【龔成問答信箱】（Q22641-Q22660）

Q22641：

老師，一隻股票股價跌5成，係咪買入時機？通常最危險嘅時候入貨是最好？

龔成老師：

簡單來說，投資者要睇三大要點。關鍵位不是睇股價。

第一：「企業質素」，無質素的企業跌9成都不會買。

你要分析股價下跌的原因，是市場情緒？中短期問題？企業核心有問題？

要從長遠的角度分析，例如3年後，企業是否正常翻，如果這刻只是中短期問題令股價大跌，就是機會。

但如果企業核心有問題，就絕對不要投資。如果質素減少，就不要因為股價跌而買入，要小心分析。

第二，考慮平貴度，如果一間企業之前好貴，下跌5成後仍是略貴，就仍未值得投資。

第三，你個人情況，自己是否持有好多這類股，現金的情況如何。

------------------------------------------------

Q22642：

sir你好，首先多謝你 之前上咗你嘅股票班 買咗比亞迪賺咗一筆錢

眼見樓市升得好犀利 我哋有賣樓嘅念頭，現在我們租一個三房單位住另外有一個兩房物業出租(還要補貼兩千蚊才夠扣按揭支出)

因為有小朋友所以正考慮兩三年後移民英國，如果而家賣樓應該會淨賺三至四百萬。但賣咗物業後怕現金貶值，想請問一下賺到嘅錢應該投資什麼.

資產如下:

香港物業市值八百萬 有$18000租金收入
英國物業市值一百萬(港幣) 有$4000租金收入
股票市值一百萬 / 現金五十萬

感謝您

龔成老師︰

唔好客氣，大家都能從投資中獲益就好。

由於本身會2,3年後移民，若你要將香港的資產清倉，其實慢慢找機會變賣物業，都係可以。

因為不論港股定港樓，我地都唔會知佢中短期點走，所以若價格合理，其實沽左佢都可以。

套現得來資金，你可以投資一些「平穩增值股」+「收息股」。

以下股票，現價都合理，可以分注。但大市暫時只算合理水平，故資金不宜盡用，你可以先用3至4成，去分注入貨。餘下的資金，等大市有明顯回調，才慢慢加注。

若你想進取些，可集中「平穩增值股」，相反你想保守少少，可以集中在「收息股」上。

但由於2-3年唔係好長，我建議保守少少較好。若你相再穏陣D，你可以將部份資金放在定期存款上，去平衡風險。

到你要離開前半年，就慢慢沽出手上股票套現，但唔好一次過沽，以免回報被價格波動所影響。

例如收息股部分，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

------------------------------------------------

Q22643：

1.老師其實好多謝你 ，睇完你d書系定立左目標同埋睇股票睇股價真系無咩用，雖然睇估值未算叻，但都會用多左歷史市盈率 同行業前景 企業質素出發，減低左高位入貨機會。

2.老師而家我28歲了， 100萬都突破左，3年收埋股息都賺左11萬，不過系呢排股票跌賬面輸6萬，但系我覺得都無咩大問題

而家持股如下：

2388 平均價29.71 （29.3%）
823 平均價 69.55 （13.6%）
1109 平均價32.89 （12.7%）
1448 平均價7.3 （10.8%）
1093 平均價8.79 （10.4%）
914 平均價43.4。 （7.6%）
384 平均價25.55。 （7.3%）
700 平均價448.8。 （5.6%）
3918平均價8.71。 （2.8%）

老師你認為組合有咩可以改善？

3..3918呢排都受疫情問題影響，但總括都系環境問題，唔系企業質素出事，我見 柬浦寨疫情而家都回落緊，而且當地接種疫苗率好高，好似系出現左入市機會。
thx老師

4.組合中打算加入以下股票

1.信義光能
2.愛康醫療
3.小米
4.中軟國際

但計算估值上全部都未達到合理水平，因此未買入

龔成老師︰

1) 非常好，但緊記估值要做得好，係要時間磨鍊。所以，你一定多做企業分析，你就會發現估值愈來愈準繩。

2) 選股係有質素，但有2點要注意翻。首先，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

你現時中銀(2388)好明顯係超標，你最好沽少少，換碼至其他優質股，咁會較好。

第二，這個組合有少少保守。以你年紀計，潛力股比重(現時只有1448, 0700和3918係潛力類)，其實最多可以去到4-5成。

但如果你現時無太多投資經驗，就先維持2-3成。到你學到一定投資知識﹐潛力股比重可以相應調高至4-5成，視乎你投資經驗多寡和了解這些股票程度而定。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。

但潛力股，部份係略貴。現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)、QQQ勉強算在合理區中上至頂部，可分注入貨，其餘都略貴，想買就要等一等。

3) 金界控股（3918）有質素的，但始終新興市場，因此點都有風險。

佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

現價算係合理區中下部，有投資價值。但我地無人知，疫情幾時先真正受控，令經濟和旅遊活動回復正常。因此，你預佢中短期一定會十分波動。

另外由於市場新興，在注碼上也不能投資過多，你預佔組合5%左右好了。

4) 信義光能(0968)和小米(1810)你預回多1,2成，才開始慢慢入貨，值博率會較好。

中國軟件國際（0354）企業本質不差，但行業有少少波動，略有風險，但前景正面。現時已經略貴，同樣建議等回到1,2成，才再考慮。

佢太多收入來自華為，這是核心風險，因為這是客戶集中的問題。華為久不久因中美因素，從而影響到這股，大部分都是中短期，當然有一些會發展至長期性。

長遠仍算正面，但無可避免存有風險，你如投資，就要分注，控制注碼，同時明白這股股價較為波動，前景可以的。

愛康醫療（1789），以長遠業務分析，正面的。

佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。

不過，投資時要考慮價格風險。現價合理區頂。小注都可。

------------------------------------------------

Q22644：

龔成老師想問一下：

1.如果想就證券提供意見，成為持牌人會比較好嗎？

2.考資格考試卷1,2,7,8 就可以？還有其他需要考嗎？

龔成老師︰

1) 若你係要從事《證券及期貨條例》下的受規管活動，包括證券及期貨合約交易，以及就有關投資產品提供意見，就必需要向證券及期貨事務監察委員會（證監會）領牌。

2) 其實要睇你從事什麼業務和工作，去考取相應的試卷，你可以去證監個網睇翻。

如果你只係做證券提供意見，基本上1,2,7,8係足夠。但其他期貨之類，就另外。

------------------------------------------------

Q22645：

老師聽了太多，可以比4-5隻你覺得現價又平，又係優質股我參考

龔成老師︰

之前我講過的，平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、粵海(0270)。如果有投資美股，可投資VOO。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。

這些股票，全部都係有質素和增長力。若你係年青至中年人士，這些股係合適的。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)、QQQ勉強算在合理區中上至頂部，可分注入貨，其餘都略貴，想買就要等一等。

但緊記，這些股票現時大多只在"合理"水平，唔係平。所以，資金唔好盡用，你要留有部份等大跌市機會。

其實有質素的股票，特別係高質的潛力股，好少會回到平宜區。所以，你要用分注策略，係合理區開始慢慢入，以免令自己最終一些貨都無。

------------------------------------------------

Q22646：

你好，請問藥明生物值得持有嗎?

什麼價位 是合理買入價位？ 波動頗大！

龔成老師︰

藥明生物（2269），主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

潛力是有的，因為過往的財務數據的確理想，但現時的估值唔平，這刻投資值博率一般。

不過，這類股好難話現價一定貴，因為佢有好高的增長，只可以話現價唔平，但如果之後有高增長，那就未算太貴。

只可以話，如果你真的想投資，小注好了，你要明白業務有不確定性，同時股價會好波動。

------------------------------------------------

Q22647：

阿sir, 您在書中比5分優質度的領展(00823.hk)什麼價位是便宜水平?

龔成老師︰

領展(0823)是優質股，有一定規模，坐擁不少優質商場，而餘下仍有一些有條件提升的商場，故仍有一些潛力。加上此股派息穩定，因此無論是收息又或是增值方面，領展都擁有條件，長線甚至永遠持有都可。

再加上早前斥資收購悉尼甲級商廈，和洽購倫敦商業區甲級寫字樓。可見集團開始在海外尋找有潛力物業，預期由本地化進一步國際化，這都是潛力所在。

同時由於此股優質，市場估值往往不平。但此股最少要求要有4%以上息率，才有投資價值，股息率達5%會更理想。

因此，以現價計算合理區中間至中上，已可以先小注儲貨。

------------------------------------------------

Q22648：

龔成老師,我嘅另一半係一個及時行樂型嘅人,唔識儲錢投資。我勸咗佢好耐,佢終於肯賣車買樓,但佢而家又不停怨我當我衰人……

我覺得咁做係為佢好,因為佢本來係租樓,但租金唔太可能跌,而樓買咗就每月供款唔會相差太大,唔怕老來俾人加租逼遷無地方住。

但佢就不停話老咗先算,又話而家供款貴過租金,個單位又細咗一半,無晒生活質素……佢都有睇你嘅問答,話你解釋得清晰過我好多。

你可唔可以幫我話佢知,其實咁係對佢比較好嘅選擇？謝謝你~

龔成老師︰

其實我地每個人，都一定有自住需要，因此物業會係我地財富其中一環。

香港樓市由於供求失衡，中短期雖然會有波動，但長線我預都係維持上升，故租金都較難有明顯下跌。

如果維持租屋狀態，其實等同沽空樓市，當樓市一直升，而你收入升幅又無樓市升得咁快，你只會愈來愈難置業。令自己要長期承受租金波動，所帶來之風險。

當然，你做高成數按揭的話，有機會係個供款高於租金。但你要記住，按揭供款除了還息外，都包含左歸還本金部份。而還本金，其實就係幫你儲緊資產。

因此，唔好單單覺得供款大過租金，就係唔抵，因為有一部份係去左累積資產。

物業到你老來，除了可以給你們一個無憂的安樂蝸外。如果你們無傳承物業給家人的需要，也可以用來做逆按揭，釋放價值，為退休生活增加額外本錢，所以物業係有佢投資價值存在。

作為一間自住屋，你最重要係留意2點。第一，是否適合你們長線生活需要，講緊係未來10-20年。第二，就係有信心，長線都可以"供得起"，咁就無問題。

------------------------------------------------

Q22649：

龔sir早晨.請問3119/0038入邊隻好.謝謝

已經入左小米2000股.可再入嗎？

2845琴日入左一手

另1177/1448/3067睇緊

龔成老師︰

第一拖拉機股份（0038）佢係中國內地在香港上市的唯一農機製造與銷售企業，其前身為第一拖拉機製造廠，創建於1955年，是中國農機行業唯一的特大型企業。

但質素只是中等，現價算合理，可分注。

ＧＸ亞洲半導體(3119)目標旨在提供在扣除費用及開支前，與FactSet亞洲半導體指數表現緊密相關的投資回報。

其3大持股，為台積電(TSM)、SONG和三星，佔基本比重近3成。

此股有投資價值，但行業令其有一定波動性和風險。現價算合理區頂部，可以小注，利用月供模式儲貨，會更好。

2者相比下，ＧＸ亞洲半導體(3119)投資價值會較高，但要留意佢有一定風險，股價會較為波動。若你係年青至中年人士，才適合投資此股。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴，故暫時不要再加注，等到有明顯回調才再慢慢加注。

此股潛力度是有的，但會比較波動，你只要長線投資，就無問題。

至於中生(1177)、福夀園(1448)和安碩恒生科技(3067)都有投資價值，現價算合理區較近頂部位置，無貨可先小注。

另外，你上述問我的，都係潛力股。佢地雖然有增長潛力，同時風險都較高，因此不宜持有過多。

假設你係年青人，潛力股可佔約5成，餘下應用以下平穏增長股。若你投資經驗較淺，或者年紀較近中年，潛力股比重，要再調至3成以下。若你係近退休之年，潛力股就太高風險，不宜你用作投資。

未來時間，你可以加入以下平穏增長股部份，令組合更平衡。

平穏增長股：指數基金、盈富（2800）、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)。如果有投資美股，可投資VOO。

------------------------------------------------

Q22650：

龔成先生，你好，我好想向你請教一下, 我係一個單身, 45 歲人士 ... 已錯過左置業機會 ... 依家都唔知點佈署自己財富好.

