【龔成問答信箱】（Q20341-Q20360）

Q20341：

成哥您好！如果比你選一隻科技ETF用於長時間投資，你會選那一隻？為什麼呢？

龔成老師：

GX中國電車（2845），因為行業前景正面。

這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

安碩恒生科技（3067）都可考慮，有潛力，又平衡。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20342：

老師 1830 3.15入左 想加注的話 係咪要等佢回落小小？

龔成老師：

必瘦站（1830）有質素的。

佢業務正面，長遠有發展，有長線投資價值，現金流及財務數據都理想。

你有貨可持有，但最近上左去，如果想加注，真的小小好了。

------------------------------------------------

Q20343：

龔成老師，我系澳門人，41歲，與老公和4歲女兒一起住。在酒店工作，月薪7萬。我老公4萬。

由於過去一直不懂投資，所以都只是齋儲蓄，但自去年疫情開始，眼見周圍都非常動盪，所以覺得只打工儲錢很難保證將來。

去年經朋友介紹睇你的FB專業，令我獲益良多，於是我入手了小米，中生，金沙，月供盈富/恒基等，也見到收成了，非常感謝你無私分享你的建議。

由於最近剛大屋，下月起要供樓了（每月2萬8）,目前住緊是我先生婚前的自署物業，但還未供完（每月1萬1）。
我們打算新屋明年中左右裝修好才住，而現在住的單位放租出去（估計可放1萬2）剛好用來報補每月供樓的費用。
但這段時間兩邊供比較吃力。裝修後應該只剩幾萬cash, 以及一堆股票了。所以我想老師能否給我些建議，
一來睇下我目前手持的股票組合是否要修改，二來教我應怎樣做才能將投資最大化。

目前股票：
小米：8400股
必瘦站：8000股
建行：5000股
陽光房產：3000股
瑞星：1000股
中生：1000股
比亞迪電子：500股
阿里：300股
中國鐵塔：2752股（月供了8個月，最近停了）
中煤：796股（月供了8個月，最近停了）

月供股票：
盈富3千
港鐵 2千
恒基3千
銀河2千

感謝，祝投資順利！

龔成老師︰

我地進行財富增值，其實就係將一直貶值架"現金"，轉換成"優質資產"。你現時財富組合中，包括了股票、收租和自住物業，組合上算唔錯。

以你年紀，現時應集中在財富增值，為將來退休去累積一筆財富。

你現時持股有質素，可長線持有。但建行（0939）和陽光（0435）主要用來收息，增長力一般，唔好加注。

中煤能源（1898）主要從事煤炭開採及洗選、煤炭及煤化工產品的銷售、煤礦機械裝備的製造及銷售，以及金融服務。

煤炭部份為集團主要收入來源，而煤炭是商品類，產品沒有差異性，故只能賺取合理的利潤，不算是最高質的類別，投資價值中等，都一樣唔好加注和做月供了。

月供組合方面，無問題。但記住月供係要維持一段時間才有用，我建議最少供3年和持有5年以上，咁個效果會較明顯。

另外，現時大市只在合理區，每月儲蓄唔好盡用。最好留有部份，等大跌市出現時，可以用來掃貨。

------------------------------------------------

Q20344：

龔成老師你好,想請教下房地產投資策略。現在我家庭有一個純出租住宅單位在香港（已供完, 不打算自住因遠離市區）, 有一個純出租住宅單位（剛剛開始供）在加拿大, 自己在香港市區租屋住。

因為自己將來冇打算響香港長留，有機會會想移居加拿大，但又未確實清楚時間點係幾時, 唔知響香港買樓自住會唔會係一個好嘅選擇。

正在考慮應該在香港買多個住宅單位自住,唔使再自己租屋住好D; 抑或響加拿大買多個投資物業出租, 自己繼續在香港市區租屋住?

想問現在是不是好的時間買香港樓住, 買香港定加拿大樓之間有什麼因素要考慮?謝謝!

龔成老師：

由於你本身已有一個香港物業及一個外國物業，在財富組合中，物業類的佔組已經不少，除非你現金及其他資產好多，否則，你再買香港樓，未必是最好的配置，因為會令你資產集中。

加上你有可能去外國住，而買樓動作的彈性較低，因此，這刻你應該投資物業以外資產，以及流動性較大的資產，例如較穩定的股票，到你日後，才慢慢決定投資物業。

------------------------------------------------

Q20345：

你好！老師，我係你忠實fans,你所有書我都儲齊，期待你新書發佈，之前我一直都有月供1211

不過近排呢隻股票已經升到好貴，所以我已經停供，是否妥當呢？反而我開始月供中生同小米

雖然現價有d貴，不過我睇好佢未來前景，你認為如何？

龔成老師︰

比亞迪（1211）現價係貴，月供可以停一停先，你預回到$120左右，才再開始會較好。

中生（1177）同小米（1810）都係有質素潛力股，前者在合理區頂，而小米則偏貴。

但月供的話，由於長線會拉平均個價，所以現時月供佢地，係可以。

------------------------------------------------

Q20346：

你好，龔Sir！我係單親媽媽，想用供股方式去幫小朋友儲錢讀大學，而家供緊港交所同領展各$1500，供咗兩個月。

雖然收入唔高，我哋而家住公屋所以生活成本比較低。
請問應唔應該繼續供港交所？見到不停升，每個月買到股數比較小。

請問我應唔應該轉供其他潛力股？多謝你嘅時間

龔成老師︰

其實月供，長線係會拉平均你個買入價，所以你長線咁供就可以。

如果你唔識定平貴，自己經常去自行調整供款，反而有機會影響長線回報。所以，初學者最好係一直不變咁去供，會係最有利。

作為增長組合，你這2隻股票都適合。未來有新資金，可以考慮供多隻盈富（2800）。佢係包括52間質素不錯上市公司股票的組合，都係一個唔錯架增值選擇。

現時大市只在合理水平，每月儲蓄最好留有部份，等大跌市機會出現時，去入平貨。

------------------------------------------------

Q20347：

龔成老師，你好，想請教一下你對144招商局港口有什麼看法。

本人持有大約六手144 ，已購入數年，平均價大約$19，但近一兩年股價徘徊9-10元，
我應該止蝕嗎？謝謝

龔成老師︰

招商局港口（0144）有一定的質素，不過，近年有關貿易的行業，賺錢能力低左，同埋風險大左。

先講佢的基本面，佢係中國最大，世界領先的港口開發、投資和營運商，係中國沿海主要樞紐港建立了完善的港口網，並成功布局南亞、非洲、歐洲及地中海等地區。

佢有龐大的港口業務，於中國處領先地位，絕對有其優勢。不過，貿易因素受全球及中國經濟情況影響，將令業務出現略波動情況。

另外，股本回報率低，加上中國進入經濟增長較一般的年代，都令這企業的賺錢能力較一般，整體質素而言，算是中等。

過往股價一般般，長遠來說將平穩，股息則十分穩定，但增長有限。

如果你主要係想收下息，再加小小增長力，此股係可以。如果你本身想增長，就應該轉其他。

但由於你買入價都有少少貴，你上翻去，你要比些耐性。

------------------------------------------------

Q20348：

你好，老師，想問1211前景，應該短炒定長線? 我是放左3690入1211，放完3690就日日狂升

而1211就差不多日日都跌，搞到我好後悔放3690，而家應該點做好，請老師指點指教，謝謝你

龔成老師︰

短炒根本是無法賺錢，我之前做銀行、證券行多年，見證大量客短炒全部都蝕錢，只有長線才能有錢賺。

比亞迪（1211）係有質素架潛力股，但現價太貴，不宜入貨住。如果你只係小注，可守住先。（你唔好再著重短期，投資要以「年」做單位。

而美團點評（3690）都有質素，佢業務巨大，同時增長快，是有危有機的股票。但近期反壟斷政策，相信會對佢有一定影響。但影響有幾大，暫時無人知。

但相信只係會加強規管，而唔會係出現大改革，整體質素預期唔會大變，但增長力難免會受影響。

集團過往一直處於燒銀紙階段，至2019年才開始有少量盈利。未來是否維持，暫時都好難講，這類企業不是不可投資，但不能大注。

長線投資好重的，記住。

------------------------------------------------

Q20349：

你好，龔成師父，剛剛開始學投資，想請教你的意見
1）自己揀左幾隻股票想博佢長時間慢慢升，已經買左，可否提供意見，thanks!
564,3798,2002,1909

