【龔成問答信箱】（Q22301-Q22320）

Q22301：

Hello 龔 Sir, 幾個月前開始接觸你，另外，我先生買咗幾本你嘅書，我睇咗你其中一本書，其實我二十多年對投資都有少少心得，只係較少接觸新經濟股….

Anyway, 依排個市跌，股票跌了 10%，咁多年股市上上落落我都無乜所謂….

其實我想講返重點，因為做全職媽咪，我十幾年無返工，但我睇了你嘅書後，決定跳出 comfort zone, 揾咗一份我很愛的 part-time, 返咗幾個月，

我真係覺得好有意義又表現幾好….但係，我今日竟然唔知醒，今日公司叫咗第二個人頂上一日，我真係喊足成日….衝動下買了 #700 發洩…

今日的故事講完，想同你分享，希望下星期我繼續有工返

龔成老師︰

如果你有上過我股票班，就會明白，我地的同學好小心投資的。課堂會派一份6頁紙的「企業評估表」，我會逼佢地填好6頁紙，先可以進行投資，所以佢地的投資都好穩健。

人生路上，我地難免會遇到一些令人氣餒的意外。最重要，係我地有無方法，令自己收拾好心情，重新上路。

發洩，其實係無問題，因為係一個情緒抒發，可以幫自己調整好心情。

每個人抒發的方法都不同，有人會做運動、有人會去唱K狂叫、有人會去沙灘對住個海沉思...。只要唔好傷害到自己和其他人，咁就無問題。

當你情緒，開始可以慢慢回復平靜，我地就要客觀分析，點去解決當前問題。(記住情緒未控制好，唔好做重大決定。)

其實遲到，我相信好多打工仔都試過，除非你本身係遲到常客，或者本身比人印象係唔盡責。否則一次半次，你誠心道歉，相信問題不大。

由於你缺席，公司要找人頂一日，都係正常，因為人地都要運作。

希望你可以明白，人生總會遇上不如意的事，重點係你面對的態度，而唔係件事本身。

其實，我好欣賞你走出comfort zone的勇氣。特別你係一個無做野1X年的全職媽媽，就更加難得，你要加油!!!

另外，你好衝動咁買左架騰訊（0700），現價算合理區中部。雖然近期中央政策，對相關大型企業，有不利影響。

但騰訊（0700）係有質素和規模的公司，相信會慢慢適應如何在這些新法規下營運，因此長線投資價值依然存在。

不過，你預佢中短期一定會較波動，但長線持有的話，就無問題。

------------------------------------------------

Q22302：

1) 龔sir你好，最近我學習了SOTP估值方法，我用此方法評估了最近金山軟件的估值，你可以給我一點意見嗎？

金山內在價值：
網遊+辦公軟件=70億人民幣
金山雲= 108億人民幣
淨現金= 140億人民幣
獵豹移動= 10人民幣
但參考aastock 496.93憶市值
我計漏咗啲咩？

網遊和辦公軟件以33%增長，金山雲以一倍增長。獵豹移動大約股價$2美金，大概18億人民幣，現金就參考披露易最近的2020年全年業績

如果計算之後就變成價值$28.46一股，這樣就高了30%

2) 另外，信達生物最近研發出pemigatinib藥物針對治療癌症,並已經在台灣日本美國批准使用,並對信達生物業績增長一倍以上,如果股價跟隨大市回落至$60，即是到250天線附近。有見及此，值得買入嗎？

不好意思一次過問你這麼多問題

有機會出現MACD背馳嗎？恕我班門弄斧

1801信達生物(六個月圖)

龔成老師︰

1) 雖然有參考價值，但你都要明白背後原理，由於唔知你具體每一部分怎樣計算，有可能你這個估值方法，只簡單將企業子公司市值加起(持股部份)，再計入集團本身資產和負債，去做出一個市值作估算。

現時財經網站提供的市值，純粹係現價，再乘以發行股數。

而你這個方法，係要對不同分部，因應其特性和發展階段，用相應估值方法，去作出評估，所以唔一樣係正常。

其實，市值計算本身係好主觀，特別係一些估值方法，如果你唔係非常有經驗，只要數字有些微偏差，個結果可以差好遠。不同估值方法，會適合不同性質企業，唔可以亂用。

而且附屬公司、聯/合營公司計算比較複雜，如果直接閱讀財經網數據，係會有偏差。

所以係估值前，我地要按實際情況，對數字作出相應調整。這部份較難，我都係在自己的進階班，才會教授同學。

因此，我唔建議你單用市值，作為分析基礎。你可以用佢參考，但最重要都係了解企業本質，佢做什麼業務、行業發展狀況、財務數據、競爭情況等，去做核心會較穏當。

金山軟件（3888）主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區，唔建議大注投資。這股前景正面的。

2) 你要記住，我地投資股票，就等同投資一間企業。你最重要係知道佢本質、行業等基本因素。

過去股價未必能反映其未來情況，因此唔好再睇圖的趨勢，這是好錯的投資方法！巴菲特已經講到明，技術分析沒有作用的。我地只會分析企業的質素，以及企業的價值。

我20年前，都會用移動平均線、RSI、圖表等分析方法，但當我輸完又輸時，我決定放棄這些技術分析，從此我就不斷贏錢。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台。

睇翻佢資料，佢亦係腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

你所講的，是一個利好因素。

但由於仍處於燒銀紙的狀態，所以有危有機，潛力度是有的，但估值好難，現時市值都唔細，只能完全「估」佢將來的價值，不確定性好大。

只可以話，這刻投資值博率中等，你投資係可以，但唔建議大注。

------------------------------------------------

Q22303：

Hello 龔成你好，想請教下你關於現況應該點樣投資

我地二個人(30歲頭), 每月固定收入66000(已扣MPF)，係外地有個物業價值600萬左右係按揭每月交17000左右

現在手頭上有大約150萬現金，30萬股票，20萬黃金 (結婚收到的)

現在需要搬屋, 正係度煩惱緊買定租好 (如果租大約13000-15000左右)，銀行就話我地可以最盡係香港置業借到6百萬 (有說明外地物業同按揭情況)

不過我地就怕太risky/未係合宜嘅時間(定係等多1-2年再升人工先), 不過又好似好浪費現金,定係可以做一點其他投資? (唔係買物業)

希望你可以指點下我地. 不過如果你Post出黎我驚比人估到係我地, 好多朋友都有follow 你

萬分感謝!

龔成老師︰

香港物業，我唔知中短期會點走，但長線我預期都會維持上升。如果你2人係計劃，長線都會留係香港生活，我建議你要為自住屋，做定準備。

現時樓市雖然唔算平，但若果有配合到你長線生活所需，價格合理，足以你們長線"供得起"的物業，其實已經可以出手。

若果你都係想穏陣D，等人工高D先再算。現時資金，可以先投資在優質股，去進行增值。

你們可以選擇一些「平穩增值股」+「潛力股」作投資目標。若每月有一定儲蓄，建議進行月供股票，去提升增值能力。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那150萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

而黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多(<3%)，而且持有的應該為實金。

當然，如果這些黃金若有紀念價值，你係可以自行衡量是否保留，不必跟足<3%的標準。

------------------------------------------------

Q22304：

Hello 龔成老師，上次聽左你意見開始抽部分資金去月供2318，現在組合配置更佳。另外有幾隻股票想問下你意見。

1. 3309
2. 1368
想了解你對呢2隻股票睇法

3. 1830
由2.x 見你講必瘦站但一直無入貨，見而加升到差不多10蚊
想問下合理區同便宜區位置係邊呢

謝謝你！

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

特步國際（1368）不差的，生意與盈利都有增長，本身都算有品牌，不過盈利就較為波動，部分年份盈利出現下跌。但長遠仍是正面。

個別年份有生意上升但盈利下跌，反映成本增加，同時未能轉嫁消費者，又或者佢要用減價策略才能吸客，反映賺錢能力未必好強，質素有，但不能定義為最高之列。

整體都有長線投資價值，現價偏貴。等佢最少回2,3成，才好開始小注。

完美醫療（1830）長遠有發展，本身有一定的質素。而價唔平，$6/7算係合理區頂部。若你到平宜區，需要出現好大幅回調，才可以。

------------------------------------------------

Q22305：

講完投資，保險個part都想請教下老師

以3X歲女士有家庭，1個3歲小朋友為例，其實要投保（危疾）既保額大概係幾多先叫合理？（另有買醫療）

每個經紀講既都唔同，都唔知幾多先叫足夠

龔成老師︰

危疾，佢賠償係已一個指定金額計算，同醫療保不同。這筆賠償，無指定用途。

因此，危疾除了可用作抵銷部份醫療開支外(超出醫療保保障部份)，最重要係填補你因長期不能工作，所失去的收入。

由於危疾係一些大病，一般治療至休養，可能講緊係2-3年。所以，你可以用你2年年薪，作為基礎標準。

再按你現時和預期將來家庭開支狀況、保單條款等，再進行調整，咁就可以。

------------------------------------------------

Q22306：

龔sir你好，我現在持有 主要是收息股。正為退休作準備，還有少量其它股 等合適時機沽出換馬

現在有點舉棋不定，因為以下4隻收息股都是我比較喜歡的 但只能4選2:

1098 路勁
3383 雅居樂集團
604 深圳控股
1883 中信國際

有勞龔sir幫幫眼 打擾了 謝謝！

龔成老師︰

中信國際電訊（1883）業務穩定，整體質素算是不差，作為收息股係可以。

深圳控股(0604)和雅居樂集團(3383)都適合做收息股，但佢地負債較高，風險會高少少。

而路勁(1098)都有質素，但派息較受盈利所影響，作為收息股，就未必咁合適。

這些股票，現價都在理想，已經可以分注入貨，並長線持有。

------------------------------------------------

Q22307：

想请问Geely Auto 您又怎么看呢？

Xiaomi 现在的价钱算贵吗？


龔成老師︰

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂，至略貴。你預佢股價會波動，有貨可長線。如果現價入貨，小注都可以。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價略貴，回多1,2成，才開始小注會較好。

------------------------------------------------

Q22308：

龔成你好呀, 我一直有睇你既page同專欄, 好讚成你所講, 股票係應該要睇長遠, 加上近期短炒蝕過錢, 更加同意你的觀點。

因為都踏入中年, 加上疫情期間工作大受影響, 所以都好希望可以盡快學識投資,

近期自己心目中都mark定左兩隻, 希望可以請教一下你的意見 (唔知可唔可以咁樣PM你問, 如果唔得都唔緊要的。)

唔知可否請教以下幾隻股, 可長揸嗎?

- 中遠海控 (見佢升咁多一直冇買, 但前景幾好咁)
- 國泰航空 (一直在7蚊左右持有左好耐, 希望等到疫情完後)
- 醫思健康 (有新世界入股, 加上是醫美行業, 自己比較熟悉, 覺得前景不俗, 但之前又係升左好多, 一直未敢入)

多謝指教

龔成老師︰

我想你先明白一些投資概念，我地做財富增值，就係尋找優質企業，用一個合理，甚至平宜的價錢，去買入，並長線持有。讓其自然增值，以達至財富增值目的。

成件事，重點係「優質」之餘，買入價格都要係「合理」。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

這股係有投資價值，但現價略貴，未係投資時機，要等佢回2、3成會合理翻d，我地才可以考慮。

而國泰（0293），坦白講質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

若你持貨較多，建議等疫情過去，經濟好轉時，佢反彈就減持部份，去平衡風險。如果只係小注，你照長線持有都可以。

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂至略貴。如果你資金較為充裕，現階段先入一小注，係可以。

否則等佢回多1成才入貨，值博率會較高。

------------------------------------------------

Q22309：

你好, 龔成老師。最近開始睇左你d 文章, 想試下投資股票, 本人沒有投資經驗, 最多只買過ibond, 我對小米, 騰訊, 港鐵, 領展等都有興趣, 但最近個價位好似唔係好夠平, 唔知入唔入市好,

除左上述股票外, 有沒有些係最近較平同值得入手的? 還是等待時機入手上述股票好呢?

