［活在回憶中，到老一場空呀］狡兔都有三窟，出嚟行要幾張鬼卡。退休點可以只靠一隻股票？

1. 一貫作風，報紙專欄，導讀長過正文。你當係Director’s cut

2. 慣例，post最底有全文，反正免費嘢。或者睇返蘋果亦得：　滙豐如辰衝 廿蚊不是夢（https://bit.ly/2PrVQky）　

3. 張圖我幾鍾意，固然辰衝都講咗一個星期，過氣，但我度篇文都幾日前，而第一句湧出嘅就係呢句，「滙豐如辰衝」，廿蚊不是夢係後來加嘅，某讀者提議的

4. 唔鍾意嘅，又會指手劃腳講，廢文，成篇文連業績點差又冇講，公司面對咩問題又唔講，點解係廿蚊又唔講（答案：因為順口，原本想寫　十蚊不是夢）。但，你肯定想聽我講　業績點差　公司面對乜問題　同埋點計估值？我寫幾萬字都得。但你咪玩啦，百壇齋主。畀A你又話冇B，畀B你又話悶，正四方西。你肯撚定？咁不如我地講下份業績，咩係RWA，乜嘢係NRFB ，乜嘢係CET1 ratio 先？Risk Weighted Assets, Non Ring Fenced Bank，Core Equity Tier one ratio，唔好話我拋縮寫啦。你肯定你想我寫呢啲？Glossary你都未撚識睇啦多多事實。咁當然你唔使好波過美斯先可以鬧美斯，但至少都要識球例掛

5. 我想講嘅係，大佬，2020年啦。但依然係行禮如儀，又去講返某人直播落淚，又係搵幾件長情阿叔出嚟講退休金泡湯，然後又搵曾淵滄出嚟講自己啲匯豐鎖在新加坡佢幾蚊時買冇問題—係事實，但，厭唔厭？同樣地，辰衝執笠又係講當年邊個阿叔在呢度溝名校女生，當年點樣丘世文顧西蒙。實情寫嗰個，同埋睇嗰個，都廿年冇去過辰衝。

6. 事實大家早早唔睇書，睇嘅都亞馬遜誠品。同樣地，講匯控創新低，同時間蘋果創緊新高，美團創新高，甚至個「港版納指」嘅恒生科技指數都新高。正如明報星期日有篇文寫得好（https://bit.ly/30rzIgw），「我覺得沒必要討論辰衝，它不配被懷念或被撻伐」。「咁你又寫？」。我唔同，我擺明呃like搵食。而且我係個人Page，唔係霸住個B1頭條寫本人同辰衝嘅私人恩怨嘛

7. 辰衝係文化陸羽（但本人去陸羽其實冇乜嘢，咪舊式酒樓服務），匯控就係銀行界檀島—越做越差。講嘅未必係服務（服務就間間都差架啦），但股價同業績唔呃你。

8. 冇錯，銀行難做，全世界都難做，請去鬧聯儲局同歐洲央行。銀行股普遍都差—但都有冇咁差同最差嘅分別。匯控在上一次危機（金融海嘯），其實股價畀好多銀行都好，因為資本強大云云。但今次就唔係了，在眾多銀行中，佢跑輸好多同業

9. 至於「退休全部靠晒佢啲派息」嘅，固然唔係貪心之徒，但不幸地，都係做咗錯嘅決定。點解你退休嘅錢，可以全部靠晒一隻股票？！朋友話「如果佢買晒亞馬遜你又唔會咁講」，差矣。可能係。但，即使我推介任何投資都好，有冇叫你訓身家買落去？

10. 仲有個深層次啲嘅問題，Alternative Path，Possible Worlds嘅問題。（https://bit.ly/3kbJYBx）。人人都講黑天鵝，你估人人識黑天鵝咩。作者咪講過，Your dentist is rich, very rich。你剝爆卡買中石油，當然係你有膽識你好嘢，但，我唔會叫人去照做一次咯。結果同決策過程，係唔同嘅。所以咩四十歲會計師身家買匯豐（https://bit.ly/3k6O7qe），當然要恥笑。你訓身家買乜我都係咁話，祝你好運。你廿歲我都仲理解，成副身家十萬八萬甚至一萬幾千。但四十歲人，你輸晒之後—唔係冇得翻身，但，半場畀人數咗三球了。