2）本人想買穩定得黎可賺錢的股票有邊款？因本人要供樓，養小朋友，有負擔的，謝謝

龔成老師︰

1） 鄭煤機（0564）主要從事製造煤炭綜採綜掘設備，以及製造汽車零部件。

此股唔係無質素，但賺錢能力唔算強，加算負債偏高，都係會扣分架地方。你投資都可以，只要唔佔組合太多，就無問題。

家鄉互動（3798）主要透過合約安排於中國從事開發、發行及運營手機遊戲。

佢剛上市，好多時要一段時間才可見真章。而且，本身這行業波動性都大，此股不宜太大注。

陽光紙業（2002），佢在2014年的核數師報告，有少少問題出左，雖然之後無事，但賣出這股較好。

火岩控股（1909）有質素的。佢主要從事開發網頁遊戲及移動設備遊戲（包括遊戲設計、編程及圖像製作）以及授權全球各地的營運商營運集團自主開發的遊戲。

遊戲已在北美、日本、歐洲及中國營運。集團收入主要來自授權費及出售遊戲幣。

業務發展理想，生意與盈利都有理想的上升，賺錢能力強，基本上有投資價值，暫時睇，前景仍是正面的。

不過要留意兩大風險，第一，佢行業是一些變化較大的類別，無人知當中的優勢能持續多久，始終市場變化可以較大。

第二，股價上落大。此股同樣都係可投資，但要控制注碼。

2） 如果你想較穏定，但也有一定增長力，可選一些平穏增長股好似︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

現價都在合理區，可分注，慢慢咁入貨。但留意，現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q20350：

老師你好，我係你長期粉絲，有朋友上過你堂，我都想上。

我想問現價有冇新經濟可以建倉長渣？我有250阿李巴巴4手，其他都無買了。想睇下有冇推薦。

龔成老師︰

安碩恒生科技（3067）、阿里（9988）、騰訊（0700）、舜宇光學（2382）、小米（1810）都係唔錯架新經濟股。

但現時只有安碩恒生科技（3067）、阿里（9988）勉強算在合理區頂部，可分注入貨，其餘都略貴，想買就要等一等。

而且，這些股有一定波動性，年青人係可以投資。但若你較近中年，比重就要少D，約佔組合2,3成好了。如果你已近退休，這些股就不適宜了。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20351：

成老師，我現在大部分持倉的是0005 HSBC
差不多不用損錢
請問應否到回本時賣出 ?

887 英皇鐘錶珠寶現價跌了很多, 請問應否買入持有一年以上 ?謝！

龔成老師︰

匯控（0005）係收息股，唔會有太大增長力。如果你目標只係收息，持有係可以。

但你現時太大比重在匯控，我唔建議個別企業持股高於組合15%，因為會有過度集中架問題。

所以你必需沽出部份，換至其他股票，去平衡翻個組合。

英皇鐘錶珠寶（0887）主要在中港澳經營腕表及珠寶首飾零售業務，本身零售就係受經濟週期影響。

而且佢多為奢侈品，個波動性就更高。而且企業賺錢能力好一般，長線換至其他優質股較好。

------------------------------------------------

Q20352：

龔sir你好 想問問新手黎講 以求穩收息的話3988可以嗎？ 同埋吉利汽車（00175）

呢兩隻點樣睇，適合月供嗎 因為之前未接觸過 玩過其他股票蝕過錢 想聽聽專業分析

龔成老師︰

中行（3988）係唔錯架收息股，但增長力會較弱。

而吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

但中國車市放緩、外來競爭、行業競爭加劇，都成為不利的因素，相信中短期仍會對佢不利。

未來電動車將為汽車業帶來很大發展空間，吉利在電動車方面技術都有，但唔算好高。相比比亞迪（1211），優勢唔明顯，故對這部份唔好有過高期望。

用這2隻股票做月供，係可以的。但中行（3988）係收息類，比較適合年長或好保守架投資者。

而吉利（0175）潛力較大，但波動性都會略高，適合較年輕投資者。你可以因應自已人生階段和投資取態，去決定選邊隻。

------------------------------------------------

Q20353：

龔成你好,本人收入不高, 上月尾剛開股票戶口,一開始接觸股票心態係想搵快錢, , 本來打算學技術分析賺錢（因為講到好易賺）,但偶然之下睇到你fb, 再買你出嘅股票勝經, 先發現自己心態係錯,

投機心態我完完全全體會到,價一跌就心慌,如果要自己無時無刻睇股票,不過學長線投資學揀股票, 起碼唔洗受短期股價影響令自己食唔安訓唔落

以下係本人少少背景

背景
30歲, 單身有物業 （無負債）
平均月入20, 000, 每用可儲約12,000
現金:70多萬
股票:有值數千元股票
無金融/投資知識. 依家未有能力分析股票既價值
目標:想進一步增加收入外,亦想將閒錢做增值資產, 達致財務自由 ,計劃用15萬做投資會否太少? 有以下心水, 打算慢慢入, 唔知可以投資邊幾類較為好,（暫時無乜興趣收息股）? 謝謝

安碩恒生科技
醫渡科技
小米
平安健康
農夫山泉
香港交易所
阿里巴巴
吉利汽車
騰訊

龔成老師︰

我地投資股票，係希望買入一些優質企業，透過佢自然增長，達至財富增值目的。而唔係炒炒賣賣，這種短炒方法，賺唔倒錢。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

由於你現時無乜選股經驗，你可以先用盈富基金（2800）作為你投資目標，佢係包括52間質素不錯上市公司股票的組合，有助你平衡組合中的風險。到你有一定能力，才買其他我建議的股票。

現時大市只是合理區，你現有70萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

而你所講架股票，都可以。除左醫渡科技（2153），不宜佔組合比例太過多，這股雖然有潛力，現風險都存在。

整體上，你持有的，都是有質素的，可長線。

------------------------------------------------

Q20354：

你好，龔sir！有些買樓問題想請教你的，煩請指點指點小妹一下，謝謝你。

本人同老公剛剛抽中白居二（白表居屋第二市場計劃），我可以免補地價買二手市場居屋。

問題：

- 而家是買樓時机嗎？白居二中懺率大約是5-8%（每年），我是否應該用呢個机會上車呢？

- 如買，應該點揀好？（因為本身住開港島區，想買返呢邊，但奈何無乜選擇，呢邊既居屋好多樓齡已過25 年，只能做六成按揭）現在將軍澳和港島東區揀

應該怎樣決定呢，長遠主要是自住用途，以後有需要換樓再作打算。

本身有月供股票，如黎緊可能買樓應否暫停供款 / 減少供款金額？萬分感激龔sir 既答覆！

龔成老師：

我先講下大環境先，香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

至於你的情況，如果你是有自住需要，其實可以買，居屋的投資價值不算最高，但從「自住」角度是無問題的，可以。

港島東是一個不差的選擇，你可以找找，只要樓齡不是太過舊，維修無太大問題，就可以。

如果你打算買，就要停止月供股票，儲多少少現金，完成整個買樓過程後，先慢慢做翻月供股票。

------------------------------------------------

Q20355：

老師，6993目前適宜入貨住？

另外，2100龔sir你點睇，騰訊入股之後佢一直升，值唔值得長線投資一下？

2869同6049邊隻前景好啲？
太多問題，唔該曬龔sir

龔成老師：

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，開始略貴，勉強小注投資都可以。

百奧家庭互動（2100）是中國兒童網頁遊戲開發商，透過旗下門戶網站１００ｂｔ﹒ｃｏｍ開發與運作的虛擬世界為用戶提供在線互動娛樂和學習。

佢收入主要來自出售遊戲相關的虛擬物品及服務、為用戶提供高級功能的會員訂購費、廣告收入，及授權使用集團的專屬卡通形象所得的收入。

騰訊入股會提高發展力，長遠正面的，不過擔心股價上得較多。如果控制注碼，現價不是不可的，但預佢有機會上落較大。

綠城服務（2869）會較優質，現價仍在合理區。

------------------------------------------------

Q20356：

龔成老師你好：
我是澳門人，即將進入36歲，有兩個女，8、9歲。最近半年才學了解投資，已睇左老師的網上課程。

現時資產：
存款有：20萬
股票：3988中銀（100000股）
2038富智康（100000股）
月薪：由以前3萬疫情變到得一萬
另外小朋友爸爸每月比$8000
每月支出：小朋友5000
。 供樓$15000，貸款440萬
年繳保險：$30000，儲蓄保40000
想請教老師我應如何做

1:想盡快供完層樓，現在才進入第三年

2:我目前係入不敷出，應怎樣調整？

龔成老師：

由於你現時收入減少，這刻唔好增加股票等投資，$20萬就持有，等過了這段時間先啟動翻累積財富。

現時你可以開發一些新收入，例如試下網上做小生意，或一些兼職，同時可以減少一些不必要的支出，而我又唔太建議減少保險等理財工具。相信疫情過後你會回復正常，這段時間只是短期。