本人33歲, 有價值港元$55萬的英鎊, 港元$20萬在銀行高息戶口(2.5 厘息), 如果投資股票的話, 我應該動用英鎊還是高息戶口中嘅港元呢?

動用英鎊的話, 現在係好價位嗎?(其實我一直都想等好價位時把英鎊轉返港元再放入高息戶口) 謝謝!

龔成老師︰

任何貨幣都可以無限發行，因此長遠只會貶值，唔係有一個財富增值的好方法。若你的英鎊無實際用途，建議你將英鎊換回港紙去投資。

如果你擔心匯價問題，你可以分注咁，慢慢換翻做港元就可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」作組合，去創造一個增值平台。除了用你現有資金，我都建議你用每月空出來的儲蓄，去做月供股票，去加大你財富增值速度。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市現處於合理水平，那75萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

現價計，平穏增長股都在合理區，可開始分注入市。

而潛力股，暫只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22310：

龔sir, 好感恩幾年前有緣睇到你專頁，一向有買股票，都是輸多贏少，直至睇你分享先開始改變投資概念，1177,1211,285,到1810我都獲利不少，已賣出部份，

再加部份儲蓄，買到一個小單位收租，雖然不算很好的物業，但是真的好開心，剛看到你分享別人的喜悅，我也要向你説多謝，感恩你無私分享

龔成老師︰

唔洗客氣，我都係希望透過這個平台，去分享一些正確投資觀念。

希望可以幫到投資者(特別係一些初階投資者)，知道一些較重要概念，從而令佢地更大機會，找住正確方向。

雖然，你現時已有一定成績。但緊記要保持學習，長線投資才會做得好。

而且，你所講的股票，都係有質素。如果你係較保守投資者，而獲利又較多，可以"升一倍，沽一半"。

但緊記大部份貨，應該保持持有。因為長線持有優質股，增值效果才會係最好。加油!

------------------------------------------------

Q22311：

你好呀, 我脫你有介紹ETF #2800 隻股, 我想問咩價位入好呀? 我本身流動資金唔多, 又還緊債, 但我又希望可以增加資金, 想睇下買邊一隻好?

本身知道ETF 股都係收息多, 好似比較啱我咁

龔成老師︰

首先，盈富(2800)是包括58間質素不錯上市公司股票的組合，這些股票有升有跌，但長期計，都有不錯的回報。

買入盈富主要有兩個回報(分別是股價升幅，加上股息回報)，股息不多，大約只有3%，而股價升幅，其實有升有跌，每年都會波動，但長期平均計，都有5%-10%，當然，這是不一定的。

現價計，算係合理區，已經可以分注入貨。佢係平穏增長股，有一定增長力，但股息唔算多。

若你目標係收息，可以選擇X恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

至於投資邊個，你就睇翻你自己投資目標。一般情況，如果你係年青至中年，我會建議你投資盈富(2800)，因為你應先做好財富增值部份。

若你年紀較大，接近退休之年，穏定現金流去支援生活，才是你投資重點，故X恒生高股息率（3110）會較合適。

你可以因應自己人生階段，去進行配置。

另外，你要審視翻自己現有貸款，若息口較高，我優先清還貸款，以免影響長線回報。

------------------------------------------------

Q22312：

想請教1302 6988 及 9666。

龔成老師︰

先健科技（1302）為心血管及周邊血管疾病及紊亂所用先進微創介入醫療器械的研發、製造及營銷商，主要提供先天性心臟缺損封堵器（包括ＨｅａｒｔＲ、Ｃｅｒａ及ＣｅｒａＦｌｅｘ等三代系列）。

雖然近年生意都有增長，都有潛力，但始終規模細，不確定性較高，業務可能有潛力，但現時的市盈率處高水平，值博率較一般。

現價偏貴，要有好大幅回調，才好開始小注入貨。而且此股盈利都好波動，只宜小注投資。

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長。但就唔平，小注持有可以。

金科智慧（9666）有質素。

佢係中國西南第一的綜合智慧物業服務商，如果按佢綜合實力計，集團自2016年至2020年連續五年被中指研究院評為中國物業服務百強企業十強之一，自2015年至2020年，連續六年西南地區排名第一。

收益主要來源於四條業務線：物業管理服務；非業主增值服務；社區增值服務；及智慧科技服務。

包括各類住宅及非住宅物業，包括但不限於中高端住宅、商業樓宇、產業園、政府公建、高校醫院等其他物業。

生意與盈利都增長理想，暫時睇佢都有投資價值，但負債高會係一個扣分地方。此股投資係可以，只要唔好太大注，咁就無問題。相信長遠有發展的。

------------------------------------------------

Q22313：

老師你好，本人和太太各36歲，上年剛剛買樓尚有430萬貸款供29年，月入大概10萬，每月有4萬流動資金作投資，再加現金90萬，

想在3年後儲夠3百萬買多一層樓收租，本人唔識投資，想問下有咩投資組合可以加快達成目標，謝謝

龔成老師︰

我假設投資上進取少少，令你可以做到有回報有12%（連股息再投資）。你每月投資$40000 + 90萬現金，3年後大約會增值至300萬。

但你要明白，3年只算得上係一個中短期時間。最終實際回報，可能會較為波動，風險會較高。

從資產配置角度，你現時已經有一個物業，如果你咁短時間，又在增持有一個新物業。

除左成個組合會好偏重物業之餘，太短期內買2個物業，都會受較高價格波動性風險。(一般2個物業，買入時間最好相隔一個週期，大約8年左右。)

我建議你按部就班，透過月供和買入優質股，去為自已資產作增值。到你累積到一定金額，足夠你買入第二個物業之餘，都可以留下若干優質股增值才出手，會較理想。

財富增值方面，以你36歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

若你投資知識不高，可先較集中在平穩增長類股，至於潛力股，只宜小小注。到你提高投資知識後，才慢慢增加翻潛力股比例。

大市現處於合理水平，那90萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22314：

1) 我又如何得知此公司的每股盈利有冇加上物業重估呢？

2) 我想計比亞迪電子的合理股值，唔知我計得啱唔啱？

比亞迪電子現價$46.35

市盈率 水牛網沒有提供2021年市盈率所以我用9年
2020年 7.483 2016年 7.871
2012年 9.333 2013年 10.04
2018年 10.24 2014年 12.02
2017年 12.50 2019年 14.13
2015年 16.46

市盈率合理區域是 9.333 ～ 12.5

每股盈利 資料來自Aastocks
2016年 0.6112 2017年 1.3787
2018年 1.1044 2019年 0.7935
2020年 2.8725

5年平均值係1.35206，估計公司盈利還會持續增長，所以保守估計每年增長10%

1.35206 x 1.1 = 1.487266

股值合理區域是13.88 ～ 18.59

不知有沒有計錯，因為現價才$46.35相差太大。

3) 我最近留意緊國藥控股（1099）和中智藥業（3737）。我用阿sir你初階班比的企業評級表頭兩頁查過這兩間公司，機本上兩間公司都過關雖然唔係全部100分。

我睇兩間公司的官網都寫得自己點樣勁，但兩間公司的市盈率都低過10倍。流動資產-流動負債係正數。

初步睇價錢也在合理區之下。

想知道為何這兩間公司的市盈率會咁低？值唔值得投資？

謝謝！

龔成老師︰

1) 你可以睇年報中的損益表，就會知道佢有無物業重估成份。

2) 你現時這個計法，概念上係無錯。但做好初步估值之後，我地要再考量，到底這個估值，係唔係足以反映企業現時價值。

比亞迪電子(0285)近年賺錢能力有所提升，我地用過去5年平均數字，就可以能出現過於保守的情況。

因此，我地會以佢最新一年每股盈利作為指標，即係用HKD2.8725。

由於集團始終係代工企業(雖然有一定技術)，市盈率唔會太進取，我地會用佢過去10年中間4年數字，大約為10-12倍。

之後，再加多10%緩衝區。合理價大約為︰HKD26-38。

3) 其實就算係相同行業，只要業務性質、潛力、風險等不同，個市盈率都可以差好遠。

國藥控股（1099） 質素都可以，但增長力已經不算好強。

睇翻佢資料，佢係中國最大及具實力的醫藥分銷和零售企業，集團在中國主要城市以直接經營和特許經營方式管理零售連鎖藥店網絡，向終端消費者銷售藥品及大健康產品。

此股有質素，但賺錢能力唔算高，而增長力唔算太強，是平穏增長型。佢有個比較大問題就係負債比較高，而度會扣左D分，整體而言此股有質素，可投資，現價合理的。

由於佢已經係平穏增長型企業，增值潛力不及中生(1177)這類潛力股高，故市場給予市盈率，都會較低。

而中智藥業（3737）則相反，由於企業規模和品牌不大。雖然佢近年盈利增長係唔錯，但市場會較擔心，佢這個優勢，能否長線維持。

因此，會給予中智藥業一個較保守的市盈率，以反映當中的潛在風險和不確定性。

此股現價合理，但由於存在一定確定性，故只宜小注。

------------------------------------------------

Q22315：

我個人睇法認為。新世界，長期一定會好番，因為佢再俾人爆大鑊就可以執笠，但問題係驚短期甚至中期都有機會發現更多問題，始終起樓唔係一時三刻，

而今次事件反映QC部門同埋管理層有啲得過且過，其他項目都有一定機會有類似問題，只係未俾人爆或者佢地禁住咗，令中期不確定性同埋風險增加

另外留意到美國嘅經濟數據，FRB話經濟雖然開始復甦，但基層勞工市場仍然麻麻地，而高通漲相信係暫時性，仍未係時候改變貨幣政策。

咁樣會唔會令成個市場失衡，為市場復甦帶黎壓力？

龔成老師︰

中短期，新世界(0017)股價難免會弱。

但我地睇翻佢過去咁多年，其實都無出現過重大問題。所以，我會偏向覺得，個營運和監工上風險，未到話十分高的狀況。

長線投資價值，依然存在，但你預佢短期會較波動。

疫情雖然未算清零，但大部份已發展國家，已經開始穏定。相信經濟會慢慢向好，但這個唔會係一時三刻就出現，可能要幾年時間。

而中短期，依然會有好多不確定因素。例如不少發展中國家疫情未受控，對不少消費市場，或者不少企業的產業鏈，都造成不同程度的影響。

但相信這都是中短期，我都分析最好都係集中翻，係企業本質。外圍經濟因素，各國貨幣政策，係有參考價值，但佔比重不應太多，重點都係放係企業本身較好。

------------------------------------------------

Q22316：

Sir,水桶2 有咩好選擇啊？日清和雅生活算嗎？還有甚麼好選擇的？我今年34歲每月可儲2萬，現在儲一萬現金和一萬每月買d 股票的

暫時如下：

1. 科指 ETF 3032 15000股 $8.37
2. 小米 1810 1000股 $27.48
3. 阿里 9988 300股 $235
4. 京東 9618 100股 $309.5
5. 平安好醫生 1833 100股 $87.8

