【龔成問答信箱】（Q21681-Q21700）

Q21681：

老師，上完你整個課程，雖然我仍有d唔明，但我想信每天一點一滴去溫習你既notes，我會一步一步進步

我最感恩就係，依加個市上上落落，我都可以放心。因為你教識我，只要持有優質股，不用驚短暫股價既波動

1) 其實之前教既市賬率，市盈率，現金流，折現率...要計數既部份，係咪知下就得喇？

最重要係學會第6，7課既企業評估表，對嗎？

2) 你功課590話每股盈利增長係負數，即是代表什麼？

3) 老師，恕我能力偏弱，我唔識你評估表某些指標的意思，即是搵咩資料：

-生意與盈利保障程度高
-管理層理性
-總負債÷股東權益<100%
-負債的增長不過快

4) 老師，除了590外，還做了669，1211，發覺自己做多了一點，開始知d數據去邊度搵，熟習了一點。

但係指標好多都唔識做，唔能夠理性去分析，只主觀地表示 ✅或❎，甚至唔識做

5) 老師，想問下英磅走勢，你有何意見？

6) 老師，你課堂的第7堂內容非常豐富，如果分2堂講會好d

想問功課

7) 行業市盈率，照網站所示的寫下答案，還是搵返相近市值的股票公司作比較

如六福網站show 行業市盈率是35.47。

而其中 1856依波路 的PE 是710。另外，5間市值最大的股票（周大福，六福，周生生，冠城，力世紀），

當中係無盈利的，即無shows PE，係咪只計頭3間的PE? 還是照抄網頁的數字？

龔成老師︰

1) 唔係，其實這幾個是一些較主要的分析方法。除左用企業評估表中，去判定一間企業長線質素外。

我地都需要詐透過這些方法，去幫助我地計算合理值出來。因此，你係要比時間去了解的。但現金流折現法，會係較為複雜。初學者，可以先掌握其他幾個先。

2) 這個負數，係代表每股盈利由2019年去到2020年，出現66.4%的倒退。

3) 生意與盈利保障程度高︰好似一些公用股，市民基本上經濟好與壞，都要持續消費，故保障性會視為高。(六福0590︰算係一般)

管理層理性︰這個你可以睇佢市場策略，和多年年報。例如公司已經負債累累，市道又不好，還盲發展，可視為不理性。

又或者佢數年前，有些大計。但最終無疾而終，甚至朝令夕改，當經常有咁架情況，就算是不理性。(六福0590︰開店速度理性)

總負債÷股東權益<100%︰主要睇長線償債能力，你可以係BOC網站，財務比率個頁，就可以找到。我地一般要求，少於100%為之好(第7堂SLIDE45)。

但你留意翻，近年由於國際財報標準更改左。一些有較多租舖的業務，例如零售，好似六福這這類企業，我地會將個指標，調升為<150$%都接受。(六福0590︰34%)

負債的增長不過快︰你可以用過去多年數據作比較，如果負債增長較快，而負債相關的指標又明顯變差的話，你就要留意。(六福0590︰負債不多)

4) 這些係需要經驗去慢慢磨鍊出來，你預分析頭幾間，都係會有咁架情況。當你唔明，就睇翻NOTE，自己要多溫書，推論，之後真的都唔明就INBOX問我。

開頭係會較困難，但當你累積到一定經驗，你就會知道面對不同企業時，分析應該係點做。

5) 我對英磅無研究，比唔到實質意見你。但建議你除非有實際用途，否則唔好似貨幣，作為增值渠道。

在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

6)要研究下。

7) 行業市盈率，我建議你找同業，最好係產品、質素、規模都相近的公司。你現時分析六福(0590)，你可以用周生生（0116）、謝瑞麟（0417）、周大福（1929）作參考。

依波路(1856)無論業務內容和規模，都不適合用作參考。加上過去幾年都虧損，令市盈率數據較異常，故不要將佢加入考慮之列。

你用水牛網，找到這幾間企業過去10年市盈率的4個中位數。再用這4間企業市盈率的上下限，去取出平均值，就是行業市盈率。

(即係4間企業的4個中位數，"最細"和"最大"的數字分別加起，再除以4，就是行業市盈率之上下限)

行業市盈率約為︰10 - 14倍

------------------------------------------------

Q21682：

你好，請問對退稅年金有咩評價？始終感覺上好似長時間鎖住舊錢 係唔係比較適合上左年紀而又無咩免稅額既人？

龔成老師︰

年金產品，主要係提供穏定現金流﹐較適合退休人士。

因為較年青人士，應先做好財富增值，這類產品就不太適合。

但同時，你都要睇翻佢節稅能力，同你將同一筆錢，去投資所得回報作比較。

因為投資回報始終有不確定性，而節稅金額和收取年金，係保證。若2者回報係接近，退稅年金就可以考慮。

------------------------------------------------

Q21683：

老師 你好，我手上現有1316 $13.7 有兩手, 1137 $16有1手 及圓通6123 $6.2有2手 請問可以繼續坐嗎?

龔成老師︰

持有一隻股票與否，唔好單單係睇中短期架帳面賺蝕，應從佢本質著手。就算而一刻帳面出現虧損，只要佢長線質素無變，照長線持有就可以。

你以上3隻股票，都係有質素，若你係年青至中年人士，係適合你長線持有。

耐世特（1316）本質中等，之前業績有點弱，但又唔算好差。你持貨唔算多，只係2手，照持有就可以。但因為質素始終不強，你預佢增長力之會係一般，不建議加。

香港電視（1137）業務有前景，但你要留意，佢有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦。

第二，這企業現時搞網購，有增長力的，但同時存有一定的未知數。疫情過後的增長力會否減慢？故此股可投資，但不建議大注。

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。你現時只投資小注，係無問題，但要明白風險因素。

------------------------------------------------

Q21684：

Hello Sir, 我上年喺股市最旺盛嘅時間下入市, 本金80萬, 今年2月由賺20萬到今日我已經蝕咗本金30萬.

升唔識食糊, 倒跌至一個位係我覺得不能承受要止血我唯有放。而家我倉位得返50萬⋯⋯

9618 $330
1810 $25
992 $10
2269 $108
388 $515
1833 $135

請問以上股票係咪都係好股？我唔等呢筆錢用, 我其實可以長期持有, 但係長線持有係咪都要止蝕?

我知你比亞迪由$80跌落去你都冇放棄過...但係我冇這份信心

Sir, 我應唔應該放一些新經濟股轉買舊經濟股？例如1299, 5..etc

先謝謝你的解答

龔成老師︰

你同好多散戶一樣，都犯左個錯誤，就係覺得「買入價」﹐係一個神聖的指標。

記住，不要用自己的買入價作為何時沽出的指標，也不要以回本後沽貨作為策略，同時，更加不要抱著「賺了多少就沽貨」這心態去投資。

沽出是基於這股已偏貴，又或沒有前景，質素有問題，而絕非由買入價決定。

相反，若你分析該企業的係有前景，就算中短期股價波動，令你有賬面虧損，我地都唔應該沽。

你以上持股，都係有質素。但有個問題是，你太集中係潛力股類(除了聯想0992，其餘都係潛力股)。

佢雖然有增長潛力，同時風險都較高，不宜持有過多。

若你係較年青，潛力股可佔約5成，餘下應用以下平穏增長股。但若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

平穏增長股：盈富(2800)、金沙（1928）、恆基（0012）、港鐵（0066）、友邦(1299)、平安（2318）、粵海（0270）、領展（0823）、希慎（0014）、太古地產（1972）、長建(1038)

匯控(0005)只係收息股，無乜增長力，如果你係較年長或者好保守，都可以加入佢。

現貨要否沽出部份，去換碼至平穏增長股，要睇翻你組合大小。如果金額較多，你可以沽出部份換碼。

但若金額較細，可能每隻只有1,2手，咁你照持有就可以，用新資金去令組合慢慢回復平衡，就可以了。

------------------------------------------------

Q21685：

龔成老師你好，本人女性今年32歲, 穩定月入6萬3. 戶口僅保持10萬儲蓄應付不時之需.

以往旅遊購物月月清, 最近終想通生活目標, 學習緊斷捨離多儲錢增值自己

經朋友介紹認識你, 希望學習投資重新出發

背景:
資產:3年前8成按購入5M新樓
固定支出28k(供樓,家用,租金,保險)
日常支出希望維持7k

長遠目標:
希望可以5年內換樓

現在目標:
想學習穩定增加資本, 等待時機買dream house (10M)

本人BB班, 過往無投資經驗或概念, 完全唔識股票; 希望得到老師指點初部方向, 建立action plan 一步一步增加財富, 謝謝你。

龔成老師︰

首先，你要改變以往不好的理財習慣，你試下每日記低自己每項支出，再睇翻有無邊D係無必要，盡量空出多一點資金，去做投資增值。

你現時有明確目標，就係細屋換大屋。由於你已有一間物業，我地現在要做的，就是透過優質股，去幫你累積一筆資金，達成你換大屋目標。

你可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

到5年後，你可以慢慢套現股票，去實行換屋大計。

但緊記，我地財富組合，唔好偏重係個別資產類別，要平衡，樓和股票都要有。因此你換樓時，唔好股票盡沽，要留有一定數量，可以用來持續增值，才算理想。

------------------------------------------------

Q21686：

老師好，我而家最主要係糾結好唔好買樓，如果買嘅話幾時買，買咩價位嘅單位好。

今年30歲，月入9萬，和父母住。每月支出1萬至2萬。

現金儲蓄 210萬左右，強積金27萬

投資方面︰

大部分2800，有82萬左右

最近加多咗啲水桶一，加埋大概50萬左右（不過好似有啲心急咗應該分細注啲注入）

2800 - 平均價 23.2, 29000股
3188 - 平均價 60.1, 1000股
1810 - 平均價 24.9, 5200 股
1177 - 平均價 8.31 , 13000 股

788 - 平均價 1.12 , 80000 股
0027 - 平均價 65.2, 1000股
388 - 平均價 451, 100 股

遲啲諗住加埋美股 台積電。

而家亦都開始做緊月供：銀河，港交所，小米，中生 每隻5000蚊

買樓方面，唔急住自住，可能都係當投資+- 收租

自己一兩年後亦都有機會想搬出嚟租屋住或者住返買咗嘅appartment， 不過我就係度諗，買樓咁麻煩又要交差餉管理費，可能仲要比錢裝修。

到底對我嚟講呢個係唔係一個合適嘅投資呢? 如果係嘅話我咁嘅情況應該買咩類型嘅單位好呢? 定係留返啲錢遲啲買股票好?

龔成老師︰

我地投資，除左要選擇一些適合自己的優質資產外，組合的平衡性，同樣都係好重要。

若你無實際需要，我建議你先同家人同住，節省更多資金用作投資。若你無自住急切性，可先從投資角度去考慮，現時股市值博率相對樓市較高，加上你己有一間appartment，我地應先從股市這裡入手。

以你30歲計，投資應以增長為主。你現時持有股票，和月供計劃，大致上係可以。

但月供上，有少少偏重係潛力股(1810, 0388, 1177)，風險會稍高。未來可以加入一些好似盈富(2800)的平穏增長股，令組合更平衡。

另外，我建議你每月儲蓄最好可以做到，係收入一半，即係$45000。其中$25000作月供(加多一隻$5000平穏增長股)，$20000儲起。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

現時大市只在合理區，現金和股票，最好各一半。你現有資金可以用多少少入市(美股、台積電、港股都可以。)。餘下的資金，就等大跌市才動用。

至於物業，現時香港樓市係合理區頂部，投資價值未算好高。但若你此期間，發現一些有質素，又平宜的旬盤，你都可以考慮用現有資金入貨，之後放租。

因為，我地長線財富組合，唔可以偏晒係股票類，都要加入物業類，令組合更平衡健康。

但由於現時物業值博率不高，你可以集中股票先。而買邊類物業，我會建議初階投資者，先從住宅開始。

若資金較少，可以先入手較細單位(但最好都有300呎以上)，但必需要有質素和投資價值。你可以睇我本<5年買樓4步曲>，會對物業投資，有較完整解釋。

------------------------------------------------

Q21687：

龔老師你好，我30歲，剛在美股損失了很多，差不多70%身家！現持有︰

941*47蚊入
6618*160入
939*6蚊入

現打算月供2800 和6818

現金只餘下數萬元！

你覺得可以嗎？還有機會番身嗎

龔成老師︰

係而個時候，你唔好先諗翻身問題。你要先想清楚，美股出現重大損失的原因。

美股雖然近期係較波動，但不至於7成上落，所以你投資技巧和方法，一定係出左核心性的問題。

記住，我地買入一隻股票，就等同買入一間企業，一定要知道佢質素、行業前景、財務狀況等，才去考慮否投資。

當我地確認係值優質股後，我地會用平貴定入貨策略，並長線持有。而唔係做短炒，去賺差價。

更加唔好用衍生工具，或者槓桿，因為好難玩，個風險會好高。

你現時持有股票，都係質素。但中移動(0941)和建行(0939)只係收息股，增長力唔會太高，以你30歲計，有點保守，建議不要再加注。

至於月供方面，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

你所選盈富(2800)係可以，但中國光大銀行（6818）都係收息股，唔係咁適合。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成。

餘下的另一半現金，我地就等機會，當大市出現較大回調，就加大力度掃貨，然後作長線投資。

最重要係，你要努力學習正確投資知識。只要你能運用正確投資知識和技巧，長線回報一定會唔錯。

而一刻你可以先做月供，但你再加大投資前，要先了解過往失利原因所在，才好再投入更多資金入市。

------------------------------------------------

Q21688：

龔sir你好，我是一個新手，想試吓買少少投票賺少少外快。我聽別人介紹買＂美團＂但不知從何入手，求指引

龔成老師︰

首先，你要清晰一個好重要的投資概念。我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線(3-5年，甚至更長)，而唔係短期炒賣，去賺差價。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂，不過，一定不能大注。小小注，是較好的做法。

------------------------------------------------

Q21689：

龔成老師，你好，最近在facebook發現到你的專頁， 發現你回答讀者問題 提供的意見務實而有用， 非常欣賞 。希望你也可為我提供一些意見

本人32歲，未婚，與家人同住，沒有租樓壓力

月入22000, 擁有積蓄70萬。

一路以來都沒有意識到投資嘅重要，只係識儲錢擺銀行。 直至最近意識到錢擺銀行,遠追不到通脹。

直至上月開始學投資，由於好多嘢都唔識 同唔了解，所以暫時都係偏向保守 型投資。

1.)我放咗三十萬在銀行做咗個守約儲蓄保險計劃,年期8年

8年後可拎到38萬x，平均年利率3.6厘

請問老師你認為呢類型產品做得過嗎?定還是 只年期長回報少?

2.) 想放十萬 在股票市場,暫時手持:

中國移動一手
香港電訊一手
盈富基金一手
中國銀行3988一手
二南方納指500股
(啱啱投資就遇著跌市😅)

請問以上嘅組合可以嗎 或有冇更好的建議可供參考?

3.) 另外想投資15萬 到保險公司購買基金或 月供 盈富基金/voo

請問老師你會比較推薦哪一樣?

我希望呢15萬嘅投資係比作一個中長線嘅儲蓄

非常感激， 期待你回覆

龔成老師︰

1) 這類保險產品，係穏陣，但增長力好弱。持有太多，會拖慢左你財富增長力度。

你若真係想保守點，持有係可以，但金額上要作出平衡。

2) 當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時32歲去計，應以增值為主。中國移動(0941)、香港電訊(6823)、中行(3988)主要係收息，增長力唔高，不宜持有太多。現貨可持有，就不要再加注。

二南方納指(7266)係追蹤納指表現，納指升1%，佢會升2%。但相反，當納指回調，你架損失會係雙倍。這類槓桿ETF，我唔建你用，風險太高。

若你想投資納指，可以投資美股Invesco QQQ Trust(QQQ) ，是追蹤納斯達克100指數，會較適合你。

將來時間，你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

3) 3者都可以，但由於基金一般都有一定收費，長線拖低你回報。除非你肯定佢長線回報，會明顯優於大市，否則你投資盈富(2800)或VOO，會較為理想。

但留意，現時大市只係合理區，未到好平。資金一定唔可以盡用，而且係要分注咁，慢慢入貨。餘下資金，就等大跌市，才出手入平貨。

------------------------------------------------

Q21690：

Hello龔sir，我睇咗你本“股票勝經”，都成日睇你Facebook page嘅video同解答網友投資問題，穫益良多，多謝你！

我呢排都買咗少少“安碩恒生科技”3067嚟長線投資。想請教吓，你點睇“華夏恒生生科”3069，同3067相唔相似？係唔係長線投資嘅好選擇呢？

龔成老師︰

華夏恒生生科（3069）主要係追蹤恒生香港上市生物科技指數之表現，係一隻不錯的ETF，值得長線投資。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線。

但留意，華夏恒生生科（3069）和安碩恒生科技(3067)都係潛力股類，風險會較高。

假設你算係年青，佔5成左右好了。若你投資經驗較一般，比重就要再下調少少。如果你係接近退休之年，這類股票風險太高，就不太適合你了。

------------------------------------------------

Q21691：

龔成老師，我有個問題請教一下，我是澳門的，我打算一年半後結婚，現在和家人一起住，結婚後大機會和老婆家人住，

我比較偏向買鋪位，但可能要結婚後才夠錢，我是否應該在結婚前先用了青年首次置業先買個唐樓，到之後再用唐樓換鋪位？

結婚費用我工作一年半是完全足夠的，買唐樓首期現在是足夠，但鋪位就不足夠。

龔成老師︰

你都可以用這個方法，以資產追資產模式，去先買唐樓，再增值後轉買舖位。

至於澳門的青年首次置業計劃，其實我唔太清楚具體情況，細節位未必好清楚。

但首先，你要睇翻這唐樓是否有質素和投資價值，唔好純粹因為個價你可以承擔，就盲目出手，最緊要睇佢升值潛力和租金回報率，是否合理。

同時間，你要考慮你用左這個首置機會，你將來要自置自住居所時，就不能享受高成數優惠。

另外，投資舖位，對投資物業技巧要求較高。若你這方面經驗唔係太多，你就可能要提升這方面知識，才出手會較好。

若不買唐樓，你都可以考慮用優質股，去為置業資金增值，都係一個可行方法。

至於結婚資金，你就不要用來投資。因為只有1年半時間，用來投資增值，風險會太高，最多只宜作定期存款。

------------------------------------------------

Q21692：

龔成老師您好，今日想主要問問好多人心目中既股王 騰訊 (700HK)。

我有睇過有人問過700而龔成老師覺得依家係係合理區頂部。騰訊現時PE為29到，以historical 10年PE average 35到，我用個PE range 24.5-52.1黎睇，

依家已經俾過往既十年黎講相當較平而股價區會由500-1050所以覺得580已經相對比較便宜，所以想問問龔成老師咩睇法?

同埋龔成老師每次都基本上會叫人留有現金，係大跌市既市時候買入優質既股票。騰訊由高位770跌到依家580差唔多已經跌左25%。

想問下依家係唔係到龔成老師成日講既大跌市，而呢個係買入良機長線持有?

同時都想問下之前都係百度220蚊，姐係由高位跌左差唔多4成個陣買入打算長線持有。

因為百度仲下跌緊到依家差唔多175蚊，上次220蚊買入又合乎龔成老師” 大跌市”的睇法嗎?

謝謝回覆!

龔成老師︰

騰訊（0700）本身已經好大好大隻，要再高速增長並不容易，雖然手遊的長遠發展仍會不錯。

但要帶動這股倍升，相信並不容易。所以，我地唔可以完全參考過往數據，要因應現有情況，作出合理調節。

當你運用過往的市盈率作估值時，要留意翻環境與企業的情況有無改變，當一間企業有較高增長時，市場會比佢一個較高的市盈率，而騰訊5-10年前，仍處於好高增長狀態，到了今天，是中高增長狀態，估值當然會有調整。

此股相信依然有唔錯增長力，但唔會去到以前咁高。而價算係合理區頂，如果你去到平，你預跌多3-4成，才算平宜﹐故現時未稱得上係明顯買入良機。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

百度在規模和質素上，一定係有。

但我地唔好單純用比較現價和上次高位距離，因為早前科網股被熱炒，不少相關股票，都因而被大幅推高。

我地應用翻企業本身價值，去衡量佢現時價格水平，是否合理。

佢雖然已跌到$18X，但唔算係平，只是合理區頂至略貴水平。但長線有增長力，若無貨，現價小注投資係可以。

------------------------------------------------

Q21693：

龔成老師，一直睇開你嘅理財資訊，本人34歲，持有現金50萬左右，偏向增長組合。因為最近股市比較波動，所以想問吓老師意見。現持有以下股票：

1810 200×23
6618 350×130
700 600×100
883 6000×9.3
1928 1200×32.9

請問咁嘅組合係唔係有啲雜亂無章？想再增持1810同700，亦想加入823、981同2382，但未知合理價位同時好似業務有重疊。多謝老師嘅時間

龔成老師︰

你組合唔算好亂，整體上都有質素，係合你長線持有。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業，不宜持有太多。建議你沽少少，換至其他優質股。

