【龔成問答信箱】（Q21681-Q21700）

Q21681：

老師，上完你整個課程，雖然我仍有d唔明，但我想信每天一點一滴去溫習你既notes，我會一步一步進步

我最感恩就係，依加個市上上落落，我都可以放心。因為你教識我，只要持有優質股，不用驚短暫股價既波動

1) 其實之前教既市賬率，市盈率，現金流，折現率...要計數既部份，係咪知下就得喇？

最重要係學會第6，7課既企業評估表，對嗎？

2) 你功課590話每股盈利增長係負數，即是代表什麼？

3) 老師，恕我能力偏弱，我唔識你評估表某些指標的意思，即是搵咩資料：

-生意與盈利保障程度高
-管理層理性
-總負債÷股東權益<100%
-負債的增長不過快

4) 老師，除了590外，還做了669，1211，發覺自己做多了一點，開始知d數據去邊度搵，熟習了一點。

但係指標好多都唔識做，唔能夠理性去分析，只主觀地表示 ✅或❎，甚至唔識做

5) 老師，想問下英磅走勢，你有何意見？

6) 老師，你課堂的第7堂內容非常豐富，如果分2堂講會好d

想問功課

7) 行業市盈率，照網站所示的寫下答案，還是搵返相近市值的股票公司作比較

如六福網站show 行業市盈率是35.47。

而其中 1856依波路 的PE 是710。另外，5間市值最大的股票（周大福，六福，周生生，冠城，力世紀），

當中係無盈利的，即無shows PE，係咪只計頭3間的PE? 還是照抄網頁的數字？

龔成老師︰

1) 唔係，其實這幾個是一些較主要的分析方法。除左用企業評估表中，去判定一間企業長線質素外。

我地都需要詐透過這些方法，去幫助我地計算合理值出來。因此，你係要比時間去了解的。但現金流折現法，會係較為複雜。初學者，可以先掌握其他幾個先。

2) 這個負數，係代表每股盈利由2019年去到2020年，出現66.4%的倒退。

3) 生意與盈利保障程度高︰好似一些公用股，市民基本上經濟好與壞，都要持續消費，故保障性會視為高。(六福0590︰算係一般)

管理層理性︰這個你可以睇佢市場策略，和多年年報。例如公司已經負債累累，市道又不好，還盲發展，可視為不理性。

又或者佢數年前，有些大計。但最終無疾而終，甚至朝令夕改，當經常有咁架情況，就算是不理性。(六福0590︰開店速度理性)

總負債÷股東權益<100%︰主要睇長線償債能力，你可以係BOC網站，財務比率個頁，就可以找到。我地一般要求，少於100%為之好(第7堂SLIDE45)。

但你留意翻，近年由於國際財報標準更改左。一些有較多租舖的業務，例如零售，好似六福這這類企業，我地會將個指標，調升為<150$%都接受。(六福0590︰34%)

負債的增長不過快︰你可以用過去多年數據作比較，如果負債增長較快，而負債相關的指標又明顯變差的話，你就要留意。(六福0590︰負債不多)

4) 這些係需要經驗去慢慢磨鍊出來，你預分析頭幾間，都係會有咁架情況。當你唔明，就睇翻NOTE，自己要多溫書，推論，之後真的都唔明就INBOX問我。

開頭係會較困難，但當你累積到一定經驗，你就會知道面對不同企業時，分析應該係點做。

5) 我對英磅無研究，比唔到實質意見你。但建議你除非有實際用途，否則唔好似貨幣，作為增值渠道。

在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

6)要研究下。

7) 行業市盈率，我建議你找同業，最好係產品、質素、規模都相近的公司。你現時分析六福(0590)，你可以用周生生（0116）、謝瑞麟（0417）、周大福（1929）作參考。

依波路(1856)無論業務內容和規模，都不適合用作參考。加上過去幾年都虧損，令市盈率數據較異常，故不要將佢加入考慮之列。

你用水牛網，找到這幾間企業過去10年市盈率的4個中位數。再用這4間企業市盈率的上下限，去取出平均值，就是行業市盈率。

(即係4間企業的4個中位數，"最細"和"最大"的數字分別加起，再除以4，就是行業市盈率之上下限)

行業市盈率約為︰10 - 14倍

------------------------------------------------

Q21682：

你好，請問對退稅年金有咩評價？始終感覺上好似長時間鎖住舊錢 係唔係比較適合上左年紀而又無咩免稅額既人？

龔成老師︰

年金產品，主要係提供穏定現金流﹐較適合退休人士。

因為較年青人士，應先做好財富增值，這類產品就不太適合。

但同時，你都要睇翻佢節稅能力，同你將同一筆錢，去投資所得回報作比較。

因為投資回報始終有不確定性，而節稅金額和收取年金，係保證。若2者回報係接近，退稅年金就可以考慮。

------------------------------------------------

Q21683：

老師 你好，我手上現有1316 $13.7 有兩手, 1137 $16有1手 及圓通6123 $6.2有2手 請問可以繼續坐嗎?

龔成老師︰

持有一隻股票與否，唔好單單係睇中短期架帳面賺蝕，應從佢本質著手。就算而一刻帳面出現虧損，只要佢長線質素無變，照長線持有就可以。

你以上3隻股票，都係有質素，若你係年青至中年人士，係適合你長線持有。

耐世特（1316）本質中等，之前業績有點弱，但又唔算好差。你持貨唔算多，只係2手，照持有就可以。但因為質素始終不強，你預佢增長力之會係一般，不建議加。

香港電視（1137）業務有前景，但你要留意，佢有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦。

第二，這企業現時搞網購，有增長力的，但同時存有一定的未知數。疫情過後的增長力會否減慢？故此股可投資，但不建議大注。

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。你現時只投資小注，係無問題，但要明白風險因素。

------------------------------------------------

Q21684：

Hello Sir, 我上年喺股市最旺盛嘅時間下入市, 本金80萬, 今年2月由賺20萬到今日我已經蝕咗本金30萬.

升唔識食糊, 倒跌至一個位係我覺得不能承受要止血我唯有放。而家我倉位得返50萬⋯⋯

9618 $330
1810 $25
992 $10
2269 $108
388 $515
1833 $135

請問以上股票係咪都係好股？我唔等呢筆錢用, 我其實可以長期持有, 但係長線持有係咪都要止蝕?

我知你比亞迪由$80跌落去你都冇放棄過...但係我冇這份信心

Sir, 我應唔應該放一些新經濟股轉買舊經濟股？例如1299, 5..etc

先謝謝你的解答

龔成老師︰

你同好多散戶一樣，都犯左個錯誤，就係覺得「買入價」﹐係一個神聖的指標。

記住，不要用自己的買入價作為何時沽出的指標，也不要以回本後沽貨作為策略，同時，更加不要抱著「賺了多少就沽貨」這心態去投資。

沽出是基於這股已偏貴，又或沒有前景，質素有問題，而絕非由買入價決定。

相反，若你分析該企業的係有前景，就算中短期股價波動，令你有賬面虧損，我地都唔應該沽。

你以上持股，都係有質素。但有個問題是，你太集中係潛力股類(除了聯想0992，其餘都係潛力股)。

佢雖然有增長潛力，同時風險都較高，不宜持有過多。

若你係較年青，潛力股可佔約5成，餘下應用以下平穏增長股。但若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

平穏增長股：盈富(2800)、金沙（1928）、恆基（0012）、港鐵（0066）、友邦(1299)、平安（2318）、粵海（0270）、領展（0823）、希慎（0014）、太古地產（1972）、長建(1038)

匯控(0005)只係收息股，無乜增長力，如果你係較年長或者好保守，都可以加入佢。

現貨要否沽出部份，去換碼至平穏增長股，要睇翻你組合大小。如果金額較多，你可以沽出部份換碼。

但若金額較細，可能每隻只有1,2手，咁你照持有就可以，用新資金去令組合慢慢回復平衡，就可以了。

------------------------------------------------

Q21685：

龔成老師你好，本人女性今年32歲, 穩定月入6萬3. 戶口僅保持10萬儲蓄應付不時之需.

以往旅遊購物月月清, 最近終想通生活目標, 學習緊斷捨離多儲錢增值自己

經朋友介紹認識你, 希望學習投資重新出發

背景:
資產:3年前8成按購入5M新樓
固定支出28k(供樓,家用,租金,保險)
日常支出希望維持7k

長遠目標:
希望可以5年內換樓

現在目標:
想學習穩定增加資本, 等待時機買dream house (10M)

本人BB班, 過往無投資經驗或概念, 完全唔識股票; 希望得到老師指點初部方向, 建立action plan 一步一步增加財富, 謝謝你。

龔成老師︰

首先，你要改變以往不好的理財習慣，你試下每日記低自己每項支出，再睇翻有無邊D係無必要，盡量空出多一點資金，去做投資增值。

你現時有明確目標，就係細屋換大屋。由於你已有一間物業，我地現在要做的，就是透過優質股，去幫你累積一筆資金，達成你換大屋目標。

你可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

到5年後，你可以慢慢套現股票，去實行換屋大計。

但緊記，我地財富組合，唔好偏重係個別資產類別，要平衡，樓和股票都要有。因此你換樓時，唔好股票盡沽，要留有一定數量，可以用來持續增值，才算理想。

------------------------------------------------

Q21686：

老師好，我而家最主要係糾結好唔好買樓，如果買嘅話幾時買，買咩價位嘅單位好。

今年30歲，月入9萬，和父母住。每月支出1萬至2萬。

現金儲蓄 210萬左右，強積金27萬

投資方面︰

大部分2800，有82萬左右

最近加多咗啲水桶一，加埋大概50萬左右（不過好似有啲心急咗應該分細注啲注入）

2800 - 平均價 23.2, 29000股
3188 - 平均價 60.1, 1000股
1810 - 平均價 24.9, 5200 股
1177 - 平均價 8.31 , 13000 股

788 - 平均價 1.12 , 80000 股
0027 - 平均價 65.2, 1000股
388 - 平均價 451, 100 股

遲啲諗住加埋美股 台積電。

而家亦都開始做緊月供：銀河，港交所，小米，中生 每隻5000蚊

買樓方面，唔急住自住，可能都係當投資+- 收租

自己一兩年後亦都有機會想搬出嚟租屋住或者住返買咗嘅appartment， 不過我就係度諗，買樓咁麻煩又要交差餉管理費，可能仲要比錢裝修。

到底對我嚟講呢個係唔係一個合適嘅投資呢? 如果係嘅話我咁嘅情況應該買咩類型嘅單位好呢? 定係留返啲錢遲啲買股票好?