我月薪有 6 萬左右, 父母 1 萬, 可以儲 2 萬, 有 1 萬用於政府年金保險交稅等等. 現金有 70 萬左右, 債卷股票有 20 萬左右, 我依家係同兩老居住, 但兩老百年歸老後, 樓亦要買而分給兄弟.

如果我想買樓既話, 我應該點佈署好 ? 定係我應該放棄買樓 ?

龔成老師：

其實你45歲，依然有時間可以做增值，去實行置業計劃。只要你用正確方法投資，相信係可以。

以你情兄，投資選股上應以增值為主。我建議你用「平穏增長股」 + 「潛力股」作組合，並以「平穏增長股」作主力，去創造一個增值平台。

現在你每月先用5成儲蓄，即$10000做月供。其餘先儲起，用一邊月供一邊儲蓄的策略。

大市現處於合理水平，那70萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

另外，債券主要係現金流產品，無增長力，比較適合退休人士。若你持貨不大，都可以。如果較多，最好將部份換至優質股，財富增值能力會較好。

我假設投資回報有10%（連股息再投資），你每月投資$20000 + 70萬資金，5年後大約會增值至250萬。

相信這筆資金，對你置業上會有一定幫助。

若情況許可，係你置業同時，最好可以留少少優質股，去保持增值。因為你全數用晒去置業，你成個財富組合會偏重晒係物業類，造成過度集中性風險。

------------------------------------------------

Q22651：

老師你好啊，我之前完全唔識股票理財，幾年前擺曬d錢去買中移動（70蚊x1000)同創維(3蚊x20000）

宜家我基本上我咩儲蓄，月入23k，應該可以開始月儲1k，唔知點解可以增值財富呢？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

假設你係年青至中年人士，應以增值為主，建議你用「平穏增長股」 + 「潛力股」作組合，去創造一個增值平台。

中移動(0941)只係收息股，增長力不高。而創維數碼（0751）增長力不強，質素只係不過不失，不宜持有太多。建議你沽出部份，換碼至以下優質股。

現在你每月用$1000做月供，去估月供股票。

月供方面，你可以選擇投資在平穏增長股︰指數基金如盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

或潛力股︰安碩恒生科技(3067)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

但由於你每月資金不多，建議全數月供盈富(2800)。

以你現時收入，你儲錢比例好少。若你較年青，每月儲蓄最好可以去到收入一半。

之後，每月用一半儲蓄做月供，另一半就儲起，等大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22652：

龔老師，請問GX中國生科(2820)與華夏恆生生科(3069)邊隻較為好，現價合理嗎？謝謝！

龔成老師：

ＧＸ中國生科(2820)基金是被動ETF並旨在提供在扣除費用及開支前，與Solactive中國生物科技指數NTR(指數)表現緊密相關的投資回報。

華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

其實兩隻都可以的，3069都可以。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

------------------------------------------------

Q22653：

你好sir 6060 37.8有6手 請問咩位可加貨？

龔成老師：

眾安（6060），業務都有發展力的，但業務仍有不確定性。佢最近開始由虧轉盈，反映之前的投資開始有收成，暫時睇是正面的，但之後的發展仍有未知，這一定會令股價波動。

佢做這類互聯網保險公司，的確有潛力，同時背後有支持，所以有發展，這部分產生了「概念價值」。

現時市值有部分是概念價值，而這個價值值多少錢，其實無人知，市場對這價值的看法不一，同時經常改變，所以令股價大上大落。

初步睇，企業有發展力的，不過風險同時存在，因此唔建議太大注投資，這股都可考慮長線持有的。現價合理區頂。是否加注，要睇你本身持貨佔組合%，如多，就不要加。如不多，就跌多1成加少少。

------------------------------------------------

Q22654：

老師，請問富-Futu 120買入了現在掉到100值得繼續持有嗎？

新手一開始學就差不多交了10萬學費😴

龔成老師：

富途（FUTU）業務變化較大，是有風險，有潛力的股票。這類股，不是不可持有，但不宜持有太過多。

佢係一家在線經紀公司，提供一站式在線投資服務，騰訊（0700）為股東。該公司通過網上平台提供服務，其中包括香港、中國大陸，以及美國股市的市場數據、交易服務和新聞源。

佢以經紀佣金，以及手續費服務的形式產生收入。

這企業雖然有發展，但現時市盈率好高，股價變化大，要留意風險。

這股小注持有可以，長線有增長力。

如果你現時持貨比例大多，宜減。減持的原因不是股價下跌，而是你持貨比例。

------------------------------------------------

Q22655：

龔Sir, 請問如果買樓，你會看好奧海城，還是將軍澳天晉呢？想看看老師你的睇法，謝謝！

龔成老師：

奧海城的質素會較高，因為較近商業區，交通配套等質素較好。

同時若政府日後發展大嶼山，將會有第三個核心商業區，奧海城相對會較受惠。當然，將軍澳近年配套開始成熟，加上有新道路出九龍東，都會加分，但本質始終不及奧海城，但如果你資金有限，將軍澳不是不能考慮的。

------------------------------------------------

Q22656：

我富途股票應該加注嗎？520呷哺我$9.10買咗有半年了，一路跌，請問佢仲係資優股嗎？

阿里健康及京東物流也輸好多，有得守嗎？謝謝老師先。

我持有3690、6626、0520、2618、2359、2126、0241、0027、0003、1024、1177、9988。

買咗你好多本書都有睇，吾知點解一買就跌，重新組合又係蝕好多，希望老師可以幫下我，遲啲一定會搵時間嚟上你既堂，謝謝龔Sir

中銀戶口，快手、阿里巴巴也是蝕好多，我應該點做，前幾日又重組咗啲股票，而家中銀戶口得呢4隻，請老師指教下是否加注，感謝

龔成老師︰

你要記住，投資係一個好長線架過程。因為就算再有質素股票，中短期都受好多不同因素影響，令個股價出現波動。

另外，如果你在貴的價位買入，就算優質股都未必有好回報，你要加強學習平貴技技及企業估值。

但長線計，只要佢地係有質素，股價一定會將其實際價值反映出來。

近期大市受中央政策影響，出現較大波動，好多股票都有不同程度的下跌。但你要做的，就是冷靜分析到底佢地長線質素，有無出現改變。如果無，咁你照長線持有就可以。

你現持有股票，都係有質素，暫時未見核心質素出現問題，你照持有就可以。

但美團(3690)、阿里健康(0241)、快手(1024)、藥明生物(2269)、藥明巨諾(2126)、京東物流(2618)不確定性較高，不宜太注。

另外，你而家太偏重左係潛力股，佢地雖然有增長潛力，同時風險都較高，不宜持有過多。

假設你係年青人，潛力股可佔約5成，餘下應用以下平穏增長股。若你投資經驗較淺或者較近中年，潛力股比重，要再調至3成以下。

未來時間，你就要加大翻平穏增長股部份，令組合更平衡。

------------------------------------------------

Q22657：

師傅，以你咁多年投資經驗，發現一隻優質股不難，難在是超值價位買入？

所以，不會all in，就算建議月供或分段吸納，就算1830，去年一月時都係分段吸納而不是all in?

感覺上，現在的股市很難投資，主因內地政策，所以感覺上今年冇乜投資機會

龔成老師︰

其實依然有不少優質股，現價都有投資價值。

但好多優質股，特別係潛力股類的優質股，真係好少會回到平宜區。所以，我地投資這類股票，必需要月供或分注進行。由合理區開始入貨，每回調就再加注。

雖然平均價會比直接平宜區買貴左，但就可以避開左開唔到貨風險，所以係值得咁做。

近期中央有不少政策出台，影響不少行業，令成個市況都變得波動。但我地要做，就係去分析翻，到底這些政策有否令企業質素，出現長線改變。

如果無，這些股價下跌情況，反而係造就左我地入平貨機會。

當然，政策不確定性高左，我地投資相關受影響股份時，暫時不宜太進取，要控制注碼。

------------------------------------------------

Q22658：

龔sir，你好，朋友介紹我睇你的文章，睇左一個月左右，獲益良多，謝謝你。睇左你的文章之後，心理質素強左，早幾日跌市都冇恐慌，而且仲入左啲貨，都是多得你文章的點化

本人46歲，因疫情由2020年開始，被迫停工，已經接近2年冇收入，靠積蓄過生活。

持有資產如下：

「1」自住物業$1,200萬左右，已供完，我佔一半業權

「2」現金 120萬

「3」股票戶口（A) 約$25萬貨

（27）銀河娛樂1 手 @$52
（270）粵海1 手 @$10.84
（386）中石化2 手 @$3.55
（548）深高速1 手 @$7.48
（700）騰訊1 手 @$504.5
（1177）中國生物製藥1 手 @$6.72
（1398）工商銀行1 手 @$4.39
（2628）中國人壽1 手 @$13.16
（2638）港燈1 手 @$7.85
（2800）盈富基金2 手 @$26.62
（3067）安碩恆生科技2 手 @$14.35
（6823）香港電訊1 手 @$10.68
（9988）阿里巴巴1 手 @$185

「4」股票戶口（B) 約 $33萬貨

（5） 匯豐 2手 現價$42.6
（883） 中國海洋石油 3手 現價$7.75
（939） 建設銀行 19手 現價$5.43
（1398） 工商銀行 11手 現價$4.37
（1929） 周大福 10手 現價$16.42
（2038） 富智康集團 10手 現價$1.1
（2628） 中國人壽 1手 現價$12.96
（2800） 盈富基金 4手 現價$26.66
==========================
（330） 思捷環球 0.6手 現價$0.66
（985） 中譽集團 5手 現價$1.73
（2858） 易鑫集團 1手 現價$2.05

問題（一）

本人現在失業，沒有收入，辛苦了咁多年，身體狀況大不如前，打算順便退休。

$120萬現金 應如何配置？心目中想買收息股，製造現金流，但又想股市再跌多啲才掃貨，心大心細，經常見龔Sir你寫，現時股價是合理區，留cash 等股價到平價區再大手入貨

咁我現時入貨，請問是否等於買貴了？

有少少兩難：

1）現金放係度 = 冇利息= 不斷貶值

2）現在買收息股 = 可以製造現金流 = 但遲啲股價跌，差價 Vs 股息 可能得不償失

問題（二）

股票戶口（B) 約 $33萬貨，當中$1萬左右（最尾3隻：（330）（985）（2858）我好想放左佢，請問放左佢合適嗎？我應該現在放？還是等下先放？

這個戶口是2007年開的，因我當時工作忙，自己又懶得打理，所以交由一朋友幫我管理，最近才由我自己負責返，好想執靚佢

唔好意思，問題比較多，如蒙解答，感激不盡

龔成老師︰

我文章幫到你就好，只要你明白自已投資股票，其實係投資緊企業，只要佢質素不變，我地係唔會因為個價波動，而去賣出。

1) 股票永遠係低位買，長線回報一定較好。但幾時係會低位，甚至會唔會去到你心目中低位，無人知。

所以，我地投資係唔會"估"走勢，而係用平貴，去定買入策略。係合理區開始慢慢入貨，再回調就再加注。到平宜區，才大力掃貨。

這樣做，雖然平均買入價會高左，但同時都避免左你完全入唔到貨架風險。

所以，係現時大市只在合理水平的情況，現金只宜佔比約3-5成，用來等大跌市出現，才加大力度掃貨。

雖然用現金持有，係無息收。但同時間，佢流動性較強，有利於我地把握市場機會。

2) 你現時持股好多，好雜亂，長線集中係10隻以內，會較理想。若你預算短期會退休，我地就以此作為目標，去調整你現時組合。

由於退休後會無收入，我地財富組合上，應以收息資產為主。去為自己創造穏定現金流，支援退休生活開支。

你現時持股中，粵海(0270)、中石化(0386)、深高速(0548)、工商銀行(1398)、港燈(2638)、盈富(2800)、香港電訊(6823)、匯豐(0005)，建行(0939)都適合你長線持有。

而中譽集團(0985)和思捷環球(0330)無投資價值，建議沽出。

其餘股票，都係有質素，但對退休的你而言，唔係太適合。你可以將佢地，慢慢換碼至其他收息股。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

同時間，你要留意組合平衡性。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(但盈富係一個組合，不受此限。)

