#bfmurmur1502 今年中五，幾個月前佢一句經歷多咗好難再好似初戀咁心動，原來我做咗咁多嘢，佢都冇感覺，到底我做錯啲咩？ 講返自己背景先，我係獨生仔，我自問屋企真係好幸福，爸爸媽咪關係好好，爸爸咩事都會將我同媽咪放喺第一位，亦都係因為咁我好細個就知做男仔要保護自己嘅女人，揀咗就要一心一意對佢好。 中三嘅時候認識咗佢，佢細細粒眼大大，第一眼見到佢已經覺得佢好可愛。嗰陣時我哋嘅關係好好，我覺得佢好細心好溫柔，又好為別人着想，所以開始暗戀佢。我知道要開始一段感情唔係玩吓玩吓，我唔知係咪真係可以比到最大嘅幸福佢，所以我想俾啲時間自己諗吓，再同佢相處下先。直至聖誕節嘅時候，我哋一班朋友有過自己嘅party，我表左白，佢亦都接受左我。我哋兩年嘅感情就係咁開始。 雖然嗰陣時我哋只係中三，佢係我嘅初戀，但係我已經係佢第三任男朋友。一開始我哋相處都幾開心，我知道佢有啲咩想要，或者有啲咩要幫手嘅，我都會即刻幫佢，即刻滿足佢。佢係一個好有獨立思想嘅女仔，佢都有同我講過佢其中一個男朋友就係覺得佢唔夠嗲先同佢分開。除咗過分獨立之外，佢仲有一個缺點就係好悲觀，初初認識佢嘅時候見到佢成日為別人着想，但係原來對住自己嘅問題佢好消極，一唔開心就唔見人幾日，短訊電話都唔覆唔聽，其實作為男朋友當然好想為佢分憂，但係佢偏偏好鍾意收埋自己，或者都係因為佢好獨立。我好鍾意佢，所以即使佢有呢一啲性格我都盡量去包容去接受。 我都有諗過或者我可以用其他嘅方式去幫佢，但係無論我做啲咩佢都好似冇咩感覺咁。中三係選科嘅一面，成績真係好重要，我同佢嘅數學成績一樣都唔見得人，佢亦都因為呢樣野成日都好唔開心，佢都好想補習去解決問題，但係佢爸爸唔俾，因為佢覺得好浪費錢同埋學校嘅老師都已經有能力解決佢嘅問題，我一直有補習，因為今年嘅課題難左好多，我都轉左去一間好啲嘅補習社，當然價錢都會貴啲。開頭我補完習之後一返到屋企就會即刻打電話教佢，但係效果都唔係太好，我嘅成績當然有好轉，但係佢就一直都冇進步，於是我將補習嘅位讓左比佢。 爸爸每次俾錢我交補習社，我就會幫佢交學費，佢去補習嘅時候我就去公園度坐，有事就買定嘢食接佢放學再送佢返屋企。我覺得只要幫到佢我乜嘢都唔介意，因為我覺得對女朋友好係男仔嘅天職。 去到中四，佢同佢本身玩開嘅嗰班女仔鬧咗交，圈子變得好細，中四嘅分班係根據選科嘅，我知道一班入邊冇一個好朋友一定好冇安全感，所以即使我好鍾意化學，我都陪佢揀咗中史，因為我唔想佢唔開心或者分組冇人陪佢。為咗佢我連自己嘅前途都可以放棄，因為我覺得佢先係最重要嘅嘢。當年我哋仲有生涯規劃嘅課程，我知道佢好想自己開一間甜品店，我同佢都有傾過我哋嘅將來，講真做甜品店又點會有足夠嘅錢過活，不過佢鍾意，我一定支持。 嗰時我求左爸爸好耐比我去返part-time，因為我知道要交租創業要好多嘅資金，所以我想偷偷地儲落一筆錢將來俾個驚喜佢，週末好多時候都會同佢周圍去，所以我唯有放咗學就算幾攰都去返工，咁先可以平衡到陪佢同埋賺錢，只要佢開心，我真係唔怕辛苦唔怕攰。 直至幾個月前，有一日佢無啦啦WhatsApp我同我講，原來一直以來佢都覺得經驗多咗，心動少咗，就算我對佢幾好佢都搵唔番初戀嗰種心動。我果刻個心好痛，我以為佢真係會係我將來嘅老婆，我真係好唔想冇咗佢。睇到呢度你哋或者會覺得一直以來都係我一廂情願，其實我都有諗過，畢竟係我暗戀咗佢咁耐。但係冷靜過後諗返轉頭，我哋都有為對方付出過嘅。 佢零用錢唔多，我生日佢都慳慳埋埋買咗部遊戲機俾我，我唔舒服，佢第二日要測驗放咗學都嚟探我。我知道感情冇得勉強，但係我只係唔甘心點解我要輸畀心動，我都有諗過，如果我係佢初戀結局會唔會係咁呢？無論點都好，我好想咁多位俾啲意見我，呢個打擊令到我已經冇勇氣再開展下一段感情，到底我哋之間有啲咩問題？到底我做錯左啲咩？ ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig