【龔成問答信箱】（Q22141-22160）

Q22141：

老師你好，想請教一下。我手上有9股均價$600的騰訊。最近跌到得$4xx。我係咪應該止蝕再係4xx買入月供？咁我個價就可以貼市d。

定應該繼續供？我計過要平均返個價去4字頭都要買入超過一手先得。求指教，謝謝

龔成老師：

騰訊（0700）可以持有，你這樣止蝕再買翻，是無意思的，所謂「個價就可以貼市d」只是一個左手數與右手數的問題，你絕對唔好比「買入價」限制左你的投資策略。

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22142：

想請教一下，新手,現持︰

中銀03988,8000股，平均買入2.8蚊
盈富基金2800，一手，買入28.42
越秀服務06626,二手，平均買入4.9

這樣的組合太保守嗎？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，算係一個偏保守的平穏增長組合。若你係中年人，或者投資取態較保守的人，這個組合係可以。

但若你係較年青，應以增值為主。中行(3988)只係收息股，增長力唔高，唔係咁適合。你可以用以下「平穏增長股」 + 「潛力股」，去取締中行。

如果你係偏年青，建議用潛力股，去增大翻個組合增長力。相反，你係近中年，可以用平穏增長股。

未來時間，你新投資都可以參考以下股票，再按你年紀和風險承受能力，去作出配置。

例如潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22143：

龔成老師你好，我同老公三十幾歲, 有2個小朋友。2019年賣樓, 搬番同屋企人一起係九龍住。

賣樓獲利約有300萬, 我地一半放入股票市場, 希望2-3年後可以買市區樓。

暫時買左以下股票, 想請問要唔要調整下? 同埋有咩股票推薦加入組合呢? 唔該哂!

匯控 (0005) @$40.48 有6400股
置富 (0778) @$9.12 有1000股
中銀 (3988) @$2.80 有160,000股
騰訊 (0700) @$610 有200股
潤泥 (1313) @8.66 有10000股

龔成老師︰

由於每個人都有「住」的需要，因此，長遠點都建議你買翻自住樓。

華潤水泥控股(1313)和騰訊 (0700)都有質素，但佢地波動性較大，你距離再買樓只有2-3年，時間唔算長，故不宜持有太多。現貨可持有，但就唔好再加注。

另外，你組合好集中係銀行股，咁會出現過度集中性風險。當銀行業有大問題時，你成個組合就會有重大影響。

因此，你要減持這2隻股票，令佢地比重，只佔組合2-3成。取回資金，可以分注買入以下股票。

若你想增長力高D(但風險都會較高)，可較集中平穏增長股。若你想較保守，可以集中係收息股。

收息股目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

到你置業前半年左右，你就要開始慢慢估貨。唔好等到要買樓一次過沽，因為無人知個陣時會係乜野價位。因此，你要慢慢沽出持貨，去平衡價格波動的風險。

------------------------------------------------

Q22144：

你好，如果扣除家用每月剩$13000（未扣其他日常開支），想開始投資有咩建議？暫時只係抽過ibond 冇其他投資。謝謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄做月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22145：

龔sir 你好,首先,真心好多謝你, 分享小小故事

本人18年創業失敗 , 負債30多萬,當時月入19000,每月還款15000,每日早餐食25元的燒味飯飽肚,中午不吃節省開支,晚餐再燒味飯 ,斷絕娛樂支出,

咬緊牙關渴望用最短的時間還清債務 終於在20年年初還清所有債務

在19年年尾,生活壓力無咁大的時候,購買了你的第一本書, 80後百期富翁 ,當中的心態對我影響好大,讓我確立財務目標,渴望掌控自己的未來 ,

21年年初更成為你倍升股的學生, 對財富之路的了解更多 ,真心再次多謝你

本人今年29歲 , 住公屋, 月入30000 ,現時每月存款18000, 現有資金60萬 ,預計2年內會存到人生第一個一百萬 ,思考未來計劃中

本人與父母同住公屋 , 由於父母年齡已過65歲,短期內不會被房署收回公屋 對未來置業計劃迷茫,未知方向,想你比小小意見

1)買私樓

與父母同住公屋 , 購買私樓出租, 家人作擔保人購買 500-600萬的私樓,做9成按揭 月供21000左右 , 放租大約可收回11000左右租金,

若有租戶的情況下實際每月支出大約一萬左右

2)綠表買居屋

把公屋交回,換購市區居屋 , 每月供款1萬8左右, 但就變成自住物業...雖然有升值空間,它日可出售套現, 但無法出租增加資金收入...

希望龔sir比比意見, 應該如何計畫 , 當有明確目標後,一定將會前進得更快更明確

最後再次祝你 身體健康 , 更早的達成你的目標, 然後開開心心住入你最早的目標

龔成老師︰

你唔需要太急考慮投資物業，現時租金回報率，唔算係好高。投資值博率計，先投資在股市，效益相信會較好。

你可以投資「平穏增長股」和「潛力股」。你每月5成儲蓄，即是用$9000做月供。其餘先儲起，用一邊月供一邊儲蓄的策略。

由於你已經上過股票班，投資上會有一定知識，潛力股可以佔組合約4-5成。但若你覺得，投資知識都未算掌握得太好，或者對這些股票唔係太熟識，可以調低個比重至2-3成。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到了你真係有實際需要，要去購買一間自住樓時候。我會較建議買居屋，雖然佢投資價值不及私樓，但由於佢樓價私樓平。變相你可以空多更多資金，去投資優質股。

當然，因為係自住樓，最重要都係睇你「長線」生活所需，同埋是否可以做到「供得起」。只要做到這2點，基本上就無問題。

而你分享的這個經歷，對很多投資者和創業者，都很有教育意義。好多人都唔識面對失敗，不懂如何走出和面對逆境，你是一個很好的正面教材。

但你要記住，要留住財富，除了「知識」外，「健康」都係好重要。所以，斷絕娛樂和不必要開支係可以，但盡量少做一些會影響健康的事。影響到健康，一切都會變得不值。

加油!