11. 係架，佢訓身家買咗六合彩而家發達添。但如果唔中呢？仲要話退休人士休息喎。匯控出業績嗰日，仲有兩間藍籌出業績，恒生同中電。業績一樣差，但恒生就減派息，中電就保持派息。我當你最初唔係退休靠晒匯豐，買晒呢三隻，都係收少啲息，但至少唔會冇飯開日日嘈，最多係由食半島變檀島。

12. 講過了，買匯豐嘅，「想穩穩陣陣收七厘息嘛」。呢個咪就已經係錯嘅諗法。世界上係冇「穩穩陣收七厘息嘛」，甚至冇「穩穩陣收三厘息嘛」。美國十年長債債息0.5定0.6厘，高過呢個數嘅就係「唔穩陣」。本來風險冇問題，但你唔知自己take 咗就有問題。

13. 周顯有過一個露骨但我好鍾意嘅比喻：你去嫖妓，看似危險，其實安全，等於職業車手賽車，一定做足安全措施。你啲老蘭ONS，以為乾淨，其實等於臭飛渣大膽車地下賽車，呢啲先最危險—因為你以為安全。

14. 買輪嘅，唔會買身家（你會嘅恭喜你）。但買匯控嘅，就買身家—因為以為冇風險「最多個價跌但我夠長命」「穩穩陣收七厘息嘛」。

15. 所以好多人嘅諗法都係有盲點嘅。等於埃汾叫你買金，然後佢訓身家去買，輸咗錢又問我點好　—　叫你買，同叫你訓身家買，係兩回事。What if 我睇錯呢？What if 你睇錯呢？你成副身家信一個未見過嘅人，咁我好多謝你對我嘅信任，但你自己就好危險。

16. 當然你可以話我細膽，隨便你，你今晚訓身家買場波，應該快過你咩買蘋果買亞馬遜升幾倍。但，如果唔中呢？

17. 呢個亦見於我嘅做人哲學，同埋行為。唔止我要求自己盡量高透明度，亦都要求自己坦誠（那怕係戇鳩地坦誠仆街地坦誠）。睇過收費短片嘅可以做證，我唔信聯匯爆煲（事實爆咗未？），但，我一樣叫人轉啲美金 – 因為，可能我估錯呢？同樣地，你今日睇梗係美股好，但我亦唔會叫你買晒—如果我同你都估錯呢？

18. 再舉個例，我要嘅，一早可以買樓添。事實我啲同學好似04 甚至02買樓，我去到13。我係咪人工特別低過佢地？又唔係。甚至唔使13年我都可以呼丕層樓添（濕鳩屯門樓都係樓），但我都係儲到可以呼丕後再一陣先買（固然都係做九成按，留意我可以呼丕，同我去做呼丕，係兩回事）。係架，錯過咗09年個升浪呀，但又如何？下下倒後鏡咩。係架，早年我想換去住太古城添，當然買得起，當時仲有銀行士大夫優惠—但，如果畀人炒呢？如果我想劈炮呢？（結果果然冇耐後我就裸辭，如果嗰時換咗層太古城就應該唔會了）

19. 至少09年後，我全部日子都訓得安穩，今年3月咩股災，冇乜點驚過。我完全冇減倉，仲有加（講股票啦，樓冇買多層，雖然有諗過，咩呀，台灣樓唔係樓？），而家堆嘢價值低位升返五成（其實，即係同標普指數差不多，但夠啦）。你可以睇返個FB post啲人點串我點鬧我（https://fbook.cc/3DW0）。咁我肯定佢地全部而家都表現好過我的，應該係。根本唔使跑贏大市，因為大多數人連呢點都做唔到。

20. 再諗下，咩97移民潮啲友，當時當然覺得香港仆硬街啦，個個都咁講，於是連根拔起，層樓都快手買賣。「但如果你錯呢？」
-----------------------------------

辰衝執笠，我相當心涼，該店出名門高狗大白鴿眼。滙控（005）呢？我並冇特別唔鍾意，但如果辰衝係文化界陸羽（本人去陸羽倒冇不快），滙控就係銀行界檀島。前景坎坷，食老本，全無改善，稍為有尊嚴嘅人都避之則吉。說話係難聽，但三唔識七我冇必要針對小股東，記住苦口良藥。

咩年代呀？個世界要進步的。但辰衝執笠後，照舊係訪問吓啲阿叔當年點溝名校學生妹，照舊講咩一個年代終結。今次滙控業績後，朋友依然係傳某人在電視落淚張相。傳媒循例又訪問下啲長情股東，「我退休靠晒佢㗎啦，但都冇計，惟有希望下年派返息啦。」