到疫情過後，收入正常，你要開始投資，你36歲，仍是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股可考慮：安碩恆生科技ETF（3067），但比例一定要比上述的平穩增長股為少。

你做好財富增值先，不用急於還物業。

------------------------------------------------

Q20357：

想投資債券 本金十萬 中風險 over5厘
現在可行嗎？有什麼推薦的？

買股票定債券定債券基金定儲蓄保險好？
本身有買少量2800，也有買其他港股和美股

十萬本金 十年內不急用
謝謝

龔成老師：

你要留意一點，「債券基金」跟「債券」有所不同，債券基金坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

如你決定投資債券基金，必需理解當中風險和仔細分析。

你可以投資高評級的債券，就會較為穩陣，例如「A」級。你可去銀行問下。

至於儲蓄保險，都是可考慮的產品，但你就要問清楚當中的回報風險與條款。

另外，你可以考慮建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q20358：

你好龔老師，我今年30歲，月入2萬蚊，而每月可以儲1萬蚊。現時手持40萬現金，300股9988阿里爸爸(買入價$.259.6) 同埋10000股0815(買入價$.1.08) 。

如果想今年內有80萬可以如何部署?
現金和股票分配比例應該是多少?

龔成老師：

阿里（9988）有質素，可長線。

中國白銀集團（0815）風險高，唔太建議。

你30歲這年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

$80萬，暫時只建議投資$20萬-$40萬。當中較多是平穩增長，小部分是潛力股。

平穩增長股：你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20359：

龔老師，你好！
我今年28歲，月入約25k。
我想問下你意見 我持倉既分配可以嗎？

建設銀行10000股 @7.45
德視佳 1000股 @11.1
中國生物製藥 1000股 @7.84
中國鐵塔 2000股 @1.12
金沙 800股 @33.3

龔成老師：

上述持有的，基本上都是有質素的。

德視佳（1846）主要於德國、丹麥及中國以「德視佳」品牌提供視力矯正服務。

佢的服務可大致分為屈光性激光手術（包括全飛秒激光手術及飛秒激光聯合準分子激光角膜原位磨鑲術）、後房型人工晶體（ＩＣＬ）植入術；晶體置換手術（包括單焦點及三焦點晶體置換手術）及其他（包括用作矯正眼晴屈光不正的ＰＲＫ／ＬＡＳＥＫ及角膜基質環段ＩＣＲＳ植入手術）。

見佢的財務數據都不差，生意與盈利都有穩定增長，現價算是合理，但不是高增長類，同時由於規模未算好大，因此唔建議太大注。

中國鐵塔（0788）仍是有質素，但增長力比過往慢左。

上述持有的，不是差，但以你28歲的年齡，除了中生（1177）外，其他的增長力都不算強。上述你可以持有，但之後可加翻少少潛力類股。

例如可考慮：安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20360：

老師你好，留意你最近的post，除了#2800，都開始建議買 #3067，想請教呢類型都係可以長線持有的嗎？算係平穩增長嗎？謝謝。

龔成老師：

每個人承受風險程度，以及投資目標不同，如果想組合增長力高少少，可考慮：安碩恒生科技（3067），當然，風險都會提高左。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18101-Q18120）

Q18101：

阿sir您好，我依家睇緊notes，其中有一句我依家都仲係唔太明白，想向您請教一下：

“將流動資產減流動負債，若股價低於這價值，...”即係點計？點用？

謝謝阿sir幫忙解答

龔成老師：

假設流動資產$10億，流動負債$2億，當我地考慮企業的資產價值時，其中一個角度可考慮佢「流動性較強、變現能力較高的資產」。因此，將流動資產減去流動負債，就會得到$8億，反映這企業在流動性較強方面的資產價值有多少。

因為企業有好多資產，但不是每一項都值錢的，以這角度就可以計出一個較有代表性的數目。

下一步就是比較企業市值，如果現時的市值好低，例如$5億，低過$8億，反映佢在資產的層面，已處於平的水平。

當然，我地在分析時，應該同時考慮佢的業務價值。

------------------------------------------------

Q18102：

龔sir，想問你，好似無見你上一d電視或者網上電台分享投資心得?

因為我見到 aastock中午同收市都會有人黎講,但佢地好多時都用圖表分析咁講,比較少講股票的實際分析。

成日聽到就話,20天線升穿50或者100天線之後就會有升浪,20天線跌穿100天線就會跌浪之類,係咪無實際用途? 因為成日咁聽覺得好似有道理,所以先想學。

但之後先知技術分析無咩實際根據。

你會唔會有書教人分析平貴度? 定只係會系你上堂既時候教?

龔成老師：

我運用的是價值投資法，講長遠企業發展，買入後持有，而我這一套，雖然是最賺錢的方法（巴菲特正是用這一套），但卻在坊間不受傳媒歡迎。

原因好簡單，如果你仔細留意，佢地一般人贊助的，而贊助的大多是證券行或衍生工具發行商，佢地好希望人短炒，而增加生意，如果人人都用長線投資，佢地會好快倒閉。

另外，我順道在這裡有做小分享，我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

你可以睇《股票勝經》《年報勝經》。

------------------------------------------------

Q18103：

老師，新經濟股依家已經偏貴 等回落先落注？但又驚好似apple tesla 咁 長升長有。謝謝

龔成老師：

如果企業有實質的價值增長，就會不斷升，所以你要小心判斷價值與價格的情況，如果價格大升，就算價值升，都貴。

如果價格升，但價值大升，就會平。

------------------------------------------------

Q18104：

想請問一下老師，如果要找尋潛力優質股，可以從財務報表哪幾個方面看出來？還是有其他方法

龔成老師：

財務報表是其中一個方法，我地選股時，會用好多方法去選股，因為無一個方法是完美的，不同方法如同不同角度去尋找出優質、潛力股。

所以我在課堂中，會教5種選股方法。

另外，我課堂研究在一些財務指標，研究過往10年升10倍的股票，發展有一個財務指標，明顯比一般企業高的。課堂會有講述。

------------------------------------------------

Q18105：

老師，我有幾份保險都係用美元做，如果保險公司容許，係咪應該轉返港元? 聽說美元在不久將來會轉弱

如果繼續用美元結算，到時我提取保單價值會減少嗎？謝謝

龔成老師：

因為港幣用「聯繫匯率」，所以當美元貶值，港幣都會一樣貶值，無意思的，你照原本的就得。你保單唔會因此而價值減少的。

------------------------------------------------

Q18106：

龔成老師你好. 小弟23歲, 希望3年能儲到100萬, 然後轉行. 所以想問老師一些投資貿策略.

小弟工程系畢業, 現於電力公司做見習工程師. 一向對工程沒大興趣, 原本只是見前途不錯, 就打算做工程做過世. 中學時一向都想讀物理治療, 但physio收分太高, dse retake了一次也考不到入去, 所以只能放棄.

但現在做工程愈來愈無興趣, 然而對讀物理治療的心結愈來愈大. 所以便希望先儲錢投資到100萬, 再回去讀物理治療.

這三年可以令我更認清方向, 知道自己是否一時衝動. 然而儲100萬是讓我回學校讀書時仍可以交家用給父母, 更可以之後繼續投資以確保收入. 我有一些計劃, 希望老師給一些意見.

1. 我現銀行儲蓄連投資大約$15000. 月入$22000, 現在有做part time補習, 每月多$4-5000, 扣了家用($5000)日常洗費($2-3000), 剩儲應該大約$18-19000左右. 請問靠儲蓄及投資, 有多大可能在3年來儲到100萬呢?

2. 雖然我本金不足, 只買了一手金沙($30) 及2手太古($18.7), 因我看好這兩隻前景, 而且現在只是短期問題, 長遠便會增值. 如果之後投資

我打算50%資金儲起來, 到日後某些優質股或潛力股平的時侯才入. 而另外50%資金, 我打算在小米, 金界控股, 金沙,太古,中生製藥, 比亞迪, 港鐵中選擇. 請問我這投資計劃能否助我3年內儲到100萬?

3. 在1及2的計劃中, 會否有任何不足?

4. 能否給一些建議小弟, 如何增加3年內儲到100萬的成功率, 或縮短儲到100萬的時間?

5. 因為我人生閱歷不足, 我的父母也有點擔心, 令我也有點懷疑自己. 請問老師如何看我的計劃? 會否想得太理想? 26歲才回學校讀書會否太任性? 心態上或計劃會否不夠成熟?