6. 日清 1475 3000股 $6.87
7. 京東物流 2618 100股 $40.36
8. 雅生活 3319 250股 $36.7
9. 福壽園 1448 2000股 $7.5
10. 鐵塔 788 10000股 $1.545

現金：35萬

龔成老師︰

日清(1475)和雅生活(3319)都係唔錯的水桶2股票，你現有持股，都係適合你。

以你34歲，可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有35萬資金可以再投入多10-15萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22317：

首次置業 按揭多好定係少好？

依家開始有個好習慣就係先儲蓄投資 再消費，一個月儲＄5000 另外$5000攞嚟投資 係3-4年之後有＄100萬 有冇問題？

龔成老師︰

其實多與少，跟你首置無關，我地主要係睇佢現行息率。現時貸款息率低，我地應該盡借，令我地可以空多更多資金，作其他投資增值。

你現時養成這個先儲蓄和投資，之後才消費，係一個非常好的習慣，你保持。

以你2X歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

假設投資回報有10%（連股息再投資），你每月投資$10000，4年後大約會增值至55萬。若你要達至100萬，就需要將金額升至$14000和供5年，才可以做到。

------------------------------------------------

Q22318：

師父1212 利福下至合理價低部5.95 ， 值得加注？

近曰消費股如六福，周生生， 莎莎都上番不少，何解1212返而向下？

啟德項目應該有利佢發展對嗎？

另外完美醫療已升至over $8 , 稍貴， 應否放一半？

3069 ETF 你有什麼意見？

龔成老師︰

我地投資，唔好太在意中短期走勢。我地要睇翻個重點，就企業自己本身狀況。

利福國際（1212）主要從事經營生活時尚百貨店及其他零售業務，以及物業發展及物業投資業務。佢透過崇光在香港專門經營百貨店。

中短期一定弱，但長遠仍會正面，不過回勇就要時間。同埋要留意，佢負債較高，因此唔建議投資太大注，現價合理區中下部至底部。

啟德項目，對佢長線發展係有利。但股價唔會一時三刻反映出來，要需要時間。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

如果本身有貨，就長線持有。若你持貨較多，現價沽少少獲利，都係可以。

華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

------------------------------------------------

Q22319：

龔老師你好，我今日34歲，未婚，冇乜經濟壓力，現時未有結婚及生育打算，月入二萬，月儲大約七千，現時擁有資產大約二十萬，其中八萬現金，十二萬股票。

經過你前三個月的教導，我購入多左水桶二的股票，現在股票組合比例大致平衡，現時持有的股票如下：

水桶1
1177 中生製藥 2000x$7.27 11.7%
3718 北控城市 8000x$0.99 6.4%
3067 安碩恒生 100x$16.06 1.3%
1448 福壽園 2000x$7.46 12.1%
3319 雅生活 250x$32.85 6.6%
2057 中通快遞 50x$230.4 9.3%

水桶2
823 領展 100x$74.55 6.0%
2800盈富 1000x$28.38 22.9%
2388 中銀香港 500x$25.1 10.1%

水桶3
778 置富 2000x$8.34 13.5%

快速增值：平穩發展：收息資產=47:39:13

1）請問現時股票組合比例平衡嗎？我打算長期持有無問題嗎？

2）現在我目標先儲現金，等儲到現金佔50%，才加水桶一股票合適嗎？

3）請問3718北控城市資源質素無問題嗎？現價（$0.96）是合理價還是平？我$1.92同$1.28都入左一手，現價可以再分注入嗎？值博率大嗎？等可以再等下？

還有等$15買3067，或等$80買平安好醫生，或等$23買小米，哪個值博率大些？謝謝指導！

龔成老師︰

1) 現時配置係可以，你長線持有，係無問題。但留意中通快遞(2057)始終唔係上市太耐，要再過一些時間，才可以見真章，所以暫時唔好再加注。

2) 現時大市在合理區，現金應佔3-5成左右。目的係等大跌市出現時，我地可以有資金入市買平貨。

而目標唔係集中係水桶1，因為水桶1雖然增長潛力大，但風險都高。建議你視乎當時平貴，再去慢慢平均分配在水桶1和2，咁會較穏當。

3) 北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中下部。現價加小小注，都可以。

至於平安好醫生（1833），無貨現價小注都可以，但由於佢不確定性都高，要控制注碼。

而安碩恒生(3067)和小米(1810)都有質素，但前者係一籃子科技股，較有分散風險能力。

3067現價中合理區上部，而小米就要回多1,2成，就算合理區頂，才可開始分注入市。以現價計，安碩恒生(3067)值博率會係3隻當中較高。

------------------------------------------------

Q22320：

龔成老師，我44，現在有以下股票，共35萬，另有15萬現金，月入2萬+佣金。

170萬按揭，供25年，每月供樓$7700，因為依家巳44歲，好希望可以10年內供完，請問我應該點做可以達到這個目標?

煤氣 18手
港鐵 3手，正在月供1000
中國鐵塔 5手

領展 1手，正在月供1000
盈富 2手，正在月供1000
阿里巴巴，上月開始月供1000

我有諗過每年年尾將花紅約2萬還按揭去減年期，希望可以加快完成供款，做法正確嗎？

龔成老師︰

以你44歲年紀，你持股和月供組合，都係合適的。你現時可以用這些增長股，去累積財富。

由於現時按息不高，我較建議資金先用作增值，而唔係去還款。這樣做，成個財富增值效率，才會較高。

現時大市只在合理區，每月儲蓄唔好盡用。最好留有部份，連同現時的15萬現金，一齊等大跌市出現時，可以用來掃貨。

我假設投資回報有10%（連股息再投資），你每月投資$4000 + 50萬資產(股票和現金)，10年後大約會增值至200萬。

到時你可以因應情況，再決定先還款(若到時息率好高，係可以先還)，還是保持增值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22081-Q22100）

Q22081：

亞sir!我係一個失業半年50歲幾歲既師奶，住緊層樓供緊，手上有既股票都係蝕錢，舊年老公買左微訊女股，唔見左80萬，想請教亞sir 可以點樣投資

龔成老師︰

你先要明白，自己過往投資失利的原因。

我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

另外，我地買入一隻股票，一定要知道佢質素、行業前景、財務狀況等，才去投資。唔好只係聽消息、聽人講、聽群組就去投資。

如果你連間公司點賺錢、行內有乜優勢、點解未來有發展和增長潛力，都答唔倒自已，咁就要停一停，唔好投資住。

以你的年齡，其實已開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

但見你過往投資都係失利多，建議你用月模式去儲貨。透過平均價格買入法，去減少你買貨風險。

你月供股票，可以供「平穩增值股」+「收息股」，比例大約各一半。每月先用一半閒錢，去做月供，另一半就儲起等大跌市動用。

但就隨著年齡增加，慢慢增加收息股的比例。到退休時，收息股應佔100%。

最後，你要審視翻自己現有持股，睇下佢地有無投資價值。如果有，中短期帳面虧損，唔洗太在意，照持有就可以。

但無質素，就算佢而家是賺是蝕，你都要沽出。

------------------------------------------------

Q22082：

老師 我想問下你意見，我（29歲）月入30000 我老婆（25）月入18000

兩人聯名買左樓 按揭9成 借600萬 月供21500 計埋水電差餉管理費一個月25000左右

同老婆加埋有15萬 想5年儲100萬 請問可以點 希望可以指點迷津

股票玩左年幾 少蝕

龔成老師︰

首先，你要了解清楚，自已過往虧損原因和作出修正。否則，你再開始投資，都只會越行越錯。

我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時29歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

你現時家庭收支只算係平衡，基本上係儲唔倒錢做增值。因此，你要努力開源節流，減少不入要開支之餘，最好多找方法增加額外收入。

目標係，每月都有一定閒錢，可以用來做月供，作累積財富之用。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那15萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

若你要做到5年有10萬這個目標，我假設投資回報有10%（連股息再投資），你就需要每月投資$10000 + 現有資金15萬，才可以達成。

你可以用這個數字作參考，計劃一下未來財務安排。

------------------------------------------------

Q22083：

老師你好,我剛開始學買股票, 時也有買老師你的書開始學習,感覺做短炒不如做長線投資, 但由於有家庭負擔我每月能存的金額是7500 左右 ,

現在開始買3988 打算用5年時間來買一定的股票來收息達到每年用息來還保費, 從而提升每月存款力,

現時想打算開個美股戶口每月買1手台積電 希望在10年後會有收成, 這個做法正確嗎 ?

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你就應先做好增值部份，而唔係儲收息股(3988)去交保費。表面上，你用收息股現金流去支付保費，從而增加每月儲蓄量。

但實際上，你投資收息，其實係拖慢緊你成個財富增值速度。建議你保費照用現金支付，其餘的資金用應增值會較好。

你可以用「平穏增長股」 + 「潛力股」的組合，如果你係偏年青，比例大約可以去到各一半。

台積電(TSM)係一間有質素架企業，在全球半導體業界有領先地位，都係一個唔錯的月供選擇。

但我地成個組合，長遠唔可以只係得一隻股票，否則會有過度集中性風險。我地要創建一個平衡性高的組合，當中包含不同行業的優質股。

以下是一些適合年青至中年人士的股票，你可以參考下。

你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資，相信10年後，會有唔錯成果。

------------------------------------------------

Q22084：

龔sir, 想請教一下在大跌市時（一、兩星期跌2000-3000點）的操作技巧：

如果我有三注資金準備在大跌市時可以運用，請問在買入優質股（新經濟股、舊經濟股）的買入時間及分注操作應怎樣處理呢？

我選的新經濟股(3067, 1810, 9988,700)及舊經濟股(2800, 1972, 3, 1928, 66, 1658)皆為優質股，在第一注買入的時候應該是買入新經濟股還是舊經濟股呢？

之後第二注及第三注的操作又怎樣呢？　我想在現階段構思一下。謝謝指教！祝身體健康、生活愉快！

龔成老師︰

你係一些投資概念上，可能未必太清晰。

其實大跌市與否，是否在1星期，還是2星期內急跌，都唔係我地一些重要考慮點。

我地只會從股票質素、平貴和是否適合你，去決定成套投資策略。你現時48歲，投資上係可以做增值，但要開始保守少少。

你所提及的新經濟股(3067, 1810, 9988,700)及舊經濟股(2800, 1972, 3, 1928, 66, 1658)，都係有質素。潛力股(3067, 1810, 9988,700)都可以投資，但最多佔組合2-3成好了。