龔成老師︰

我地投資，除左要選擇一些適合自己的優質資產外，組合的平衡性，同樣都係好重要。

若你無實際需要，我建議你先同家人同住，節省更多資金用作投資。若你無自住急切性，可先從投資角度去考慮，現時股市值博率相對樓市較高，加上你己有一間appartment，我地應先從股市這裡入手。

以你30歲計，投資應以增長為主。你現時持有股票，和月供計劃，大致上係可以。

但月供上，有少少偏重係潛力股(1810, 0388, 1177)，風險會稍高。未來可以加入一些好似盈富(2800)的平穏增長股，令組合更平衡。

另外，我建議你每月儲蓄最好可以做到，係收入一半，即係$45000。其中$25000作月供(加多一隻$5000平穏增長股)，$20000儲起。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

現時大市只在合理區，現金和股票，最好各一半。你現有資金可以用多少少入市(美股、台積電、港股都可以。)。餘下的資金，就等大跌市才動用。

至於物業，現時香港樓市係合理區頂部，投資價值未算好高。但若你此期間，發現一些有質素，又平宜的旬盤，你都可以考慮用現有資金入貨，之後放租。

因為，我地長線財富組合，唔可以偏晒係股票類，都要加入物業類，令組合更平衡健康。

但由於現時物業值博率不高，你可以集中股票先。而買邊類物業，我會建議初階投資者，先從住宅開始。

若資金較少，可以先入手較細單位(但最好都有300呎以上)，但必需要有質素和投資價值。你可以睇我本<5年買樓4步曲>，會對物業投資，有較完整解釋。

------------------------------------------------

Q21687：

龔老師你好，我30歲，剛在美股損失了很多，差不多70%身家！現持有︰

941*47蚊入
6618*160入
939*6蚊入

現打算月供2800 和6818

現金只餘下數萬元！

你覺得可以嗎？還有機會番身嗎

龔成老師︰

係而個時候，你唔好先諗翻身問題。你要先想清楚，美股出現重大損失的原因。

美股雖然近期係較波動，但不至於7成上落，所以你投資技巧和方法，一定係出左核心性的問題。

記住，我地買入一隻股票，就等同買入一間企業，一定要知道佢質素、行業前景、財務狀況等，才去考慮否投資。

當我地確認係值優質股後，我地會用平貴定入貨策略，並長線持有。而唔係做短炒，去賺差價。

更加唔好用衍生工具，或者槓桿，因為好難玩，個風險會好高。

你現時持有股票，都係質素。但中移動(0941)和建行(0939)只係收息股，增長力唔會太高，以你30歲計，有點保守，建議不要再加注。

至於月供方面，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

你所選盈富(2800)係可以，但中國光大銀行（6818）都係收息股，唔係咁適合。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成。

餘下的另一半現金，我地就等機會，當大市出現較大回調，就加大力度掃貨，然後作長線投資。

最重要係，你要努力學習正確投資知識。只要你能運用正確投資知識和技巧，長線回報一定會唔錯。

而一刻你可以先做月供，但你再加大投資前，要先了解過往失利原因所在，才好再投入更多資金入市。

------------------------------------------------

Q21688：

龔sir你好，我是一個新手，想試吓買少少投票賺少少外快。我聽別人介紹買＂美團＂但不知從何入手，求指引

龔成老師︰

首先，你要清晰一個好重要的投資概念。我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線(3-5年，甚至更長)，而唔係短期炒賣，去賺差價。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂，不過，一定不能大注。小小注，是較好的做法。

------------------------------------------------

Q21689：

龔成老師，你好，最近在facebook發現到你的專頁， 發現你回答讀者問題 提供的意見務實而有用， 非常欣賞 。希望你也可為我提供一些意見

本人32歲，未婚，與家人同住，沒有租樓壓力

月入22000, 擁有積蓄70萬。

一路以來都沒有意識到投資嘅重要，只係識儲錢擺銀行。 直至最近意識到錢擺銀行,遠追不到通脹。

直至上月開始學投資，由於好多嘢都唔識 同唔了解，所以暫時都係偏向保守 型投資。

1.)我放咗三十萬在銀行做咗個守約儲蓄保險計劃,年期8年

8年後可拎到38萬x，平均年利率3.6厘

請問老師你認為呢類型產品做得過嗎?定還是 只年期長回報少?

2.) 想放十萬 在股票市場,暫時手持:

中國移動一手
香港電訊一手
盈富基金一手
中國銀行3988一手
二南方納指500股
(啱啱投資就遇著跌市😅)

請問以上嘅組合可以嗎 或有冇更好的建議可供參考?

3.) 另外想投資15萬 到保險公司購買基金或 月供 盈富基金/voo

請問老師你會比較推薦哪一樣?

我希望呢15萬嘅投資係比作一個中長線嘅儲蓄

非常感激， 期待你回覆

龔成老師︰

1) 這類保險產品，係穏陣，但增長力好弱。持有太多，會拖慢左你財富增長力度。

你若真係想保守點，持有係可以，但金額上要作出平衡。

2) 當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時32歲去計，應以增值為主。中國移動(0941)、香港電訊(6823)、中行(3988)主要係收息，增長力唔高，不宜持有太多。現貨可持有，就不要再加注。

二南方納指(7266)係追蹤納指表現，納指升1%，佢會升2%。但相反，當納指回調，你架損失會係雙倍。這類槓桿ETF，我唔建你用，風險太高。

若你想投資納指，可以投資美股Invesco QQQ Trust(QQQ) ，是追蹤納斯達克100指數，會較適合你。

將來時間，你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

3) 3者都可以，但由於基金一般都有一定收費，長線拖低你回報。除非你肯定佢長線回報，會明顯優於大市，否則你投資盈富(2800)或VOO，會較為理想。

但留意，現時大市只係合理區，未到好平。資金一定唔可以盡用，而且係要分注咁，慢慢入貨。餘下資金，就等大跌市，才出手入平貨。

------------------------------------------------

Q21690：

Hello龔sir，我睇咗你本“股票勝經”，都成日睇你Facebook page嘅video同解答網友投資問題，穫益良多，多謝你！

我呢排都買咗少少“安碩恒生科技”3067嚟長線投資。想請教吓，你點睇“華夏恒生生科”3069，同3067相唔相似？係唔係長線投資嘅好選擇呢？

龔成老師︰

華夏恒生生科（3069）主要係追蹤恒生香港上市生物科技指數之表現，係一隻不錯的ETF，值得長線投資。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線。

但留意，華夏恒生生科（3069）和安碩恒生科技(3067)都係潛力股類，風險會較高。

假設你算係年青，佔5成左右好了。若你投資經驗較一般，比重就要再下調少少。如果你係接近退休之年，這類股票風險太高，就不太適合你了。

------------------------------------------------

Q21691：

龔成老師，我有個問題請教一下，我是澳門的，我打算一年半後結婚，現在和家人一起住，結婚後大機會和老婆家人住，

我比較偏向買鋪位，但可能要結婚後才夠錢，我是否應該在結婚前先用了青年首次置業先買個唐樓，到之後再用唐樓換鋪位？

結婚費用我工作一年半是完全足夠的，買唐樓首期現在是足夠，但鋪位就不足夠。

龔成老師︰

你都可以用這個方法，以資產追資產模式，去先買唐樓，再增值後轉買舖位。

至於澳門的青年首次置業計劃，其實我唔太清楚具體情況，細節位未必好清楚。

但首先，你要睇翻這唐樓是否有質素和投資價值，唔好純粹因為個價你可以承擔，就盲目出手，最緊要睇佢升值潛力和租金回報率，是否合理。

同時間，你要考慮你用左這個首置機會，你將來要自置自住居所時，就不能享受高成數優惠。

另外，投資舖位，對投資物業技巧要求較高。若你這方面經驗唔係太多，你就可能要提升這方面知識，才出手會較好。

若不買唐樓，你都可以考慮用優質股，去為置業資金增值，都係一個可行方法。

至於結婚資金，你就不要用來投資。因為只有1年半時間，用來投資增值，風險會太高，最多只宜作定期存款。

------------------------------------------------

Q21692：

龔成老師您好，今日想主要問問好多人心目中既股王 騰訊 (700HK)。

我有睇過有人問過700而龔成老師覺得依家係係合理區頂部。騰訊現時PE為29到，以historical 10年PE average 35到，我用個PE range 24.5-52.1黎睇，

依家已經俾過往既十年黎講相當較平而股價區會由500-1050所以覺得580已經相對比較便宜，所以想問問龔成老師咩睇法?

同埋龔成老師每次都基本上會叫人留有現金，係大跌市既市時候買入優質既股票。騰訊由高位770跌到依家580差唔多已經跌左25%。

想問下依家係唔係到龔成老師成日講既大跌市，而呢個係買入良機長線持有?