滙控創新低嘅同時，蘋果創緊新高。OK，美股巴閉嘛，唔好咁屈機。但「港版納指」一樣創新高。話港股廢嘅，至少騰訊（700）、阿里巴巴（9988）、美團（3690）等，近年差不多任何位買你都贏錢，而我唔係叫你去買細價股喎。

滙控愚人節彈弓手，除咗淨嘅股息都唔派，至今4個月。有本書叫《Who Moved My Cheese？》。你不停咁鬧滙控令你嚿乳酪冇咗，有冇用？冤有頭債有主，而家係英倫銀行搶咗你嚿乳酪喎。

最好笑係，滙控在歐洲蝕到七彩，南北美非洲中東基本上打和，就係亞洲賺埋貼歐洲蝕！而仲要係英倫銀行禁派息！但公司或股東堅持攬住英國做總部，就唔知點解了，莫非英國有乜乜咁巴閉？而家環境，講遷冊香港梗係政治不正確。但，不如諗吓新加坡之類？阿爺可能肯接受，又可能唔使俾人限派息。

滙控鬧劇，畀大家最大嘅教訓係：投資應該分散。每次我講呢句，都會畀人鬧，但事實如此。唔好講「一早買騰訊、蘋果就冇事」之類。實際啲，買滙控嘅係咩人？多數咩心態？我歷年都接觸唔少呢啲小股東，佢哋並唔係貪心嘅人。可惜，好人未必係有好報嘅。唔係你嘅錯，係社會嘅錯。你問個小股東點解買滙控，想像吓佢會點答？佢應該唔會答「我覺得公司可以改變世界升幾百倍」、「覺得管理層好有型」、「覺得銀行超好賺」。

十個有九個答你「我諗住穩穩陣陣收吓息」。不幸地，呢個世界上，係冇「穩穩陣陣6厘息」，甚至冇「穩穩陣陣2厘息」。美國10年債券，而家係0.6厘息左右。任何超過呢個水平嘅息，就即係「有風險」。只不過，有時風險喺你知嘅地方，有時喺你唔知嘅地方。畀得6厘息你，當然係有相當大風險，你食咗唔知啫。

唔想咁樣，可以點樣？風險其實好難避免。除非你甘心拎0.6%回報，否則必定有風險。但，你可以將佢管理得好啲。我見訪問好多退休人士，居然係可以成副身家放晒落滙控。有啲真係話平日開支就靠收4次息。唔覺得咁有問題？佢有事你咪PK？

我無法估下一隻蘋果，因為話唔埋會變下一隻8號仔，況且退休人士唔適合咁進取。但市面大把收息工具，當然，都係必定有風險。但最重要嘅，就係分散。當你最初買啲滙控，但又買啲恒生（11），買啲中電（2），三間咁啱一齊出業績：一間唔派息，一間減，一間維持。咁你最多係由食半島變成食檀島，但總好過乜都冇！你話，咁咪拖低個股息回報囉？係呀！咁，你想食得好定瞓得好吖？拎個中庸之道囉。我幾肯定滙控嘅股東，而家寧願最初有買其他幾隻。
狡兔都有三窟，出嚟行要幾張鬼卡。退休點可以只靠一隻股票？活在回憶中，到老一場空呀，切記。

————————————————————————————————
最新收費影片：第一次推介跑贏大市，同你回顧檢討下。仲有新推介。40分鐘，都係賣返$80

簡介及以前嘅片（未睇可訂）：https://bit.ly/3iYMD0F
報名嘅，課程編號CC006：https://bit.ly/3eXVX1K
報完名交咗錢，呢度log in：https://bit.ly/3gYXu9e
之後按最頂「按此觀看」就得
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:　回顧第一段專欄片有幾勁！今段落多幾個Number賺死你！40分鐘，都係賣返$80

影片/課程編號：CC006
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC006]
2/利用信用卡網上付款
3/及後有登入資料可以立即收看
查詢：whatsapp 63832145

［八成人，重考都唔會升級］當然你可以搏，好主觀嘅，六合彩都有人中。但整體嚟講，你見到好多人都高估自己能力。邊有咁多唔好彩？

TL：DR—數字已經話你知，唔係game of chance．仲要畀多年時間你，都仲要八成人原地踏步。證明八九成原本嘅 grade，係fair嘅。係呀，可能你升級嗰年先係運氣喎。