------------------------------------------------

Q22146：

龔sir,你好 今年27歲，現時持股狀況如下，大部分跟龔sir你推薦都升 但自己高位入了其他 變相冇賺冇蝕….請問6919應沽出嗎？

剛忍痛沽出[email protected] 放 出2手 當時買入價是32.5.

以下股票都是一手買入，現想進行月供股票$8000分散風險，$3000小米，$3000金莎，$2000盈富基金 請問組合可以嗎？

No. 數量 平均買入價
386 10手 3.354
590 2手 16.1
2800 3手 24.6
1928 3手 31.4

1972 2手 19.5
788 10手 1.757
1810 2手 1810
6049 1手 35.5
6919 10手 32.5

龔成老師︰

人瑞人才(6919)主要為企業提供綜合人力資源服務，其服務包括發布招聘廣告、前端招聘、入職及上崗、後端人事管理等。

根據灼識諮詢報告，中國人力資源服務市場由2014年約人民幣1,912億元增長至2018年約人民幣4,086億元，複合年增長率為20.9%。

預期到2023年達到約人民幣10,142億元，複合年增長率為19.9%。故行業發展，預期係正面。

集團中國具有強大的服務網絡，覆蓋超過150個城市的客戶，開設超過20間辦公室。

按2020年末計，集團是內地龍頭靈活用工服務提供商，以工人數和收入計，市佔分別為2.3%和3.1%。

初步睇，此股都有投資價值。但人力需求很受經濟環境影響，加上集團現時賺錢能力，唔算得上十分強。

而且行業上，也算不上係藍海市場，因為行業都發展了一段時間，只是市佔較為分散，故增長力你預係中上，唔會係爆發性增長。

此股都有投資價值，但不宜太大注。若你持貨不多，可以守。

新東方在綫（1797）都有質素，但政策風險影響較大，不宜大注。

其實你持有股票，都係有投資價值。但較大問題係，你好多股票都係高位入貨。因此，我建議你暫時維持用月供投資，去減少你買貴貨的風險。

持股中，中石化(0386)增長力弱，以你年紀，不宜持有太多。你可以沽出部份，換至其他較有增長力的股票。

而月供方面，選股係可以，但我建議用指數基金做主力，資金分配轉為指數基金$3000、金沙(1928)和小米(1810)各$2500，咁會較好。

另外，現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q22147：

老師：你好！有問題想請教你，首先自我介紹下，我同先生都是50幾歲，有一個仔和女，我做兼職每月3000元左右收入，先生每月約有18000元收入，

兒女還在讀書，每月交租12000元。現時有300萬現金，眼見資金越耒越少，心情難受，近排同先生開始學投資，

買了銀行安聯收益及增長基金（50萬）、純債卷（50萬）、農業股（50萬），請教我如何運用現有資金投資，目標是想草錢買層600萬左右樓住，

望老師能忙裡偷閑解答，萬分感謝！

龔成老師︰

雖然你地5X歲，但購買$600萬的物業，都可以做到按揭，當然成數未必高，以及年期未必長，因為你地現時月入不算多。

如果要累積多幾年錢先買樓，如5-10年，你地能按揭就更少，但如果現時短期內無法買樓，都無辦法，要慢慢儲錢進行。所以，我就當你地能按揭的金額好低或無按揭，去進行分析。

當然，當你地不斷儲錢時，都可以了解下樓市，不一定儲到足夠的數先開始，中間可以調整。

首先，大方向要累積到較大金額，我先以這個假設作分析。

若果係希望將300萬現金，增值去買600萬的物業，重點應放係增值之上。

但由於你和你先生，已經係50幾歲，都比較接近退休之年，係做銀行按揭上，會較困難。因此你需要累積更多資金，甚至係用全樓價作目標，去作準備。

以你年們年紀，投資選項上要保守少少。我建議你利用平穏增長股，作為增值平台。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只是合理區，你現有可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

若你將來子女畢業，開支無咁多的時候，每月若有空出的資金，建議你用這筆錢，去做月供股票，去加快你增值速度。

策略上，你每月先用5成儲蓄做月供。其餘先儲起，用一邊月供一邊儲蓄的策略。餘下一半儲蓄，就等出現大跌市時出手。

而你現時基金和股票，可以審視翻佢地增長力和質素，去決定是否持有。債券只係產品，主要係提供穏定現金流，無增長力。用於增值，就唔係咁適合。

我假設投資回報有8-10%（連股息再投資），你現時投資$300萬，10年後大約會增值至650-780萬。

但你唔好因為見已多於600萬，就覺得足夠。因為置業時，還有其他連帶成本(如稅、律師費、裝修等)。

再加上，到時已到你們退休之年，你們係需要額外一筆資金，去投資收息資產，為自己創造現金流，去支援你退休開銷。

假設你希望退休後，想每月有1萬蚊現金流收入，以股息率6%計，你就需要本金200萬。你可以用此作為參考，去計劃你未來10年投資大計。

------------------------------------------------

Q22148：

成哥，其實我真係想上你既股票班，但我又行動不便

坐車點對點我都得既
因為真係好想學點估值
而家蠻中中咁買股
好蠢

係咪上完堂
自己肯學會學識？

龔成老師：

完成課程後，你會掌握：
☆自己設定投資策略
☆掌握資金分配
☆低風險爭取合理回報方法
☆能分辨股票優劣
☆為企業優質度評分
☆懂得自行尋找優質股
☆掌握5種選股方法
☆掌握大市買入及沽出時機
☆能評估現股價處平或貴
☆掌握企業估值
☆懂得閱讀企業年報
☆懂得分析財務報表

如果你決心足夠，我相信你總會方法去到上堂的，我未搞澳門股票班前，每一期都有幾個澳門過去的同學，每次上次，由澳門來回香港，8堂如此，每次來回花的時間要4小時，我相信你花的時間，應該不用這麼多。