中芯國際（0981）、舜宇光學科技（2382）、騰訊（0700）現價算係合理區頂部，小米(1810)則是合理區頂至略貴，領展(0823)算合理區中上部。

這些股票，若你無貨，而價可以首注。但有貨者，建議再等佢有明顯回調，才出手。

小米(1810)、舜宇光學科技（2382）和中芯國際（0981），行業性質上有重疊，加埋不要高於組合3成。

另外，你持股和目標股票，不少都係潛力股，佢雖然有增長潛力，同時風險都較高，不宜持有過多。

以你34歲計，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

現時大市在合理區，你50萬現金，可以用多10-20萬，以分注形式入市。餘下現金，我地就等大跌市機會，才出手掃平貨。

------------------------------------------------

Q21694：

龔成老師你好，我最近經常睇你fb專頁同書本，裡面學到唔少，宜家想付諸實行！

我宜家22.5歲，工作左兩年半，現時人工26k，每年大概會加1.5k，開支方面: 每月家用10k, 儲蓄保險每月供款2.5k （為期五年，已供了兩年）,

還有每月日常消費大概3k，剩下用作儲蓄/投資，我目標係二十五歲時有一個穩建成長及帶來現金流的投資組合，

而帶來嘅現金流則可用作再投資、儲蓄或支付日常開支, 例如每月交通費。

我本身對股票幾有興趣，炒左股一年半，雖然會自己研究下圖表、聽下財經節目，但係暫時都係輸錢，加上工作關係唔可以經常睇實個市，而且有時心理壓力都大，

因為有時啲股票好波動，可能幾日已經輸一兩成，所以我想改變下我現有嘅投資方法，以下係我嘅方案：

1. 自行睇位分注吸納科技ETF 3067, 剛在16.5入了第一注，每跌10%加注

2. 月供股票，每月供款金額約$10000
從以下每個板塊挑選一至兩隻月供，每隻供款金額約$1000-2000

- 穩定增長+收息為主 （第二個水桶）
消費板塊：1044 上月已開始供, 想加914可以嗎？
內房板塊 ： 813 or 2007 （二選一）
金融板塊：需要包含嗎？如需要，心儀2628 or 659

- 高增長 （第一個水桶）
生物醫藥板塊 ：1833 + (醫藥ETF?)
可再生能源、環保板塊: 未有特別心水（916？6865？ 586？可以嗎？）
物管板塊: 823 or 3319 or 1821 (三選一至二）
科技板塊：981，1810，2382，9988，9618 （五選二至三）

每隻股嘅供款金額應該會一樣（e.g大概每隻$1000）但係有些板塊會供多於一隻（例如科技、消費、醫療，因為我較睇好這些板塊或者裡頭潛力股較多）

所以7個板塊投資嘅金額唔會係平均14%（100÷7），反而有啲佔比會重啲，有啲則輕啲

想問這個投資方案可以嗎？

還有我現持有以下股票，打算將部分分批賣掉，套現出來的現金打算儲下來留在跌市時分注吸納或用在月供

6186 2000股 買入價 24
2318 1000股 買入價 50
6865 1000股 買入價 34.5
285 500股 買入價 43.85
7226 1000股 買入價 9.96

189 2000股 買入價 7.5
6601 1500股 買入價 9.2
6049 200股 買入價 69
6110 1000股 買入價 12.6

2333 500股 買入價 23
3319 250股 買入價 35.2
9888 50股 買入價210

想請教下你，謝謝

龔成老師︰

你過去的投資方法和理念，都唔係咁正確。

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。因此，我地唔會係用睇圖表，這類技術分析方法，更加唔需要成日睇住個市。

另外，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時22.5歲去計，是財富增值的黃金時期。

你重點唔係要現金流去再投資，而係直接集中係一些較有增長力股票，去累積一筆財富。

"保險"只係理財中防守部份，買足夠保障就可以，增值可以留比優質資產(如優質股、物業等)去做。買太多，只會拖慢你財富增長力。

現時，你自行睇位分注吸納安碩恒生科技(3067) ，這方法可以。

月供策略上，你可以投資「平穏增長股」和「潛力股」。現時大市只在合理水平，除了月供外，每月都要留有一定資金，等大跌市才掃貨。

選股上，你上述板塊都可以。但內房負債較較高，不宜持有太多。而且一些不確定性較高的股票，都唔建議用來月供。

以下是一些較有質素的月供組合，你可以從中參考。

你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於持股方面，如果有質素，我建議你長線持有。若你想留一些資金，捕捉大跌市機會，可以新資金來做。

怛留意，ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

東岳集團（0189）、滔搏（6110）質素中等，唔建議持有太多。

朝雲集團(6601)不確定較高，不宜持有太多。若現時只佔你組合一小部份，可以持有。

------------------------------------------------

Q21695：

老師，我這次的置業目標，計畫的使用的方法會較為特別，我想和你分享一下。

我即將39歲，月入＄29000, 已婚，有1小孩（即將6歲）。

我有1個物業（屯門兆康苑，已補地價），管理費＄700, 做按揭時是自住的，現時已出租（月租＄10500），按揭利率為H+1.23%, 2019年轉按了，轉按時銀行估價540萬，我借了6成，供款期為30年。此物業我在2010年買入，當時樓價115萬，做7成H按揭，一直收租至2015年結婚後自住。

我太太即將36歲，月入＄36000, 2019年購入屯門新樓御半山自住，樓價666萬，做6成按揭，按揭利率為H+1.23%, 30年供款，管理費＄1900.

現在我打算購置第3個物業作投資（名義上是我外父自住用途）。

我外父和外母現聯名持有1個私樓物業（深井碧堤半島）作自住（已完成供款），並持有1個該屋苑的私家車位（已完成供款）。

他們本身是舊制已退休的公務員，有長俸，外父（即將61歲）的長俸較多，有＄30000, 我跟他們談過我的想法，但要他們將現聯名持有的物業改為獨名持有（外母持有），然後當我看中物業時，我外父便可用首置名義（投資）入市

若他能通過壓測的話便可做到9成按揭（樓價800萬或以下），30年供款，供樓戶口要用他名下的，直至按揭總額還款至低於6成方可改為我名義的戶口供樓，當然，所有相關費用，包括供樓會由我承擔。又假設我外父的長俸過不到壓測，也可加我做擔保人，但便只能做8成揭揭。

這樣，我便能合法地做到我想做的。這個物業會由我打理一切，雖然名義上不是我的，但我太太是獨女，就算當我外父、外母百年歸老後，物業仍會被視為遺產留給我太太。

這第3個的物業（嘉輝花園）我會出租，實行以租養樓。

龔sir, 對於我的計畫，不知你會有何評價。

而我和我太太預計會60歲退休

龔成老師：

方向不是不可，但有幾點要講翻。

第一，你地（我以整個大家庭作單位），將會持有4個物業（連同你外父外母聯名那物業的計），在整個財富配置中，其實出現了集中風險。因為我地投資，其中「平衡」都是好重要的，加上香港物業增長力最高的年代過往，我預期往後10年、20年，將會是平穩增長年代。

因此，如果從財富配置的角度，投資其他項目的回報，以及對整體財富的平衡度，將會是最好的。

第二，當涉及的人物愈多，就愈容易出現問題，始終大家都會有不同意見，每個人都是獨立個體，因此，如果日後有甚麼問題出現，會對你地的關係有所影響。

第三，壓力測試，我都唔能夠講得好清楚，佢是否能過關，你最好問清楚先好進行。

第四，買樓有一個好關鍵因素，就是「供得起」原則，如果樓市及租金下跌，你地的防守力如何，如果有一段時期租不出，你地的資金是否頂得住？

至於大方向，其實可以，但你地要明白上述的風險，大家都有共識後，先可以進行。

至於嘉輝花園，可以的，有質素。

------------------------------------------------

Q21696：

老師。其實968呢隻股似唔似資源股，價格比市場影響。因為記得上堂老師不太建議投資呢啲股。

龔成老師：

有少少影響，因此在價格自主能力方面，未能去到好強。不過，我地要睇翻佢本身有無技術，如果擁有技術的話，其實佢能否以較低成本生產到產品。

同時，能生產到較高質的產品，這就會產生了產品價格的差異性，反映企業有質素。就能跳出課堂所課，無法加價的問題。

因此，你在分析時，要小心分析佢的技術，是否行得較前，以及往後的技術發展如何，這是決定企業有無質素的關鍵位。

------------------------------------------------

Q21697：

老師，多謝你回覆。其實我由細接觸好多活動都揾唔到自己真正興趣，直到大學期間睇左富爸爸本書改寫左我人生同觀念，就瘋狂睇其他理財投資書，開始決定長遠目標和寫成功日記，我可以樂此不疲連續睇書，就諗呢個係未我興趣但又害怕(當時中係由窮人思維變緊富人思維中)。

直到網上遇到你，你完完全全教我地點樣實行，開始接觸股票，睇你著作，呢個時侯我已經好肯定咁揾到自己興趣(想成為專業投資家)同人生價值，生活習慣，思維幾年內睇到自己變化好大，亦同身邊人分享理財重要性同推薦你網站。

見到佢地有改變 自己好滿足同開心。我想激動分享既係你地好偉大！啟蒙左我，來來回回咁多年我終於揾到自己目標，好開心！

我亦知自己揾唔到全職一時既低落，調整心態，唔會花時間諗(曬時間)，自己能力范圍亦會幫助其他人，相信你同其他作家都希望會見到呢個乘的效應！好啦！

知道阿SIR貴人時忙，我知我多野講，但太激動所以想同你分享，感謝你同其他作家，感恩遇到你地！

龔成老師：

其實你自己都好明白方向，只是一些短期問題。

你知唔知，決定一個人是否成功，不是睇佢順境，是睇佢逆境，如果一個人要對逆境，都能夠保持正確方向行，做出一些對自己長遠利好的決定，這類人成功，只是遲早的問題。

加油啦！

------------------------------------------------

Q21698：

呀sir 我現家重整左股票組合

9988@242 2手
285@47 3手
1810@26 5手
1211@178 1手

我草緊錢準備跌市加倉，但如果到時資金有限，我加倉次序應該點排好，比亞迪其實好想加先，因為得一手，唔該晒呀sir幫我解答

龔成老師：

你所持有的，都是有質素的股票，可以長線投資，無問題，最緊要唔好太著重短期股價上落。

另外，你出現了集中風險情況，同一系的公司，不能太多。

同埋，你整個組合都是潛力股，你應該加入平穩增長股，去平衡整個組合。

所以，你加倉時，應該加入其他。如果想加入上述的股，要跌更明顯下跌才出手。

------------------------------------------------

Q21699：

你好龔SIR，小弟剛睇完《股票勝經》，而家睇緊《50優質潛力股》，暫時只買了幾隻你比較常推薦的潛力股(2800, 0823, 0012, 1928, 3319, 3918)每隻目前都係入唔1-2手

部份都有輕微升幅，部份好似因為之前美國提及是否加息而出現跌市，所以有下跌，想請教一下點解只係討論美國加息與否，都會對股市咁大影響，小弟只了解過對樓宇按揭利息有影響，如果美國真係加息，是否會做成大跌市？