1. 人生有個好朋友好到極。話說我昨日在公司原本可以黃昏走人，結果篇埋篇DSE（https://fbook.cc/3CkI）。咁就順手在公司做埋嘢（原本想在屋企做的），結果搞到十一點半先走（明顯係有人將啲嘢堆到死線前先做）

2. 以上呢堆同本文有乜關？就係，我返到屋企，睇埋啲email呀之類，兩點咁滯，然後發現已經冇晒儲稿！要知道埃汾有七點半出post，畀你返工坐車睇文嘅習慣（＊）。但冇晒啦喎，點算呢？當然可以即時打篇，又唔係未試過，但今日比較累。

3. 就畀我見到朋友嘅呢個圖。正好啱使。個圖靚，有insight，有話題性。夠晒。最重要係佢容許我抄圖抄結論（唏，其實我好多文都係咁，但經我一抄就成篇文唔同晒，分分鐘你覺得原創者抄我）

4. 首先介紹返，DSE真係好重要。同個圖冇乜關，但同件事有關！呀作者鍾意低調，但作者當然係個勁人（拿我唔係好多人話勁人架下）。雖然佢唔係我同學，但都叫做朋友嘅朋友。個朋友亦係勁人。直接啲講，呢啲唔係讀三流大學四流副學士嘅人。係真係，唔同的。你嘅朋友係乜人，往往又令到你識到嘅新朋友係乜人。正所謂痴痴呆呆坐埋一枱。因為勁人係覺得啲廢人浪費佢地時間的（當然，廢人都覺得勁人浪費佢地時間，世界真好）。講咁大輪，唔敢話我DSE仆咗街就識唔到呢個人，呀朋友好大愛嘅，但機會細啲咁咯。

5. 好，正題。基本上個圖同個題都講晒。16/17年嘅數字，重考前重考後嘅級數，真係我地啲寫文人最好嘅原材料。DSE英文。但朋友話望過下其他科同年度都係咁。咁信住佢先，但得閒我會自己再研究下（＊＊＊）

6. 朋友寫咗了。重考嘅人之中，八成，係升唔到grade嘅。七成都係原地踏步，一成仲要再跌，哈哈。升到級嘅，兩成，差不多全部都係升一級。升到兩級以上嘅，1%都冇

7. 當然，八成，1%呢啲，算大定細機會，睇係咩事件，咩情況，代價係乜，不能一概而論。但朋友話頭，如果離你目標爭一級嘅，仲可以博。爭兩級嘅，其實不如去買場波好啲。

8. 朋友話，「重考能改善成績」嘅機會，可能比好多人想像中更窄。我唔肯定。呢啲「好多人」，係街外人，定當局嘅人？可惜我張圖劇透咗，否則可以一開頭問返大家，你估下有幾多人升到grade，兩成，係咪比你預計少？我唔知。但似乎係比我預計少。但，當局者呢？係佢地高估自己能力，定好多人都知機會不大，只係摶一搏，好似打機首抽咁，唔啱心水咪抽多次，咁？

9. 我可以再補充啲諗法。留意，會去重考嘅人，係幾細嘅一部份，4000人左右。咁當然，佢地係覺得「我唔好彩」「我未盡力」之類。咁可以睇下，呢啲人，係有冇高估自己實力？

10. 答案都幾明顯啦，係有嘅。七成人都根本係同一個級　—介紹返，唔好忘記你多咗一年時間，又多咗一年經驗，況且應該唔使應付咁多科。想講乜？不進則退。其實維持原判呢七成，根本就已經係高估自己能力。

11. 另外，其實你估都估到。又係好殘忍咁講句。你估下咩人會重考？固然有啲精益求精，5級都去重考，但鄧小平啦，少數。最多嘅，當然係考得冇咁好嘅人，合符你常識丫。係咪？

12. 嚟啦喎，1）多數人重考都升唔到級，不進則退。2）重考嘅多數係低分嘅人。兩埋夾埋，證明到乜？證明左D-K Effect （！）（https://bit.ly/3jv8BZz）—咪就係，冇能力嘅人，咪會高估自己能力！哈哈哈哈。但，呢個結論係錯的。比你諗下點解錯。

13. 因為，人數上，同比例上係兩回事。朋友最右邊嘅表咪話到你知，升級最大機會嘅，其實係拎U嘅人，或者1分嘅人。其實都合理，「個基數低咪易改善」。真的，有啲可能根本係夢遊球場。但你見234嗰啲，反而係低。至於5**嘅，其實係想點？

