月儲30k

我現金放在戶口用按揭戶口有2厘 但係好似有啲浪費 我想問如何令資產增值會快些？

另外700越跌越低 我平均價$601.5 應該繼續溝貨定可繼續持有 可否比些意見呀

龔成老師︰

你月供組合都可以，但以你們每月可以儲$30000計，建議再加大多少少月供供款，至每月$15000。

而新加資金，可以投入一些潛力股，去加大你個組合的增長潛力。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

雖然放係度等，好似浪費左一些投資時間。但由我地唔知幾時會出現機會，故必需保留一些流動性高的資產，去把握這些時間。

現時騰訊（0700）在合理區，你本身持資佔近組合全部，比重過高。就算再跌，你都唔好再加注，因為只會增加你過度集中性風險。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

------------------------------------------------

Q22023：

Hello啊Sir，其實我報左你股票班，不過都想盡早比你睇下我現有既Profile同埋我既諗法正確與否？

1. 我應將中國鐵塔換至港交所嗎？因為我見啊Sir你極力推薦。而如果本身我未有費，第一注應幾錢左右入呢？

2. 5月見比亞迪回落了不少，在$142左右開始月供，但現在又回升了，那我應該停止月供嗎？

3. 我目標每年額外投放$100萬至組合，我的策略應該是如何？

4. 阿里巴巴雖然已佔組合約12%，但我見潛力股黎講佢既值博率幾高，我應再在那個價位入市。

5. 福壽園我只得少量貨(佔組合3.01%左右)，我應在那個價位再加注呢？

6. 最後，就是啊Sir你覺得現有組合對於年紀30歲左右的我可以嗎？

問題多，麻煩哂啊Sir你

現有股票組合

優質股:
1. 煤氣x3,000@$14.5
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x600@$135.9
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x4,900@$18.78

龔成老師︰

1) 港交所(0388)有質素，你預回多1,2成才到合理區頂，才可分注。而中國鐵塔(0788)都質素，但增長力就弱左，長線持有價值依然係有，只係無以往增長咁快。

如果你想部份，換至港交所(0388)係可以。但建議都保留部份，畢竟此股都係有投資價值。

2) 比亞迪(1211)現價略貴，如果你已經儲到一定貨，你可以停一停。但若果你持貨只有好少，你暫時可以照供，但只可小注。

3) 以現價計，大市算係合理區，你可以先將50萬，分注買入「平穏增長股」 + 「潛力股」。餘下一半，就等大跌市機會。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於「潛力股」係一定波動性，以你30歲計，大約佔組合5成左右。若你經驗較淺，只宜投資約3成比重。

你現時持股，過半數係「潛力股」類。因此，新資金應優先投入「平穏增長股」，去平衡翻個組合。

4) 阿里(9988)有質素，你預每回10-15%，就可以加注。但你要留意，再優質股票，都不可以過量持有(個別企業﹐不可超過組合15%)。否則，會有過度集中性風險。

5) 福壽園(14488)現價合理，可以加多少少。之後都是，每回10-15%就再加注。

6) 現有組合過於進取，因為潛力股佔比重偏高。當然，你還年輕，想進取點係可以，但你要明白當中風險。

最理想，潛力股係維持3-5成左右，會較穏當。

股票班見!

------------------------------------------------

Q22024：

老師，想問下京東物流同攜程。 呢2隻股票分別前者系43.3 買入， 後者是303.6買入。 兩隻都只是買了一手。 請問現價是否繼續持有？

本身睇好呢2隻股票，但買完就系咁跌。

是否未跌出5%就放番止蝕？

龔成老師︰

記住，不要用自己的買入價作為何時沽出的指標，也不要以回本後沽貨作為策略，同時，更加不要抱著「賺了多少就沽貨」這心態去投資。

坊間經常用買入價作為何時沽出的標指，這是極度錯誤的。沽出是基於這股已偏貴，又或沒有前景，質素有問題，而絕非由買入價決定。

因此，若你分析該企業的前景一般，就可沽出。

京東物流（2618）都有質素的。

京東物流係中國領先的技術驅動的供應鏈解決方案及物流服務商。通過科技賦能提供全方位的覆蓋各個業務領域的供應鏈解決方案和優質物流服務，從倉儲到配送，從製造端到終端客戶，涵蓋普通和特殊物品。