你現時銀行股明顯超標(0005, 0939, 1398)，但你唔洗沽出佢地，可以利用新資金，將個比例慢慢平衡翻，咁就可以。

最後，你係投資前，最好額外為自己預留大約半年開支，作應急之用，咁會較為穏當。

------------------------------------------------

Q22659：

工程好 定係 揸的士好？電機工程

你有什麼見解

龔成老師︰

你可以多從「長期」視點去分析，就工作來說，無論做那份工作，我地的主要目的都是薪金，以及興趣。

你可以想想，10年後你希望自己的薪金如何，職位是甚麼，當你有左這個大方向，就知道這一刻的情況。

------------------------------------------------

Q22660：

老師,請教345前景如何？又發了盈警，你對此公司有何睇法？

龔成老師︰

其實都係主要受之前的事件，你預維他奶短期股價一定不利，但長遠，我相信影響又未算核心性，但回勇的路仍長，現時仍要睇事件發展程度，中期的影響，當中仍有未知數，只可以話短期股價上落都大。

長遠來說，佢仍有質素，有品牌、有銷售網絡。

不過現價仍未唔平，大約為合理區中上，若考慮風險因素，小注或月供可以，但回多1成投資會更有投資值博率。

這股可長線的，如果本身有貨，只要貨不多，可守，但有心理準備中短期弱，要耐心持有。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22381-Q22400）

Q22381：

你好啊龔成老師，我現時係一個中五學生，我好希望可以得到你嘅幫助

我今年啱啱18歲，因為家庭環境問題，一直好想快啲賺多啲錢，因為咁我好快就踏上咗買賣股票，大半個月前我因為貪心，無經驗，

心急咁買咗美團嘅認購證，我好蠢咁擺咗成世人儲曬嘅錢落一隻股到（～35000），果陣頭兩日賺4000好開心，但第二日開始每日跌，跌二千，二千，三千幾，一萬幾，

跌到宜家我差唔多輸咗8成（～30000）我唔知點，

我心態好崩潰，好後悔自己貪心，明明畫圖分析咗佢跌，自己又唔肯走，仲覺得佢會升返，我宜家唔知點好，你可唔可以指導下我

龔成老師︰

首先，同學仔你對投資理念，存在一個好大誤解。你現時成個投資模式，都係同一般散戶一樣，犯上同樣，而且致命的錯誤。

其實我20年前，都做過同你一樣的事，短炒、炒孖展、炒衍生工具，輸左幾年我先識醒，後來發現全最賺錢的投資者、基金經理，只用一個方法「長線投資優質股，買股票就是買企業」，我就改變策略，長線投資，之後就賺多過輸。

你要好清晰一個投資"重點"，我地買入一隻股票，就等同買入一間企業，一定要知道佢質素、行業前景、財務狀況等，才去考慮否投資。

當我地確認係值優質股後，我地會用平貴定入貨策略，並長線持有。而唔係做短炒股票或者輪證，去賺差價。因為短線股價會受市場氣氛、資金流向等，與企業質素不相關的事情影響。這些因素，我地係不能估計。

但長線，企業價值會係股價上展現出來。因此，優質股你買入後，長線持有，讓其自然增值，永遠都係最有效的財富增值方法。

我明白你家庭問題，需要盡快賺多D錢。但你要明白投資增值，係一件長線的事，你唔好預佢對你短期財務，有任何幫助。

全世界投資最叻，最賺錢的巴菲特，佢會唔會做短炒。佢只會叫大家，長線持有有質素股票，等佢地自然升值，達至財富增值效果。佢自己身體力行左幾10年，去證明這件事係行得通的。

所以，我建議你放棄短炒。現有的輪，就全數沽出，當買左個經驗。同時要認真去學好投資，之後才再出手。你可以睇我架《80後百萬富翁》、《財務自由行》和《股票勝經》，都適合你。

------------------------------------------------

Q22382：

老師 ，我現時的資產分佈如下

股票 36%
現金 23%
等跌市 41%

請問現時配置ok嗎？（因為我冇物業，所以比較簡單）

我現時總資產約85萬，首期都比唔起，所以冇諗過上車，只希望靠股票儲到多啲錢可以三年後移民

雖然有啲渺茫，因為我計過自己三人家庭，6年洗費都要2.5M。但移民係我短期目標，香港生活真係太壓迫了。

而且我曾經在英交流半年，我有信心可以適應嗰邊既生活。我每一日都會想像我喺英國冇咗姐姐、自己又冇工作能力又要湊住個（三年後六歲）囡搞唔搞得惦

答案係：未得

所以我比三年自己康復、去說服身邊既人我可以

請問老師你對移民英國有什麼看法呢？應該要有幾多錢先夠？

龔成老師︰

現時大市在合理區，股票佔比重，去到5-6成都係可以。你可以用分注形式，再慢慢加大翻股票佔比。

但若果你係好大機會在三年後移民，時間不算好長，我會建議投資選項上，要保守少少，以平穏增長股為主。

以下平穏增長股，都係有質素，現價都在合理水平，可慢慢分注。但緊記我地組合要平衡，個別企業和行業，不要佔組合15%和30%以上，以免出現過度集中性風險。

至於移民部份，每個人都有不同考量，有的為工作、有的為教育、有的為改生活模式。最重點，係你明白你目標係想點，而這個新地方，係未來長線係唔係可以做到，你心中所想，咁就可以。

但由於移民去新地方，好多野都要重新配置，所以資金係好重要。到時你要優先留有一定現金，去先處理好生活事宜，到一切都安定好，才好再諗投資。

在你打算移民前半年倒，你就要開始慢慢沽出股票套現，唔好等到要用才一次過沽，以免回報受價格波動影響。

至於要用多少錢，你要睇翻自已計劃，衣食住行各方面開支。因為每個人都有不同，單係住在不同英國城市，個租金和樓價，都可以有好大分別，故好難話要幾多才足夠。

所以，你要先計劃好，自己移民的落腳地。再去了解翻這個城市生活和住屋水平。由於這是個新地方，會有不少額外開支，故你要預鬆D。生活費用上，最少有半年儲備，才算理想。

------------------------------------------------

Q22383：

多謝你不斷提供正面資訊俾我哋，成日都覺得投資要盡早開始，自己本金唔大，成日睇住股價上上落落，短炒咗一段時間，真係輸多過贏 好後悔好後悔。

而家睇緊老師你出嘅書，龔老師啱啱聽你咁講，先增值後享受，有正如所講長線投資一定會有回報，我想問你個意見，我同先生月入大約四至五萬 ，正因為而家有兩個小朋友讀緊小學 開支好大 儲錢亦唔多

如果我手頭上有一間價值六百萬嘅樓居屋 係自住嘅 大概仲有一百六十萬未供完。因為短時間都升值咗好多 都算係人生第一桶金

你覺得能唔能夠賣出然後用二百萬至三百萬長線去投資 然後自己租樓住五至八年。咁到五年或者八年後 咁樣財富增值 係唔係一個好嘅選擇？

但如果最後升值唔多，有機會而家住緊嘅屋都會再升，但如果我唔用呢個機會 根本就冇辦法 拎到現金去投資

以上是我之前同你提及的方案

如果我真係賣出層樓，利用一百萬收息，例如電燈。一年都大概有70,000至80,000利息，咁樣可以蓋過租樓開支，然後剩返二百拎嚟投資，選擇一些有潛力的， 你覺得咁樣大概等幾年後收成，

我希望能夠右手上嘅300零萬，可以變到500幾萬 ，幾年之後再買返樓，目標希望可以買到600-700萬600呎新界私樓， 而且可以製造多啲現金流！

如果萬一有風險嘅話，咁就可能選擇買返一啲納米樓。

因為如果唔用呢個方法，我同先生每月嘅收入 就好似變成入不敷支，根本唔可以令資產再提高。

龔成老師︰

我自己唔係太建議你，沽出自住樓去投資。因為你會變成處於"沽空樓市"狀態。表面上，你計劃係可行。

但實際上，當個貸款息率上、租金持續向上、或者樓市升幅跑嬴股市，都會令你計劃失算。

我建議你自住樓部份不變，如果開支真係無任地方可以減少。你地睇下有無可能做些網上小生意﹐或做些兼職，去增加收入。最終可以做到，每月有一定資金，去做投資增值。

如果都係唔可行，你最後方法，就係去加按。現時仍處低息期，加按是沒有問題的。

但你要睇翻自己年齡，可承受的風險程度。40歲總負債大約可佔總資產7成，如果50歲就5成好了。

現時按息不高，將資金買入其他資產，創造更高的回報。但要新資產產生的利息回報，一定要比加按的利率高，這樣才值得做。

最好有比較明顯的息差回報，這樣才能抵銷加按後，加大負債為你所帶來的風險。因此，你加按前，最好先計劃如何分配新資金，如何平衡風險。

投資於股市時，相信中低風險會較合適，公用股、內銀股、收息股、房託等，都可考慮，策略為長期的增值及收息，期望股息回報大於加按利息，這樣就值得做。但絕不建議炒賣等方式投入股市。

同時，你要明白加按表面上無本生利，但實質有風險的，你負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。如果日後加息，又或你收息股的派息減少，都會令你得到的息差回報收窄，你的回報會減少。

若你覺得以上風險，都係你可以接受範圍，你才好加按。

另外，我地投資物業時，緊記唔好投資納米樓。因為佢呎寸太細，連一個基本家庭需要(約300呎)都做唔到，投資價值會係比其他較大樓盤，弱好多。

------------------------------------------------

Q22384：

龔老師，我有事想請教。我之前聽你教導每月月供股票，現約有約：

1）40萬股票
2）另有20萬基金
3）及約10萬現金

我想用林鄭plan買一層約500萬，209呎開放式住宅（20年樓）住宅作投資用途，但要將手上全部股票基金放曬。這樣會否太高風險？

請指點迷津，感激。

龔成老師︰

我地財富組合除左要有增長力和質素外，平衡性都好重要。若你盡沽優質股，去買物業，會令你組合偏晒去物業類，因而產生風險。

最理想係，買物業之餘，可以保留一定優質股作增值，才算平衡。除非你發現的物業，明顯係旬盤，現價又好有值博率，才好考慮。

再加上，現時整體租金回報率唔高，從投資角度，投資優質股會較好。

另外，係你將來購買投資物業時，緊記要買一些最少有300呎的單位(能滿足一個家庭需要的大細)。單位太細，其實投資價值會被打折扣。

------------------------------------------------

Q22385：

阿sir 之前8.15開始入3918，分段入，入到開始懷疑人生，而家平均買入價係7.16

每一次佢再跌我又睇一次佢既負債，現金流，財務數據，仲有佢既專營權，有冇咩壞消息，相信係短期，再入。不過而家話全球疫情會反彈，相信又要再跌。

想問下佢跌成咁我有冇miss左啲咩風險？新興市場，較受中國旅客人數影響，比澳門賭股有風險我都了解。

另外，我理解呢類股注碼不能去得太盡，而我入下入下都變成一隻持貨較多既股，但佢大平賣我又真係想再入，我既步署應該點調整好？

多謝阿sir，正當全城人妻都睇緊mirror，我老公就話，你又睇龔成（仲要無樣睇）@@我同佢講睇龔成係唔會導致我地婚姻破裂，相反係為左我地既將來努力😆

今晚進階班見

龔成老師︰

金界控股（3918）其實佢本質，無大變動。正如你所講，佢較大風險係新興市場，故一定不能大注。

雖然佢現價已經係合理區中下，好似好抵。但你過度加注，表面上拉低平均價，實際上係加大左成個組合，投放係高風險項目的資金，咁係唔理想。

如果佢已佔你一定比例(組合5-10%)，但停一停，再平都唔加注住。

現時佢一直跌，最大原因係疫情不明朗，特別係一些發展中國家。因此，你預佢中短期一定會好弱，但長線質素係依然存在，持有係無問題。

------------------------------------------------

Q22386：

龔sir, 你好。上完堂之後買了好多你的書，好有用，令到我更容易明白你的堂課。因為一直以來我好相信你加上你無論上堂及sms都好有心及好誠懇。

所以好想請教一下，你可以給意見我嗎？

現年60，計劃退休年齡想5年後，但唔想完全不工作及0工作收入，如果現在先學定開網店，待退休後的工作及生意，你認為可以嗎？

Facebook 見到有廣告講網店，但教學費大約要hkd8000好耽心能否學以致用，所以想聴下老師意見及有冇推介？

現仍在月供股票中，想加多1只3188，你點呢？

最近見152（有10000股）但跌好多，請問點解既？

見388, 700, 9988 跌中，如想入，請問合理價約幾多？好感恩遇到老師，感謝你的幫忙分析，辛苦晒也謝謝你。

龔成老師︰

我覺得可以，你可以把握退休前的5年，去學習和嘗試網店經營模式，去找出一個最適合你退休後營運的方法。

至於這些創業堂有無用，我就唔係好知。但你記住，「價值」最重要，「價格」是次要。

其實，只要你從你的興趣、強項、認識的事著手。例如你本身對某類產品很有興趣，你會在那裡買？如果你在網上買這產品，這個網站的模式如何？

你最初要有學習的對象，你先尋找一些自己認為不錯的商店，了解一下佢地的商業模式，最始好大型及小型都有，先以小型作學習對象，然後就試下佢地的模式，能否成為你創業的方向。

你最初創業，就係摸石過河，一路做，一路修正，然後再一步步發展。記住，最好唔好做得太雜，要專注在某一範疇，等人容易記得你。

另外，你可以睇一些創業書本，可以到坊間找找「XXX創業」之類的字眼就得，另外可睇有關猶太人生意經之類的書。但你要緊記，創業係唔易，好多事都係摸石過河，慢慢從經驗中修正。

而且，成功與否，最大關鍵位唔係你能力，而係你能否堅持。加油!