14. 講返個結論。都係傾向於我話你知嘅，一般問題，都係懶，或者柒，或者廢。懶應該最易一年內改到，廢其實都可以改到（你睇U嘅咪知），但柒嘅最難改，而目測佔最多

15. 睇到啦，七成人重考都係同一個級，甚至重考呢班人已經係覺得「未反映我水平」嘅嗰班，都仲係咁。證明，呢個唔係一個game of chance．唔使數字證明啦。如果係運氣成份大嘅，點會有個咁嘅分佈？你應該見到相對地分散。

16. 所以，其實有時自己都唔知，但都係疑點利益歸於柒。好大機會，都唔係運氣。

17. 最後一講，上篇文都講過。我知有運氣。但就算有，你都唔好成日用嚟做理由。否則對你成長冇乜益。梗係有運氣啦，但高手因為運氣輸咗，唔係同人講自己冇運—而係下次令到運氣成份更細。舉個例，可能係球證偏幫，或者發雞盲，或者收咗錢，老屈你一個十二碼，一個紅牌。係架，係老屈。你當然可以北京電視機（＊＊＊＊）。但更好嘅係，你下次令對手波都拎唔到半場都過唔到，咁冇得插水冇得屈你十二碼啦？

18. 當然，包拗頸嘅話，理論上兩者可以並行。我一路鬧北京電視機一路練好波，得唔得？杜奧巴都係咁，後來捧歐聯添。但，實務上，等於咩鬧鬧鬧匯豐彈弓手嗰班。 Who moved my cheese？係架，理論上，係可以一路鬧一路自己部署。但實際上，嗰啲友，十個有九個都錯過晒之後嘅升浪。你咪鬧。係呀，鬧多幾下會派返畀你。而家BNO都唔使續有得去英國，快啲去英倫銀行門口鬧。

（＊）呢個七點半出post嘅規律好多人知。但應該冇乜人知，我揀出乜post，都有考慮。啲太技術性嘅文，或者涉及好多數字呀，或者多external link嘅文，我係唔會放的。例如上次篇「」香港納指（https://fbook.cc/3CkJ），咁技術又咁多數字，唔啱在車睇。但我又想開市場前咗個收視，所以較到八點半，等你返工坐低食住早餐睇。係咪好體諒大家呢。你愛惜你嘅讀者，你嘅讀者先愛惜你。（＊＊）

（＊＊）由此可見，好多人話我「唔識體諒人」，係錯嘅。一般嚟講我係「唔撚體諒人」。留意，兩者真係有分別。我係知道你點高興點唔高興但我決定做唔做，反社會人格嘅人往往係冇感覺，所以我應該唔係（未係）好嚴重。

（＊＊＊）拿，朋友就係咁。佢往績好，我當然信咗佢先，唔會質疑佢。但到有空時，我會自己查證一次。可能佢睇錯呢？有幾出奇。況且聖人都有錯。

（＊＊＊＊）自己Google啦

-------------------------------------------------------------------------
香港聯匯何去何從？新收費片已出，講足一個鐘，單次買200

想睇簡介嘅，呢度。亦有埋以前嘅片，有興趣可訂：https://bit.ly/3iYMD0F
報名嘅，呢度。今次課程編號填 CC005。唔想填信用卡亦可以FPS： https://bit.ly/3j0r9QZ　
Log in 呢度：https://bit.ly/3gYXu9e
已付費嘅，log in後按最頂「按此觀看」就得。再唔係返呢度睇：https://bit.ly/3fyKbw0
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:「聯繫匯率會否脫勾？散戶應如何應對？」
影片/課程編號：CC005
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC005]
2/利用信用卡網上付款
3/及後有登入資料可以立即收看
查詢：whatsapp 63832145

［DSE仆街點算好］考得好嘅，就梗係去外國，或者在香港讀醫。撈兵拿。但考得唔好架呢？

TLDR：真的，DSE仆咗街嘅，等同你半場輸咗0-2。係死唔晒架，係可以奇蹟反勝架，但你可以望下走地盤賠率點睇你。除咗好老土嘅，下半場努力啲。其實最緊要係，面對現實，檢討。十居其九，一係你懶，一係你屎，一係你柒（留意三者唔一樣，但唔少人三者集於一身）。一日仲係賴唔好彩嘅，一日你都唔會有進步。