根據一些調查報告，按總收入計，這企業係中國最大的一體化供應鏈物流服務商。

2018、2019 及 2020 年，京東物流營收分別為人民幣 379 億元、人民幣 498 億元和人民幣 734 億元。

京東物流於 2018、2019 及 2020 年產生的虧損淨額分別為人民幣 28 億元，人民幣 22 億元及人民幣 40 億元，不過，如果扣除一些非現金流的開支，又未算太差。

佢表示，上市集資所得，部分將用於升級和擴展該企業的物流網絡；部分將用於開發與供應鏈解決方案和物流服務相關的先進技術。

企業有優勢的，長遠發展正面，但中短期股價未必有好強的表現，這股都有投資價值，但現階段未必值得大額投資。

攜程集團（9961）有質素。

佢係全球領先的一站式旅行平台，可提供一套完整的旅行產品、服務及差異化的旅行內容。

用戶可以通過平台進行任何類型的旅行預訂，從目的地內活動、週末短假及短途旅行，到跨境旅遊及商務旅遊。

產品及服務組合涵蓋經濟、高端、定制化及精品產品。集團經營一系列品牌，包括攜程(Ctrip)、去哪兒(Qunar)、Trip.com及天巡(Skyscanner)。

根據報告，以商品交易總額（或 GMV）口徑統計，佢係過去10年內一直為中國最大的在線旅行平台，近年更為全球最大的在線旅行平台。

財務數據方面，收入都有不差的增長，但盈利就比較波動，有時會出現虧損，反映企業仍處於投資期。

這企業有獨特性，長遠有投資價值，但估值難，未能確定這刻的平貴度。只可以話，潛力度是有的，但預期股價都會波動，因此投資要控制注碼。這股宜長線，等企業成長。

由於這2隻股票，你都係得1手。我建議你超長線持有，咁就可以。同時間，你要明白這2隻股票，都係有一定不確定性，若你資金唔算充裕的話，暫時不要考慮加注。

------------------------------------------------

Q22025：

老師，我在分析3 號煤氣，我留意到公司在2020 年的收入及毛利都比2019年高，但盈利就大幅下跌。

查看損益表及附註發現，對比2019 年，2020年在 " 投資（虧損）／收益淨額 " 一項有數目變化，而該變化是來自 "上市證券" 的虧損。

我想問:

1. 從何得知這些虧損及盈利是否一次性?

2. 有考慮有代表盈利時，是否不需要計算此項?

3. 在那裡可以看到 " 國際金融中心投資物業之重估減值" 的數值?