至於投資方面，近期大市氣氛較弱，故不股票都有明顯回落。但我地唔好用股價，去判斷一隻股票有無持有價值，我地要睇佢本質。

深圳國際（0152）本質無大變，你照持有收息就可以。

但華夏滬深三百(3188)、阿里(9988)、港交所(0388)、騰訊（0700）都係潛力股，唔係咁適合你年紀，如果係你女兒投資，咁就可以。

現價都在合理區中上至頂位，可分注。除了港交所(0388)較貴，要回多2,3成才好考慮。

------------------------------------------------

Q22387：

阿sir (1810)應該咩位入

老師 你另外個4本我都訂埋。可唔可以講一次我知 13本書個順序要點睇？

我宜家睇緊股票勝經

龔成老師︰

小米(1810)$24合理區頂。

但如果你現時完全無貨，現價入一小注先，都係可以。

你可以先睇我架《80後百萬富翁》、《財務自由行》和《股票勝經》，都適合初學者。

之後，如果你想了解多D有關企業估值，可以睇埋《選股勝經》和《年報勝經》。其餘幾本，你按自己興趣去睇就可以。

------------------------------------------------

Q22388：

龔老師你好我有個問題想請教你一下。有些股票係有股息分配，理論上是否我衹要在分紅之前一天，擁有該股票就有權分到每股的紅利?

如果是的話噉，每一個人衹要係分股息之前買入，賺股息之後賣出就可以賺到股息。

這個概念是否正確?

龔成老師︰

你對派息運作，似乎有點誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在此期間因買/沽貨，出現任何著數。

------------------------------------------------

Q22389：

謝謝老師。另外想請教一下微盟集團2013。我看見它2018 的總負債遠比總資產多？我不太看得懂發生了什麼事。是會計上的計算問題嗎？正常應該破產了吧? 謝謝

請問老師怎看6123圓通？

老師晚安，不好意思想問一下1070 TCL 股價現在是不是已回到合理區？

龔成老師︰

因為佢2019年才上市，在上市集資時獲得大量資金，故2019年資產比2018年明顯為多。由於2018年未上市，以一間開發中公司，總負債較多都係正常。

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。只可以話，這類股小注持有不是不可，但要明白風險因素。

TCL電子（1070）全球最大的電視生產企業之一，其產品銷售遍及全球各主要市場。

集團本質不差的，業務穩定，生意不差，有持續的盈利，不過，過往的增長力就不算強。

負債偏高會係一個扣分的地方，以現時估值來說，可說是處合理區的範圍。

------------------------------------------------

Q22390：

我朋友一直叫我改玩美股代替港股，話港股已冇得買，但本身美股一d概念也沒有
請老師請教

龔成老師：

我地投資，最重要是建立一個優質股組合，中國、美國，都是往後20年最強的兩大經濟體，我地在當中選股，點都唔差。

所以，你可以考慮配合投資，不過，不要認為港股玩完。正如我在2003年，聽到大量分析話香港樓市玩先，人是好表面的，我地要睇長期。

正如我持有的比亞迪（1211），港股，都升左10倍，過往跌到最低時人人話無得玩，但多年後就大升。

------------------------------------------------

Q22391：

龔老師，你好～我今年35歲，女，與父母同住，有62萬做了定期，會2023年到期。而股票是在今年六月才開始投資股票，現在有18萬在股票上，而現金只有10萬。

其實已經有一年多沒有上班了，原因是被診斷出我的腦部有一個先天缺陷，雖然已經經過一年多時間的治療和復健，康復進度理想，但始終影響了我半邊身的活動能力，

無論平衡力、腿部活動、手指活動能力、閱讀、寫字、表達或迅速反應的能力都受到影響。

但好在我是在大公司內工作，他們都具有一定的社會責任，仍然保留職位空缺給我，如無意外我將會在下個月復工。但人工相信將會下降至等同一個剛畢業生，

因為我的工作能力已經不及從前⋯

我估計自己將來的工資會是12K-15k左右，同時，我一直需要每月有1萬元給家裏作供樓用途，因此在這情況下我無法累積新的現金。

所以希望請教一下你，在這情況下：

1）我可以如何更有效地滾存現有的資金？

2）而我現有的投資組合有需要作出調整嗎？

同時，非常期盼你能來澳門開班，讓我能夠學習如何有效地增值財富。我已經買了五本你的書籍，但礙於現在的讀寫障礙，需要很長時間慢慢的閱讀，

期盼疫情過後能夠出席你的課堂。

00388 - 100股 $462.2
00823 - 200股 $75.3
01810 - 800股 $26.55
01928 - 400股 $29.6

02382 - 100股 $234.4
02800 - 2000股 $28.6
02845 - 50股 $154.1
03067 - 400股 $15.365

感謝你的寶貴意見

龔成老師︰

1) 你現時股票，都係有質素和適合你年紀，你照長線持有。但由於你本身健康因素，我建議你現金部份，留來備用會較好。

如果現時生活上未能儲錢，就唔好勉強去增加投資。到你身體狀況轉好，或者財政上較鬆動，才再考慮。永遠我地都係生活和健康行先。

至於你62萬定期，由於佢息口唔會太高，你可以將佢用來投資。至於投資目標，以你年紀計，應該係潛力股和平穏增長股。

但如果你每月收入，都未必能支付你基本開支，而這個情況，你預期係較長線，你可以用這筆錢，去買入一些收息股，目標係5-6%，大約每月都可以幫你創造$2500-3100現金流，去舒緩你每月開支。

潛力股︰比亞迪(1211)、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）

平穏增值股︰指數基金、港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

2) 暫時無需要，當然如果你有需要加強每月現金流，你可以將部份持股，換成收息股，都係無問題，緊記照顧好自已生活，永遠都比投資增值係優先。

至於澳門班，因為現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q22392：

龔成老師：我的港股處於蝕錢階段，想請教你我應該如何做。

以下是我的持股:

9988: 平均價250，持300股
941: 平均價47.8，持1000股
939:平均價6.15，持10000股
883:平均價8.76， 持6000股
700:平均價685.75，持300股

388:平均價544，持100股
11: 平均價152.58，持200股
1038:平均價45.03，持500股

其實我想買英國樓，但D現金係股票度。謝謝你的指教。

另外，我亦有買了108股Tesla( 平均價為666.7），手持大概400,000港元現金

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時持股都有質素(港股和美股)，但有少少亂，不同種類股票都有。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

如果你係年青至中年，0941/0939/0011這類收息股，就不宜持有太多，因為始終增長力較弱。相反，你係近退休之年，你投資上就可以集中係這些收息股上。

另外，中海油(0883)係商品類股票，價格自主力能低，質素只算中等，不宜持有太多。

現時大市只在合理區，未算係好平宜。你現有40萬現金，建議先儲起，等大跌市出現時，才動用。

至於是否買英國樓，你可以睇翻你有無實際需要，若有實際需要，你可以分段沽出部份股票套現。

如果只係為左投資，你就要考慮翻佢回報率是否吸引。以過往港股長線波幅，都大約有8-10%(連股息再投資)。如果你覺得都有這個數，你對相關物業、法規、市場等又有一定認知，你都可以考慮。

------------------------------------------------

Q22393：

龔Sir，你好，我今年50歳，有自往物業，現金一千萬，請問現在買樓收租好嗎？樓咁貴，仍有升值潛力嗎？謝謝你

龔成老師︰

從投資角度計，現時租金回報率不高，投資在股市，值博率會較好。而且，你本身已有一間物業，我建議你先用優質股增值，從增值角度或資產平衡性計，都會較理想。

以你50歲，可以選擇一些「平穩增值股」作投資目標。

以現時大市合理區狀況，你可以用200-300萬，以分注形式，慢慢買入以下優質股。餘下資金，我地就等大跌市，才加大力度入貨。

但由於你資金都較多，長線你都應該再加持物業。但現時先用優質股增值，到將來樓市有明顯回調，或你在期間發現優質又平的旬盤，才再去加注物業市場。

------------------------------------------------

Q22394：

龔老師你好。我今年23歲，是一位大學生，每月大約有4000元港幣的收入請問我可以怎樣投資在30歲前達到100萬的資產？

還想請教老師，母親今年48歲，有45萬元的現金，請問可以怎樣投資？

感謝你！希望得到您的回覆

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時23歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資「平穏增長股」和「潛力股」。你每月5成儲蓄，即是用$2000做月供。其餘先儲起，用一邊月供一邊儲蓄的策略。

餘下的另一半現金，我地就等機會，當大市出現較大回調，就加大力度掃貨，然後作長線投資。

假設投資回報有10%（連股息再投資），你每月投資$4000，30歲時大約會增值至45萬。雖然好似同你目標，有好大落差。但你很年青，收入增長力較高，你可以慢慢加大月供金額，以達至一個可完成你目標的水平。

至於你媽媽，由於佢已經係中年人士，投資要比你保守，只宜集中係平穏增長股身上。

現時大市只是合理區，你現有45萬資金可以先投入10-20萬，用"分注"形式，慢慢買貨。餘下資金，就等大市出現一定程度的下跌，才大力度掃貨，然後長線投資。

------------------------------------------------

Q22395：

龔sir, 你好!想問一下 偉易達 (303) 用市盈率估值法 or 用股息率估值法 比較好?

我用客觀方式用市盈率估值法(用五年數據: 市盈=11.88 至16.42, EPS=$6) 計到合理範圍$72至$99, 我的計法對嗎?

謝謝回覆!