6. 請問老師認為我這個計劃中, 會遇到的困難會是什麼, 而且應該如何克服呢?

很抱歉地我的問題太長. 因我也很重視這個計劃, 希望可以問得清楚. 謝謝老師. 我報了老師的投資班, 很期待到時跟老師學習!

龔成老師：

1）由於3年累積$100萬時間不多，因此你要加大儲蓄力度先度，否則好難做到。同時最好是增加收入，你要找一些高時薪的兼職。

每月保持儲$20000，才有機會做到。

2）方向可以，我相信如果你有耐性，算到這些股有明顯下跌先入，在平的價位買到，然後等佢倍升，你的財富有更大的增長，但這就要你有耐性，以及懂得把握投資時機，以及有估值的能力。

3）第一，要增加收入，第二，要加強分析潛力股的能力，你要自行發掘一些潛力股，希望比市場早一步發掘。

4）由於3年時間唔多，所以有難度，你要盡力提高收入，以及增加投資知識令你可以投資到潛力股。

5）你這3年，努力儲蓄及投資，完成左$100萬的目標先，同時可以好好利用這3年時間去想清楚。如果可以的話，你在這3年可以試下轉工（但不用轉行），這樣你可以更清楚自己是否適合這行業。

6）堅持。

要保持每月儲$2萬，並不容易，你每逼自己每個月都做到，另外，一定要花時間去研究股票，提高知識。

股票班見！

------------------------------------------------

Q18107：

你好，想請教，40歲，只有20萬現金，每月可儲1萬蚊，未曾投資，冇概念，可能2年後離開香港。

明天開始，我是否先買你一本書了解? 推薦哪本書? 立即先開 月供股票戶口嗎? 推薦哪間經紀公司?

2年後，我應該可以 賺到幾多錢左右?
感謝指教

龔成老師：

如果你將會2年後離開香港，我建議你這刻唔好心急投資，先學好理財知識先，然後想清楚如何建立一個平衡的財富組合。

建議你睇《大富翁致富藍圖》《財務自由行》《股票勝經》。

投資股票的流動性高，是其中一項可考慮的工具，但不是唯一的工具，你要多了解不同的工具先。

同時，投資股票往往要長期先有回報，中短期只會因股市波動而上落，所以2年時間，回報率未必高。

只外，在想回報的同時，都要明白風險。

------------------------------------------------

Q18108：

龔sir,你好,之前問過你,你解答我嘅問題，唔好意思,我又再麻煩你

因為你之前話我如果煤氣股我佔組合15%，我就不要再加碼，但係我不知道怎樣計算為15%,因為我有月供股票加分注買入

我現在月供緊七隻股:
港鐵 $2000
長江基建 $2000
金沙 $2000
香港電訊 $2000
中電 $2000
港燈 $1000
盈富基金 $4000

另外分注買入現持有
港交所 200股
置富產業信托 2000股
恆基地產 2000股
煤氣 2000股
對唔住文字較多及我再想問我月供組合可以嗎？

多謝你之前不厭其煩地解答我的問題

龔成老師：

要計算組合的比例，你可以用這股現時你持有的股數X股價，每隻計算，個股及組合總數，就可以知單一股票是否太集中。

由於股價會波動，所以差少少不是問題，如果差太遠，就要作出調整。

你所月供的股票，無問題，都是有質素的，同時比例正確，你可以進行不用擔心。

但這刻，你都要同時留有一定的現金，唔好過份集中在股票。

其實你的組合無問題，唔需要太擔心，比D信心就得。

------------------------------------------------

Q18109：

成哥你好，本人今年35歲，手持自住物業月供大約1萬，還有20年。

本人每月扣除所有支出，可儲現金大約2萬，現有月供股票$3,000 盈富 (2800)。現想組合一個月供$15,000的組合。

現時有現金10萬，另外現有股票組合價值大嘅$110萬（包括月供的盈富）

現有股票組合

1. 0006 @2500 (10%)
2. 0012 @3000 (8%)
3. 0066 @2070 (7%)
4. 0435 @25000 (8%)
5. 0788 @10000 (6%)
6. 0823 @2000 (11%)
7. 0883 @5000 (4%)
8. 0945 @500 (5%)
9. 1686 @4000 (2%)
10. 1810 @4000 (5.5%)
11. 1928 @1200 (4%)
12. 2388 @5000 (10%)
13. 2638 @5000 (4%)
14. 2800 @2207 (5%)
15. 6823 @10000 (10.5%)

月供部份就想1.5萬- 0270 ($2000), 0285 ($2000), 0669 ($2000), 2318 ($2000), 2800($5000), 6098 ($2000) , 這組合可以嗎?還是各2千的5隻有另外的選擇?

現有股票,如果派息穩定應該每年大約有6萬(約5%股息), 現時想法是將每年收到的股息大約每年分3-4注入2800，是否可以?

如果一直持有以上15隻股票加上另外每月月供15000, 再用每年收到的股息再投資2800, 這樣10年後資產可由現時110萬可滾存到大約多少?

希望可以得到你意見，十分感激。

龔成老師：

雖然你的選股都是有質素，但部分增長力較低，只是收息股，以你35歲來說，並不是最適合。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，香港電訊（6823）、電能（0006）、港燈（2638）未必最適合你。

至於月供股票分面，都是有質素及適合你的，可以進行。

要留意，你的持股隻數開始多，因此唔好再增加太多集數，否則管理上會較難。

如果你每年能保持10%的複息增加，每月投資$15000，加上原有的$110都以10%增長，10年後總財富會上到$500萬-$600萬。

另外要注意，你現時的現金數目不多，盡量要留。要等到大跌市先動用。

------------------------------------------------

Q18110：

9997,2328邊隻好老師請指教

龔成老師：

康基醫療（9997）係中國最大的國內微創外科手術器械及配件(MISIA)平台。

根據資料，按銷售收入計，2019年中國MISIA市場規模達到人民幣185億元，集團在國內廠商中排名第 一，在所有廠商（包括國際和國內廠商）中排名第四，所佔市場份額為2.7%。

根據資料，2019年銷量計，集團在中MISIA市場的多個細分領域，包括一次性套 管穿刺器、高分子結紮夾、第三類一次性電凝鉗以及重複性套管穿刺器和鉗中亦排名 第一。

初步睇，正面的，現價唔平，如投資，小注可以的。

至於舜宇光學科技（2382），有質素，有增長力，如果講業務的穩健度，佢會比9997強，不過潛力就9997較高，所以要睇你的風險承受能力。

------------------------------------------------

Q18111：

呀Sir，你好。想問下點樣計好個年回報率，因為我地用既係年回報率去計將來我地既財富總值，但因為我地係長線投資者

咁個回報率應該係計現價除買入價再Take返我地買左幾多年既Root黎計？

定就咁用年尾既價除年頭既價咁計？如果我想每年檢視一次自己既回報率，令自己可以確立到有一定回報率。

其次想問下，黎緊三年內應該會準備結婚，依家計緊3年後，大約28歲會有1m資產，但始終結婚都唔太想動用到

你會唔會覺得如果可以借稅貸用低息黎結婚好啲？因為人情都會收得返

龔成老師：

最簡單的方法，就是賣出/現價，除以買入價，但如果想每年計一次今年的回報，就是利用年尾你持股的市值，而該批股票年頭的市值去比較，然後再加上股息。

不過，我唔建議成日計回報，因為我地投資一定是長線的，你太集中短線計算，無意義，比亞迪（1211）早1、2年的思報都唔好，但今年就好好，如果我因為之前的差回報就賣出這股，我就會錯失了真正的回報。

因為我地投資，應該計算長期的回報，5年以上為基礎，這樣會較好。

雖然借貸之後能好快收翻，但始終會面對風險，我唔太建議，但你如果真的想做，我不反對的。

通常我只建議「借貸投資」，即是除了投資之用外，其實情況都避免借貸。另外，借貸始終有風險，如果有好明顯的投資機會才考慮用。

------------------------------------------------

Q18112：

我今年結左婚嘅，自己積蓄有3萬左右，同老公儲左大約80000，甘我應該點樣去分配投資？

另外想知道2800盈富基金
應該幾時買入

龔成老師：

由於資金唔算多，建議較多留現金，部分則可投資一些較穩健的股票。

盈富（2800）是最適合的選擇，因為盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。現價合理，已經可以分注。

另外，你可同時考慮配上其他股票：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金（即是你要留低一定的現金），而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18113：