龔成老師︰

1) 其實這部份，是一些集團持有的金融工具，其帳面價值的變化。

這部份基本上，每年都係會出現，唔算係一次性因素。但由於當中部份只係帳面值變化(有點似物業重估)，故這個項目，不用睇得太重。

2) 對，要調整。

因為佢主要受市場影響，令佢每年數字都好波動。只要你拿較長期數據作參考，就可以將這個部份，對分析盈利所造成的偏差淡化。

3) 你將年報中(P.6-7)，"集團稅後溢利（未計集團所佔國際金融中心投資物業之重估減值）為港幣64億8千4百萬元" ，

減去"計入該投資物業重估減值後，本年度集團股東應佔稅後溢利為港幣60億零7百萬元"，就會知道大約個重估數字是多少。

------------------------------------------------

Q22026：

龔sir，你好！我最近看了你那本《財務自由行》，明白持有越多資產越有利，借取越多現金越有利，本人最近思考如何實踐。

本人情況：租住朋友一間三房物業，月租$7000，有一層第一城物業放租。雖然本人是銀行職員，尚未使用員工優惠，享用低息高貸款額。現在面對以下兩選擇：

1. 繼續租住朋友屋及放租第一城，但儲了很多現金，又沒有名額買第二層資產，但細單位升值潛力高，又可以盡快財務自由。

2. 賣出第一城，用公司員工優惠，買入更大單位自住，可實踐借取越多現金越有利，但大單位升值潛力較細。

謝謝龔sir

龔成老師︰

我較建議用方法1，因為香港買賣物業成本，都比較高。一來一回，會唔見左好多錢。而且，你現時朋友屋租金好平。可以為你節省更多現金流，去進行投資增值。

除非你個單位質素好差，租金回報率好弱，否則你照放租，用"以租養樓"的模式。

再用現有資金，去投資優質股增值，集中以股票，作為財富增值的核心。之後，如果日後有人名，才再思考怎樣用你員工優惠，去加入第二個物業，咁會較好。

------------------------------------------------

Q22027：

老師，想問問你對於保單融資的意見

龔成老師︰

保單融資，其實就係透過借貸，去以槓桿形式放大回報。相比傳統儲蓄保險，佢增長潛力會相對較大，同時風險會相對較高。

而且，回報和利率都係不保證。因此，最終回報未必是預期中咁理想，你要明白這個風險。

其實比較建議，"保險"只用作防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

------------------------------------------------

Q22028：

老師，A股隻002352順豐.買唔買得過？

龔成老師︰

順豐控股 (002352.SZ)為內地快遞物流綜合服務的提供商，主要提供倉儲管理、銷售預測、大數據分析和結算管理等綜合物流服務。

此股有質素，集團在內地有領先規模。在電商近年高速發展下，集團長遠發展正面。

但此股現價不平，過往佢股票波動都比較大。此股有投資價值，但現時值博率唔算高，同時要控制注碼。

------------------------------------------------

Q22029：

龔SIR, 你好呀,又要請教你供股既問題喇, 因為我老公唔識股票, 所以佢係每月比5K我供股, 我就幫佢供緊3K 2800 + 2K 66, 黎緊佢可以再加多3K, 呢3K放響邊類股票好呢?

我係用自己個中銀AC同佢一齊供既, 成個AC供緊既野如下,

2800 6K 我地一人一半
66 4K 我地一人一半
823 2K 我自己
1810 1.5K 我自己
1211 1.5K 我自己

佢果3K好唔好放去2隻科技股 , 每隻1.5呢? 你認為將佢放埋入1810 同1211好定再揀過2隻幫佢供會好D呢? THX

龔成老師︰

你現時計劃，已經係可以。

由於現大市只在合理區，你唔好每月全部儲蓄都動，要留有部份，等大跌市機會，才出手入平貨。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

而盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

你現時組合，領展(0823)和港鐵(0066 - 算半隻地產股)都係地產相關行業，雖然都尚在合格水平，未有超過標準。

但未來有機會再加新股票，就要先避開地產相關行業，以免有過度集中性風險。

------------------------------------------------

Q22030：

龔成老師你好，我係你股票班舊生。小妹今年28歲，月入九萬可存6-6.5萬，有車，無家庭負擔。

3年前上完股票班開始投資，多數係月供股票以及少量低位買入。85萬成本賺左60萬左右，真係衷心多謝您。

有個問題想請教下。

較早前購入1750萬物業樓花（建期），套現左部分股票，支付左訂金，印花稅及律師樓雜費等，用左240萬。

樓花期2年，家人承諾會幫忙支付部分首期（還剩樓價40%）。我都希望在2年內盡量存錢，希望可以達到270-300萬，上會前分擔部分首期。

本身月供24k，分別係

12 @3000
27@3000
66@3000
788@2500

1177@2500
1810@2000
2388@3000
2800@5000

另外套現後宜家剩翻股票如下，大約63萬

66/691股 @42
590/1000股@16.7
788/15000股@1.17
1177/8500股@7.3
1211/2100股@41.5

美股15萬左右，現金35萬

想問下應該加大月供計畫金額，定係存現金好。

龔成老師︰

你現時持股和月供計劃，都係適合你的。

以你每月可儲6-6.5萬計，你應該再加大少少個月供金額，去到每月可儲資金一半。

假設投資回報有10%（連股息再投資），你每月投資$60000 + 現有資產(約115萬)，2年後大約會增值至280-290萬。

但問題是，2年係一個好短架時間。就算再優質的股票，中短期都會出現波動，影響你最終回報，你要明白這個風險。

因此，你加大的月供部份，我建議集中係收息股類。而餘下資金，除非大市有明顯回調，否則不要出手。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)

當然，如果你想再穏陣D，唔想2年後太多變數。這個新增月供部份，可以由收息股，更改為定期。同時間本身月供組合，都可以將部份股票轉為收息股。

但這樣，你個組合增長性，就會減弱左，你要從風險與回報間，取個平衡點。

------------------------------------------------

Q22031：

老師你好，自從認識到你的Facebook後，開始看你的書籍，了解自己的習慣，比較適合月供股票，目前31歲。

目前已經開始月供半年左右。在整個組合中，盈富4000 ，比亞迪3000 ，海螺3000 ，中電3000 ，騰訊3000 ，安踏2000。

1）個人希望以穩定為主，慢慢累積財富，少量投資增值股。目前組合需要調整嗎？符合我的年齡？

2）當中海螺水泥，目前虧損比較多，長遠水泥股發展老師的看法是如何？需要先暫停月供還是繼續？

謝謝老師指導。

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主。你現時月供組合，都係有質素的股票，大致都適合你年紀。