1. 拿，其實我係可以五點半放工返屋企玩勞蘇的。但因為我有使命感，先寫埋呢篇文先放工

2. 講真的，DSE真係唔關我事。冇教書好耐，我啲學生仔都生埋。我又冇小朋友，我朋友啲小朋友又未去到咁大。而雖然本專頁嘅讀者其實多數後生過我，但相信都冇幾多個係考DSE嘅。仔女考DSE？讀者又好似冇咁老。不過可能些上些會去到啲考生，或家長度？是但

3. 上次開考時寫過一次（https://fbook.cc/3CiD），反應好好。未睇嘅，可以快手睇多次。

4. 如果你係考得好嘅，恭喜你。你應該做嘅嘢，係去外國讀書，或者在香港讀醫。撈冰拿。遲下再解。但真係唔使用腦。你唯一要擔心嘅，就係諗下點打發蘋果記者問你國安法。真的，啲人話小時了了，但我好似冇乜見高考學霸第日會仆街。況且，DSE仲小時？（但如果你成績好，但怕血又手震嘅，咁你就會end up 好似我咁嘅下場）

5. 咁所以，篇文，係畀啲考得唔好嘅人睇嘅。嚟啦喎

6. 上篇文都講，邊個話公開試唔緊要嘅，一巴星佢啦。咁大家都知道埃汾鍾意迫人面對殘酷嘅現實。所以呢，你DSE失利。恭喜你，你嘅人生已經輸咗一截，中咗一下超必咁，睇圖，你就係中咗拳嘅小麥奇

7. DSE仆咗街嘅，就等於踢波，半場你輸緊 0-2咁咯！如果屋企冇錢嘅，就等於再趕咗件出場咁上下。

8. 就係咁，有幾難明？係咪有人話唔重要？

9. 點解唔係0-1？以前有會考有高考嘛，而家一劑過，咪0-2。咁點解唔係0-3？又未咁絶望嘅，十幾歲仔。但都話，落後緊0-2咯。相當凶險架啦

10. 我唔明，啲人講「唔係世界末日」，「唔緊要」，係咩邏輯。係架，梗唔係世界末日，你咪畀我打兩巴咯，都唔係世界末日架。你咪試下聽日冇左隻手咯，唔係世界末日架，楊過都做大俠啦。

11. 真的，Everybody has a plan until they get punched in the mouth。圖上面嘅泰臣講嘅。你畀人上枱打幾槌重拳，然後睇下仲係咪「仲有機會反勝」。當自己睇Rocky？應該變阿波羅嘅機會大啲。

12. 即係，寫文鳩up呃like唔緊要，但如果真係畀意見嘅，啲邏輯就唔好咁亂嚟。係呀，邊個邊個名人會考仆街後來係博士嘛（但更多名人會考唔仆街之後係博士），鄧小平係煙鏟都好長命嘛（但更多人唔係煙鏟都好長命），李斯特城唔係好有錢都拎英超冠軍嘛（但更多年更多聯賽都係錢多終勝）。係呀，有人中六合彩添。使乜考 DSE？

13. 我唔明點解咁多人，可以將特例當係道理。除非你證明到畀我睇，原來真係冇乜正相關，甚至係負相關。唔好講causation，根本correlation都未有

14. 咁明嘅，講嘅，可能出於好心啫。但你知我唔玩呢套，又唔係同你有親。但好處係我畀個真相你。即係你末期肺癌咁（放心，DSE仆街未去到咁嚴重嘅，「一期啦」），你親友梗係安慰你，呀邊個邊個都末期肺癌，之後忽然消失（癌細胞，唔係個人消失），出於好意，唔通話我地已經幫你搵定位咩。當然更多係啲借機呃你錢嘅偏方氣功撚。但醫生就會話你知，不如有乜心願做埋佢啦。梗有奇蹟，但醫生話到你知，有幾多機會。

15. 至於「焉知非福」「激發鬥志」論更加係戇鳩。係，可能係真。但，請參考泰臣嘅名句。好人好姐做乜要畀人打幾槌先激發鬥志？你啲鬥志都幾唔聽使喎。

16. 其實用足球比喻幾好，係呀，的確好多隊，落後兩球，下半場都可以反勝—不過更多隊係兩球優勢玩到你完場，甚至炒多你幾球。特別係你屋企冇錢，打少個的話。

17. 市場就最好，因為最現實。我當你係利物浦對橡樹之心（＊）都好，你一開波輸兩球兼打少個，你自己睇下，走地賠率會點。你唔係話畀我知會「激發鬥志」，所以更熱下話？咁不如下次開波自己擺兩球老烏「激發鬥志」咪仲好？（呢招係乜？星矢，足球小將，定芥川龍之介地獄變？）