同時都想問下之前都係百度220蚊，姐係由高位跌左差唔多4成個陣買入打算長線持有。

因為百度仲下跌緊到依家差唔多175蚊，上次220蚊買入又合乎龔成老師” 大跌市”的睇法嗎?

謝謝回覆!

龔成老師︰

騰訊（0700）本身已經好大好大隻，要再高速增長並不容易，雖然手遊的長遠發展仍會不錯。

但要帶動這股倍升，相信並不容易。所以，我地唔可以完全參考過往數據，要因應現有情況，作出合理調節。

當你運用過往的市盈率作估值時，要留意翻環境與企業的情況有無改變，當一間企業有較高增長時，市場會比佢一個較高的市盈率，而騰訊5-10年前，仍處於好高增長狀態，到了今天，是中高增長狀態，估值當然會有調整。

此股相信依然有唔錯增長力，但唔會去到以前咁高。而價算係合理區頂，如果你去到平，你預跌多3-4成，才算平宜﹐故現時未稱得上係明顯買入良機。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

百度在規模和質素上，一定係有。

但我地唔好單純用比較現價和上次高位距離，因為早前科網股被熱炒，不少相關股票，都因而被大幅推高。

我地應用翻企業本身價值，去衡量佢現時價格水平，是否合理。

佢雖然已跌到$18X，但唔算係平，只是合理區頂至略貴水平。但長線有增長力，若無貨，現價小注投資係可以。

------------------------------------------------

Q21693：

龔成老師，一直睇開你嘅理財資訊，本人34歲，持有現金50萬左右，偏向增長組合。因為最近股市比較波動，所以想問吓老師意見。現持有以下股票：

1810 200×23
6618 350×130
700 600×100
883 6000×9.3
1928 1200×32.9

請問咁嘅組合係唔係有啲雜亂無章？想再增持1810同700，亦想加入823、981同2382，但未知合理價位同時好似業務有重疊。多謝老師嘅時間

龔成老師︰

你組合唔算好亂，整體上都有質素，係合你長線持有。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業，不宜持有太多。建議你沽少少，換至其他優質股。

中芯國際（0981）、舜宇光學科技（2382）、騰訊（0700）現價算係合理區頂部，小米(1810)則是合理區頂至略貴，領展(0823)算合理區中上部。

這些股票，若你無貨，而價可以首注。但有貨者，建議再等佢有明顯回調，才出手。

小米(1810)、舜宇光學科技（2382）和中芯國際（0981），行業性質上有重疊，加埋不要高於組合3成。

另外，你持股和目標股票，不少都係潛力股，佢雖然有增長潛力，同時風險都較高，不宜持有過多。

以你34歲計，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

現時大市在合理區，你50萬現金，可以用多10-20萬，以分注形式入市。餘下現金，我地就等大跌市機會，才出手掃平貨。

------------------------------------------------

Q21694：

龔成老師你好，我最近經常睇你fb專頁同書本，裡面學到唔少，宜家想付諸實行！

我宜家22.5歲，工作左兩年半，現時人工26k，每年大概會加1.5k，開支方面: 每月家用10k, 儲蓄保險每月供款2.5k （為期五年，已供了兩年）,

還有每月日常消費大概3k，剩下用作儲蓄/投資，我目標係二十五歲時有一個穩建成長及帶來現金流的投資組合，

而帶來嘅現金流則可用作再投資、儲蓄或支付日常開支, 例如每月交通費。

我本身對股票幾有興趣，炒左股一年半，雖然會自己研究下圖表、聽下財經節目，但係暫時都係輸錢，加上工作關係唔可以經常睇實個市，而且有時心理壓力都大，

因為有時啲股票好波動，可能幾日已經輸一兩成，所以我想改變下我現有嘅投資方法，以下係我嘅方案：

1. 自行睇位分注吸納科技ETF 3067, 剛在16.5入了第一注，每跌10%加注

2. 月供股票，每月供款金額約$10000
從以下每個板塊挑選一至兩隻月供，每隻供款金額約$1000-2000

- 穩定增長+收息為主 （第二個水桶）
消費板塊：1044 上月已開始供, 想加914可以嗎？
內房板塊 ： 813 or 2007 （二選一）
金融板塊：需要包含嗎？如需要，心儀2628 or 659

- 高增長 （第一個水桶）
生物醫藥板塊 ：1833 + (醫藥ETF?)
可再生能源、環保板塊: 未有特別心水（916？6865？ 586？可以嗎？）
物管板塊: 823 or 3319 or 1821 (三選一至二）
科技板塊：981，1810，2382，9988，9618 （五選二至三）

每隻股嘅供款金額應該會一樣（e.g大概每隻$1000）但係有些板塊會供多於一隻（例如科技、消費、醫療，因為我較睇好這些板塊或者裡頭潛力股較多）

所以7個板塊投資嘅金額唔會係平均14%（100÷7），反而有啲佔比會重啲，有啲則輕啲

想問這個投資方案可以嗎？

還有我現持有以下股票，打算將部分分批賣掉，套現出來的現金打算儲下來留在跌市時分注吸納或用在月供

6186 2000股 買入價 24
2318 1000股 買入價 50
6865 1000股 買入價 34.5
285 500股 買入價 43.85
7226 1000股 買入價 9.96

189 2000股 買入價 7.5
6601 1500股 買入價 9.2
6049 200股 買入價 69
6110 1000股 買入價 12.6

2333 500股 買入價 23
3319 250股 買入價 35.2
9888 50股 買入價210

想請教下你，謝謝

龔成老師︰

你過去的投資方法和理念，都唔係咁正確。

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。因此，我地唔會係用睇圖表，這類技術分析方法，更加唔需要成日睇住個市。

另外，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時22.5歲去計，是財富增值的黃金時期。

你重點唔係要現金流去再投資，而係直接集中係一些較有增長力股票，去累積一筆財富。

"保險"只係理財中防守部份，買足夠保障就可以，增值可以留比優質資產(如優質股、物業等)去做。買太多，只會拖慢你財富增長力。

現時，你自行睇位分注吸納安碩恒生科技(3067) ，這方法可以。

月供策略上，你可以投資「平穏增長股」和「潛力股」。現時大市只在合理水平，除了月供外，每月都要留有一定資金，等大跌市才掃貨。

選股上，你上述板塊都可以。但內房負債較較高，不宜持有太多。而且一些不確定性較高的股票，都唔建議用來月供。

以下是一些較有質素的月供組合，你可以從中參考。

你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於持股方面，如果有質素，我建議你長線持有。若你想留一些資金，捕捉大跌市機會，可以新資金來做。

怛留意，ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

東岳集團（0189）、滔搏（6110）質素中等，唔建議持有太多。

朝雲集團(6601)不確定較高，不宜持有太多。若現時只佔你組合一小部份，可以持有。

------------------------------------------------

Q21695：

老師，我這次的置業目標，計畫的使用的方法會較為特別，我想和你分享一下。

我即將39歲，月入＄29000, 已婚，有1小孩（即將6歲）。

我有1個物業（屯門兆康苑，已補地價），管理費＄700, 做按揭時是自住的，現時已出租（月租＄10500），按揭利率為H+1.23%, 2019年轉按了，轉按時銀行估價540萬，我借了6成，供款期為30年。此物業我在2010年買入，當時樓價115萬，做7成H按揭，一直收租至2015年結婚後自住。

我太太即將36歲，月入＄36000, 2019年購入屯門新樓御半山自住，樓價666萬，做6成按揭，按揭利率為H+1.23%, 30年供款，管理費＄1900.

現在我打算購置第3個物業作投資（名義上是我外父自住用途）。

我外父和外母現聯名持有1個私樓物業（深井碧堤半島）作自住（已完成供款），並持有1個該屋苑的私家車位（已完成供款）。

他們本身是舊制已退休的公務員，有長俸，外父（即將61歲）的長俸較多，有＄30000, 我跟他們談過我的想法，但要他們將現聯名持有的物業改為獨名持有（外母持有），然後當我看中物業時，我外父便可用首置名義（投資）入市

若他能通過壓測的話便可做到9成按揭（樓價800萬或以下），30年供款，供樓戶口要用他名下的，直至按揭總額還款至低於6成方可改為我名義的戶口供樓，當然，所有相關費用，包括供樓會由我承擔。又假設我外父的長俸過不到壓測，也可加我做擔保人，但便只能做8成揭揭。

這樣，我便能合法地做到我想做的。這個物業會由我打理一切，雖然名義上不是我的，但我太太是獨女，就算當我外父、外母百年歸老後，物業仍會被視為遺產留給我太太。

這第3個的物業（嘉輝花園）我會出租，實行以租養樓。

龔sir, 對於我的計畫，不知你會有何評價。

而我和我太太預計會60歲退休

龔成老師：

方向不是不可，但有幾點要講翻。

第一，你地（我以整個大家庭作單位），將會持有4個物業（連同你外父外母聯名那物業的計），在整個財富配置中，其實出現了集中風險。因為我地投資，其中「平衡」都是好重要的，加上香港物業增長力最高的年代過往，我預期往後10年、20年，將會是平穩增長年代。