唔好比一些小問題，影響左你追求進步的心，加油！

------------------------------------------------

Q22149：

您好 龔老師：我初學投資購買股票 想請教您

有穩定工作 每月收入約$45000，租金$10000，還貸款$3750（尚有12期）、保險每月$1800

單親家庭 有1小孩（9歲）、請問我應如何投資好呢？

先謝謝解答

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀，應以增值為主，建議你用「平穏增長股」 + 「潛力股」作組合，去創造一個增值平台。

若你偏向較年青，潛力股可佔3-4成。但若你偏向中年，潛力股佔1-2成好了。到你有一定投資經驗，潛力股比重可以調升翻少少。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

策略上，現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22150：

老師你好,唔好意思我想問下1177, 9988 & 941邊隻股票投資較好。

另外想問下我本身用左10萬買左銀行投資plan要放15年。

另外股票方面現在941有2手,9988有1手。本身喺Manulife買左每月供基金下年11月到期,嗰份基金現時大約$200,000.想用多10萬投資,

唸緊買股票定係投資喺Manulife有隻收益及增長基金每月派息大約6-7%. Many thanks

龔成老師︰

你上述3隻股票，都係有質素。但以你38歲年紀，投資應以增值為主。

中生(1177)和阿里(9988)係潛力股，適合你，現價合理，可以分注入市。但中移動(0941)只係收息股，增長力欠奉，對你就未必太合適。

至於一隻基金是否值得投資，你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

以每月派息7%計，勉強算可以。但你要了解翻個派息是否保證，若非保證﹐長線計投資價質股，相信會較高值博率。

------------------------------------------------

Q22151：

老師我有一個難題唔知點做！我媽媽有一層45年舊樓一向放租，近年疫情長達十年租客唔租，因為多年無維修，現在打算大裝修再放租，其實我咁做啱唔啱，

定係有其他方法，保障我媽媽收入。希望老師能幫我分析一下。謝

龔成老師︰

其實你要考慮翻個物業長線投資價值，因為本身個樓齡都略大，長遠維修成本會增加，會有機會慢慢蠶食租金回報。

除非，係一些大型屋苑(特別係藍籌屋苑)，或者你相信裝修後，租金回報會唔錯，而且可以維持一段較長時間。

否則，你要計劃下將佢轉換成其他資產。個新資產，可以係收租物業、收息股或者其他收息產品，都係可以。

若你不打算再新置收租物業，你可以考慮以下收息資產，大致可將資金分成4部分，平衡去分配就可以。

第一部分投資收息股，你可以建立一個收息股組合，你可考慮港燈(2638)、香港電訊(6823)、工行(1398)、建行(0939)、置富(0778)、陽光(0435)等，大多有5%股息或以上(你可睇下我本《50穩健收息股》當中仲有好多)。

你可以用"分注"形式，慢慢儲貨。平均的投資這些股，除了可以得到穩健的收息收，同時可有效的分散風險。這些股票唔洗理佢股價波動，只要一直持有收息就可以。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。另外，你亦可投資銀行低風險類的產品，你可自行到銀行了解下，總之是「低風險，持續現金流」的。

第四，持有現金，這可以為你的後盾，以備不時之選。同時可以等投資機會。

------------------------------------------------

Q22152：

早晨你好，因為我不太懂投資，所以我想分散風險，打算分三筆錢，買入以有關三個板塊「電動汽車、醫藥、科技」的etf、指數或基金。

應該點買？有推薦嗎，或者哪裏可以找到？

龔成老師︰

若你對個別行業有信心，但又不懂從中選股，ETF會係一個唔錯選擇。

電動車行業，你可以用GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

醫藥方面，ＧＸ中國生科(2820)基金是被動ETF並旨在提供在扣除費用及開支前，與Solactive中國生物科技指數NTR(指數)表現緊密相關的投資回報。

而科技股，你可以考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

以上3隻基金，現價大約在合理區頂，至略貴水平。因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

雖然你現時只有約35歲，算係年青。但畢竟以上都是水桶1股票，風險會較高。緊記，最多只可以佔組合4-5成，否則風險就會偏高。

------------------------------------------------

Q22153：

想問有關月供股票事項

我現時月入3萬、1萬家用、現金儲蓄4000

月供股票
1810 $500
1177 $500
2318 $500
2800 $1000

有1手比亞迪 高位240入左

請問老師我月供組合有無問題？

我想月供金額再加大，另外想供12或16，有無任何建議？

月供股票由今年四月開始

龔成老師︰

你現時月供組合，無問題。至於加大月供，恆基(0012)和新地(0016)都可以，但前者會較有發展潛力。

而你現時25歲，很年青，我反而建議考慮供多隻潛力股，去提升個組合增長力，以下都是一些合適選擇。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

另外，你尚很年青，你應該把握沒有太多財務負擔的時候，努力去做增值。最好係每月投入，可以去到人工一半，就較理想。

------------------------------------------------

Q22154：

老師，想問你意見，我係38歲既孖b媽咪，仔女今年3歲，老公係公務員，老公月供梗941 $2500, 823 $2500 我之前問完你意見，

所以月供梗3067 $2000 6823 $2000, 今日出糧公司加左我大概14-15%人工，所以想利用加左既人工，月供多一隻股票，請問有個提議呢？

還是喺我原有既3067, 6823加大月供金額？

我之前曾經問過你，另外心水既月供股票有1211, 2845, 2382，但最後我揀左3067（因為潛力較大）同6823（因為有息）

求指教一下，謝謝老師！

老師，我最後同老公決定供多隻66港鐵$3000, 941 $2500, 823 $2500, 3067 $2000, 6823 $2000, 一齊每個月供$12000, 希望10年後儲到筆錢俾孖b讀書用

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時38歲計，可以較偏重係增值方面。你現時月供股票，都可以。而新加入的港鐵（0066），都係合適的。