另外想問一隻股票，虎都(2399)早前見阿里巴巴同虎都旗下公司合作，這隻股票是否有潛力？但見最近股價一直大跌，這股值得投資嗎？

希望龔SIR可以提供意見，謝謝

龔成老師：

你上述持有的股票，都有質素的。

可能你會見到股價之前升，之後跌翻，但其實唔需要太過理會。

至於投資市場，一向是以一個「預期」的模式運作，即是說，不是發生了才反映，而是預期之後點發生。

美國加息，理論上會對樓價有影響，會下跌，因為供樓的成本增加左，但要睇到時加多少，如果加幅不大，根本無乜特別影響。

加上香港樓的供應不足，需求大，因此樓價下跌根本有限。

至於虎都（2399），擔心佢炒作多過實際，唔好比一D表面因素影響，要睇企業的實際發展。暫時唔太建議投資，風險高。

------------------------------------------------

Q21700：

龔sir, 你好，想請教一下我有2百萬想放入股市買入一些收息股來做被動收入，請問有什麼股票現在可買入/介紹？

而我會分開十期，每月買入二十萬元股票，這個方法好嗎，還是分開五期，每期四十萬較好？

我現年46歲，打銀行工，有供緊樓。想將這些被動收入補償供樓利息的支出和增值。

下列是而家月供股票

$2000 - 66 （平均價 42.77）
$4000 - 2800 （平均價 26.12）
$2000 - 1928 （平均價 32.59）

我仲想問吓，呢$2,000,000嘅投資應該買入幾多隻股票呢，五隻會唔會太多？我大概希望有 5% - 7% 嘅收入。謝謝

龔成老師：

你46歲，可投資平穩增長股，加收息股，你不用100%投資收息股，因為你這年齡仍有財富增長力。

我會建議你分10期，每次20萬，分12-18個月進行，慢慢分注投資，能將買入價平均，你可以投資5-10隻股票。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時月供的，可以保持，長期進行就得。

要留意，你不能用盡所有現金，要同時留有部分資金，等機會投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18881-Q18900）

Q18881：

老師我係你學生，我想問分析ROE、毛利等財務數據時，是否不能單純數字分析，還需要很多長遠目光和對經濟的了解？我仍未能完全掌握。

龔成老師：

其實當我地分析財務比率時，你不能只睇數字，要同時配合「企業」、「大環境」。

例如今年盈利比上年度上升了10%，而ROE下跌了3%，你要分析，點解？

你首先要分析翻，佢收入點解會上升10%，分店多左？加價？大環境向好？其他行家的情況如何？

之後要睇翻ROE跌的原因，是盈利下跌，再投資方面的回報較弱，還是甚麼原因，當我地分析ROE時，往往要配合派息比率及負債因素去進行分析。當然，我會較建議分析長期的ROE情況，而不是個別的一年情況。

但你最重要記住，數字是死的，我地作為投資者，一定要將佢「意義化」，要配合當年的企業經營情況、大環境，去配合分析。

------------------------------------------------

Q18882：

Ar Sir, 1446鴻福堂，我研究過企業是有質素的(對員工好，今年又派特別息比小股東)，但打不入內地市場，今年上半年疫市竟然也賺了一些。

將來也衹可以主力本地市場，佢地話稍後會嘗試打開外地市，甘Ar sir你點睇佢地將來的發展和賺錢能力?

鴻福堂上市5年，但股價現在是0.450，你會否認為此企業被估值低左呢?

是否值得現在投資呢?

Ar sir, 甘有時會出現企業質素好，但唔代表賺錢能力強的情況嗎?

龔成老師：

鴻福堂（1446）質素算是不過不失，未算高質。產品都有一些支持者，但發展力卻不強。

睇翻財務數據，每年盈利不高，生意多年來無特別增長，反映佢在開發市場方面，只是做得一般。

現價算是合理，無低估，但就唔見到有好大的投資價值。

------------------------------------------------

Q18883：

老師你好，我一直不懂投資，直到幾年前在公司同事遊說下，嘗試接觸投資股票，但因為什麼都不懂，他說什麼好我就跟着買什麼，結果幾年下來買的一路下跌

以為等着等着就可能會上升，但似乎越跌越多，我就開始嘗試去看一啲投資書籍，才發現自己一直犯的錯誤，我想問問老師

我應該繼續擺股票一直等上升返，還是應該賣晒佢，換一啲有實力前景的公司，因為擺下擺下都已經蝕左唔少，我應該點處理？

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

------------------------------------------------

Q18884：

老師你好:我今年27歲。持有以下股票，但不知道應不應該繼續持有，定沽左部分購入更有潛力如9988或1177？

2128中國聯塑 $15.79@2000股
3662奧園健康$8.1@3000股
1810小米集團$15.29@3000股
2013微盟集團$10.16@4000股
1448福壽園$6@4000股

感謝你繁忙中解答! 祝安好!

龔成老師：

上述都是有質素的股票，其實你可以長線持有，只是部分潛力股，可能風險度會高少少如微盟集團（2013），你佔組合的比例就不宜太多。

記住，買入價不是重點，重點是該股的質素、前景，你持有的比例。

至於阿里（9988）與中生（1177），你都可以加入的，阿里就最好回翻D，而中生現價就可以開始小注。

現時大市合理區，未算平，你都要留有一定的現金在手。

------------------------------------------------

Q18885：

Hi 我儲蓄唔多，家庭開支太大。我有14萬，如果拎呢舊錢去投資， 買收息股， 想穩年年收息， 揀邊隻好？

如果想買阿里巴巴其實咩價位入最好？美國大選係咪會影響股市會下跌架？

最後如果我想買你既書睇， 邊本比較好？ 因為我係新手學買股票

今日去買左3本你既書

我都好耐無睇過書。

想問9988，如果想長揸，依家個價買係咪會太高？
應該大約幾錢入？

仲有1810我都想長揸，依家呢個價入都可以嗎？

龔成老師：

首先，你要想清楚自己的投資方向，想收息，還是增長，自己的風險承受程度如何。

至於中短期因素，就唔需要太著重，最重要是期的財富配置。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

阿里（9988）是增長型的股票，風險較高，最好回翻少少先，至於小米（1810）都是潛力股類別，但最好都是回翻少少先買。

如果你較初階，建議你投資ETF。

例如盈富（2800）。如果想較高增長，就安碩恆生科技ETF（3067），不過現價唔平，如投資，只能小注慢慢入，或月供。

你保持閱讀，增加左基本知識先，投資唔好急。

------------------------------------------------

Q18886：

老師點睇303，我見佢都幾賺＄，派息都吾錯，但書中沒介紹

龔成老師：

偉易達（0303）作為收息股，可以，但增長力就不算強。因為佢近年有些業務正向下，這會令股價向下，所以無無介紹，去到現水平，算是合理，股價相信唔會再大跌，投資值博率開始出現。

雖然近年的股價較一般，但本質都未算差，但就唔叫好強。

佢過往派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。

公司已不需要每年投資發展，反而管理層、大股東，偏向想收息，因此這是重派息多過重發展的公司。

雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。

如果你目標係收息為主，此股可投資，但不能太過大注。

------------------------------------------------

Q18887：

龔sir，您好，今年年頭已經在Facebook專業看你關於投資的知識，還買了《80後百萬富翁》《50優質潛力股》學習，但我本人比較保守，遲遲都不肯動手，終於在今個月買入了幾隻股票。

本人23歲，有現金50萬，現持有：
2800 [email protected]
2382 100@130
1177 [email protected]
1928 [email protected]

還想入0027，現價合理區中部，我比較想直接入一手，你覺得可以嗎？

我唔係太想月供，因為我覺得月供回報好慢，但我明白可以平均買入價，所以好難做決擇。

還想入1211，但現價略貴，你覺得回到幾多可以直接入一手。

另外2382轉換去0285你覺得好嗎？這兩隻股你點睇？邊隻潛力會較高？謝謝龔Sir

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你現時23歲，唔需要太保守。而現金要適當運用，當然，現時大市未算平，唔能夠盡用現金的。

現時你持有的，都是有質素的，可長線。

至於現價加銀娛（0027），可以的，但要留意賭業佔你的組合比例會開始多。

如果唔想月供，就自行分注入，但就要留意現時股價未算平。

至於比亞迪（1211），最好去翻$80先入，當然，未必見到，如果好想入，最好都去翻$100以下先分注。

舜宇光學科技（2382）與比亞迪電子（0285）都有質素的，不過現時比亞迪電子，所以，你持有舜宇就得。

------------------------------------------------

Q18888：

龔sir, 小弟今年24歲，月入大概3萬至3萬5
每月有一個月供九千既15年基金計劃

到年頭先發現到咁係好傻既儲法，之前都試過炒牛熊結果輸左幾萬蚊，之後買左龔sir幾本書睇發覺要改變投資策略

然後而家扣曬家用洗費每月大概有五千蚊放係股票市場
而我而家拎有既股票係

港股
788 @1.5 16000股
981 @26.95 500股
1368 @3.09 3500股
1810 @10.4 2400股
2638 @7.43 500股

中國股票市場
601985 @4.39 600股
2665 @2.6 1200股

想請教一下呢個投資組合算吾算合理/合格，亦想了解一下有無繼續投資落去既遠景，唯一好岩心水既小米已經升到成18蚊，仲好吾好繼續買貨，定係等佢回一回？我自己對呢間公司既信心就好大下。

請龔sir俾啲意見賜教一下，多謝你

龔成老師：

衍生工具好難賺錢的，之後唔好再玩。

至於基金計劃，要具體分析先會知當中的質素。不過，月供$9000可能有點多。

至於現時持有，我無特別分析內地股市。港股方面，持有的相是有質素的股，大致上無問題，中芯（0981）唔建議大注。

中國鐵塔（0788）、小米（1810）可長線。小米開始貴，唔好心急加注，原有貨要長線持有。

特步國際（1368）都可以，但質素不算最高之列。

港燈（2636）只是收息股，未必適合你的年齡。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你的持有大致無問題，現時大市未算平，如果要入貨，要慢慢分注入，唔好太急，要留有現金。

------------------------------------------------

Q18889：

Hello, 本人有一物業，銀行估價300萬，現收每月租金6300，如果賣了，買股票收息，能達到財務自由嗎？

有推薦的收息股嗎？感謝

龔成老師：

假設套現得到$300萬現金，之後全部投資收息股，但到5%股息。

一年預期會收到股息，$15萬，每月平均會收到股息$12500。能夠財務自由，就要睇你的消費金額。

要留意，投資收息股，最好只作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜，因此買入時宜分注，同時不能用盡現金。

------------------------------------------------

Q18890：

龔老師妳好，請問港鐵00066而家入算抵嗎？

同埋小米集團01810
係咪都屬於回落緊

感謝龔老師

龔成老師：

港鐵（0066）現價合理，可以分注投資，長線持有，這股有質素的。

至於小米（1810）有質素及增長力，不過，現價唔算平，去翻$18以下會較為合理。所以最翻落少少先開始分注。

------------------------------------------------

Q18891：

老師你好！ 家人之前幫我買了00136, 10萬股 已蝕了8k，00871, 10萬股蝕了35k, 02858, 一萬股蝕了60k, 還有02882, 10萬股蝕了38k， 現在 應該怎麼辦