因此，如果從財富配置的角度，投資其他項目的回報，以及對整體財富的平衡度，將會是最好的。

第二，當涉及的人物愈多，就愈容易出現問題，始終大家都會有不同意見，每個人都是獨立個體，因此，如果日後有甚麼問題出現，會對你地的關係有所影響。

第三，壓力測試，我都唔能夠講得好清楚，佢是否能過關，你最好問清楚先好進行。

第四，買樓有一個好關鍵因素，就是「供得起」原則，如果樓市及租金下跌，你地的防守力如何，如果有一段時期租不出，你地的資金是否頂得住？

至於大方向，其實可以，但你地要明白上述的風險，大家都有共識後，先可以進行。

至於嘉輝花園，可以的，有質素。

------------------------------------------------

Q21696：

老師。其實968呢隻股似唔似資源股，價格比市場影響。因為記得上堂老師不太建議投資呢啲股。

龔成老師：

有少少影響，因此在價格自主能力方面，未能去到好強。不過，我地要睇翻佢本身有無技術，如果擁有技術的話，其實佢能否以較低成本生產到產品。

同時，能生產到較高質的產品，這就會產生了產品價格的差異性，反映企業有質素。就能跳出課堂所課，無法加價的問題。

因此，你在分析時，要小心分析佢的技術，是否行得較前，以及往後的技術發展如何，這是決定企業有無質素的關鍵位。

------------------------------------------------

Q21697：

老師，多謝你回覆。其實我由細接觸好多活動都揾唔到自己真正興趣，直到大學期間睇左富爸爸本書改寫左我人生同觀念，就瘋狂睇其他理財投資書，開始決定長遠目標和寫成功日記，我可以樂此不疲連續睇書，就諗呢個係未我興趣但又害怕(當時中係由窮人思維變緊富人思維中)。

直到網上遇到你，你完完全全教我地點樣實行，開始接觸股票，睇你著作，呢個時侯我已經好肯定咁揾到自己興趣(想成為專業投資家)同人生價值，生活習慣，思維幾年內睇到自己變化好大，亦同身邊人分享理財重要性同推薦你網站。

見到佢地有改變 自己好滿足同開心。我想激動分享既係你地好偉大！啟蒙左我，來來回回咁多年我終於揾到自己目標，好開心！

我亦知自己揾唔到全職一時既低落，調整心態，唔會花時間諗(曬時間)，自己能力范圍亦會幫助其他人，相信你同其他作家都希望會見到呢個乘的效應！好啦！

知道阿SIR貴人時忙，我知我多野講，但太激動所以想同你分享，感謝你同其他作家，感恩遇到你地！

龔成老師：

其實你自己都好明白方向，只是一些短期問題。

你知唔知，決定一個人是否成功，不是睇佢順境，是睇佢逆境，如果一個人要對逆境，都能夠保持正確方向行，做出一些對自己長遠利好的決定，這類人成功，只是遲早的問題。

加油啦！

------------------------------------------------

Q21698：

呀sir 我現家重整左股票組合

9988@242 2手
285@47 3手
1810@26 5手
1211@178 1手

我草緊錢準備跌市加倉，但如果到時資金有限，我加倉次序應該點排好，比亞迪其實好想加先，因為得一手，唔該晒呀sir幫我解答

龔成老師：

你所持有的，都是有質素的股票，可以長線投資，無問題，最緊要唔好太著重短期股價上落。

另外，你出現了集中風險情況，同一系的公司，不能太多。

同埋，你整個組合都是潛力股，你應該加入平穩增長股，去平衡整個組合。

所以，你加倉時，應該加入其他。如果想加入上述的股，要跌更明顯下跌才出手。

------------------------------------------------

Q21699：

你好龔SIR，小弟剛睇完《股票勝經》，而家睇緊《50優質潛力股》，暫時只買了幾隻你比較常推薦的潛力股(2800, 0823, 0012, 1928, 3319, 3918)每隻目前都係入唔1-2手

部份都有輕微升幅，部份好似因為之前美國提及是否加息而出現跌市，所以有下跌，想請教一下點解只係討論美國加息與否，都會對股市咁大影響，小弟只了解過對樓宇按揭利息有影響，如果美國真係加息，是否會做成大跌市？

另外想問一隻股票，虎都(2399)早前見阿里巴巴同虎都旗下公司合作，這隻股票是否有潛力？但見最近股價一直大跌，這股值得投資嗎？

希望龔SIR可以提供意見，謝謝

龔成老師：

你上述持有的股票，都有質素的。

可能你會見到股價之前升，之後跌翻，但其實唔需要太過理會。

至於投資市場，一向是以一個「預期」的模式運作，即是說，不是發生了才反映，而是預期之後點發生。

美國加息，理論上會對樓價有影響，會下跌，因為供樓的成本增加左，但要睇到時加多少，如果加幅不大，根本無乜特別影響。

加上香港樓的供應不足，需求大，因此樓價下跌根本有限。

至於虎都（2399），擔心佢炒作多過實際，唔好比一D表面因素影響，要睇企業的實際發展。暫時唔太建議投資，風險高。

------------------------------------------------

Q21700：

龔sir, 你好，想請教一下我有2百萬想放入股市買入一些收息股來做被動收入，請問有什麼股票現在可買入/介紹？

而我會分開十期，每月買入二十萬元股票，這個方法好嗎，還是分開五期，每期四十萬較好？

我現年46歲，打銀行工，有供緊樓。想將這些被動收入補償供樓利息的支出和增值。

下列是而家月供股票

$2000 - 66 （平均價 42.77）
$4000 - 2800 （平均價 26.12）
$2000 - 1928 （平均價 32.59）

我仲想問吓，呢$2,000,000嘅投資應該買入幾多隻股票呢，五隻會唔會太多？我大概希望有 5% - 7% 嘅收入。謝謝

龔成老師：

你46歲，可投資平穩增長股，加收息股，你不用100%投資收息股，因為你這年齡仍有財富增長力。

我會建議你分10期，每次20萬，分12-18個月進行，慢慢分注投資，能將買入價平均，你可以投資5-10隻股票。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時月供的，可以保持，長期進行就得。

要留意，你不能用盡所有現金，要同時留有部分資金，等機會投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17621-Q17640）

Q17621：

1.龔SIR,我是你初階班的學生。上堂學到唔少野,學到有用的估值方法。我想學更多估值方法,去估值不同行業股票,如潛力股, 保險股。可否推介一些有效地教估值的書。謝謝。

2. 優質股票應長期持有, 或在估值高時賣出。我相信龔SIR大部分情況下,即使估值貴,也是不賣的。但可否分享一下你試過估值高而賣出股票的情景和心態, 什麼事令你判斷賣出優質股?(除了2800)

3. 另外,如大市過熱,想放部分優質股.是否先優先放水筒2/3的股票較好?潛力股如1211價值未完全釋放,不應優先放出?還是按估值同資產比例.貴的股就可放?

感謝你的回答

龔成老師：

1）你可以睇有問巴菲特的，當中有部有教估值方法，不過要仔細找。另外，我的進階班都會教。

2）中國人壽（2628）就是其中一個例子，這股我在$6買入，之後在$40賣出的。

因為當時我的估值，佢大約是$15-$25，所以我在股價比股價低時買入，在股價比估值高時賣出。保險股其中一個特點，就是當投資市況狂熱時，好易炒高左。

這是由於佢持有一些金融資產，佢會將收來的保費投資，當股市上升時，佢當中資產價值會上，但這個所謂的資產價值，只是由於短期股市向上，並不是業務的長期向上，所以，當時市場比佢好高的估值，但我認為佢總會回到合理價值，因此，當時在股市狂熱期，配置貴的時候，賣出這股。

你會見到我運用了第四堂所教的指標，將「賣出時機」指標，配合了「貴」的估值，作出賣出動作。

其實，佢回落翻，加上賺錢能力比過往略有減少，因此我無再買入。

3）其實要睇你自己的配置，如果你配置想持有較多水桶1，就唔好賣水桶1。

另外，要睇翻大市是熱炒那一類，例如近期，新經濟股有少少熱，但舊經濟股反而一點都唔貴。如果要優先賣出就會選新經濟。

------------------------------------------------

Q17622：

我想問北京控股392，見佢 股價不停下跌，但係睇佢嘅財務報表又唔係咁差，請問原因係乜？仲有冇長線投資價值？

龔成老師：

第一，盈利有所下跌，你睇翻佢中期業績都。第二，市場預期佢之後會更差，所以估值下跌，第三，融資成本高左，佢的利息盈利率跌左，去到近5倍的水平，反映利息支出情況有少少對佢不利。

質素不是無的，但唔算強，同時有少少轉弱，現價合理的。投資值博率就中等。

------------------------------------------------

Q17623：

你好,成哥,請問,我點樣憑"損益表, 資產負債表,負債總額, 股東應佔權益"黎分析E個企業現在價值,或合理平貴位置?