龔成老師︰

其實2個計法，都係可以，你可以互相配合，去得出一個較立體估算。

市盈率你可以拿長少少時間，用10年個計法，去找出市盈率合理範圍。而EPS係正確，大約係HKD6。

但你計算後，你會發現個合理範圍較窄，你記得要加入緩衝區，對相關估值進行調整。

若以股息率計，佢達9%。但由於佢股息較波動，加上企業質素唔算好高，大約算係合理區底部。

根據2種分析，此股現價大約在合理區較底至初步平宜區。如果你目標係收息為主，加基本增長，此股可投資，但不能太過大注。

緊記，我地估值法有好多種。最理想就係用不同估值法，去立體得出一個答案，咁會較為穏當。

------------------------------------------------

Q22396：

老師︰微盟 11.32入左
9666 57.25入左
2400 62.5入左
493 1.7有49000股
巴巴 276 入

應該止蝕定溝貨，謝謝

龔成老師︰

首先你要正確了解翻，加注這個概念。我地決定加注與否，要睇幾個因素。但記住，絕對並不會是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

你現有持股，大多有質素。但金科服務（9666）、微盟(2013)、心動公司(2400)不確定性較大，只宜小注。。

而且，你持大部份都係科技相關行業，有過度集中性風險(個別行業不應佔組合3成以上)，就算再平，都時不宜加注。

國美零售（0493），從過往分析，質素只是一般。

企業連續出現虧損，品牌價值遠不及從前，優勢不強，雖然正加強網上網售網絡。

唯一的賣點是創始人黃光裕回歸，可能帶公司變強，但發展仍有未知數，如果以這刻的業務、發展、現價，整體的投資價值唔算高。

當然黃生可能帶領公司變到好唔同，但這點真的無得計。以理性分析，這刻投資值博率，只是一般。

因此，你以上股票可持有。但考慮到組合平衡性問題，建議你新資金，優先投資在科技類以外股份(而非在現有股票加注)，去令組合更平衡，才是理想做法。

------------------------------------------------

Q22397：

龔老師，想請教一下投資策略，本人現時48歲，沒有物業，存款有100萬，另每月可供$5000。請問我該選什麼股，ETF, REITs 呢？香港或外國都可以，可以教我嗎？多謝

我的計劃是買
$30萬（2800）
$30萬（2638）
$20萬（0066）
$20萬（0002）

每月供
$2500 美國（VTI)
$2500 加拿大 （Riocan)
請指教

龔成老師︰

以你48歲計，都有一定財富增值需要，但進行時就要保守少少。

你現時月供計劃，其實都已經可以。但RIOCAN係專注於單一行業，有少少集中生風險，我建議更改為$3000 VTI和$2000 RIOCAN，咁會較好。

另外，現時大市未算平，每月要留有一定現金，去等大跌市機會出現。

至於直接買入選股，都係可以。但同樣現時港股只在合理區，你可以先用一半資金，分注咁慢慢儲貨。餘下一半，就等大市有明顯調整，才慢慢加大力度入市。

以下是一些都適合你年紀的股票，除了ETF和REITS外，我都比埋一些單一企業的優質股你作參考。

平穏增長股︰VOO、盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

------------------------------------------------

Q22398：

龔Sir你好，我追蹤咗你嘅FB一段時間，好多謝你無私付出。我第一次問問題，希望你可以撥冗回覆：

我$14入咗6000股微盟（2013），我有持貨能力，但考慮到騰訊和阿里合作平台的消息，是否會影響到微盟長遠的賺錢能力，還可以長期持有嗎？謝謝你。

龔成老師︰

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。

至於，騰訊和阿里合作消息，其實好多具體細節，我地都唔清楚，好難咁快判斷成件事，是好是壞。

只能說，此股中短期股價，一定會較波動。如果6000股佔你組合不多，你長線持有就可以。但若佔較大比重，你可以考慮沽出少少，去平衡一下風險。

------------------------------------------------

Q22399：

龔老師你好，你給予大家既意見好中肯，你寫既書都好有啟發性，多謝你分享咁多！

我自己最近有啲野念極都念吾明，所以想向你請教下啲睇法。6988樂享互動，營銷SaaS服務的定位，我覺得前景吾錯，公司有錢賺，但股價就未有反映出嚟！

我3.1入，現價2.6，我想知我係咪應該繼續持有？

麻煩老師解答，感謝老師！

龔成老師︰

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長，但佢估值一直都唔平，你買入價都算係偏貴水平。

就算現時回落，都係合理翻D，未算平。此股你預佢中短期，都係較波動。如果你持貨不算多，可以守住先，再觀察。

------------------------------------------------

Q22400：

Hi 老師，-我想問家人有20萬現金 在股票市場應該如何分配？

-現時有：

$2.4買入1萬股中國銀行，$13.5 買入3000股中國人壽 需繼續持有定沽出？

-佢地半退休狀態，希望將儲咁耐的現金流，變更多金錢。為未來退休做准備，謝謝你

龔成老師︰

若你家人已進入半退休狀態，穏定現金流去支援生活開支，會比財富增力為主要，所以配置上，會較以收息股為主。

中行(3988)係唔錯收息，可持有。中國人壽(2628)有增長力，但質素只係算中等，近年賺錢能明顯弱左，不宜持有咁多。

未來組合，建議一半用指數基金，可以為組合帶來股息之餘，都有平穏增長力。

另一半，就係收息股。目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

現時大市只係合理水平，現金佔比重大約3-5成，你可以再投入多少少資金，去分注入市。餘下資金，就等大跌市出現，才加大力度掃貨。

但留意一點，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22301-Q22320）

Q22301：

Hello 龔 Sir, 幾個月前開始接觸你，另外，我先生買咗幾本你嘅書，我睇咗你其中一本書，其實我二十多年對投資都有少少心得，只係較少接觸新經濟股….

Anyway, 依排個市跌，股票跌了 10%，咁多年股市上上落落我都無乜所謂….

其實我想講返重點，因為做全職媽咪，我十幾年無返工，但我睇了你嘅書後，決定跳出 comfort zone, 揾咗一份我很愛的 part-time, 返咗幾個月，

我真係覺得好有意義又表現幾好….但係，我今日竟然唔知醒，今日公司叫咗第二個人頂上一日，我真係喊足成日….衝動下買了 #700 發洩…

今日的故事講完，想同你分享，希望下星期我繼續有工返

龔成老師︰

如果你有上過我股票班，就會明白，我地的同學好小心投資的。課堂會派一份6頁紙的「企業評估表」，我會逼佢地填好6頁紙，先可以進行投資，所以佢地的投資都好穩健。

人生路上，我地難免會遇到一些令人氣餒的意外。最重要，係我地有無方法，令自己收拾好心情，重新上路。

發洩，其實係無問題，因為係一個情緒抒發，可以幫自己調整好心情。

每個人抒發的方法都不同，有人會做運動、有人會去唱K狂叫、有人會去沙灘對住個海沉思...。只要唔好傷害到自己和其他人，咁就無問題。

當你情緒，開始可以慢慢回復平靜，我地就要客觀分析，點去解決當前問題。(記住情緒未控制好，唔好做重大決定。)

其實遲到，我相信好多打工仔都試過，除非你本身係遲到常客，或者本身比人印象係唔盡責。否則一次半次，你誠心道歉，相信問題不大。

由於你缺席，公司要找人頂一日，都係正常，因為人地都要運作。

希望你可以明白，人生總會遇上不如意的事，重點係你面對的態度，而唔係件事本身。

其實，我好欣賞你走出comfort zone的勇氣。特別你係一個無做野1X年的全職媽媽，就更加難得，你要加油!!!

另外，你好衝動咁買左架騰訊（0700），現價算合理區中部。雖然近期中央政策，對相關大型企業，有不利影響。

但騰訊（0700）係有質素和規模的公司，相信會慢慢適應如何在這些新法規下營運，因此長線投資價值依然存在。

不過，你預佢中短期一定會較波動，但長線持有的話，就無問題。

------------------------------------------------

Q22302：

1) 龔sir你好，最近我學習了SOTP估值方法，我用此方法評估了最近金山軟件的估值，你可以給我一點意見嗎？

金山內在價值：
網遊+辦公軟件=70億人民幣
金山雲= 108億人民幣
淨現金= 140億人民幣
獵豹移動= 10人民幣
但參考aastock 496.93憶市值
我計漏咗啲咩？

網遊和辦公軟件以33%增長，金山雲以一倍增長。獵豹移動大約股價$2美金，大概18億人民幣，現金就參考披露易最近的2020年全年業績

如果計算之後就變成價值$28.46一股，這樣就高了30%

2) 另外，信達生物最近研發出pemigatinib藥物針對治療癌症,並已經在台灣日本美國批准使用,並對信達生物業績增長一倍以上,如果股價跟隨大市回落至$60，即是到250天線附近。有見及此，值得買入嗎？

不好意思一次過問你這麼多問題

有機會出現MACD背馳嗎？恕我班門弄斧

1801信達生物(六個月圖)

龔成老師︰

1) 雖然有參考價值，但你都要明白背後原理，由於唔知你具體每一部分怎樣計算，有可能你這個估值方法，只簡單將企業子公司市值加起(持股部份)，再計入集團本身資產和負債，去做出一個市值作估算。

現時財經網站提供的市值，純粹係現價，再乘以發行股數。

而你這個方法，係要對不同分部，因應其特性和發展階段，用相應估值方法，去作出評估，所以唔一樣係正常。

其實，市值計算本身係好主觀，特別係一些估值方法，如果你唔係非常有經驗，只要數字有些微偏差，個結果可以差好遠。不同估值方法，會適合不同性質企業，唔可以亂用。

而且附屬公司、聯/合營公司計算比較複雜，如果直接閱讀財經網數據，係會有偏差。

所以係估值前，我地要按實際情況，對數字作出相應調整。這部份較難，我都係在自己的進階班，才會教授同學。

因此，我唔建議你單用市值，作為分析基礎。你可以用佢參考，但最重要都係了解企業本質，佢做什麼業務、行業發展狀況、財務數據、競爭情況等，去做核心會較穏當。

金山軟件（3888）主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區，唔建議大注投資。這股前景正面的。

2) 你要記住，我地投資股票，就等同投資一間企業。你最重要係知道佢本質、行業等基本因素。

過去股價未必能反映其未來情況，因此唔好再睇圖的趨勢，這是好錯的投資方法！巴菲特已經講到明，技術分析沒有作用的。我地只會分析企業的質素，以及企業的價值。

我20年前，都會用移動平均線、RSI、圖表等分析方法，但當我輸完又輸時，我決定放棄這些技術分析，從此我就不斷贏錢。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台。

睇翻佢資料，佢亦係腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

你所講的，是一個利好因素。

但由於仍處於燒銀紙的狀態，所以有危有機，潛力度是有的，但估值好難，現時市值都唔細，只能完全「估」佢將來的價值，不確定性好大。

只可以話，這刻投資值博率中等，你投資係可以，但唔建議大注。

------------------------------------------------

Q22303：

Hello 龔成你好，想請教下你關於現況應該點樣投資

我地二個人(30歲頭), 每月固定收入66000(已扣MPF)，係外地有個物業價值600萬左右係按揭每月交17000左右

現在手頭上有大約150萬現金，30萬股票，20萬黃金 (結婚收到的)

現在需要搬屋, 正係度煩惱緊買定租好 (如果租大約13000-15000左右)，銀行就話我地可以最盡係香港置業借到6百萬 (有說明外地物業同按揭情況)

不過我地就怕太risky/未係合宜嘅時間(定係等多1-2年再升人工先), 不過又好似好浪費現金,定係可以做一點其他投資? (唔係買物業)

希望你可以指點下我地. 不過如果你Post出黎我驚比人估到係我地, 好多朋友都有follow 你

萬分感謝!

龔成老師︰

香港物業，我唔知中短期會點走，但長線我預期都會維持上升。如果你2人係計劃，長線都會留係香港生活，我建議你要為自住屋，做定準備。

現時樓市雖然唔算平，但若果有配合到你長線生活所需，價格合理，足以你們長線"供得起"的物業，其實已經可以出手。

若果你都係想穏陣D，等人工高D先再算。現時資金，可以先投資在優質股，去進行增值。

你們可以選擇一些「平穩增值股」+「潛力股」作投資目標。若每月有一定儲蓄，建議進行月供股票，去提升增值能力。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那150萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

而黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多(<3%)，而且持有的應該為實金。

當然，如果這些黃金若有紀念價值，你係可以自行衡量是否保留，不必跟足<3%的標準。

------------------------------------------------

Q22304：

Hello 龔成老師，上次聽左你意見開始抽部分資金去月供2318，現在組合配置更佳。另外有幾隻股票想問下你意見。

1. 3309
2. 1368
想了解你對呢2隻股票睇法

3. 1830
由2.x 見你講必瘦站但一直無入貨，見而加升到差不多10蚊
想問下合理區同便宜區位置係邊呢

謝謝你！

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

特步國際（1368）不差的，生意與盈利都有增長，本身都算有品牌，不過盈利就較為波動，部分年份盈利出現下跌。但長遠仍是正面。

個別年份有生意上升但盈利下跌，反映成本增加，同時未能轉嫁消費者，又或者佢要用減價策略才能吸客，反映賺錢能力未必好強，質素有，但不能定義為最高之列。

整體都有長線投資價值，現價偏貴。等佢最少回2,3成，才好開始小注。

完美醫療（1830）長遠有發展，本身有一定的質素。而價唔平，$6/7算係合理區頂部。若你到平宜區，需要出現好大幅回調，才可以。

------------------------------------------------

Q22305：

講完投資，保險個part都想請教下老師

以3X歲女士有家庭，1個3歲小朋友為例，其實要投保（危疾）既保額大概係幾多先叫合理？（另有買醫療）

每個經紀講既都唔同，都唔知幾多先叫足夠

龔成老師︰

危疾，佢賠償係已一個指定金額計算，同醫療保不同。這筆賠償，無指定用途。

因此，危疾除了可用作抵銷部份醫療開支外(超出醫療保保障部份)，最重要係填補你因長期不能工作，所失去的收入。

由於危疾係一些大病，一般治療至休養，可能講緊係2-3年。所以，你可以用你2年年薪，作為基礎標準。

再按你現時和預期將來家庭開支狀況、保單條款等，再進行調整，咁就可以。

------------------------------------------------

Q22306：

龔sir你好，我現在持有 主要是收息股。正為退休作準備，還有少量其它股 等合適時機沽出換馬

現在有點舉棋不定，因為以下4隻收息股都是我比較喜歡的 但只能4選2:

1098 路勁
3383 雅居樂集團
604 深圳控股
1883 中信國際

有勞龔sir幫幫眼 打擾了 謝謝！

龔成老師︰

中信國際電訊（1883）業務穩定，整體質素算是不差，作為收息股係可以。

深圳控股(0604)和雅居樂集團(3383)都適合做收息股，但佢地負債較高，風險會高少少。

而路勁(1098)都有質素，但派息較受盈利所影響，作為收息股，就未必咁合適。

這些股票，現價都在理想，已經可以分注入貨，並長線持有。

------------------------------------------------

Q22307：

想请问Geely Auto 您又怎么看呢？

Xiaomi 现在的价钱算贵吗？


龔成老師︰

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂，至略貴。你預佢股價會波動，有貨可長線。如果現價入貨，小注都可以。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價略貴，回多1,2成，才開始小注會較好。

------------------------------------------------

Q22308：

龔成你好呀, 我一直有睇你既page同專欄, 好讚成你所講, 股票係應該要睇長遠, 加上近期短炒蝕過錢, 更加同意你的觀點。

因為都踏入中年, 加上疫情期間工作大受影響, 所以都好希望可以盡快學識投資,

近期自己心目中都mark定左兩隻, 希望可以請教一下你的意見 (唔知可唔可以咁樣PM你問, 如果唔得都唔緊要的。)

唔知可否請教以下幾隻股, 可長揸嗎?

- 中遠海控 (見佢升咁多一直冇買, 但前景幾好咁)
- 國泰航空 (一直在7蚊左右持有左好耐, 希望等到疫情完後)
- 醫思健康 (有新世界入股, 加上是醫美行業, 自己比較熟悉, 覺得前景不俗, 但之前又係升左好多, 一直未敢入)

多謝指教

龔成老師︰

我想你先明白一些投資概念，我地做財富增值，就係尋找優質企業，用一個合理，甚至平宜的價錢，去買入，並長線持有。讓其自然增值，以達至財富增值目的。

成件事，重點係「優質」之餘，買入價格都要係「合理」。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

這股係有投資價值，但現價略貴，未係投資時機，要等佢回2、3成會合理翻d，我地才可以考慮。

而國泰（0293），坦白講質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

若你持貨較多，建議等疫情過去，經濟好轉時，佢反彈就減持部份，去平衡風險。如果只係小注，你照長線持有都可以。

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂至略貴。如果你資金較為充裕，現階段先入一小注，係可以。

否則等佢回多1成才入貨，值博率會較高。

------------------------------------------------

Q22309：

你好, 龔成老師。最近開始睇左你d 文章, 想試下投資股票, 本人沒有投資經驗, 最多只買過ibond, 我對小米, 騰訊, 港鐵, 領展等都有興趣, 但最近個價位好似唔係好夠平, 唔知入唔入市好,

除左上述股票外, 有沒有些係最近較平同值得入手的? 還是等待時機入手上述股票好呢?

本人33歲, 有價值港元$55萬的英鎊, 港元$20萬在銀行高息戶口(2.5 厘息), 如果投資股票的話, 我應該動用英鎊還是高息戶口中嘅港元呢?

動用英鎊的話, 現在係好價位嗎?(其實我一直都想等好價位時把英鎊轉返港元再放入高息戶口) 謝謝!

龔成老師︰

任何貨幣都可以無限發行，因此長遠只會貶值，唔係有一個財富增值的好方法。若你的英鎊無實際用途，建議你將英鎊換回港紙去投資。

如果你擔心匯價問題，你可以分注咁，慢慢換翻做港元就可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」作組合，去創造一個增值平台。除了用你現有資金，我都建議你用每月空出來的儲蓄，去做月供股票，去加大你財富增值速度。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市現處於合理水平，那75萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

現價計，平穏增長股都在合理區，可開始分注入市。

而潛力股，暫只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22310：

龔sir, 好感恩幾年前有緣睇到你專頁，一向有買股票，都是輸多贏少，直至睇你分享先開始改變投資概念，1177,1211,285,到1810我都獲利不少，已賣出部份，

再加部份儲蓄，買到一個小單位收租，雖然不算很好的物業，但是真的好開心，剛看到你分享別人的喜悅，我也要向你説多謝，感恩你無私分享

龔成老師︰

唔洗客氣，我都係希望透過這個平台，去分享一些正確投資觀念。

希望可以幫到投資者(特別係一些初階投資者)，知道一些較重要概念，從而令佢地更大機會，找住正確方向。

雖然，你現時已有一定成績。但緊記要保持學習，長線投資才會做得好。

而且，你所講的股票，都係有質素。如果你係較保守投資者，而獲利又較多，可以"升一倍，沽一半"。

但緊記大部份貨，應該保持持有。因為長線持有優質股，增值效果才會係最好。加油!

------------------------------------------------

Q22311：

你好呀, 我脫你有介紹ETF #2800 隻股, 我想問咩價位入好呀? 我本身流動資金唔多, 又還緊債, 但我又希望可以增加資金, 想睇下買邊一隻好?

本身知道ETF 股都係收息多, 好似比較啱我咁

龔成老師︰

首先，盈富(2800)是包括58間質素不錯上市公司股票的組合，這些股票有升有跌，但長期計，都有不錯的回報。

買入盈富主要有兩個回報(分別是股價升幅，加上股息回報)，股息不多，大約只有3%，而股價升幅，其實有升有跌，每年都會波動，但長期平均計，都有5%-10%，當然，這是不一定的。

現價計，算係合理區，已經可以分注入貨。佢係平穏增長股，有一定增長力，但股息唔算多。

若你目標係收息，可以選擇X恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

至於投資邊個，你就睇翻你自己投資目標。一般情況，如果你係年青至中年，我會建議你投資盈富(2800)，因為你應先做好財富增值部份。

若你年紀較大，接近退休之年，穏定現金流去支援生活，才是你投資重點，故X恒生高股息率（3110）會較合適。

你可以因應自己人生階段，去進行配置。

另外，你要審視翻自己現有貸款，若息口較高，我優先清還貸款，以免影響長線回報。

------------------------------------------------

Q22312：

想請教1302 6988 及 9666。

龔成老師︰

先健科技（1302）為心血管及周邊血管疾病及紊亂所用先進微創介入醫療器械的研發、製造及營銷商，主要提供先天性心臟缺損封堵器（包括ＨｅａｒｔＲ、Ｃｅｒａ及ＣｅｒａＦｌｅｘ等三代系列）。

雖然近年生意都有增長，都有潛力，但始終規模細，不確定性較高，業務可能有潛力，但現時的市盈率處高水平，值博率較一般。

現價偏貴，要有好大幅回調，才好開始小注入貨。而且此股盈利都好波動，只宜小注投資。

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長。但就唔平，小注持有可以。

金科智慧（9666）有質素。

佢係中國西南第一的綜合智慧物業服務商，如果按佢綜合實力計，集團自2016年至2020年連續五年被中指研究院評為中國物業服務百強企業十強之一，自2015年至2020年，連續六年西南地區排名第一。

收益主要來源於四條業務線：物業管理服務；非業主增值服務；社區增值服務；及智慧科技服務。

包括各類住宅及非住宅物業，包括但不限於中高端住宅、商業樓宇、產業園、政府公建、高校醫院等其他物業。

生意與盈利都增長理想，暫時睇佢都有投資價值，但負債高會係一個扣分地方。此股投資係可以，只要唔好太大注，咁就無問題。相信長遠有發展的。

------------------------------------------------

Q22313：

老師你好，本人和太太各36歲，上年剛剛買樓尚有430萬貸款供29年，月入大概10萬，每月有4萬流動資金作投資，再加現金90萬，

想在3年後儲夠3百萬買多一層樓收租，本人唔識投資，想問下有咩投資組合可以加快達成目標，謝謝

龔成老師︰

我假設投資上進取少少，令你可以做到有回報有12%（連股息再投資）。你每月投資$40000 + 90萬現金，3年後大約會增值至300萬。

但你要明白，3年只算得上係一個中短期時間。最終實際回報，可能會較為波動，風險會較高。

從資產配置角度，你現時已經有一個物業，如果你咁短時間，又在增持有一個新物業。

除左成個組合會好偏重物業之餘，太短期內買2個物業，都會受較高價格波動性風險。(一般2個物業，買入時間最好相隔一個週期，大約8年左右。)

我建議你按部就班，透過月供和買入優質股，去為自已資產作增值。到你累積到一定金額，足夠你買入第二個物業之餘，都可以留下若干優質股增值才出手，會較理想。

財富增值方面，以你36歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

若你投資知識不高，可先較集中在平穩增長類股，至於潛力股，只宜小小注。到你提高投資知識後，才慢慢增加翻潛力股比例。

大市現處於合理水平，那90萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22314：

1) 我又如何得知此公司的每股盈利有冇加上物業重估呢？

2) 我想計比亞迪電子的合理股值，唔知我計得啱唔啱？

比亞迪電子現價$46.35

市盈率 水牛網沒有提供2021年市盈率所以我用9年
2020年 7.483 2016年 7.871
2012年 9.333 2013年 10.04
2018年 10.24 2014年 12.02
2017年 12.50 2019年 14.13
2015年 16.46

市盈率合理區域是 9.333 ～ 12.5

每股盈利 資料來自Aastocks
2016年 0.6112 2017年 1.3787
2018年 1.1044 2019年 0.7935
2020年 2.8725