龔成老師︰

恒騰網絡（0136）比較麻煩，因為暫時的業務賺錢能力仍弱，不確定性大，你唔好再加注。如果佔財富太多就減持，如果不算多，就持有先，到反彈到一定程度後就慢慢賣出。

中國疏浚環保（0871），業務不佳，5年有3年處於虧損狀態，投資價值不高，加上核數師意見中，曾經出現了修定報告，這反映當中有少少問題，但其後算是調整翻，但這都反映，這企業有些地方有古怪，要小心。

近期股價大幅波動，炒多過實際，風險高，因此對這股有保留，賣出會比較好。

易鑫集團（2858）企業仍處於燒銀紙的狀態，這類股風險較高，不過，我唔敢話佢完全無潛力。

這類股估值難，不確定性較高，只可以話，小注好了，暫時我未能確定佢業務真的向好。

香港資源控股（2882）主要透過全資附屬公司勝力經營電鍍化工品貿易業務。另外，透過收購香港珠寶零售連鎖店－金至尊品牌，去踏足珠寶零售業務。

此股連年虧損，再加上2019年在核數師意見中出現"保留意見"，代表盤數可能有問題。建議你沽出，轉至其他優質股。

睇翻你以上持股，質素上都比較唔理想。我建議你在再投資前，去多讀投資相關書本、年報，新聞和相關課程。提升自已選股能力後，才再出手。

------------------------------------------------

Q18892：

請問的士牌是一個好投資嗎？

龔成老師：

的士牌，現金流工具，好處係投資者可利用借貨，付首期購入的士牌，然後收取每月穩定的租金收入，原理與買樓收租一樣。

按揭成數高、管理不難、買賣成本低、限制少，所以都是一個不差的投資工具。

不過，近年出現的叫車程式，對佢有一定的影響。相信長遠，的士牌的增長有限，只是一個平穩及收息的工具，前景只是中等。

現價合理。我會認為，如果資金真的較多，作為整個財富配置的其中一部分，都可以的。

------------------------------------------------

Q18893：

你好 龔老師，我只持有三隻股票
分別係9988 300股平均價係$262.67

IGG 10000 股 平均價$9.37
303 偉易達集團 1500 股
平均價格係50.67$

個倉overall都有賺

但想減持股票數量/ 優化股票組合
要如何做好？唔捨得蝕放

龔成老師︰

首先，如果你個倉只有3隻股票，會有"過度集中"架問題。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

另外，當我地選擇投資項目時，會參照自已人生階段。年輕時，可以用"平穏增長股" + "潛力股"，到中年"潛力股"比重要減少，到近退休應集中在"收息股"上。

你持股中的IGG（0799）和阿里（9988）係潛力股，而偉易達（0303）偏向收息股。

你應睇翻自己人生階段，去調節組合持股。

最後，IGG（0799）是有風險的類別，雖然佢財務數據不差，但業務本質的不確定性大，軟件及遊戲都是變化較大的行業，這種不確定性可以令企業好勁或好弱，因此你要明白這點。

這股可以有潛力，但投資時，不宜太大注。

------------------------------------------------

Q18894：

老師好,向你請教後經過一年多了
早前停工大半年,可惜錯過了3,4月時的大跌市
最近在閱讀你的年報勝經,希望能了解多點關於年報的訊息

回想1年半前的自己,發覺對投資認識更多後不知不覺心態更比以往只做定期較為進取得多,亦開始明白知識真正的重要性。

目前月入2萬8千,持有股票組合約28萬,定存30萬,現金約20萬

恒生銀行2手 成本197
金沙5手 其中2手成本47.6 月供部分約3手成本35.57 月供2000

盈富 4手 成本26.96 月供3000
比亞迪 325股 成本43.87 暫時停止月供
恒地 1手 成本34.7 月供2000
煤氣 3手 成本13.91 月供2000
長建 1手 成本50.29 月供2000

首先多謝老師介紹比亞迪並帶來不錯的回報

可惜早前月供期不長,持貨量不多,於80元時覺得價格稍貴停了月供,並採取了升一倍放一半的策略

如今只剩下不足一手

本來打算於60元左右價位時恢復月供
豈料「一升冇回頭」,現在更升至接近140元的價位
似乎較難期望回落至60元左右的價位

1.請問這情況下老師會建議採取甚麼策略?恢復月供還是應該繼續持貨並改為投資其他潛力股?

另外我打算在美股戶口開戶後月供約HKD$2000 ARKK及HKD$3000 VOO,分散地區投資風險

並於定存中抽取3-5萬轉移到即將推出的ibond賺取較高回報

2.請問我投放在月供部分金額會否太多,令將來持有現金不足?

3.目前持有煤氣3手,恒地1手。明白恒地及煤氣屬同系股票會有集中風險,有否需要調整目前的策略如停供增長力減弱了的煤氣?

4.現時月供部分除了盈富的成份股外均屬舊經濟股及平穩增值型。有感今年疫情經濟受創下舊經濟股表現差強人差,「升市無份、跌市一齊跌」。如今股票組合也是靠比亞迪一隻支撐著其他股票的虧損。

　請問有需要檢討及重整名單,新加1-2款潛力股或新經濟股以增加第1個水桶的佔比及作風險平衡嗎?

5.騰訊及阿里巴巴等科網股均升至歷史高位,市場亦出現針對新經濟股的過熱訊號。如果作重整股票組合名單,是否應該待回落至合理價才轉馬?

6.中國阻止外匯流失,對金沙的基本面有影響嗎?

7.老師對即將上市的螞蟻集團有何看法?記得你提過IPO一般以稍貴的價錢上市,但考慮到螞蟻集團的獨特性,是否應該抽這隻IPO?如否,哪個價位才算合理價?

8.同樣,港交所的合理價應為多少?我對港交所及必瘦站一直有興趣,尤其看到老師介紹及持有必瘦站後對它更有信心。但再購入這2隻股票後會否持有過多股票令組合變得混亂?

問題稍多不好意思,期待老師的賜教

龔成老師︰

1） 比亞迪（1211）現價偏貴，我建議回到$100以下，才再開始翻月供會較好。$80以下先正式買入。

此期間，你可以供住盈富（2800）先，或其他潛力股都可以。

安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）

投資美股去分散地區性風險，係可以。只要你對這些股票係了解，同埋佢地係適合你年紀，咁就無問題。

如果你未到退休之年，IBOND我就唔太建議投資。

2） 以現時大市在合理區計，每月儲蓄大約用一半做月供，一半儲起等大跌市機會，咁會較好。

3） 問題不大，煤氣（0003）近年係弱左，但長線投資價值依然存在，你可以維持月供策略。

4） 其實你月供股票，都係有質素。受大圍環境變差影響，難免會跟隨下跌。現時你月供的股票，反而因為調整而值博率高左，所以照月供就可以。

至於是否雖要加入一些潛力股，就視乎你年紀。如果你係較年青，長線的確應該加入1,2隻潛力股，去提升組合增長潛力。

5） 騰訊（0700）及阿里巴巴（9988）現價的確係偏高，如果直接1手手咁入貨，我就唔建議。但若以月供形式，去慢慢儲，現階段依然係可以進行。

6） 內地政府主要想防止太多資金外流，這樣難免影響到賭場收入。但由於金沙（1928）主要以中場客為主，影響預期相對其他以貴賓廰為主的賭場同業為少。

而且，這個只會係中短期因素，長線集團發展依然係正面。

7） 無錯，好多IPO上市價都會偏貴。但我地要考慮埋佢質素和潛力，去取得一個平衡點。

但由於螞蟻集團上市資料未公布，故現時很難說是否值得買入。

8） 港交所（0388）是壟斷企業是典型的優質股，值得長線持有。

在$300水平以上就開始貴，你最好等佢回到合理區附近，才開始慢慢入貨。此股算有一定潛力，加入組合係可以。

必瘦站（1830）有質素的，佢生意穩定，同時有平穩增長的情況，佢盈利都不錯，保持增長。

比較特別的是，佢的派息比率高達100%。代表佢有自我成長的能力，不用投資太多的資金，都能令企業成長，這是佢優質的地方。同時反映管理層重派息多過企業增值，因為管理層未無太大的發展意慾。

不過，近年管理層有所改變，表示有可能減少派息，投入更多在發展方面。雖然派息少左，但潛力就有所提升。

整體而言，佢業務有一定不確定性，未知之後的業務、盈利、派息會點發展。現價合理區頂。

------------------------------------------------

Q18895：

龔成老師你好! 本人39歲, 未婚, 未有結婚生小朋友打算

本人現與母親住在公屋兩房單位, 母親是主婦, 自己月入HKD65000-.

1-2年前開始閱讀你的文章, 增值投資認識不少. 現有現金180萬左右, 股票10萬元, 基金5萬元.

想提供更優質的生活給家人及增加家用空間, 有置業打算. 有兩個方向, 不知如何是好.

- 用綠表購入3房二手居屋, 700萬, 9成按揭25年, 首期開支HKD一百萬左右, 月供需 HKD28328左右. 預留50萬裝修, 餘下30萬再作投資. 但二手居屋已有20年, 怕日後轉售有困難

- 先用50萬以租置計劃買下現有公屋單位. 另外, 外出租用3房私樓住 HKD2-2.2萬. 餘下130萬先作投資.公屋單位現估價250萬, 禁售期後轉售獲利200萬.
待2年後,

不知樓價是否再有下調,加上自己的130萬以首置買入私樓3房, 裝修費用後餘下投入債券基金收息, 可協助供按揭

請問那個方案比較好? 或有其他建議? 謝謝!