老師你好，有BNO visa計畫後，我打算一年後去英國

黎緊想一個月草1萬左右，希望到時有12-15萬去，所以想問下，依一年將啲錢全部放係銀行存款

好似有啲浪費，所以打算6000放銀行，餘下嘅想月供股票，請問有無介紹？

我都明只係得一年左右，月供其實係作用唔大，但放唒係銀行又會覺得好浪費，有無其他建議？謝謝

龔成老師：

其實你持有現金會較好，月供股票要有較長時間，先可以見到回報，1年根本無乜作用，加上中短期的股價，往往只因資金流向，短期情緒等因素影響，而你唔會知道一年後的情況，因此，存有風險。

始終建議你持有現金好了。雖然回報低，但好過你虧損。

------------------------------------------------

Q18114：

龔sir又打攪到你，有啲物管既問題想請教下你

1. 碧桂園是內地最大地產商之一，每年銷售不少面積，因此能夠為碧桂園服務(6098)帶來不少新增在管面積，而第三方開發商潛力也高。

由於母公司是地產龍頭，規模大加上土地儲備多，因此6098的市盈率高是合理的？但現在70倍的市盈率似乎有點貴。

2. 雅居樂集團的銷售面積，我上網查過，只是約為碧桂園十分之一，因此每年能為雅生活(3319)新增的在管面積有限，而雅生活大多發展在第三方開發商，是否令3319估值相對較低？依靠第三方開發商風險會不會相對較高？

3. 奧園健康(3662)母公司中國奧園銷售面積近年高速增長，因此奧園健康在管面積也能快速增長。由於公司規模相對小，風險度略高，加上有其他非物業管理的業務（如大健康業務）也是令3662估值相對較低的原因？

4. 雅生活服務(3319), 碧桂園服務(6098)和奧園健康(3662)目前來看，哪一個較為值搏？感覺上物管股都不便宜。雅生活$35左右算不算是合理價?謝謝你！

龔成老師：

1）你的分析方向正確，佢擁有這些優勢，因此佢的估值的確能比同行為高，不過多少先算貴，這就無絕對的答案，當中亦會有主觀的成份。

我認為這股，已去到合理區的頂位。

2）你都可以這樣理解，但雅生活（3319）不止單靠母公司而同時會自行找生意，因此，這裡反映佢的潛力度。風險度會有少少，但整體仍是好穩健的。

3）這是其中一個原因。當我地分析時，要同時了翻佢自己本身的優勢及發展方向，前景等。

4）雅生活（3319）是較有投資值博率的一隻，$3X是合理價。

------------------------------------------------

Q18115：

龔老師,本人年50,現在才起步月供股票,希望能在退休後有約每月20000收息現金流,以下的股票能否為我做到呢？

003煤氣 1000
066港鐵 2000
2638 港燈 1000
823 領展 2000
1038 長建 2000

另外加
2800盈富 2000
1177 中生 1500

以上是否可以長線持有至退休呢？

龔成老師：

如果要每月有$2萬現金流，假設投資6%的收息股，即是要有$400萬的資金。

如果你每月投資$12000，15年時間，回報率10%，就能夠做到。

因此，你要做好兩樣野，第一，每月投資+儲蓄（準備投資）的金額，要有$12000，第二，你要爭取到10%的每年複息回報（連股息）。第三，你要堅持15年，滾存到近退休年齡時，就慢慢轉為收息股。

你可以集中投資平穩增長股，上述大致都是這類，但由於你年齡唔算年輕，因此唔能夠太進取，潛力股只能小注。

港燈（2638）轉盈富（2800）。中生製（1177）都可，但保持$1500好了，唔好加。

------------------------------------------------

Q18116：

龔老師，你好!本人今年30歲，澳門人，近幾個月開始學習投資股票市場，目前尚係一位初哥。

有了解到老師的專頁和書籍，一睇就愛上左!! 獲益良多。

目前本人積蓄約50萬，月薪4萬，扣除每月支出約每月可存2萬。本人目標係3年內結婚同買樓，初步計算過，差不多需要400萬。

所以想請教老師，我應該採取什麼方式的投資才能達到目標?

目前手持: 386 (中國石油化工股份) 12000股 3.62買入
788 (中國鐵塔) 14000股 1.4買入
1398 (工商銀行) 4000股 4.56買入
2342 (京信通信) 12000股 3.34買入
7299 1000股 7.775買入
7522 5000股 4.942買入

想問下這個投資組合有無問題? 有什麼不足? 如要達到目標要如何做? 月供2800 盈富能否有幫助? 謝謝老師!!

龔成老師：

坦白講，要在3年內滾存到$400萬，的確不易，你要好高回報先能夠做到，但如果強行追求太高回報，你所面對的風險又會好高，因此唔太建議。

較可行的方法：集中投資潛力股，同時你要大量研究股票，一定要比市場早一步找出潛力股，唔好等市場升左先入。不過，太集中在潛力股都有風險，你要自己衡量。

至於現時的股票。

中石化（0386）、工行（1398）只是收息股，不適合你。

京信通信（2342）都可持有，但股價略波動。

ＦＬ二南方黃金（7299）都可持有，但由於有槓杆，唔建議持有太多。

ＦＩ二華夏納一百（7522）是反向工具，好難玩的，唔建議。

比較穩健的方法，你可以投資「平穩增值股」+「潛力股」。

你可以考慮盈富（2800）再加上：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18117：

你好啊！我依家有1百萬，我想問下你，邊隻收息股好，因為我想每個月有固定收入，同埋可以長期持有？？

龔成老師：

投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜，因此買入時宜分注，同時不能用盡現金。

------------------------------------------------

Q18118：

老師，巴菲特轉增持黃金， 你點睇 ？咁樣有冇啲 有質素嘅黃金股份建議？

龔成老師：

黃金白銀這些貴金屬，我自己都有投資。方法好簡單，你不是睇升跌，而是「財富組合的配置」，現金永遠貶值，黃金白銀總有一定的價值，因此可以在組合中，佔比一部分，長線持有。

但由於無現金流，因此又唔值得持有太多。1%-3%已夠。

------------------------------------------------

Q18119：

龔成老師，請教下#1628 禹洲集團經常發行高息票據，但另一方面又提早購回即將到期票據，是什麼原因呢？這股票你又點睇？謝謝回答！

龔成老師：

這是一些資金上的運作，但我都唔知佢具體的目的，可能佢認為回購有著數，對公司有利，當刻就回購，而同時能以較低的利息去發行新的負債，就有可能這樣做。

當中涉及較多企業資金成本與有效運用的問題，要從外部分析並不容易。

------------------------------------------------

Q18120：

龔成老師, 本人32歲,一向對投資無興趣,但最近有感自己咁大個人仲係月光族,所以想學投資賺下錢,之後想移民。
之前亂聽人講買牛熊, 輸左4000蚊

又聽人講買左以下股票,全部都未番到本..我應該止蝕放晒佢定點?

6808 $11.14買1手
2333 $7.59買1手
9979 $3.41買1手
759 $0.92買1手
1128 $13.42買1手

我要由月光族變儲到錢移民係咪無希望?
我應該點增加自己既投資能力?
謝謝你解答

龔成老師：

牛熊這些衍生工具，好難賺錢，唔好再投資，我20年都有玩衍生工具，輸多贏少，所以唔玩。

至於股票，首先你要明白，我地繼續持有一隻股票與否，與你的買入價無關，因為這只是一個心理因素，最重要是企業的質素、前景。

買股票就是買入一間企業，原理就是買入企業等佢成長，因此，你根本不用理中短期因素，保持長線投資就得（如果是優質企業的話）。

高鑫零售（6808）、長城（2333）都有少少質素的，但未算好高。

綠城管理（9979）、永利（1128）有質素。

而ＣＥＣ國際控股 （0759）就只是一般。

如果你想財富有明顯改善，要盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以做月供股票，或自行分注投資，集中在較有質素的股。

你可以考慮盈富加上銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14401-Q14420）

Q14401：

老師，請教一下

我本身的工作，收入非常不穩定，自己年紀不輕了，快50歲，自己單身，但因為家庭有成員長期欠債，搞得自己都沒買到樓，錢久不久就會被清袋.....

手上有大約300萬，現在大部分錢都放在一些派息基金，還有少量是股票，散散的盈富、中電、港交所、領展、雅居樂、中鐵都各有一二手

現在開始想要為退休打算了

1) 派息基金，看似息口真不錯，不過清楚知道價格向下調，息口都是從本金來的，幸好3、5年來，總計算帳面沒怎虧，但這幾年沒增長，就是虧囉

2) 自己感覺供股對我來說，不是很適合，有錢時就直接買，不過我很少能把握到好時機，每次都是高價買入，但又不願意賣出，例如港交所290元會走去買....