但到時入邊隻先，你要睇佢當時價格平貴水平，去做決定。因為大市跌，唔代表所有股票，都會按同一比例一齊跌，所以你要按當時個別情況，去作出行動。

若你有3注資金，每注大約相隔10-15%，咁就可以。

現時你所講股票，大致上都在合理區。除了小米(1810)要回多1,2成，才算較合理外。

若你這些股票，都係無資係手。其實現價已可以入首注，只後再等有明顯回調，才再出手。

------------------------------------------------

Q22085：

龔老師您好：首先十分感謝您無私地與我們分享投資知識，令我明白到價值投資法和短炒的弊端，投資股票等於投資一間企業的概念。

我今年25歲，2018年時盲目地在高位入了下列股票後持有至今：

6881 $5.2 1 手
1528 $8.5 4手
939 $ 7.1 3手
1398 $6.6 1手
3988 $ 4.4 8手

今年機緣巧合下接觸到你的facebook page，十分認同你的投資概念，便立刻去買你的書來學習後再買入下列股票：

66 $44.3 1手
270 $12 1手
1177 $7.65 2手
1928 $36.15 1 手
1972 $22.80 2手

我看你給其他人的意見是在我這個年紀不應該持有收息股。請問上述內銀股應該放住收息待股價上升，還是現在蝕住賣出然後把資金轉去投資平穩增值股呢？

另外，1528 和 6881 應該止蝕嗎？

感謝您的指點，祝 身體健康！

龔成老師︰

你今年25歲，還很年青，投資選項上應以增值為主。

你現時持有股票，大致上都有質素，可長線持有。除了紅星美凱龍(1582)質素較一般，長線慢慢換至其他優質股會較好。

中國銀河（6881）係中國綜合性金融服務提供商，提供經紀、銷售和交易、投資銀行和投資管理等綜合性證券服務。

主要業務分為經紀、銷售和交易，投資銀行，投資管理以及海外業務。佢已開發多項新型資本仲介型業務，是首批獲中國監管機構批准經營該等業務的證券公司之一。

質素與發展力都有，但業務就較受投資市場影響。長遠都算有發展力，但未必是高增長類別。

至於現有銀行股，我建議你沽出部份，換至其他較有增長力股票。

另外，長遠我建議你可以加入一些潛力股，去提升成個組合增長潛力。

但由於你投資知識不高，因此可先較集中在平穩增長類股，至於以上潛力股，只宜小小注(不多於3成)。到你有一定投資知識和經驗，才慢慢增加潛力股比例(大約5成)。

------------------------------------------------

Q22086：

老師～本人3X歲，有1個小朋友，有現金$50萬，打算拎一半$25萬作投資增值。

每月扣除開支可剩$12000，打算一半（$6000）月供股票，另一半先儲現金。

1. 現金25萬現價入0066，1928，1810，1448，1177可以嗎？比例應該點分配？（如不適合，應如何步署）

2. 月供方面按以下分配可以嗎？

2800 $2000
3067 $2000
0388 $1000
0548 $1000

3. 月供揀佐既股票，25萬中的投資可以重覆嗎？

4. 00097 恒基發展有潛力嗎？

謝謝老師耐心解答，其實點先做到投資每年增值10-15%？

龔成老師︰

1) 你現時資金配置上，係正確的。而這25萬，我會建議你分成2-3注，慢慢去買入這5隻股票。現價先入一注，每注相隔大約10-15%。

但由於現時小米(1810)有少少貴，首注比例上，你要調低少少。

2) 深圳高速公路（0548）只係收息股，對你而言，有少少保守。我建議將佢換成一隻平穏增長股，會較合適。

3) 可以，只要佢地佔比重，唔會過多，影響到組合平衡性，咁就無問題。

以你年紀，平穏增長股和潛力股，大約可以各佔一半(若你投資經驗較淺，潛力股比重要下調。)。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

而盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

4) 恒基發展（0097）算是收息股，但唔能夠叫做「好穩陣收息股」。

佢持有「千色」零售業務，由於業務較為單一，同時規模不算好大，因此本質上有較大的風險。雖然派息穩定，但零售轉弱，對佢有影響。

中短期，佢仍可以運用內部資金，作支持去派息，但如果業務長期弱，佢派息會減，這就是風險。

你唔好預佢有明顯增長力，只算係收息股，不太適合你。

至於每年10-15%，其實你長線用以上月供和儲貨計劃，相信很大機會，可以達成這個目標。

------------------------------------------------

Q22087：

謝謝你的解答，其實我見有啲ETF同基金投資既內容都係差不多，費用當然基金貴些，但ETF每次買入都有舊手續費，所以都拿不准。

我都打算長線揸，不會隨便贖回，現在感覺23歲可能不太適合做長年期基金投資了。

多謝老師介紹平穩增長股同潛力股！會好好研究，不知道如果分注，每個股票月供資金應點分配呢？

例如現在二十萬資金，投入一半是十萬，每月分注供VOO/QQQ/盈富其中兩款，如果先供各$2000，要持續供到有多少貨才停手，等下跌掃貨或者可以買其他股票呢？謝謝！

龔成老師︰

你可以先將10萬資金，分成多注，現價先入一注。只後當每有10-15%回調，就再加注，直至資金用完。餘下10萬，就等大跌市。

而月供方面，你可以先每隻ETF各供$2000。現時大市只在合理區，每月資金唔好盡用。最好留有部份，等大跌市出現時，可以用來掃貨。

我地唔會話，供到幾多手就停。因為我地其實係將貶值現金，去換成資產，令我地可以有財富增值效果。

這個動作係一直進行，除非好貴，我地才會停一停，甚至減持，去增值翻現金比例。

至於其餘股票，到你有一定投資經驗，對佢地又有了解，才好加入。

------------------------------------------------

Q22088：

龔先生你好，追左你d post 1年有多， 之前$40蚊月供左比亞迪 後來有大錢要用 $150左右放左。 係度 要講聲多謝， 因為係買股票來賺個%係咁大。

宜家歸零重新出發 再月供過 想請教一下。

月入18k, 兼職1-2k ,33歲，每月大約剩6-7k,宜家每月用2k 月供，分配如下

1177$500 現持494股
2382 $500 現持13股
2800 $500 現持82股
6823 $500現持89股

另有3067 ，400股 ；6990, 200股

(i) 現增值比例組合可以麼？

（ii) 月供金額要唔要加多點？定建議保留月供金額，相反每月固定買一手3067

感激，因為有你，所以先學識月供，學識儲蓄。

龔成老師︰

比亞迪(1211)係一隻好優質的潛力股，如果你之後有資金，建議你入翻少少。但現價偏貴，只宜月供。若想直接入貨，最好回到$120才開始考慮。

你持有安碩恒生科技(3067)有質素，適合你。而6990，我相信你打錯了股票編號。

(i) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你33歲年紀，應先做好增值部份。香港電訊(6823)只係收息股，增長力欠奉，唔係咁適合你。

你可以用以下股票取締，若你有一定投資經驗，可選潛力股。相反，你投資經驗較淺，或者相保守d，可選平穏增長股。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

(ii) 現時大市在合理區，我建議你月供加大至$4000。餘下資金就儲起，等大跌市機會。

新的月供預算，你用來每個月一手手咁買安碩恒生科技(3067)，係可以。但你餘下新增資金，就最好用來買平穏增長股，否則組合風險性會過高。

因為你雖然年青，但都唔可以太集中係潛力股類別，最多係50:50比例好了。

------------------------------------------------

Q22089：

龔sir, 我有一疑問，現我兆康苑單位以每月＄10500租給一客，即每年收租12萬6千，而中銀網上估值是511萬

1. 樓價511萬，如以現每年3%回報來計算，租金是應是＄12775才有合理回報？

2. 我現的出租金額是否低於市價？

3. 這個回報率的情況，我應以銀行的估價，還是以租金回報率的估價為優先的估價方法？

龔成老師︰

1) 3%這個租金回報率，算係一個合理水平。但由於樓價係會有波動，受市場需求、氣氛等影響，故租金回報率都會跟住變。

現時香港整體樓市，都係一個合理區頂位至略貴水平。因此，租金回報率少於3%，都係合理的。

最重要是物業係有質素，你照持有個物業就可以。

2) 你可以同同區類似樓盤作比較，如果差唔多，咁就無問題。

3) 如果你係想睇單物平貴和投資值博率，可以用租金除以銀行估值(最好係用實際市價)，去計個租金回報率。

------------------------------------------------

Q22090：

我其實好有興趣上你嘅堂，但我對投資完全零概念，之前完全冇任何投資經驗。

我今年54歲，工作中，之前餐搵餐食餐餐清冇多餘嘅錢去投資(之前老人家們還在，老人院及其他日常生活什費開支不輕)，我有兩個女，細女今年都大學畢業，

所以近兩年開始經濟鬆動D有些少積蓄，去年經朋友介紹開始follow你FB，去年中開始做月供股票，最初每月3仟，而家增至每月8仟(逐步加大)，今年年頭家人分左一筆錢比我，

計埋自己積蓄大約有150萬左右現金，由於我同先生都有工作，係正正香港夾到扁既夾心階層，總收入已超越申請居屋或政府樓資格，私樓又冇能力買，

所以長期交貴租(now月租萬七)，本來考慮用150萬買間細樓(600萬以內做九成按揭)自住，唔使再為租約滿而搬屋煩惱，但又擔心頂多十年就要退休，

最後都打消念樓，的起心肝買左你4、5本書，諗住睇完之後有D基本概念先，再去上你既投資班(if not 應該完全唔知你講乜)，年紀大未必一聽就入到腦!!!

我驚跟唔到課堂進度。

不好意思，長篇大論，可否給我些少意見，thx a million

龔成老師︰

【投資倍升股課程】適合初學者的，就算你現時對投資完全零概念，都無問題。

因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

上課前，你可以睇我寫架"80後百萬富翁"、"財務自由行"和"股票勝經"，較適合初學者。同時，會對你課堂吸收，有一定幫助。

當然，你而一刻就算睇唔明，都唔緊要。課堂上，我會將一些基礎知識，重新講解一次，到時相信會較易明白。

萬一都係尚有地方不明白， 你可以係課堂中間休息時間，落堂後或者在這裡INBOX問我，都可以。

由於你年齡去到54，如果買樓，按揭的年期不會太長，變相每月供樓金額會好大，同時你較難造到按揭。而我地買樓，最重要是「供得起」原則，如果太勉強，就不要進行。

因此，暫時都唔建議你買樓。你只有好好累積資產，以及運用資產為你帶來更多財富及現金流。你現時有好工，正好要把握時機儲錢，為退休做準備。

投資方向上，以你的年齡，其實已開始為退休做準備，但同時，財富仍有增長力（但不是進取），因此，你可以集中投資「平穩增值股」+「收息股」。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

由於你現時投資知識不多，你可以先做月供股票。每月供$4000盈富(2800)，而餘下$4000就先儲起。

而現有資金，同樣可以先用15-30萬，分注咁慢慢入盈富(2800)。

至於餘下資金，你可以等上完堂，你對投資有個全面理解，才開始計劃都未遲。

------------------------------------------------

Q22091：

想問買收息股是否比買年金好？

我有一個仔，我的想法是收息股可以留給兒子，但年金沒法留給兒子,你認為我的想法對嗎?