但有2點要留意，中電(0002)主要係收息，增長力唔高，唔係太適合你年紀。(當然，你想個組合穏陣少少，留佢係度都可以。)

比亞迪(1211)有質素，但現價略貴。暫時不宜月供太大注，最好暫時將供款，下調至$1500-2000，到佢回到$17X左右，才慢慢大加。

現時大市只在合理區，每月資金唔好盡用。最好留有部份，等大跌市出現時，可以用來掃貨。

2) 安徽海螺（0914）有質素，有增長力。

佢主要從事生產和銷售熟料和水泥製品，業務地區包括中國東部、南部、西部、中部及海外。而安徽海螺是水泥行業中，全球最大的單一品牌供應商。

水泥屬於基礎原材料行業，對建築行業有很高的依賴性，同時亦會與經濟增長速度有較高的相關性，特別與固定資產投資相關。即是說，當中國基建及房產市場不景，水泥行業會比一般行業處較大的不利狀態。

另外，水泥企業在生產過程中，燃料成本佔總生產成本中約佔了超過一半。若能源價格出現較大變動，就會對企業成本造成較大影響。因此，當能源價格出現較大上升時，將引致安徽海螺的成本增加，影響其中毛利。

綜合來講，佢擁有相當規模、生產能力，有一定的質素及賺錢能力，而水泥行業長期將因中國城鎮化以及一帶一路的建設，仍然會增長，但不會像過往般快速，而是進入較平穩的時期，在本質上此企業不差。

現價勉強合理的，但要留意盈利有潛在波動。

你要明白一個概念，我地持有一隻股票與否，關鍵位是企業質素、前景，不要被買入價(或者買入成本)影響。買入價只是一個心理因素，如果企業核心因素未被影響，我地係唔需要理，照持有就可以。

------------------------------------------------

Q22032：

龔成老師你好，本人剛結婚，現有有關買樓一事想請教。

我和老公三十頭，二人月入共十一萬、冇計劃要小朋友，打算過多十年移民外地。老公買左土瓜灣一手私樓自住(300呎)，打算日後過了禁售期再售出圖利。

我們現金約有一百萬，外幣一百萬(之前唔識投資，只會買外幣放銀行但冇息)。但其實賣出後我們還有自住需要，所以我在想以下那個方法比較好

1) 要否以我的名再買一層居屋/二手私樓自住，等待大約十年後移民外地前再賣出。如果買第二間，啟德跑道的一手樓花好定大圍二手居屋會易點升值呢?

2) 定係用買第二層樓的首期來投資股票會更好?但我們都不太懂買股

3) 定係現在用土瓜灣一手私樓換另一間大點的私樓會更有升值空間?

另外，我在$249買左1手9988, 你覺得現在@205可再買點嗎?謝謝老師

龔成老師︰

其實香港買賣物業成本唔細，加上你們之後都會移民(相信不會保留本地物業)。除非現有物業非常不適合你們需要，或者質素好差，長線計無乜升值能力，否則唔建議沽出換樓。

反而，你用現有資金，去買入一些優質股作增值，咁會較好。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你3X歲，應以增值為主，建議你用「平穏增長股」 + 「潛力股」作組合，去創造一個增值平台。