3) 因為自己一直都是，當有一筆錢進袋時才買投資產品，有時因為對股票太不熟悉了，不想買股票，便去買基金

也因為經歷過幾次，家人要等錢時，什麼價位的股票、基金都賣，幾次碰上幸運基金都沒怎虧...所以又繼續買基金

是不是該轉一轉？因為年紀問題，不想再小注小注買，現在看似市道不好，是不是該把基金都放出，等股票下調後買入你一直看好的派息股？

龔成老師：

所有野，都應該以長期的方向去想，你應該開始做一些長期的調整，唔好太著重中短期策略與因素。你唔好再著重「賺多少」，應該著重，如果得到每月穩定的股息收入，你要改變你的思維，這點最重要！

以你的年齡，其實會開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的$300萬，暫時只能動用$150萬，因為大市唔算平，你要分注投資，同時留下一半資金。長線投資。

你可以投資「平穩增值股」+「收息股」，但就隨著年齡增加，慢慢增加收息股的比例。如果你唔中意月供，你就用分注模式去投資。

你過往太著重短期價格，以為捉到低位，但其實不易，建議你改用「分注投資模式，例如每隔3個月入一次，將一注資金分成多注去入，將買入價平均，對你會最為有利，能大大改善你的投資問題

至於選股方面，平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

如果你不想選股，就簡單投資ETF，例如盈富（2800）、南方Ａ５０（2822）、領航標普五百（3140），都是很適合你的。

至於你現時的基金，是否應賣出轉上述股，你可以睇兩樣野，第一，這基金過往5年的總回報，即是價格與股息，如果回報不供，不如投資收息股，收息股每年都有5%回報。

另外就是睇金基金的前景，你要分析基金組合、投資策略，如果只是一般，就賣出。

總之，你這刻要開始為你的退休準備，而所有野，你都要分析，這個項目，是否能在你的退休組合內發揮到作用。

------------------------------------------------

Q14402：

老師你好, 先感謝你無私的分享，我都追看你寫的書和文章一段日子，因為你嘅教導我也係開始左月供股票兩年了和每日都mark 低支出，月供計劃當中有賺有蝕但係我堅信你教導的月供概念，打算一直長線供款投資落去。

我有幾個問題，希望你抽空不嫌煩替我解困一下。

本人35歲, 下年年底打算結婚，職業是sales，收入大概係$60,000, 女友28歲收入大概$16,000。我現在跟我媽咪 (已退休，68歲，兩層樓收租$36,000)暫時兩人同住一層480尺私樓，結完婚打算都同媽咪一齊住，因為我好細過就單親。

自己支出大概如下:
- $10,000 家用;
- $19,800 供樓;
- $17,000 月供股票 (選股方面，$3,000盈富(2800), $1,000 金沙（1928), $2,000恆基（0012), $1,500 中銀（2388), $2,000 港鐵（0066), $1,000 煤氣（0003),$2,000 長建（1038), $1,500 領展(0823), $1,000比亞迪（1211) 和 $2,000銀娛(27);
- $7,200 月供一個公司儲蓄計劃 (利息大概5% 回報)。

資產大概如下:
- 一層自住市區私樓 (我個名)市值: $10M, 30年按揭欠$4.8M;
- 一層市區私樓 (媽咪名) 市值: $7.5M, 收租$18,800, 本來無按揭，但因為我當時無首期，媽咪要加，呢家按揭仲欠$1.1M, 每月供翻$16,000
- 另一層市區私樓 (媽咪名) 市值: $7M, 已無按揭，收租$17,200, 無按揭;

- 兩年前加按左層樓$1.12M走去買咗個車位 (我個名)收租大概$2,800, 放左大概一年都放唔走;
- 有個大概$1.96M (今年2019Q1開始投資@$2.2M) 嘅港股portfolio (由一向替我投資嘅長輩打理，每年review, performance charges 是15% out of performance, 即係個盤賺幾多，他就分個賺個啲嘅15%);

- 同時，可以建立一個$400,000收息股的組合，包括2500股（2388), 13000股冠君（2778), 10000股越秀 (405), 1000股(66), 開元 (1275), 8000股春泉(1426) 5000股置富（0778), 8000股陽光(0435), 20000股匯賢產業 (87001), 8000肌泓富 (808)和8000股 (貿易通);
- 另外有一個$200,000嘅普通股票組合，包括 300股騰訊 (700)，100股港交所 (388), 1000股吉利 (175), 6000股高偉電子 (1415), 12000股易大宗 (1733)。

1. 明白老師一向都提議大家月供嘅好處，所以如果想再加月供銀碼，我都想加多隻潛力股中生 (1177), 可惜我用嘅銀行無得選擇你有沒有提議我應該加碼到邊隻好？

2. 我如果月供加埋REITs (2778, 788, 808, 405, 87001 & 435) 好唔好？因為我呢家自己一手一手個個收息組合好似太少貨。

3. 我女朋友都聽完我介紹之後，開始每月$3,000 ($1,000 盈富，$1,000港鐵，$500 領展，$500煤氣), 你覺得需唔需要改？

4. 收息組合和普通股票組合，我都係高高地位購入，我知大部分可以叫做優質股可以長線投資，但你有冇特別意見？

5. 近排社會運動令好多retail 業務好重的公司股價影響好大 (例如利福，莎莎, 六福, 周大福), 如果係依個時間當儲貨長線值博率高唔高呢?定都係買番啲民生比較重嘅例如大家樂/大快活好啲？

6. 我其實想結婚之前搵三房單位，到時候住大少少，起碼三個人住，有多啲私人空間，可惜我媽咪住慣市區，唔肯搬入去新界或交通不太方便嘅地方，我其實3個方案，你可以俾我少少意見嘛？

方案1: 租我個名嘅單位俾人，大概收$20,000租金，再補少少錢 (大概$5-$8,000)去租三房;

方案2: 問媽咪攞層樓去銀行加按做首期，不過年紀問題，我相信加唔到幾多，而且就算有首期，我同媽咪都有物業，只可以用女朋友個名入市，但係她收入有限

方案3: 賣晒我自己個名嘅單位同車位

個車位最煩係賣唔出，我當賣出我自己單位有$10M, 還咗銀行個按揭$4.8M, 再拎$5.2M睇市區樓，媽咪因為最想住翻紅磡 (但黃埔花園三房都要大概$12M)，媽咪都接受美孚新村 (三房大概$9-$10M)，前者不用擔心老人家適應，後者我就可以樓換樓仲有啲錢套! 如果我買樓，我想儘量俾少啲首期!

7. 記得之前有另一個讀者問關於年金嘅計劃，老師亦都回答如果單以收息股和年金比較，都知你嘅建議就係我哋嘅年齡修息股同埋年金計劃都可能唔係一個好嘅投資但係我嘅portfolio 比較着重左係股票所以如果我真係可以慳到税嘅情況下，其實年金計劃係咪都係一個不錯嘅選擇？

謝謝指教，我嘅問題比較長背景亦都可能好複雜但希望老師可以花啲時間去睇吓我嘅問題分享下你嘅意見。

龔成老師：

1）我地一定是股票行先，即是該，你長遠想建立一個怎樣的組合，當中股票的質素如何，不會因為該銀行無得供，而買另一股。

中生製（1177）有潛力，可投資，如果無得供，在現價又少少貴的情況，你可以自己分注，小注小注慢慢入。

2）這些都是有質素的股票，但我怕你組合開始有少少散。第一，這是造成管理混亂，因為我地買得的股票，都應該完全了解，並在每次出業績時仔細分析，但當你股票好散，就好難全部都了解到。

第二個缺點，你要較長時間先能夠買入到一定的股數。

3）整體無問題，只要長期月供就得，如可以的話，盈富（2800）加多$500-$1000。

4）買入價不是重點，企業質素與前景才是。

你現時持有的股票，大部分都有質素，可長線持有，不過就有點散，你要注意翻這點，要記住，每隻股票都要充份了解先可以投資。

另外，易大宗（1733），核數師在近年的意見都是「保留意見」，反映盤數「有古怪」，這企業不宜持有。

5）零售股的投資值博率正在增加，雖然中短期會較弱，但長遠來說，仍有投資價值，零售股可考慮。

6）從累積財富的角度，方案二是較好，你可以賣出現時的車位（減多D、同找多幾間經紀幫手放，就較易賣出），再利用加按物業，去進行這一步，不過，就要你女友的名，不知你及你媽的想法。加上，按揭情況亦要問清楚。