龔成老師：

要好長好長時間，先解釋到，這是一本書的內容。《年報勝經》正正是講這些。

你大約可以理解，損益表是記錄企業的生意情況，而資產負債表是記資產與財務情況。

當我地了解左一個企業現時的「情況」後，就可進行企業估值，主要考慮企業的「業務價值」、「資產價值」。

坦白講，要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，要考慮企業的生意、盈利、現金流等財務數據，同時要比較行業，考慮這企業的經營情況，之後的環境又會如何。這都是計算的基礎。

但如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q17624：

老師，我係你舊生，嘗試分析另一隻股票
3306江南布衣。

基本數據是不俗，負債/ROE/來自主要生意的收入等都不錯，毛利率高於同行，數字上表現不差，於是連同年報一併分析。

近期股價受挫，因疫情令它要暫停部分店鋪，而造成盈警，但只是中短期影響。

根據年報資料:自己亦有投資發展，購買了不少不動產廠房，公司是有長凌發展目標。而且它的網上銷售有上昇趨勢(三年收入增加一倍)，長遠是一個正面信息。它的目標顧客以內地為主，相對不太受貿易制裁所影響。

護城河方面，它有一定品牌知名度及活躍會員三年間也增加了一倍，而會員貢獻零售占比在2019年多達70%。有見及此，雖然是易被取代的製衣業，但設計的品味及忠誠卻難以被複製。

當然未來會員增長未必會有這麼快，pe不能太進取。基於以上情形，3306的pe有點難推算，因為它設計為主的獨特性市場上沒有大公司是比較接近。

與李寧/安踏及申洲有一定分別(李寧/安踏的時裝收入佔比不大，申洲以製衣為主，設計較少)，而安踏李寧及申洲的pe都有20以上。

睇返3306的過往表現，及會有一定發展空間，但中期都不會像李寧這樣能發展至國際品牌。所以我認為pe有10-15，每股盈利$1港圓，加上10%buffer，所以價格為9-13.5。老師點睇，謝謝

龔成老師：

你的分析不差，不過估值要保守翻D，主要原因是賺錢能力唔算強。

江南布衣（3306）係一家位於中國的設計師品牌時尚集團，從事設計、推廣及銷售女士、男士、兒童及青少年時尚服裝、鞋類及配飾。

產品定位於中高層收入客戶，佢將所有產品生產外包予國內的供應商，分為成品供應商，即負責加工該等自行購買的原材料及面料，及加工供應商，負責加工集團所提供的原材料及面料。

過往的增長力不差，但業務開始有增長力減弱的情況，投資價值只是中等，加上中國經濟轉弱，唔算特別吸引，但不是無質素的，現價合理區中下部，暫時睇是平穩增長類。

------------------------------------------------

Q17625：

成哥，最近睇緊你本5年置業本書睇到按揭果度有少少野想請教下你。

目標30歲前儲到100萬，家人支助30萬，買4M樓投資用，每月供大約1萬2。現時人工22K，穩定。

因為計過人工如果冇升到3萬5一個月，咁樣就過唔到壓力測試。假使人工不變，我諗左兩個方案

1) 搵女朋友做擔保人
 可以借盡9成，有多D閒錢作投資。
2) 借按保8成
 首期要畀80萬+按保費約7萬到。

龔成老師：

如果從穩健度來說，（2）是較好，如果你用（1）的方法反映你每月供款方面較緊，而投資物業的重要原則，就是「供得起」，因此，（2）對你來說，始終是較穩健的。

------------------------------------------------

Q17626：

想請教一下 如果收息股 2777 3393 405 435 778 邊隻好？

2777 3393 相對高息 派息又穩定 唯獨股價唔穩定

龔成老師：

富力地產（2777）的優點是超高息，但缺點是業務本質，始終內房業務較為波動，這會令股價較波動，加上本身負債較高，有風險，因此，這股不是不能收息，但只能是收息組合「其中一員」，不能過多。

威勝控股（3393）質素一般，擔心出現賺息蝕價。

至於其餘3股，都是理想的收息股，無問題。

不過，上述大部分都是同地產有關的企業，這會出現行業集中風險，你要注意翻。

------------------------------------------------

Q17627：

成哥，我想問下有200萬/500萬/1000萬流動資產有乜嘢分別？

龔成老師：

首先要處理左自己的需要，例如住屋、生活、備用、負擔，同時考慮自己風險等，每個人要留的現金都不用。

另外，就是因應自己的年齡與風險，去進行配置，在比例上，配置分別唔大，但「能買到的工具」，就會不同，例如物業及一些入場費較大的工具，就要較大金額先較易配置。

------------------------------------------------

Q17628：

老師你好，看了你的文章決定想月供股盈富，我月薪22k，但我目前想每月供$2000先嘗試一下，請問這樣有問題嗎？

因為我的銀行要收50元手續費，這樣會不會很蝕？ 月供股有沒有最底的入場費會比較好一點？

（只想供一隻）另外想看你的股票入門學習書本，可否推薦，謝謝。

老師我忘了說，我每月有$8000元的可用閒錢。

龔成老師：

如果可以的話，建議你每月供多少少，$4000較好，或是找一間手續費較平的銀行或證券行進行，否則你手續費佔比太多，唔值得。

你可以這刻儲多少少現金先，之後先開始進行，每月供盈富（2800）$4000。

如果你有選股能力，有心水股，就可以月供盈富$2000，另外再加2隻股（每隻$1000）。

你可以睇《股票勝經》。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17629：

龔成老師你好，我是你的讀者。我緊排睇緊你財務自由行的書，學到好多嘢。

本人三十五歲，之前冇儲蓄，試過投資外匯，被偏下八十萬，今年頭先還完所有財務。我月入大嘅四萬，扣除家人支岀我還有$13000左右。

我想將來有被動收入財務自由，聽朋友介紹，我月供$4000（0005）依家有二手，另外每月買入一手（3899）二手，有三手小米，我睇完你平時寫盈富基金係好選擇，如果我想月供應該點分配，我另外對中銀香港有興趣，我是不是可以一齊月供。

我想做到你所說財務自由，不受「系統」控制，雖然我好遲有這個想法，但希望老師可以幫幫我，多謝。

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你35歲，其實唔需要太保守，我見你好多收息類或增長類的股，這並不是好事

匯豐（0005）唔太建議月供，對你來說，小部分持有已得，這股增長力有限

中集安瑞科（3899）唔值得每月入一手。

中銀香港（2388），你都可以分注投資，但你唔應該過份集中在銀行股。

你可以考慮盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。（如果你本身較保守，就唔好投資這幾隻）。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17630：

請問現在00019太古股份公司應該是入市好時機嗎？
因為太古按每年都有百分之十的增長

龔成老師：

太古股份公司Ａ（0019）的質素只是一般，佢業務裡包左國泰（0293）而這部分較弱。

整體上，0019增長力唔強，投資價值中等。

反而你考慮太古地產（1972），長遠增長力更好，中短期會較弱，但長遠無問題的。

------------------------------------------------

Q17631：

早晨龔Sir ，第一次上來請教。我想買匯豐股，宜家可以嗎?

但好多人對匯豐前景唔睇好，我猶豫不决，請指教，謝謝。

龔成老師：

匯豐（0005）並不是零質素，不過，賺錢能力、增長力，的確比過往年代弱左，所以估值都有所調低。

你要明白佢只是收息股，股價增長有限，你買入就是收息。現價是合理的，可以投資，但由於質素等問題，唔建議持有太多。

------------------------------------------------

Q17632：

龔Sir，想請教你點睇1157及3339？

龔成老師：

中聯重科（1157）主要從事研究、開發、生產與銷售工程機械、環衛機械和農業機械，提供環境解決方案，以及融資租賃服務。

企業早幾年的生意不太好，有持續下跌的情況，盈利亦比較波動，到近一年才好轉，而股價都升翻唔少。

這股現時估值算合理，但不算平宜，投資值博率只屬中等，如你想入，分注投資都可以的。

中國龍工（3339）主要業務為製造及分銷輪式裝載機、壓路機、挖掘機、起重叉車及其他基建機器。佢的產品有出口至俄羅斯、中東、澳大利亞及非洲等地。

雖然近一年生意不差，但以過去5年計，生意與盈利都有波動情況，這點不得不注意。而企業的賺錢能力算是中等。

以企業的質素來計只屬中等，現時不貴，股息率都算吸引，但業務波動是風險，因此投資不能大注。但長線基本上可以的。

------------------------------------------------

Q17633：

你好龔老師，本人40歲，經過多年投資儲蓄，終於儲蓄到有一百萬現金，希望可以得到指點一下未來投資策略，現在沒有任何股票持有，月入26,000。

龔成老師：

如果你無特別的資金需要，可以用這些資金來投資，股票是其中一個主力。

你可以動用$50萬（要分注慢慢用），餘下$50萬就等機會。

以你的年齡，平穩增長股是較合適的。你可以考慮盈富（2800）、南方Ａ５０（2822）、VOO作為重心。

另外再加一些個股，如銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。（以你的年齡，這部分唔應多過平穩增長類股）。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17634：

你好龔Sir, 看完了股票勝經之後，現實行重整手上持有多年的股票，有些沒有質素的已經賣了，但其中3隻不知如何處理，請指教。

1. 中國重汽
2. 第一視頻
3. 中遠海發（之前想賣嘅時候見佢開始派番息，而且都不錯，但股價一直跌）

龔成老師：

決定繼續持有一隻股票與否，最重要是睇「質素」，買入價不是重點。

中國重汽（3808）有質素的，本身企業的定位清晰，持有無問題。

第一視頻（0082）無乜質素，賣出較好。

中遠海發（2866）質素中等，貿易類股票的賺錢能力，比過往減弱，這類股唔建議持有太多。可以等經濟好翻D，這類貿易相關股都會上翻，到時先賣出到得。

------------------------------------------------

Q17635：

老師，我喜歡寧靜的環境，昨天去深井睇樓，過去3年跑輸大市，大市升了十幾%，深井反而跌了5-10%，請問你點

希望可以買些小單位自住，跟大市同步升值；你本書介紹九龍東，我也有興趣，但真的太密集+樓齡40年

錯過了凱匯，又可能買唔起

龔成老師：

深井在環境、景觀上都不差，如果你喜歡，這都可以考慮。當然，這是從「自住角度」去分析。

佢跑輸大市，是「市場角度」，因為市場認為佢的價值，並不及其他的地區，自然會出現跑輸這情況。佢最大的問題就是「地點」，始終在交通上較煩，相信在可見將來，情況都是這樣。