龔成老師︰

收息股和年金，財富增值能力不高，係一些主要提供現金流的資產和產品。若你係將近/已退休，或者投資取態係好保守，這些項目係適合的。

年金和收息股係不同，從投資角度，收息股股息回報率，一般都比年金為高。但由於股價有波動，有機會出現賺息蝕價的問題。

而年金回報率雖然較少，但佢本金係保證，唔會有波動出現，故風險相對收息股為低。

至於年金，的確係無法直接傳承給你兒子。但一般情況，若年金內資產未用盡，該部份拆算後，係可以退還給受益人。

甚至受益人可以一直收取每月年金，直至保證期結束(詳情︰你要同相關機構了解翻)。因此，年金未必完全無傳承作用。

所以，簡單咁講，若你考慮重點係資產傳承上問題，其實2個項目都可以做到。

我建議你先從現時自身需要和風險承受能力，作為出發點，去考慮如何選擇投資項目。因為，往後你兒子運用方法，會同你大不同(因為佢較年輕，應投資增長型資產，而非收息資產)。

所以，你唔需要考慮咁遠，先用自己做出發點，去作出選擇。再做好相關傳承上的安排，如年金定好受益人，安排好平安紙(有關股票分配)，咁就可以。

------------------------------------------------

Q22092：

老師你好,最近有個做保險嘅朋友向我推介保險融資,聽落好吸引,請問老師對融資有何意見？印象好似老師之前有分析,但揾唔返資料

龔成老師︰

係，我印象中，之前都有讀者提問過相關問題。

保單融資，其實就係透過借貸，去以槓桿形式放大回報。相比傳統儲蓄保險，佢增長潛力會相對較大，同時風險會相對較高。

若保單實際回報，係多於貸款利息，自然會因為槓桿操作，而令回報放大左。

但由於保單本身，好多時回報和利率都係不保證。再加上貸款利息，多為浮息。在低息環境，固然會受惠。但進入加息週期，利潤將進一步被蠶食。

因此，用保單融資去投保，係有一定風險。

其實係財富增值上，最好集中係優質資產上(如物業、優質股)。

"保險"只係一種產品，主要係用作防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但最好係一些較傳統儲蓄保單，而非這類有槓桿性質的產品。

------------------------------------------------

Q22093：

老師，我幾年前買了以下股，想離場了。

1萬股 (5手) 00215，成交價 HKD3.4，成本用了$34086.62

6千股 (1手) 02327，成交價 HKD1.06，成本用了$6467

兩隻股成本共用了40,554

要馬上放嘛？還是那個價位最好？

謝謝！

龔成老師︰

你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

和記電訊香港（0215）都有質素，但此股只係平穏增長類﹐你預係收下息，增長力唔會明顯，要去到買入價就較困難。

若你目標係收下息，你照長線持有，係無問題。但若果你較年青，係想做財富增值的話，此股就唔係咁適合。建議你每有反彈，就慢慢換至其他增長股。

美瑞健康國際（2327）主要從事抗衰老健康管理服務及銷售藥物；房地產代理及建築材料貿易服務；買賣健康醫療產品及建築材料。

生意雖然有增長，但業務有點波動，企業規模細，獨特性不強，投資價值只是一般般，不過初步睇，不是劣質類。

你只係得一手，守住先都可以。

------------------------------------------------

Q22094：

老師 想請教下，我現時每月月供$5000 $3000-2800 / $2000- 3067

我想停供2800 改700 或1810

你會比較建議邊隻

我36 歲 月入$38000 未結婚，之後打算租樓 或 買樓

龔成老師︰

騰訊（0700）和小米(1810)都係有質素的潛力股，可作為月供選項。但若你用佢地取締盈富(2800)，你成個組合就剩翻潛力股。

潛力股雖然增長潛力較高，但同時間波動性都較大，若你100%只有潛力股，風險會好高，你要自已衡量。

以你年紀計，我比較建議保留盈富(2800)，但你可以調整供款比例。

盈富(2800)$2500、安碩恒生科技(3067)$1500、再加入騰訊（0700）/小米(1810)$1000，這樣會較平衡。

現時大市只在合理區，每月資金唔好盡用。最好留有部份，等大跌市出現時，可以用來掃貨。

另外，若你打算短期內置業(1-3年)，而又需要沽出部份股票，作為置業資金。那部份資金，就不要投資潛力股這類高風險股票。

最多只可以投資好似盈富(2800)這類平穏增長股，甚至收息股，去減低不確定性，以免影響置業計劃。

------------------------------------------------

Q22095：

龔sir, 我想請問計算平均價的問題：

手持1000股領展（購入價60及60.80），12月以股代息收取了21股@62.67，現合共1021股，請問均價計算是否=（30000+30400)/(1000+21) = 59.16?

謝謝你解答

龔成老師︰

你計算方法，係正確的。

我地只要用本身所投入資金，再除以現時持有股數，就係你個平均買入價。

但我地係投資時，緊記唔好以此作為判斷持股與否準則。因為我地持有一隻股票與否，係睇佢質素。買入價所造成帳面值變化，參考價值不大。

------------------------------------------------

Q22096：

我40歲，現在沒有工作，現金存款有200萬，

一直每月3萬月供股票：月供15000

-2800，現股數14327，價26.75
以下各5000
-66，現股數4818，價45.58
-823，現股數4623，價78.83
-2388，現股數7698，價26.96

另持股票：

-102，現股數452000，價1.1513（之前聽內幕消息買大咗）
-788，現股數10115，價1.44
-1398，現股數10000，價6.96

另有車位一個，價值117萬買入，現市值180度，有價無市，賣唔出。

我想請阿sir指點一下，謝謝🙏

1。我應否繼續月供3萬在以上4隻股？

2。我是否將現金一部份買一些收息股？

3。其他股票是否繼續留下？

4。我繼續這樣投資將來怎樣可以財務自由？

龔成老師︰

1) 這4隻股票，係有質素和適合你年紀，你照供係可以。

2) 可以，但以你年紀不用太多，整個組合，收息股大約佔2成就可以。

3) 你持有股票，都可以保留，除了凱升控股(0102)，佢規模不大，賺錢能力不係好一般。長線計，換碼至其他優質股會較好。

我地買入一隻股票，一定要知道佢質素、行業前景、財務狀況等，才去投資。唔好單靠聽消息，聽朋友講，就走去投資。

如果你連間公司點賺錢、行內有乜優勢、點解未來有發展和增長潛力，都答唔倒自已，咁一定唔好投資住。

4) 財務自由，其實每個人定義都未必一樣。最簡單，就係講我地被動收入，足以支付日常開支，就可以稱為財務自由。

你現在透過上述月供和持股，一直去累積資產。到一定數量或退休時，將佢換成收息資產，去創造現金流，支援退休生活咁就可以。

至於要累積多少財富，就睇你退休後人生目標。假設你希望退休後，每月有2萬蚊現金流，以股息率6%計，你就需要累積400萬本金。

而車位，唔好只係放係度，你可以放租，至少有現金流收入。長線，你要睇翻佢有無長線投資價值。無就要盡快沽出，將資金轉移去其他優質資產上。

------------------------------------------------

Q22097：

你好啊
我想問下其實每年複息股價回報係點計架？

龔成老師：

回報率＝（賣出價- 買入價）／買入價
例如以$10 萬投資某項目，以$15 萬賣出，就有50%
的回報率：

（$15 萬-$10 萬）／$10 萬＝ 50%

不過，這個「50%」並不全面，因為當中未包括「年期」。

例如這項目的年期是一年，那麼年回報率就是50%，這當然是不錯的投資項目。

反之，若果這項目的年期是40 年，那麼年複息回報率就只有1%，當然沒有投資價值。

因此我們在計算，又或要比較不同投資產品的回報率時，就要用相同的單位，亦即化成一年為單位作比較，以及要用上複利息的概念。

年回報率＝ n √（1+ 總回報率） -1

例如上述獲得50% 回報率的項目，需要投資3 年，總回報率就是50%，而每年計的複息回報率，就是14%。

3 √（1+50%） -1 ＝ 1.14-1 ＝ 14%

我們要計算回報率，就要用化成「一年」為單位才有比較的意義。

另外，除了比較價格上的回報，也要考慮期間現金流的回報，例如股息，這個之後會再講述。

------------------------------------------------

Q22098：

0778依家喺高位，係咪唔適宜再加注，等佢回返啲先再入？

同埋可以講解一下零碎股票嘅作用嗎？性質同月供股票相似？

龔成老師︰

置富(0778)現價算係合理區中間，是否加注，好睇你本身計劃投資在佢身上的資金，現時用了多少。

如果依然有一個較大比重，係未動用。例如本身想入10手，而家才入了3-4手。在現時這個未貴的水平，你都可以加小小注(1-2手)。

若你本身已經大部份資金入左市，咁你就最好等接近平宜區，才再出手。

至於碎股，就係至不足一手的股票。例如你月供盈富，每月$5000，現價$29，你一個月會買到大約170股。

但由於盈富一手係要500股，所以這月供得來的170股(不足一手要求的500股)，我地就稱之為碎股。

其實碎股同一般一手股票，係無大分別，都係可以照樣買賣。只係碎股買賣時，個差價有機會比完整一手為大。

但只要你係做月供，其實就會慢慢儲到完整一手。加上我地投資，主要係想持有優質資產，佢係一手定碎股，係唔重要。

所以，你做投資決定時，唔洗太在意碎股問題。只要係質素，就算只係得碎股，都應該長線持有。

------------------------------------------------

Q22099：

1. 老師你好，我見最近d 英鎊一直跌，唔知你點睇呢？應該買或者應該放？

究竟呢個係短期因素定已經見左長期頂呢？

英鎊議息結果出咗，都係唔會加息，咁係咪即係英鎊會下跌？

但係如果美匯指數都持續向下嘅話，咁呢啲外幣又應該會升返個喎？係唔係呢？定係英鎊今次下跌係因為疫情嚴重咗？

2. 老師你好，剛剛睇到你嘅文章，你話新興嘅嘢或者熱炒嘅嘢要理性分析佢嘅合理價值，咁唔知老師你點睇最近啲航運相關股份例如1919中遠海控？

佢真係非常大上大落，以為佢冇得再升，但係啲人又會熱炒，跌咗落去以為佢已經冇行啦，點知又爆升返上去，真係好難想像同埋分析。

但係我又知道如果疫情好轉返啲航運應該會正常返,咁呢一類股票其實係唔係只可以係短炒?根本長期唔會支持到呢一個運費咁高個喎?唔知老師你點睇呢?

呢隻股係咪應該已經要快啲走?唔好再持有佢?

龔成老師︰

1) 其實，你要仔細分析一隻貨幣走向，唔容易。

只能簡單咁講，市場預期美國將會重回加息週期，因此美元升，相對地英鎊跌係正常。

我地做財富增值，係要集中儲優質資產。貨幣因為可以無限發行，因此不是一個理想的財富增值選項。除非你有實際需要，否則不要持有太多。

2) 我地對住任何股票，都只會用理性分析，佢內在價值。只後視乎佢平貴，去定買賣策略。你唔好比佢升升跌跌，或者大市氣氛，影響左個判斷。

同時，你要分清楚，邊D係影響企業的長線和短線因素。若係長線，我地就應該係估值時，加入作考慮。若只係短線，就唔洗太在意。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

現價已經係貴，要大跌幾成才算合理翻d。若你持貨較多，可以沽出部份，先行獲利都可以。

------------------------------------------------

Q22100：

成老師的解答。

其實除左現金，我手頭上有以下股票：

SOHO中國0410: 蝕78%
中鐡建1186: 蝕63%
中國中車1766: 蝕75%
呢啲已擺係度好多年冇理到，是否應該斬，蝕賣算數？

高價入，現時跌：
阿里巴巴：蝕11%
舜宇光學：蝕7%
港交所：蝕6%
（呢啲有機會升返嗎？阿里巴巴已溝幾次，都係蝕）

新抽股蝕錢：
百度：蝕13.5%
百融雲：蝕15.88%

賺錢的有：
盈富基金
京東集團
工商銀行
京東健康
美團

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

現時你持有的股票，不是完全無質素，但你最大的問題是在貴的價位買入，你日後要提高這方面的知識，如果未能掌握投資時機，建議你用分注或月供的模式進行。

ＳＯＨＯ中國（0410）集團主要從事投資房地產開發、物業租賃和物業經營。

這企業過往生意增長力不強，同時無乜錢賺，如果扣除了投資物業重估因素，見佢有時出現虧損。投資價值不高。

至於中鐡建（1186）、中國中車（1766），並不是無質素，但增長力唔強，唔建議持有太多。另外，新股不宜投資太多，風險較高。

至於其他股，問題唔算大，可持有。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21761-Q21780）

Q21761：

老師你好，我上堂見你有教Benjamin 選股方法，其中一個係計流動資產淨值的3分2

以港鐵#66為例

流動資產=43,495 M
流動負債=41,651 M
流動資產淨值 = 43,495 M - 41,651 M = 1,844 M
流動資產淨值x2/3 = 1,844 M * 2/3 = 1,229 M

25/6/2021 的總市值 = 2,649.53 B
已發行股本(股) = 6,183,275,373
25/6/2021 的收市價 = $42.85

1,229M 除以 6,183,275,373 = $0.19
根據Benjamin 選股方法, 港鐵股價要跌到$0.19 先算便宜

想請問以上計法正確嗎?