18. 當然你係利物浦嘅，梗係可能反勝，你係橡樹之心都可能架。梗有可能。但，marginally, incrementally, ceteris paribus-ly，半場輸兩球打少件，點會唔係問題？

19. 好啦，其實冇事的。古語都有云啦，唔好放棄治療。但你認清事實先。你末期肺癌都話自己冇事嘅，點幫你？

20. 接受咗自己輸緊0-2嘅，咪好咯。從懺悔到贖罪嘛，你知道輸緊0-2同唔知，鬥志未必好有分別，但踢法都唔同啦。望下分牌先

21. 剩返嘅，就梗係好老土，踢好佢。但真係廢話，唔通耶穌（話時話，耶穌踢波的，在香港）咁，人地入你兩粒，你自己擺多兩粒老烏咩，老虎盃呀？

22. 你見啲人舉嗰啲例外，十居其十都係之後努力咗好多，先追得返。邊有咁多唔好彩。佢地照上半場咁踢嘅，就下半場輸多幾粒啦。但點解發奮咁難？就係我上篇文講嘅嘢：你DSE考得唔好嘅，打後好多時就係同啲廢柴一齊（不一定所以考得唔好嘅都係廢柴，但廢柴多數考得唔好，明冇？），你唔廢都變廢，有鬥志都變鬥志。就日日圍爐上網打飛機講讀書邊有用，李澤楷都冇學位，Steve Jobs同Mark Zuckerberg都中學未畢業。

23. 我想講，除咗「踢好剩返嘅半場」「好好享受足球」外（嘻，本質上呢句嘢，同你同末期肺癌講「有乜想做做埋佢」差不多，頂多係時間耐啲）外，我仲想講樣嘢。

24. 就係，檢討下啦！

25. 真的，遲下我會寫篇講投資嘅。但同一道理。首先，錯過之前升浪嘅，低位打晒靶嘅，本質上一樣。第一係接受自己失敗，錯咗。然後，諗下，點解會錯！亦即係你諗下點解你考成咁。點解你半場輸兩球。記住，誠實呀。你發現埃汾強調嘅核心價值，除咗高質，就係誠實。面對他人都仲可以唔誠實，面對自己都唔誠實嘅，好難救（但話說回頭，好似對自己誠實仲難）

26. 點解衰咗？一般人最常賴嘅嘢，就係運氣啦。挑，個市同實體經濟都脫節嘅。扯，球證偏幫，人地符碌。鬼咩，佢印漏條清代中央政制畀我喎（＊＊）

27. 十居其九，自己失敗都係唔好彩，人地成功就人地好彩，人之常情。我知真係好多時有運氣成份，但，就算有，都唔好養成乜都賴運氣，聯儲局，北水，大戶之類嘅習慣，否則你永遠唔會進步。講白啲，唔好彩都唔可以話自己唔好彩！而除非你真係考嗰日畀車撞到入咗廠之類，否則，唔好彩唔係一個理由。讀書係，投資更加係，你嘅人生更更更加係。你一事無成，總有原因。

28. 比較有得搞嘅，就係你用錯策略，或者低估對手，高估自己。即係你柒。懶廢柒之中，柒係比較易搞嘅。多數係有得救嘅。咁就靠你下半場踢好佢。但唔好忘記，其實你都真係冇乜真係巴閉，因為你稍為犯錯，就已經輸咗兩球。高手嘅嘢，犯錯都仲係領先你幾球。

29. 當然，仲有一個可能，十分殘酷，但好多時係事實—咪就係，你技不如人咯。有幾難明？你係利物浦對橡樹之心，你半場輸兩球，可能球證黑哨，唔好彩，輕敵。但你係橡樹之心嘅，唏，簡單啦，你半場輸兩球，咪就係因為你屎波咯！有幾難明？再殘忍啲都有呀：以你咁質地，先輸兩球咪好彩咯！

30. 咁，屎波可以點？我都唔知。除咗好廢嘅「努力啲」，或者「踢茅啲」（＊＊＊），都冇乜可以點。你應該要明白呢，冠軍就得一個。你努力，唔通人地唔努力？梗有人輸的。個個都5**，咪即係個個都唔係5**咯。考試又係一個咩遊戲呢，又？