但香港電訊(6823)和中移動(0941)主要係收下息，增長力唔會好高，不宜月供太多。

你可以考慮將佢地月供金額減半，去供多一隻潛力股，增長力會較好。以下是一些合適選擇，供你參考。

潛力股可選阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

現時大市只在合理區，每月資金唔好盡用。要留有部份，等大跌市出現時，可以用來掃貨。

------------------------------------------------

Q22155：

龔sir 你好呀，我係你澳門fans 呀，有少少關於買樓嘅問題想問下你意見。最近同女朋友睇中左一個半新樓嘅單位，

入伙唔夠4年嘅私人樓（金峰名匯近路環）建築面積大概610呎，實用率7成3嘅開放式單位，管理費要2.7。我地都幾鍾意個單位同屋苑，

因為入面比較寧靜和配套設施都齊。我地計算過如果供25年的話大概每個月19000（我地兩個收入差少少5萬，）

但如果租哩個單位就大概8000租，我見疫情期間澳門租金跌左好多，而樓市就只係D大單位回調幅度比較多。我計完之後發覺租嘅價錢好似化算好多（平供樓一半有多）。

如果你係我地會先租再等樓市跌定係都會覺得哩一個係入市機會，還有如果美國加息樓價下跌空間你覺得多唔多呢，謝謝

龔成老師︰

表面上，你租金支出比供樓少近半。但實際上，你供樓金額當中，有一部份係用來還本金，其實等同於係度儲緊資產。

所以，你首先要睇翻個物業，長線有無投資價值。最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

同時，你再要審視其升值潛力，未來地區上、交通上、生活等等的配套發展，才去下一個結論，咁會較好。

另外，你再從自已長線生活需要，去睇下間物業係唔係適合。若2關都過到，而你長線又供得起，咁你去置業，係無問題。

記住，我地投資股市和買物業，都唔好用估走勢去進行，我地應用而一刻佢平貴和質素，去決定買賣策略，咁就可以。

至於美國加息，理論上係對樓市負面。但有多大影響，你要視乎佢加息的力度、時間、經濟情況、樓市供求等等因素。而一刻，較難有個明確結論。

------------------------------------------------

Q22156：

老師你好 我32歲，剛剛開始起步投資了，目前有30萬現金左右。用76.6 入了1手中電 28.7 入了1手盈富基金，淨24萬左右。

我打算分注入市 2-3個月後打算再去入1手中電 1手盈富基金

然後打算用8-10萬買儲蓄保險 分散投資

淨10萬現金做儲備

請問目前的策略可以嗎? 謝謝老師

龔成老師︰

以你32歲年紀，可以進取少少。中電(0002)增長力唔算太高，主要係收下息。現有1手可持有，就不要再加注。

你每2-3月入一手盈富(2800)，這個策略係可以。另外，我建議你加多隻潛力股，去提升組合增長力。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

但現少不少潛力股，都尚在偏貴水平。再加上你剛開始投資，未必太懂得選股，我建議你先用行業ETF做目標，佢地都係一籃子企業，較能分散風險。

安碩恒生科技(3067)、ＧＸ中國電車基金（2845）、三星FANG ETF（2814）現價都在合理區頂，你可以用2-3月入一次的模式，去儲貨。

至於"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

------------------------------------------------

Q22157：

龔成老師。 又係我，又打擾你

首先第一樣野要感謝你，就是因為看你的書開始理財，資產增值，最大的改變由以後的日日外食改為盡量自己煮，籍此省錢。

現在每個月如沒額外消費由每月存5000-6000 增加至8000-9000。當然我爸爸近來身體不好，那是另一筆支出。雖然在大家看來是小數目，不過感謝你，讓我定立目標為將來負責。

第二，有關2013微盟，我女朋友之前2月以近30蚊高位買入（約3手，佔股票1x%)。我現在稍為幫她看了2019-2020的報表。

期實他現金流算不錯，不過他現金流主要來自19年約8億及20年約10億的融資或可換股債券，而21年6月也有約3億的融資，

這部份我覺得公司太倚賴融資，現在大家看到這類saas 網上平台、網上商店、網上廣告等的潛力，可能問題不大，不過我是看到隱憂。

另外，雖然他還在消錢階段時，但已有小量的盈利，但他太倚賴騰信，有2x%營收來自與騰信有關的業務。

這兩點是我比較擔心的地方。如果是你，你認為這股在未來5年有能力去到30蚊的價位？你會如何處理這個投資失誤？

但已有小量盈利是指2019年情況

龔成老師︰

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。

營業額其實持續都有增長，2018和2020年較大虧損，主要係一些金融資產公平值變動所致，並唔係業務上出問題。

至於你所講，佢現金流較依賴融資，這個的確會令風險增加左。但由於佢都係一間尚在發展階層企業，需要投入較大研發資金，故要用到融資去支援開發，都係合理。

而騰訊(0700)佔其收入近20%，唔算話好多，過度集中性風險，唔算係好大。

我地分析微盟，主要考慮點會放係企業和行業長遠發展潛力，而唔係而一刻。當然你所講融資較多問題，和發展上的不確定性，會令風險高左。

但整體而言，此股都係有投資價值。但投資時，我地要控制注碼，去平衡翻當中風險。

由於此股有投資價值，雖然買貴左，都可以守。長遠企業發展，會令估值會慢慢上升，從而股價會回升。

但持有3手係比例上，有少少多，你可以考慮減持1手，去平衡風險。如果你唔想沽，你可以用新資金，去慢慢平衡翻個比例，都係可以。

------------------------------------------------

Q22158：

1830幾多才入市

2331可以考慮買嗎

山東黃金可以買入嗎

想重整股票組合。哪些值得投資

美股期權交易是否好大風險

龔成老師︰

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

所以，如果無貨，可考慮回少少，先小注，然後等跌多d先正式分注投資。

李寧（2331）有質素，佢係中國領先的體育品牌企業之一，擁有品牌行銷、研發、設計、製造、經銷及零售能力。

但現價偏貴，你要等佢有較大跌幅，才好開始小注入貨。

你組合中，大部份都有質素，可長線持有。

但留意，山東黃金（1787）盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。

這類企業都有一定的投資價值，但就不會太高。現價都合理，可分注入貨，但不宜持有太多。

中糧肉食(1610)、五菱汽車(0305)質素中等，不宜持有太多。

中國黃金國際(2099)無明顯投資價值，建議沽出。

美股，係有投資價值。但期權這類估走勢的工具，我就唔建議。你應該用翻正確投資方法，就去分析一間企業優劣，再用平貴向定買入策略，之後長線持有。

------------------------------------------------

Q22159：

龔sir, 我今年54歲，月供由1月2020年至現在，大約年半時間，股票之前組合︰

盈富基金$4000
港鐵 $2000
長江基建 $2000
金沙 $2000
中電$2000
港燈$2000
香港電訊 $2000

另外，分注買入
粵海 6000股
港交所 200股
煤氣 2000 股
六福3000 股
恆基 5000 股
置富 產業信托5000 股
中國鐵搭 2000股
小米 400 股