你可以用每月空閒資金，做月供股票。每月先用5成儲蓄做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

現時大市只是合理區，你現有萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

至於外幣，唔係一個好的增值渠道。貨幣係可以無限印制，長線只會一直貶值。除非你有明確用途，否則應換回港元，去做投資。

阿里巴巴(9988)適合你年紀，現價合理，加上和你上一注有一定距離，故現價加1注係可以。

------------------------------------------------

Q22033：

午安，龔成，經常有留意你頻道，所以入左小米和中生製藥，小米27時入了一萬股，中生製藥在8.6時入了三萬股，但一直唔明為什麼業績好，公司有潛力，

但股價一直下跌，這幾日還連續開八連陰，現在還有廿萬現金，應再補貨，後續應如何部署

龔成老師︰

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

你唔好用股價升跌，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

你現時持有這2隻股票，都係有質素的潛力股。若你係年青至中年人士，這類潛力股，你照持有就可以。

但我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

未來時間，現分散投資多幾隻不同行業股票，去平衡風險。

現時大市只在合理區，未到好平，不宜盡用資金。餘下廿萬現金就先儲下，等大跌市動用。

------------------------------------------------

Q22034：

你好 龔成老師！由2018年開始幫家人（現時50歲）投資幾隻房產信托基金-主要收息 由於當時投資知識不足 所以組合比例分配的唔好

而且投資的幾隻現時都跌左好多 最近幾個月開始認真閲讀老師的幾本書同專頁 開始對股票組合有少少頭緒並作出調整 在此萬分感激老師！

有以下問題想請教老師︰

家人年紀約50 預計5-10年後退休，有醫療保險 強積金約50萬 ，現金30萬

現持有股票：

越秀房產信托基金 11000股 平均價$5.23
置富產業信托2000股 平均價$8.93
匯賢產業信托 23729股 平均價人民幣2.64
煤氣 1000股 $11.38
香港電訊 4000股 平均$10.82
粵海 4000股 平均$11.77

6月開始月供$3000盈富基金 $2000港鐵 $2000金沙

每月可儲現金$6000

1.請問以上組合比例適當嗎？有需要再調整嗎？

2.房產信托越秀同匯賢質素如何？ 應繼續持有或趁低增持嗎？ 因為87001 自疫情開始就跌近半 一直都上唔返去維持人民幣1.76左右 本來打算收息 但現時賺息蝕價

以往一直選擇以股代息增持 但現時擔心這股質素已改變 請問係暫時受大環境經濟影響定真係質素變差 唔會再上返去？

3.若果越秀上返買入價 應該賣出再增持置富嗎？

另外請問呢個年紀小注加入3067適合嗎？股價幾多係便宜至合理？

粵海 煤氣現價係合理區 到幾多先係便宜？
感激老師解答！

龔成老師︰

1) 以上月供組合和資金分配，都係可以。但這組合，不是用至退休。

由於你家人開始要為退休準備，你要慢慢將一些收息股，換入月供組合中。到退休時，收息股都應佔100%。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時房託和部份股票，都有超標情況。你要用新資金，慢慢將個比例拉翻平衡。

2) 匯賢產業信託（87001）雖然是不錯的房託，但這房託比其他房託有點特別，可長線持有收息的。

匯賢現時主要資產：包括於2011年收購的北京東方廣場之零售、寫字樓及服務式公寓業務；以及兩家酒店（北京東方君悅大酒店及瀋陽麗都索菲特酒店）。

加外有新增投資，於2015年才收購的重慶大都會東方廣場。

但要留意，根據北京市人民政府於2006年6月26日發出的國有土地使用證（京市東港澳臺國用（2006出）第10128號），該發展項目總土地面積為7萬7千平方米的土地使用權已授予北京東方廣場公司作綜合用途，到期日為2049年4月21日。

從整體及本質上，這房託是不錯的，適合長線投資。雖然有上述所講的潛在風險，但高股息率，可說能抵償當中風險，同時反映部分物業有「到期」因素。

簡單來說，就是佢的股價，會慢慢長期向下，因為有些資產會到期。不過，如果佢餘下的資產在這段時間增值，咁股價就不會向下。

簡單而言，越秀(0405)和匯賢(87001)都係可以持有。由於你目的係用來收息，你係唔洗太在意個股票變動。

3) 你可以將部份換碼，現價計置富(0778)值博率係高少少。同時間，你都可以將2隻股票比例，變得更平衡。

50歲以上，我唔建議買安碩恒生科技(3067)，因為波動性太大。若真係好想買，都係好小注好了。

粵海(0270)和煤氣(0003)現價合理，你預回多1,2成，才開始算係初步平宜區。

------------------------------------------------

Q22035：

老師您好:本人今年50, 因為做得唔開心, 所以打算辭職, 進入半退休。我持有:

1. 現金$400萬
2. 公積金$200萬
3. 股票$80萬, 包括:
a. 1398: 100000股
b. 808: 20000股
c. 435: 10000股
d. 0006: 2000股
e. 1038: 1000股