龔成老師︰

對，你的計算是正確，但要留意，這只是一個「以資產角度計，貪平的方法」，即是說，我地估值有好多方法，而這個方法，就是假設「就算企業業務再差都好，流動負債點都值錢的」，以爛船都有三斤釘的角度出發。

佢這個方法，只係其中一個估值方法。佢以流動資產淨值，去計算一個有安全邊際的估值。

但由於佢這個方法，只係著重於資產價值上，而港鐵(0066)係一間有潛力企業，未必能有效反映實際情況。

所以，我課堂經常會講，我地最好用多個不同估值方法，去得出一個較立體的估值結果，這個答案，才會較有參考價值。

------------------------------------------------

Q21762：

因為我和家人都有貨(完美健康1830)，但其實不多，大約1-2手，我和家人都不太認識「買賣單位降」和改名會有什麼影響，但我們擔心不知會否影響現時我們持有貨的價錢，

例如現在1手是8蚊，即32000元，但之後改名改股變成8蚊1000股的話，是不是即變成我們持有1手貨由32000變成8000蚊？那麼我們要不要在調整之前賣出，然後降股後買回？

我家人有點擔心

龔成老師︰

其實無分別，只是方便買賣，不用擔心。

我地是否投資一隻股票，重點係佢企業本身架質素。佢改名，其實唔重要，只要佢本身業務和質素係無變，咁就無問題。

完美健康(1830)於7月15日會進行拆細，每一手由以往4000股1手，轉變為1000股1手。從而，令每手買入成本少左。

但作為現有投資者，你係唔會有影響。

以你現時持有一手為例，你有4000股(即1手)，現價假設係$10，你持貨總值就係$10 X 4000股 = $40000

拆細後，你依然都係會持有個4000股，但就會變成4手(因為現時係1000股1手)。我假設現價不變，都係$10。

拆細後持貨總值︰$10 X 4000股 = $40000。

你會見到，其實拆細這個動作，對你手上的持貨價值，係全無影響。因此你唔需要因為拆細，而賣出持貨。

但留意，此股現價略貴。現貨可持有，就暫時不宜再加注。

------------------------------------------------

Q21763：

老師您好！我係您既學生，而家睇緊您本千萬富翁(一路睇放唔低)。

我想創業自己做生意，但一向呢方面既知識唔多，雖然之前返果份工都係做sales...

但覺得自己相比起其他人business sense方面唔太好..想請問有無咩方法改善？老師有無睇過啲好既書本可以推介？

另外，我都明白要認識多啲人加強人際網絡，但係我個人有啲內向型，一諗起呢啲就聯想到要去一啲function自我介紹咁識人，想問下有無咩方法會自然啲？謝謝！

龔成老師：

坦白講，創業最好的學習，就是去創業，你得到的將會比你睇書多好多。

我建議你試下一些低成本的小生意先，例如網上創業等，這是一個很好的進步機會。

你最重要是不斷試不斷試，想，是無用的，試，才可有得著。你可以寫低所有你認為有商機的生意，然後睇下那些較小本，而你又做到，就可以開始。好多時有無市場有無發展，並不是想出來，而是試出來的。

另外，有D生意要真你有較強人際網絡，但有D生意則無要求，所以唔好比這些因素限死左自己。你可以參加一些商會活動，或早餐會之類活動，去結多D人。

至於自然唔自然，其實好主觀的，你去得多就得，所有野都是熟能生巧，做，是最重要的，唔好得得想字。

------------------------------------------------

Q21764：

老師好，有5百萬cash (前幾年買賣樓賺+儲蓄）, 應該買股票好定買樓好？

背景：3字頭，同屋企人住，而家住嘅地方有d遠

人工扣除家用開支，應該儲到1萬左右，有基本嘅醫療、危疾、年金

另外有30幾萬股票：
0002 - 2500股 $73.1
1928 - 2000股 $28.43
9988 - 200股 $225
2018 - 1000股 $41.6
1038 - 500股 $47.3

如果今次再買樓，應該唔會咁輕易賣出，除非好動蕩，最多係用黎自住（近返市區方便d返工同出街）或收租。因為有自住嘅可能，都會揀d高質素少少嘅樓買，咁就會用哂d cash

樓價高，如果只係用黎收租，其實回報唔多，計埋供樓利息可以話冇，不過可以博樓市會升，而家唔買之後可能更貴。但長遠8-10年後，

我唔係太睇好香港前景，覺得會俾大灣區/其他內地城市慢慢取代，所以都驚長遠會跌20-30%

但係另一方面，我又唔敢用幾百萬黎買股票...我就係普通人心態，擁有又驚失去...咁就更加唔上唔落

如果真係唔買樓，而買股票/基金，請問有咩建議？

超長遠目標：返part time、建立1至2個可以一直玩到老嘅興趣，可能要用時間、金錢黎鑽研、再老d或者會移民

唔好意思，寫得好長

仲有一個問題，就係可謂小注？唔同資金下，小注嘅定義會唔會唔同？謝謝

龔成老師︰

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

我地再睇翻眼前而一刻，由於你自住唔算有大問題，那這筆資金，我地應較集中從投資角度，去做考慮。

現時租金回報率唔算好高，投資在優質股，值博率相對較高。

你3X歲，建議你用「平穏增長股」 + 「潛力股」的組合。現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

現時大市只是合理區，你現有500萬資金可以先投入多50-100萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

但你要注意一點，我地財富組合除左要有增長力和質素外，平衡性都好重要。你長線都要找機會加入物業類，以免成個組合過於偏重股票類。

因此，若你在此期間，發現一些租金回報率唔錯，又有質素的樓盤，你都可以出手。

至於我成日講架「小注」，如果我係講個別股票「質素或風險度」，只宜小注。代表你只宜用總資金的5%左右，投資在這隻股票上。

若我係講緊「買入價」時，現價只宜小注。就是想指出，此股現價水平唔平，建議你只能用打算投入該股資金，其中一小部份去入少少，到有明顯回調，才加大注碼。

------------------------------------------------

Q21765：

你好，我想問如果我要將啲股票分類

公用: 3， 270
地產/房託: 12，66，823，778
賭業: 27，1928
銀行: 1398，2388，3988
平衡: 2800
新經濟: 388， 788，1177，1211，1810，9988

請問新經濟嗰部分可以點分，每個分類應佔組合幾多。
謝謝

龔成老師︰

我建議你可以簡單，從「行業」和「風險度」去進行分類。

「行業」你可以主要分成公用(0003,0270)、地產相關(0012, 0066算半隻, 0823, 0778)、博彩股(0027, 1928)、銀行股(1398, 2388, 3988)、科技股(0788, 1810, 9988)、新能車(1211)、醫藥股(1177)

至於港交所(0388)業務性質特別，你可以分開。

我地投資優質股時，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，盈富(2800)係不受此限，因為它是一個包含55間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

就「風險度」，我地可以分成「潛力股」、「平穩增值股」和「收息股」。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

「潛力股」- 0388, 0788, 1177, 1211, 1810, 9988
「平穩增值股」- 0003, 0270, 0012, 0066, 0823, 0027, 1928, 2388, 2800
「收息股」 - 0778, 1398, 3988

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

這個部份，基本上係因應你人生階段、投資經驗和風險承受力，去作出配置。

例如你係年青人，你就可以「潛力股」、「平穩增值股」各佔50%。若你尚有5-8年就退休，就應「平穩增值股」、「收息股」各50%。到退休，就100%「收息股」。

------------------------------------------------

Q21766：

龔生你好，本人想問你一些意見。我五年前因先生生意問題賣左層樓，已租樓五年，現在想買返樓，請問是否好時機？

我有現金大約三百萬，月入41000，先生沒有穩定收入，兩個仔女一至兩年後大學畢業，本人五十歲。現在租金18500。

我只擔心退休後無屋住，而且已50歲，所以想上返車, thx

龔成老師︰

現時香港樓市，算係合理區頂部，從投資角度，未算好吸引。

但由於你目標係自住，我地考慮重點，唔係現時樓市水平，而係物業符唔符合你需要，講緊係未來10年、20年，係唔係都適合你。

如果係合適，你就堅守住"供得起"這個大原則，就算現時置業都係可以的。

但最好，你可以係置業之餘，留有一定現金，去用優質股進行增值，咁就更理想。

------------------------------------------------

Q21767：

龔老師，您好，我朋友公紹而認識您，我朋友話你分析及推介的股票很準，我初看到閣下的Facebook, 建議買2800，如果大市跌是否會跟住跌，為何會推介2800,因為我股票不太認識。

我有持
1313,9.9元買15000股
914, 45.7買，1000股
1810, 25.15買5000股

最想請教老師我上年$2.9買3988,坐足一年，重貨，跌到約$2.3，利息都補唔番差價，下星期除淨，除淨前會升些嗎？

我想除淨前賺差價，不要息可以嗎？謝謝老師

龔成老師︰

你對派息運作，似乎有點誤解。

在「除淨日」前一天，依然持有股票，就會收到股息。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在除淨前沽出，而出現任何著數。

盈富（2800）佢係一隻追蹤恆生指數的ETF，所以恆指下跌，佢都會同一比例地下跌。

佢並不是最高回報的投資，但這是一個組合，當中有58隻質素不太差的股票，對本身不懂選股的投資者來說，是一個很好的選擇，加上有平衡組合風險的效果。

就算對無乜選股能力的投資者，提供一個穩健，收息及平穩增長的組合。所以，我經常都會推介佢比讀者，特別係經驗較淺的一群。

你上述4隻股票，都係有質素，若你係年青至中年人士，都適合。

但華潤水泥控股（1313）業務較波動，佢過往的盈利數據上落都大，因此股價的變大亦會較大。

長遠計，房屋、基建發展等因素，都會利好水泥股。但就要留意股價上落會較大，自己要注碼上控制，唔好佔你組合太高比重。

至於中行(3988)佢有質素，算係收息股類，增長力唔高，主要係收下息。若你較年青，就不要持有太多。

而且，我地投資會講求成個組合的平衡性，唔應該太集中單一企業或行業，佔比要維持分別15%和30%以下，才算穏當。

因此，你現時重貨的話，建議你沽出部份，去平衡風險，咁會較好。

------------------------------------------------

Q21768：

龔成老師，您好，我係一位32歲的全職媽媽，留意您的文章有一段時間，但3月才正式入市

270 2000股$24.1
1810 800股 $24.5
1177 2000股 $8
1448 2000股 $7.8

3067 200股$19
2388 1000股$28.5
3800 5000股$2.74
1972 600股$24.3

以上是我手頭上的股票，大部分算高位入市！特別270係咁跌！

1/我們抽中了白居二，可能會在一年內盡量買來一家四口自住，未知是否需要用到此十零萬資金，所以請問我是否需要放曬所有股票？定keep一兩只？目前配置合適嗎？

2/目前住荃灣，應該買唔起附近，以您專業的眼光，如果買樓，邊一區會是個潛力股？因為我今次未必可以買到三房，想以後仔女大左可以換大間！

期待您的解答，感謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時股票，大部份都係有質素和適合你。而且除了粵海(0270)，其他都唔算好高位入，大致係合理區頂至略貴，你可以守。