香港人較忙碌，地點的因素會影響好大，無論是時間、方便、交通費上，因此，從投資角度，這區並不是很理想，但如果你想自住，你自己喜歡就最重要。

九龍東當然更有投資價值，但可能你在自住方面就較一般。

所以，你要考慮自住的因素較大，還是投資因素較大。

------------------------------------------------

Q17636：

老師，你好，看了你的《選股勝經》如獲至寶，不衹是教人選股，而且通過各行各業的分析，國家發展等。

把他推薦給剛畢業的大學，一來通過該書可以見到各行各業的發展前景，幫助自己擇業，二來可以在畢業生見工前，如果想進入書中介紹的公司

自己對該公司進行了比較準確的瞭解，對見工成功，我想也會大有幫助。

推薦給DSE考生也助於選擇大學專業。
真是太好了。

有時間我一定去上你的堂。

龔成老師：

《選股勝經》較多在大環境與行業面的方面。

你要保持進步，我相信知識對我地好重要，而財富與知識成正比。大家加油！

遲D課堂見！

------------------------------------------------

Q17637：

龔成，會唔會做有關6969 既初步分析睇法？

龔成老師：

思摩爾國際（6969）係霧化科技解決方案提供商，主要經營以下兩項業務。

第一，佢以ＯＤＭ模式為全球煙草公司及獨立電子霧化公司（如日本煙草、英美煙草、Ｒｅｙｎｏｌｄｓ
　　Ａｓｉａ－Ｐａｃｉｆｉｃ、ＲＥＬＸ及ＮＪＯＹ）研究、設計及製造封閉式電子霧化設備及電子霧化組件。

第二，佢做研究、設計、製造及銷售自家品牌（包括「Ｖａｐｏｒｅｓｓｏ」、「Ｒｅｎｏｖａ」及「Ｒｅｖｅｎａｎｔ　Ｖａｐｅ」）開放式電子霧化設備或ＡＰＶ（高級進階私人電子煙設備）。

基本上業務是正面的，有當中的獨特性，以及長遠有增長力。不過，股價升了不少，現價唔算平，如投資真的小注好了，而這股有長線投資價值的。

------------------------------------------------

Q17638：

龔Sir你好！有關月供股既配搭想問吓龔sir你意見：我爸爸月入3萬；媽咪全職主婦，爸爸仲有7年退休，係月光族，得幾萬元積蓄。

我想每個月用大約6，7千蚊幫佢地月供股儲錢，等佢地第時退休每個月都最少有五千蚊生活費。

月供股方面例如月供盈富可以嗎？抑或揀一兩隻收息股做月供？

例如希慎/香港電訊/港燈？
麻煩晒，唔該你

龔成老師：

以佢地的年齡，可以供盈富（2800）$3000，然後有$4000就月供一些收息，這是較平衡的做法。你可以利用7年時間，保持月供就得。

例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。你在這裡選股就得。

------------------------------------------------

Q17639：

龔老師,我想問下我而家啱啱拎左政府嗰1萬,自己又無現金積蓄

其實可唔可以試下投資,或者適合D咩投資呢?
我今年26既...唔該晒老師先

想大約兩年左右有35-40萬左右儲蓄去外國進修...唔知道可唔可行?

唔記得加返月入...而家月入係19000左右,儲錢習慣比較差可以等於無咁樣...唔好意思成日都加D加D咁樣...

龔成老師：

政府的$1萬，其實作用有限，反而你留做備用現金仲好。

如果你想完成見標，就要好好運用你的收入，你26歲，是財富增值的黃金時期，要好好把握，盡你一切的力量去儲蓄、投資、學投資知識。

如果可以的話，我會建議你每月儲$10000，其中$5000月供股票，$5000儲現金。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$5000
。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17640：

老師，我之前報讀了股票班，現在已經賺了學費的接近10倍。再此先謝謝老師。當本人真正賺到100萬時，定必會再次認真多謝老師。希望這個日子很就會來到。

龔成老師：

太好了！

理財是長期過程，要保持進步，保持理財與投資，同時要平常心，加油！

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13141-Q13160）

Q13141：

你好，我是股票班學生，有問題想問下老師：

1. 如果財務支出(即是借貸利息)相對於除税前盈利或純利比較大，你說企業會經不起波浪，那麼你會用什麼財務比率去評估這風險？這個比率要低於多少才安全？

2. 為何你愛用總負債和股東權益比率作評估債務風險？它只表示公司的資產的欠款和股東資金比例而已，反而總負債和總資產比率反映風險，不是嗎？

3. 變動成本只是貨品的成本？固定成本是租金，人工，廣告費？

龔成老師：

1）我地會考慮一個叫「利息盈利率」或「利息覆蓋率」，這是考慮到，這企業在融資成本方面，會否過高，對比盈利的情況如何。股票班都會講述公式，你預5倍以上，就安全水平。

2）其實，總負債對股東股益，以及總負債對總資產，都是負債比率，只要我地有其中一個，就可以推算到另一個，這只是一個數學問題，因此用那一個都無所謂。

簡單來說，只要你明白各自的指標就得。

3）一般來說，變動成本是指，當銷售增加時，支出會用時增加的項目。而固定成本，則是指無論銷售多成少，該成本都是固定的，不過，每一行的定義都會有所不同，一般來說，你上述的理解正確。

------------------------------------------------

Q13142：

老師，我想問金沙中國，此企業自2015年開始沒有增加過派息，想問它還算唔算好的收息股？謝謝

龔成老師：

這是由於2015年前的中國旅客消費力好勁，而到了2016年，中國經濟轉弱，人民幣弱，影響了金沙（1928）的賺錢能力。

雖然金沙長遠仍能平穩發展，但未必如2015年之前般好易賺錢，因此，佢長遠仍是不錯的優質股，但就未必去到2015年度般情況。

暫時睇，佢股價只會平穩，不會有太大增長，但始終有平穩發展能力，長遠股價都能穩步增長。視為收息股與平穩增長股可以的。

------------------------------------------------

Q13143：

Hi龔sir,上完您堂，我覺得很有用，上堂前偷步入左27, 1177, 12, 賬面已經賺番個課程費用！

有左基本知識對之後入市可以更加有信心。
多謝您。

我想搭單問多條問題，點解宏利我唔太適合用市盈率推算出大概合理值呢？謝謝

龔成老師：

其實，【投資倍升股課程】是基礎班，你學到了大部分的股票知識，不過企業估值是比較深的一部分，雖然我用了近2堂去教，但都只是一些入門的概念。

在正式的企業估值上，不同企業可以同不同的估值方法，有時亦會配合去計算分析，我相信之後的股票進階班，會更詳細講述。

宏利（0945）是保險股，當中的盈利會包括了投資收益的部分，而這部分是十分波動，同時我地在分析時，都不能預測這部分的盈利會穩定，所以，利用盈利去計算，就要有所調整，同時，過往的市盈率亦會有這問題，令數據的代表性減。

因此，我地會自行調整一下數據，又或以其他估值方法去計算。

------------------------------------------------

Q13144：

龔成老師你好，本人現在34歲，現月入80K，但計劃年尾會辭工全職照顧初生小朋友，另一半年紀相約，做生意每月收入唔穩定，年收入浮動600K-1.2M上下。

每月家庭支出方面，供樓+保險+基金+家用40K，洗費20K以下，本身餘下全儲，但小朋友剛出世預計支出會陸續增加。

現持有資產:
物業1層(仲要供25年)
現金1.5M, 其中100K人民幣
基金200K
黃金10g
另股票如下

1918 4000
1928 1600
2007 4000
2388 2500
全部現價低於買入價

本人預計2年後會重反職場回復現金流，長遠要預留小朋友教育基金同退休基金。請問呢兩年要點部署資產同投資呢? 現在仲適宜開始月供股票嗎?
感謝你!

龔成老師：

雖然你有兩年無現金流，但你本身都有一定的資金，除非另一半的生意出問題，否則，你都可以動用部分現金，去作出投資，始終你這刻的股票部分不多。

你可以每月供$2萬，就算考慮你會有小朋友，令支出增加，但就算動用原有現金去做月供都可以，這2年內，合共都只是動用$48萬，你餘下的現金仍是足夠的。

你可以月供平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388），你可在從中選股。

當然，如果中途你的收入明顯減少，又或支出真的太大，就可能要停月供。

------------------------------------------------

Q13145：

hello 龔成老師，日日睇你個page去激勵自己「相信自己，用行動改變命運」，多謝發放正能量！想問三隻股票：

1475日清食品， 我$4.41買，想問買入價係貴，平，定合理？見佢升幅都好唔錯，品牌價值強，大陸感覺亦有好大市場空間發展，所以想加注，你認為可以嗎？請問合理價和便宜價是多少？

1810小米，平均價$8.86買入，都想加注，你認為現價如何？合理和便宜價是多少？

3918金界控股，我看了龔成老師對這股的分析，亦覺得潛力不錯，幾個月前開始關注，但因為不懂分析股價平貴而遲遲未買入，錯失更便宜入市機會，請問這股現價貴嗎？ 便宜和合理價是多少？ 高增長期已過嗎？