現時組合股票共現值HK90幾萬

很多年前月供盈富基金，大約有2100股，之後停咗，到之後認識你再重啟供股的路，現時都有正增長，好感激你，想問

1.現時組合是否太散？

2.我打算改變月供組合為

盈富基金$4000
長江基建 $2000
金沙 $2000
香港電訊 $2000
港燈 $1000
港交所 $1000
港鐵 $2000
中電$2000

希望這組合可以增加增長率，但是適合我否？

3. 另外，現在有現金大約60萬⋯⋯已經留咗20萬現金作急用（不動產），請問現時那隻股票可以值得分注買入呢？希望趁平價買入以上種類股票，麻煩幫幫忙

4. 另外，想問如果每月供$15000，六年後有沒有可能累積倒市值500萬股票？

真的感謝你幫忙，以上咁多問題希望你唔會介意，因為自從認識你之後真的財富增長速度比我之前以儲蓄的速度相差一截，在此多謝晒你

龔成老師︰

1) 唔算太散，都可以。

但緊記，現時大市只在合理區，每月資金唔好用晒去月供。最好留有部份，等大跌市出現時，可以用來掃貨。

2) 你將港燈(2638)月供資金，換成港交所(0388)係可以。

但以你54歲年紀，要開始為退休作出準備。港交所(0388)這類潛力股，唔可以持有太多，最多只可以佔組合1-2成。

而且，你成個股票組合，你按年慢慢向保守方向調整。慢慢加大收息股比重，到退休時，收息股最好係佔組合100%。

3) 以下股票，都在合理區。而且佢地都係較適合你年紀，未來應以這些股票，作增值目標。

但由於你本身已有一定持股，故我建議你現時40萬現金，等大市真係有較明顯回調，才慢慢出手。

平穩增值股︰、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

收息股︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

4) 我假設投資回報有8%（連股息再投資），你每月投資$15000，6年後大約只會增值至130萬。

但若用你實際情況，每月供$16000 + 現有資產130萬(持股90萬和現金40萬)，6年後係會增值至340萬。

如果要做到你6年後有500萬目標，就要將月供加大至$33000。若不相加大投資資金，就要將年期加長至9年，才可以做到。

------------------------------------------------

Q22160：

你好， 好想長期投資，好認同你嘅投資策略

本人背景，27歲 現有36萬 月入2萬，宜家有1801 一手 ，1772 一手，少量美股

請問有咩投資建議可以長期有回報？

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時27歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，應以增值為主。信達生物（1801）和贛鋒鋰業（1772）都適合你，但信達生物不確定性較高，不要持有太多。

至於美股，你可以睇翻佢有無增長力和質素，去決定是否持有。

未來投資，你可以集中係「平穏增長股」和「潛力股」。你每月用5成儲蓄做月供，其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那36萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17061-Q17080）

Q17061：

龔sir您好，看了您的一些影片和文章分享，明白長線投資才是真的投資而非投機。

在此想請教個低級問題，當我把現金轉換成優質股等資產後，縱然其價值在長期下來會不斷上漲，但我一天不賣，除了股息外，是沒有新增現金流的

這樣我沒有增加可以使用的現金啊？是否定期要賣掉部分資產來換取想使用的現金？我這概念是對的嗎？

龔成老師：

從累積財富的角度上，會出現「怎樣將你的財富最大化」這個前題，當然，會假設你減少消費，盡量不要賣出股票，因為這是用掉了你的財富。

所以，在財富增長期，如果該股是優，你無必要賣出的。

而我地進行人生財富累積，會假設你上半場，努力儲錢，減少洗錢，如何將財富滾得最大，之後，到下半場，就會慢慢用錢。

你去到某一天，都希望用這些財富，好好運用，最好在「不消耗」總財富情況下，能每月有現金流，作生活之用。所以，到時會進行資產配置。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

------------------------------------------------

Q17062：

龔成老師您好，本人40歳，月入$60000，月光族，有一層物業（市值五百萬）最近吐了現金三百萬開始學習投資股票和研究有質素嘅股票作長期供股

希望可以5-10年內達到財務自由每月收息四萬，有可能嗎？

有哪些有潛質的收息股和組合可推介？

一百萬作長期投資組合：盈富基金（30%）、中電（10%）、港鐵（20%）、港交所（20%）、中華煤氣（20%）
一百萬可作短抄和供股？

希望老師可以給予意見！

龔成老師：

如果你投資經驗不算多，加上你資金來原是加按物業而得（原理即是借貸），在投資上，就要較保守，唔好太過進取。

首先，唔好短炒，這是無可能賺到錢的。

另外，你可以將其中的$150萬，投資平穩增長股及收息股，當中$50萬盈富（2800）、餘下可分配恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）、中電（0002）。同時投資收息股如港燈（2638）、深高速（0548）、香港電訊（6823）、工行（1398）、置富（0778）、陽光（0435）都可以。

你唔一定要全部買晒，可以自行選股，建立一個平衡的組合。

現時市況波動，你可以分注資，唔好急。

至於餘下的$150萬，就等機會先用，唔好急，暫時存於按揭高息戶先，你無損失的。

------------------------------------------------

Q17063：

龔sir
你好想問下856
偉仕佳杰

龔成老師：

偉仕佳杰（0856）業務有提供資訊科配件產品，以及及為原設備製造商提供供應鏈解決方案。

另外，佢亦有搞一些發展較快的業務，如雲計算及大數據分折，提供用於資訊科技基礎設施之企業系統工具（中間件、操作系統、Ｕｎｉｘ／ＮＴ服務器、數據庫及儲存）及資訊科技基礎設施設計及執行、培訓、維修及支援服務。