龔成老師︰

從平衡與穩健角度考慮，方案一「用綠表購入3房二手居屋」較好。

雖然居屋在投資價值未必及私樓，但從自住角度，不差的，而你最大的目的是「優質的生活給家人及增加家用空間」，相信這一步較穩陣地去做到。

至於買公屋的方案，由於你的目的只是借公屋作跳板，期望樓價下跌並之後買私樓，由於樓價下跌存有不確定性，到2年後賣出較難確定樓市情況，因此存在未知數。

如果到時要再等，你就要持續支付租金，加上年齡漸大令按揭年期有可能受影響，所以不確定性較高。

另外，債券基金有好有壞，要留意，有不少網友同我分享，投資債券基金出9現了賺息蝕價的情況，所以唔好以為一定能依靠當中的現金流，唔好比佢的高息吸引。

------------------------------------------------

Q18896：

龔sir你好~機緣巧合下係fb見到你嘅分享，獲益良多~啱啱都買左你兩本著作（股票勝經和50優質潛力股，閱讀中）了解到時間是令財富增值的不二法門，想就住自己的情況問下意見~

我今年30歲，單身，月入將近2萬。扣除1/4家用，1/4生活花費，1/4雜項（先儲埋支付包括保險，或者家裡要換的家電或電子產品等等比較大的支出），剩下大概5000能用作每月投資。

個人的目標是希望45歲前能儲到250萬用作移民，並且之後能靠被動收入維持生活。

現時只有投資美股（半年前開始，因為可以一股股買，資金少易入手），投資左26000港幣左右。暫時睇有6%升幅（買得比較雜，有2/3都係大公司）你認為需要轉返d錢返黎嘛？定係繼續放？咁之後仲入唔入錢過去？

港股方面，有1手中生（1177），7.92買入打算長揸~另外有5萬左右現金，係咪應該拎一半黎投資？定揸住等個市跌返少少先？

另外睇到龔sir的分享，想開始月供股票的計劃。

打算每月供2500蚊盈富（2800），1500蚊比亞迪（1211），1000蚊阿里，（9988），依個配搭可以嗎？（假設唔再投資落美股果邊）雖然長期供股票可以平均成本，但係見到近日阿里同比亞迪都創新高...宜家開始供可以嘛？

本人係投資新手，都係今年先開始慢慢學習，問題比較多，唔該曬龔sir~

龔成老師︰

當我地選擇投資項目時，應參照自已人生階段。年輕時，可以用"平穏增長股" + "潛力股"，到中年"潛力股"比重要減少，到近退休應集中在"收息股"上。

中生（1177）有質素和適合你，長線持有就可以。而美股方面，你可以睇翻你現有股票，是否有增長力、企業是否優質、行業前途如何、財務狀況等，去決定是否值得持有。

但我想你清晰翻2點，首先，唔好因為"入場費平"，就去投資一隻股票。我地選股重點係"企業質素"，一隻$50000入場費架優質股，長線可以繼續升。一隻入場費只要$500架劣質股，最終係可以跌到1蚊都無。

另外，大公司唔代表一定有投資價值，佢都可以係連年虧損。所以，投資前要了解清楚，唔好見係有名或者大公司，就盲目去投資。

以你年紀，投資策略可以比較進取。你現時月供選股可以，但由於現時比亞迪（1211）偏貴，你最好等佢回到$80左右，才開始月供，現時可以先用其他潛力股代替。

潛力股︰安碩恒生科技（3067）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）

學習方面，除左睇我架書，你可以多睇財經新聞、企業年報和上些相關課程。

本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。課程時間，你可以留意我FB。

------------------------------------------------

Q18897：

龔sir 2800 或者3067 之類既 ETF 或者基金增長會唔會比普通既股票慢?

因為我見到好多時你都係叫人穩陣d就買2800, 但佢真係比普通股穩陣? 但我以前睇過佢派息又唔會派得特別多,以新手入市又唔算好平,所以有呢個疑問。

我依家開始要慢慢了解下車股,其實車股係咪都係睇佢賣車同有無研發新產品之類?

好似以我所知內房就睇賣樓,有多負債,土地儲存,同國策之類。呢種分析方向是否正確? 你會唔會建議人同行業分開投資大同細既公司?

例如2333相對175係細隻d, 175買大份小小,2333小注咁樣?

原來係有人贊助佢地推介人買股票,難怪講呢d野既人好多時係咩基金董事之類既人。

龔sir之前話長線投資,咁我幾時先知道嗰個股票我應該要食糊?

因為我都有一個股票係咁,(3883)係美國總統一開始同中國玩貿易戰既時候5蚊左右買左2,3手,一路揸都揸左有2到3年,佢由5蚊跌左落4蚊

之後高位升到13蚊,但我都無放,依家落到7個幾,咁我係咪錯過左最好賺錢既時機? 因為有d後悔無係12蚊嗰陣放,覺得佢可以有能力升上去無放。

依家你建唔建議轉投其他板塊如車股,因為依家內房既國策收得有d緊,雖然人仔有升,但內房都無乜升。所以就想問咁算唔算長線投資錯過食糊機會?

我都買左本年報勝經睇,慢慢學下野先。

龔成老師：

盈富（2800）有平穩增長能力，不是高增長類，但由於有50隻股在其中，風險得以分散，以我地投資，一定要「先想風險，後想回報」，因此，先平穩風險，同時有平穩回報，這是好選擇。

至於安碩恒生科技（3067），原理相同，而當中是潛力股，不過，不少現價都唔平，所以買入時唔好一次過入，要慢慢分注，或月供。

至於汽車股，要睇佢的產品，客戶對象，品牌，過往賣車的數據，優勢，研發能力，有沒有與其他公司合作，長遠發展，財務數據等。

無論車還是內房，你分析時，重點是睇「這企業」，你現時是買入一間企業，就要用企業的角度，分析當刻及長遠的情況，同時買入價是否合理。

至於你話細隻大隻，你唔好比股價數字、入場費多少影響，最重要睇「企業」。

另外，唔好理中短期的股價波動，最重要是長期持有企業，如果企業有質素，可以一直唔放。如果升到貴，賣部分都是可以的。

你現時的想法，同一般散戶一樣：「著眼在短期升跌，以為自己能在高位賣出」，如果你繼續這樣想，結果只會與他們一樣（根據統計，香港散升，有9成在長期計是輸錢的）。

------------------------------------------------

Q18898：

龔老師您好，有事想請教，周不時睇到有啲所謂大行不斷作出或修改估價，這是為什麼呢？睇到有啲書話被某某機構阻擊，這又是什麼意思，唔明點解一隻股會有不同機構給予不同估價，咁會唔會被弄到停牌除牌架？

龔考師早晨，補充詢問這些曾被質疑評估及阻擊的股我們又應該如何分析應對？

龔成老師：

其實大行報告，都不能盡信，有時可以參考下，有時有佢地本身的目的。

例如本身佢沽空左某股，然後就發表報告，講這公司有問題，之後就會令股價大跌，佢地就可以從中獲利。

所以，這些報告，參考下好了。

其實好少會搞到停牌，除非該公司自己本身有問題。或者最多為澄清，而暫時停牌。

我地睇到這些報告時，唔好盡信，要自己睇翻財務數據的可信性，同埋這股票過往的獨立核數師意見。

------------------------------------------------

Q18899：

1) 我在32.4入了一手金沙，得知現時金沙處於合理區的低位，有意再入一手，但後來獲得更多資訊後覺得銀娛會相對更大潛力，如再入金沙好像會有點矛盾，我相信金沙和銀娛並不適合同時持有。我對金沙應採取甚麼方向？

2) 多謝你上次的回答建議我加大潛力股的比例，我之後閱讀了50倍升股，實在大開眼界，我對數間公司都有投資興趣，想請教應投資次序和現價是否處於合理區。

354 中軟國際
6869 長飛光纖
522 ASM Pacific
謝謝解答！

題外話，我之前去尖沙咀誠品購書時發現你的書在商業投資類都受歡迎，我在早上時發覺在短短十五分鐘已有人選購和閱讀。

龔成老師：

1）比較平衡的做法，是投資銀娛（0027），因為這可減少你集中風險。其實兩隻現價都合理的，金沙較適合收息及平穩，而銀娛則有增長力，兩隻同時長期持有，可以的。

2）在這3股中，中國軟件國際（0354）、ASM PACIFIC（0522）的優質度會較高，暫時可留意這兩股，中國軟件國際在合理區，而ASM PACIFIC在合理區中上部。但始終業務都會有少少波動，因此投資唔能夠過份大注。

哈哈，多謝報料！

------------------------------------------------

Q18900：

老師你好,我看了中國光大綠色環保(1257)既中期報告,咁就有以下既問題/分析,希望可指點一下!!

(1) 2020年收益同2019年收益好接近,但2020上半年係疫情較嚴重時候,咁如果2020都可以做到2019同期既收益,係咪算唔錯?

(2) 損益表入面既"財務費用"係咪指利息支出既意思?如果係既話,推測公司將收入既一部分去還錢,就會影響公司長遠發展,呢個推測合唔合理?

(3) 另外,"財務費用"高過上年,而且公司負債係高過上年,請教下兩者會唔會有關係?

(4) 現金流量表中, "經營活動所動用之現金"比上年高左幾倍,可以點解釋?謝謝老師！

龔成老師：

1）可以咁講，不過，我地分析時最好用較長期的角度分析，中期業績只是輔助，但不是分析的核心。我地要用長期的角度去了解左企業先，再因應中短期業務情況去調整。

2）對，即是融資方面的成本，我地會睇翻佢的成本多與少，佔盈利比例多少。以及分析佢的風險度。

3）兩者有關的，要睇翻佢高左是否到了危險水平，還是仍可接受。

4）當中涉及較多的會計因素，好難在這裡簡單解釋。但經營活動現金流保持正數並有向上情況，一般都是利好的。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18741-18760）

Q18741：

老師：

有一個問題想問你: 為何你多次提到唔好集中於銀行股呢？我的看法是他們比較穩健

龔成老師：

因為銀行業是高負債的企業，你的存款，其實是佢地欠你的錢，如果金融市場出現危機，銀行其實會有一定的風險。

當然，現時銀行已有一套較穩健的風險管理方法，不過，始終都是有風險的。所以，投資不是不可，但就唔建議太過集中。

------------------------------------------------

Q18742：

龔sir，你好，我未上過你股票班，但剛剛開始拜讀到你嘅注作，想請教一下如果去計算或者去界定一個公司的股票是否值得係現價或者而家係高估或低估，謝謝！

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q18743：

龔成老師，最近我做了一些決定打亂了我人生的節奏，我在深圳買了一層樓，手上的資金應該如何倍大.或增值令我可以快啲供甩深圳呢層樓呢？

錢放在銀行會安全但是會貶值，錢放到股票有機會贏大錢但如果不幸就轉不到身，錢就被扣住了，失了靈活性.....看到信息有空回答我這個80後，謝謝老師

龔成老師：

最重要是分析投資的回報率、風險、值博率。

你要分析下，資金持有這深圳樓，回報率有多少，收金收多，預期長遠的升值多少。

如果想相同的資金，轉到股票，預期會得到多少。

你唔好用短期的角度分析，要睇長線，物業的發展，股票（企業）的發展。

供甩與否，不是重點，重點是資金的配置。例如你擁有一筆資金，用作還錢可以減少利息，但如何用作投資，可能回報更高，因此，你要分析投資回報率，思維將資金投放在那裡。

------------------------------------------------

Q18744：

老師早晨,想問吓中國鐵塔同順豐合作的消息出咗,我覺得呢啲消息應該會令股價上升,但而家反而跌落去

我真不明白？另外,請問香港電訊而家價位可以入嗎？

龔成老師：

中國鐵塔（0788）與順豐集團簽署戰略合作框架協議，
雙方將共同推動能源服務、產業鏈物流等方面的深度合作。

中國鐵塔將依托現有的換電網絡為順豐超過55萬快遞、同城配送騎手提供換電、充電服務，為順豐集團解決低速電動配送車輛充電不方便、不安全、效率低的問題。順豐集團將在年底前為3萬騎手開通鐵塔換電業務。