雖然粵海(0270)帳面值虧損較大，但佢係有質素，你照長線持有，主要用來收息，再加上少少平穏增長。

但現回到你買入價，相信會要較長時間。

另外，保利協鑫能源(3800)現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

1) 我地成個財富組合，除左講質素外，平衡性都好重要。因此，我建議人在置業同時，必需留有一定優質股，作增值之用。

這樣才會避免到，所有資金完全側重晒係單一資產(物業)類別。

但若你生活上係有置業的迫切性，你盡用這些股票去買樓，都係可以。但緊記，你最低限度，要堅守"供得起"這個大原則，就可以入市。

之後，你再有新資金，才再慢慢累積優質股。

若你打算1年後置業，由於時間唔長。如果你確定係要動用股票部份去業，你現時就要開始，慢慢分批沽出持貨。唔好等到動用資金個一刻，才一次過去沽，以減低價格波動，對你回報造成之影響。

2) 較高升值潛力地區，除左鄰近商區地段，好似中環、東九、北大嶼(或有變數)外。你都可以留意一些潛力較高地區，好似堅尼地城、大圍、黃竹坑等。

雖然你長線有細屋換大屋打算，故新購物業(細屋)有升值潛力，對將來換大屋較有利。

但同時間，佢都係你自住樓，你都要從生活角度去考慮。2者要取得一個平衡，才算理想。

------------------------------------------------

Q21769：

龔成老師你好，我和太太均31歲，各月入$5萬，資產如下：

- 物業1，2017年買，自住，月供$15k，26年按揭
- 物業2，2020年買，收租，月供$13k，收租$11k，30年按揭
- 股票$150k，005 和 2628
- 現金$1M

每月扣除開支，儲$30k-35k，想50歲有$50k被動收入，資產應如何配置？感激！

龔成老師︰

若你想做到50歲後每月有5萬蚊現金流，以股息率6%計，你需要本金1000萬。

你現時財富組合，物業和股票都有，係理想。但比例上，明顯偏重左係物業類。因此，我地新資金應優先投放股票類，去令組合更平衡。

現時你持有股票，匯控(0005)主要收息，無乜增長力，唔適合持有太多。而中國人壽(2628)雖係增長股，但近年賺錢能力，明顯係弱左﹐不宜持有太多。

這2隻股票，建議你沽出部份，慢慢換至增長股，長線對你會較有利。

你31歲，應利用「平穏增長股」 + 「潛力股」這類增長股，去創建一個增長組合。現在你每月先用5成儲蓄，即$15000做月供。其餘先儲起，用一邊月供一邊儲蓄的策略。

大市現處於合理水平，那100萬資金，你可以再用多30-50萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

假設投資回報有10%（連股息再投資），你每月投資$30000 + 現有資產(15萬股票和100萬現金)，20年後大約會增值至2800萬，相信用以上計劃，很大機會達至你的財務目標。

------------------------------------------------

Q21770：

老師，我現年我33歲，兩公婆每月加埋收入得25000，有一物業供緊剩低50萬左右，但供樓及小朋友同家庭基本開支30000，户口現金剩30萬左右，

我想問下老師意見我仲適唔適合投資股票？

龔成老師︰

以你情況，由於每月係入不敷支，因此重點應先放在這財政問題上，要令你變回收支平衡之餘，也可以有一定資金作投資。

現在你要看看你自已的開支，有沒有一些部份可以調整來增加月供金額。如果無，你就要從開源著手，轉工(如SALES，一些多勞多得的工作)、找PARTTIME、網上生意等。

目標係令你可以應付生活開支同時，每月有資金空出，作投資之用。

當你可以做到這點，你就可以開始月供股票計劃，去為自己增值。

你33歲，可用「平穏增長股」 + 「潛力股」的組合。你每月可用5成儲蓄作月供，其餘先儲起，等大跌市時去掃貨。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

至於現有30萬資金，我建議先扣起半年生活支出，作應急之用。餘下部份，你可以先用一半，分注買入上述股票。

如果你唔係好認識這些股票，可以集中買盈富(2800)。餘下部份，都係同樣等大跌市機會出現，才出手入貨。

------------------------------------------------

Q21771：

老師，你可否給我一點建議？
我的情況：

現時37歲
每月收入：$20萬
每月開支：$17萬
現有3層樓，都要供，2層出租，一層自住
股票：$25萬（有2388、2800、3067、9888、6618、1208、941）
現金：$30萬

如果我想50歲財務自由，每月有$50000去用，我應該點做？

龔成老師︰

以你的情況，其實不難的，首先，你現時有兩層樓收租，當你50歲的時候，理論上已還了一定的借貸，加上租金在長遠會偏向上，因此，該物業能為你提供一定的正現金流。

若然到日後供款完成後，現金流將會更加明顯。

如果假設你50歲時，物業未供完，我再假設未有正現金流，你就可配合以下方向去參考。

50歲想每月有5萬蚊現金流去支援生活。我地以股息率6%去計，你就需要本金1000萬。

由於你現時已有不少物業，未來新資金應集中翻係股票類，以免財富組合過於偏重單一資產。

以你37歲，應以增值為主，可以選擇一些「平穩增值股」+「潛力股」作投資目標。

你現時持有股票，都係有質素和適合你。但百度(9888)、京東健康（6618）不確定較高，不宜持有太多。

五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際，這股不建議持有，你可以每有反彈，就慢慢沽出。

中國移動(0941)有質素，但只係收息股，增長力麻麻，同樣不要持有太多。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里巴巴（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845），但就要明白波動性比上述會高左，同時風險大左，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，餘下30萬和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 30現金 + 25萬持股，50歲時大約會增值至逾1000萬。

再加上你現有物業的租金收入，相信以上增值計劃，很大機會可以助你達成退休目標。

------------------------------------------------

Q21772：

龔sir 你好 ，我本人26歲。以前買過港股，有買過小米$15.x左右，賺左小小16.x就賣左。現在持貨：

-中國鐵塔$1.5
-3兩黃金平均$18600/兩
-小量美股

近年睇多左你既Page，都覺得價值投資既重要。同埋要建立一個投資組合非常重要。

未來計劃主要想投資美股：

長線投資：
-蘋果
-BRK 伯克希爾 B
-Tesla
-微軟
-台積電

中期：
-美航
-Pala Tech

短期：
-富途
-蔚來、bilbil

我想30歲前儲到100萬，我會儲月入大約55%既人工，目前月入24K，資產大約15萬。

希望老師俾小弟建議。

另外非常感謝你回覆網友問題，post其他網友既case，俾我地見到好多層面既人既經驗，非常值得借監，你既回覆亦值得學習。多謝你！加油

龔成老師︰

美股都有質素，你用來作增值組合，都係可以。

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。所以，你唔好再用短炒這個策略，而係用長線角度，去選擇股票。

你上述股票，都係有質素。只要你係長線投資，再用平均價格或月供去儲貨，咁就無問題。

但留意，Palantir Technologies Inc (PLTR)和Bilibili Inc (BILI)都有投資價值，不過由於佢地至今都未有盈利，不確定性較高，不宜太大注。

另外，雖然疫情開始穏定，但始終存在不少變數。加上航空業賺錢能力，已經係弱左，American Airlines Group (AAL)這類企業，唔係太建議你投資。

而黃金是貴金屬，有「終極貨幣」之稱，主要作用是對沖黑天鵝事件。

不過，黃金沒有現金流，持有無法創造出經濟價值，持有過多，反而會拖慢成個組合的增值效果，我建議佔財富比例太多，大約3%以內好了。

至於投資部份，你每月可先用5成儲蓄去做月供，其餘先儲起，用一邊月供一邊儲蓄的策略。

餘下的另一半現金，我地就等機會，當大市出現較大回調，就加大力度掃貨，然後作長線投資。

除了可考慮月供上述美股外，我建議你加入Vanguard標普500指數ETF〈VOO〉，是追蹤標普500指數的ETF。佢係一籃子的優質美股，有助提升你組合平衡性。

我假設投資回報有10%（連股息再投資），你每月投資$12000 + 15萬資產，30歲時大約會增值至90萬。

所以，你想提高成事機會，最好再調高少少個月供金額，會較理想。

------------------------------------------------

Q21773：

Hi，有事想請教我收到另一間公司offer

其實我好迷惘 有2個offer 一間全球top 5 會計師樓 一間係中型既list co

Top 5 個間係高壓文化 must ot 會好辛苦 但學既野會多 有朋友話不少人捱五到一個月就走 for junior 位 捱到既senior 就做得耐

另一間中型既list co manager super nice 我覺得 但學既野五太多 佢話五洗ot 兩間既人工offer 一樣

我考慮既點 係要challenge 自己入去個間高壓文化做下 捱到 就會係有料既人。定舒舒服服入去中型list co 做 利申26 years old

講多少少 我自己係能力是ok 我最大問題是情緒問題 一五開心 一驚 表現先大打折扣 有自信信心 表現超好 所以五太岩高壓既環境

但屋企人勸我入個間高壓文化捱下 捱到你咪情高提高

龔成老師：

其實你個考慮點，應該都係放係長線因素，你要知道邊度架經驗、資歷、知識、甚至做事方法，會對你投入這個行業，以至長線發展，會係最有利。

你可以問下一些行內朋友，或者同學意見。再加上你以往在中型/中小型會計師樓經驗，去綜合一個結果比自己。

高壓文化、OT，這些唔係唔可以考慮。但這些相對你成個職業生涯，只係一些中短期因素，我唔建議你睇得太重。

------------------------------------------------

Q21774：

老師, 今次真的可以實名的叫龔老師, 因為我已經報讀老師的課堂.

對上一次請教您, 已是一年多前, 很多手上的爛股都去掉, 現時入的,都是看老師您回覆, 再加上自己預估的, 買了一些股, 老師可否幫忙, 看一看有冇入錯, 謝謝您.

我現年43, 月入50000, 積蓄有80萬, 想再入啲優質股, 保留30萬在手, 所以計劃想投資50萬左右,

現時手持,
1810 x 2000股
788 x 40000股
992 x 2000股,
1478 x 2000股,
2800 x 2000股

本人計劃想買700, 2269 or 1772, 2128, 1347，想請問老師有咩高見? 謝謝您.

另外, 我老豆有些股已經跌左25%, 想請教下, 可唔可以再守? 2188 同860.

感激老師.