生意與盈利都有理想的增長，但現金流唔強，這是扣分的地方，另外，負債較高也是風險所在。

考慮到相關風險，投資價值都算有，但未算好高，潛力有少少的，不過唔建議太注。現價算是合理。

------------------------------------------------

Q17064：

請問老師，如何5年有100萬

龔成老師：

最基本，你要有本金，同時，你要將資金滾大。所以，你第一步要做的，就是努力儲錢，例如要自己每月儲到$10000。

另一步，就是開始投資，要令財富有合理的增長能力，投資不是炒賣，是一個合理的增值過程。建議你多增加投資知識，在選股、企業估值、投資時機上落功夫，對你長遠財富有好大影響。

------------------------------------------------

Q17065：

Tesla宜家可入嗎
宜家有萬幾美金 月入18000
想儲一百萬

謝謝你
今年27

龔成老師：

Tesla是潛力股，但現價唔平，當然，如果佢不斷保持高速的業務發展，股價有可能向上，但這刻如投資，要小心控制注碼。

你27歲，可承受風險，但都唔好太集中在單一股票，要建立一個平衡的組合。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17066：

我是澳門的，3月諮詢完你的意見後，積極看樓，現在已買入一間剛好600萬的樓自住，雖然由於疫情關係，同區有很多價格更低的，但比較過座向及實用性等最後選擇了剛好在BUDGET內的單位。

待裝修及一切穩定後，會再進一步了解日後的投資計劃，再一次謝謝你。

龔成老師：

先恭喜你！

買樓最重要是「供得起」原則，你在理財上，要先從這方面著手，計好數，做好準備後，之後先慢慢先得「增值」的部分。

------------------------------------------------

Q17067：

我想問現在有很多已在美國上市的股票在香港上市為什麼佢哋要這樣做呢？

因為佢哋係中國驚遲啲美國都會佢哋會做啲乜嘢嘢

龔成老師：

因為有部分中國的企業，在美國上市，但擔心因為政治或其他原因，到某一天而無法在美國上市，因此，佢地要要先找一條後路，這就是來香港上市。

無論佢地最終在美國的去留，在香港作為多一個地方上市，都是無壞的，因此不少企業都這樣做。

------------------------------------------------

Q17068：

老師，明白係自己心理質素差。我真心希望跟你學習

最後7500應該如何賣出？現時輸緊錢！
（另外，想跟你學野，會留意開班時間）

龔成老師：

心理質素要訓練的，首先，唔好比當刻的「短期」市場環境影響，要從長期及實際角度分析，只外，就是平常心面對股價上落。

最重要就是做到理性分析。

另外，ＦＩ二南方恒指（7500）這類反向工具，好難玩的，因為投資者其實好難作出準確的短期股市分析，因此唔太建議投資，你睇位賣出較好。

------------------------------------------------

Q17069：

你好龔sir！

之前疫情同國安法掃左唔少平貨，而家大巿只不過係回升返到合理價已經有可觀既回報！

比著以前短炒就會平價賣晒d股票又唔會趁機買貨，所以感謝你令我認識到價值投資先唔會錯失左呢次既機會！希望多d人會明白呢個投資法！

早排因為國安法太多不確定因素唔係入左好多貨，如果呢刻我仲有約25%現金是否合理？
謝謝！

龔成老師：

你的方向正確，我地應該買入優質企業後，長線持有，之前的疫情及國安法，都是大市波動時候，你可以把握到實在太好！

以現時的大市平貴，你持有25%現金可以，但就唔好心急入市，要等大市再出現大跌的機會，才動用這部分的資金。這刻就儲多D現金先。

------------------------------------------------

Q17070：

老師，唔好意思，想請教下，今日國泰供股其實對間公司係唔係有利無害呢？優先股，同供股(11供7)，對我地散戶有咩影響呢？謝謝

龔成老師：

坦白講，國泰（0293）的質素只是一般，就算佢重組，得到新資金，只是比佢「捱過這一關」，並不是賺錢能力方面有改善，長期的質素仍是一般般。

對於一般散戶來說，就是要供股，投入新資金，如果唔供股，股權就會被攤薄。

------------------------------------------------

Q17071：

龔老師你好，想問700騰訊，入手價$545，見到由540急跌至512。

此股老師話係潛力股 但有風險，如果我呢一刻唔急用錢，請問應該用$515做止蝕位？跌穿即走？

定係繼續長渣（由於睇好該企業長遠發展）？就算跌低過515元心中止蝕位都照渣住等經濟同個市慢慢轉好？

感謝你幫忙回覆比意見。

龔成老師：

你唔好太著重中短期上落，要睇長線，買入後要持有幾年，最好就是唔好睇股價，無意思。

騰訊（0700）是有質素的股票，你買入股票就是買入企業，如果企業質素無變，點解要當佢跌左時賣出？平左應該入，唔應該出的。

雖然你買入價位唔算平，但只要長線，無問題的，少D睇股價啦。

------------------------------------------------

Q17072：

老師 本人新手
我買左你本50優質潛力股一書

對六福集團有興趣 稍有研究
而老師提到自由行係分析重點

但宜家疫情關係冇左自由行 生意大跌
對股價有影響嗎？

我打算入一手 應該趁現在 定等自由行恢復才入手呢？
謝謝老師

龔成老師：

我地當分析企業時，要從長期角度分析，自由行對六褔（0590）有很大影響，中短期一定好弱，不過從長期來看，自由行點都會慢慢好轉，這只是時間問題，這企業亦會因此而回勇。