5年平均值係1.35206，估計公司盈利還會持續增長，所以保守估計每年增長10%

1.35206 x 1.1 = 1.487266

股值合理區域是13.88 ～ 18.59

不知有沒有計錯，因為現價才$46.35相差太大。

3) 我最近留意緊國藥控股（1099）和中智藥業（3737）。我用阿sir你初階班比的企業評級表頭兩頁查過這兩間公司，機本上兩間公司都過關雖然唔係全部100分。

我睇兩間公司的官網都寫得自己點樣勁，但兩間公司的市盈率都低過10倍。流動資產-流動負債係正數。

初步睇價錢也在合理區之下。

想知道為何這兩間公司的市盈率會咁低？值唔值得投資？

謝謝！

龔成老師︰

1) 你可以睇年報中的損益表，就會知道佢有無物業重估成份。

2) 你現時這個計法，概念上係無錯。但做好初步估值之後，我地要再考量，到底這個估值，係唔係足以反映企業現時價值。

比亞迪電子(0285)近年賺錢能力有所提升，我地用過去5年平均數字，就可以能出現過於保守的情況。

因此，我地會以佢最新一年每股盈利作為指標，即係用HKD2.8725。

由於集團始終係代工企業(雖然有一定技術)，市盈率唔會太進取，我地會用佢過去10年中間4年數字，大約為10-12倍。

之後，再加多10%緩衝區。合理價大約為︰HKD26-38。

3) 其實就算係相同行業，只要業務性質、潛力、風險等不同，個市盈率都可以差好遠。

國藥控股（1099） 質素都可以，但增長力已經不算好強。

睇翻佢資料，佢係中國最大及具實力的醫藥分銷和零售企業，集團在中國主要城市以直接經營和特許經營方式管理零售連鎖藥店網絡，向終端消費者銷售藥品及大健康產品。

此股有質素，但賺錢能力唔算高，而增長力唔算太強，是平穏增長型。佢有個比較大問題就係負債比較高，而度會扣左D分，整體而言此股有質素，可投資，現價合理的。

由於佢已經係平穏增長型企業，增值潛力不及中生(1177)這類潛力股高，故市場給予市盈率，都會較低。

而中智藥業（3737）則相反，由於企業規模和品牌不大。雖然佢近年盈利增長係唔錯，但市場會較擔心，佢這個優勢，能否長線維持。

因此，會給予中智藥業一個較保守的市盈率，以反映當中的潛在風險和不確定性。

此股現價合理，但由於存在一定確定性，故只宜小注。

------------------------------------------------

Q22315：

我個人睇法認為。新世界，長期一定會好番，因為佢再俾人爆大鑊就可以執笠，但問題係驚短期甚至中期都有機會發現更多問題，始終起樓唔係一時三刻，

而今次事件反映QC部門同埋管理層有啲得過且過，其他項目都有一定機會有類似問題，只係未俾人爆或者佢地禁住咗，令中期不確定性同埋風險增加

另外留意到美國嘅經濟數據，FRB話經濟雖然開始復甦，但基層勞工市場仍然麻麻地，而高通漲相信係暫時性，仍未係時候改變貨幣政策。

咁樣會唔會令成個市場失衡，為市場復甦帶黎壓力？

龔成老師︰

中短期，新世界(0017)股價難免會弱。

但我地睇翻佢過去咁多年，其實都無出現過重大問題。所以，我會偏向覺得，個營運和監工上風險，未到話十分高的狀況。

長線投資價值，依然存在，但你預佢短期會較波動。

疫情雖然未算清零，但大部份已發展國家，已經開始穏定。相信經濟會慢慢向好，但這個唔會係一時三刻就出現，可能要幾年時間。

而中短期，依然會有好多不確定因素。例如不少發展中國家疫情未受控，對不少消費市場，或者不少企業的產業鏈，都造成不同程度的影響。

但相信這都是中短期，我都分析最好都係集中翻，係企業本質。外圍經濟因素，各國貨幣政策，係有參考價值，但佔比重不應太多，重點都係放係企業本身較好。

------------------------------------------------

Q22316：

Sir,水桶2 有咩好選擇啊？日清和雅生活算嗎？還有甚麼好選擇的？我今年34歲每月可儲2萬，現在儲一萬現金和一萬每月買d 股票的

暫時如下：

1. 科指 ETF 3032 15000股 $8.37
2. 小米 1810 1000股 $27.48
3. 阿里 9988 300股 $235
4. 京東 9618 100股 $309.5
5. 平安好醫生 1833 100股 $87.8

6. 日清 1475 3000股 $6.87
7. 京東物流 2618 100股 $40.36
8. 雅生活 3319 250股 $36.7
9. 福壽園 1448 2000股 $7.5
10. 鐵塔 788 10000股 $1.545

現金：35萬

龔成老師︰

日清(1475)和雅生活(3319)都係唔錯的水桶2股票，你現有持股，都係適合你。

以你34歲，可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有35萬資金可以再投入多10-15萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22317：

首次置業 按揭多好定係少好？

依家開始有個好習慣就係先儲蓄投資 再消費，一個月儲＄5000 另外$5000攞嚟投資 係3-4年之後有＄100萬 有冇問題？

龔成老師︰

其實多與少，跟你首置無關，我地主要係睇佢現行息率。現時貸款息率低，我地應該盡借，令我地可以空多更多資金，作其他投資增值。

你現時養成這個先儲蓄和投資，之後才消費，係一個非常好的習慣，你保持。

以你2X歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

假設投資回報有10%（連股息再投資），你每月投資$10000，4年後大約會增值至55萬。若你要達至100萬，就需要將金額升至$14000和供5年，才可以做到。

------------------------------------------------

Q22318：

師父1212 利福下至合理價低部5.95 ， 值得加注？

近曰消費股如六福，周生生， 莎莎都上番不少，何解1212返而向下？

啟德項目應該有利佢發展對嗎？

另外完美醫療已升至over $8 , 稍貴， 應否放一半？

3069 ETF 你有什麼意見？

龔成老師︰

我地投資，唔好太在意中短期走勢。我地要睇翻個重點，就企業自己本身狀況。

利福國際（1212）主要從事經營生活時尚百貨店及其他零售業務，以及物業發展及物業投資業務。佢透過崇光在香港專門經營百貨店。

中短期一定弱，但長遠仍會正面，不過回勇就要時間。同埋要留意，佢負債較高，因此唔建議投資太大注，現價合理區中下部至底部。

啟德項目，對佢長線發展係有利。但股價唔會一時三刻反映出來，要需要時間。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

如果本身有貨，就長線持有。若你持貨較多，現價沽少少獲利，都係可以。

華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

------------------------------------------------

Q22319：

龔老師你好，我今日34歲，未婚，冇乜經濟壓力，現時未有結婚及生育打算，月入二萬，月儲大約七千，現時擁有資產大約二十萬，其中八萬現金，十二萬股票。

經過你前三個月的教導，我購入多左水桶二的股票，現在股票組合比例大致平衡，現時持有的股票如下：

水桶1
1177 中生製藥 2000x$7.27 11.7%
3718 北控城市 8000x$0.99 6.4%
3067 安碩恒生 100x$16.06 1.3%
1448 福壽園 2000x$7.46 12.1%
3319 雅生活 250x$32.85 6.6%
2057 中通快遞 50x$230.4 9.3%

水桶2
823 領展 100x$74.55 6.0%
2800盈富 1000x$28.38 22.9%
2388 中銀香港 500x$25.1 10.1%

水桶3
778 置富 2000x$8.34 13.5%

快速增值：平穩發展：收息資產=47:39:13

1）請問現時股票組合比例平衡嗎？我打算長期持有無問題嗎？

2）現在我目標先儲現金，等儲到現金佔50%，才加水桶一股票合適嗎？

3）請問3718北控城市資源質素無問題嗎？現價（$0.96）是合理價還是平？我$1.92同$1.28都入左一手，現價可以再分注入嗎？值博率大嗎？等可以再等下？

還有等$15買3067，或等$80買平安好醫生，或等$23買小米，哪個值博率大些？謝謝指導！

龔成老師︰

1) 現時配置係可以，你長線持有，係無問題。但留意中通快遞(2057)始終唔係上市太耐，要再過一些時間，才可以見真章，所以暫時唔好再加注。

2) 現時大市在合理區，現金應佔3-5成左右。目的係等大跌市出現時，我地可以有資金入市買平貨。

而目標唔係集中係水桶1，因為水桶1雖然增長潛力大，但風險都高。建議你視乎當時平貴，再去慢慢平均分配在水桶1和2，咁會較穏當。

3) 北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中下部。現價加小小注，都可以。

至於平安好醫生（1833），無貨現價小注都可以，但由於佢不確定性都高，要控制注碼。

而安碩恒生(3067)和小米(1810)都有質素，但前者係一籃子科技股，較有分散風險能力。

3067現價中合理區上部，而小米就要回多1,2成，就算合理區頂，才可開始分注入市。以現價計，安碩恒生(3067)值博率會係3隻當中較高。

------------------------------------------------

Q22320：

龔成老師，我44，現在有以下股票，共35萬，另有15萬現金，月入2萬+佣金。

170萬按揭，供25年，每月供樓$7700，因為依家巳44歲，好希望可以10年內供完，請問我應該點做可以達到這個目標?

煤氣 18手
港鐵 3手，正在月供1000
中國鐵塔 5手

領展 1手，正在月供1000
盈富 2手，正在月供1000
阿里巴巴，上月開始月供1000

我有諗過每年年尾將花紅約2萬還按揭去減年期，希望可以加快完成供款，做法正確嗎？

龔成老師︰

以你44歲年紀，你持股和月供組合，都係合適的。你現時可以用這些增長股，去累積財富。

由於現時按息不高，我較建議資金先用作增值，而唔係去還款。這樣做，成個財富增值效率，才會較高。

現時大市只在合理區，每月儲蓄唔好盡用。最好留有部份，連同現時的15萬現金，一齊等大跌市出現時，可以用來掃貨。

我假設投資回報有10%（連股息再投資），你每月投資$4000 + 50萬資產(股票和現金)，10年後大約會增值至200萬。

到時你可以因應情況，再決定先還款(若到時息率好高，係可以先還)，還是保持增值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

社運後4連賺: 第1645-8成交(堅): 感覺4-6分，屯門良德街9號盈豐商場

(1645) 感覺5分。地下A52號舖，嗒真D小食店，建築面積400呎，商場入口位，向街，實用面積237呎，成交918萬，1997年6月上手以250萬買入。 1993年11月以143萬第一手從南豐發展商買入。市值租金約2.5萬，回報3.3厘。

(1646) 感覺4分，1樓B70B舖， 吉舖， 建築面積370呎，實用面積209呎，成交380萬， 原業主以256.8萬於2012年11月買入。1993年11月以57.9萬第一手從南豐發展商買入

(1647) 感覺6分，1樓B18舖， 晴朗教室，建築面積671呎，實用面積363呎，成交703萬， 原業主以120萬於2009年9月買入。1993年11月以84.6萬第一手從南豐發展商買入

(1648) 感覺4分，1樓B77舖， 明升教育中心，建築面積584呎，實用面積316呎，成交505萬， 原業主以64.8萬於1993年11月第一手買入。

位置於屯門北，近輕鐵田景站及港鐵兆康站，樓上盈豐園平均呎價實用是約每呎12000。 每單位約五百萬。 盈豐園是南豐集團發展 ，1993年落成，合共兩座數，38層，單位合共六百伙。 附近屋苑有寶怡花園、海麗花園、建生邨、兆隆苑、兆邦苑、新圍苑。

整體上這個屋苑業主都賺錢， 發展商於1993年拆售， 當時大部分是幾十萬起。 地下向街則百多萬起。 和這裏的租戶傾過計，生意一般， 非常穩定，沒有大上大落。 補習社反而學生較穩定， 附近新樓落成交，較有前景。

#屯門舖，#盈豐商場舖

Note: 如果對影片任何內容有意見，請通知我。我會盡量配合修改。我無心得罪任何人，請多多見諒。

商舖業主/經紀放舖熱線 (直接聯絡我): WhatsApp +852 9036 1143

康業信貸快遞，業主按舖/按樓熱線2110 2110 (My family business，聯絡 Bonita Tsui，話李根興介紹)

盛滙投資商舖基金/買舖/租舖/放舖熱線: 2830 1111 或 whatsapp +852 90361143

盛滙商舖基金 Bridgeway 網頁 www.bwfund.com

李根興創業之友 https://www.facebook.com/EdwinNetwork/

李根興商舖之友 https://www.facebook.com/edwinprimeshop/

李根興 youtube 商舖創業及投資分享https://www.youtube.com/channel/UCEN66AnLghXESgCDIsz-3Nw

購買李根興的三本書:
(1) 「買舖 要買得 PRO」書 ($198)
(2) 「買起金磚頭 - 商舖投資煉金術」($128)
(3) 「買起金蛋鵝 - 生意營商之道」($128)
可透過以下渠道:
(1) PayMe at 9745 3555
或
(2) 永隆銀行戶口
020-644-0000-3123
(Bridgeway Development Company Limited)

付款後，請留你的地址給我們，我們會馬上郵寄給你。或你可到我們盛滙辦公室領取。中環皇后大道中16-18號新世界大廈一期1502至3室。電話 2830 1111。我會親筆簽名給你。多謝!

《香港十大商舖成交紀錄》香港的十大商舖紀錄有那十個?

(10) 舖最貴呎價成交? 
(9) 舖最平呎價成交? 
(8) 舖最貴每月呎租?
(7) 舖最貴每月單一租值?
(6) 舖加租最多?
(5) 舖減租最多?
(4) 舖單一成交最大金額?
(3) 舖單一蝕本最大金額?
(2) 舖升幅最多倍數?
(1) 舖跌幅最多百份比? 

答案在影片裏。
..........

「行街睇舖團」人數：每次限最多十位
報名/查詢:
聯絡: Suki / Monica
電話: 2830 1111
Whatsapp: 9218 5223
Email: cs@bwfund.com
只適合持有港幣八百資產以上想買舖人士參與。
..........