4. 自住物業: 未供完, 每月供5千。

除工行, 都係近排買入, 會再分注買入。

辭職後收入大減, 希望透過投資維持每月20-30K收入 (包括供樓支出)。

龔成老師︰

如果你希望8年後每月有2-3萬蚊現金流，以股息率6%計，你需要本金400-600萬。

以你現時資產規模，是可以做到你的目標。

現有持股，你長線持有就可以。你可以再將這$400萬現金，分成4部分。

第一部分投資收息股，你可以建立一個收息股組合，你可考慮港燈(2638)、香港電訊(6823)、工行(1398)、建行(0939)、置富(0778)、陽光(0435)等，大多有5%股息或以上(你可睇下我本《50穩健收息股》當中仲有好多)。

你可以用"分注"形式，慢慢儲貨。平均的投資這些股，除了可以得到穩健的收息收，同時可有效的分散風險。這部分可佔你財富$100萬-$200萬。這些股票唔洗理佢股價波動，只要一直持有收息就可以。

但由於工行(1398)已經佔你組合很大比重，暫時不要加注。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。另外，你亦可投資銀行低風險類的產品，你可自行到銀行了解下，總之是「低風險，持續現金流」的。

第四，持有現金，這可以為你的後盾，以備不時之選。同時可以等投資機會。

你可以將資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q22036：

龔sir 你好, 我今年31歲發覺自己儲錢好慢+投資初哥, 股票比例輸多 想請教你投資方法同&意見

我月入HKD20,000, 每月可儲HKD8,000左右

現持有以下資產

Cash :HKD85,000
股票 : 9988 (291.55買入) X 400 股
941 (48.5買入) X 500股
1928 (35.6買入) X 800股

Q1: 9988見你話佢潛力都大 但我好高位入左, 有需要止蝕/加注 由得佢擺住先 ?

Q2. 941 同1928 值得長期持有/加注/ 咩位就要放呢?

Q3. 小米可以入手嗎?

Q4. 另外, 想請教我呢個年齡有咩投資方法/組合可以儲錢有效率啲. 我見你推介供股為主

多謝您的解答

龔成老師︰

1) 阿里巴巴(9988)係有質素的潛力股，你買入價係貴左，但此股有增長潛力。當企業盈利上升，佢股價再回向上，你照長線持有就可以。

但由於佢已經佔你組合，一個好高架比重。就算股價再回調，你都唔好再加注。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主，建議你用「平穏增長股」 + 「潛力股」作組合，去創造一個增值平台。

阿里巴巴(9988)和金沙(1928)都適合你，但中移動(0941)只係收息股，增長力好一般，唔適合你。但你只係有1手，照持有都得，就唔好再加注。

3) 小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂位至略貴，小注分注可以，但唔好入得太急，預佢股價仍波動。回多1-2成更有投資值博率。或者月供都得。

4) 你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

目標係一些「平穏增長股」 + 「潛力股」，現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

大市現處於合理水平，那8.5萬現金和每月儲蓄，就等大跌市機會出現，才大力度掃貨，並長線投資。

------------------------------------------------

Q22037：

龔成老師你好！本人34歲，月入20000，月儲2500，因過往實在缺乏規劃理財，零投資經驗，單純地以為買了份儲蓄保險就足夠（供25年,每月1200），

於是便成為月光族了，因最近結識女朋友，當開始為未來籌劃時，實在十分旁惶，驚覺一切已太遲！想向你請教一下，如果我想3年內儲20萬，我該如何做呢？萬分感激！！

龔成老師︰

其實34歲，未算遲，只要你用正確方法去做財富增值，一樣可以有唔錯效果。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

現時份儲蓄保險，若已供了一定時間，我建議你保留會較好。但就最好不要再加大這方面投入，以免拖低財富增長力度。

你34歲，應以增值為主，建議你用「平穏增長股」 + 「潛力股」作組合，去創造一個增值平台。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

現在你每月先用$1500做月供，其餘$1000先儲起，用一邊月供一邊儲蓄的策略。

餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

我假設投資回報有10%（連股息再投資），你每月投資$2500，3年後大約會增值至10萬。故要達成目標，你最少要加大供款1倍。

而且3年唔係一個長時間，最終回報有機會受股市波動所影響，你要明白這個風險。

------------------------------------------------

Q22038：

老師你好,本人現在收入不穩定, 有大概九萬幾現金, 市值十一萬港股加美股.另外有一小型saving account, 再加五萬六左右在基金投資.