如果這方案做唔到，就做方案三，這其實是一個換樓的模式，都是可行的方法。

7）以年金去慳稅，在理財中可行，不過，這難免會減少了我地整體的投資回報率，因為始終你仍年輕，投資應著重增值。

不過，你都可以將小部分資金，投資在這類慳稅年金產品，視為財富組合中防守的一部分，只要不多就無問題。年金在理財中，是防守性產品，有其存在價值。

------------------------------------------------

Q14403：

您好，想請教下，本人現時36歲，有穩定職業，但月薪只有$15000+不固定佣金，有陣時工時會好長，除開同最低工資差不多，拆賬率好低，好想自立門戶，但又好怕收入更加唔穩定。

有兼職可賺取三千多一個job，接到幾多job好難講。現時外債、學債、欠家人大約70-80萬，有咩方法可以喺兩至三年內扭轉而家呢個局面？

個人資產只有十幾萬嘅MPF, 同埋供咗四年經保險公司買嘅儲蓄單，要供十五年，而家供咗$6-7萬。

龔成老師：

坦白講，你這個年齡，是突破的最後機會，我會建議你盡快做突破這動作！

自立門戶是其中一個方向，如果你做了該行一段時間，應該了解到客戶的來源，這是重點，你要分析這行，你是否有能力自己爭取到，除了一些跟開你你的客戶外，能否自行到時找到新客？難易度如何？

你現時負債70-80萬，單靠你現時的工作，基本上要10年時間先處理到。但如果你肯突破，就有可能有轉機，當然，無人知結果。

不過，如果是我，36歲，我知道係我好重要的時期，我會用最大的決心突破，我會用盡所有方法去爭取生意，建立自己的事業，目標是2年常內處理好負債，並在之後有一定的財富！

------------------------------------------------

Q14404：

老師你好
想了解一下你的投資風格都是中長線嗎？

龔成老師：

長線。

20年前試過短炒，唔成功，之後我做過10年銀行同證券行，見好證好多散戶的投資成績，輸最多的就是短炒者，所以，決心永遠唔短炒。

------------------------------------------------

Q14405：

老師，我係你股票班的學生，仲上緊堂，你的堂令我獲益良多，謝謝你的教導。

我正在分析現時財富組合及檢討自己投資組合，
有以下的問題想請教一下：

1/ 計算財富分類

樓的資產值計算 , 是否只計淨值?
如一個單位現時銀行估值$600萬，但還有$200萬借貸，當做財務整體分析分類時，是否應該只計算$400萬？

2/ 水桶分類

我現時擁有以下的股票，請問下列分類是否正確？
水桶1: 1211
水桶2: 1 /3 /11 /12 /66 /823 /2800
水桶3: 5 /6823

如正確，現在組合應該是：
水桶1: 0.1% (剛於11月月供$1000）
水桶2: 78.7%
水桶3: 21.3%

現在年齡近50歲，你課堂上建議比例 20/40/40。

那我是否應該轉移多一點至水桶1， 如加大月供1211 至$2000， 再加入1177 （$1000）？

同時加入多一至兩隻收息股，如 2638 / 778 / 435 加上原有的 6823 每月每隻供$2000？

或者現時股價是否已可直接各入一手！之前再月供？

令組合分配更平均，正確嗎？
謝謝老師！

龔成老師：

我地會計算「總值」，即是每項資產，現時的總市值，所以，物業計算是$600萬

至於股票方面，上堂是大致的分配建議，你要睇翻自己本身的風險承受程度，以及本身的收入穩定、家庭財政情況而決定。

你可以加翻多少少水桶1，但唔好只集中一隻，最好有2隻或以上，比亞迪（1211）與中生製藥（1177）各$1500可以，到了這兩股佔你組合15%，就要減慢。

整體上，你上述持有的股票，都是有質素，並且都是適合你，方向無問題，只是比例上，可以慢慢增加翻收息股，令組合更平衡（增加收息股這動作，可以慢慢配置，例如用1年時間去做。

你可以現價，先買入置富（0778）、香港電訊（6823）、陽光（0435）、港燈（2638），之後再以分注成月供的模式進行。

------------------------------------------------

Q14406：

龔sir:您好！我由12月份開始用小册子記錄低每日的開支，但就冇分類。

我今天下載了應用程式。我由今日開始慢慢轉成手機記帳，呢個app有分類，希望下月可以有完整的數據。目標每月儲1千5至2千

另外，盈富基金，佢依家$28.10,價格是否偏高？合理價錢依然是24-26嗎？

之前曾經在$7.38和$6.9買入1177,之後升到$10賣出，今日看到1177升到$11。是否要等跌返落去$10以下才合理範圍。

總結以上，由於我可動用的資金不多（4萬），我心諗等到2800和1177跌回合理價錢範圍，才各買一手來長期持有。

上個禮拜我睇完你的著作「大富翁致富藍圖」，今個禮拜開始睇「選股勝經」，預計下個禮拜睇「50穩健收息股」之後再睇「50優質潛力股」，再之後睇「股票勝經」，我手上暫時只有你這幾本書，對於我呢個由零開始的中年人，以上的次序是否合適呢？

謝謝

龔成老師：

理財最重要是適合自己，同時保持進行，堅持最重要！

盈富（2800）現價仍是合理價，可以投資，不過，由於不是平宜價，所以在買入價，要同時留有現金，不能用盡現金。

至於中生製藥（1177），$10以上略貴，但記住，永遠無人知佢的走勢，我地只能從平貴角度分析。你可以等$10以下先入。

你應該次序：《大富翁致富藍圖》、《股票勝經》、《選股勝經》、《50穩健收息股》、《50優質潛力股》。

完成後，再睇翻我其餘的書。

------------------------------------------------

Q14407：

老師，中國鐵塔和福壽園，是否中國鐵塔比較有潛力和值博率呢?

未答都先謝謝!

龔成老師：

兩隻都是有質素的股，潛力度同樣有，但要睇未來大環境的方向。

中國鐵塔（0788）是5G相關股，接下來會進入5G年代，佢業務一定受惠，不過，佢本身的回報率不算好高，加上現時估值唔平，因此，又未算好高值博率，但投資價值有的。

至於福壽園（1448），本身有質素，不過不會象中國鐵塔有主題，但長遠有增長潛力，但現價都唔算平。

兩隻都是有潛力的股，這刻中國鐵塔會略略高D，加上有5G主題，相信中期會較強。

------------------------------------------------

Q14408：

龔 sir想請教下 我而家睇緊你既3 本 <50> 你當中會經常講到 如果股本回報率高係反映到再投資回報率 好。
但如果本身派息率高 就不能反映到。

我理解係。 如果大部分息都派俾股東 甘股東權益大左(分母) 但個息細左(分子) 甘除落去好似不大 但其實間公司賺到好多盈利 ?

龔成老師：

有關股東權益與派息等部分，你理解錯誤。其實，這部分要解釋不易，我上堂都要花一定時間，學員先大致明白。

我做一個好初步好初步的結構同你講，如果一間公司股東權益$1000萬，當佢今年賺左$300萬，佢將其中$200萬派息，這$200萬就會派走左，唔會再屬於公司，股東袋左，自行運用。

至於餘下的$100萬，就會成為「保行盈餘」，再投入在公司裡，這樣，股東權益就會變成$1100萬。

當我地計算下年ROE，就會以下最新的盈利，除以$1100萬，這就會反映到再投資的動作。

------------------------------------------------

Q14409：

老師 我不太明白 你在書中 的各公司5 年業績表 , 收益 同盈利代表乜 ?

因為往往收大好多 例如六福 2013 年 收益係134 . 盈利12. 4, 每股盈利係 2.11 , 其實係點計出黎？

龔成老師：

收益就是做生意的最基本收入，以六福（0590）來說，佢賣一個珠寶比你，例如$5萬，未計成本人工等，佢實收你$5萬，這就是收益。

佢到最後，扣除所有的人工、成本等，最後得到的就是盈利。

例如2013年，收益就是$134億，盈利就是$12.4億，而將這數除以總發行股數，就是每股盈利，即是每一股賺到$2.11。

你可以睇《股票勝經》，當中有較多股票基本的解釋，上我的股票班亦可。

------------------------------------------------

Q14410：

老師 ，之前見到你最3大持倉係，比亞迪，中生同金沙，如果學你咁用呢3隻做最大持倉做前題，再買其他股票，咁樣得唔得?