當然，最重要是企業「捱得過」這關，而六福是無問題的。

如果你投資注碼不大，現價可入一手，因為當你等到自由行好轉，已經不是這刻的股價。當然，你要明白買入價股價仍會波動，要睇長線。

------------------------------------------------

Q17073：

龔sir你好，我係30蚊個時買左金沙中國，想問現家我應該再入多手股嗎？定佢會有機會跌，應該要等

同埋盈富現定都回升到，一手股買唔買得落，定等佢跌再入手好D

最後想問1928同2800合理價位係幾多呢？
麻煩晒龔Sir

龔成老師：

金沙（1928）有一定的質素，但疫情仍然反覆，全球經濟仍有潛在風險，如果你$30買入時持貨好少，現價就可入小小，但如果當時買入貨已適量，就等$2X先入。

至於盈富（2800），現價仍是合理區，只要你買入後，你仍有現金剩，其實現價仍是可以分注投入的。

兩股現價都合理，盈富$24以下開始平，而金沙$27以下開始平。

------------------------------------------------

Q17074：

你好，岩岩開始睇80後百萬富翁3，睇左2章，想一邊學，一邊試下投資，現在剛剛開始月供金莎和盈富各2000,想投資埋銀娛，但想直接投資一萬(不月供）省手續費

我見你FB都有介紹銀娛，想問下銀娛的資料，再次麻煩你了

龔成老師：

對初學者來說，月供盈富（2800）是很好的做法。

至於金沙（1928）與銀娛（0027），都是好有質素，適合長期月供的，金沙收息較好，銀娛就增長力較強。但你不能在投資組合中，過度集中在這兩股，如果你想同時投資這兩股，就每隻供$1000。

如果想一手手直接投資，都可以的，最好是你可以分注買入，減少一次過買入價的風險。

留意翻每一股的佔比，唔好過度集中。

銀河娛樂（銀娛）主要業務為於澳門從事娛樂場、幸運博彩、其他形式的博彩，提供酒店及有關服務，以及在香港、澳門及中國內地製造、銷售及分銷建築材料。

自2002 年獲澳門政府批給博彩專營權後，銀娛一直發展澳門的酒店及博彩業務，目前博彩及娛樂業務已佔銀娛營業額及盈利的九成半以上，集團旗艦為「澳門星際酒店」、「澳門銀河」、「澳門百老匯」。

2020年的肺炎，對銀娛有相當的打擊，但由於這只是中短期事件，疫情總會過去，因此這企業長期仍是穩健。

綜合而言，銀娛有一定的質素，絕對是優質股之選。但賭業的收入較為波動，這亦令銀娛過往的股價較為波動，因此投資者要明白這點。

現時的股價處合理區，賭業不利情況只是中短期問題，只要企業的務情況穩健，就不用擔心，銀娛是有能力捱過的，之後就會慢慢回勇，這只是時間問題。

由於這股的亮點是長期發展，因此要長線投資，經濟、自由行人數、賭業的中短期可能會有波動（特別是賭業對經濟較為敏感），但長期計，賭業一定是很賺錢的行業，所以當行業處於較弱，這股較多壞消息時，必定令這股處於較平狀態，反而是最好的投資時機。

------------------------------------------------

Q17075：

龔老師
我睇緊隻嘉里物流636
各項數據都吾錯
唯成交量比較少
請問你點睇？

龔成老師：

嘉里物流（0636）這股不差的，佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的３５個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

現時的經濟及疫情，對佢都有一定的影響，而市場對佢的估值都會因而減少。

其實現價處合理區中下部，以長線投資的角度，有值博率的。成交少並不會影響企業價值，只會影響股票的流動性，但只要是長線投資，這問題不大。

------------------------------------------------

Q17076：

龔sir，有少少嘢想請教，最近我在看1088神華的股價圖表，我記得2007年11月左右股價上過去40幾50蚊，喺aastock都見到

但有d 股票軟件嘅圖就顯示20幾30蚊，近期6月3日除淨前14蚊，而家睇翻某d圖，顯示12,13個幾，請問係咪呢d股票公司想呃人呢？謝謝!

龔成老師：

股價圖是會因為企業的派息及送股，而有調整的，這是正常的情況。

例如某股今天收市$10，明天除淨日，派息$1，這樣，明天的股價就會變成$9，這是自然的調整。而過往的股價圖，都會全部下調$1。

另一個例，如果某股送紅股，1送1，其實即是將1股變2股。

如果今天股價$100，明天除淨日，明天除淨日，1送1，這樣，明天的股價就會變成$50，這是自然的調整。而過往的股價圖，會全幅「除2」。

------------------------------------------------

Q17077：

龔成你好，我想問你覺得如果做地產保險經紀呢類不穩定收入，靠傭金搵食嘅行業，未必可以做到持續買月供股票做長線財富增值，咁可以有咩其他途徑為財富增值？

當開到單，出左佣金之後又可以做啲咩去增值財富呢？
感謝

龔成老師：

就算收入不穩，只要用過往的平均收入作準，同樣可以進行月供，只要每月所供的金額，不要太多，同時保留一定的現金在手就得。

另外，你都可以用一手手的方法買入。

首先，你要留有一定的備用現金，例如$10萬，至於餘下的，就可以投資有質素的股票，同樣可以進行財富增值。即是設定個底線現金，這數目以上的，就可以投資。這樣同樣可以有效進行財富增值。

------------------------------------------------

Q17078：

您好想請教。
本人四十幾歲，沒有物業與家人同住。唔識投資，早幾年高位買入2628.

現時每月可儲hkd 10.000 有月供066 同2800. 現有股票如下
2628 4000 股 買入@37
2800 64xx 股 平均24.05
0066 54xx 股 平均 43.8
0823 1000 股 @48
0939 10000 股 買入@ 7.5