不過，整個合作對中國鐵塔的核心增長力不強，未至於去到十分利好的狀態，因此，唔會對企業價值帶來好大的提高。

加上市場近期對科技類的企業都有估值減少的情況，因此，中國鐵塔股價都有所回落。

你唔需要太著重中短期股價與消息。

香港電訊（6823），現價合理，可分注投資，是不差的收息股，但增長力不強。

------------------------------------------------

Q18745：

先生您好！本人50歲，以下為本人股票分佈，請問比例分佈可以嗎？

應否增持或減少或增加哪種股票更為適合，另外#435，$3.5可入嗎？謝謝

#27，[email protected]
#548，[email protected]
#3，[email protected]
#939，[email protected]
#2800, [email protected]
#941, [email protected]

龔成老師：

你50歲，適合投資平穩增長類的股票，另外再加部分收息股。

從上述持有的，基本上都是有質素，以及屬於這類別的股票，方向正確，你可以持有。

你之後的方向，可以同步增加平穩增長類股+收息股。你可以投資盈富（2800）、港鐵（0066）、陽光（0435）等股票，陽光可入。

不過，這刻大市未算平，唔好用盡現金。

------------------------------------------------

Q18746：

老師，我最近第一次係股票市場損手，蝕咗7千幾，但感覺安穩d，唔使下下擔心幾時變仙股/跌到得幾蚊。

我買咗你幾本書，好informative 同深入淺岀！但我一直都懶，睇得80後百萬富翁既一半。今次之後我會努力研究

我本身對econ無咩概念，你d書對我有d難，要分開日日睇d，否則太多資訊有啲難消化。多謝你分享！

龔成老師：

止蝕是十分重要的一課，好多散戶一世都學唔識，但如果你要成為一個有實力的投資者，這一步好重要。止蝕是一個理性的處理方法。

不過，你要仔細分析，是這企業本質有問題，還是只是你「擔心變成仙股」的心理因素，你做每一個決定前，都要做功課，要有足夠的理據，這都是學習。

《80後百萬富翁》
《股票勝經》
《財務自由行》

是較為入門的類別，你暫時可以集中睇這3本，如果唔明，睇多次，慢慢會掌握得到。知識要保持增加，才可以提升長遠的財富。

------------------------------------------------

Q18747：

龔成你好,步入中年困惑, 誤買債基餐損失慘重, 手上還有現金但不敢投資, 有點徬徨，從經濟一週及網上看到你的信箱, 請求幫手重組投資組合而確保資產每年有高回報10-15%)及之後生活安穏.

先生及自已40歲, 夫婦二人合共月薪$70,000, 資產如下:

- 自己名 , 先生擔保, 物業價值 $900萬, 貸款: $700萬
- 現金: $150萬 (現想買些股票, 基金或ETF增值, 3年後可否增值到可多買一屋)
- 債基: 100萬槓100萬, 每月收息$9000
- 股票: $50萬 (中國鐵塔 / 小米 / 路勁(1098) / 紅星美凱龍1528

謝謝你幫忙.

龔成老師：

債券基金有好有壞，要小心平衡風險，總之你要記住，這不是保本的工具，同時你利用槓杆，放大了風險，投資價值未必如你想像般高。

由於你打算3年後，目標希望買多一層樓，所以在投資上，未必適合太過進取，同時，應該投資一些較有流動性的項目。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可小注考慮安碩恆生科技ETF（3067），但這基金現時處合理區頂位，因此唔好一次過入，要慢慢分注投資。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18748：

龔成老師. 你好, 小弟仍股票市場初階投資者, 想請問國藥控股1099睇法, 看其業績過往十年都有平穩增長(雖然未必算是爆發性增長)

嚟緊銷售疫苗應該亦對其業績幫助很大, 為何其股價仍然沒有點樣升幅, 其現市盈率都唔算高

現時這個價位是否值得持有, 想懇請龔成老師指教

龔成老師：

國藥控股（1099） 質素都可以，但增長力不算好強。

睇翻佢資料，佢係中國最大及具實力的醫藥分銷和零售企業，集團在中國主要城市以直接經營和特許經營方式管理零售連鎖藥店網絡，向終端消費者銷售藥品及大健康產品。

此股有質素，但賺錢能力唔算高，而增長力唔算太強，是平穏增長型。

佢有個比較大問題就係負債比較高，而度會扣左D分，整體而言此股有質素，可投資，現價合理的，你可以分注投資。

------------------------------------------------

Q18749：

老師，你好! 想請教一下，２８歲情侶，月入共7萬，預計兩年內月收入共９萬，未有任何物業。

現時資產如下
現金：６０萬
股票：８５萬
定期：１０萬

正計劃結婚置業。

請問以下那個置業計劃較理想？

１）現時先用一人名義購買約四百五十萬單位，先上車自住，留待日後收入增加，以另一人名義購入多一個細價單位放租，產生被動收入

２）現時直接用一人名義（加另一人作擔保）購買約六百萬至七百五十萬的單位自住，期待日後有升值潛力再換樓。謝謝你的時間

龔成老師：

要睇你地的實際需要，如果你地唔想轉來轉去，認為（2）的物業較適合你地自住，就（2）。但如果唔考慮自住（1）的方法會較平衡。

（1）的方法，置業後仍可有現金與股票剩，在配置上會較平衡。

不過，香港買樓物業的成本貴，你最好計算一下，（1）的方法，在長遠怎樣配合你的置業自住計劃。

簡單來說，如果不考慮自住，（1）會較好，但（2）可能較適合你自住計劃。其實你可以睇《5年買樓4部曲》，對你有幫助的。

------------------------------------------------

Q18750：

老師，我接觸左股票半年左右, 暫時蝕5萬5, 前兩個月開始睇左龔sir你幾本書,都開始睇緊巴菲特相關ge書,的確學左唔小, 認為市盈率估值法最容易同最接近合理預估.

1. 而我係 （股票勝經P.268） 睇到折現率計算,係關於1.無風險利率（長期:香港外滙基金票據）, 2.風險溢價（恒指十年複息回報率連股息）, 同埋該股的3.啤打系數, 即係大約折現率可以用E個方法求到?

同埋1同2我上網搵過, 但係係香港金融管理局同恒生指數官網都唔太清楚實際係邊度可以搵到?

2. 請問「預計」之後的現金流, 要如何做到, 因年年不穩定, 如未出新年報業績, 並不會知道公司現金流ge使用情況?

3. 而剛剛9月中係股市回調向下前兩日已經察覺唔對路已放曬貨,無賺蝕收手已經算有進本, 現時我預估, 都等緊恒指跌到21000-22500 及恒指市盈率低過10, 認為到合理偏低區就開始揀優質股入注?咁樣可以嗎?

4. 我25歲,持有25萬左右, 打算選2-3間優質企業作長線起碼1-2年持有, 如及後繼續評估並分析數據及年報,如優質不變會繼續持有, 觀察名單有3968, 11（銀行類打算選一間平衡風險,但認為越接近年底,銀行類會越向下調）,

以下的打算選其中兩間企業, 241, 285, 1169, 1797, 3918（風險較大,但認為潛力較大增長）, 345, 669, 823, 1211, 2382（認為風險較小, 但較優質於市場同類型及較平穩）, 希望龔sir能比意見, 組合ge優質度, thx

龔成老師︰

1）坦白講，我好講在這裡三言兩語講到，因為就算在股票班，都要較長時間同學先明到。

WWW.CMU.ORG.HK，這是「金管局債券報價網」，你找香港外匯基金--10年期--買入孳息率

另外，這是恆指服務公司的網：www.hsi.com.hk

2） 我地只能根據佢以往紀錄，去做一個合理估算。如果佢過往現金流都平穏，而未來佢業務上優勢，我都預期唔會有太大變動，咁我地可以假定佢將用現金流走勢，會同以往係一致。

如果企業過往現金流都好波動，咁就唔適合用這種估值方法。

3）你這個方法唔正確，記住我地投資絕對唔好用"估走勢"去做策略。因為無人會估到個市中短期點走，如果你當日放左，之後佢唔跌，反而一直升。咁你就要用較高成本，去買翻D優質股。

我地定買賣策略時，只會用平貴去做決定。現時大市在合理區低位，如果你無貨，應該分注入翻D先，唔好完全100%揸現金。否則個市之後升，你就會因無貨，而完全地失去一個增值機會。

4） 投資1-2年唔係一個長時間，5年以上才算係一個較理想長度。

你以上所講的股票，大致上都有質素。但有部份風險性較高，以下幾隻會較為理想，你可以參考下。

較平穏可選海爾電器（1169）、招行（3968）、恆生（0011）、維他奶（0345）、創科（0669）。

金界控股（3918）、比亞迪（1211）、比亞迪電子（0285）、舜宇光學科技（2382）就會有較大潛力，但同時波動也會較大，你要自己平衡。

由於部份股價已經係貴，如比亞迪、比亞迪電子、舜宇、維他奶等，入貨前要做先做好估值。

------------------------------------------------

Q18751：

龔成老師您好啊！我係您既fans，雖然未有機會上您的堂，但我一直都有留意您的每一個post, 2年前左右講到我同男朋友的儲蓄只有10餘萬

呢2年我地都有努力儲錢同增值自己，再加上適當投資，而家我地既資產（唔計儲蓄保險）大概有60幾萬

我地希望2022年前可以成功上車（屯門300呎左右小單位蝸居，有開始睇樓），我地會繼續努力的，想同你講聲多謝！

另外，最近我地睇到保利物業有點下跌，同時亦睇到中國內地物管市場，都想參考下您的意見

龔成老師︰

唔好客氣，做到這個成績，好大程度上係你自已的努力，要KEEP住，你一定可以完成更多財務目標！

保利物業（6049）係中國的物業管理服務綜合商，主要提供以下三項服務：（1）物業管理服務（2）社區增值服務（3）非業主增值服務：主要向物業開發商提供案場協助服務。