現在有一創富難題:

想盡快儲首期買到一層650萬或以下的樓來投資

如果想創造穩定被動收入來供樓, 唔駛驚自己收入唔穩定供唔到樓.

老師你會有甚麼建議?正在閱讀"80後"中不過還是想麻煩老師你, 真不好意思

龔成老師︰

有兩個方向，第一，你將物業出租，利用租金去供樓，但如果你造高成數按揭，有機會租金少過供款，就會出現負現金流，因此，如果你想較有保障，就不能以高按揭成數去進行這動作。

當然，這就要求你有較多首期，因此，你要在這方面，自己取平衡。

第二，如果你想創造被動收入去供樓，你只要將投資一些收息股，用佢地去創造現金流，咁就可以。

假設你每月要有2萬蚊現金流，以股息率6%計，你需要本金400萬。因此，你現時重點，就係要去累積這400萬。

但一般我地會建議讀者，運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你係年青至中年人的話，你現時應把握時間優勢，先做財富增值部份。除非你預買樓時，你年紀都已較近退休之年，你才好考慮原先被動收入的計劃。

至於儲置業資金，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有9萬資金和每月所儲倒的資金，就等大市出現一定程度的下跌，才大力度掃貨，然後長線投資。

至於基金，你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年)。

如果整體係優於大市，你都可以投資。

------------------------------------------------

Q22039：

龔成，我想請教一下怎樣實現財務自由，夫婦二人打算明年帶小朋友移居英國。丈夫現已辭去工作，本人兼職收入約每月$8000，每月開資約兩萬。

打算用400萬元在英置業後，餘下資產應該投資甚麼可以製造每月30,000元的現金流呢？

資產：

香港有3個物業：

1.銀行估價480萬元，打算明年賣出用來購英國物業，現每月收租$13000)

2. 市場價約330萬，沒有按揭，現奶奶及老爺收租作生活費。

3. 市場價約330萬，有100萬按揭，收租可cover 供樓費用。

強積金：夫婦共100萬元（移居5年後獲取）

儲蓄保險：24萬本金

藝術品投資 : 現時價值大概 80萬

流動現金: $50萬

虛擬貨幣: $5萬

月供基金: 現價值約40萬，上月已提取其中20萬作為流動現金，並已申請延期供款，餘下20萬會滾存到20年後方可再次提取。

龔成老師︰

若你希望移居英國後，每月有3萬蚊現金流，以股息率6%計，你需要本金600萬。

你可以考慮將部份資產賣出，再轉換成收息股，去創造這筆現金流。例如部分原本無現金流類別的項目如藝術品投資，以及剩餘現金。

收息股︰你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

但由於英國對股息，係會收取一定稅項，故實際回報會係低少少，你要自己了解翻。

英國稅制比香港複雜，你最好了解清楚。要沽出的資產，就盡早處理，以免受英國稅項影響，令你資產價值被打上折扣。

另外，你移居到一個新地方，生活不確定會大增。建議係投資同時，都留有一定現金，以備不時之需。

------------------------------------------------

Q22040：

龔SIR, 可不可以對我的股票 portfolio 比些意見? 以下大概總值三百多萬, 應該繼續持有, 還是套現買樓?

股票#(買入價)
3988 (3.20)
6 (42.7)
8(4.22)
883 (8.2)
17 (36)

19 (40)
1113(41)
1044 (55.5)
308(1.23)
52(17.)
175(29)

THANKS!

龔成老師︰

你現時持股，質素上都可以，算係一個平穏增長組合。若你係較中年人士，算適合。

香港中旅（0308）、中海油(0883)質素較中等，不宜持有太多。

若你係較年青人士，我建議你加入一些潛力股，去增升組合的增長能力。

潛力股：安碩恒生科技(3067)、阿里（9988）、 騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

至於是否置業，要睇你本身有無實際需要。若係自住樓，你可以套現，但緊記要嚴守"供得起"這個大原則。另外，在置業同時，必須確定尚有一定股票，可以保持增值，以免成個財富組合，偏重晒係物業上。

若你置業目的係為左投資，我就唔太建議。因為現時租金回報率，唔算好高。相比股市，值博率係較低。故暫時將資金投資優質股，會較好。

當然，你此期間找到旬盤，租金回報率高，升值潛力又唔錯，你都可以入市。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。