31. 固然，轉個跑道，亦係得嘅。即係我踢波贏唔到你，打籃球咪贏你咯。「但我肯定C朗打羽毛球都贏你」。真的，有機會再講，但勁人呢，係真係可以做好多瓣都勁嘅。廢人亦係。呢個夠晒殘忍。但事實好似真係咁。「咁我打倉頡應該快過C朗嘅」

32. 所以講到尾，大家都知，總係唔會個個都成功。盡咗力，都真係冇計—雖然講呢句嘅十居其九都未盡力。而又其實，咪接受自己嘅位置咯。的確絶大多數人，都係唔會拎到金球獎的。但唔通全部死晒佢咩。生命仲有好多美好嘅東西嘅，例如一年去幾次日本啦，食返幾次米芝蓮兩星啦，睇下埃汾啲文咁咯。

33. 預告：我嚟緊想寫一篇，「如何決定聽乜人嘅意見」。夠晒high level，但真係一百億嘅問題。網友話打疫苗會自閉，醫生話唔係，咁我應該信邊個？但專家係咪一定啱？埃汾話買股票，但有人話核爆，咁信邊個好？呢個係一個意見多過屁眼嘅年代，人人都有個，人人都覺得其他人臭。咁你信邊個好？

34. 另一預告：其實文中都提過，嚟緊寫篇文，講檢閱你嘅投資成績。贏輸當然重要，但更重要係點解。

35. 補多句：其實而家應該冇人寫日記。但投資又好，做人又好，其實寫低自己諗過嘅嘢，都係十分好的。投資就係trade log，做人咪……林過雲日記。真的，例如你今日決定揀去讀精算，然後十年後一事無成（好似我咁），咁你至少睇返，自己當時點諗。係有嘢漏諗？定根本係自食其果？好重要。

36. 呀，筆鋒一轉，賣個廣告。絶對冇任何利益，亦唔係佢叫我出，雖然我估佢會請我食飯。但介紹返， 培正專業書院 Pui Ching Academy （雖然我唔知有幾專業），我朋友 Simon Sai-hau Ho檔嘢（雖然我唔算同佢好熟，我都唔記得對上一次叫佢我我屋企飲咖啡係幾時）。愁出路嘅，可以諗下。講明，我一無所知。但我信佢。就係咁簡單。其他問題，就梗係你問佢。我不背書佢檔嘢，佢亦不背書我篇文。唔好問我「檔嘢好唔好」，咁大個人，為自己嘅決定盡返責任。我唯一可以答你嘅就係，我信佢。拿，呢三隻字幾咁有重量，重過佢同我加埋（目測佢應該重過我）

（＊）有幾多人唔Google都知係一隊波？

（＊＊）呢句係向律勤（假名）致敬的。踢波落後嘅嘢，佢好有經驗。聽聞考中史嗰日佢發現派漏條清代中央政制畀佢，佢想舉手問，但結果冇。考完就去咗踢波。所以佢篇文叫《踢球者》。佢家下都冇穿冇爛，不過家庭觀眾唔好學。鄧小平咯。

（＊＊＊）但的確係有用的。廣義嚟講，DSE你就焗考，但如果明知玩呢樣唔夠人玩嘅，第時就同人比較其他嘢啦。我最唔明就係有啲人，擺明唔係讀書材料，但又堅持幾廿歲人都玩呢啲遊戲，嘥錢嘥時間。但人就係咁，冇嗰樣整嗰樣，靚女想你讚佢好獨立唔係靠樣，大波想你讚佢好演技，賣才華想你讚佢靚仔（好似我咁），有錢仔就要搞埋啲start up 證明自己。巧拿煩的。

-------------------------------------------------------------------------
香港聯匯何去何從？新收費片已出，講足一個鐘，單次買200
想睇簡介嘅，呢度。亦有埋以前嘅片，有興趣可訂：https://bit.ly/3iYMD0F
報名嘅，呢度。今次課程編號填 CC005。唔想填信用卡亦可以FPS： https://bit.ly/3j0r9QZ　
Log in 呢度：https://bit.ly/3gYXu9e
已付費嘅，log in後按最頂「按此觀看」就得。再唔係返呢度睇：https://bit.ly/3fyKbw0
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:「聯繫匯率會否脫勾？散戶應如何應對？」
影片/課程編號：CC005
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC005]
2/利用信用卡網上付款
3/及後有登入資料可以立即收看
查詢：whatsapp 63832145