龔成老師︰

你現時持有股票，都係有質素，照長線持有就可以，但中國鐵塔（0788）增長力減弱左，你不要加注。

至於你計劃買入的5隻股票，都係有質素，但有幾點要留意。

中國聯塑(2128)現價偏貴，最好等有明顯回調，才入貨。

贛鋒鋰業（1772）、藥明生物（2269）不確定性較高，不宜太大注。

你以上所講的股票，除了盈富(2800)、聯想（0992）算係平穏增長股外，其餘都係潛力股，佢地雖然有增長潛力，同時風險都較高。

以你年紀，不宜持有太多，大約佔3-5成(視乎你投資經驗和風險承受能力而定)，餘下應集中以下平穏增長股，否則會令你組合風險過高。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

現時大市只在合理區，你可再投資在30-50萬，餘下資金就等大跌市機會。

當然，你可以不用急，唔洗即刻走去再投資。你可以等上完堂，對整個投資概念有較完整理解，才出手都可以。

至於你父親的持股，力世紀（0860）其實好難分析，因為佢一直處於年年虧損的狀態，而我地對這類股好有戒心。

我地只可以對佢的前景作「想象」，無人知真正的價值有幾多，股價一定會大上大落。見佢之前有做個十合一之類動作，這類股票要小心。

整體而言，此股好難分析佢價值，投資風險唔細。

泰坦能源技術(2188)規模好細，而且近幾年都係出現虧損，投資價值不高，建議沽出。股票班見!

------------------------------------------------

Q21775：

成老師，想你提供一些理財意見，現有狀況如下：
年齡： 43
職業： 企業銀行

1）現有資產共HK$16.94 Million

- 現金 ： HK$1.1 Million （remarks: 2%p.a. deposit rate for staff with deposit balance within HK$1 Million）
- Asian Currency Bond Fund : HK$0.1 Million
- 自住物業： HK$13.5 Million
- MPF : HK$1.4 Million

- Equities : HK$0.61 Million
>5 HSBC @ 3156 shares
>3988 @1,000
>1398 @1,000
>3968@650
>16@500
>700@200

>1@50012@1,000
>27@1,000
>9988@100
>1448@7,000
>3067@1,000

- 合資格年金累算權益：HK$0.105 Million （已繳兩年）
- 保單累算權益： HK$0.125 Million

2） 每月收支

- 每月收入: HK$90,000
- 每月合共開支：HK$70,000
（父母家用: HK$15,000）
（供樓：HK$39,000）
（日常開支：HK$14,500）
（MPF 供款: HK$1,500）
->每月平均盈餘 : HK$20,000

請問在50歲時能否做到每月有HK$30,000 被動現金流? 另外，如何能達成？謝謝！

另外，想補充一下, 本人現樓按結欠HK$6.9 Million, 尚餘16年期

龔成老師︰

你現時43歲，財富仍有一定增長能力，可以利用這7年時間，將財富增傳值，到了近50歲，就可轉翻一些現金流類別的資產。

如果你希望7年後每月有3萬蚊現金流，以股息率5%計，你需要本金720萬。

現時大市在合理區，現金和股票最好各佔一半，你現時持有現金水平係偏高。雖然你現金有2%員工利率收取，但這程度的增長力，唔算理想。

建議你用這筆現金和每月儲蓄，去增持一些有增長力股票，去累積這筆財富。

現時持股，大致上可以。但匯控（0005）、中行（3988）、工行（1398）都是收息股，增長力唔高，唔好持有太多。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）、ＧＸ中國電車基金（2845）。但佢地波動性和風險會較高，你要自己平衡。

你現有110萬資金，可以再投入多20-30萬，用"分注"形式，慢慢買貨。餘下資金和每月儲蓄，就等大市出現一定程度的下跌，才大力度掃貨，然後長線投資。

以大市過去年平均回報10%計（連股息再投資），你每月投資$20000再加上你現有資金和持股（約170萬），7年後大約會增值至560萬。如果要達至你的財務目標，月供金額必需增大至$35000。

現在你要看看你自已的開支，有沒有一些部份可以調整來增加月供金額。如果無，你就要從開源著手，轉工（如SALES，一些多勞多得的工作）、找PARTTIME、網上生意等，令你每月可儲資金大幅提升，以助你達成目標。

------------------------------------------------

Q21776：

因為本人媽媽不擅於投資，我剛開始接觸股票，幫佢review股票組合發現大部分都係蝕錢，我應該幫佢止蝕定由得佢等落去呢？

0042 平均價2.14
1398 平均價5.72
0998 平均價5.68
1288 平均價3.94

3988 平均價3.5
1680 平均價2.98
2628 平均價26.22
2009 平均價3.86

2866 平均價 4.35
1766 平均價11.67
0390 平均價 8.52
0005 平均價78.69

有一部分已蝕一半已上、帳面合共虧損30萬左右，我可以點幫佢調整呢？因為佢年紀都十分大，亦唔適合過高風險投資。唔該曬龔sir。

龔成老師︰

我地先要睇翻隻股票有無質素，如果佢帳面虧損，但係有質素，我地都可以守住先。若無質素，就算帳面無蝕，我地都要考慮減持，甚至全部沽出。

東北電氣(0042)、澳門勵駿(1680)投資價值不高，建議有反彈，就慢慢沽出。

中國人壽(2628)、金隅集團（2009）、中遠海發（2866）、中國中車（1766）、中國中鐵(0390)有投資價值和增長力，但增長力唔會好強，質素算係中等。

若佢唔係佔組合太多，持有係可以。若較多，可以慢慢換碼至優質的收息股。

匯控(0005)、工行(1398)、中信銀行（0998）、農行(1288)、工行(3988)、有質素的收息股，主要提供現金流的股票，適合你媽媽。

由於你目標係收息，帳面賺蝕反而唔重要，除非佢本質出現問題，否則你長線持有收息，就可以了。

但你要留意，現時你媽媽組合中，有不少銀行股。個別行業，不要佔組合30%以上，否則會有過度集中性風險。

而且，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。所以，你都要幫她調整一下個比重。

以下是一些有質素的收息股，給你參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21777：

咁佢哋都有能力成為10倍股？但似乎來講指數好難升到10倍股⋯⋯水桶一指最大潛力，有冇機會係10倍嘅選股？

阿sir，唔知道你有冇留意啲細價股，汛和（1595）會比京基借殼上市，咁1595值唔值得投資？將來等收成？

另外，我想問第一視頻（82）值唔值得長線投資？因為佢改名做瘋狂體育，未來幾年係體育年份，佢係唔係一隻潛力股？謝謝阿Sir


龔成老師︰

水桶1，係指增長潛力較高股票，通常都是處於行業快速增長階段初至中期，故相對其他股票，有較大增長潛力。

但要指數ETF(如3194、3067、3032、3033)增長10倍，係會較難。

由於佢唔係單一企業，要做到10倍增長，即係要絕大部ETF中股票，出現大幅爆升，因此要ETF成為10倍股，機會較微。除非你投資一個長時間，都有可能。

京基欲借殼汛和（1591）上市，暫時未落實，無人知發展成點。若言成事，我地才可以從新業務，可判斷此股有無投資價值，現時所有都係得個估字。

以現時集團質素計，投資價值不高，唔建議持有。

第一視頻（0082）從事互聯網業務，包括在中國經營體育彩票新零售業務、網絡視聽新媒體、其他互聯網相關的投資，以及阿聯酋杜拜的衛星電視台業務。

業務持續虧損，質素一般。除非你好確認佢之後的發展正面，就可小注博下。

記住，我地投資股票，就係投資緊一間企業，要分析係長線的企業投資價值。佢用乜野名，係唔會對佢業務有影響。

另外，唔係好估走勢或者估消息。我地要用實質理據，去做投資決定。

而且，就算再優質股票，都要時間去成長。唔好用賭博心態，諗住博某股票業務突然改變，從而令其股價爆升。

這個做法，只是投機，並不是投資。

------------------------------------------------

Q21778：

老師，原來我有好朋友關注你，同埋有一個上過你堂，佢依家做到財務自由，佢隻1211原來佢40元樓下買左萬幾股，依家都冇走貨，我問佢幾時走，佢話當你見到成街都係電動車就可能會走！

我依家30歲開始學投資，算吾算遲，其實我五年前已經開始接觸股票，一直都係輸，有時可能贏小小就用晒，到最後本金都輸埋！又重新來過

我開始明白你經常講嘅一句，買股等於企業，企業慢慢去發展，企業既成長，等於我儲蓄！

我而家買入嘅股票我都唔會再輕易去走貨，因為佢係錢搵錢

我放假要再去買你一本書，你經常提我知識好重要，係邊本書係簡單容易明白

我第一本書就係睇你介紹嘅50隻優質股同埋10隻潛力股！

我想學知識，邊一本我比較容易明白
等待謝謝你的回覆

龔成老師︰

你可以睇我寫架"80後百萬富翁"、"財務自由行"和"股票勝經"，較適合初學者。

其實30歲，依然係一個財富增值的黃金時期，只要你認真學好正確的投資方法，一樣可以做到不錯的回報。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，建議你用「平穏增長股」 + 「潛力股」的組合。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

現在你每月先用5成儲蓄估月供，其餘先儲起，用一邊月供一邊儲蓄的策略。

而你朋友買的比亞迪(1211)，係好優質的潛力股，現時未算行業爆發時間，長線持有，待佢慢慢發展上去，回報會更理想。

但由於現價已經偏貴，要月供最好等佢回到$150才開始，會較穏當。

------------------------------------------------

Q21779：

老師，我應唔應該買樓？出面話公務員會減薪, 咁你覺得樓市之後係咪應該會下跌?

咁我係唔係應該要等多一陣先買?

龔成老師︰

若公務員會落實減薪，某程度上，都會影響到私人市場的薪酬變動。

但樓市之後會唔會下跌，係要好多因素，唔係單單睇薪酬變動咁簡單。而且，我地投資唔好太著眼1,2年架事，要諗長線少少。

香港樓長線都係供不應求，因此樓價長線都係睇升。

始終市場需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

但中短期係有機會出現波動，造就入市時機。但你唔好預佢大跌，若係自住樓，只要係合你需要，而且長線"供得起"，你就已經可以出手了。

至於你之前講的房屋政策，只係好初步，無人知會唔會成事。就算成事，又要等到幾時先可以立法執行。

因此，你在做決定時，要在現實情況和這些存在不確定的未來政策中，自己取個平衡。

------------------------------------------------

Q21780：

龔Sir，你好。想請教一下，手上有匯豐控股（00005），平均買入價$57.8；電能實業（00006），平均買入價$66.7。

早幾年買，錯過左高位賣出時機，而家帳面蝕錢，不過睇返多年收過股息算打平。而家係咪應該賣出，定等機會股價升返？（好似好難）

龔成老師：

首先，要睇翻你的年齡與投資目標，你上述持有的，並不是無質素的股票，這些都是收息股，不過，增長力就不強。

如果真的賣出，可以等過1、2年，經濟好轉，等佢地股價上翻D先賣。

如果你年輕，其實未必太適合持有，應該在適當的位置，轉其他。

如果你年長，又或風險承受能力較低，又或投資目標著重現金流，其實就可以持有的，因為這兩股都是不差的收息股，只是你買入價少少高，但如果以長期收息的角度來說，其實無問題的。

另外要留意，你不能持有同一隻股票太多，你應該建立一個組合，同一隻股票去到15%好了。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。