龔成老師：

你可以參考我的組合，但每個人的風險承受程度，以及佢的財政情況都不同，因此，你可以參考，但不建議複製。

這3隻都是可長線持有的股票，我會好長線投資（5年以上），會唔理中短期股價，所以，你都要有這個投資想法，先適合參考我的組合。

------------------------------------------------

Q14411：

師傅
請問1382買得過嗎？

龔成老師：

互太紡織（1382）本質不差，近年的增長力不強，整體算是不過不失。

從長遠的大環境，以及這企業過往的發展政策去分析，這股收息較好，不要對股價太有期望，而睇翻過往的派息政策，管理層都是將盈利中，絕大部分用作派息。

因此，這股收息不差，但見到管理層發展的野心不大。以收息來計，現價已可，有約9%股息率，的確吸引，已反映了業務一般的情況。

但始終增長力不強，業務有潛在向下壓力，因此，不建議太大注。

------------------------------------------------

Q14412：

你好。我最近加按，留一半錢在mortgage link戶口後，約有200萬想建立約6厘的收息組合。我暫時打算投資:

6823香港電訊，659新創建，1052越秀交通，3煤氣，778置富，405越秀，012恆地，1212利福國際，1848中飛租及1928金沙。

我本身已有匯豐(2400)，長建(2000)，比亞迪(3000)，佐丹奴(60000)，金沙(1600)，煤氣(3300)，新地(500)，恆地(2200)，灣區發展(10000)，冠君(8000)，中飛租(6000)。

另有月供21000股票，有中電，領展，友邦，中銀，金沙，地鐵，比亞迪等。

請問約6%新組合的股票是否合適?金沙會否太多?

月供的股票還有盈富

龔成老師：

首先，你上述持有的，都是有質素的股票，可以長線，繼續進行，同時在平衡組合方面無問題。

至於200萬想建立約6厘的收息組合，方向正確，因為加按而得的資金，風險度宜低少少，你可以投資上述股票，這些都是有質素的股，如果單一股票佔你組合15%以下，仍是無問題的，所以，你最重要是計算總比例。

（盈富當然可以較多，因為這本身就是一個組合）。

另外，現時大市處合理區，可以一邊投資一邊留現金，因此，不能用盡現金。

而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14413：

老師，我現在手上有6060、在28.9入659、在11.16入857、在3.84入，以上這幾隻可以繼續持有嗎？

龔成老師：

唔好比買入價限制左自己，最重要是企業的質素、前景。

眾安（6060）唔敢完全話佢無潛力，但暫時睇，業務仍未得，投資價值只是中等，小注可以，如持有太多，要賣出部分。

新創建集團（0659）可持有，這股有質素，但中短期會較弱，增長力為中等。

中石油（0857），商品企業，雖然有質素，但不是高質之列，可持有，但唔建議太多，企業處比較被動的狀態。

------------------------------------------------

Q14414：

龔成老師你好，本人26歲，學歷不高，不想做錯決定令將來痛苦。

我係一個普通打工仔，基本月薪23000，年尾花紅有5-6萬元，有現金100萬，已婚。曾持有939、1299，都已止賺離場。

由於已婚，打算買樓自住，首期、入息不算充裕，所以仲未睇啱。

股票方面，大部分都已沽出，只剩大約十萬蟹貨，沒有明確投資方面，希望老師可以指點一下。另外如果要睇老師嘅書學習投資理財觀念、知識，應由邊本書開始？謝謝。

龔成老師：

你要明白翻投資的正確觀念，我地進行投資，是整個理財的一部分，唔可以無整體性。簡單來說，理財投資，就是進行一個財富配置。

由原本只是持有貶值的現金，轉為持有有質素的資產，建立一個優質，平衡的組合。

不過，你現時仍有改善的地方，例如持有一些蟹貨（我地唔應該以賺蝕去決定繼續持有與否，而是以企業質素），相信，你賣出了建行（0939）、友邦保險（1299）這些有質素的股票。

首先，你要清楚翻自己的目標，是否打算買樓，目標樓價大約是多少，能否支付到，如果首期未足夠，之後的儲錢計劃如何？記住，買樓，最重點，不是分析之後樓價的走勢，而是你買入後，是否「供得起」。

如果這刻已足夠，還欠甚麼？是否可以開始睇樓？

當你計劃好買樓的資金及所需後，就可以更有效進行財富配置，例如，現時的股票，是否要賣出套現？還是，可以有剩餘資金作長線投資？

以你的情況，我會建議你睇《財務自由行》、《大富翁致富藍圖》、《股票勝經》。

------------------------------------------------

Q14415：

老師，我係你學生，我正在研究中國燃氣的年報，發現他毛利及盈利都增長理想，但每股盈利增長卻比較低我不太看得明白，請問你知道原因嗎？

在說的是2019-2020年頭半年的最新中期報告

我另外我想問你認為看公司賺錢能力應該看毛利，盈利或還是每股盈利最有代表性？

因為中國燃氣毛利增長有兩成半然而盈利增長只得18%以每股盈利增長就知道15%

龔成老師：

中國燃氣（0384）業務正面的，無論是行業發展，大環境，前景，這股都不差。財務數據正面，生意與盈利保持向上，股本回報率高，賺錢能力強，不過，負債少少高是扣分的地方。

整體來說，這企業都有投資的價值。

毛利是反映企業最基本的賺錢能力，反映當中最直接的成本，以及售價之間，是否有一定的利潤。至於盈利，則已是扣除了各開支後得到的淨利潤。

所以，當你見到毛利增長較盈利增長多時，反映企業在產品售價方面雖然有提升，但有一些成本卻無法完全轉嫁，如員工、維修等成本。

至於每股盈利增長不及盈利，這是由於增加了股數的發行，影響了每一股的盈利價值。

在分析企業時，我地會先分析毛利及盈利等這些財務數據，因為這是反映整間企業，而我地會先集中企業質素與估值的分析。之後，就會再考慮每股價值的問題。

------------------------------------------------

Q14416：

龔成先生：本人是你粉絲，現26歲，月入7萬，有約50萬股票（平均價：煤氣$15@5000、建行$6.5@20000、旺旺$6.5@20000、人保$3@10000和中聯重科$5.7@10000）。

首期預300萬，想2020年買市區兩房1000萬內自住，期望只供15-20年。

有沒有高回報穩建的股票和收息股介紹？中長線理財應如何分配？謝謝！

龔成老師：

坦白講，你打算中短期買樓，資金應該投資較低風險的項目，因為你的資金有實際需要，因此在投資上不能太進取。

現時你持有的股票，基本上都有質素，你可以持有，至於投資方面宜投資平穩增長股，恆基（0012）、太古地產（1972）、港鐵（0066）都可考慮。

------------------------------------------------

Q14417：

九毛九，買得過？

龔成老師：

九毛九（9922）這類半新股，分析比較難，因為財務數據少，好難做到準確的估值。

佢係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，不過現價就唔算平，小注都可以，初步睇，這股都有長線投資的價值。

------------------------------------------------

Q14418：

成哥，有個問題想請教，朋友內地母公司準備明年春天在美國上市，公司名字叫XX控股。

據朋友所說，認購pre-ipo，上市失敗會有12％息，上市成功的話最差預期是12％，保守預期是30％收益，有底層協議。

公司2018年利潤是1.8億，保守估計2020年利潤是3億。下有保底上不封頂

請問這個投資風險大嗎？朋友說是沒有損失本金風險的
他說公司上市後表現好就會退出，表現不好就會部分回購

龔成老師：

你首先要確認，這公司的財務數據是否真實，佢所講的情況是否真，在金錢方面，任何一個人，你都不能盡信，你都要有保障自己財富的概念。

如果你確認可以，這可以視為一個有風險，有潛在回報的項目，小注投資可以，但一定不能投入太多資金。

------------------------------------------------

Q14419：

您好老師，本人35歲，每月可儲25000, 想用15000作月供股票。

分配想是 2800 $7000, 0968 $3000, 0354 $3000 和 1515 $2000。請問這樣分配可以嗎？

龔成老師：

上述都是有質素的股票，基本上，月供長線投資無問題。

不過，信義光能（0968）、中國軟件國際（0354）都是潛力股，這類股，業務始終會有點不確定性，因此，每隻月供$2000會較好。盈富（2800）則可以加至$9000。

------------------------------------------------

Q14420：

成哥，你好，我請教你，你覺得如果想係投資上獲得成就，認認真真地去讀關於金融既課程還是去讀一些股票班會比較好？

龔成老師：

我之前讀高級文憑同大學，都是修「財務學」的。

課本上的知識，都有少少用，但坦白講，我自己出面狂睇書、不斷研究股票、不斷睇年報，這樣的得著更大（我相信讀書時的知識，佔我現時「能運用到的投資技巧」，大約2成。

因為就算是我的股票班，都唔會教到好似學術模式咁，我會將部分學術，配合現實的投資情況去講，學術野太理論，要調整先可以用得。

我會認為你與其花幾年去讀這些課程，不如花時間睇書、睇年報、出去上下堂。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。