另有usd 30000 (較早前對換因聽家人講唔好留港元)
一份年金已供完，如現時攞全數有大概hkd 230,000

2628 睇嚟唔會升番買入價，唔知點，如賣會蝕好多。
同066 依家跌緊，係咪可以繼續月供

同埋想問應該可以點分佈/重整以上資金投資？請指教。謝謝

龔成老師：

你現時持股，基本上都是有質素的，只是部分股票較高位買入，其實大部分都可以長線持有的，無問題。

盈富（2800）你可以保持買入，只要你同時留有一定的現金就得。

至於港鐵（0066），唔需要理中短期股價，保持長期月供就得，因為最重要睇企業質素，但你要留意，長遠這股佔你組合的比例，會否過多。

至於中人壽（2628），只有暫時守住先，佢會上翻D但要去到$3X就比較難。

如果你40歲，財富仍有平穩增長力，之後可以保持投資盈富及其他平穩增長股。

------------------------------------------------

Q17079：

成哥你好，本人今年30歲，因屋企環境一路未能成功儲錢，亦不懂投資，於近月開始學習，現時有資產35萬，月儲1.5萬

其中大約10萬放了在2840
部分在2342、2018及3175。

看到你的投資方法覺得很正確，想投放部分於收息股作長線投資，0008可考慮嗎？

想請教你對以上既股票有可展望及可持續持有嗎？謝謝成哥

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

ＳＰＤＲ金ＥＴＦ（2840）是追蹤黃金的ETF。由於現金貶值，長遠黃金的價值會向上，不過，黃金始終沒有現金流，因此唔值得持有太多。

京信通信（2342）可長線持有，但現價唔算平。瑞聲（2018）有質素，可持有。

至於Ｆ三星原油期（3175）就是追蹤標普高盛原油額外回報數之表現，不過，我都無特別研究這基金，只是追蹤油價的相關指數。

當中有點複雜，唔止關油價事，仲有考慮轉倉成本等因素，價格與期貨有關，而期貨會到期，所以要不斷轉倉，而轉倉要成本，就會令這基金價值減少。

中短期油價會好波動，風險高，如果油價持續不利，每月有成本，都好麻煩。因此，一定唔可以大注。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17080：

你好龔成老師
想問下一啲有關股票嘅問題
今年廿五歲

月入17000
想將來財務自由唔使打工

希望可以買入收息股
到將來有可以有每月派息30000

請問除咗公用股
仲有冇其他選擇？

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你25歲，可以集中在「增值」的部分，首先，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

如果可以的話，你每月做供股票，每月$5000。如不想月供，就自行分注投資。

你可以考慮盈富（2800）$2000。

另外再加2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

2020年7月28日 范巧茹

香港新冠肺炎疫情持續惡化，昨日確診個案創新高。我們迎來更多收緊措施，但相信未來數天，確診數字或以倍數增加，似細價股狂升嘅股價圖，因為檢測範圍進一步擴展，或會找到更多隱形帶菌者。

昨晚美股表現不俗，白宮新一輪方案計劃推出，市場憧憬可以振興經濟，亦期望資金流入股市。至於蘋果、亞馬遜、Facebook、Alphabet，今周公布季績，可以留意，相信業績不太受疫情拖累，甚至可能是受惠者。你都上多左Facebook youtube 同上網買嘢啦。

另外，美國上市中概股搜狗，獲騰訊(0700)提出私有化建議，每股作價9美元，溢價56.5%。現時騰訊持有約39%已發行流通股份。此行動反映中概股想離開美國市場，除了選擇香港第二上市外，股東私有化可能是途徑之一。私有化成功後，搜狗將成為騰訊間接全資子公司。私有化或對未來的整合更為方便，或於搜尋器上有另一部署，或是只為避開美國監管的干擾？搜狗目前在內地的搜尋器市場上僅次於百度，但市場份份遠遠不及。當年2017年在美國IPO，上市價為13美元，仲未上返水面，會唔會私有化後回歸港股或A股？

美元非常弱勢，昨日跌至兩年新低。究竟美金是否會低位反彈？資金為何要離開美金？以往美元弱都有利新興市場股市。貨幣都是看需求及當地經濟表現，美國經濟弱，咁歐洲呢？日本呢？美國大印銀紙，歐洲、中國都印唔少。

市場焦點於黃金上，昨日現貨金創新高。一來中美關係緊張，另外市場開始擔心通脹、滯漲，對抗通脹最大工具都是黃金。加上全球量寬及低息環境，持有黃金與持有債券、收息資產，基本上沒分別。可以留意黃金ETF、紙黃金、金股，甚至實金。但參考油價經驗，商品市場也可能隨時出現難以預期的極端市況。

今早外圍期指繼續向上，新加玻黑期升逾200點。港股或維持窄幅波動，沿上升通道(橙線)中軸下半部分窄幅上落。科技股高位整固，但舊經濟股拉低股市表現。

科技指數昨日首登場，鴻騰(6088)表現最差。雖然是大圓底升穿頸線，但燈號未轉為綠燈，頸要小心。恒騰(0136)表現第二差，其圖表不及鴻騰好，但燈號有4粒綠燈。微盟(2013)頸線，約10元附近不容有失。若跌穿的話，下跌幅度會更深。至於表現最好有眾安(6060)。比亞迪電子(0285)圖表幾好，手機類相關股份，我會比較喜歡它。

騰訊昨下試頸線位置，今日或會反彈。現時形成另一個高位橫行反覆區域。若今日營造短線上升浪，上次高位564元就是阻力。

中印關係仍未有起色，如果選擇能避險的股份，不會選小米，雖然我仍然不明，為什麼小米股價不去反映這個風險，但這個險暫時不宜冒。

黃金股受惠金價上升，特別是山東黃金(1787)，它幾乎百分百與金礦相關。雖然金價尚有上升空間，但需要小心注碼，睇住美元、金價來部署金股。招金(1818)、紫金(2899)升幅相對較慢，因為其金礦佔整體營業額，不及山東高。黃金相關ETF是比較穩陣選，跟隨黃金價格向上。利好金價消息仍然主導，博金價跌的朋友要留意位置。根據油價上次經驗，到一些極端情況時，需要更加小心，留意風險。

金飾股，10多年前都有因金價上升而熱炒。六福(0590)較受惠因有較多實金坐貨，周大福(1929)相對較少。它們現時內地業務多於香港業，香港零售市道差未必有太大打擊。不是叫大家買，但不宜看得太淡。

要提一提思摩爾(6969)，入左港股通，琴日北水淨流入好多，概念我知好獨特，但往往會趁好消息出貨，情況一如中芯A股掛牌，高位請小心。

(純分享，請對閣下投資決定負全責）