謝謝解答！

龔成老師：

日清食品（1475）有質素的，增長力不差，前景正面，現時可以話處略貴水平。而你的買入價，合理，你可以持有，這股有長線投資的價值。

至於小米（1810），其實這股業務不差的，只是以貴的價上市，令股價持續下跌，現時已在合理水平。

小米這刻的盈利未算明顯，財務數據仍未算很理想，整體質素屬中等。不過，企業的產品的確有理想增長，而且受消費者歡迎，加上小米的商業模式、前景，都成為這企業的亮點。

現價合理，如果注碼不大，可以投資這股，長線持有，這股長線有前景的。但就不建議投資得太多。

金界控股（3918），有質素的，現價在合理區中上部，小注分注投資無問題，這股的風險度，會比澳門賭業股，略高。

------------------------------------------------

Q13146：

老師, 我有個疑問：月供美股會唔會穩陣過月供港股呢？

例如自行月供尖牙股(faang) 雖然可能入場費較高, 但美股相對起港股較難操控

而且都是世界級知名公司, 所以自行月供美股會比月供港股更穩陣而且回報更好嗎？

龔成老師：

一些市值細的股票，的確有股價操控的可能性，但如果市值大，就不用擔心。另外，我地買股票就是買企業，只要企業有質素，無論美股港股都可投資。

如果你對美股有興趣，能分析當中的企業質素，了解其財務數據，推算到是優質股，你都可以投資的。

我相信美股港股都有優質股，只是美股我無港股咁認識，所以我一般會推港股較多。

------------------------------------------------

Q13147：

Hello,sir 想請教一下如果1038及00006，呢2隻邊隻買黎收息會比較好？另外10月英國脫歐，你認為會有影響嗎？現時52-53價位買入可以嗎？直揸的

或者阿sir有無好推介高息又底風險既股票呀？

龔成老師︰

電能實業(0006)是優質股，你見之前長和系近期有很多動作，電能派特別息，長建(1038)會收到好多現金，變相將現金轉到長建。電能往後的定位，會更為平穩，增長較為有限，但仍有相當的優質程度，適合對股價追求不多，只求股價平穩增長，較穩定派息人士。

長建（1038）是香港具規模及多元化的上市基建公司，並在國際基建業穩據重要地位。

核心業務包括：能源基建、交通基建、水處理基建、廢物管理及基建有關業務。長建的營運範圍遍及香港、中國內地、歐洲、澳洲、新西蘭及加拿大。

雖然近年的股價不太好，但其實佢仍不斷進行投資，此股有潛在增長力。

長建有英國業務，脫歐因素難免對其造成影響，但由於長建同時間有其他國家的資產，故影響不算太大。現價在合理區較底部，如果無貨可以買入，在$50以下入貨會更好。

2隻計，長建比較有增長潛力，而收息就選擇電能。

至於收息股，你也可以選擇如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435），大多有5%、6%的股息率，而且企業都是有質素。

------------------------------------------------

Q13148：

老師，我想問問，我現時30歲，月薪$14000,手上現金$70000左右，做緊月供$1000 媒氣，$2000港鐵，好唔好再加多$2000供盈富基金呢？

想去外國再進修，但學費唔係好夠
感謝

龔成老師︰

你現在月供煤氣（0003）、港鐵（0066）都是有質素，如果你可以加入盈富基金（2800）會更好。因為盈富（2800）是包括50間質素不錯上市公司股票的組合，可以令你投資組合更平衡。

另外，如果需要短期內（少於3年）動用那7萬的資金，來進行你進修計劃，那筆錢就不宜用作股票投資，最多做定期好了。

但如果是閒錢，又或者你外國進修計會在數年後才開始，那你可以將這筆資金買入優質股去增值。那現時市況大致在合理區，你可以先行將一半買入盈富基金（2800）。餘下一半，在大跌市時再入貨。

------------------------------------------------

Q13149：

龔老師你好，我不是你的學生，但一直有追看你的Facebook, 我知道股票是可以賺錢的，而且老師是教大家長線投資而不是炒股的，但心裏有一疑問。

股票在未來十年還可信嗎？還是會被其他投資功具取代。

另外香港在失去中國的支持下，香港公司的營利還會增長嗎？謝謝老師賜教

龔成老師︰

過去數10年間，股市經歷不少大風浪，但股票這投資工具至今依然存在，我相信未來股票依然係投資主流工具。

你要明白買股票，背後是等同投資一間企業，優質企業會慢慢升值，令你財富增加。因此我會將股票視為一種"資產"，而其他投資工具如債券，都只是「產品」，從財富本質上，我地應較集中持有「資產」，才對我地最有利（你可以睇睇《財務自由行》一書。

至於一間公司盈利能否維持增長，要考慮很多因素，例如未來行業發展、企業自身優勢、財務狀況等，不能用單一原因去一概而論。就好似港燈（2638）主要收入來自港島區和南丫島電力收費，失去內地支持，根本唔會影響倒佢的收益。

我地要睇番企業業務本質，在失去中國市場支持下，會唔對佢長遠前景和核心因素造成影響，這才是重點。

------------------------------------------------

Q13150：

老師，想了解一下 友邦保險（1299）是一隻優質股，但現時股價會否偏高? 因為業績增長似乎會有放緩的趨勢?

另外思考樂教育（1769） 這支半新股具有潛力嗎?但因是新股風險似乎偏大，不過應該仍有不少升值潛力?

靜候老師回覆，感謝

龔成老師︰

友邦保險（1299）不差的，企業有一定的質素，有品牌、有規模，生意雖然做到較大，但仍有增長力，不過就不是高增長，只是平穩增長。

不過盈利就有少少波動，但這都正常，因為保險公司有投資相關收益，所以這亦會令股價略為波動。這股有長線投資價值，但現價就處合理區較上部，分注較好。

思考樂教育（1769）上市不到半年，集團主要透過結構性合約於中國提供課後教育服務，包括以「升學」品牌提供學業備考課程，及以「樂學」品牌提供初階小學素質教育課程。

業務上，不是沒有吸引力。不過，我一向都新股半新股都無興趣，因為真實面要慢慢先見到，而且估值很困難，只建議小注，同時你要明白當中的風險。

------------------------------------------------

Q13151：

龔成老師，你好。本人今年28歲，現時月薪28000元，每月可儲蓄15000元,預計每年月薪增加2000元。早前已賣出所有持有的股票，目前只有七十五萬港元現金，長期目標是35歲或以前令資產增值到三百萬。

1）本人有打算等待大跌市出現時再重新買入優質股長期持有，現在主要留意中銀香港（2388），恆生銀行（0011）和友邦（1299）。想請教老師選擇哪一隻比較好？

2）另外想請教老師，接目前的資金狀況，該如何分配投資，以更有效率地達成本人於上文提及的長期目標。

謝謝老師。

龔成老師︰

現時隔離35歲尚有7年，以恆指每年平均回報10%計，你月供$15,000（之後每年加薪，都用作加大月供供款。）和現有資金75萬，在35歲時增值到三百萬是有機會的。

1） 其實，我地不是要「估後市」，而是做「策略」。現時股市在合理區，我地無人知跟住個市會升會跌，會否進一步下跌至平宜區，我地唔會知。但我地可以測量現時市況的狀態，從而作出合適對策。

恆指26000大約10.5倍市盈率，仍未算平宜。這時候，我地的財富組合中，應該持有一些股票資產，同時持有現金，若你沒有股票資產，財富不會增值，若股市上升，你都不能受惠，所以，持有部分股票，部分現金，才是適當策略。

你所選的3隻都是有質素股票，但我地係安排投資組合時，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

中銀香港（2388）和恆生銀行（0011）同是銀行股，你要避免過度集中在銀行業。另外，以你年紀計，應集中在較有增長力股票，所以3者選一，我會推薦中銀香港（2388）。

2） 我建議除了考慮你所選的3隻股票外，可以透過月供股票去建立一個投資組合。你可以選擇月供平穏增長股︰盈富（2800）、銀娛（0027）、恆基（0012）、港鐵（0066）、煤氣（0003）或潛力股︰比亞迪（1211），中生（1177）或福壽園（1448）等。

至於你現有75萬可以分一半，其中一半可以在現時用分注形式入市以上述優質股。其餘的一半，等待大跌出現，你才大手入貨，會對你整體投資增值會較有利。

------------------------------------------------

Q13152：

龔成老師你好，我27歲月入3萬，有現金約25萬，主要係之前稅季既低息貸款借番黎，雖然冇家庭負擔，但而家每個月都還緊一萬既現金分期。

想問如果我想3年內儲到一百萬有冇機會呢？ 我想集中投資落一至兩隻潛力股，例如比亞迪/中生，另外莎莎最近跌左咁多，係咪可以大注入呢？謝謝解答

龔成老師︰

由於3年只是一個中短期，好難講到時的投資回報有多少，因為投資股票其實就是投資企業，而企業成長需要時間。就算是優質股，中短期都會有股價上落，要長期先可以確保股價向上。

如果你希望3年內增值到100萬，以年回報15%計，要每月最少月供$16,000，再加上你本金25萬能升至約33萬才可以成功。你可以集中投資在潛力股去加大增長力，此舉雖然可以提高你達標機會，但同時間也會加大了回報不確定性風險，你要明白這點。

莎莎（0178）本質不差的，但近期人民幣較弱，加上香港的零售市道有風險，都令這股價股中短期受壓。這企業本身有優質的，有品牌、有規模，在行業有一定的地位，賺錢能力不差。但不建議太注投資。

佢會受經濟及零售市道影響，令股價較為波動，買入後要較長時間才會有收成。由於你增值期不長，這股未必最適合你。

------------------------------------------------

Q13153：

龔成老師，請問700, 什麼價位適合入貨？長線仍是安全的嗎？

龔成老師：

騰訊（0700），這股仍有質素，但有佢增長力減左。

佢已經由過往最高增長年代，減為平穩增長年代，所以這股之後，只會平穩增長。

這股仍可投資，但你只能預佢平穩增長，現價在合理區中上部，只要不太大注，仍可投資的。

------------------------------------------------

Q13154：

為什麼你所說的優質股，如煤氣，港交所，PE會較高？
而你介紹的優質股12恒基地產，市盈率長期處於低水平？5.9PE

龔成老師︰

簡單來說，市盈率是衡量企業平貴的其中一個指標，能助投資者理解到當前股價處於平或貴，以便作出投資決定。

在估算市盈率時，我們會先以大市及行業的市盈率作基礎，以此基礎再作出上下調節，有優勢的、有增長力、行業較好的，就會給予較好的市盈率，從而將範圍調高。相反，企業較弱的，則調低。