這企業的業務增長理想，現金流強，但上市時期短，規模細，都是不利的因素。過去市場這類股有少少熱，所以估值都偏高。

現時只係回翻去一個較合理水平，佢投資價值係有，只要投資唔過多，這股可長線的。

------------------------------------------------

Q18752：

龔Sir請問2101係味真係老千股？

龔成老師：

不是最近的騙案類別。

但最大的問題，就是上市價已貴。福祿控股（2101）是中國的第三方虛擬商品及服務平台運營商。

此股上市不久，有睇開我FB朋友都知，其實我唔係咁推薦新股。因為可參考數據唔多，很難估值。而且要時間，才會見真章。

以佢2019年盈利8000萬計，上市估已值貴，業務潛力度是有的，但要明白業務波動及現價仍唔平。

------------------------------------------------

Q18753：

老師喺沿用價值投資法之後有冇試過比較大既失敗/失誤既投資經歷？

如果優質股係價格越低越好 公司基本面冇變的話係咪唔需要理止蝕？

龔成老師：

其實又不算「價值投資法」失敗，是我當時運用得不好。

這是十幾前年，投資了一隻嘉利國際（1050），財務數據不差，於是投資了不少，但當時忽視了這股沒有太大的議價能力，佢有好多大客，但客太大，不斷壓佢價。

同時，十年前中國的成本上升，佢無法轉嫁比客，於是盈利大幅下跌。

當時我無仔細分析佢的業務模式，當大環境改變時，佢的弱點就出現，最後我止蝕了這股。

------------------------------------------------

Q18754：

龔sir：2638、6823,1398、11、778、435、548要在什麼價位入,還是現價入呢？

阿sir我應看你邊本書適合呢？我想從書本上先了解吓選股知識.唔該晒龔sir

龔成老師：

上述的股票，基本上都在合理區中間，你已經可以投資，只要分注，慢慢入，不要一次過入，同時留有現金，這樣就可以。

這些都是有質素的股，但由於是舊經濟，因此仍受疫情影響，股價表現未必好，但收息不差，長遠則會慣慢好轉的。

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q18755：

老師。我想問亞盛醫藥6855呢隻股值唔值得繼續持有。我35蚊有貨。

渣到呢加都唔識升。好驚會繼續跌

龔成老師：

亞盛醫藥（6855）這上市年期不長，我無仔細研究，因為新股一向的風險較高。另外這股最大的問題，是未有正式的盈利。

佢主要從事生物製藥業務，核心治療領域包括癌症、ＨＢＶ及衰老相關疾病。到目前，佢共有8款候選藥物進入臨床開發，正在進行28項臨床試驗和21個在全球範圍內提交的ＩＮＤ（試驗性新藥）。

企業不能話無潛力，但不確定性實在太高，是較高風險的類別，有危有機，如果成功當然股價好勁，但失敗都可以有好大打擊，而我地投資者要判斷佢的藥是否成功，其實都幾困難。只可以話，如睇好佢的產品將來市場發展，你小注持有都可，唔好理將來股價，重點是佢之後的研發與產品如何。

------------------------------------------------

Q18756：

龔老師早晨，今日又想請教老師，我現在正閱讀學習老師您的作品，但係發現自己係生活環境上的敏銳好唔夠，往往事情發生左一段時間才注意到

好想改善下慢一拍的思維，仲有想請問老師係咪要經常睇國際新聞或財經，有冇一個比較集中嘅app可以睇

我現在睇富途app，但係都覺得自己好似仲係好混亂揾唔到重點，都係東睇吓西睇吓。謝謝老師指點下

龔成老師：

我每日都會睇新聞與財經的，我睇電視，這已經夠。

反映app太多訊息，有時未必知邊d重點，而電視的，一般都是較重點的，這已經得到了基本的資訊。當知道最近發生的基本大事後，兩就著這些大事都找資訊就得。

但你有兩點要注意，第一，我地要「資訊」，不是要「意見」，第二，中短期，對企業無核心性影響的資訊，你不用過份放大。

------------------------------------------------

Q18757：

成哥，最近儲咗200,000現金，本身有10萬股票分別係月供嘅港鐵同盈富儲出嚟(每月5千)，仲有一手領展。除咗20萬現金，我每月可供多3千。

如果我想加碼，穩健上升嘅選擇，有乜嘢可以揀？
thank you!

龔成老師：

盈富（2800）與領展（0823）可長線。

如果想運用$20萬，你可以考慮盈富（2800），再加上其他股。

例如：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。最好當然回翻D先入。

現時大市處合理區，可以一邊投資一邊留現金（暫時你可留$10萬現金，用$10萬去分注買入慢慢入貨）。

而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18758：

成哥你好，我係你股票班學生，多謝你禁有耐性分享投資知識同埋一邊鼓勵學生培養正面心態，有啲覺得太遲先認識你！哈哈！如果早啲開始睇你書既話，應該可以走少好多冤枉路。

以下係我現時既狀況:
31歲
每月收入：正職35k，兼職5k，物業收租12k
每月支出：(租住+供樓) 21.5k
每月供緊：保險3k + 國指基金2k + 股票9k
每月可儲淨現金：10k
備用現金有20萬 (其中10萬諗住長擺唔用)
預計40歲時有2份保險基金可取現金70萬

現時股票大約22萬：
水桶1: 約30%
1177: 平均價$9 ，持倉佔比15% (月供1k)
777: 平均價$22.68 ，持倉佔比14%

水桶2: 約65%
1113: 平均價$9 ，持倉佔比48% (月供1k)
270: 平均價$12.78，持倉佔比2% (月供1k)
9988: 平均價$267.8，持倉佔比1.3% (月供1.5k)
388: 平均價$370，持倉佔比1.5% (月供1.5k)
2688: 平均價$86.5，持倉佔比6%
2800: 平均價$21.37 ，持倉佔比7% (月供2k)

水桶3: 約5%
1313: 平均價$11.49，持倉佔比0.5% (月供1k)
939: 平均價$5.7，持倉佔比4%

想求投資方向。唔好意思，我有好多問題都好需要你既指導

問題1: 1113長實
我知道持倉太重，但已經係認識你之前已經買落，而且睇完公司數據同基本面後，都對佢有信心(相信中美港政治同疫情情況只是中期，長期會回復正常)，期望10年後的回報。

如果繼續趁現價平，值搏率高，小注長期月供，慢慢拉低持倉比例，有冇大問題？

問題2：777網龍
本身見公司業務做開手遊，前景做海外網上教育，覺得中長期有前景，知道現階段公司教育方面仲係投資階段，未有回報。

但明明潛力高既公司，以往業績亦不錯，為何價位會一直插落去既？有啲不解，雖然有set止蝕位，但因為覺得基本面冇變，所以冇跟住止蝕，繼續揸緊。

成哥你點睇呢間公司？如果我期待回報期係2至3年，依家應該慢慢再加注(keep住15%持倉)嗎？

問題3: 9988阿里
我睇中佢既網上平台同雲端潛力，同埋現金流高，好穩陣，好想加大月供注碼，因為現時月供銀碼細，感覺要儲好耐先夠貨。

但心理上硬係覺得現價好貴。我係咪應該拋開呢個心態問題，加注呢？

問題4: 388港交所
覺得香港未來前景都係靠金融投資發展，所以覺得公司有長遠前景，怕依家唔買的話，將來升左買唔翻。

見你有講過呢間公司有個週期，請問現時是否週期狂熱期？可否繼續現有的小注月供，等下個交投淡既週期先加大注碼？

期待10年後回報或以後揸到退休。

問題5：
現時個倉蝕緊3萬，數目唔大，但心理有啲覺得唔太舒服，會有個壞習慣每日睇價位，會盡量睇多啲價值投資書去令自己有信心少少，但真係好難做到。

之前有試過短炒1313潤泥同1810小米，賺到成哥課程既學費，所以成日心癢癢想玩下短炒。

如果我分多一舊細錢專玩短炒，係咪其實都只係純止癢，效率一定不及價值投資高？

因為幾乎身邊冇親戚朋友同我一樣睇長線，佢哋仲會話我咁樣永冇發達，話我比龔sir洗腦 (我有啲嬲，所以想用時間同成績証明自己係岩)

想請教下成哥你當時點解決呢個心態問題？

問題6:
請問我個倉咁樣分配會唔會散？裡面既公司有沒有邊隻唔優質，可以剔走？

*2800我會慢慢加注。

多謝龔sir既耐心解答，期待你既答覆，同埋我應該會繼續在上課期間有無限多問題指教

龔成老師：

1）唔建議你再加注了，這股佔比已多，這是一個組合風險的問題。我對這股都正面的，雖然長遠不是高增長股，但好轉是無問題的。

你原有貨就持有，不過唔建議加注了。

2）網龍（0777）主要從事網絡遊戲開發（包括遊戲設計、編程及繪圖）及網絡遊戲營運；教育業務；移動解決方案及移動營銷業務。

另外，佢近年有發展教育業務，相信長遠都有前景的，但業務始終有不確定性，市場具體情況仍有未知數，所以，投資價值是有，但唔建議太大注。

我見你水桶1佔30%，但只得兩股，你保持30%無問題，但就唔應該只得兩股，這股較為集中。

3）阿里（9988）現價的確略貴，不過，由於本身有質素，加上業務有發展力，因此，這類股要大跌又唔易。最好的方法是月供，可以的。

4）這股好優質，但近年上左唔少，最適合的方法是月供，只要你同時留有現金在手就得。

5）你用巴菲特做例子就得，世上投資賺最多錢的人，唔建議人短炒，只會長線投資。

你之後唔好再短炒，同時唔好成日睇股價，唔好理中短期賺蝕數目。

同時唔需要同其他人爭論投資方法，你做好自己就得。

6）其實都有質素，唔算散，只要分配的比例可以慢慢調整。

------------------------------------------------

Q18759：

龔成老師，您好。我最近好迷茫，想請教你意見。這一年，我由月入三萬幾，變成失業。最近開始做一份七千蚊的half-time, 邊借政府錢讀master，希望捱過這兩年。

目前煩惱的是，前兩年開始買的醫療(無儲蓄，今年交一萬)及危疾保險(2 份無儲蓄，1份有儲蓄，合共交兩萬幾)，及投資基金保險(每月三千) 成為了負擔。

我應該如何是好？

朋友說現在有一份半職十分好，可以邊做邊找工作。 但看形勢，找不到之前收入的工作。

想起要交的保險，令我想索性放棄找一份收入比較接近的工作，及目前的half time，索性找一份能夠交保險及應付生活的勞工工作⋯⋯ 但又擔心日後回不了頭。

我應不應該放棄部分保險，令自己比較輕鬆面對低迷？

龔成老師：

我相信分成兩步先。

第一，你從收入著手，唔好太快停左果邊保險。

反正你現時都只是兼職，其實試下做其他工作都無所謂，我成日覺得，疫情是有危有機的，你可以做到好多原本無打算做的野，有時可能是一個突破位。

如果你這刻生活費方面有壓力，就唔好理，任何工都照做，提高翻收入先，這是做最重要的第一步。

如果生活費真的有問題，就行第二步，就是問清楚你手持的儲蓄及保單，睇下停供有那些問題，應該停那一份。

你這刻進行「提高收入」這步先。

------------------------------------------------

Q18760：

老師,怎樣可以分辨隻股票是否優質??
Thanks.

龔成老師：

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是分析的基礎。

如果要講，真的有排講，總之你要找出，一些較有競爭優勢，比其他企業較強，賺錢能力較高的企業。

在長遠的經濟發展上，這類企業的得益會較其他企業強。

----------------------------------------------

若你有問題想向本人發問，可在龔成的fb專頁中（龔成）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。