影片內容: 

舖每呎高達137萬，低至1429蚊，貴至每月1378萬，每呎要成8667蚊，租金升213%，但跌就百分之76，最大單11.5億，但蝕就4.6億，升可以7600倍，但跌就百分之92.5。舖真係可以天堂可以地獄。


你一輪咀係道噏緊乜嘢呀？


我係道噏緊十個商舖天堂與地獄嘅成交紀錄。你知唔知邊十個？


買舖 要買得 PRO， 我哋經常搞行街睇舖團，想報名可以打2830 1111，經過梗係要識呢十個舖市紀錄啦！


第10： 論呎價，全港最貴嘅舖就係我後面呢間銅鑼灣波斯富街77至83號波斯富大廈地下N舖，實用面積得嗰126呎，喺2014年資本策略就用1.85億買入，後來因為自由行減少，業主英記茶莊為求成交，願意減價1200萬，最終以1.73億沽出，實用呎價都高達137萬一呎，依然係全港呎價鋪王。


相比起住宅，最貴嘅樓，即使今時今曰，山頂既Mount Nicholson 係今年3月，每呎都最多只係賣過152000蚊，相比下，舖王就貴多樓王8倍。 所以舖王唔單止係舖王，應該係叫做物業之王，論呎價，應該無任何物業貴過佢嘅137萬一呎。 即使有, 我估都只係骨灰龕位，咁細個啦。


記住，舖價可以高達137萬一呎。


第9：講完最貴呎價，咁最平呢？ 唉，畀張紙巾我先。而家舖市基本上係大幅落後大市，差 過住宅、差過工廈、差過商廈、差過車位、連骨灰龕位都差過。 啱啱講嗰啲，全部依家日日創新高。 但舖市呢，所有新高都係講緊11 、12、 13、 14年，但所有嘅新低都係呢兩三年發生。 我做舖嘅，都真係一殼眼淚，不過近排好返好多啦。論最平呎價？ 唔好講N年前嗰啲，因為比較唔到，近年嘅話可說係我後面呢個佐敦廣場。


前身係百爵酒樓，面積近兩萬呎涉及四層樓面，係1992年嘅時候就劏咗成為160間鋪，當時嘅呎價就已經兩三萬蚊呎。 可惜好多買家收舖之後先發個實用率超低，得嗰三四成， 向賣方追討後賣方仲清盤埋間公司，管理公司都執埋，由於欠缺管理，舖價瀑跌。 喺呢度3樓9號舖，建築面積約70平方呎，係2016年4月嘅時候就沽出咗只係十萬蚊，呎價只係得1429蚊， 原業主喺九二年以70萬買入，揸咗廿四年，蝕咗八成六。


相比下，同一時期，即使最隔涉， 被譽為有可能係最平私人屋苑嘅大嶼山澄碧邨， 係2016年5月就賣咗170萬，以建築面積615呎計，呎價都要成2764蚊， 最隔涉嘅住宅比起咁中心位置嘅佐敦廣場間舖，同期住宅呎價都高出近一倍。


藝人薛家燕當年都係呢道用左254萬買左兩間，揸咗18年，係2010年就以27萬6000蚊賣買返畀財團，蝕咗近9成。 到依家你睇下，依然都係咁吉。


記住， 近年舖最平都只係1429蚊一呎。


第8。 講完買賣成交，而家就講下租務。全港最貴呎租嘅舖就係喺我後面呢間銅鑼灣景隆街同駱克道交界嘅找換店，景隆街2號呢間迷你舖, 建築面積50呎，實用只得嗰30呎，2014年4月續租租金為26萬，實用呎租為$8667。雖然 隨著自由行的縮減，2017年5月續租時，租金下跌咗近一半，至13.8萬蚊， 憑著實用每方呎每月四千六百蚊依然是香港的租值舖王。


記住， 鋪月租呎價可高達8667蚊。


第7： 講完呎租之王，而家就講下成間舖租起，最貴係邊間。就係我後面呢間銅鑼灣渣甸街 5 至 19 號京華中心地庫、地下，以及 1 至 4 樓共 6 層巨舖，總面積51,188 方呎，由 Forever 21 係2011年承租, 成為全港有史以來 最貴嘅單一舖租、月租高達 1,378 萬元。 可惜Forever 21 品牌喺2017年撤出，依家由Victoria Secret只係用一半價值，七百萬就租到。


相比起住宅單位， 摷番資料2012年5月份嘅時候，西半山天匯頂層複式單位，就用咗天價月租125萬租出， 以實用面積5732平方呎計，呎租都只係218蚊。 相比起最貴嘅舖王，舖王貴樓王呎租足足40倍。成間嘅租值都相差成十倍。 所以做得舖王，可說說是所有物業之王。


記住，最貴嘅鋪月租係1378萬。


第6: 講起加租最多， 可以數返去2011年自由行好景嘅時候，銅鑼灣羅素街58號，即係同波斯富街大單邊呢個位， 建築面積地下700呎加一樓1100呎，太子珠寶鐘錶嗰時就以每月250萬續租， 比起舊租80萬，租金急升超過兩倍，即係213%。 嗰陣時嘅業主幾狼，樓？ 邊度有加咁多呀。


記住，舖租一加可以加213%。


第5: 升得急，亦都跌得甘。香港史上減租最多個案，就係我後面呢道。恩平道17至19號地舖，同白沙道嘅大單邊，建築面積1471呎，2013年起以月租170萬租給名錶IWC, IWC 約滿後減租以60萬再租給英國家電品牌Dyson， 可惜由於Dyson冇辦法打通1及2樓於是放棄租用。 於2017年8月再租給藝廊40萬元, 由高峰期足足跌了76%，相信係香港單一減租嘅紀錄。 仲未衰完，即使減租咗，可惜不足半年間藝廊又再執笠，依家最新租左俾Initial， 希望做得住啦。


記住，舖租最多減76%。


第4: 舖市歷來單一舖最大單Deal 呢？ 可以數返去2012年6月， 內地投資者劉軍就用咗11.42億買咗我後面，波斯富街 108 至 120 號寶榮大樓地下 A 、 B 號舖、1 及 2 樓，即泉章居舊址，總樓面約 2.5 萬方呎，係當時及至今最大單單一舖嘅 deal 。嗰陣時，原業主都只係早三年，即係2009年7月以約3.07億元買入姐，三年升近三倍，仲要係交吉賣，劉軍係唔係買貴咗呢？


好多人問我，佢買間舖買得靚唔靚。我話好簡單啫，唔使問咁多，你賣返出去有錢賺嘅，咪買得靚囉。賣出去蝕本嘅，咪買得差囉。喺劉軍呢單case，就買咗嗰差位，因為係蝕大本。


記住，舖最大單單一成交係11.42億。


第3。 香港市場蝕本最多嘅鋪係邊間？ 就係劉軍呢間啦。佢係2012年以11.42億元買入之後，吉咗一年，2013年底終於搵到先施百貨進駐，以月租190萬租出大部份樓面，2016年續租時就減咗兩成至150萬先施續租到依家。當時地下AB號舖則長期租不出，直至2014年底，劉軍劈價五成，以2.1億元出售地下AB號舖予宏安鄧清河，劉軍再係2017年2月以4.68億沽埋先施個位俾冠華鏡業，前後合共套現6.78億，比起2012年買入價11.42億， 未計手續費，係五年間就蝕咗4.64億， 即係蝕本超過4成，相信至今係香港歷史上蝕本最多錢嘅商舖成交。


老實說，買得呢啲位置嘅一般都係好強實力，有頭有面嘅投資者。即使係蝕本都唔會咁樣高調沽貨離場，好樣衰。仲洗見人？ 係都靜雞雞，公司股份轉讓無人知道。不過，如果唔係本地投資者嘅， 冇識咁多朋友，我估就相對冇所謂嘅。 我去非洲買鋪，蝕本咪照沽囉，但如果係香港，蝕大本，好樣衰㗎媽，仲駛出來行！


記住，舖蝕最多係4.64億。


第2: 講完蝕得最甘，不如講下升得最多。我後面呢間係全港有史以來升得最多倍的舖， 地址係波斯富街76號地舖(羅素街及波斯富街交界)。本來是Rado, 現在是 Folli Follie。 原業主於1966年以5萬元買入, 係2011年1月以3.8億沽俾英皇。45年間升值7600倍， 是香港舖界紀錄，應該也是所有物業中的紀錄。建築面積600呎，呎價$63萬，買入時租金為每月64萬，回報2.0%。之後2014年3月加租1.8倍至179萬， 隨著零售業自由行大跌，Rado 於2015年12月撤出，follie follie 進駐，最新租金為90萬，呎租由$2983減至$1500。 舖市升過千倍好平常，但係升7600倍依然係香港紀錄。


樓的話，最多一般升都只係升幾百倍。係我後面呢間，勿地臣街16號一個單位，係2017年1月，因為收購而被發展商用3600萬買入，原業主係70年用$37000買入單位，46年間就升值咗972倍。 翻查有報導過嘅資料，呢單已經係香港樓嘅紀錄。


如果你喺1960年代買入香港第一個大型私人屋苑，即係美孚新邨，第一手揸到而家，揸足50年，都只係升咗大約二三百倍。 所以舖王升值潛力遠遠大過樓王。


記住，舖可以升值7600倍。


第1: 上帝要你滅亡，必先令你瘋狂。升得多，梗係亦都會跌得甘。 買樓一般最多都只係蝕幾成。即時97年最高峰嘅時候買入，03年沙士嘅時候沽出，就蝕七成囉。但買舖就蝕得更甘啦。 你以為我上面講嘅佐敦廣場蝕得甘？ 未算。 我後面呢個尖沙咀金馬倫道首都廣場一樓F148舖，實用80呎，前身係DNA 商場， 喺2013年由劏場大王尹柏權劏出嚟，全場劏舖數目超過700個， 推出首兩年五厘回報保證，吸引咗唔少第一次買舖嘅買家，原業主係2014年用827.2萬第一手買入， 由於欠缺推廣及管理不善，舖價大跌淪為死場，原業主就係2017年5月以70萬沽出， 未計手續費， 帳面蝕咗足足91.5%。


呢個未係香港紀錄，只係排第二。第一應該係位於我後面荃灣近路德圍嘅地皇廣場， 前身為登發大廈嘅商場，本來係幾間大型食肆同補習社。 喺2012年又係劏場大王尹柏權劏出二百五十間舖， 又係首兩年五厘回報保證，可惜劏場最終又係淪為死場，係2017年7月地皇廣場內一個2樓嘅238號舖，建築面積 84 方呎，實用面積 42 方呎。原業主用400萬4千元買入，持貨五年以30 萬元沽出，帳面勁蝕 92.5%！ 比首都廣場嗰間蝕多1%，呢個先至係香港舖市蝕本嘅紀錄， 我相信亦都係喺香港所有物業市場蝕本嘅紀錄。


好多人問我蝕咁多點解要賣呢？你要明白，商場舖即使你租唔出，每個月都要畀冷氣同管理費，每間舖平均要比成千幾蚊港幣。 一方面你租唔出的話，你可以每個月繼續俾千幾蚊，或者一次過收30萬斬纜就算數啦。 你可以等，但回望返佐敦廣場，一吉起來就可以至今吉足廿六年，咁你會選擇每個月畀千幾蚊， 唔好彩嘅畀足26年，或者袋三十萬認輸離場呢？ 你自己計計數啦。


好在喺2017年8月份，有個叫李根興嘅攪屎棍聯同一班業主， 一齊唱歌跳舞希望聯合力量招租搞返旺個場 ，而家？已經100%出租曬啦！ 想租鋪？可以打俾 Olive Wong 5640 8020 睇下你仲有無份入場。三十萬一間？ History 啦，依家肯以倍數上返去。


但最後，都要記住鋪可以蝕92.5%。


今日聽多次個南無佬講咗啲乜？


舖每呎高達137萬，低至1429蚊，貴至每月1378萬，每呎要成8667蚊，租金升213%，但跌就百分之76，最大單11.5億，但蝕就4.6億，升可以7600倍，但跌就百分之92.5。舖真係可以天堂可以地獄。


而家聽得明啦掛。你去天堂定地獄？ 睇你本事啦。


李根興博士 Edwin @ 2018年8月
盛滙商舖基金 Bridgeway 創辦人
- 關於「舖」：聯絡我 WhatsApp 90361143 edwinlee@bwfund.com