但要留意我地估算市盈率時，除了企業本身質素外，還要看行業本身平均值。有些行業會較高（如高科技行業），有些會較低（如內銀股）。將這些因素考量後，才會得出一個合理市盈率估值。

你講的3隻股票都是高質素的優質股，但點解會PE值恆基（0012）會少咁多，主要原因唔係佢的盈利中，包了物業重估的部分，因此令盈利數字谷大左，所以令市盈率細左。

------------------------------------------------

Q13155：

成哥，我朋友見我開始投資，叫我睇下試下美股，仲有更加優質企業，仲可以少少一股股買。你點睇？比較港股，美股有咩風險？

龔成老師︰

美股的確有不少優質企業，就好似巴郡更是長遠投資之選，不過巴菲特年紀大，是風險因素，雖然我認為佢團隊都能用佢的方法投資，令長遠有增長力，但始終巴菲特無人能及。

另外，美股可以一股股買，變相令人感覺入場費用相對較少。但你要注要番我地買入一隻股票，係考慮佢長線盈利能力和前景，而唔係入場費多少。

由於近年美股的升幅不錯，現在市盈率已較高，反映價格而不平宜。

至於投資與否，關鍵位就是你認識的程度，如果你對相關股有認識，可投資，整體來說，處合理區。如果無特別那一隻股好認識，就投資相關基金，你亦可以考慮領航標普五百（3140）。

總括而言，以中國及美國長遠的經濟發展計，兩者都是不錯的，而中國的增長力仍會好少少。

------------------------------------------------

Q13156：

你好，龔Sir
本人姓何36歲 月入50,000左右
太太35歲 月入30,000左右
現金流200萬

住緊一個相連單位 市場總值1300萬
欠銀行400多萬 月供25000左右
現在太太想休息照顧小朋友

做什麼投資基金債券 做到財務自由
月入可以多40,000左右
謝謝

龔成老師︰

債券基金其實只是「產品」，而且此產品本身有不少風險，有機會出現了「賺息蝕價」的情況。從財富本質上，我地應較集中持有「資產」，物業、優質股是「資產」，才對我地最有利（你可以睇睇《財務自由行》一書，我從財富本質上，講述了當中原理）。

如果你想要有每月額外$40,000現金流，以股息率5%計算，你需要960萬資金才可以做到。

由於你現時現金只有200萬，並不足以支持你所需每月現金流，在進行財富增值時，我地會運用「先增值，後現金流」作方法。先投資較有潛力的股票，令財富增值到960萬，才漸漸轉成收息型股票，為自已創造穏定現金流。

現在你要做的是將每月可儲的資金6成進行月供股票，而現有的由於現時市況只在合理水平，我地會利用"一邊月、供一邊儲蓄"的策略。

月供方面，你可以投資在平穏增長股︰盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270），另外再加配一些潛力股︰比亞迪（1211），中生（1177）或福壽園（1448）。

至於你現有的200萬資金，可以將一半用分注形式買入上述優質股，餘下的現金就等機會。當大市出現一定程度的下跌，就可以動用現金去投資，在平宜價加大力度掃貨。然後長線投資。

當你資產增值到接近960萬水平，就可以慢慢換碼至收息股（要5%或以上股息率），就可以為你創造每月$40,000穏定現金流。

------------------------------------------------

Q13157：

老師你好，我今年40歲，單親，家有一個五歲嘅女兒，加個工人。

每月收入六萬，前夫給兩萬，上年買了一層自住物業六百萬，只給了一百二十萬首期，尚欠四百六十萬，尚有18年期。

沒有多餘積蓄
沒有買保險

我有公積金二百四十萬，每年5-10%會報。隨時退休隨時可以攞走。

我是上年才把自己整頓好，阿女未出世之前嘅10年，持續地買賣1398，做波段，每年有10至30%回報，再將儲蓄加股票回報，去買物業，曾經同時擁有兩個物業，期間換過樓來增值，後來家庭問題乜都冇晒。

之後，重新振作，過往兩三年，持續不斷去上堂學習投資，範疇包括物業、股票、外匯程式。回報反而越來越差，比以前做1398差很遠。

現在家庭支出：
供樓：$26000
管理費：$550
電：$2000
水：200
石油氣：$250
工人人工：$4520
女兒學費：$6550
車費：$1650
家庭食用雜費開支$5000-$6000
負債每月支出：$11000（比多四年）

自己就慳住使
但係就好難儲蓄

龔成老師：
想問下現階段可以點樣做？

我現在人生階段覺得冇以前走得咁順，以前一個人，儲蓄買股票買樓，樣樣很順心、順意，支持丈夫敗咗我嘅身家，加埋個女出世，個人就亂亂地，支出預算混亂，消費混亂，計劃混亂，學習後實踐不足，對自己信心下跌。現在買咗樓把家安頓好了，才算是定下來，希望好好在行之後嘅路，希望在投資路上有你指點，多謝你龔成老師

龔成老師︰

當人生出現一些轉變，難免會令人覺得人生越來越混亂，面對日常事時，想法也變得負面。但你能立即重新振作，積極去重新面對自已新生活，並努力學習投資理財技巧，為自己和女兒未來生活打拼。講真，一D都容易，你要知道你自已做得十分出色。

現在你要做的是先整理好思緒，慢慢將面前的問題逐一解決。

我留意到你開支部份，有"負債每月支出：$11000"。我建議你要先處理好這部份，就算不能即時還清這負債，也不要令佢再增加。同時你可以研究，能否將餘額轉至一些較低息的貸款計劃，令你在這筆債務上的利息成本減低。

同時間，你可以睇下有無時間做一些能為自已增加收入的事業，如開網店等，令自已有錢可以進行財富增值。

到你開始有儲蓄能力時，你可以用月供股票方法去投資增值。簡單來說，月供股票就是你每月將現金，買入某一隻或多隻股票，慢慢咁樣儲貨。同時，可以幫你減少左過高價格買入之風險。

你可以選擇平穏增長股如︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）。這些都是有質素的股票，只要你長線持有，自然會幫你財富慢慢增值。

以往見你有做波段、學外匯程式等，這些都是短炒和技術分析層面的方法，都是好錯的投資方法！

可能你短期會做到一些回報，但長線一定會出現問題。正確的投資方法，是應該分析企業的質素，以及企業的價值。所以，以往投資方法不要再用。

如果你想了解多點投資選股的知識，你可以睇《股票勝經》，裡會有教你點樣有系統地選股。另外︳我的股票班，都會講5種選股的方法，教你點樣由2000間上市公司中，選取有質素的股票，相信會適合你。你可以留意下我FB，不時會舉辦課程。

你自己是一個出色，樂觀、又積極的人。給自己一點時間，問題和生活總會變好的，加油!

------------------------------------------------

Q13158：

老師, 您好, 本人41, 月入30k, 剛剛將跌到殘的股票賣掉, 因為跌了超過75% ( 1041, 1009, 8511, 8613, 1239)

眼見應該再持有連一元都拿不回來, 所以決定放了買收息股, 因本人工作繁忙, 沒有時間可觀看, 請問老師, 如果我可調動30k買入收息股, 6823, 386呢幾隻ok?

定買入比亞迪電子?
謝謝老師

龔成老師：

我地的投資組合，應該集中持有優質股，劣質股就要理性賣出，初步睇，上述的確有不少是劣質股，你賣出是理性的做法！

而你工作繁忙，長線投資優質、業務穩健的股，就更加適合你。

比亞迪電子（0285）不能視為收息股，因此不適合你這刻投資。

建議你投資香港電訊（6823）、置富（0778），長期收息，相信是最適合你。

------------------------------------------------

Q13159：

老師你好，我早排買左你的年報勝經，發覺它深入淺出，又有很多例子説明，好好！

我最近研究左1070，TCL，5年年報，發覺它最近3年付費會員的互聯網業務增長得很快，毛利率很高，我估計這業務繼續高速增長。

它的海外電視機銷售都是高雙位數增長，但我見佢這幾年營業額不是增長得很快，但營利就增長很快，暫時這幾年的ROE都是10左右。

我看好它的將來盈利增長，準備長期持有，因為我覺得它暫時10倍PE，算合理，但日後互聯網業務佔比不斷提升時，估值應該更高，老師覺得我投資正確嗎？

龔成老師：

TCL電子（1070）不差的，業務穩定，生意不差，有持續的盈利，不過，過往的增長力該就不算強。

股本回報率不強是扣分的地方，以現時估值來說，可說是處合理區的範圍。

至於你所講的付費會員的互聯網業務，我相信都有增長力，但我就未有太仔細研究，如果你打算買入這股，相信這部分是分析的其中一個重點，例如這部分佔收入的貢獻多少，這部分現時的市場結構如何，長遠有否增長力，如果都是正面的話，就可以投資。

------------------------------------------------

Q13160：

龔老師，見到你經常鼓勵年輕人創業，就算是網店都好，想請問你有沒意見是應該開設什麼類型的網店。

雖說這些應該自己研究和網店暢銷要看是否開正個條水，但以你經驗請問有沒少少意見可賜教/指點一下呢thanks

龔成老師：

我建議從「自己的興趣」著手，因為每個人都有佢中意的類別，你可以從一個用家的角度，去分析應該賣那些產品。

所以「興趣與自己熟識的事」，就是開那類店的因素，另外，當然要同時考慮市場，想想市場的需要。

做生意時，唔好做得太雜，要做得較專，有自己的獨特性，集中發展。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。